أنا .... والاستقدام

[Hazemmagdi]

أنا خريج تجارة وبشتغل في الرياض ووضعي اني كنت طالب على كفالة والدي وبعدين نقلت كفالة للشركة اللي انا عليها مع تغيير مهنة لمحاسب عام والاسبوعين اللي فاتوا دول كنت بعمل الاستقدام

يوم 31/12/2008 رحت لمكتب الاستقدام اللي في الرياض طبعا ومعايا الورق المطلوب اللي هما كاتبينه في الصالة هناك

المهم بعض الناس حذرتني من واحد معقد هناك ووصفولي شكله ويشاء الله أني اقع معاه فبص في الورق وبدون ما يكلم معايا ولا كلمة كتب على استمارة الاستقدام انه مطلوب رخصة العمل - تصوير جميع تأشيرات الخروج والعودة ( أثناء الدراسة يعني لمدة 15 سنة ) - المؤهل الثانوي الأصلي موثق ( مش عارف منين بصراحة ) عقد الزواج موثق وانا كان معايا العقد بس متوثق لحد الخارجية المصرية وقالوا لي مش ضروري يكون متوثق من السفارة السعودية لو اسمي مكتوب في جواز سفر الزوجة والموضوع ده فعلا صحيح ومشي معايا

المهم طلب مني الأوراق ديه فرحت قلت ايه ؟ كنت قريت في المنتدى هنا لازم تحاول مرة واتنين وتلاتة فقلت خلاص احاول تاني ده طبعا بعد ما سألت عن موضوع رخصة العمل والشركة قالت لي مينفعش نطلع رخصة العمل الا مع تجديد الاقامة أو قبل انتهاء الاقامة بستة شهور وانا اقامتي لسه فيها سنة كاملة والكلام ده طلع غلط ورخصة العمل او كارت العمل بيطلع في أي وقت فلما الشركة قالت لي كده قلت خلاص أجرب تاني واقولهم في الاستقدام الموضوع ده , وايه ؟ الراجل اللي في الشركة بيقولي كنت تقولهم انا لسه ناقل كفالة اجيب ازاي كارت العمل ده ؟ ودخلت على مدير الاستقدام بقلب جامد واقوله طيب اديني ورقة انكم عايزينها عشان المعقب يقدر يروح مكتب العمل يطلع لي كارت العمل ده , فقال لي لا احنا مبنديش حد حاجة روح جبها وتعالى وورقك هيكون خالص إن شا ء الله ( بس طبعا معاملته وحشة جدا )

المهم رحت اجرب تاني عند شخص آخر فقال لي لازم رخصة العمل ومدقش على شهادة الثانوية ديه , سألني عليها بس مدقش عليها

في نفس اليوم رحت للمكاتب اللي قدام الجوازات وسألتهم عن موضوع كارت العمل ده فقالوا لي المعقب ده بيضحك عليك وتقدر تعملها في أي وقت والشركة تعملهالك حتى لدرجة ان المكاتب كانت مستغربة اني رايح اطلب منهم حاجة زي كده وقالوا لي ارجع للشركة بتاعتك

المهم رجعت للشركة وصعدت الموضوع والشركة قالت خلاص هنعملها , وعملوها في أسبوع رغم انها بتتعمل في نفس اليوم

استلمتها امبارح ورحت النهارده مكتب الاستقدام وصلت الساعة 7 الصبح كان دوري الـ 35 وبعد الفرز من اللي بيفرز ويدي أرقام رسيت على 17 واحد قدامي

المهم دخلت على الموظف ( واحد تالت ) فبص في الورق وقالي فين شهادة الثانوية قلت له انا واخدها من مصر قال لي حتى ولو من مصر لازم تجبيها وتكون مصدقة

فقلت له انا معايا صورة قالي هاتها وفعلا حطها في الورق وكتب على الورق استطلاع تأشيرات الخروج والعودة وقال لي روح لرئيس الاستقبال ( نفس الشخص اللي انا رحت له في المرة التانية ومدقش على شهادة الثانوية وكان كاتب على الاستمارة رخصة العمل ) فرحت له فعلا وطلعها من على الكمبيوتر وكتب خروج وعودة من تاريخ ..... لتاريخ ....

ورجعت له تاني فاداني الورقة الصفرا والحمد لله

وخلصت الحكاية الطويلة المملة مع ان الموضوع سهل بس الناس بتحب تعقد هنا ( طبعا موضوع كارت العمل ده )

وبالتالي الورق المطلوب بيكون كالتالي :

1- استمارة الاستقدام مختومة من الشركة وعليها توقيع الشركة ( لازم الاتنين )

2- خطاب تعريف من الشركة مذكور فيه الراتب وبيانات الزوجة ( الشركة بتبقى عارفاه بالضبط ) مختوم من الشركة وممضي ومختوم من الغرفة التجارية

3- صورة جواز سفر الزوجة

4- صورة جواز سفرك كامل وخلي بالك من كامل ديه وأهم حاجة صورة تأشيرة الدخول

5- عقد الزواج مصدق من السفارة السعودية ولو متوثق لحد الخارجية المصرية ومكتوب اسمك في جواز الزوجة يبقى مش لازم توثيق السفارة السعودية

6- ايصال البنك اللي يثبت انك دفعت

7- صورة اقامتك

8- صورة رخصة العمل في حالة تغيير المهنة

9- طبعا مع أصول عقد الزواج والمؤهل و الاقامة والجواز وكارت العمل ( بس غالبا مبيسألش عن الجواز ) بس مكتوب انه مطلوب

10- في حالة وجود أولاد معرفش لأن انا معنديش اولاد لسه لكن غالبا أصول شهادات الميلاد متوثقة من السفارة السعودية مع صور منها

وهما إلى حد ما سهلين لكن اللي طول الموضوع معايا وعقدني هو موضوع كارت العمل ده وان الشركة ضحكت عليا وعطلتني اسبوعين كاملين

يعني انا نقلت كفالة في اسبوعين ( بالفلوس طبعا ) والاستقدام اخد مني اسبوعين

لكن الحمد لله كل شيء انتهى وكل شيء له نهاية

وفي الآخر بقى عايز حد يقولي ايه الخطوات المطلوبة في مصر من الزوجة ؟ وايه الأوراق المطلوبة ( هل لازم الورقة الصفرا الاصلية تروح ليها ) وبتعمل كشف بدون اي ورقة من هنا ولا لازم اوراق معينة ؟

يعني لو حد يقول لي باختصار ايه الخطوات المطلوبة مع الاوراق كده بالترتيب ؟؟؟

وأكون شاكر ليكم جدا

وعقبال كل اللي بيعمل استقدام الآن

[HassanAboali]

ألف ألف مبروك والله فرحت لك وشرحت صدري لأني سوف أبدأ نفس إجرإتك تغير منهة وكنت أتمني لوأفيدك ولكن لم أبدأ بعد وربنا يوصلك زوجتك بالسلامة

[ozoozo]

1-تبعت الورقه الصفراء بالدي اتش ال

2-يستلموها وبروحوا اي مكتب صفريات يقولهم علي المطلوب ويخلصوها في حوالي اسبوع

[Hazemmagdi]

شكرا على ردودكم واهتمامكم , وربنا يوفقك يا حسن وييسرلك الأمور , عموما الموضوع بسيط بس حاول يكون ورقك كامل عشان متضيعش وقت ( ده لو مكنتش لسه رحت )

هي الخطوات اللي بتحصل في مصر :

1- بتجيب رقم النت من المكتب اللي هو قدام معامل وزارة الصحة عشان تعمل تحليل الدم في معامل وزارة الصحة ( لازم رقم النت أول خطوة )

2- بتروح مكتب جامكا ( تقريبا اسمه كده ) وده مكتب توزيع , عشان تشوف اي مستشفى هتكشف فيها وده تقريبا عبارة عن كشوفات عامة

3- بتاخد نتيجة المستشفى تاني يوم وتاخد نتيجة معامل وزارة الصحة بعد 3 أو 4 ايام وتروح للمكتب وتديهم نتائج الكشف الطبي و صورة من الورقة الصفرا وصورة من عقد الزواج وصورة من جواز سفر الزوجة وتسلمهم المكتب وبعدين بأه مش عارف لأني لسه في المرحلة ديه لكن أظن بتابع مع المكتب لحد ما التأشيرة تطلع من السفارة ومش عارف ديه بتاخد وقت اد ايه

[tinkerbell]

اشكرك على المعلومات الهامة :unsure: احنا لسة هنبدأ الموضوع ده وفعلا محتاجين لها ! دعواتكم

[Hazemmagdi]

ربنا ييسر لك الأمور إن شاء الله

و لو عندك اي استفسار إسأل وانا أحاول افيدك ان شاء الله