بابا بيعزمنى على فرحة ؟؟؟

[ذهبية]

نزلت موضوع من فترة كدة مش عارفة انتم فاكرينة ولالا لو ابوك عايز يتجوز و هو فوق السبعين معظم الرود كانت من الرجال انة من حقة و شرعا وحلال و اى سن

رد ساعتها النساء بان ربنا يصبرنى وان الرجال ملهموش امان

الان بقى بابا بيتجوز فعلا و لقى عروسة احلامة وهى بنت لم تتزوج من قبل عندها50 سنة وجدها فى يوم و شبكها تانى يوم و جهز شقتة قصدى شقة امى و اثاثها و فرشها زى ماهو من يوم ما ماما توفت من سنة يعنى الشقة كاملة من كلة خدتها باللى فيها على الجاهز

طالما الشقة جاهزة لية التاخير يدوب على قد دهان جديد وتم فى يومين يعنى ابويا اتجوز فى اسبوع

بابا لم ياخد راى احد فينا هو بس الحمد الله بلغنا انة شبك و بلغنا ان كتبت كتابة بعد يومين اللى عايز يجى يجى اللى مش عايز براحتة

الجدير بالذكر انة هيعمل فرح ضغنون كدة على قد العروسة الضغنونة لانها بنت بنتوت و عايزة تفرح و طبعا هيدخلوا البيت بزغاريط وزفة عربيات بعد سهرة كدة يفرح بيها عروستة فى البيت الىل اتربينا فية طبعا الجيران كل واحد بكلمة و كل واحد بتريقة

ياترى بقى لو انتم مكانى تروحوا تحضروا فرح ابوكم ؟؟؟؟؟؟؟؟

طيب لو ما روحتوا هيبقى عادى هو مش فارق معاة كتير فى الزعل لانة مهموش راى اى حد من البداية و الىل كان بيقول لة عكس اللى عايزة كان بيخاصمة و يمشى

لكن فارق بقى انة ساعتها هيكون تحت تاثير مراتة بس واهل مراتة و هنكون احنا وحشين

ياترى هتعملوا اية لو مكانى ؟؟؟؟؟؟؟؟؟؟؟؟

عايزة وصفة سحرية منكم امسح بيها السنين و التعب و الاخلاص و الحب اللى امى ضيعتة مع ابى عايزة حد فيكم يقولى اطفى النار اللى انا حاسة بيها ازاى وصورة امى مش بتطلع من خيالى اللى عملتة تعب السنين كلة جة فى دقيقة مسحة كلة

صبرونى باى كلام لانى بدات اتجنن

[مغتربة]

حبيبتى خلاص الى حصل حصل كتب الكتاب تم و انتهى الامر

يعنى هيا دلوقتى زوجته شرعا و قانونا

لو انا مكانك بامانه لازم هحضر و افرح لابويا كمان

التعب الى تعبته والدتكم معاه لم يذهب هدر و اجره و ثوابه عند رب العالمين

لكن انت عارفه قسوه الوحده اكيد حب والدتك فى قلب والدك مقلش و لا حاجه بس هوه فى الوقت ده عايز انيس و جليس معاه الوحده صعبه جدا و ميعرفش صعوبتها الا الى قاساها

و بعدين هوه اخذ واحده عمرها مناسب الى حدا ما و كمان هيكسب اجرها لانها لاول مره تتزوج

روحى حبيبتى و افرحى لفرح والدك و عامليها زى اخت ليك و يمكن تكون كويسه معاك و تكونوا اكتر من الاخوات

و ربنا يخلف الظنون

و بالنسبه لكلام الناس الناس كده كده بتتكلم و حتى لو اى حد قال اى حاجه فى ساعتها بعدين بس خلاص كل واحد هيتلهى فى دنيته

هوه مين فاضى لمين فى الزمن الى احنا فيه دلوقتى

[الجدار]

انا شايف ان كلام الأخت مغتربة مظبوط الى حد كبير بس في نفس الوقت حاسس باللي جواكي اكيد جواكي احاسيس كلها داخله في بعضها

ليه يعمل كده؟

ماما هانت عليه؟

طيب معقول بعد ماما ياخد دي؟

و و و و

بس ماتنسيش انه مهما عمل والدك وليه عليكي حق بره وعدم عقوقه (مش عايز الإجابة تبقى مثالية قوي وزي ما بيقولوا اللي ايده في الميه مش زي اللي ايده في النار).

انا من رأيي ماتقارنيش بين والدتك ومراة والدك علشان والدتك دايماً حتكون كسبانه. وبرضو ماتخديش موقف من غير ماتعرفيها يمكن تكون كويسه ومش غلطتها ان والدك اتجوزها.

معلش اصبري وطيعي ابوكي واحتسبي ده عند ربنا.

وسيبك من كلام الناس الخايب اللي لا بيودي ولا بيجيب.

ربنا يقويكي ويرشدك للصح.

[Amr Radwan]

اختي الكريمة ..

اية رايك لو ناخد الموضوع بشكل اكثر عقلانية بدل من العاطفة ؟؟ و سيبك من كلام الرجاله اللي قالهولك ان ده حقة و و .. و .. و كلام الستات .. ان الرجالة مالهمش امان و .. و ..

اية اللي خلي والدك يفكر في سن السبعين انه يتجوز و يدور علي عروسة و مجرد ما لقاها اتجوزها ؟؟

هل لان اولادة كل واحد في حالة و مشغول بدنيته و محدش بيسال عليه ؟؟

هل لان الوحدة القاتلة خنقته و حب يتحرر منها ؟؟

هل لانه مخنوق من ولاده و عاوز يعاقبهم علي حاجة عملوها ؟؟

هل .. هل ... اسئلة كتيرة ..

ممكن تكون الاجابة عندك و ممكن تكون الاجابة مش عندك .. بس في النهاية .. هذا اصبح واقعا ..

اتوقع من الافضل ان تحسنوا العلاقة مع والدك و تشوفوا اية اللي يبسطة و تعملوه .. لانه من النوع اللي لما بيقرر حاجة بيعملها بدون اي تردد ..

صدقيني .. عشان تكسبي والدك .. احضري الفرح و حسسيه انك فرحانه

و ربنا يعينك علي فراق والدتك و زواج والدك ..

[ابو حودة]

الاخت دهبية

انا رايي لازم تروحي وتفرحي معاه وليه لان فيه حالتين

الحالة الاولى ان الست دي تطلع كويسة وفي الحالة دي نكون كسبنا اخت او ام او خالة في العيلة

الحالة التانية انها تكون مش تمام وفي الحالة دي نبقى منسيبهاش تاخد الراجل وتقسيه علينا يعني نخسر دنيا اذا كان عنده فلوس واخره نخسر دعواته

واخيرا اذا جالك الغصب خده برضا

[شاب مصري]

روحي وأمرك الى الله

وحاولي تحطي أعصابك في تلاجة وتنفصلي عن مشاعرك وعن الجو المحيط خلال فترة الفرح

هتعدي والله

كل حاجة بتروح بالنسيان والتأقلم والتكيّف

وبعدين ده حاجة حلال

انا فاهم الغصة اللي في حلقك وحاسس بيها

بس عديها وربنا يكرمكم في حياتكم ان شاء الله.

[ام بلال]

أختي الفاضلة ذهبية :

لا أقلل من حساسية الموضوع بالنسبة لكم ، ربنا يربط على قلوبكم ، و أدعو الله أن يرحم أمي و أمكم و موتى المسلمين جميعا ،

أولا :

مجهود أمك لم يضيع بدليل أنكم موجودون على هذه الحياة و قد أفنت نفسها في تربيتكم و تعليمكم و رعايتكم ،و بالتأكيد في رعاية زوجها الذي هو والدك ،

والدتك ذهبت لخالقها ليجازيها بإذن الله على ما قدمته لكم جميعا ، لو كان تعبها في المتاع الزائل الذي هو : شقة - أثاث - أطباق

أعتقدك كما نحن جميعا نعتقد أن هذا المتاع الزائل ليس نتيجة تعبها و إلا كنا فعلنا مثل قدماء المصريين دفنا مع الميت متاعه و هوليس بنافعه في شيء

أعتقدك كذلك أننا كمسلمون نعتقد بعدم فنائنا في شخص نحبه إذا مات و إلا كنا حرقنا الزوج مع الزوجة الميتة أو العكس كما يفعل الهندوس ،

أختي الفاضلة :

للرجل مهما كبر إحتياجات لن تستطيعوا كأبناء تقديمها له : لا أقصد الطعام أو النظافة ، بل

المودة و الرحمة و السكينة التي لا تتحقق إلا بين زوجين إرتبطا برباط شرعي و الذي تركته والدتك بعد رحيلها لخالقها خاليا ،

الإحصان و غض البصر لن يتحقق إلا بتوفير الحلال الطاهر ، لذلك يجب أن تحيي أبيك على رغبته الصادقة تلك في أن يسلك طريقا يرضي الله عز وجل و إن أغضبكم ،

أختي الفاضلة :

الدعاااااااااااااااااااااااااااااااااااااااااااااااااااااااااء بتأليف القلوب و أن يرزقكم و يرزق أبيك خيرها ، و أن يكفيكم شرها و أن يخلف عليكم يعد وفاة أمكم بما تحبون في الدنيا و الآخرة

ربنا يربط على قلوبكم و يصلح لكم الحال

[مسافر]

أبوك عزمك

يعني لازم تروحي وتباركيله

[abdulmuttaleb]

أهلا (ذهبية)..

أنا عارف أن رأيي ده ممكن يكون مختلف شوية عن اللي انت متوقعاه ولكن فيه حاجات لازم الواحد يكون صريح فيها..

سيدتي الكريمة،

دعينا نتفق على حاجة مهمة جدا في الأول:

لازم نعرض كل مواقفنا وآراءنا على كتاب ربنا وسنة نبيه محمد صلى الله عليه وسلم قبل احنا ما نصدر أحكامنا الشخصية،

ولو أحكامنا الشخصية تعارضت مع كلام ربنا وسنة نبيه يبقى الغلط فينا احنا مش في الدين العظيم بتاعنا اللي كله رحمة ومودة وتكافل وصلة رحم

بداية وقبل كل شيء قبل الرد أسأل الله أن يرحم والدتك وأن يسكنها فسيح جناته وأن يتغمدها برحمته وأرجو من القراء قراءة الفاتحة لها

الحمد لله رب العالمين

الرحمن الرحيم

مالك يوم الدين

إياك نعبد وإياك نستعين

اهدنا الصراط المستقيم

صراط الذين أنعمت عليهم

غير المغضوب عليهم ولا الضالين

آمين

نبدأ الردّ:

أولا-زواج المرأة بعد وفاة زوجها لا يعني أبدا أبدا أنها خانت العشرة أو العيش والملح أو مودة زوجها، وكذلك العكس صحيح، وده غير إنه مباح في الدين الإسلامي طبعا. النقطة الهامة الأخرى ويا ريت المجتمع ياخد دايما الدين كباقة متكاملة مش جزء آه وجزء لأ، الجزء الهام هو أن سيدنا محمد بعد عشرات السنين من وفاة زوجته خديجة أم المؤمنين كان يحرص على مجاملة صديقات زوجته الراحلة، وكان يهدي إليهنّ بعض الهدايا رغم أن زوجته توفيت منذ زمن، دي نقطة مهمة جدا.

ثانيا-العفش وأثاث البيت ..إلخ كل الحاجات عادة تؤول بالميراث للزوج/الزوجة، يعني هي شرعا من حق كل منهما بعد وفاة الطرف الآخر، طالما كانت ملكا وليس إيجارا، وبالتالي فلا معنى على الإطلاق للتحسر على والله إن والد حضرتك تزوج في الشقة التي كانت تعيش فيها والدة حضرتك رحمها الله.

ثالثا-التعب والإخلاص الذي بذلته والدة حضرتك رحمها الله ليس محصورا يا سيدتي في شقة وأثاث وتحف وأنتيكات، بل هو في أولاد صالحين إن شاء الله ومتربيين على الخلق والدين ومكارم الأخلاق، هذا هو البذل والتعب، ازاي حضرتك تحصري التربية والتعب اللي بتبذله الأم في مجرد شقة ودهان وأثاث؟! أنا أختلف جدا مع حضرتك في الجزئية دي.

رابعا-برّ الأب يا سيدتي غير مرتبط بزواجه مرة ثانية أو ثالثة، وغير مرتبط بكونه يعيش مع زوجته الجديدة في شقته القديمة أم الجديدة، برّ الأب سيدتي أمر إلهي واجب النفاذ في جميع الظروف والأحوال، بل حتى لو طلب الأب أو طلبت الأم من الابن أن يكفر بالله فكل المطلوب منه أن يرفض، وبعض العلماء يقولون أن يقول لهم نعم ولكن لا ينفذ ويتلكأ في التنفيذ.

خامسا-جزئية الجيران وكلام الناس: سيدتي متى كان الناس مقياسا سليما؟ انظري لأبسط شيء في الحياة، الفتاة التي تتحجب يكثر حولها اللمز والغمز تحجبت عشان تتجوز عشان مش عارف ايه، والبنت اللي مش محجبة برضه الناس مش ساكته دي جاهله بدينها دي ناوية دي عشان مامتها محجبة وهي مش بتحبها فدايما عكسها، يعني كلام الناس في النهاية لو حضرتك أو أي حد أنصت له لن يتحرك خطوة وفي الآخر برضه مش ح يعجب الناس.

سادسا-أرجوكِ سيدتي دعي عنكِ كلام المسلسلات والأفلام، لا يوجد ما يشير إلى نوايا (تأثير) على والد حضرتك متعه الله بالصحة والعافية ورزقكم برّه والإحسان إليه، كذلك هذه العروسة لا يوجد ما يشير إلى أنها (خطفت) والد حضرتك، سيادتك ضعي نفسك مكانها رجل وتقدم لفتاة، هل ذنبها أنها وافقت عليه؟ ليس جريمة ولا حرام ولا عيب.

سابعا-اهتموا جميعا كإخوة ببر والدتكم وهو في هذه السن، فالإنسان في هذه السن يحتاج للحنان والرعاية أكثر من أي شيء، ويمكن إذا انشغل الأولاد أن مثلا يرسلوا أولادهم (الأحفاد) لرعاية الجد ومؤانسته في وحدته ومثلا الذهاب معه لاستلام المعاش، أو زيارة قريب أو زيارة طبيب بحيث يجد من يؤنسه ويخفف عنه وحدته.

أسأل الله للجميع التوفيق.

واعتذر عن الإطالة وسامحيني لو كنت أخطأت أو تجاوزت حدودي في الردّ.

[الباشمهندس ياسر]

انا مع مغتربة ف رايها

[osmel33]

الأخت العزيزة ذهبية معلش خلوا الأمور تمشى وتقبلوا الأمر وبلاش موضوع ماخدش رأيكم وأن هي خادت الموضوع

على الجاهز وكلام من ده لأن الكلام ده هو اللى هايزيد المشكلة والفرقة تقبلوا الأمر وأدعوله بالتوفيق وصلاح الحال

طب أقولك على حاجة أنا لما والدتى توفيت من زمان يعنى وكانت قريبة لى جداً وأنا وحيدها وأكيد أنت عارفة علاقة

الأبن بأمه تحديداً بعد وفاتها أنا فكرت شوية كده بهدوء لقيت أن من مصلحة والدي أنه يتجوز علشان كمان أنا باسافر

أزاى هاسافر وأسيبه لوحده وبغض النظر عن سنه وقتها سعيت وأنا اللى طلبت منه بلساني "بغض النظر عايز قطعه ولا لأ"

أنه يتجوز وطبعاً ما دخلتش فى اختياره وسبته يختار وبغض النظر عن حسن أو سوء الإختيار وخلى بالك من سوء دى

هو أختار واتجوز فعلاً وأنا سافرت ومن كام سنة كان بيتعب تعب شديد وكنت بانزله مصر أطمن عليه بس على الأقل

أنا حاسس بأن حد معاه وأنتى عارفه توفاه الله وأنا مش معاه وبرضه كانت زوجته معاه وعلى الرغم من وجود اولاد عمي

بعد كده بس على الأقل حاسس أن فيه حد جنبه وبغض النظر عن علاقتى أنا الشخصية بالحد ده أنتى عارفه أنا حسيت

براحة ضمير كبيره لأنى ببساطة تخيلت أنه لو كان توفاه الله وماكنتش جنبه وماكانش فيه حد جنبه متخيلاها ؟

أكيد كانت هاتبقى صعبة جداً وأنا ماكنتش هاسامح نفسي

عزيزتى ذهبية تقبلى الأمر وأدعى ليه بصلاح الحال وأن زوجته تكون خير عون ليه :lol:

[fatfouta]

اختى العزيزة

بالبلدى كده ابوكى عاوز حنان واهتمام ومش لاقيه منكم لان كل واحد فى دنيته

فلازم نمشى برأى الدين ونروح الفرح ونضحك فى وشه ونحاول نفرحه وخلاص اللى حصل حصل هو اتجوز وخلاص وبرى ابوكى ...برى ابوكى ...برى ابوكى عشان ماترجعيش تندمى على عدم برك ليه وتلاقيه فى ولادك بعدين وتقولى يا ريت اللى جرى ماكان وكنت بقيت كويسة مع بابا

اما هى زوجته يعنى دى ست كبيرة لو قلتلها كلمتين حلوين وحاولتى تكسبيها هتلاقيها بقت كويسه معاكى حاولى تحسنى معاملتها

ياحبيبتى امك ماتت خلاص ادعى لها بالرحمه ومش هتنسيها انا مجربة لكن خلاص ماتت يعنى مش موجودة فى دنيتنا وربنا هو اللى هيجازيها مش انتى ولا اى حد عارفة لما امى ماتت بقيت افتكرها واقول يا حبيبتى فضلتى تشقى وماخدتيش حاجة وافكار من دى يعنى لكن بعد كده ارجع لربنا واقول مانت يارب اللى هتجازيها وادعى لها بالرحمة والمغفرة وان ربنا يديها على اد ماعملت يارب

فانتى دلوقتى مسيطر عليكى مشاعر غضب وزعلك على امك اوعى تخلى المشاعر دى تبقى السبب فى انك تعادى ابوكى اوعىىىىىىىىىىى

اكسبيها صدقينى هتلاقيها كويسة لو عملتى كده انتى واخواتك وده كله عشان خاطر ربنا وابوكى بعد كده

وحاولى تجتمعى انتى واخواتك على كده عشان ربنا يا حبيبتى والله

بصى روحى كمان هاتيلهم هدية وادخلى بيها ان شالله ورد وماتقوليش انى ببالغ هو ده الصح

ولو لاحظتى راى كل اخواتك واخوانك هنا بيقولولك برده ماتخسريش ابوكى وانا بقولك ماتخسريهوش هو زمراته

فكرى كويس وهتلاقى كلامنا كووولنا صح

ربنا يبرد قلبك انا حاسه بيكى اوى

[dongol]

مش عارف معظم الستات دايماً بيحرموا علي الرجاله اللي بيحللوه لنفسهم ليه

معظم الستات بعد ما جوزها يتوفي تلاقيها بتدور علي الجواز بدعوة الوحده و انها لسه في عز شبابها و ما تقدرش تعيش من غير راجل و ضل راجل ولا ضل حيطه و كل الكلام اللي انتوا عارفينه

أختي العزيزه اتقي الله في والدك ولا تتركيه للوحده و الكأبه و معيار الوفاء لوالدتك ليس بعدم الزواج ولكن بمقدار المعزه التي يكنها لها في قلبه

[dongol]

أختي العزيزه معلش هكتب رد تاني علي موضوعك

مش عارف و انا قاعد جت علي بالي السيده أسماء بنت عميس ليه و ربطتها بالموضوع بتاعك

السيده أسماء كانت متزوجه سيدنا جعفر بن أبي طالب ولما قتل تزوجت من سيدنا أبو بكر و لو لما توفي تزوجت من سيدنا علي بن أبي طالب و ماحدش من أهلها او الناس اللي عايشين معاها قال عليها انها خاينه العشره و قليله الاصل و الكلام ده كله

[somayasaleh]

نزلت موضوع من فترة كدة مش عارفة انتم فاكرينة ولالا لو ابوك عايز يتجوز و هو فوق السبعين معظم الرود كانت من الرجال انة من حقة و شرعا وحلال و اى سن

رد ساعتها النساء بان ربنا يصبرنى وان الرجال ملهموش امان

الان بقى بابا بيتجوز فعلا و لقى عروسة احلامة وهى بنت لم تتزوج من قبل عندها50 سنة وجدها فى يوم و شبكها تانى يوم و جهز شقتة قصدى شقة امى و اثاثها و فرشها زى ماهو من يوم ما ماما توفت من سنة يعنى الشقة كاملة من كلة خدتها باللى فيها على الجاهز

طالما الشقة جاهزة لية التاخير يدوب على قد دهان جديد وتم فى يومين يعنى ابويا اتجوز فى اسبوع

بابا لم ياخد راى احد فينا هو بس الحمد الله بلغنا انة شبك و بلغنا ان كتبت كتابة بعد يومين اللى عايز يجى يجى اللى مش عايز براحتة

الجدير بالذكر انة هيعمل فرح ضغنون كدة على قد العروسة الضغنونة لانها بنت بنتوت و عايزة تفرح و طبعا هيدخلوا البيت بزغاريط وزفة عربيات بعد سهرة كدة يفرح بيها عروستة فى البيت الىل اتربينا فية طبعا الجيران كل واحد بكلمة و كل واحد بتريقة

ياترى بقى لو انتم مكانى تروحوا تحضروا فرح ابوكم ؟؟؟؟؟؟؟؟

طيب لو ما روحتوا هيبقى عادى هو مش فارق معاة كتير فى الزعل لانة مهموش راى اى حد من البداية و الىل كان بيقول لة عكس اللى عايزة كان بيخاصمة و يمشى

لكن فارق بقى انة ساعتها هيكون تحت تاثير مراتة بس واهل مراتة و هنكون احنا وحشين

ياترى هتعملوا اية لو مكانى ؟؟؟؟؟؟؟؟؟؟؟؟

عايزة وصفة سحرية منكم امسح بيها السنين و التعب و الاخلاص و الحب اللى امى ضيعتة مع ابى عايزة حد فيكم يقولى اطفى النار اللى انا حاسة بيها ازاى وصورة امى مش بتطلع من خيالى اللى عملتة تعب السنين كلة جة فى دقيقة مسحة كلة

صبرونى باى كلام لانى بدات اتجنن

الاخت الفاضله

الي حصل حصل.... وخلاص مافيش فايده من الزعل

والدك من حقه باقي ايامه يعيشها في امان وراحه.....

انا مع تصرف والدك مائه في المائه.....

لازم تبصي للموضوع من زاويه اخري علشان ترتاحي.....

اولا العروسه 50 سنه يعني مش طمعانه في حاجه غير الستر والاستقرار

علشان كده اعتقد انها ان شاء الله سوف تضع والدك في عينيها وتقوم بخدمته علي افضل وجه(ان شاء الله)

ثانيا ده فلوس والدك وهو احق بها وفي التصرف بها بالطريقه اللي علي كيفه

ثالثا انتم مهما عملتم له مش زي زوجته اللي معه 24 ساعه ... كل واحد في حاله مش ح تكونوا فاضيين له

لذلك ده افضل قرار اتخذه.....ولازم تحضروا وتباركوا له وتحسسوه انكم معه

بالنسبه للوالده الله يرحمها.... هي عند ربنا دلوقت في احسن مكان......

وصدقيني هي من مكانها ده ح تكون مبسوطه علشان اطمنت عل شريك حياتها

اختي الفاضله....... بصي لراحه وسعادة ولدك....ماتبصيش لتعب والدتك والفلوس والحاجات الماديه ده

كوني عادله شويه في نظرتك للموضوع...... الفلوس ده فلوس والدك هو اللي تعب فيها..... فمن حقه كل الحق انه يستمتع بها

وصدقيني بعد كام سنه ح تعرفي انه عمل الصح....لانه مع تقدم السن مش ح تقدري علي مراعاته الصحيه والنفسيه ....والونس .....اللي هو اهم من التواجد المتقطع منك او من اخواتك

اسفه علي التطويل..... بس لازم تضعي نفسك مكانه ....وتفكري بعدل شويه

الف مبررروك مقدما

[Torontotruk]

الف مبروك لباباكي...وبالرفاء والبنين...