غرائب و طرائف الهجرة

[Torontotruk]

كنت اخذت بطاقته معي لكتابة بيانات المؤمن والمؤمن عليه في خطاب التأمينات اللي مالوش رقم تاميني اصلاا ...وكله بيضحك علي كله ...المهم الختم اياه...وظرفني تعرفني...واكتشفت ان مهنة وسط البلد في البطاقة....نجار مسلح. :lol: ..وبسبب هذه المهنة طلب موظف التامينات المرتشي 100 جنيه زياده :lol: ليعمل له خطاب تامينات بمهنة مدير سياحي...واكتشفت ان موظف التامينات له علاقة باصحاب شركات متنوعة النشاط يعني استراد,,سياحة...الخ ويحتفظ بخطابات لهذه الشركات مكتوبة و موجهة لمكتب التامينات ووائفة علي اسم المؤمن عليه... :rolleyes:

المهم...وجدت في يدي خمس ورقات كل ورقة بمية ولكن ليست مائه جنيه....كل ورقة بمائة دولار...بعد نهاية حديثي مع موظف التامينات...ووعده لي بكتابة الخطاب وانه حيكون جاهز صباحا...اتصلت بوسط البلد لاسأله عن هذه الحفنة من الدولارات...فقال لي اني عندما ذكر خلال حديثه معي الف او الفين كان يقصد دولار وليس جنيه... :sad: :lol: ما علينا....

في صباح اليوم التالي ذهبت بمفردي الي مكتب التامينات ووجدت الخطاب مكتوب ومختوم...واعطيت الستمائة جنيه للموظف وكنت غير آسف عليهم...

لم ارجع الي القهوة مكان المقابلة ولكني اتصلت بوسط البلد لمقابلتي امام المجمع وان يحضر معه بعض الصور...للجواز..وكنت بالفعل قد ملأت طلب اصدار جواز سفر باسمه بمساعدة احد اقاربي العاملين بالمجمع...وعندما حضر بعشرة دقائق كان الجوز بجانب حافظة نقوده المنتفخة بالدولارات :P وعملات اخري كانت مجهولة الهوية بالنسبه لي... wst::

طلب وسط البلد قبول دعوتي للغذاء معه ولانه يريد الحديث معي في امر هام...

قبلت دعوته ولكن للعشاء وكانت علي ظهر احدي المراكب النيليه الفاخرة...ودار هذا الحديث وعذرا سوف اكتب ملخص له لاني اتذكر انه استمر في الكلام حتي الساعات الاولي من الصباح التالي...

هو...انا عايز اعترفلك بشئ انا آسف انى خبيته عنك...بس انا ماكنتش اعرفك كويس...حضرتك عارف الناس بأت وحشة..

انا...انا حاسس انك عملت عاملة دنيئة..

هو...لا والله يا استاذ محمد...

انا...أول الحئيئة واوعدك اني مش حجيب سيرة لحد

هو...انا مش خايف من حد...بس انا مؤمن ان الانسان يستعين علي قضاء حوائجه بالكتمان...

انا...صح وبعدين..............................انجز....

هو...بصراحة انا اتجوزت اجنبية...وعايزاني اسافر لها...

انا...اجنبية...ازاى ده حتي مابتعرفش تكلم انجليزى...

هو...لا انا بكلم ...بمشي نفسي.... wst::

انا...طب تمام...وعلشان كده طلعت باسبور

هو...آه...بس عايزك تيجي معايا السفارة بعد بكرة علشان انا خايف اروح لوحدي.....

انا....ماشي ...سفارة ايه ان شاء الله...اوعي تكون سفارة

ليبيا

هو...لا ...هو انا عبيط...دي السفارة الكندية...

ملحوظة...كنت في هذا الوقت اعرف ان عاصمة كندا هي مدينة مونتريال :lol: وقد تفضل مشكور السيد وسط البلد وصحح لي هذه والمعلومة وقال ان عاصمة كندا هي مدينة فانكوفر :lol: التي سوف يستقر فيها......يتبع

[moheltohamy]

انا...أول الحئيئة واوعدك اني مش حجيب سيرة لحد

:rolleyes:

دانتا فضحته ، مش هتجيب سيرة لحد مين بس يا عم الحاج؟! :lol:

هو...لا ...هو انا عبيط...دي السفارة الكندية...

ملحوظة...كنت في هذا الوقت اعرف ان عاصمة كندا هي مدينة مونتريال :lol: وقد تفضل مشكور السيد وسط البلد وصحح لي هذه والمعلومة وقال ان عاصمة كندا هي مدينة فانكوفر :P التي سوف يستقر فيها......يتبع

كده بأه فعلاً انتا دخلت في غرائب وطرائف الهجرة صحيح... اتفضل يا عم الحاج... أنا كلّي ودان (I'm all ears) :lol:

[Torontotruk]

طبعا...سالته وكنت في قمة الذهول من كلام وسط البلد...

وحتي انني كنت اسمع كلامه ولكن في قرارة نفسي غير معتقد فيما يقوله...

انا...طب انت ازاى اتعرفت عليها...وكنت ازاى بتتكلم معاها...بالمشاوره...

هو...يا أ/محمد ان بفهم انجليزى وبكلم شوية..وبعدين لغة الحب لغة مش محتاجة ترجمة...

هو...بس البداية لازم يكون فيها كلام مقنع...علشان حتي تقتنع ...

هو...والله يا استاذ محمد انا كنت وائف اودام محل بردي في شارع التحرير وكانت هي معادية اودامي والكلام ده كان بعد يوسف سافرفي شهر يوليو ..وهي كلمة واحدة قولتهالها وبعدها وأفت في الشارع تضحك معايا...وطلبت مني انها تروح البيت عندي علشان تتعرف علي اهلي...

انا...ايه الكلمة دي...اللي عملت كل ده...

هو....ويلكوم تو الاسكا....

انا...في عقلي الباطن من بكرة حشتري شوية بردي واقف بيهم مكان ماهو كان واقف واى واحدة معاديه حئولها ويلكوم توالاسكا...

انا...وهي اللي عملتلك كل ده...

هو...آه...واشترتلي الشقة اللي حضرتك شوفتها...بس انا عايز اسافر واشوف الد نيا...ونفسي افتح بازار في الغردقة..

انا...طب انت عايز تروح السفارة علشان تاخد الفيزا من غير دعوة...

هو....لا ماهي بعتيتلي الدعوة وفيه صورة اتبعتت علي السفارة...دعوة زيارة تلات شهور...والسفارة كلمتني في التليفون بس انا مافهمتش كانوا بيئولوايه...بس انا فهمت انهم عايزين جواز السفر...

انا...كمان بعتيتلك دعوة زيارة...ماشاء الله...وناوى تتجوزها هناك..

هو....آه...

انا...وحتشتغل ايه هناك..

هو...اى حاجة...يعني انا كنت بشتغل هنا ايه....

انا...طب يالة بينا...الحئ انام شوية قبل مانروح السفارة..

هو...طب اجيب معايا...

انا...انت حيلتك حاجة غير جواز سفرك..لما نشوف...

هو...ماشي يا استاذ محمد ...ربنا يخليك...بكرة حفوت عليك لساعة عشرة في المكتب..ونروح نشوف طلباتهم...

انا...ماشي..

حتي آخر لحظة كنت لا اصدق كلام وسط البلد ...ولكن حدثت مفاجأة...كنت غير متوقعها...حينما ذهبت معه الي السفارة ورايت الدعوة...وحينما دخلنا السفارة سألته موظفة مكتب التاشيرات اذا كان يتكلم الانجليزية..فقال لها...نعم اتحدثها بطلاقه...اى سبيك انجلش فيري جود...فطلبت منه ميلئ استمارةطلب الفيزا...وطبعا قمت انا بملئ الطلب وطلبت منه عند الخروج من كندا بترك هذه الدعوة في مكتب جوازات المطار او للضابط المختص...

وبعد دفع الرسوم ...وفي اقل من نصف ساعة...حصل وسط البلد علي تاشيرة كندا...

النهاية

سافر وسط البلد الي كندا...بعد خداع صديقته التي اصبحت زوجته وام لابنه بانه كان مدير سياحي...وان الشركة التي كان يعمل بها قد اغلقت ولم يجد الا هذا المسكن في صفط اللبن لكي يعيشوا فيه بعد فقدانه لمصدر رزقه..

عاد وسط البلد الي القاهرة بعد ان حصل علي الجنسية الكندية وحقق حلمه بعمل بازار في الغردقة واصبح بعد اقل من سنة عدة بزارات في الاقصر...والقاهرة وهو المالك الرسمي لشركه...ج.ف.ت ومقرها القاهرة...

قمت العام الماضى بزيارته عندما كنت في مصر...وملك الملوك اذا وهب لاتسألن عن السبب....ارزاء....سبحان الله....تمت

[Torontotruk]

القصة القادمة...هي مهلبية ام عيون عسلية...وهذه القصة تندرج في قائمة بكش المقيمين... :lol:

[pampino]

واللة ياعم تورنتو فعلا قصة عجيبة وغريبة ولا تصدق دى ولا احداث فيلم ياراجل..... بس انا ليا عندك سوال هو اى ست كندية او حتى اجنبية ايان كانت جنسيتها تعمل كل دة يعنى تدفع كم الفلوس دى مع واحد ماتعرفوش او حتى عارفى تتعامل معاة طبعا لسبب اللغة... يعنى شقة محترمة وعربية وفلوس .. دى تقريبا عملت ابجريد لحياة هذا اى وسط البلد دة... لو الحياة كدة دى تبقى بجد سهلة اوى وماكنش المصرين البسطاء وجدو صعوبة... وهيا كانت بتشتغل اية فى كندا دى ... اكيد دى ست عجوزة زى ما بنسمع الحوارات دى ماهى اكيد عجوزة عشان تعمل كل دة...... فى النهاية سبحان العاطى الرزاق

[Torontotruk]

واللة ياعم تورنتو فعلا قصة عجيبة وغريبة ولا تصدق دى ولا احداث فيلم ياراجل..... بس انا ليا عندك سوال هو اى ست كندية او حتى اجنبية ايان كانت جنسيتها تعمل كل دة يعنى تدفع كم الفلوس دى مع واحد ماتعرفوش او حتى عارفى تتعامل معاة طبعا لسبب اللغة... يعنى شقة محترمة وعربية وفلوس .. دى تقريبا عملت ابجريد لحياة هذا اى وسط البلد دة... لو الحياة كدة دى تبقى بجد سهلة اوى وماكنش المصرين البسطاء وجدو صعوبة... وهيا كانت بتشتغل اية فى كندا دى ... اكيد دى ست عجوزة زى ما بنسمع الحوارات دى ماهى اكيد عجوزة عشان تعمل كل دة...... فى النهاية سبحان العاطى الرزاق

انا كنت فاكر زيك كده...ولو ما كانش وراني صورتها معاه...وهما في نفس الغرفة اللي كنت جالس فيها معه ...وصورة جواز سفرها اعتقد تكفي لمعرفة سنها...ياسيدي هي فعلا اكبر منه بحوالي اربع سنين..بس حلوة...ولما اخوك تورنتو يئول حلوة تبئي حلوة :lol: .بس حئيئي معرفش بتشتغل ايه..

وفي نفس الوقت معرفش ان كان الموضوع صعب او العكس...مائدرش افتي لانى ماجربتش.وعمري ما كنت في وضع وسط البلد.....لكن مشاهداتي بتئول ان مش كل اللي بيتزوج في مصر من اجنبيات بيعدي زى وسط البلد ومش كله بيعرف يسافر..عموما ممكن تجرب :lol:

ممكن يكون عجبها...او هو ده التيب بتاعها...ممكن يكون صعب عليها...بكسر الصاد...حبته يا اخي..وكما قال الشاعر الكبير وسط البلد ان لغة الحب دولية كل الناس بتعرفها...وكما قال الشاعر الكبير ماجد الكويس :) صديقي الدنيا للأورزئي مش للئوحدوئي,, :)

[Torontotruk]

انت كنت مخبي كل ده فين يا أستاد تورنتو :)

احكي احكي ده انت حكاية :)

أفريقيا الغربية ورمانيا وكندا وغطس ومحاماة :lol:

ده انت طلعت 007 واحنا مش عارفين

متابعين يا مسيو بوند :lol:

والمغرب كمان...ختها من مخيم البلوزاريو..الداخلة...العيون...سمارة..بوجدور...اغادير...وعملت سفاري في اطلس ...وخت الفاري من طنجة لجبل طارق......عايز تاني و لا كفاية كده...احكيلك حصل معايا انا واصدقائي ايه في كازابلانكا...ولا بلاش... :)

[pampino]

ممكن يكون عجبها...او هو ده التيب بتاعها...ممكن يكون صعب عليها...بكسر الصاد...حبته يا اخي..وكما قال الشاعر الكبير وسط البلد ان لغة الحب دولية كل الناس بتعرفها...وكما قال الشاعر الكبير ماجد الكويس صديقي الدنيا للأورزئي مش للئوحدوئي,,

:) بجد انتا موتنى من الضحك وفعلا دى اللغة الوحيدة اللى العالم كلة بيعرفها وواضح من كل اللى وصل لية انة رفع علم مصر عاليا ارزاق ياسيدى هههههههههههه وقول معايا تحيا مصر :lol: :lol: ورجالة مصر

تم تعديل 16 يناير 2009 بواسطة pampino

[somayasaleh]

كنت اخذت بطاقته معي لكتابة بيانات المؤمن والمؤمن عليه في خطاب التأمينات اللي مالوش رقم تاميني اصلاا ...وكله بيضحك علي كله ...المهم الختم اياه...وظرفني تعرفني...واكتشفت ان مهنة وسط البلد في البطاقة....نجار مسلح. :lol: ..وبسبب هذه المهنة طلب موظف التامينات المرتشي 100 جنيه زياده :sad: ليعمل له خطاب تامينات بمهنة مدير سياحي...واكتشفت ان موظف التامينات له علاقة باصحاب شركات متنوعة النشاط يعني استراد,,سياحة...الخ ويحتفظ بخطابات لهذه الشركات مكتوبة و موجهة لمكتب التامينات ووائفة علي اسم المؤمن عليه... :unsure:

هذه هي مصر يا عزيزي تورونتو

او بعض المصرين المرتشين اللي بوظوا البلد

وعلشان كده احنا عايزين نخرج منها علي خير......

يعني نجار مسلح.... ب100 جنيه اصبح بقدرة قادر مدير سياحي؟......ارزاق

ربنا يستر علي البلد ده....محدش عارف هي رايحه لفين؟

[KANE]

بالرغم من ان الموضوع قد يبدو هزلياً أو كوميديً أو اشتغاله

إلا ان من سافر خارج مصر سواء للخليج أو لأوروبا أو لأماكن أخري يعرف الحقيقة

ان الناس بتبان على اصلها بره

تسجيل متابعة

ويما فعلاً شفنا من الناس

صوابعك مش زي بعضها :)

[Torontotruk]

فعلا سبحان الرزاق و عماار يا مصر و يا شباب مصر و انا كدة عرفت كلمة السر اول ما هسافر بره هاعمل كشك في اي ميدان و اكتب عليه ويلكم تو الاسكا وكلها يومين و ارجعلكم وانا شايل عيل على كتفى شعره اصفر و عيونه خضرا و هعمل شركة عمار يا الاسكا لتهجير الشباب :)

هو شكل تورنتو باشا مقالناش الجملة الكاملة

قالنا نصها بس : ويلكم تو ألاسكا

بس ليها نص تاني عشان مفعولها يشتغل

ومش هيقولهولنا لأسباب أمنية :)

يا جماعة انتم فاهمين غلط...مافيش اى معني لويلكوم تو الاسكا تاني..وسط البلد مابيكلمش انجليزى ...واللي علموا يبيع بردي آلو لازم تبئي دمك خفيف مع السياح....فالراجل حاول علي اد مائدر وربنا كرمه..وسبحان العاطي الوهاب...

[Torontotruk]

بالرغم من ان الموضوع قد يبدو هزلياً أو كوميديً أو اشتغاله

العضو كاني...القصص دي حئيئية...مائة في المائة...ووسط البلد مش واحد بس ...ده فيه منو كتير...ولو مش مصدق ممكن بنفسك تنزل وسط البلد ....ميدان التحرير...ميدان طلعت حرب...دول مجموعة من الشباب بيطلق عليهم لقب الخرتية جمع خرتي...واصل الشغلانة جاية من الهرم...وبالتحديد من عيلة الخارتوة..والخرتي الكبير كان بيسكن منطقة كفر الجبل وكان بيعمل في بيع التحف والعطور وتاجير الخيول والجمال للسياح..ولكن مع الوقت اصبحت هذه المهنة طريق للزواج من اجنبيات واحيانا من اجانب لغرض السفر اوالحصول علي المال كما ستكتشف بعد قليل في قصة مهلبية ام عيون عسلية...وللاسف الشديد اصبحت هذه لمهنة طريق للنصب علي السياح تحت اسماء كثيرة مما جعل وزارة الداخلية تنشئ ادارة جديدة للنصب السياحي...مرة اخري هذه القصص واقعية ويمكنك كما قولت التحري عن ذلك بنفسك في الاماكن السالف ذكرها ...

[Torontotruk]

نبذه عن مهلبية ام عيون عسلية....فتاة من القاهرة..في الثلاثين من عمرها...حاصلة علي دبلوم تجارة...تعمل في مطعم في منطقة الحسين يتبعه قهوة تبيع المشروبات واشياء اخري..لها اخت تكبرها بعام تعمل في محاسبة في الرقابة الادارية...والدها متوفي وامها تعمل اخصائية اجتماعية في وزارة الداخلية..كانت مهلبية تدرس في معهد التعاون للعلوم الادارية بطريقة الانتساب نظرا لظروف عائلتها الاقتصادية التي فرضت عليها العمل ...اختها كانت متزوجة من رجل يعمل في احد البنوك الكبري ولكنه كان علي خلاف دائم مع امها و مهلبية وكانت نتائج هذا الخلاف انه نجح في التفرقة بينهم فاصبحت اخت مهلبية من النادر ان تزورهم او حتي تتحدث معهم تليفونيا...

الام...كما قلنا...تعمل اخصائية في وزارة الداخلية وكانت متدينة وام فاضلة بمعني الكلمة...

مرت الايام وكانت مهلبية لاتزال في عملها بعد حصولها علي البكارليوس..ولكنها لم تفقد الامل..في البحث عن عمل اكثر احتراما وملائم لطبيعتها كأنسانة علي قدر كبير من الثقافة والجمال الذي كان سببا في شقاؤها احيانا و سعادتها احيانا اخري...

لم تيأس مهلبية في البحث عن العمل المنشود...حتي قابلت صديقة لها تعرفت عليها اثناء دراستها...يتبع

[Torontotruk]

قابلت مهلبية صديقتها مع زوجها صدفة في منطقة الحسين وعرضت عليها فرصة للعمل في احدي دول الخليج وبالتحديد سلطنة عمان ...كان نوع العمل في مجال التسويق والاعلانات ولكن كانت كل الشروط تنطبق علي مهلبية ماعدا شرط اللغة الذي كان من اهم الشروط للالتحاق بهذه الوظيفة...وبالفعل ذهبت مهلبية لتعلم اللغة الفرنسيةبجانب الانجليزية التي كانت تتحدثها بطلاقة.. وبعد عدة اشهر اتقنتها بالقدر الذي يجعلها تتعامل بكل سهولة مع مرؤسيها او ابناء البلاد الناطقين بها...ولكن كانت فرصة العمل قد ضاعت خلال الوقت الذي كانت تدرس فيهالفرنسية ولكن وعدتها ايجاد فرصة اخري خلال شهور...كانت مهلبية قد احبت دراسة اللغات فاسرعت في تعلم الاسبانيةالتي اتقنتها لدرجة انها قوبلت في احدي الوظائف المتميزة في احدي مكاتب شركات الطيران بالقاهرة وكان عملها هو في الاستعلامات عن الرحلات التي تقوم بها هذه الشركة الي آخره...ولكن حلم السفر الذي من اجله تعلمت الفرنسية.والاسبانية. كان يراوغ خيالها بين الحين والأخر...حت جائت لها مكالمة هاتفية من زميلتها تعرض عليها فرصة للسفر مرة أخري ولكن هذه المرة الي اسبانيا للعمل كمضيفة علي متن احدي العبارات العاملة بين اسبانيا والمغرب...كانت مهلبية تحب السفر ليس لغرض جمع المال فحسب ولكن لأرضاء شئ ما داخلها هذا ما قالته لي عند الحديث معها اول مرة في مستعمرة جبل طارق..ولكن من خلال كلامي معها ايقنت ان اقبالها علي السفر كان بدافع الهروب من شئ غامض لم استطيع معرفته بسرعة الامر الذي جعلني متشوقا لمعرفته ..وكنت كل يوم يزداد يقيني علي انها ليست المرة الاولي في حياة مهلبية في السفر خارج مصر...كانت غامضة..ولا تتكلم عن حياتها وحتي اذا سألها احد تتهرب بطريق لا يشعر بها احد غير الذي مهنم وعند فضول لمعرفتها...يتبع

[Torontotruk]

كنت قد تعرفت علي مهلبية ام عيون عسلية اثناء عملي في دولة مالي بغرب افريقيا في تصدير المانجو والليمون لاسبانيا والبرتغال وكانت مهلبية في هذا الوقت تركت عملها كمضيفة علي العبارات الي مكتب الشركة المالكة في اسبانيا وكانت تكثر في التنقل في ايام العطلات بين اسبانيا وجبل طارق وبالتحديد من جزيرة لاس بالماس الاسبانية حيث كان مقر عملها....وكنت دائما اقوم بشحن الريفير/الثلاجة التي تحمل المانجة والليمون/من خلال هذه الشركة التي تعمل بها والتي كانت لها فروع في كل انحاء اوروبا..كانت تعمل في قسم الشحن لاجادتها للاسبانية والفرنسية...وكنت اعلم انها تتقن اللانجليزية ايضا لان الشركة التي كانت تعمل بها انجليزية ولكنها كانت تكره التعامل بها لاسباب سوف اكصها :unsure: عليكم لاحقا..ارتبط بعلاقة صداقة وطيدة مع مهلبية الامر الذي جعلها تطلب مني ارسال الريفير وهي سوف ترسل لي ايصال الشحن وايضا تاكيد بالاستلام بواسطة البريد العادي اذا كنت لا املك الوقت بالحضور شخصيا

كل مرة...... الامر الذي ساعدني كثير في توفير الوقت والمال..وظلت العلاقة مستمرة حتي طلبت ان تحضر لزيارة مالي في اجازة تستمر لمدة عشرة ايام تقضيها مناصفة بين الاخيرة وجبل طارق..و بالفعل قبلت استضافتها..يتبع...

[Torontotruk]

وصلت مهلبية ام عيون عسليةالي مالي وكنت في انتظارها..وكنت قررت ان اعرف ماتخفيه وراء نظراتها المليئة بالغموض تارة والحالمة تارة اخري...وكنت اقيم في منطقة الشلالات بجانب النهر الكبير القريب من المنطقة الخضراء كما يطلق عليها سكان مالي البامبرة وتقع في الجنوب حيث تكثر الخضر ة..ويطلقوا علي هذه المنطقة ايضا ذات النهرين...لوجود نهرين كبيرين...سبحان الله ...كانت الرحلة من لاس بالماس الي باماكو اقصر من الرحلة الي منزلي فكانت المسافة بالطائرة من بالماس الي باماكو حوالي ساعة ومن باماكو الي جواه وهي مدينة تقع في الجنوب.ثلاثة ساعات..وصلنا الي منزلي ..وتعرفت مهلبية علي اصدقائي الماليين الذين عرضوا عليها رحلة في النهر الكبير ..هذه الرحلة كانت اول الطريق لمعرفة ماتخفية مهلبية..

كانت مهلبية قليلة الكلام ...كانت تملك مهارة في التحكم في اطراف الحديث ولا تجعل احد يتطرق الي حياتها الخاصة...ولكن عند بداية الرحلة النهرية بدأت في الحديث مع بعض النساء عن عادتهم واسلوب حياتهم و خلال حديثهم معها عرفت انها كانت متزوجة وبعد قليل علمت شئ آخر من احدي النساء اللاتي كان يتجاذبن اطراف الحديث معها ان لها طفل في الثامنة ...وعلمت انها بكت حينما بدأت في الحديث عنه...كل هذا علمته بعد عودتها من الرحلة النهرية...علاوة علي انها سباحة ماهرة...كان انشغالي قد منعني في الذهاب معها في هذه الرحلة علاوة علي شعوري بانها تريد الذهاب بمفردها...يتبع..

[Torontotruk]

عادت مهلبية ام عيون عسلية الي المنزل عصر اليوم الثالث وقد بدت عليها ملامح الارهاق فطلبت مني السماح لها بالذهاب الي النوم علي وعد بلقاء مساء نفس اليوم...كانت ملامح الارهاق تضيف الي وجها جمالاا علي جمال ونطقها للعربية ممزوجا بطريقة بنطق الاسبانية يشعر المتحدث معها بانه يعيش في الاندلس قبالة العصر الاسلامي...كانت اكثر من رائعة علاوة علي الهدوء الصارخ الذي يشع بين جنبات ملامحها الطفولية..قررت ان اعرف حقيقة هذه المرأة بعد ان سرح خيالي في اكثر من تحليل...

مساء نفس اليوم بعد وجبة العشاء التي كانت مليئة بالأكلات الشعبية المالية كالمافي..والدلجان ومارو الحوت وهذ ا النوع من الطعام شائع في غرب افريقيا كلها...بدأت الحديث معي هذه المرة بسؤال عن شراب السوسو ...وهو شراب ممزوج بالفانيليا مع الماء المثلج مع قليل من النشا والخميرة ...وبعد شرحت لها طريقة عمله واسماء الطعام دار هذا الحديث معها...

انا...انا سمعت انك بكيتي في الرحلة..

مهلبية...ايوة...

انا...انا حاسس انك عندك كلام كتير ومحتاجة تكلمي ..

مهلبية...انا قررت اسيب مصر علشان ماتكلمش لان الكلام مش حيفيد بحاجة...

انا...ممكن لو اتكلمت تستريحي..مش مهم تغيري اللي حصل...علي الاقل تلائي حد يشاركك .......في اى حاجة ممكن تخفف عليكي..

مهلبية...انت خففت عليا وانا متشكرة جدا انك ابلت استضافتي...

انا...بس انا حاسس انك زعلانة...ولازم اعرف انتي زعلانة من ايه..

مهلبية...صدئنى لو حكيتلك مش حيتغير في الموضوع حاجة...

انا...طب انتى ليه متاكدة...

مهلبية...لان مشكلتي ماحدش يقدر يحلها غير واحد بس

انا...ونعم بالله...

.لكن ربنا جعل الناس احيانا سبب ...

مهلبية...انا فاهمة طبعا...بس صدئنى مش حتأدر تعمل حاجة..

انا...انا سمعت انك كنت متزوجة وعندك طفل...ولد

مهلبية...ايوة...

انا...وعايش معاكي...

مهلبية...لأ عايش مع ابوه في امريكا...

انا...يعني هي دي المشكلة .......

مهلبية....بالظبط...ومافيش غيرها...

انا...من زمان ماشفتهوش...

مهلبية....من سبع سنين...

انا...يعني انا فهمت من الست اللي كنتي بتتكلمي معاها علي المركب انه عنده تمن سنين...

مهلبية...ايوه انا ولدته وعيشت معاه سنة...وبعدين حصل اللي حصل...

انا...ايه اللي حصل...انا عرفت مشكلتك اوليلي يمكن اأدر اساعدك...ماتنسيش انا محامي...والقانون حواراته كتيرة..

مهلبية....كان ممكن لو كان لسة عايش في كندا...كنت عرفت اخده من غير حتي اى محامي ...

انا...انت مش أولتيلي انه في امريكا...

مهلبية...انا ولدته في كندا..وابوه بعد كده هرب بيه علي امريكا لمراته الامريكية...

انا.....طب احكيلي الكصة من طق طق لباي باى...

مهلبية...الكلام اللي حئولهولك اول مرة حد يعرفه برة عيلتي انت تاني واحد يعرفة بعد صاحبتي في مصر...

انا...كالعادة ...اوعدك ماحدش حيعرف حاجة وسرك في بير. :) .مع اني مش شايف حاجة لغاية دلوقت مش طبيعية...يتبع

[Torontotruk]

اخذت مهلبية تروي قصتها لي وكنت في قمة التعجب ...بدأت قصتها عندما كانت في الثامنة عشر من عمرها وكانت في المدرسة التجارية...حين توفي والدها ...وفي يوم جنازته ذهبن الي الكنيسة ليعملن الصلوات اللازمة قبل دفنه...وهناك تعرفت علي زوجها الذي كان يقيم في كندا ..كان طبيب شاب يكبرها بخمسة عشر عام...تعلم في كندا وحصل علي درجة الدكتوراه في علم الوراثة...وكان صديق لزوج اختها وكان في ذلك الوقت في زيارة لمصر بغرض الزواج ...لم يكن الوقت مناسب للحديث معها...فتكلم مع زوج اختها لكي يقوم بعمل اللازم لجلسة تعارف بين العائلتين...وبالفعل قام زوجها بزيارة اسرة مهلبية ..وكانت ام مهلبية تعرف اسرة هذا الطبيب سلفا ولها علاقة بامه التي كانت تعمل في الكنيسة التي كانت تترد عليها لعمل الصلوات...و فهمت ان امها كانت موافقة حتي من قبل ان تري هذا الطبيب...وبالفعل تمت الزيجة وباركها كل الحاضرين بما فيها العائلتين...سافرت مهلبية الي كندا ..ليس لها اصدقاء سوى اسرة واحدة قامت باستضافتها قبل عودتها الي مصر في ايامها الاخيرة ...كان كل عملها هو القيام بالاعمال المنزلية في بيت زوجها الذي ادعي انه ملك له...وبعد مرور عامين ونصف حملت مهلبية في ولدها الذي كان بمثابة افضل الاخبار سماعا لزوجها...اخذت مهلبية تحكي قصتها تارة وتبكي تارة اخري..واضافت انه كان يعاملها بكل احترام وحب...وبعد ان وضعت طفلها اخذ يغضدق عليها بمشاعر طالما طوقت اليها فتاه لم تتجاوز العشرين من عمرها...كانت كل طلباتها مجابة...علاوة علي انه احضر امرأة للقيام باعمال المنزل بالنيابة عنها...واصلت مهلبية الكلام وهي تبكي...وفجأة قامت لتنظر من النافذه التي كانت تطل علي النهر...وقالت فكرت كثيرا في الانتحار...ولكنى تراجعت املاا في النظر لوجه ابني يوما ما...واصلت الحديث ...ولكن هذه المرة عن المرأة الامريكية التي دعاها زوجها لقضاء عطلة نهاية الاسبوع معهم ...واخذت في وصفها لي...يتبع...

[Torontotruk]

وصفت مهلبية صديقة زوجها الامريكيه ..علي انها طبيبة وتعمل في احدي جامعات امريكا...قالت بالحرف الواحد شعرت عندما رأيتها ان شئ ما نزع من احشائي ... لكنها جميلة وفي عمر زوجها تقريبا...اخذ زوجى يتحدث معها في امور العمل لانها كانت حاصلة علي الدكتوره في نفس تخصص زوجها..وعن بعض المشاريع والابحاث العلمية التي يودوا القيام بها في امريكا.. لاحظت بشده اهتمام زوجي بهذه المرأة وعندما سألته عن نوع العلاقة التي بينه وبينها...قال انه يرغب في الانتقال الي امريكا حيث فرصة نجاحة هناك اكبر من فرصته في كندا..قالت كنت لا امانع في الاقامة معه في اى مكان حتي في مصر ان اراد ذلك...وخاصة بعد ان روزقتنا بهذا الطفل الذي لم يتجاوز شهره العاشر..واصلت حديثها ...شعرت بتحول كبير في العلاقة وكثر ذهابه الي نيويورك حيث تقيم صديقته هناك...حتي عندما مرض طفلنا لم اجده بجانبي وحملني مسئوليه مرضه ...حتي جاء نبأوفاه امه وقررنا العوده الي مصر لحضور جنازتها ..ولكن مر طفلنا وتحذير الطبيب لنا بخطورة سفره بالطائرة جعلني اطلب منه السماح لي بالبقاء ...ولكنه اصر ان اسافر معه وترك طفلنافي احدي الاماكن المخصصة برعاية الاطفال حديثي الولادة...

عدنا الي القاهرة وحضرنا جنازة امه...وبعد خمسة عشر يوما سافر الي محافظة الفيوم حيث تقيم عائلة امه حيث كانت تقيم امه في ايامها الاخيرة لوداعهم وطلب مني البقاء مع والدتي لحين عودته وطلب منها ان تجهز نفسها للسفر بعد اربعة ايام علي الاكثر...

كانت هذه....آخر مرة تري فيها زوجها....سافرت للبحث عنه في الفيوم .........واكتشفت انه لم يذهب الي هناك كما قال لها...باعت امها كل ماتملك لشراء تذكرة طائرة الي كندا..وعندما وصلت الي المنزل اكتشفت وجود عائلة كنديةتسكن فيه وعندما علموا بقصتها ارسلوها الي مكتب التحقيقات لعمل اللازم ...واكتشفت ان المنزل يستأجرهوا زوجها وليس ملكا له كما كان يدعي...كانت مهلبية قدتعرفت علي احدي الاسر في احدي حفلات اعياد الميلاد...فاتصلت بهم ..وبالفعل قاموا بمساعدتها ...واكتشفت انه قد تكلم مع احد افراد هذه العائلة بما سينوى عمله...بالانتقال الي امريكا والاقامة مع هذه المرأة...وعلي اثر هذا الخبر انهارت مهلبية ام عيون عسليه ودخلت المستشفي لعده اشهر...وبعد تحسن حالتها عرضت عليها هذه الاسرة عدة فرص للعمل في كندا وخاصة بعد حصولها علي الجنسية...ولكنها فضلت العودة للاقامة مع امها...

لم تياس مهلبية وطرقت جميع الابواب في كندا ومصر ...وحتي السفارة الامريكيه...ولكن دون جدوى...ولكن الشئ الاكيد الذي عرفته انه قام بتغيير اسمه للاقامه الأمنه في امريكا...

قالت لي...لقد قررت الرحيل من مصر ..لان.مع كل طرقة من طرقات باب منزل امي كنت اشعر انه زوجي و معه ابني الذي بلغ الأن الحادية عشر من عمره....

تمت

[Torontotruk]

القصة القادمة كنت قد كتبتها في الماضي علي صفحات هذا المنتدي ...ولكنى اعتقد ان هذا التوبيك هو المكان الصحيح لها...وهي في قائمة لؤم المهاجرين...بعنوان قبلة الوداع...ولكني افضل ان اسميها...الصيدلي اللي افتكر نفسه فهلوي...