لعبة كلنا نشترك فيها

[الباشمهندس ياسر]

هو السؤال صعب والمفروض اغيره؟؟

طب انا هغيره

اكتر لون بتحبه و بيغطى نسبة اد ايه ف البيت عندك؟

تم تعديل 11 مارس 2009 بواسطة الباشمهندس ياسر

[waloaa]

اكتر لون بتحبه و بيغطى نسبة اد ايه ف البيت عندك؟

اكتر لون بحبه: الموف بدرجاته كلها

موجود كتير فى لبسى, اكسسواراتى, اقلامى, حتى الماركر اللى بخطط بيه ف الكتب :ninja:

أنا نفسي قوى أعمل الرحلة البحرية بتاعة موانى البحر المتوسط

سؤالي :ايه الرحلة اللى نفسك تعملها و حتستمع بيها قوى؟؟

[الباشمهندس ياسر]

أنا نفسي قوى أعمل الرحلة البحرية بتاعة موانى البحر المتوسط

سؤالي :ايه الرحلة اللى نفسك تعملها و حتستمع بيها قوى؟؟

رحلة الموانى البحرية رحلة جامده جدا...اما تطلعيها ابقى اكتبيلنا عملتى ايه هناك

المهم

انا عندى رحلة غريبة اوى اوى ..مش كتير اللى سمع عنها

فى جبل اسمه جبل علبه ع البحر الاحمر بين مصر والسودان

نفسى نطلع جروب كده وناخد هناك اسبوع...فعلا نفسى فيها اوى

بس المشكلة انى واصحابى مش بنتجمع خالص لمدة كافية

سؤالى...

عملت رحلة صيد قبل كده؟؟ و لو اه فين وامتى؟؟

[alsaher]

عملت رحلة صيد قبل كده؟؟ و لو اه فين وامتى؟؟

والدي يحب الصيد جدا

وفي صغري كتمرد على كل ماهو معتاد كنت أكره الصيد ، لكنني بعدها أصبحت أحبه جدا جدا ، وربما أمارسه أكثر من والدي

كنت عندما أسافر بلدي ، كان هناك مرفأ صيادين ، يقومون بصناعة انواع الشباك يدويا ، بطرق قديمة وتقليدية وبأثمان ليست رخيصة

كنت أشتري منها وأهديها لوادلي عندما أزوره >>> هدية بس بفلوسه :ninja:

ربما فترة الثانوية كنت أمارس هذه الهواية كل إسبوعين على الأقل

كنت أخرج لمنطقة على البحر الأحمر خارج حدود مدينة جده بحوالي 50 كيلو ، وأبدأ يومي بفرد الشباك بطرق معينة وفي أماكن مرور أفواج السمك

ثم أدخل للغطس وأتركها

ثم أعود كل فترة وأقوم بحركات معينة حول أماكن الشباك ، لتحريك أفواج السمك إلى مكان الشباك

وبعد المغرب أبدأ إما بسحب الشباك للخارج

أو تسليك السمك منها وإخراجه ، قبل سحبها ، لأنه تسليك السمك في الماء أسهل وأصح لسلامة الشباك :ninja:

أحيانا اصيد 3 كيلو من انواع مختلفة ، تزيد وتنقص حسب الجو

وذات مره كنت ووالدي وصدنا حوالي 12 كيلو في 3 ساعات فقط

وادوات الشواء جاهزة طبعا ، نتعشا ونرفع كام سمكه لغداء آخر في البيت بعد يومين ، والباقي نوزعه لأي حد

ومرة جربت الصيد بالصناره في رحلة بمركب بحري في جده برضو ، مع إنو صدنا كام سمكة حلوين ونوعيات رائعة ، لكني ما إستمتعت في العمليه

طبعا الكلام ده كله فات عليه على الأقل 4 سنين وأكثر

ذكرتني بأيام حلوة يابش مهندس ، لكن أكتر شيء بحبه هو البحر والسيارات ، والإتنين حصلي حوادث فيها وامتنع عنها بطلب من الأهل :)

سؤالي

عمرك عملت خناقه ، ولو أه كام مره ، وإنتهت إزاي ؟؟؟

[الباشمهندس ياسر]

سؤالي

عمرك عملت خناقه ، ولو أه كام مره ، وإنتهت إزاي ؟؟؟

افتكر ان كنت عصبى جدا

و لغاية فترة قريبة

تقريبا و انا ف تانية كلية بدأت اتعلم ابقى هادى و اعصابى ف تلاجة

صحيح انا لسه فيه ناس بتقول عليا نرفز بس فيه فرق كبييييييييييييييييير

المهم

انا من النوع اللى مبيستحملش البارده ابدا

دمى حامى و عندى يقين ف الله انى لو واجهت بلد فأنا ادها و ادود طالما ع الحق

و فعلا كنت ما ادخل فى اى مشكلة بدخل بصدرى و دائما الخصم يجيب ورا

المهم عدد المرات اكتر من انى افتكره..و كل ما ترجع لورا تلاقيها تكتر

بتنتهى ازاى ...دائما لصالحى بفضل الله

الا مرة واحدة .. كنت ف اولى ثانوى و كنا تلاته زمايل ( عيال اصلها فلاحين بقى)

ووالله العظيم يا ساهر دخلت الخناقة عشان واحد منهم اتشتم

و قلت للجماعه التانين .. انت ازاى تشتموا و هو ماشى معايا

راح شاتمنى انا كمان

رحت مالى بوكس جميل ف عنيه و بعدها لقيتهم زى التتر حواليا

انا شاطر اوى ف القصة دى بس اتغدر بيا لان الاتنين اللى معايا جريوا

و ربنا سترها و كان معدى شباب من اصحابى و حجزوا بينا

بعد ما اخدت اول واخر بوكس ف عينى

ومن يومها ..مبقتش اصاحب ولا امشى الا مع الرجاله ولاد الرجاله

و دائما بأفكر نفسى بالجملة اللى بتقول

اختر لنفسك من اذ لم يمنعه شرف دينه من خيانتك ,منعه شرف اصله... واللى يعترض يعترض براحته

سؤالى..

رحت رحلة صيد برى ... سافارى يا معلم؟؟

[alsaher]

قصص الخناقات رغك كرهي الشديد لها

لكن أحيانا بأحس إنها قدر لابد منه في بعض الأحيان ، ولازم تكون جاهز لها :ninja:

سؤالى..

رحت رحلة صيد برى ... سافارى يا معلم؟؟

صيد بري ، ماعمريش عملتها ، لكن نزلت سفاري من غير صيد وكان في صحاري الغردقة ، كانت تجربه جميله

سؤالي ....

عمرك سافرت من بلد لبلد بالبحر ؟؟؟؟

[SoSo R]

سؤالي ....

عمرك سافرت من بلد لبلد بالبحر ؟؟؟؟

لأ الصراحة ما حصليش الشرف!!!

سؤالى:

أيهما أكثر نجاحا فى رأيك الخاص....زواج الحب أم الزواج التقليدى؟؟

أرجو الأجابة من أكثر من عضو

[SoSo R]

سؤالي ....

عمرك سافرت من بلد لبلد بالبحر ؟؟؟؟

لأ الصراحة ما حصليش الشرف!!!

سؤالى:

أيهما أكثر نجاحا فى رأيك الخاص....زواج الحب أم الزواج التقليدى؟؟

أرجو الأجابة من أكثر من عضو

[ذهبية]

سؤالى:

أيهما أكثر نجاحا فى رأيك الخاص....زواج الحب أم الزواج التقليدى؟؟

أرجو الأجابة من أكثر من عضو

و الله يا سوسو انا من وجهة نظرى و اللى نفذتة فعلا فى حياتى ان الجواز التقليدى انجح من جواز الحب و طبعا دى مش قاعدة

اعتقد ان الجواز التقليدى احسن بسبب ان العقل بيكون المحور الاساسى فى الاختيار فاكيد هتكون فى مراعاة فى المستوى الاجتماعى و الاخلاقى والمادى لكن لما القلب بيدخل بيلغى كل الحدود و بيشيل كل المسافات و بتذوب كل الفروق

لو الاختيار عن القلب راعى في التناسب العقلى و الفكرى و الاجتماعى اكيد ممكن ينجح و فى الاول و فى الاخر الجواز دة نصيب ومحدش عارف نصيبة فين ومع مين

[ذهبية]

سؤالى

فى مجتمعاتنا الشرقية طبيعى جداا ان المراءة ان تتزوج رجل اكبر منها بالعمر .

لكن هل ممكن الرجل يتزوج امراءة اكبر منة فى السن ؟؟

[الباشمهندس ياسر]

سؤالى:

أيهما أكثر نجاحا فى رأيك الخاص....زواج الحب أم الزواج التقليدى؟؟

أرجو الأجابة من أكثر من عضو

الزواج التقليدى الذى يسبقه اعجاب متبادل من الطرفين

و بصراحة زواج الحب دائما جايب لورا ويقطع الحب وسنينه و البهدلة اللى شفناها و بنشوفها بسبب الحب

سؤالى

فى مجتمعاتنا الشرقية طبيعى جداا ان المراءة ان تتزوج رجل اكبر منها بالعمر .

لكن هل ممكن الرجل يتزوج امراءة اكبر منة فى السن ؟؟

ايوه ممكن ... بس لازم يكون ف شريحة بتفهم

عشان ميسمعش جمله ... من همه خد واحده قد امه

و شفت حالات بالصورة دى

و دائما ردود فعل المراة بتبقى عاليه اوى و بتحل مشاكل كتير ممكن تحصل

بس مينفعش ياخدها اكبر منه بكتير

يعنى من سنة لتلاته

اكتر من كده يبقى هيتعب على مستويات تانية مينفعش نكتبها ف المنتدى هنا

مش هكتب سؤال عشان ادى فرصة للاخرين يجاوبوا

[alsaher]

سؤالى:

أيهما أكثر نجاحا فى رأيك الخاص....زواج الحب أم الزواج التقليدى؟؟

بناء على التجارب اللي بأشوفها حولي

الزواج التقليدي انجح ، وكتير بيولد معاه حب خرافي بيستمر أكتر

بس برضو في زيجات حب ناجحه

فى مجتمعاتنا الشرقية طبيعى جداا ان المراءة ان تتزوج رجل اكبر منها بالعمر .

لكن هل ممكن الرجل يتزوج امراءة اكبر منة فى السن ؟؟

في المجتمع اللي انا منه ، ده بيعتبر جريمة نكراء ، او على تعبير أخف حده، حالة شاذه جدا

ربما يتحدث عنها وبها كل من سمع عنها

هذا إن حصل وكان هناك موافقة من الاهل ، خاصة أهل العريس

وأعتقد إنها بتكون معركه طاحنه ربما تصل للخيار بين هذه الجيزة أو الأهل

إيه الحد الأدنى والأقصى لفارق العمر بين العروسين ، برايك ؟؟

[شيماء حمدين]

مساء الورد على كل لاعيبة المنتدى

حبيت اشارك فى اللعبة للمرة التانية ارجو ان اكون لاعبة شاطرة المهم

انا راى فى ايهما انجح الزواج عن حب ام زواج الصالونات

كلاهما ممكن ان ينجح مع توافر التوفيق

لانى الحب بعد الجواز بيتغير وبياخد مجرى اخر ولا يستمر حب النظرات والقاءات وغيرة

بيبدء المنديل يتلبس والجلبية تتلبس باليومين والميك اب يتشال ويظهر الوجة الحقيقى

ويمكن دة اللى بيخلى الراجل يتغير ويغير راية

بس على فكرة الزواج بدون معرفة سابقة بيظل الحب صامد فية لمدة اطول شوية

لكن لو الست زكية ومتجددة ومتغيرة فتضمن ان الحب سيدوم

:unsure:

[شيماء حمدين]

اة نسيت اكتب سؤالى

هما فى الحقيقة سؤالين

الاول تقول/ ى لمين بحبك وحشتينى

الثاى تقول/ى لمين لو انتى مطلعة عينى بحبك موووووووووت

[الباشمهندس ياسر]

اة نسيت اكتب سؤالى

هما فى الحقيقة سؤالين

الاول تقول/ ى لمين بحبك وحشتينى

الثاى تقول/ى لمين لو انتى مطلعة عينى بحبك موووووووووت

الاول : هى عارفه ... لما يحصل النصيب هتقرا ده كله وتعرف ساعتها

التانى : ست البلاد ..مصر ...اللى بتضييع مننا يوم بعد يوم

انا افتكرت حسن الهلالى ..الاول و بعدها بشوية الثانى :sad:

سؤالى...

عندك كام ساعة و نوعهم ايه؟

[ذهبية]

عندك كم ساعة و نوعهم اية ؟؟؟

انا مش باحب الساعات اصلا لذلك هاترك اجابة السؤال دة اللى بعدى

سؤالى

لما تشعر بالغيرة و تحس ان قلبك بيوجعك من احساس دة و تحس انك ضعيف و الغيرة مطيرة النوم من عينك تعمل اية ؟؟؟

[الباشمهندس ياسر]

سؤالى

لما تشعر بالغيرة و تحس ان قلبك بيوجعك من احساس دة و تحس انك ضعيف و الغيرة مطيرة النوم من عينك تعمل اية ؟؟؟

هفترض ان الحالة اللى حضرتك تقصديها بين زوجة و زوجها

ينفع اقول ان الصح هنا ... انها تراجع نفسها و تشوفه انتبه لغيرها ليه ده اولا

ينفع اضيف انها تبدأ تشد انتباهه ... باى تجديد تعمله ف نفسها او ف حياتها

ينفع اضيف مداخلة منفصلة بتتكلم عن الموضوع ده

دقائق و اضيفها ان شاء الله

[الباشمهندس ياسر]

مبدئيا دى مقالة عن سبب نفور الزوح و الوصول لمرحلة التعدد

نادراً ما نجد زوجاً يصارح زوجته بما يكنّه من نية في الزواج من أخرى ، فمعظم الرجال يخفون أمر الزواج من امرأة أخرى عن زوجاتهم ، ويضعونهن أمام الأمر الواقع .

أيتها الزوجة العزيزة ألم تتساءلي عن سبب زواج زوجكِ من أخرى وهو مازال يعشقكِ ؟؟

فهل من السهل أن يفكر في الزواج مرة ثانية ويتكلف ببيت جديد ومسؤولية مضاعفة ؟

وهل من السهولة التي تجعل الرجل يقسم حياته بين ثلاث زوجته الأولى وزوجته الثانية وعمله ؟

كلا .. ثمّ كلا .. ففكرة الزواج عزيزتي الزوجة لم تكن بالأمر الهين كي يفكر به زوجكِ .. فلابد من وجود مبررات وأسباب مقنعة جداً دفعه لأن يكلف على نفسه هذه المسؤولية . هذا النوع من التفكير وإيجاد البديل المريح لا يراود الأزواج إلا عندما يشعر بالنقص في نواحي من حياته الزوجية ويحس بفقدان السعادة التي يحلم بها .

عزيزتي الزوجة .. لماذا لا تتجنبي هذا الألم الذي حلله الله للرجل وهو تعدد الزوجات بالاكتفاء بكِ وحدكِ كي تكوني أميرته دون غيركِ ؟؟

ابدئي أولاً بنفسكِ وانظري ما ينقصه منكِ .. ثم اتركي العناد واللامبالاة جانباً .. ثم اسألي نفسكِ الأسئلة التالية علها ترشدكِ إلى ما أبعد زوجكِ عن حياتكِ

هل طلب منكِ يوماً أن تتزيني له و تسرحي شعركِ ورفضتِ أمره ؟

هل طلب منكِ أن تعدي له نوعاً من الأطعمة الشهية ورفضتِ أمره ؟

هل طلب منكِ الخروج معه ذات ليلة لوحدكما ورفضتِ أمره ؟

هل طلب منكِ مصاحبته إلى المحال لتختاري له احتياجاته ورفضتِ أمره ؟

هل يجد ابتسامة وجهكِ المشرق كل صباح وأنتِ تقدمين له كوب الشاي أو كأس العصير ؟

هل رفعتِ سماعة الهاتف أثناء تواجده خارج البيت لتهمسي بأذنه اشتقتُ إليك ؟

هل أسمعته كلمة (حبيبـي ) كأول ما نطقت به شفتاكِ عند دخوله البيت بعد عمل متعب ؟

هل امتدحته يوماً أثناء تواجدكِ مع أولادكِ كي تشعريه بأهمية وجوده ؟

هل وجدكِ تنتظرينه بشوق ولهفة عند عودته مساءً بشذى العطر وهندام جميل ؟

هل قدمتِ له عبارات الحب والإخلاص أثناء حديثكِ معه ؟

وهل أعددتِ له يوماً جوّاً رومانسياً مليئاً بالزهور الحمراء والشموع الصفراء في يوم ميلاده كمفاجأة لهذه المناسبة ؟

وهل وقفتِ أمام المرآة لتقارني بين صورتكِ اليوم و صورتكِ بالأمس ؟

إذن عزيزتي الزوجة ..

لا تعاتبيه ولا تلوميه فمعه كل الحق أن يبحث عن كل ذلك خارج البيت الذي افتقر لراحته التي يتمناها

ولا تعاتبيه عندما يتخذ خليلة تنسيه تعاسة الحياة معكِ إذا افتقر إلى المال ..

ولا تغطي أخطاءكِ برعاية الأولاد فهؤلاء إن احتاجوا إليكِ يوماً فالزوج يحتاجكِ كل يوم وكل لحظة ..

أيتها الزوجة .. فما دمتِ وقفتِ على جوانب النقص فابدئي الآن وليس غداً واستعيدي ذكريات شهر العسل وكيف كانت رائعة ..ولا تدعيه

يقول : عذراً زوجتي!! سأتزوج

و ده موضوع كامل عن الغيرة

http://www.egyptiantalks.org/invb/?showtopic=72296

و اخيرا ربنا يصلح ذات البين عند كل الناس

[الباشمهندس ياسر]

سؤالى :

زعقت لحد ف الشارع قبل كده؟

[SoSo R]

سؤالى :

زعقت لحد ف الشارع قبل كده؟

يوووووووه كتييير..

أى واحد يتغابى فى السواقة و لا يكسر عليا مثلا..واقعته سودا

بس المشكلة فى المطاردات اللى بتحصل بعد كدة

غير الشحاتين اللى بيلزقوا وما بيفهموش...مرة زعقت فى واحدة منهم :happy:

بلطجية أنا مش كدة؟!!

آه نسيت ....هما الزباين اللى بتتهزق و تطرد من الصيدلية شر طردة...يعتبروا تبع الشارع؟؟؟ :lol: