على هامش صعوبة الزواج بين المصريين

[عادل أبوزيد]

فى محيط الأسرة و الأسر التى أعرفها تقفز على السطح مشكلة زواج البنات أو الأولاد رغم كثرة من هم فى سن الزواج من الجنسين ، و ظهرت أنماط جديدة ممن يحترفون مهمة البحث عن شريك أو شريكة الحياة عن هذه الإشكالية دعونا نتحاور ...

ما سبق كان إستهلالا لابد منه

منذ ما يقرب من ثمان سنوات حكت لى زوجة صديقى عن سيدة مجتمع راقية تحترف - أو ربما تهوى - القيام بدور الخاطبة و قالت لى زوجة صديقى أن المطلوب منها أن تدعوها لتناول الشاى فى بيتها و ترى الفتاة المطلوب البحث عن شريك العمر لها ... ثم تقوم الأم بدس مظروف به ثلاثة آلاف جنيه فى يدها - يد الخاطبة - ..... إلخ و لم توافق زوجة صديقى أو ربما وافقت و شعرت بالحرج من ذلك.

و فى الصحف و المجلات و جريدة الوسيط الكثير من الإعلانات لمكاتب الزواج التى تقول أن تقوم بعملية ال match making بمنتهى الجدية و الحرفية.

و قد تلقينا هنا فى محاورات المصريين طلبات عديدة للمساعدة فى الوصول إلى شريك العمر و إعتذرنا لأنها مهمة صعبة و تحتاج إلى ضوابط و إمكانيات ليس فى مقدورنا التصدى لها.

أعرف فى الريف تكاد لا توجد تلك الإشكالية و أظن أيضا - مجرد ظن - أن الإخوة المسيحيين لا يعانون من هذه المشكلة بنفس القدر الذى يعانيه المسلمين لأن عند المسيجيين يوجد مفهوم "أبناء معمودية واحدة" كما جاء فى فيلم "بحب السيما" و ليصحح لى معلوماتى أحد الأعضاء المسيحيين.

العمل فى الخارج ربما ساهم بكثرة فى تفاقم المشكلة

هل تغالى البنات فى طلباتهن ؟ هل المشكلة من البنات أم الأولاد ؟ أم الأهل؟

[الباشمهندس ياسر]

السلام عليكم

الفاضل عادل ابوزيد

مش عارف اقول لحضرتك ايه و الله

فاتح الموضوع فى وقت مظبوط معايا ايه بالمسطرة الحرف T

من امبارح وانا عمالى اقلب فى ركن الموضوعات الشخصية ع الحوار ده

و من غير ما احلف الموضوع نزل و انا بقلب فى موقع زواج اونلاين :sad:

اه محدش يستغرب ... هيا لسه موصلتش معايا لكده

بس اهو الواحد بيعمل حساب بكره ... احسن توصل معايا لكده فعلا

مش عارف اقول المشكلة فين تحديدا

بس انا فى صولاتى و جولاتى للبحث عن عروس

افتكر انى عديت على اكتر من مشكلة منها المغالاة

منها اختلاف طبيعة الدماغ

منها حتة الندية الزايدة عن الحد..

حتى مش بالمعقول

المهم بغض النظر عن ده كله

تانت اللى بتدفع 3000 عموله للخاطبة

ناوية تدفع كام للعريس..... :sad:

عموما

لنا الله

و الى عودة من اجل مداخلة اخرى ان شاء الله

[بركة]

أقلهن مهرا أكثرهن بركة

هكذا علمنا رسول الله

بس مين يطبق الكلام ده ؟؟؟؟؟؟؟؟

[ترنيم]

والله يا باشمهندس ياسر من الواضح إن حضرتك دائما بتكون العريس الصح فى المكان الغلط

طيب ممشتش ليه بوصية الرسول الكريم صلى الله عليه وسلم "اظفر بذات الدين تربت يداك"

والله لو عملت كده أكيد أكيد ربنا هيسعدك وهييسرلك

طبعا لا مانع أبدا أن تكون جميلة وذات دين وأنا شخصيا أعرف صديقات كتييييييير لى من النوعية دى

ربنا ييسر لك الى فيه الخير

حضرتك بتفكرنى بأخويا

طلع عينينا وعنين الى خلفونا لحد ما اتجوز

بس هقول لك الكلمة الى دائما وأبدا بقولها إن محدش هيتجوز غير مراته ولا واحدة هتتجوز غير زوجها

فى الميعاد والوقت الى ربنا مقرره سبحانه وتعالى

ربناييسر لك الخير ويقرب لك كل ما تتمناه وزيادة سبحانه هو المنعم الكريم

[ترنيم]

ذات الدين يعنى ذات الدين

مفهومة طبعا ..........مش كده

[~Heba~]

باشمهندس ياسر هو انت مش خاطب ؟؟!!!

على كل حال انا دقة قديمة شوية و افضل معارف الاهل و القريبين يعنى لا افضل الزواج م شخص غريب لازم اعرف اهله و اصله و فصله مسبقا

[سهل جدا]

لم أر مثل الجواز التقليدي

وذلك بالاستعانة بالأم أو الأخت أو أي قريبة متزنة في البحث عن شريكة الحياة

لأن النساء مع بعض بيظهروا على حقيقتهن، مش هاينفع يمثلوا على بعض..

وأكثر الزواج نجاحا هو الزواج التقليدي, كما أرى ذلك في محيط أقربائي وأصدقائي

[أبو محمد]

حُذفت مداخلات أخرجت الموضوع عن سياقه

الإدارة

[محمد عيسى]

اخويا بقاله سنتين مش عارف يلاقي عروسة بالرغم ان شروطه هي:

- تدين حقيقي

- مستوى اجتماعي راقي

- رفيعه

بس كده

[محمد افندى]

والله يا اخوانى ان بردة عندى المشكلى دى اصل نويت والنية لله ان وانا فى الاجازة اقوم اية اخطب بس محتار حيرة ما بعدها حيرة

بدور على اية

تدين حقيقى ( عبادات ومعاملات ) يعنى مش بتوع حكى فاضى على رأى اخوانا السعوديين

جميلة ومعلش يا جماعه فى الايام اللى احنا فيها لازم تكون جميلة

اهلها ناس طيبين

ومؤهل عالى

ولفيت البلد من شرقها لغربها ادور على الكنز المفقود مش لاقيه اعمل اية

دلوووووووووووووووووووووووونى يا ولاد الحلال """""""""""""""""""""""""""""ط

[MoHaMMeD EgYpT]

ربنا يسهلها مع جميع الشباب :unsure:

[desert_eagle70]

باشمهندس ياسر متستعجلش ومتيأسش .. واوعى تقع تحت ضغوط بجد من الأهل او الأقارب تأنى وخد وقتك .. هقولك على حاجة أنا نزلت اجازة 55يوم وفضللوا يزنوا على دماغى لحد ما أستسلمت وقلتلهم شوفوا اللى أنتوا عايزينه وريحونى 50 يوم والدنيا كلها بتكلمنى فى حاجة واحدة اللى هى أخطب .. أول مرة أعرف ان الدنيا واقفة على الخطوبة وإن الأجازة معناها أنى انزل اتجوز وأخطب .. المهم انى أستسلمت وخطبت قبل سفرى بيومين .. بعد يوم خطوبتى والله نازل من البيت بحاول استوعب انا عملت ايه لحد ما وصلت بيتنا وسافرت وانتهت اخرة الزن بالفشكلة لأن الجواز مش كده خالص.

أصبر أصبر أصبر .. هتيجى هتيجى وربنا يوفقك.