لعبة كلنا نشترك فيها

[ام بودى]

احب نوع من الزهور الى قلبك؟

الورد البلدى سؤالى: من هو العضو صاحب هذه الصفة 1. موضوعاتة متميزة

2. موضوعاتة جادة

3. عضو مهم 4. عضو قليل الظهور 5. عضو تبحث عنه عند دخولك المنتدى 6. عضو حبوب 7. عضو عصبى 8. عضو هادئ 9. عضو مشاكس 10. عضو متمكن من ادواتة

[الباشمهندس ياسر]

بودى ماميت,

ينفع استخدم خاصية م التلاتة بتوع البرنامج

و اطلب تغيير السؤال

[ام بودى]

تؤتؤتؤ السؤال اجبارى بص فى ورقتك وجاوب باقى من الزمن ... انت لسة بتبص حواليك ممنوع الغش

[ريحانة]

ام بودى

بقالى نص ساعة مستنية السؤال يتغير

ده صعب اوى

اصعب من الثانوية العامة

حد يرد بقى :lol:

[ام بودى]

يا نهار ابيض وطراطيفو بنبة هو السؤال صعب اوى كدة ولا اية طيب لحد ما ييجى حد لهلوبة ويجاوب ع السؤال الصعب اسأل سؤال تانى جوة المنهج مش براة السؤال: اية الفرق بين الفيل والنملة اهو سؤال هايف اهو

[الباشمهندس ياسر]

يبدو ان بودى ماميتو

بتسال ف حاجات بره المنهج خاااااااالص

عموما لغاية ما ترجع و تغير الاسئلة احط انا سؤال

أجمل فيلم ابيض واسود و اجمل مسرحية و اجمل فيلم الوان

و لغواة الافلام الاجنبية

اجمل فيلم رومانسى؟؟

تم تعديل 6 مارس 2009 بواسطة الباشمهندس ياسر

[ام بودى]

أجمل فيلم ابيض واسود

ام العروسة

و اجمل مسرحية

المتزوجون

اجمل فيلم الوان

الناصر صلاح الدين

و لغواة الافلام الاجنبية

اجمل فيلم رومانسى؟؟

بودى جارد وبلاش اسأل

[الباشمهندس ياسر]

وبلاش اسأل

:closedeyes:

[alsaher]

حضرتك أنا حجاوب على السؤال الصعب ده

بس سامحينا لو كانت الإجابه بأكتر من شخص أحيانا

1. موضوعاتة متميزة : لولا

2. موضوعاتة جادة : الفاضل أبو محمد

3. عضو مهم : الفاضل عادل أبو زيد

4. عضو قليل الظهور : في كتير ، أذكر منهم Heba و Emo

5. عضو تبحث عنه عند دخولك المنتدى : كتير والله ، منهم لولا ، إمو ، الباشمهندس ياسر ، ريحانه ، ولاء ( لو ماكنتش غلطان بالإسم)

بإختصار الشلة بتوع الشعر والأدب والواحه

6. عضو حبوب : بيتهيألي الفاضل س س ، وأعتقد إني شديت معاه في الحوار مره من فتره ، وماكانش لازم يحصل وبأعتذر منه

وأيضا الدكتور التهامي باشا :happy:

7. عضو عصبى : مش عارف ، بس يمكن أنا :closedeyes:

8. عضو هادئ: الدكتور هشام إبراهيم و الدكتور الشامي

9. عضو مشاكس : مع إني من يوم ما سجلت لم أصادف تواجدها ، لكن من الأرشيف واضح إنها هبه :sad:

بس مشاكسة لطيفة وأحترمها طبعا

10. عضو متمكن من ادواتة

دي صعب أحصرها في شخص

فالأغلب هنا يعتقد أنه متمكن من أدواته ، ودائما هناك طرف آخر يختلف معه ويعتقد أن ادواته هي الأكمل والأصح

أتمنى أكون جاوبت كويس

سؤالي ....

كم مرة قلت حغير من نظام حياتي ومنفذتش أي حاجة من اللي قولتها ؟؟

[ام بودى]

عضو تبحث عنه عند دخولك المنتدى : كتير والله ، منهم لولا ، إمو ، الباشمهندس ياسر ، ريحانه ، ولاء ( لو ماكنتش غلطان بالإسم)

وانا لأا انا اسمى مش مكتوب طيب هو انا مش من الواحة اروح ادور لى على بلد تانية غير الواحة اعيش فيها sad:

كم مرة قلت حغير من نظام حياتي ومنفذتش أي حاجة من اللي قولتها ؟؟

كتيييير وباستمرار

سؤالى

هل انت راضى عن نفسك

[alsaher]

وانا لأا انا اسمى مش مكتوب طيب هو انا مش من الواحة اروح ادور لى على بلد تانية غير الواحة اعيش فيها

لا والله

معلش أنا في حكاية لأسامي مش أوي

يعني أحيانا بافتكر أراء وبأفتكر مواضيع بس مش بأفتكر صحابها والله

زهايمر مبكر بعيد عنك

وتقبلي مني بوكيه الورد ده

هل انت راضى عن نفسك؟؟

لا , مش راضي خالص خالص :sad:

إيه رايك في الجو النهارده wst:: ؟؟

تم تعديل 7 مارس 2009 بواسطة alsaher

[ذهبية]

إيه رايك في الجو النهارده ?

الجو النهاردة فى مصر حر و مترب و رياح الخماسين بدات يعنى جو ربيعى لكن مش حلو بسبب التراب

سؤالى

اية الامنية اللى اتمنتها وربنا حققها ليك ؟؟؟

و ياريت اكتر من عضو يجاوب علشان تدونا امل ان الامانى ممكن تتحقق بشوية صبر

[الباشمهندس ياسر]

اية الامنية اللى اتمنتها وربنا حققها ليك ؟؟؟

و ياريت اكتر من عضو يجاوب علشان تدونا امل ان الامانى ممكن تتحقق بشوية صبر

ياااااااااااااااااااااه

امنيات كتير اوى حققهالى ربنا

منها انى ادخل هندسة و منها انى اشتغل ف المجال بتاعى

و منها انى اظبط ظروفى بعد التخرج مع نفسى كده و حصل بفضل الله

و حاجااااااااااااات كتير اوى

وان تعدوا نعمة الله لا تحصوها

مش هسال بقى عشان اللى يجى يكتبلنا عن امنياته اللى اتحققت

[waloaa]

اية الامنية اللى اتمنتها وربنا حققها ليك ؟؟؟

اتمنيت إنى اكون وسطكم واتعرف عليكم كلكم :blush2:

[الباشمهندس ياسر]

فين السؤال

[emano]

إيه رايك في الجو النهارده ?

الجو النهاردة فى مصر حر و مترب و رياح الخماسين بدات يعنى جو ربيعى لكن مش حلو بسبب التراب

سؤالى

اية الامنية اللى اتمنتها وربنا حققها ليك ؟؟؟

و ياريت اكتر من عضو يجاوب علشان تدونا امل ان الامانى ممكن تتحقق بشوية صبر

1- اتمنات زوج متدين بس مش متعصب وفاهم الدين بعتدال وربنا حققلى الامنيه

االاولاد بنين وبنات

اكون موجوده قبل وفات والدى وفعلا وصلت من السفر الثلاثاء وتوفى الخميس الله يرحمه

اتمنات اصوم رمضان الى فات ومفطرش وفعلا ربنا قدرلى صيامه وفطرت اخريوم فقط علشان البابى كان وصل

ياحجات كتيره قوى متهيقلى كل دعاء باصر عليه جامد ربنا بيحققهولى الحاجه الوحيده ا الى لسه متحققتش ان بنت تبطل حطه اصبعها فى فمها لان عمرها 8 سنوات دعواتكم معى

- 2-

[الباشمهندس ياسر]

احط انا السؤال بقى ... و امرنا الى الله

تستمتع بالموتوسيكل اكتر ولا بالسيارة؟؟

[alsaher]

تستمتع بالموتوسيكل اكتر ولا بالسيارة؟؟

أنا بأحب السيارة أكتر بكتير

وتجربتي مع الموتسكل كانت فاشلة ومش موفقة

لكن حبيت أوي تجربة الموتور السفاري في الصحرا ، كانت حاجة حلوة

بالمناسبة انا مجنون سرعة ، يعني في الزحام بأبقى ماشي بالراحة ، لكن بس أطلع طريق مفتوح ، بيطلع الجنان كله

لغاية ما عملت حادثة ، وبناء عليه رجعت للمواصلات :)

وياريت ماحدش يسرع خالص بجد

سؤالي ...

بتقضي إجازة آخر الإسبوع إزاي ؟؟؟

[الباشمهندس ياسر]

سؤالي ...

بتقضي إجازة آخر الإسبوع إزاي ؟؟؟

غير السؤال يا عم ساهر

او استنى حد غيرى يجاوبك

صدقنى ... مش هينفع خالص اجاوب

بااااااااااااااس

[ريحانة]

سؤالي ...

بتقضي إجازة آخر الإسبوع إزاي ؟؟؟

غالبا فى البيت مابين القراءة وتخليص اللى ورايا

وساعات قليلة بخرج مع صحابى لكن ده قليل جدا

وساعات بزور اقاريبى اللى بقالى كتير مشفتهومش

الأوقات دى تعنيلك ايه؟

الفجر

الصبح من الساعة 6 الى 9 تقريبا

الغروب

منتصف الليل