غرائب و طرائف الهجرة

[Torontotruk]

والله انا بآلي ساعة بحاول اكتب في الكصة :wub: wst:: دى قصدي في القصة دي...احداثها كوميدية .وآعد اضحك..وعلي فكرة هي قصيرةوندمت علي اللي عملته يمكن علشان كنت لسة جديد في تورونتو وكان عندي امل اني الاقي اصدقاء كوميديين بس بطريقة مختلفة. :) ..لاني صراحة زهقان من النوعية دي...كنت وقتها بشتغل مع رجل ايطالي في شركه مباني وكان عنده شركة امن كمان ومراته كانت رومانية بس من منطقة تسمي باكو ـ اونيشت والبلد دي بالمناسبة اللي اتولدت فيها نادية كومانتشي...بطلة العالم في الجيمانيستك وبالمناسبة كانت بطلة مدينة مونتريال في نفس الرياضة لمدة اربع سنوات وهي بالمناسبة كندية ايضا..واهل البلد دي معروف عنهم خفة الدم .المهم بعد المرمطة شويه قابلت مراته بالصدفة...واكلمت معاها بالرومانية طبعا استغربت وسالتني منين اتعلمت اللغة...وحكيتلها الكصة :) من طق طق ....ل la revedere...وصرنا اصدقاء ...وعرضت اني اشتغل معاها في شركة الامن ...في الويك اند فقط..يعني الجمعة بالليل الي الاحد ...طبعا وافقت لانها كانت شغلانه آخر روشنة ...علاوة علي اني حكون مشرف...آخد العيال اللامنجية واوزعهم بالفان علي اماكن عملهم في الديسكوهات و البارات واماكن الانس والفرفشة ههههههههههه. :) ..وعيش وسيبني اعيش...هههههههه. :lol: ..كانت شغلانه فيها البركة وعائدها المادي ممكن اقول احسن من شغل شهر فول تايم...علاوة علي ان عملي هو المرور فقط علي العيال الامنجية في اماكن عملهم...و شغل يومين في الاسبوع وبس...هذا العمل سمح لي بعمل بعض الكورسات في قيادة مركبات النقل الثقيل و الديرك...في نفس الوقت اعطي لي وقت لكي اناكش في مخاليق ربنا علي صفحات المنتديات هههههه :lol: :lol: :lol:

و في يوم من الايام من سالف العصر والزمان ...تحديدا نوفمبر 2007 فتحت منتدي المحاورات ووجدت رسالة من عضو..اعتقد انه سجل علشان يبعتلي الرسالة دي...مالهاش تفسير غير كده...عدد مشاركاته...1 مشاركة....وحتي الآن ...برده ا مشاركة...المهم عجبتني رسالته جدا جدا...رسالة اقسم بالله فضيلة الشيخ محمد متولي الشعراوي رحمه الله لا يستطيع كتابة رسالة مثلها...من شده اعجابي بها طبعتها بل وحفظتها علي الكمبيوتر الخاص بي...اسلوب علماء...اسلوب يدل علي تفقه عالي جدا في الدين...انانفسي قولت ياواد ياعمر...واحد زى ده حيعيش ازاى في تورونتو...كان مرفق مع الرسالة البريد الاليكتروني الخاص به...وبسرعة عملت اضافة له...حقيقي كنت محظوظ فقد ظهر اون لاين...وصار هذا الحديث معه واعذروني انا ححاول الخص علشان الفترة اللي اتكلمت معاه فيها يوميا تناهز السبعة اشهر...فاحكتب آخر حوار دار بيني وبينه قبل وصوله بايام وكنت في هذه الفترة عايش بمفردي لمدة ثلاثة اسابيع في تورونتو...يتبع

[moheltohamy]

تسجيل متابعة يا عم الحاج...

إنتا كده حطّيت رجليك ع الطريق الصح :happy: وكلامك هيؤخذ بعين الاعتبار...

ومش بعيد كمان كام يوم ؛ نلاقي نُص الأعضاء بيلعنوا ويشتموا في كندا :winner:

[Torontotruk]

تسجيل متابعة يا عم الحاج...

إنتا كده حطّيت رجليك ع الطريق الصح bv:- وكلامك هيؤخذ بعين الاعتبار...

ومش بعيد كمان كام يوم ؛ نلاقي نُص الأعضاء بيلعنوا ويشتموا في كندا :lol:

برده تاني...يا حاج قبل كده انا كنت بأول راى شخصي في كندا...وكلامي ما كانش ليه غرض تاني ويعلم الله وحده اني كنت بصف كندا التي رايتها..انا مش مقتنع بكندا ..علشان بالبلدي حاسس انهم بيصيعوا علي وعلي الناس...ممكن فيه ناس شايفة اني مخطئ..بس انا فيا :winner: ميزة :happy: حلوة mil: مستحيل :D افرض رايي :o علي حد... :o

[Torontotruk]

المهم الشيخ الحبوب ده نزل عليا بارشوت ...زيه زى ناس كتيرة طبعا مش كلهم عينة ...ماكنش العشم او ماتأولش خليني ائوله...بس الشيخ ده حالة خاصة جدا...وبالمناسبة انا كتبت كصته زمان ردا علي عضو دمه خفيف ثبت اخيرا انه عايش في مصر وكل كصصه عن كندا كانت من واحدة صاحبته اتعرف عليها من احدي مواقع الشات وفي الآخر اديته الصابونة ومابآش يظهر تاني...واليكم الحديث الروحاني الذي دار بيني وبينه....

انا...صباح الخير ياحبوب

الشيخ..يامحمد اقرئوهم السلام...وعليكم السلام ورحمة الله وبركاته...هي الساعة عندك ؟

انا...سابعة مساء

الشخ...صليت العشاء

انا..الحمد لله...

الشيخ...يا محمد انت ناقصك بس الصلاة...آه لو تعرف فوائد لصلاة...انت عارف الصلاة رياضة بدنية كمان...

انا...سمعت

الشيخ...انت عارف حتي لو كنت عايش مع كفرة ممكن تخليهم يفكروا في اعتناق الدين الاسلامي لو شافوك مواظب علي الصلاة؟

انا....الحمد لله علي نعمة الاسلام يا شيخ...

الشيخ...انا عايز اقولك علي فوائد الصلاة وخاصة في بلاد الكفرة ...اولها بتبعدك عن كل فاحشة...وبتغض بصرك... وهي العلاقة اللي بينك وبين الله...

انا...ان شاء الله حنبقي جيران وحنتكلم كتير...المهم انت جاى امتي؟

الشيخ...انا استلمت الفيزا زي ما انت عارف والسفر تساهيل...بس المدام تخلص اجرائات الاستقالة من المدرسة في السعودية ...باذن الله انا حاجي لوحدي اول شهر ...علشان ارتب الامور وانت معايا...والله المستعان...

انا...ماتألأش ان شاءالله متيسرة...

الشيخ...المهم عندي الولد...يعلم الله انا مهاجر عشانه..ومش عايز اخسره..

ملحوظة...الشيخ وابنه عايشين في مصر....والام بتشتغل مدرسة في السعودية...

انا...طبعا بعد ما حكيتله عن نظام التعليم في كندا...في المدارس الكندية...قرر انه يدخل ابنه مدرسة اسلاميه...وروحت مخصوص المركز الاسلامي وهو بالمناسبة بيدي تسهيلات كتيرة للمهاجرين اللي عايزين يعلموا اودلادهم في المدارس .الأسلامية..المهم جيبتلو ليسته بالمدراس وقولته كمان تكاليف الدراسة فيها...وعمل حساباته وكان مبسوط جدا...

الشيخ...هو فيه مشاكل بالنسبة للنقاب في كندا علشان مراتي منقبة..

انا...مافيش اى مشاكل ماتألأش خالص من الناحية دي...

الشيخ...محاضرة في النقاب...وانه سنة...الى آخره...

انا...انا حاعمل اللي حقدر عليه..وان شاء الله خير..

الشيخ...شكرا...وان شاء الله نبقي جيران...وربنا يكرمني فيك ياعمر...وسعادتي ان ربنا يكون راضى عنك...

انا...انا كلمت المسئول عن المبني ووعدني في اقرب فرصة حيشوفلك شقة كويسة...وان شاء الله حتعيش عندي يومين تلاتة لحد مانشوف ...عموما انا لوحدي اليومين اللي حتيجي فيهم...وانا من ناحيتي حعملك الريفرانس

الشيخ...باذن الله اكيد مش حيكون اكتر من كده...علشان الكشف الطبي...

انا...ماشى الكلام وانا حكون في انتظارك في المطار..

الشيخ...معلش يا محمد انامعايا شنط كتير ...مش عارف اعمل ايه...

انا..ما تألأش حجيب الفان من الشركة وحشيل الكراسي و حنظبط الشنط مع بعض...ماتلألش...

الشيخ...جزاك الله خير يا محمد...

انا...انت ليه مش حتجيب مراتك وابنك معاك...

الشيخ...علشان مراتي مش حتخلص اجرائات الاستقالة بسرعة..وانا عايز اكسب وقت واخلص كل حاجة قبل ما ييجوا..

انا...ماشي يا حبوب انا صاحب القرار

الشيخ...انا فكرت ولئيت انه هو ده القرار الصحيح...

انا...عموما انت ضيفي وحنظبط كل حاجة مع بعض..

الشيخ...جزاك الله خير.....

وصول الشيخ...الساعة اتنين ظهرا...مسيساجا

سبحان الله...ايه الحلاوة دي...ده انا كنت فاكرك عجوز...

الشيخ المودرن...ربنا يخليك يا محمد...انا سعيد بمقابلتك..

انا...ايه اخبار الرحلة...كانت مظبطة والا ايه..

الشيخ المودرن...آه يا بو حميد ده الواحد ماكانش عايش عملنا ترانزيت في لندن...وشوفت لندن من الطيارة..انا حاولت آخد فيزا ترانزيت من السفارة ليلة واحد بس ما عرفتش...

انا...ان شاء الله لما تاخد الاقامة وتشتغل ممكن تروح بسهولة..

الشيخ المودرن...خلينا نعيش شوية يا بو حميد...ماحدش واخد منها حاجة...

انا...وانت نواى تعمل ايه...حتمشي في سكة المعادلات والدراسة؟

الشيخ المودرن...لما اشوف...المهم نفسك معايا ...اىحاجة في الاول علشان نعرف البلد ونصرفش من الملمين اللي معانا...

انا...ان شاء الله حظبطك في شركة امن ...علي الاقل حتجيب ايجار بيتك و مصاريفكوا...وحتلاقي وقت للمذاكرة...

الشيخ المودرن...المهم ايه اخبار النظام هنا...

انا...نظام ايه...

ملحوظة...هذا الحوار دار بينا في المسافة بين المطار وبيتي

لشيخ المودرن...يعني عايز اتفسح شوية قبل ما المدام تيجي والواد..بعد كده حيبقي ما فيش وقت...

انا...غالي والطلب رخيص يا سلام...ده انا بتاع الليل وأخره...حظبطك...

الشيخ المودرن...وهو بيضحك...انا كنت متاكد انك واد هلاس وابن ليل.... bsh:)

انا....موت علي نفسي من الضحك...... شوفوا اللي جاى حتموتوا من الضحك :lol:

وصلنا العمارة وهي عبارة عن 19 دولار كل دور فيه 14 شقة السوبر انتيدينج جوز حريم روماني بالنسبة لي عاديين...بس بالنسبه للمصرى اللي جاى جديد في وجهة نظره لو نزلوا مصر يعملوا ثورة. cld: ..عرفته علي واحده منهم...طبعا هي بتتكلم علي الشقق و صاحبنا مش عارف يعمل ايه حريم داخلة وكتاكيت خارجة.cld: ..وسكان العمارة كلوهم روس علي رومان علي اوكران يعني بصراحة بعد ما شوفته بيبص لكارولين ازاى حتي هي لاحظت خوفت عليه لتجيلوا سكته قلبية...وبصراحة خوفت علي نفسي وقررت اني انام في الانتريه... wst::

المهم...عرف انه مافيش شقق فاضية لمدة شهرين...لكن الغريب اني ماحسيتش انو زعلان ..ولا في دماغه...طلعنا علي شقتي وصاحبنا آخر مزاج و مزبهل...

هو...ايه يا بو حميد...عايز بكرة تعملي برنامج حلو ...

انا...بلاش بكرة خليها بعد بكرة الجمعة...حاظبطلك...

هو...بيضحك...ماشي لما نشوف....

هو...طبعا ماعرفش ينام علشان الساعة اياها...وطول الليل مالوش سيرة الا عن كارولين والبنت اللي مسئولة عن نضافة العمارة...وانا ميت علي نفسي من الضحك...

هو...ممكن اعمل تليفون يا ابو حميد...

انا...اتفضل ...مصر...

هو...لا ...هنا في تورونتو

انا...اوك اتفضل...

هو....الو...هاى...ايتيز مى...

وربع ساعة او اكتر كلام مع موزة كندي...

انا بعد ما خلص...يا صباحوا وكمان عامل علاقات من ابل ما تيجي....

هو...ياراجل ماتفهمنيش غلط...دي واحدة اتعرفت عليها علي الموقع ده...هو يمشي بخطوات ثابتة الي الكمبيوتر ويفتح موقع ديتنج كندي...

هو...هو ده...موقع روش...ممكن استعمل الياهو مازينجر...دقيقة واحدة...

انا...اكيد اتفضل...

هو...هي حتبعتلي عنوانها ...حكتبه واقفل علي طول...

انا...خد راحتك...انا حنام...وعلي فكرة القبلة وشك حيبقي في اتجاة باب البلكونة....انا سألت واحد جاري باكستاني قبل ما تيجي ...

هو..ماشي...

انا...تصبح علي خير...

تاني يوم...صحيت انا الاول...وهو كان نايم نوم عميق...

خلصت كام مصلحة ورجعت ...لقيته مظبط نفسه علي الأخر وبيسألني...اوصله ...لمول معروف في نورث يورك...

انا...طب ناكل ونروح

هو...مافيش وقت الميعاد بعد ساعة...

انا...ماشي يالة بينا...اخذت الفان بتاع الشركة وطيران علي العنوان...والاقي الدنيارة في انتظاره.. wst:: .وعيش وسيبني اعيش :P ...اشطة جدا...

انا ومن الآخر...يا حبوب انا آسف مش حقدر ادخلها البيت عندي...

هو...عيب ...انا ماأقدرش اتعدي حدودي...

انا..سألته سؤال ليه مخزي علشان قررت اخلص منه...

ات تعرف ترجع البيت من هنا

هو...لا طبعا...

انا....طيب نتقابل هنا الساعة كام...

هو...الساعة تسعة ممكن؟

انا...اوك...

كانت الساعة حوالي تلاته ظهرا...وكنت قررت فعلا التخلص من هذا الحبوب بجد...روحت اشتريت خريطة لتورونتو ...وبعد كده روحت علي واحد صاحبي يوناني عنده مطعم و فوقه غرف بياجرها والحمد لله لأيت غرفة فاضيه...

عدت الي المنزل جهزت كل شنطه ...ونقلتها الي الغرفة...وفي الميعاد...روحت للحبوب اللي اتاخر اكتر من نص ساعة...ودار هذا الحديث....

هو...آسف يا بو حميد...اصل البت جامدة اوي

انا...ياعم ما حدش واخد منها حاجة.. .هيص وانبسط...

هو...بس بجد تستاهل المية وخمسين دولار

انا...مانطاتش بعد كده بكلمة واحد...لحد ماخلص كلام انا ما ادرش اكتبه... :sad:

هو...معلش يا بو حميد...بكرة حتوصلني كمان...

انا...معلش بكرة الجمعة و عندي شغل وكمان انا لائيتلك غرفة محندئةممكن تستقبل فيها اللي انت عايزه كمان لغاية ما المدام تيجي...وخد الخريطة دي حتعرف تتحرك بيها في كل

GTA ....تعمدت اقول الكلمتين دول قبل عنوان الجديد بفترة قصيرة..هو طبعا حاول يعرف السبب طب لو حنتقابل تاني ولا لأ...حتي لما وصلنا للراجل اليوناني كنت بحاول اخلص علشان انفد بجلدي...مضي العقد والرجل اليوناني وافق انه ياخد فلوس الايجار كاش...وطبعا بعد كدة اطع العقد..لانه مش حيديله ايصال بال 350 دولار اللي دفعهم...طلعنا انا وهو وسلمته شنطه..وودعته...وما اعرفش اى حاجة عنه من ساعتها وساعته ;)

الشيخ...محاسب ...ومراته مدرسة...ومن القاهرة...الزيتون...مدينه الزهراء...تمت...

[اسكندرية تانى]

يخرب عقلك يا محمد يا عمر

بس انا خايف عليك من بعض الردود اللى هتهاجمك عشان الشيخ الدقنوش

تحياتى

[casanooovaaa]

هاهاهاهاهاهاه دا شيخ اخر مسخرة بس عرف يأكلك الاونطه يلا تعييش و تاخد غيرها

[samehelassad]

انا مش عارف اقول اية بجد.

اول الحكاية كنت هموت على روحي من الدحك. ووشي احمر من هسترية الدحك.

بس الحقيقة في الاخر كان عندي زهوووووووووووول. وزعل وصمت زي مايكون سهم الله نزل عليا. وفعلا اتضايقت.

لاحول ولا قوة الا بالله.

انا كنت متوقع انة يكون وحش بس الحقيقة مش لدرجة السفالة دي.

ربنا يستر علينا وعلى اولادنا.

سبحان الله اللي يسمع كلامة معاك على النت ميتوقعش اطلاقا ان دة هو الراجل اللي جنبك في العربية.

اللهم احفظنا.

[مسافر زاده الخيال]

هههههههههههههههههههههههههههههههههههههههههههههههههههههههههههههههههههههههههههههههه

هها

بجد مش ممكن

كل ثانية اتأكد ان المصريين :blink: اباطرة الكمديا والدم الخفييييييييييف في الكون

يانا دحكت دحك ;)

رغم ان الموضوع خاص بالمصريين واني مالبدايه مقرر اني اتابع بس

لكن مقدرش امسك نفسي wst::

الكاتب الساخر الجديد(تورنتو) ابدع ايما ابداع في كتابة كصة الشيخ المودرن باسلوب مش عارف ائول ايه عنه

(خلال حياتي سمعت كصص دي دي عموما لكن معنديش اسلوب كومدي عشان اكتبه)

وبما ان الشي بالشي لزوم الشيء يذكر

هي كندا بلد سياحي من الدرجة الاولى؟؟؟؟؟ :blink:

هي احلى من اروبا (بريطانيا او فرنسا مثلا)

[znaty]

شيخ؟؟؟ ******* على قبره دة راجل ناقص ومنافق

الدين برئ منه ومن امثاله

150 دولار ؟؟؟؟؟ هما 20 دولار مافيش غيرهم

ايه يا عم تورنتو العينات العجيبة اللي انت بتقابلها دي ؟؟؟

طبعا عندك حق تتعقد من الغربة والمغتربين

بس من الواضح انك جدع بس حظك وحش

فيه ناس اكتر بكتييييير جدعان وزي الفل وولاد بلد ولما هاجمع مادة قصصية هاعملك توبيك ولاد البلد والناس اللي زي الفل

[pharaon]

اده يعنى الواحد مهاجر عشان يبدا حياة جديدة

يقوم اول حاجة يعملها فى حياته الجديدة تبقى كدا

اده يا جماعة هو فيه كده طيب اتقل شويه :roseop:

[Torontotruk]

انا...خد راحتك...انا حنام...وعلي فكرة القبلة وشك حيبقي في اتجاة باب البلكونة....انا سألت واحد جاري باكستاني قبل ما تيجي ...

...

:blink:

:blink:

اهي الحتة دي انا كاتبها مخصوص عشانك..ومتراهن مع واحد عليها..انك حتعلئ عليها...ياعم.......اكسب الرهان....خلاص يا بوب...ده احنا عشرة عمر...من ايام ....بلاش بوب لحسن شاكلك حتزعل....ماشيها كونسلتنت..وووووووو مدددددددددددددددددددددددد... wst:: ;) ;)

[casanooovaaa]

العجيب بقى انو عامل نفسو شيخ :blink: امال لو ماكنش عامل نفسه شيخ كان هيعمل ايييه كان زمانة قلب شقة Torontotruk ملهى ليلى و عاش بقى :blink: و تانى يقوم نلاقى اخونا Torontotruk فى السجن لحيازة مادة مخدرة فى منزلة و الناس هنا بتسأل هو Torontotruk غايب ليه من زمان و الناس هناك تروحلو بعيش و حلاوة و اللذى منه المهم يلا متابعين و مستنيين الهاند اوفرز الجديدة

[Torontotruk]

وبما ان الشي بالشي لزوم الشيء يذكر

هي كندا بلد سياحي من الدرجة الاولى؟؟؟؟؟

هي احلى من اروبا (بريطانيا او فرنسا مثلا)

القطاع السياحي في كندا في رواج علشان بيصرفوا علي الدعاية ليه كتير..مثال ...احتفالات كيبيك بعيدها ال 400 كان كل يوم بيزور ميناء كيبيك باخرة ركاب حمولتها 10.000 راكب...في شهرين بس زار مقاطعة كيبيك اكتر من 600.000 سائح...في اونتاريو منطقة الشلالات شغالة 12 شهر في السنة..بعض الكامبات اللي في جبال روكي شغالة كويس...فانكوفر...قبلة البواخر السياحية...وتمتاز بجوها الجميل معظم السنة...الهم الامطار اللي بتضايق السياح وخاصة الاوروبين....بس طبعا اوروبا قارة ليها تاريخ وحضارة...ونوعية السياحة فيها بتعتمد كثيرا علي زيارات للمعالم الاثرية...وجهة نظري اوروبا افضل من كندا سياحيا...

[osmel33]

ده أيه الشيخ اللى مش شيخ ده يا حاج تورنتو أنت قولت أنت لقيته فين ؟ :sad:

بس أيه يا معلم أنت قلبته حتة قلبة :lol:

قول يا سيدي وا شجينا هى دى الغربة بتخلي الناس يشوفوا بلاوى

[Torontotruk]

علي صفحات المنتدي قريبا..المنوفي الذي اكتشفت سره.... :sad:

تسجل متابعة ياتورنتو وبجد طريقة عرضك للموضوع تجنن وخصوصا حكاية الشيخ المودرن دة انتا موتنى من الضحك ياراجل علية .. دة طلع شيخ مسخرة من بتوع الذقن التيوانى هههههههههههههههههههههههههههه

كان من غير دأن...ولا حتي شنب...بس كان حالئ شعره انجليزي..مخفف من الجناب ..حاجة كده زي فرع الديك :lol: ...مهاجر كندا بئة لازم يبئة مودرن. :lol: ..طبعا هو في اعتقاده كده. :lol: ..بالأضافة انه راجل جيلااوي :lol: ....يهوي استخدام الجيل ويكثر منه... :lol:

[jessika]

الشيخ...انا عايز اقولك علي فوائد الصلاة وخاصة في بلاد الكفرة ...اولها بتبعدك عن كل فاحشة...وبتغض بصرك... وهي العلاقة اللي بينك وبين الله...

ومردتش لية علية وسالتة اية جايبك بلاد الكفرة وانت كلك تقوى وايمان متعد فى بلدك؟ وقلة كمان فين صلاتك دى اللى غضت بصرك دة انت عينك تدب فيها رصاصة يا راجل

[Nassarlink]

شكرا تورونتو علي التجارب العمليه دي

اكيد كتير مننا هيستفاد منها

بس يا ريت تكون دي آخر قصه عن المشايخ الموديرن

وتكون تجاربك الباقيه بافكار مختلفه في مجالات ثانيه

علشان السكه دي بتفتح حوارات ملهاش لازمه

[ABO ADAM]

المقالة دى من المصرى اليوم عشان ميبقاش كلوا نكد كدة

اشمعنى همّه؟

بقلم عائشة أبو النور ١٣/ ١/ ٢٠٠٩

أحلى ما فى السفر أنه يسمح لنا بالخروج من الدائرة المغلقة لواقعنا المعيشى المحدود. عند السفر نكتشف العلاقة الجدلية بين الجزء والكل.. المحدود والمطلق.. المحلى والعالمی.

فى أيام البعاد يتجلى لعقولنا بوضوح حجم مشكلاتنا المحلية. يسهل علينا رؤية الحلول لها على ضوء الواقع المعيشى للدول الأخرى. كنت قد عاهدت نفسى منذ زمن ألا أعكر صفو الاستمتاع بأى رحلة سفر، بتلك العادة «النكدة» للمصريين عند مقارنة أسلوب المعيشة فى الدول المتقدمة بأسلوب حياتنا فى بلادنا.

وتضيع الرحلة ونحن نردد ونعيد: شوف يا أخى همّه وصلوا لإيه، وإحنا لسه فين! اشمعنى همه عندهم وإحنا معندناش، مع إننا كنا سابقينهم بسبعة آلاف سنة!!

إن كيمياء النجاح التى أوصلت بلدا مثل كندا لا يزيد عمره على ثلاثمائة سنة، جميع مواطنيه من المهاجرين ليصبح من بين الدول الثمانى الكبار فى عالم اليوم، هى كيمياء لها خصائصها الواضحة تعتمد على خمسة محاور أساسية: التربية والتعليم.. سيادة القانون.. دقة النظام العام.. العمل الجاد التنافسى.. البحث العلمى بفروعه.

كندا هى البلد الثانى على مستوى العالم فى نظامها التعليمى بعد اليابان. وهى الأولى فى مجال حماية البيئة، واحترام المواثيق الدولية لحقوق الإنسان، كما أن نسبة الفساد الإدارى والمالى بها محدودة بسبب الرقابة القانونية، وسيادة النظم الديمقراطية الحقيقية.

هل ترغبون فى معرفة الذى يشغل الدوائر العلمية ومراكز الأبحاث فى دول العالم الأول الآن؟ الأرقام تقول إن ١٥٠ ألف باحث من ألمع العقول العلمية تم جمعهم من بين ١٢٧ دولة، يعملون بجد ودأب فى مجالات الاختراعات العلمية التى سوف تغير وجه الحياة فوق سطح الكرة الأرضية خلال القرن الحالى.

هم يعملون الآن على اختراع مواد رخيصة لتوفير الطاقة للمصانع والسفن والعربات والطائرات على أن تكون صديقة للبيئة. هم على وشك اختراع إنسان آلى متناهى الصغر يسهل حقنه فى دم المريض لعلاجه.

البحوث ما زالت مستمرة فى مسألة التحكم فى شكل ونوع المناخ الجوى. يشتغلون الآن على اختراع جهاز كمبيوتر قادر على التفكير والتخيل. يستعدون لإقامة مستعمرات فوق سطح بعض الكواكب البعيدة!

ما يشغل الناس فى العالم الأول هو صناعة المستقبل. أما نحن؟ وعلى إيه، ما إحنا سبق وقلنا ملهاش لزوم المقارنة.

[el faid]

أخي تورنتو

شكرا على تعقيبك والمعلومات القيمة التي أرفقتها

اسمح لي أهنيك على موضوع الشيخ وأستأدنك نسميه الشيخ لايت :lol:

ونحن في انتظار نمودج آخر من النمادج التحف التي تعرضها علينا :lol:

[magedghonim]

قصة مودرن واسلوبها لذيذ

اسلوبك يا تورنتو بيه اكتر من رائع

اسلوب قصصي من الدرجة الاولى

بيفكرني بالمجموعات القصصية الي كنا بنقراها زمان

وبالنسبة لموضوع القصة نفسها فعلا غريب

ان الراجل يبدأ في كندا ب .. (كبيرة زنا)

يعني انا متوقع ان الراجل دة اساسا كان تعبان اخر تعب في مصر

وواهم الناس بس انه شيخ ودة فيه من كتير للاسف

بس سؤالي ليكي وان كان دة تطفل تسامحني عليه؟

ليه ما حاولتش تقوله ان دة غلط وحرام

يعني على الاقل زي ما بدأ معاك بنصايحه عن الصلاة وخلافه

وشكرااا ياعمووووووووووووووووووووووووور

وفي انتظار المزيد يازعيم............. :blush2: