أستودعكم الله

[se_ Elsyed]

أردت أن أقول لكم جميعاً " أستودعكم الله " بمناسبة قيامي بإجازتي السنوية لمدة شهر وحيث أنني قررت أن أقوم بإجازة سلبية - زي لعيبة الكوره - يعني أنام وأتفسح وأهيص ( وأكل حواووشي ) فللآسف مش هأقدر أشارك فى المنتدى خلال هذه الفتره ... وفعلاً فعلاً سوف أفتقد حاجة مهمة وحلوه في حياتي ..

وأنا طالب حاجتين بس خلال غيابي :

1- أطلب من السير لانسلوت ييجي يقعد مكاني .

2- أرجو من أخويا سكوربيون - سيناريست المنتدى - أنه مايستغلش فترة غيابي ويكروت دوري فى فيلم " الصحبه الهنية فى كلية بهية " علشان لما أرجع هأحتاج نسخة من السي دي بتاعت الفيلم علشان أتفرج عليها برواقه.

أشوف وشكم بخير جميعاً ... والسلام عليكم ورحمة الله وبركاته

أخوكم س س الرحالة المشهور والملقب بملك البحار السبعه .

[elbana]

على رأي حشيش : عقلي الباطن :كويس آدينا خلصنا من واحد كان عامل إزعاج في التوبيك بتاع السكوت

إحم .. ح توحشنا والله يا سي السيد (وش خبيث ومريب ومرتبك وفرحان بس عامل نفسه زعلان) .

أحلى حاجة في الدنيا الأجازة السلبية ، النوم والفرجة على التلفزيون ، والفسحة والتمشية ، والسهر لوش الصبح والنوم للساعة ثلاثة ، الله ع الكسل .

أتمنى لك أجازة سعيدة ، وما تكترش في الحواوشي ، الدنيا صيف ، وترجع بألف سلامة .

[amir]

أجازه سعيده يابو السيد

سنفتقدك و نفتقد الحواوشى

فى انتظار عودتك سريعا

[farasha79]

اجازه سعيده جدا يا سي السيد

و انشالله خلال الفتره دي ماتنساش المنتدى و تنسانا لاننا بجد هنفتقد وجودك وسطينا

مره تانيه اجازه سعيده

و انا في المطار واقفه بودعك اهو

[بنت شعنونة]

تروح وترجع بالسلالالالامة يا سي السيد

ويارب تنبسط في مصر

وترجع تحكيلنا عن مغاااامراااتك

واوعى تنسى تروح درييييم لالالاند

اجازة سعيدة يارب "وش بيشمر دراعه عشان ياكل الحواووشي بتاع س س "

[nora]

بقى انت سيبني هناك بندهك عليك وبطلب حووشي وانت بتلم الفرشة هنا اية مش عايز تاكل عيش ( وش واحد عايز ياكل حد)

تروح يا عم بالسلامة يارب بس خلي بالك بلاش تتقل في المحشي والبط والحمام والذي منه لتجيلك تخمة وترجعلنا تعاني من الكسل وتبدأ تتفرج على مريم نور وتكتب في باب صحتى اريد حلا

سلماتي لمصر وزوجي العزيز و تيته وعمي وبنت عمي زعمتى وابن عمي وياريت تبلغ خالتي ان الشراب الي بعتتهولي طلع ديق شوية وسلامي الي ارض اسكندرية و سلامي ..........................................( انت وراك حاجة اعتقد انك هتقضي الاجازة توصل سلماتي )

[linux]

مع الف سلامة يازميل الكفاح الحواوشي المسلح بالشطة

تمنياتى لك و للأسرة الكريمة بأجازة سعيــــدة

و عليك بأسماك المحروسة

وكذلك حلاويتها و شاورمتها

اما عن كبابها ... فحدث و لاحرج

ولا تنسى نصيبك من نكت ولادها و بناتها

و الغروب على شط بحرها

اما اللى يضايقك فأحلقله

وقول بس أنك جاى من طرف المعلم لينكس

بس على الله ما تنسناش بالفته!

___________________________________

لينكس ظروفى متأزمة لينكس

حامى حمى كمب شزار و تاجر سكسونيا

[Faro]

أجازة سعيدة ...

[Spider]

أخى س س

حتوحشنا جدا

فقط لى طلب صغير عندك قبل الفسحة!

تأكد ان فردتين الجزمة اللى ستسافر فيهم أنهم ذى بعض ومش فردة وفردة ذى كل مرة! متنساش أعمل معروف..(وش ماشى حافى)

[freefreer]

و الله عال !! .. و الله عال !! .. معاليكم عمال تتخذ قرارات كدة بثقة .. و عمال تقول تصريحات افتراضية عما سيحدث و لا كأن المنتدى سايب ..

فين سعادتك تصريح الأجازة موقع من اثنين منسقين قدام و عليه ختم نسر المنتدى .. و الا حتتسجل غياب .. و توقع عليك غرامات .. و بلاوى متلتلة انت مش قدها ..

[crossfield]

مصر هتنور يا أبو السيد

أجازة سعيدة ان شاء الله :)

[Lancelot]

هتنور مصر يا أبو السيد .... تيجي و تروح بالسلامة (في مصر) و تروح و ترجع بالسلامة (في المنتدي) ...

وأنا طالب حاجتين بس خلال غيابي : 

1- أطلب من السير لانسلوت ييجي يقعد مكاني .

و أنا ما قدرش أقعد مكانك أبدا ... مكانك محفوظ لحد ما ترجع بالسلامة ....

2- أرجو من أخويا سكوربيون - سيناريست المنتدى - أنه مايستغلش فترة غيابي ويكروت دوري فى فيلم " الصحبه الهنية فى كلية بهية " علشان لما أرجع هأحتاج نسخة من السي دي بتاعت الفيلم علشان أتفرج عليها برواقه.

و هو فين السيناريست بس ... إختفي خالص ... عمل لنا Demo للقصة بتاعه و بعدين تبخر ... و لا حتي قال لنا إزاي نجيب النسخة الكاملة ...

و يا س س يا حبيبي ... هل ممكن نتقابل و إنت في مصر .... في إجتماع أو بأي طريقة .... لأن فيه ناس كتير نازلين أجازة و هتكون فكرة كويسة لو إتقابلنا كلنا كده....

[مصرى]

ترجع للمنتدى بالسلامة يا أبوالسيد

ولكن شهر كتير .. وفى مصر إنترنت أيضا وملايين من خطوط التليفون .. وكذلك هناك تنتشر الآلاف من مقاهى الانترنت .. إتصال من أى مقهى فيهم ممكن يطمنا ..

(فيلم عربى قديم)

[Cleo]

دى مصر هايبقى النور فيها نورين...

س س و الطفشان.....

ياللا أجازة سعيدة إنشاء الله

[moody00x]

وأنا كمان راجع إنشاء الله خلال أسبوعين بعد غياب سنة ونص عن مصر واهلى وحبايبى وخصوصآ الواد الشقى أحمد اللى إتولد وانا بعيد عنه ولسه ماشفتش غير صورته بس....ده هيبقى موقف مشحون بكل أنواع الدراما فى المطار...

[achnaton]

بسلامة الله يا حاج سيد .. وزى ما بيقول الأخ مصرى ..قهاوى النت ملأت القرى المدن فى المحروسة .. ما هو مفيش شغل .. حتبقى بطالة وقعدت بيت .. على العموم حظك كويس .. الطفشان ناوى لها برضه ممكن تأخده تأكله عيش مرحرح .. وتخدوا لفة بالفرنساوى إذا ماكان مازال موجود .. ولما حتروح الزقازيق .. مش حترقى عربات حنطور خلاص .. حتلاقى " كتكت " موتسكل معملول كابينة .. بشيل أثنين لو زى حالاتى عيدان قصب .. أما إذا كانوا من الوزن التقيل فواد فقط .. على العموم ممكن الطفشان يقعد مكان السواق .. ماهو مالوش لزمة السواق .. أنت حتقول .. " كتكت .. رحب بالضيف " حيقوم يلف بك المديرية كل الصيف .. وبعوده .. وعقبال رحلى الحج بمشئة الله .. بس برضه تآخد الطفشان معاك .. واوعى يطفش منك ..

اخناتون

[Set_Amina]

يارب ياسي السيد تفتح الكومبيوتر من مصر ولو مرة واحدة وتشوف ان انا كمان باودعك وباتمنى لك اجازة سعيدة يابو عمر..

وباذن الله باذن الله هاحصلك في نهاية الاسبوع ده وبالمرة باسلم مقدما على كل الاصدقاء في المنتدى مع اني اظن واعتقد اني سأحاول الوصول لأي كومبيوتر في مصر وابص عليكم بصة سريعة ان شاء الرحمن.

واهو بالمرة ادور هناك على البت سعاد يمكن تكون زقت على هناك.. ما هي فركة كعب.

[جـورج]

وباذن الله باذن الله هاحصلك في نهاية الاسبوع ده وبالمرة باسلم مقدما على كل الاصدقاء في المنتدى مع اني اظن واعتقد اني سأحاول الوصول لأي كومبيوتر في مصر وابص عليكم بصة سريعة ان شاء الرحمن.

واهو بالمرة ادور هناك على البت سعاد يمكن تكون زقت على هناك..  ما هي فركة كعب.

تروحـى و ترجعى بالف سلامـه

و متخافيش على صندوق الحاجه الساقعه بتاعك أنا حشغلهولك اثناء اجازتك

أستثمار يعنى

[Set_Amina]

وباذن الله باذن الله هاحصلك في نهاية الاسبوع ده وبالمرة باسلم مقدما على كل الاصدقاء في المنتدى مع اني اظن واعتقد اني سأحاول الوصول لأي كومبيوتر في مصر وابص عليكم بصة سريعة ان شاء الرحمن.

واهو بالمرة ادور هناك على البت سعاد يمكن تكون زقت على هناك.. ما هي فركة كعب.

تروحـى و ترجعى بالف سلامـه

و متخافيش على صندوق الحاجه الساقعه بتاعك أنا حشغلهولك اثناء اجازتك

أستثمار يعنى

هاتكون خدمة انسانية ولا مشاركة في الربح بمجهودك؟؟

ولا تلاقيك عطشان وراسم على واحد مامي متلج

عموما انا باشكرك وكشفت راسي وداعيتلك علشان انت الوحيد اللي قدرت ظروفي المعيشية وعرضت تحافظي لي على أموالي الساقعة