طبيب اسنان رايح الكويت بفيزا زيارة اروح و لا ما ارحش

[eryocool]

انا حادخل في الموضوع علطول

انا طبيب اسنان دفعة 2006 متخرج من اسكندرية جيد جدا مع مرتبة الشرف و معايا cv كويس الي حد ما

سبق لي العمل في السعوديه لمدة قصيره في مكان خاص لكن كان فيه خلل في بنود العقد و ما حصلش نصيب و مكملتش

المهم الموضوع اللي انا عايز اسال فيه

وانا لي خالة عايشة في الكويت من 20 سنه و جوزها كويتي و كمان اولادها كوايته

المهم

هي بتعملي فيزه زياره عشان اروح انا و ادور علي شغل بنفسي و اقابل اصحاب العمل بنفسي

فانا محتاج نصيحه من الاخوه اللي غملوا بالكويت او اللي لهم خبره اروح ولا لأ؟

يعني فيه فرصة الاقي عمل بمرتب كويس ولا صعب الاقي اصلا علما اني ممارس عام

فارجوكم محتاج نصيحة عشان ما اصرفش فلوس في السفر عالفاضي و ممكن احبط وانا في بداية الطريق

وهل لو لقيت عمل ممكن احول الاقامه من هناك ولا لازم ارجع مصر و اعمله من مصر

وممكن حد يقول لي تكاليف فيزا الزياره و اجراءتها

ارجوكم محتاج نصيحه انا عارف ان فيه ناس في المنتدي ده كتير عندهم خبره

مستني الردود لو سمحتو

تم تعديل 11 يناير 2009 بواسطة eryocool

[امال العطيفى]

السلام عليكم اخى دكتور الاسنان اولا فيزا الزيارة تستخرج مجانا غير عدم الممانعة مصاريفك هتكون ثمن تذكرة الطيران لو انت جاى فيزا تجارية تتحول عادى الى اقامة عمل لكن كارت زيارة عائلية بتحول فحالة انك لو تعاقدت مع جهة عمل قدر تغادر للبحرين وترجع الكويت تكمل اجراءتك وان شاء الله تحصل على فرصة عمل جيدة وانشاء الله تكون متمكن وايدك خفيفة عشان نتعالج عندك بالكويت وربنا يوفقك

[eryocool]

جزاك الله خير يا اختي

و يا ريت اللي يعرف حاجه كمان ما يبخلش علينا

و يا ريت لو حد يقولي مرتب الطبيب في حدود كام

و يعني اقل حاجه ممكن الواحد يقبل بيها كام عشان مصاريف المعيشه

[الجدار]

بسم الله

أعتقد انه من الأفضل انك تبعت السي في بتاعتك لخالتك وهي ممكن تشوفلك فرصة عمل كويسة وبالذات ان جوزها كويتي ودي يعني مش حقولك الحل السحري هنا في الكويت ده لو كان في مجال انه يخدمك.

لو حابب انك تسافر بنفسك من الأفضل تكون الفيزا زيارة تجارية علشان لو ربنا وفقك في شغل تحول اقامة من غير ماتنزل مصر لأن الإجراءات في مصر معقدة ممكن تقعدلها شهرين. ومصاريف التحويل بتبقى على المكان اللي حتشتغل فيه ولو زنقت وخلوك انت اللي تدفعها حتبقى حوالي 200 دينار.

وفي شركة طيران الجزيرة أسعار التذكرة فيها مناسب ومش غالية لو عايز تشوف الأسعار او تحجز من على النت في الموقع ده http://book.jazeeraairways.com/skylights/c...n/skylights.cgi

أعتقد ان راتب الدكتور المفروض مايقلش عن 500 دينار وده يعتبر مبلغ كويس هنا ولو اتعرض عليك اقل من كده ماتقبلش لأن المعيشة غالية جداً في الكويت.

ونصيحتي لو في شغل كويس أدامك في مصر ماتسافرش. أو شوف دولة غير عربية.

ربنا يوفقك للي فيه الخير ليك.

تم تعديل 12 يناير 2009 بواسطة الجدار

[eryocool]

الف الف شكر يا حبيبي

انا فعلا بغتلها السي في و هي تقول تعالي انت و دور بنفسك عشان اصحاب العمل يشوفوك او يختبروك

وبالنسبه لزوجها انت عارف بقي الاحراج فانا كلامي مع خالتي احسن

المهم

انا متشكر قوي و محتاج لنصيحة تانيه عن تقريبا كام متوسط مصاريف السكن و الاكل لان انا شويه اسمع ان الكويت غاليه و شويه رخيصه

و يا ريت لو حد يعرف مكان يكون عايز دكتور اسنان او نصيحتكوا ابدا منين

و من الاخر كده فيزا الزياره احسن و لا استني لما اشوف عقد عن طريق شركه

معلش مصدعكو

تم تعديل 12 يناير 2009 بواسطة eryocool

[eryocool]

اه صحيح بمناسبة كلامك عن الدول الغربيه

انا فعلا باحلم اني اسافر دولة اجنبيه

وكنت مقدم في منحة فولبرايت لامريكا cci العام الماضي و اتقبلت لكن شوف النصيب بقي .......

اتصلوا بي و انا كنت في السعوديه و قتها و عرفت من اهلي وانت فاهم بقي الناس ......... قالولي عصفور في اليد احسن .......

و الحجه بقي انت عارف ...((( يا بني حتسيب النبي و تروح عند الكفار ))\

قلت ماشي خليني قاعد وعصفور في اليد بس في الاخر ندمت

و اديني رجعت من السعوديه بعد ما راحت و خسرت الاتنين .....بس الحمد لله رب ضره نافعه

وانا مقدم حاليا في الجرين كارد و مستنيه بقي بس برده مش مضمون

معلش طلعت بره الموضوع بس حبيت افضفض شويه

مش ده برده منتدي حوارات المصريين هاهاهاااههاهه

تم تعديل 12 يناير 2009 بواسطة eryocool

[الجدار]

يا سيدي اتكلم في اللي انت عايزه يعني احنا ورانا ايه. ربنا يوفقك وتسافر اي دوله غير دول الخليج يعني بتشوف كمية كره مش طبيعية وتكسير واحباط لنفسك بتحس انك مش بتتعامل مع ناس كله بيبصلك انك من المرتزقة اللي لحم كتافك من خيرهم اكنهم بيدوك الفلوس صدقة مع انك بيبقى طالع عينك.

المهم خلينا في موضوعنا بالنسبة للسكن ممكن يبقى حظك كويس والسكن يكون على المكان اللي حتشتغل فيه. لو حتشوف سكن ده حيكون على حسب المنطقة وفي الغالب بيبقى النظام واحد مأجر شقة ومشترك معاه كذا واحد في الإيجار يعني الشقة في المتوسط حتبقى ب 150 او 180 دينار وبيتقسم على العدد اللي فيها والأكل ممكن 50 دينار في الشهر طبعاً ده مع الإقتصاد وخروج ومواصلات وتليفونات وخروج قول زيهم.

شوف فيزا الزيارة التجارية أحسن علشان سهل انك تحولها لعقد العمل من غير اجراءات في مصر وطبعاً مش حقولك التعقيد والروتين اللي حتلاقيه في مصر لو طالع بعقد انا فاكر اني فضلت اخلص في اوراقي في مصر حوالي شهرين لدرجة ان الناس كانوا خلاص حيلغوا التعاقد لولا ان ربنا يسر الحال.

أي استفسارات احنا في الخدمة على أد ما نقدر ان شاء الله وربنا يوفقك.

[الحاج فوزى]

أخى الفاضل ..

العمل فى القطاع الحكومى يستلزم عام أخر أو عامين خبرة زائدة عن ما تحمل .. اللهم إلا واسطة جامدة جداً .. وهى صعبة

سيكون أمامك العمل فى القطاع الأهلى ..

وهو أيضاً محدود لأن التخصص يحتاج لأطباء خبرة و ماجيستير ودكتوراه .. وليس ممارس عام .

لا أقصد أن تفقد الأمل .. لكن حتى لا تأتى بأمل كبير ..

قد تتوفق فى العثور على عمل بإحدى العيادات أو المستشفيات الخاصة .. وساعتها ستتطلب نقل إقامة . ولأنك بدون إقامة ( زيارة ) ستكون هذه عقبة إضافية .

لأنه يستلزم ان يقوموا بعمل إقامة لك من البداية .. وهو ما يكون غير مستحب لدى الكثيرين لما فيه من عطلة ..

لكن بإستطاعتهم أن يقوموا بعمل زيارة تجارية لك .. تسافر مثلا ً للبحرين ليوم أو إثنين.. وتعود على الزيارة الجديدة ساعتها تستطيع الشركة تحويلك على إقامتها خلال شهر .

وتقوم بكل الإجراءات بالكويت وليس بمصر .

طبعاً أنصحك بتوثيق كافة شهاداتك من الجامعة والخارجية المصرية ثم القنصلية الكويتية بمصر .

بخصوص الراتب .. لا يمكن أن يقل راتب الطبيب بالفعل عن 500 دينار كحد أدنى لمستوى معيشى مناسب .

طبعاً الأمر نسبى ، فالأمر يختلف لو كنت متزوج أو عندك أطفال .. فحينها لن تكفيك هذه الـ 500 معيشة ( أكل وشرب وسكن وإنتقالات )

أتمنى أن أكون أفدتك ..

[الجدار]

عفواً يا حاج فوزي الفيزا التجارية لا تستلزم الخروج من البلد بل يتم تحويلها داخل البلد على عكس فيزا الزيارة العائلية اللي بتتحول لو طلعت من البلد. شكراً ليك

[eryocool]

يا سيدي اتكلم في اللي انت عايزه يعني احنا ورانا ايه. ربنا يوفقك وتسافر اي دوله غير دول الخليج يعني بتشوف كمية كره مش طبيعية وتكسير واحباط لنفسك بتحس انك مش بتتعامل مع ناس كله بيبصلك انك من المرتزقة اللي لحم كتافك من خيرهم اكنهم بيدوك الفلوس صدقة مع انك بيبقى طالع عينك.

انت بتقول فيها

طب والله مره راكب تاكسي في جده و السواق كان بيسالني ايه رايك في السعوديه و السعوديين و هو كان سعودي علي فكره

فجاوبت بحسن نيه بقول له عادي زي مصر اي مكان في الحلو و الوحش

لقيته هاج عليا و قالي المكان اللي بيوكلك و يشربك بتقول عليه كده

بصراحه الواحد كان جديد في البلد و مرتضش اعمل مشكله عالفاضي

المهم خلينا في موضوعنا بالنسبة للسكن ممكن يبقى حظك كويس والسكن يكون على المكان اللي حتشتغل فيه. لو حتشوف سكن ده حيكون على حسب المنطقة وفي الغالب بيبقى النظام واحد مأجر شقة ومشترك معاه كذا واحد في الإيجار يعني الشقة في المتوسط حتبقى ب 150 او 180 دينار وبيتقسم على العدد اللي فيها والأكل ممكن 50 دينار في الشهر طبعاً ده مع الإقتصاد وخروج ومواصلات وتليفونات وخروج قول زيهم.

شوف فيزا الزيارة التجارية أحسن علشان سهل انك تحولها لعقد العمل من غير اجراءات في مصر وطبعاً مش حقولك التعقيد والروتين اللي حتلاقيه في مصر لو طالع بعقد انا فاكر اني فضلت اخلص في اوراقي في مصر حوالي شهرين لدرجة ان الناس كانوا خلاص حيلغوا التعاقد لولا ان ربنا يسر الحال.

أي استفسارات احنا في الخدمة على أد ما نقدر ان شاء الله وربنا يوفقك.

الله يخليك يا باشا و شكرا علي النصيحه

و الواحد برده مش متسربع قوي و بحسبها المره ده عشان ما اعملش زي المره الاولي في السعوديه و اقبل بأي عقد و السلام و استحمل بقي اللي يجرالك

انا عايز اقولك حاجه كمان ان اللي بيعمل كده هي شركات السفر اللي مرخصه الاسعار و بتوهم الكفيل ان اول بس ما يقول يا عقد حيلاقي الاف بتتحدف عليه

وبالتالي ما بيكونش هناك فرصه كبيره للتفاوض

يالله الحمد لله علي كل شئ

سلام

[eryocool]

أخى الفاضل ..

العمل فى القطاع الحكومى يستلزم عام أخر أو عامين خبرة زائدة عن ما تحمل .. اللهم إلا واسطة جامدة جداً .. وهى صعبة

سيكون أمامك العمل فى القطاع الأهلى ..[وهو أيضاً محدود لأن التخصص يحتاج لأطباء خبرة و ماجيستير ودكتوراه .. وليس ممارس عام .

لا أقصد أن تفقد الأمل .. لكن حتى لا تأتى بأمل

اطلاقا

ده حتي لما اعرف كل حاجه احسن ما اروح بوهم عالفاضي

ولو لاحظت انا كاتب عنوان الموضوع اروح ولا لأ

قد تتوفق فى العثور على عمل بإحدى العيادات أو المستشفيات الخاصة .. وساعتها ستتطلب نقل إقامة . ولأنك بدون إقامة ( زيارة ) ستكون هذه عقبة إضافية .

لأنه يستلزم ان يقوموا بعمل إقامة لك من البداية .. وهو ما يكون غير مستحب لدى الكثيرين لما فيه من عطلة ..

لكن بإستطاعتهم أن يقوموا بعمل زيارة تجارية لك .. تسافر مثلا ً للبحرين ليوم أو إثنين.. وتعود على الزيارة الجديدة ساعتها تستطيع الشركة تحويلك على إقامتها خلال شهر .

وتقوم بكل الإجراءات بالكويت وليس بمصر .

طبعاً أنصحك بتوثيق كافة شهاداتك من الجامعة والخارجية المصرية ثم القنصلية الكويتية بمصر .

بخصوص الراتب .. لا يمكن أن يقل راتب الطبيب بالفعل عن 500 دينار كحد أدنى لمستوى معيشى مناسب .

طبعاً الأمر نسبى ، فالأمر يختلف لو كنت متزوج أو عندك أطفال .. فحينها لن تكفيك هذه الـ 500 معيشة ( أكل وشرب وسكن وإنتقالات )

أتمنى أن أكون أفدتك ..

عموما شكرا علي النصيحه و جزاك الله خير

وانا كده برده حاحسبها نع نفسي

[Alex Lover]

الاخ الفاضل

اغلب اعلانات التوظيف في الكويت اللي بتطلب اطباء ولو حتى حديثي التخرج بتكون مشترطة تصريح مزازله المهنة في الكويت .. اعتقد دي مجازفه وياريت انت تبحث على النت باستمرار وتقدم وانت في مصر بواذن الله تلاقي رد ويتم التواصل وتبقى الامور ماشيه في السليم

وربنا معاك .

[Bustami]

السؤال المهم ماذا ستخسر اذا ذهبت للكويت سواء كارت زيارة تجارية او عائلية ولم توفق بعقد عمل

هل ستترك عملك في مصر؟ هل ستخسر وظيفتك في مصر؟

لازم تروح وتجرب والله هو الذي يرزق الجميع , خالتك ستسهل لك كثير من الاشياء

السكن مع 2 زملاء ممكن يكلف 50 دينار , السكن لوحدك ممكن تسكن 150 دينار وفي منطقة قريبة

الاكل والشرب واللبس والمواصلات 100 - 150 بالكتير

موضوع البحرين انسى , ممنوع حاليا , احسن حاجة ان شركة هناك تعملك زيارة تجارية وتعملك الاقامة بعد ما توصل وتبدا البحث عن عمل

الاقامة تكلف 200 دينار

تم تعديل 13 يناير 2009 بواسطة albostamy

[الحاج فوزى]

عفواً يا حاج فوزي الفيزا التجارية لا تستلزم الخروج من البلد بل يتم تحويلها داخل البلد على عكس فيزا الزيارة العائلية اللي بتتحول لو طلعت من البلد. شكراً ليك

أخى الفاضل صاحب الموضوع يتحدث عن زيارة عائلية عن طريق خالته .. ، لذا ردى على أنها زيارة عائلية ..

وفى حالة لو كانت زيارة تجارية فيجب أن تكون على نفس الشركة ذات الإختصاص الطبى والتى ستقوم بعمل إقامة .

لطفاً تقبل التحية والتقدير .

السؤال المهم ماذا ستخسر اذا ذهبت للكويت سواء كارت زيارة تجارية او عائلية ولم توفق بعقد عمل

هل ستترك عملك في مصر؟ هل ستخسر وظيفتك في مصر؟

لازم تروح وتجرب والله هو الذي يرزق الجميع , خالتك ستسهل لك كثير من الاشياء

السكن مع 2 زملاء ممكن يكلف 50 دينار , السكن لوحدك ممكن تسكن 150 دينار وفي منطقة قريبة

الاكل والشرب واللبس والمواصلات 100 - 150 بالكتير

موضوع البحرين انسى , ممنوع حاليا , احسن حاجة ان شركة هناك تعملك زيارة تجارية وتعملك الاقامة بعد ما توصل وتبدا البحث عن عمل

الاقامة تكلف 200 دينار

أخى الفاضل ..

بالفعل يمكن أن يجد سكن مع زملاء .. وبالفعل يمكن أن يجد سكن لحاله بـ 150 دينار .. لكننا نتحدث عن سكن مناسب لطبيب . وهو ما سيزيد عن ذلك بعض الشىء .

أما الزيارة التى سيحولها ..

وليست أى شركة تستطيع عمل زيارة تجارية لطبيب .. يجب أن تكون ذات نشاط له علاقة بالنشاط الطبي .

والـ 200 دينار هى رسوم تحويل الزيارة لإقامة .. يزيد عليها رسوم الإقامة نفسها ورسوم التأمين الصحى ..

ناهيك عن ثمن الإقامة نفسها ، والتى تصل فى بعض الأحيان لـ 30 ألف جنيه ..( إقامة مباعة من شركة .. طريقة مخالفة للقانون )

بالإضافة لكل هذا .. حضرتك تدعوه لفعل غير قانونى وهو شراء إقامة .

ومن ثم البحث عن عمل .

من فضلك وضح له ما تقول حتى يستطيع إتخاذ قرار مناسب ويكون مسؤولاً عنه وعن نفسه فى الغربة لآحقا .

كل التحية .

[eryocool]

انا متشكر جدا والله علي كل التوضيحات ده

وصراحه الواحد بدأ يحس ان الموضوع صعب شويه بفبزا الزياره

الواحد ممكن يستني عقد عن طريق شركه هنا احسن

واللي فيه النصيب ربنا حيسهله

[الحاج فوزى]

انا متشكر جدا والله علي كل التوضيحات ده

وصراحه الواحد بدأ يحس ان الموضوع صعب شويه بفبزا الزياره

الواحد ممكن يستني عقد عن طريق شركه هنا احسن

واللي فيه النصيب ربنا حيسهله

الرزق هيجيلك مكان ما تكون ..

بس النصيحة حاول تخلص وتكمل التخصص .. علشان لما تيجى تيجى على شىء كويس ..

وتقدر تبنى كارير جنب الفلوس .. وكمان فلوس اكتر من العادى بالممارس العام ..

لأن الإستشارى والتخصصى أكيد رواتبهم ووضعهم أحسن ..

إستغل وقتك وكمل دراستك وربنا هيبعتلك الرزق الحلال إن شاء الله ..

[ahlawycatalony]

جزاكم الله خير

ولكن اكتر شىء عاجبنى فى الحوار

ان 99% مننا مقتنع ان البعد عن الدول العربيه دا راحم