اجراءات والمطلوب انشاء شركة تدريب

[حسام يوسف]

السلام عليكم ورحمة الله

اللى متابع كلامى وموضوعاتى من فترة

وخصوصا س س اللى فاقسنى دايما

هيعرف أنى صيدلى اتخنق م الكار دة

توب علينا يارب

أرجو المساعدة بالمعلومات اللازمة عن الاجراءات المطلوبة فى انشاء شركة تدريب

سواء الاجراءات المطلوبة لعمل شركة

والرسوم والأوراق المطلوبة

أو الاجراءات والرسوم المطلوبة الخاصة اذا كانت الشركة شركة تدريب

تحياتى للجميع وخصوصا س س

تم تعديل 12 يناير 2009 بواسطة حسام يوسف

[حسام يوسف]

الوووووووووووووووووووة يامركز

ماحدش عندة مساعدة؟

[حسام يوسف]

للرفع

جايز ربنا يكرم بمساعدة

[الباشمهندس ياسر]

مبارك يا دكتور حسام

و عقبال ما تبقى مجموعه شركات ان شاء الله ...

و عقبال ما انا كمان افتح اول شركة ليا ( عن قريب ان شاء الله )

[حسام يوسف]

لسة عندي أمل

وياسلام لو ألاقى عليهم كمان دراسة جدوى

[doha]

منت مقلتش شركة تدريب على ايه بالظبط .. قصدك يعني الي بيقدموا دورات تنمية بشرية ومش عارف ايه ؟

على كل حال هقولك بخبرتي المتواضعه في المجال ده لان كان عندي زمان من ايام الهكسوس كده مكتب كمبيوتر من انشطته الدورات التدريبية على الحاسب .. هقولك على الخطوات الي عملتها ويمكن تكون هي نفسها الي انت محتاجها ..

بس معليش لو خانتني الذاكرة في بعض التفاصيل لان الموضوع كان من كام سنة ..

هتحتاج اول حاجه تأجر شقة او يكون عندك عقد تمليك لشقة .. هتروح الشهر العقاري تثبت التاريخ على عقد الايجار ده عشان الشقة دي هتكون مقر الشركه او المعهد التدريبي ..

هتروح بعد كده بعقد الايجار ده تفتح لك سجل تجاري وتروح الغرفة التجارية تثبت نشاطك هناك بعدين هتروح مصلحة الضرائب الفرع الي يكون مقر الشركه تابع ليه وهتفتح لك هناك سجل ضريبي

طبعا هم في كل خطوة هيدولك استمارات تعبيها وهيقولوا لك الخطوة الجايه تعمل ايه

بالنسبة لي كان في شرط مرور ثلاث اشهر قبل بدأ نشاط الشركه عشان يعملوا تحريات في امن الدولة عشان يسمحوا لي بمزاولة النشاط . ودي خطوة متبعه في كل المعاهد التدريبية ..

هتحتاج ترخيص من الحي عشان تعلق اليفط المضيئة بتاعت الشركة بتاعتك واي لوحات اعلانية ثابته او قماشية ( نصيحة متعملش زيي وتجيب تراخيص باللوحات القماشية لان هتتقطع هتتقطع بل ان الغريب الناس الي مش مرخصة دي بتقعد لوحاتها بالسنة ) .

هتحتاج ترخيص من مباحث الاموال العامة قسم التزييف والتزوير لو عندك طابعه او سكانر في شركتك يعني من الآخر نشاطك فيه اجهزه كمبيوتر او تدريب عليها وبرضه لو عندك ماكينات تصوير .. ممكن تعمل زيي ومتطلعش الترخيص ده لاني مكنتش اعرف بس ممكن ينعمل فيك زيي برضه وينقبض عليك زي ماحصل معايا برضه بالظبط .. بس متخافش بتطلع في النهايه على غرامه وخلاص ..

هتحتاج برضه ترخيص من وزارة التربية والتعليم لممارسة اعمال التدريب ومتتعبش نفسك مش هتاخذ الرخصة دي لان قعدت سنتين اسعى فيها كل شويه يقولوا لي الوزير قافل التراخيص ومش هتفتح غير في شهر كذا ارجع في شهر كذا الاقيها لسة متفتحتش وفي النهايه اكتشفت انها بتفتح بمزاج الي عاوز ينفتح له يعني مغلقة على ناس معينين فريح دماغك ومتعتمدش نفسك من الوزارة بس هتبقى شهاداتك غير معتمده منهم وخلاص .

كافيهات الانترنت بتحتاج رخصة زياده على كل ده وهي رخصة من وزارة الثقافة !!

بس في حاجه احسن من كل ماسبق لانك مهما جبت في رخص هتلاقي نفسك برضه مقصر ولسه في حاجه ناقصة ومش هتعرفها غير لما تلاقي البهوات الي نسيت ترخص منهم مشرفين عندك في الشركه بيسألوك انت بتهبب ايه وايه خلاك تنحرف وتفكر تكسب بالحلال مكان عندك تجارة المخدرات اسهل وارخص ..

اسهل من كل ده شوف لك شريك يكون واصل وله علاقات ومترخصش من اي حاجه ولا تدفع اي رسوم وهتمشي امورك احسن من الي هيكبل نفسه بكل الاوراق دي ويمشي سليم وفي النهايه هيلاقي نفسه بس عمال يدفع في فرد لبلطجية كل جهة واخرتها هتعمل زيي وتقول حقي برقبتي وتقفل السببوبة الي مفيش من وراها غير وجع الدماغ ..

على كل حال لو لسه مصمم على فكرتك وغاوي وجع دماغ ممكن تتاكد على تفاصيل الاوراق والتراخيص المطلوبة منك من الغرفة التجارية اسأل على مكانها ( سواقين التاكسي اكيد عارفينها ) وروح هناك وشوف الشعبه الي نشاطك هيكون تابع لها وهم هيدلوك بالظبط على التفاصيل المطلوبة ..

[لولا]

العزيزه ضحى .. قرأت قصة مشروعك الأول وجميع الصعوبات الى واجهتيها ..

الحقيقة دائما تروادنى فكره .او لنقل حلم انشاء مشروع خاص فى مصر فى المجال الذى احبه

واجدنى غالبا اصطدم بقصص مشابهه لقصتك ولنصائح تنصحنى بالتروى والتفكير العميق .. و .. الغاء الفكره لو لم تكن تعنى لى الكثير !!

رغم ان خططى مستقبليه ولن اقوم بتنفيذها قريبا حتى الا اننى افكر دوما فى مدى جدوى مشروعى الصغير فى مصر واضع فى حساباتى

كل ما يمكن ان اواجهه من مواقف وعقبات مثل التى ذكرتها .

حقا لا افهم ما كل هذه التعقيدات الهائلة جدا واين الدور الحكومى فى التشجيع والدعم والتسهيل ..

منذ ايام حتى كنت اشاهد برنامج فنى تتحدث فيه المذيعه ان مصر اصبحت تسعى الى تصوير عدد من مشاهد مسلسلاتها فى سوريا

نظرا لسهولة الحصول على التراخيص وانخفاض الإسعار والتكلفه عن مصر !!!

المشكلة فعلا كبيره جدا ومتشعبه ويعانى منها الجميع ولا اعرف هل هناك بارقه امل فى تحسن الوضع ؟؟

اخى حسام .. بالتوفيق ان شاء الله فى مشروعك ولكن حضرتك لم توضح شركة تدريب خاصه بماذا تحديدا لتحصل على مساعدات

واراء قد تكون مرت بنفس التجربه او تملك معلومات متخصصه قد تفيدك .

تحياتى

لولا

[doha]

اختي لولا ..

لو انتي عاوزه تعملي مشروع فبعد دراسة الجدوى الخاصه بيه توكلي على الله واعمليه ومتخليش مواضيع التراخيص دي تقف عقبه في طريقك هي صحيح كتير بس ده للي عاوز يمشي صح لكن ممكن برضه تمشي غلط وكله بيخلص بالوسايط والفلوس في الآخر ..

يعني لما ترخصي من اكتر من جهة هتلاقي نفسك مطالبة تدفعي رسوم سنوية للجهات الي مرخصة منها وعلى فكره مفيش مقابل للرسوم دي .. يعني انا كنت بدفع للحي وبدفع اشتراك للغرفة التجارية وبدفع زياده في النور والماء والتليفون على اساس ان عدادي تجاري كل ده بدون مقابل بحصل عليه من الجهات دي يعني مجرد ( فرده ) وطبعا كل التكاليف دي بتنخصم من ارباحي يعني لازم ارفع سعري مقابلها وقت مالي ماشي غير قانوني موفر على نفسه فكلها ارباح داخله له ..

يعني كان في تعقيدات حكومية ادت الى انخفاض الارباح خاصه وشهاداتي مكانتش معتمده يعني مش بياخذ عندي غير الطالب الي اخذ في الجهات التانيه زي المحافظة مثلا او المراكز الحكومية الي بتخرج الناس مش فاهمه وتديهم شهادات وخلاص .. كنت عايشه على النوع ده من الطلبة الي جايه تفهم ومش لازمها شهاده موثقة لان الشهاده معاها اصلا .. وطبعا كانت ثالثه الاثافي زي مابيقولوا لما الحكومه انتبهت فجأه ان تجميع الاجهزه بيكسب فراحت عملت مشروع حاسب لكل بيت الي خرب بيت كتير جدا من شركات الكمبيوتر الي كانت عايشه على النوع ده من المبيعات ..

بس بغض النظر عن كل ده انا كنت مستمتعه بعملي فبغض النظر عن المكاسب فموضوع التراخيص ده لم يثنيني عن الاستمرار في النشاط لغايه ماجبت اجله في الآخر ..

لو عاوزه تفتحي مشروعك لنفسك انتي مش عشان تكسبي كتير وتبقي مليونيرة توكلي على الله وافتحيه اما لو الغرض مادي بحت ففكري كتير اوي قبل ماتغامري لان البيروقراطية الحكومية عندنا بتعقد مش بتحل وبرضه شوفي لك محامي يعمل لك اجراءات البدايه عشان الخطوة الي ملهاش لزوم ميعملهاش .. يعني انا مثلا كنت عاوزه امشي صح فبلغت الضرائب عن نشاطي من اول يوم تحسبا ان يكتشفوا وجودي فجاه فيحاسبوني ( جزافي ) وكانت النتيجه ايه؟ جات لي الضرائب جزافيه برغم ذلك وقالوا عليك عشرين الف جنيه ضرائب بالرغم من اني كنت صفيت النشاط .. طبعا الضرائب مش بتيجي لك من اول يوم لاه بتيجي بعد خمس سنوات من بدايه النشاط وطبعا لان تخصصي الاساسي محاسبه فانا فاهمه حركاتهم وتجادلت معاهم وتم تخفيض المبلغ من 20 الى الف جنيه بس .. تفتكري دفعت ؟ تجادلت اكتر برغم اساليب الترهيب الي عملوها وصفيت الحكايه في الآخر على 200 جنيه :blush2:

بس الحق يقال بتوع الضرائب ولو اني بكرهم من قلبي بس كانوا متعاونين جدا يعني بياخذوا الفرده وهم عارفين انها فرده ولسان حالهم يقول معليش يابنتي ادفعي ( اتز نوت برسونال ) واهو كاس وداير على الكل ..

هي الخلاصه ان مهما حاولتي تمشي قانوني مش هتقدري ولازم هتكوني غلطانة او مقصرة في حاجه او مطالبة من جهة ما برسوم او اشتراك مندفعش عشان دائما تبقي خائفة من شيء ما ومستعده تدفعي عشان تمشي امورك والا مش هتمشي .. وبرضه لازم تكوني دارسة السوق كويس اوي وتشوفي الناس الي شغاله قبلك في المجال الي اخترتيه شغاله ازاي يعني لو انتي مستشفى مثلا متتوقعيش تعملي مستشفى زي بتاعت برا نظافة وامكانيات .. لاه شوفي مستشفيات مصر عامله ازاي واعملي زيها .. برضه لو انتي شركه وماشيه برا بنظام معين متحلميش تطبقي نفس النظام ده في شركه في مصر .. للاسف السوق هنا له طريقة غريبة جدا في الادارة وبامكانيات عجيبة ومن الخطا انك تحاولي تطوري او تمشي بنظم وامكانيات برا ..

وبالمناسبة بما ان بقالي كام سنة في ( السوق ) في مصر قبل ماعتزل حياه الاعمال واعمل بنصيحة الي اكبر مني واخليني في الطبخ والنفخ افهم لي فلو في بالك مشروع معين وحابه تسألي عن امكانية تطبيقه في مصر لو حبيتي ممكن تقولي لي على مشروعك ده وانا اساعدك بالي اعرفه عنه ..

تم تعديل 17 أبريل 2009 بواسطة doha

[samady]

لا حول ولا قوة إلا بالله

هو احنا وصلنا للدرجادي ده ولا أكنك بتحكي قصة فلم هندي يأخت ضحى يعني كل اللي يحاول يعافر في الدنيا دي يبقى ده حاله

أنا كنت ناوي أفتح شركة استيراد اليومين اللي جايين بس بعد اللي قريته ده أنا هخلي فلوسي وكرامتي في حضني أحسن.

ده الأنحراف طلغ أسهل بكتييييييييير :blush2: على الأقل لما الحكومة تبهدلني يبقى معاها حق منا منحرف

[حسام يوسف]

أولا وقبل اى شيئ

انا اسف يا أختنا العزيزة ضحى

بعتذر لو كنت قلبت المواجع عليكي

وربنا يكرمك

ويعوضك بالأحسن ان شاء الله

وثانيا

بشكرك على النصايح

وتأكدى انى هحطها انا وشريكي قدام عينيا

وهقولله كل الكلام اللى حضرتك قلتيه

وكل الشكر للعزيزة لولا على أمنياتها الطيبة

الحقيقة

هدف المشروع مادى بغرض الربح طبعا بخصوصى انا وشريكي

بس والله العظيم

انا نفسي أكسب اه

لكن نفسي أقدم حاجة كويسة

ومفيدة

ربنا يؤجرنا عليها

المشروع تدريب فى مجالات اللغات والكمبيوتر أو الحاسوب زي ما بيقولوا بالعربي

وطبعا التنمية البشرية وتطوير الذات

وأخيرا الكورسات المتخصصة لبعض المهن

يعنى هندى للمكان ولاناس الحاجة اللى شايفونهم محتاجينها

لكننا لن نبدأ بشكل تام فى كل هذة المجالات

هنبدأ بهدوء فى الكورسات اللى تحتاجها البلد

عشان ننجح ونلاقى اقبال

وعشان الواحد فى الأول مش بيبقى مستحمل أى فشل

تحياتى للجميع

وشكرا لكل المحاوراتية

تم تعديل 17 أبريل 2009 بواسطة حسام يوسف

[doha]

بالعكس يااخ حسام مقلبتش علي المواجع نهائيا لاني لما بفتكر الايام دي مش بفتكر " الصعوبات " الي بتقولوا عليها وانما بفتكر الحماس والشغل وده بيحفزني اني لازم اكرر التجربة تاني ولو بشكل مختلف .. يعني صحيح مش هفتح مكتب تاني اكيد ولا هقوم باي مشروعات بس هحاول اني اثبت ذاتي في اي مجال آخر لان للنجاح طعم رائع صعب جدا لو ذقته انك متحاولش تجربه تاني ..

بالنسبة للتعقيدات البيروقراطية الي قابلتها دي مش قضية ومش اشكال وموقفتش امام اني افتح المشروع ولكن وقفت امام نموه لان زي ماقلت لك كون الشهاده معتمده من الجهه الفلانية فده الي بيجيب لها الزباين ..

على كل حال بما انك عاوز تعمل مشروع تدريبي فيه حاسب وفيه تنمية ذاتية وماشابه فاسمح لي اضيء لك الطريق ببعض النقاط الي يمكن تكون محتاج تعرفها في البدايه ..

اولا اسعار الدورات التدريبية في الاقاليم هي نصف سعر التدريب في القاهرة او الاسكندرية ده بالنسبة للمراكز المعتمده زي الآي بي ام او اي مركز له فروع في الاقاليم هتلاقي سعر الدورة هو النصف تقريبا عن مثيلتها في القاهرة ببساطه لان ده مستوى سكان الاقاليم او قدرتهم الشرائية ..

لازم تكون شهادتك الي بتقدمها معتمده من جهة ما او تبع ( براند) معترف بيه والا فمتحاولش تنافس على دورات من الي بتجيب الشيء الفلاني وخليك في ابو قرش وقرشين ..

لو عندك اجهزة كمبيوتر هتدرب عليها يبقى خلي بالك لازم البرامج الي على الاجهزة دي تكون اصلية خاصه الاوفيس والويندوز لان في ( مصنفات فنية ) بتمر وتفتش عليك كل شوية وبيصادروا الاجهزة ويعملوا لك قضية وغرامه لو برامجك مش اصلية .. في طبعا ( باكدج ) برامج خاصة بالتدريب ودي بيكون سعرها ارخص كتير من السعر العادي للبرامج الاصلية وبتحصل عليها من وكيل ميكروسوفت ( عن نفسي كنت شرياها من برا ) وفي حاجه اسهل من كده انك ( تظبط ) نفسك مع بتوع المصنفات بحيث يكون عندك حد واسطه يطلعك لو كبسوا عليك فجاه او حتى يبلغك بانهم بيمروا فتفصل الاجهزه .. ( بقولكم المخدرات اسهل مش مصدقيني )

خذ لك جولة على مكتبين تلاته من الي ناوي تفتح ( في مستواهم ) وشوف حاطين الاجهزه ازاي وفين وعندهم كام جهاز وكام قاعة تدريب .. الخ .. لاحظ المكان الي هتفتح فيه والمستوى الي هتبدأ بيه هيحدد لك نوعية الناس الي هتيجي تتدرب عندك وبالتالي هيحدد السعر الي هتحطه ..

لو هتدي برامج تنمية بشرية فيفضل تعمل حاجه على مستوى لان الناس الي عندها استعداد تدفع في الكلام ده غالبا مستواها مرتفع نسبيا ببساطه لان البرامج دي مش مهمه اوي في حياتنا الاقتصاديه بنفس درجة اهمية برامج الكمبيوتر .. لو هتدرس كمبيوتر فممكن تاخذ خطين .. اما حاجه مستواها عالي وفي الحاله دي لازم تكون تبع ماركه يعني خذ توكيل او اعمل حسابك على حملة دعاية ضخمة عشان تعمل لك اسم وفي الحاله دي متنساش تعمل مقرك رخام وشويه زرع وبنت حلوة تستقبل الطلبات .. لو هتفتح على قدك فمتتوسعش اوي في عدد الاجهزة ابدأ بعدد محدود بالكتير اربع خمس اجهزة عشان عدد الطلبة في الدورة الواحده يكون قليل فمتطولش فترة انتظارهم ..

مكاتب الكمبيوتر على قفا من يشيل فحاول يكون لك شيء تتميز فيه عشان تجبر الناس تيجي لك انت مش لحد تاني .. فشوف فكرتك ايه الي هتخلي عندك حاجه مش عند حد ولو معندكش حاجه جديده يبقى شوف لك مشروع تاني ..

كل دورة كمبيوتر هتديها هتطلع منها بماوس خربان او كيبورد بيخرف او حاجه بتعلق في الجهاز فلازم تبقى عامل حساب الخسائر دي لان محدش بيرضى يقعد على جهاز فيه ( إن ) وبالتالي لازم تبقى مراعي التكاليف دي وانت بتحط الاسعار بتاعتك ..

ممكن تتغلب على كل ماسبق وعلى مشكلة المصنفات واستهلاك الاجهزة والاثاث المكتبي في انك تتعاقد مع كافي انترنت يكون مجهز نفسه كويس اوي بحيث يكون ده مقر التدريب بتاعك .. ميزة الحكايه دي انك هتشيل من دماغك وجع الدماغ وعيبها انك هتضيع على نفسك الاسم الي هتكونه للمكان يعني لو ناوي تستمر لعشرين تلاتين سنه قدام هتبقى بتعمل اسم للمكان مش ليك لكن لو بتنفذ عقود تدريبية مثلا او مش عاوز تتوسع في تدريب الحاسب لغايه ماتتاكد انه جايب ثمنه فممكن تلجأ لحكايه التاجير دي ..

لو واخد مجال التنمية البشرية على انه ( سبوبه ) مش هتنجح فيه للاسف لان اساس استمرارك في مجال الدورات او التدريب بشكل عام هو مدى استفاده الدفعه الاولى الي هتخرجها منك لان دول الي هيجيبوا لك الدفعه التانيه الي هتجيب لك الثالثه والرابعه وهكذا في متوالية هندسية .. لو انت بتديلهم اي شيء فض مجالس او تحليل فلوس يبقى للاسف الي هيطلع مش هيرجع وهتقفل قبل ماتفتح ..

قبل ماتقرر تدرب في اي مجال فتش عن الجهات الحكومية الي بتقدم دوراتك دي لان دول ماشاء الله مقفلينها علينا من كل جانب وفي كل مجال وباسعار معرفش بتيجي منين .. يعني هتلاقي كلية التجارة مثلا فيها معمل مجهز واجباري على الطلبة كلهم ياخذوا فيه دورات بالشيء الفلاني كده طار مننا نصف الزباين .. وعلى صعيد آخر هتلاقي المحافظة مثلا بتدي دورات الدورة بعشرين تلاتين جنيه وكده طار مننا النصف التاني .. بس الميزه اكيد ان العيال بتطلع في الآخر مش فاهمه وبتضطر تيجي لنا لنصلح ماافسده الدهر .. المهم انت قبل ماتدي دورات في اي مجال دور شوف بتتاخذ في جهة ايه وبسعر ايه عشان تعرف تحط سعرك انت كمان ..

واخيرا وكقاعده عامه في اي مشروع عاوز تفتحه فكر انت شخصيا دورك فيه هيبقى ايه .. يعني مثلا لو انت مدرب تنمية شاطر يبقى عرفنا كويس هتبقى انت اساس لفريق التدريب .. لو انت اداري خارق يبقى كويس عرفنا انك هتوظف موهبتك دي في نجاح المشروع .. لو انت راسمالي مستبد ومعاك قرشين حلوين و ( كتير ) يبقى تمام مشروعك هيمتاز بالانفاق السخي عليه . لكن لو انت ولاحاجه مما سبق وكل الي معاك قرشين صغيرين او ناوي تدخل بمجهود عادي من الي اي حد بيعمله او حتى تحط فلوسك في المشروع تشغل نفسها يبقى من دلوقت اقولك وفر تعبك وخلي فلوسك في جيبك مدفياك احسن ..

وعلى فكره السبب الرئيسي لاغلاق مشروعي بعد كام سنه من بدايته بغض النظر عن العقبات الي واجهتها او تعثره او او .. كان جزئية ممارستي للنشاط ده اساسا تحت شعار اني بجرب نفع نفع منفعش منفعش .. لو كنت فتحته من البدايه وعملاه مسألة حياة او موت وقاتلت عشان يستمر كان استمر .. دي نصيحة بقولها لك كده على الماشي وعسى ان يكون في كلامي مايوضح لك الصورة ولو جزئيا ..

[محمد عبدالعزيز]

على فكره السبب الرئيسي لاغلاق مشروعي بعد كام سنه من بدايته بغض النظر عن العقبات الي واجهتها او تعثره او او .. كان جزئية ممارستي للنشاط ده اساسا تحت شعار اني بجرب نفع نفع منفعش منفعش .. لو كنت فتحته من البدايه وعملاه مسألة حياة او موت وقاتلت عشان يستمر كان استمر .. دي نصيحة بقولها لك كده على الماشي وعسى ان يكون في كلامي مايوضح لك الصورة ولو جزئيا ..

ماشاء الله يعنى الأخت ضحى بتجيب من الآخر.

الفقرة اللى أنا مقتبسها دى تبروزها يا دكتور حسام وتعلقها قدامك طول الوقت.

عن تجربة مع أشخاص عديدين, هى دى العقبة اللى ممكن توقف أى مشروع فعلاً, إنك مش معتبره حياة أو موت, أو نفع نفع منفعش منفعش زى ما قالت الأخت ضحى.

بصراحة يا دكتور حسام معجبتنيش جملة "الواحد فى الأول مش بيبقى مستحمل أى فشل", بالعكس الفشل بيبقى متوقع إنه يحصل فى الأول نتيجة نقص الخبرة فى المجال العملى لأنه جديد عليك وإنك لسه ماعملتش سمعة كويسة فى السوق وكده.

أنا مش بقول إنك لازم تفشل فى البداية, بس لازم تتوقع الفشل وتبقى عامل حسابك إنك تقوم وتحاول تانى, وإلا بلاش تضيعوا وقتكم ومجهودكم وفلوسكم إنت وشريكك.

وربنا يوفقكم وتعملوا حاجة كويسة ومميزة وناجحة.

[حسام يوسف]

الحقيقة كل الشكر لحضرتك يا أختنا الفاضلة ضحى على كم وكيف المعلومات الرائعة دي

وانا هحط كل كلماتك قدام عينيه

وفيه سؤال جه فى بالى امبارح بعد ماكتبت مداخلتى

انا عارف ان الاتحاد الأوروبى بيدى لمصر تبرعات بأرقم كبيرة لتمويل تدريب فئات مختلفة من المصريين

فبقول لو الواحد قدر يوفر منح من المدعمة دي للناس

اكيد الناس هتستفيد بكورسات قوية

وفى نفس الوقت الدعم المالى هيقلل رسوم وأسعار الدورات والكورسات

والاقبال هيزيد

خصوصا ان مناطق الأقاليم زينا بتختلف عن لااقهرة فى ان عدد السكان أقل بكتير جدا

وكمان عدد الجمهور اللى ممكن يدفع بالتالى بيبقى أقل

فلو الأسعار حصلها دعم

أكيد الاقبال هيزيد وهيزيد

السؤال

هل من حق الشركات العاملة فى مجالات التدريب انها تاخد منح وتديها للجمهور

ولا المنح دي مقصورة على الجمعيات الأهلية فقط؟

وخالص شكرى لحضرتك

[حسام يوسف]

الحقيقة كل الشكر لحضرتك يا أختنا الفاضلة ضحى على كم وكيف المعلومات الرائعة دي

وانا هحط كل كلماتك قدام عينيه

وفيه سؤال جه فى بالى امبارح بعد ماكتبت مداخلتى

انا عارف ان الاتحاد الأوروبى بيدى لمصر تبرعات بأرقام كبيرة لتمويل تدريب فئات مختلفة من المصريين

فبقول لو الواحد قدر يوفر منح من المدعمة دي للناس

اكيد الناس هتستفيد بكورسات قوية

وفى نفس الوقت الدعم المالى هيقلل رسوم وأسعار الدورات والكورسات

والاقبال هيزيد

خصوصا ان مناطق الأقاليم زينا بتختلف عن القاهرة فى ان عدد السكان أقل بكتير جدا

وكمان عدد الجمهور اللى ممكن يدفع بالتالى بيبقى أقل

فلو الأسعار حصلها دعم

أكيد الاقبال هيزيد وهيزيد

السؤال

هل من حق الشركات العاملة فى مجالات التدريب انها تاخد منح وتديها للجمهور

ولا المنح دي مقصورة على الجمعيات الأهلية فقط؟

وخالص شكرى لحضرتك

[doha]

هو الصراحه انا معنديش فكرة عن موضوع منح الاتحاد الاوروبي ده لكن سبق مر علي موضوع منحة وزارة الاتصالات لتدريس مواد معينة بمنحة خارجية من شركات كبرى زي آي بي ام او اوراكيل .. الخ

المنح دي فكرتها انهم بيدولك مبلغ كبير كشركه مقابل انك تجيب الطلبة وتدربهم وتعلمهم ( مجانا ) ودول طبعا الطلبة الي بينطبق عليهم شروط معينة هم التانيين .. اعتقد الكل تقريبا عارف المنحه دي او سمع عنها ..

لنفرض انك انت كشركه او معهد تدريب حصلت على المنحه دي عشان تدرب الطلبة عندك فهي مش مطلقة كده لاه في عليك رقابه وشروط لازم يتأكدوا انك حققتها عشان تبقى مستحق للمنحه او بمعنى ادق هيدولك الفلوس ومش هيسكتوا على كده وانما هيتأكدوا انك تستاهلها ..

يعني لازم معملك يكون مجهز بمواصفات معينة يعني جهاز كمبيوتر لكل طالب ( ده اساسي دلوقت في اي معهد على فكره ) الاجهزه تكون على طاولات ( محترمه ) مش بنشات .. الكراسي هيدورماتيك .. في بروجكتر .. المكان مساحته متقلش عن كذا في كذا .. الكتب تكون مطبوعه بمواصفات معينة .. نفس المحاضرين الي بيدرسوا المواد لازم يكونوا مؤهلين بشهادات معينة وفي استمارات تقييم اداء بتتوزع علي الطلبة عشان يقولوا رايهم في المحاضرين .. الخ

اذا وعلى حد علمي لو اخذت منحة من جهة معينة فانت ملزم تطبق مواصفاتها والمشكلة ان السوق المصري مش دائما بيحتمل هذه المواصفات ( الراقية ) لان في ناس بدأت قبلك بكتير وعملت اسم واستولت على الشريحه الصغيره الي عندها استعداد تدفع ومش قدامك دلوقت غير تلعب على الشريحه التعبانه وتجبرها تطلع الاثنين جنيه الي مخبياهم تحت البلاطه ..

شفت كده حكايه شركات المحمول .. فاكر زمان الاشتراك كان بكام ولا الخط كان بكام ودلوقت بكام؟

اهو نفس الفكرة دائما الي بيجي ياخذ في الآخر بيكون هو الي معاهوش فلوس كتير تخليه زبون من الاول . .

وعلى فكره برضه انك تحصل على منحه من جهة ما او دعم ده محتاج علاقات شخصية يعني هيدولك انت بالذات ليه دون عن البقية ده غير ان الحاجات دي غالبا مبيكونش لها اعلان يعني فلان عارف الشخص الفلاني فبيعرف منه ان الجهة الي شغال فيها بتوزع منح فبيروح ويتقدم وياخذها .. صحيح في البعض بيكون له اعلان وماشابه لكن الاغلب انها بتتم دكاكيني زي ماقلت لك ..

بس في سؤال مهم جدا .. انت ايه الي زانقك على موضوع التدريب بالذات ؟ هل لانك شفت الدنيا كلها بتدرب وحسيت ان ( سوقهم ماشي ) فقلت اعمل زيهم؟

على فكره دورات الكمبيوتر والتدريب بالذات كل مدى في النازل من ناحية الاسعار .. هو الخبر الجيد ان في المقابل فعدد الناس الي عاوزه تتدرب كل يوم في الطالع لكن المشكلة انهم بيروحوا دائما اما لحاجه حكومية او لحاجه مشهورة اوي والي في النص بياخذ الفتات الي باقي ومراحش للاثنين دول ..

عن نفسي لا انصحك بالاستثمار في مجال التدريب ان مكانش عندك ماتضيفه فيه يعني لو مكنتش ابراهيم الفقي ففكر مرتين قبل ماتقدم على خطوة انشاء مركز للتنمية البشرية وقبل ماتعمل مشروع فكر وقول انا دوري فيه ايه وعلى قدر تمكنك من الدور ده على قدر ماتتوقع نجاح لمشروعك ..

[حسام يوسف]

الحقيقة انا مش عارف أشكر حضرتك ازاى يا اختنا ضحى على اثرائك للموضوع

بداية العبد لله مش ابراهيم الفقى

ولا ترينر أساسا

انا صيدلى وليه خبرة فى مجال التسويق والمبيعات ودمتم

ورحم الله امرئ عرف قدر نفسه

والحقيقة عندي أسباب وجيهة ومقتنع بيها تماما للمشروع

وأغب هذه الأسباب تتركز وتدور حول نقطة واحدة

أسوان

كبلد هية صغيرة لكنها فى شدة الاحتياج لمركز محترم يعطيهم كورسات فى مجالات عديدة

مش بس يقبض القرشين ويجرى

السنة اللى فاتت دكتور ابراهيم الفقى شرفنا فى أسوان

مش عارف أقول لحضرتك كم الحضور قد ايه

من أسوان وخارجها

كل الصعيد تقريبا

حضرتك مش متصورة الصعيد محتاج ومظلوم قد ايه

ففكرتى ببساطةان لو جه حد وفر كورسات فى مجالات الناس محتاجاها

وبجودة عالية

سهل جدا يعمل اسم

وفى أقصر وقت

ويكسب كويس

وبما يرضى الله

وبجد انا متشكر جدا لآراء حضرتك فى الموضوع

جزاكى الله كل خير

رغم ان الموضوع قيد البحث منى ومن شريكي

[elfakhrany]

الى الأمام يادكتور حسام وربنا يوفقك فكرة ممتازة بس عايزة تخطيط + تنظيم + توجية + رقابة :wub:

[بندق أفندى]

فاكر موضوع التدريب أون لاين اللى قلتلك عليه؟

جماعة أصحابى بيؤسسو شركة حاليا من أجله

[عاشق]

منت مقلتش شركة تدريب على ايه بالظبط .. قصدك يعني الي بيقدموا دورات تنمية بشرية ومش عارف ايه ؟

على كل حال هقولك بخبرتي المتواضعه في المجال ده لان كان عندي زمان من ايام الهكسوس كده مكتب كمبيوتر من انشطته الدورات التدريبية على الحاسب .. هقولك على الخطوات الي عملتها ويمكن تكون هي نفسها الي انت محتاجها ..

بس معليش لو خانتني الذاكرة في بعض التفاصيل لان الموضوع كان من كام سنة ..

هتحتاج اول حاجه تأجر شقة او يكون عندك عقد تمليك لشقة .. هتروح الشهر العقاري تثبت التاريخ على عقد الايجار ده عشان الشقة دي هتكون مقر الشركه او المعهد التدريبي ..

هتروح بعد كده بعقد الايجار ده تفتح لك سجل تجاري وتروح الغرفة التجارية تثبت نشاطك هناك بعدين هتروح مصلحة الضرائب الفرع الي يكون مقر الشركه تابع ليه وهتفتح لك هناك سجل ضريبي

طبعا هم في كل خطوة هيدولك استمارات تعبيها وهيقولوا لك الخطوة الجايه تعمل ايه

بالنسبة لي كان في شرط مرور ثلاث اشهر قبل بدأ نشاط الشركه عشان يعملوا تحريات في امن الدولة عشان يسمحوا لي بمزاولة النشاط . ودي خطوة متبعه في كل المعاهد التدريبية ..

هتحتاج ترخيص من الحي عشان تعلق اليفط المضيئة بتاعت الشركة بتاعتك واي لوحات اعلانية ثابته او قماشية ( نصيحة متعملش زيي وتجيب تراخيص باللوحات القماشية لان هتتقطع هتتقطع بل ان الغريب الناس الي مش مرخصة دي بتقعد لوحاتها بالسنة ) .

هتحتاج ترخيص من مباحث الاموال العامة قسم التزييف والتزوير لو عندك طابعه او سكانر في شركتك يعني من الآخر نشاطك فيه اجهزه كمبيوتر او تدريب عليها وبرضه لو عندك ماكينات تصوير .. ممكن تعمل زيي ومتطلعش الترخيص ده لاني مكنتش اعرف بس ممكن ينعمل فيك زيي برضه وينقبض عليك زي ماحصل معايا برضه بالظبط .. بس متخافش بتطلع في النهايه على غرامه وخلاص ..

هتحتاج برضه ترخيص من وزارة التربية والتعليم لممارسة اعمال التدريب ومتتعبش نفسك مش هتاخذ الرخصة دي لان قعدت سنتين اسعى فيها كل شويه يقولوا لي الوزير قافل التراخيص ومش هتفتح غير في شهر كذا ارجع في شهر كذا الاقيها لسة متفتحتش وفي النهايه اكتشفت انها بتفتح بمزاج الي عاوز ينفتح له يعني مغلقة على ناس معينين فريح دماغك ومتعتمدش نفسك من الوزارة بس هتبقى شهاداتك غير معتمده منهم وخلاص .

كافيهات الانترنت بتحتاج رخصة زياده على كل ده وهي رخصة من وزارة الثقافة !!

بس في حاجه احسن من كل ماسبق لانك مهما جبت في رخص هتلاقي نفسك برضه مقصر ولسه في حاجه ناقصة ومش هتعرفها غير لما تلاقي البهوات الي نسيت ترخص منهم مشرفين عندك في الشركه بيسألوك انت بتهبب ايه وايه خلاك تنحرف وتفكر تكسب بالحلال مكان عندك تجارة المخدرات اسهل وارخص ..

اسهل من كل ده شوف لك شريك يكون واصل وله علاقات ومترخصش من اي حاجه ولا تدفع اي رسوم وهتمشي امورك احسن من الي هيكبل نفسه بكل الاوراق دي ويمشي سليم وفي النهايه هيلاقي نفسه بس عمال يدفع في فرد لبلطجية كل جهة واخرتها هتعمل زيي وتقول حقي برقبتي وتقفل السببوبة الي مفيش من وراها غير وجع الدماغ ..

على كل حال لو لسه مصمم على فكرتك وغاوي وجع دماغ ممكن تتاكد على تفاصيل الاوراق والتراخيص المطلوبة منك من الغرفة التجارية اسأل على مكانها ( سواقين التاكسي اكيد عارفينها ) وروح هناك وشوف الشعبه الي نشاطك هيكون تابع لها وهم هيدلوك بالظبط على التفاصيل المطلوبة ..

دي كلها اجراءات بمصر

ولسه الواحد مشتغلش ولا جاب ولا قرش

لا بجد

العملية سهلة جدا ((ربنا يكون بعون الي ناوي يعمل بزنس))

[Guest selim]

طب لو الواحد بدا من غير ترخيص او اي حاجة و بدا و اجر المكان و جهزو و بداء شغل من غير ترخيص او اي شئ اي هي المشاكل الي ممكن تقابلة