لعبة كلنا نشترك فيها

[لماضة مصرية جدا]

السلام عليكم و رحمة الله و بركاته

حبايبي الحلوين.....اللي بالمبخرة شايلين.....واللي منها برضه ملسوعين

اول حاجة سمعنا يا جدع أحلي سلام مربع.....

للزميلة ذهبية.... يعني الذوق... يعني اللطافة ...يعني الخفافة... و انا و أنت.... و رقصنا يا جدع

و اديني سلام م الغمييييييييييييييييق لدكتور الدكاتير (ايون دكاتير جمع تكسير.... مش حضرتك عظام برضه.... :blink: ).... اللي بسطنا بتعليقات كتير.....

(واد يا فجلة قوم اصحي....سايبني اعمل تحية و انت نايم.....معلش هي الفرقة درجة 17 اصلا)

بالنوسبة بقي للسؤال العميك جدا بتاع اختنا ذهبية.... و الله يا اوختشي انتي فيكي حاجة لله....ليه بقي

لان طول عمري انا متاكدة ان ده هيحصلي.....و لما بحضر فرح....بستني اللقطة دي و بعمل عليها زوووووووووووم إن..... و افضل اضحك من قبل حتي الراجل ما يوقع و لا يحرق حاجة (عشان كده آديلي فترة مبتعزمش ف افراح...تفتكروا ليه....ليه.... ما أنا بسال ليه برضه؟؟؟)

هو الموقف ده حصل بس بطريقة شوية دراماتيكية...ايه بقي....؟؟؟

العريس كان فقد شعره و كان محتفظ بالذكري الخالدة متجسدة في حبة كده علي استحياء ع الجانبين (و الله ما تريقة.... احسن حد يزعل) ا

لمهم و هما في بداية الزفة العبيطة اللي بتحصل دي و اللي الاتنين بيبقوا واقفين فيها و بيضحكوا علي خيبتهم قصدي فرحتهم.....

واحدة من قرايب العريس.... متعرفوش النداهة ندهتها و لا ايه و إذ فجأة راحت مطلعة علبة شبه البيرسول....آه و الله..... أن شفت كده قولت بس دي لقت كائنات متحركة ف راسه و هتعمل تطهير

أتاريها ايه.... بتاع كده بيعمل رغاوي... زي لما الواحد يبقي غشيم غسيل و قاعد ع الطشت و بدل ما يمرش الغسيل عمال يحط مسحوق

المهم..... متعرفوش هو مفهوم الفرحة عندها ايه بالظبط.....بس هي مسكت بتاع الرغاوي ده و هاتك يا فرحة و زغرتي ياللي انتي مش غرمانة

المشهد الدراماتيكي بقي طلع في صور الزفاف الخالدة......

شاب في مقتبل حياته....

فقد شعره....

و فقد حريته و عزوبيته للأبد.....

وو فوق ده كله فوق راسه كمية رغاوي عامل زي دقن بابا نويل بس تقريبا بابا نويل كان بعافية شوية بدل ما يحطها دقن زرعها شعر

طبعا انا عملت الواجب و زيادة...

و ده من نوع أول ما زرتهم (اصل العروسة كانت و لا زالت مكتوبة في البطاقة اختي)

باركتله....الف مبروك كابتن برسيل... يا رب ربنا يرزقكم برغاوي صغيرة تتنطط و تملا عليكم البيت نضافة و حيوية

و طبعا اختي غيرنا اسمها و بقت.....

مودام نظيفة القطنة ما بتكدبش

بس بعدها حسيت انهم اتغيروا من ناحيتي خالص (تفتكروا ليه؟؟؟)

ايه ده انا مجاوبتش ع السؤال

انا شخصيا هيكون صعب جدا اتجوز حد اصلع او اقرع أو مسطح او اي صفة عااااااااااارية من الشعر (المشكلة مش فيه..... المشكلة فيا... انا عارفة نفسي هفضل اتريق و هتنتهي حياتنا الرومانسية جدا جدا بمجموعة من البونيات الي بوقي الجميل اللي بينقط سكر......يا اخوانا حد يرش النمل الي اتجمع هنا ده)

بس لو ده حصل انا هميل عليه......

و هحط عيني في عينه

و بكل الحب اللي ف الدنيا

هبوس راسه

..............

............

............

............

...........

...........

..........

و احطها جنب الحيط

و الفح الفستان بقي ع دراعي (متخافوش بلبس بنطلون من تحت الفساتين.... ايون دي موضة اليومين دول)

و هتكل ع الله اروح بيتنا

فوتكم بعافية

[رضوي]

السلام عليكم ورحمة الله وبركاته

بجد وحشتوني الفترة الي فاتت دي غصب عني معلش كنت مشغولة جداً

ايه السؤال الصعب دة

بس حلو برضه جاااااااااامد يعني

عمالة اتخيل المنظر

فعلا مش عاطفي خالص

ربنا يستر

فكرتوني بمسلسل كنت بتغرج عليه وانا صغيرة ............ تقريباً كدة كان بتاع ظريفة ( أثار الحكيم )

اه علي ما أظن كان اسمه( ترويد الشرسة ) تقريباً

المهم كان احمد السقا بيتجوز مها احمد ( في المسلسل طبعاً ) المهم في الفرح وقع كاس الشربات علي فستان مها احمد

فجن جنونها وتعصبت علي احمد قوي لدرجة انها شتمته

طبعاً الموقف كان صعب قوي علي العريس

فطلقها في ساعتها

واتقلب الفرح الي محزنة

الاجابة بقي

كان موضوع المبخرة دة بيعجبني في الافراح ( بس انا كنت بفتكرها شوية مؤثرات مش اكتر يعني مش نار ودخان حقيقي ) بس من دلوقتي قررت اني ماعملش في فرحي الحاجات دي علشان الموقف حيبقي اكتر من صعب

بس لو حصل فعلا (لاقدر الله ) ححاول الم الموضوع بدبلوماسية شوية قدر استطاعتي , بس مايكونش فيه اصابات بالغة

مش عارفة يمكن اجابتي مش عجباني لان الموقف فعلا رخم قوي

نسيب السؤال شوية كمان

وحرجع تاني باذن الله علشان اسأل سؤالي

[الباشمهندس ياسر]

نسيب السؤال شوية كمان

وحرجع تاني باذن الله علشان اسأل سؤالي

يااااااااااااااااه يا رضوي

ده انا منتظر من امس

احط انا السؤال بقي علي ما تيجي رضوي..؟

ولا اقولكم

هخرج اتعشي.. لما ارجع ان شاء الله

[رضوي]

يااااااااااااااااه يا رضوي

ده انا منتظر من امس

معلش خليتكوا تنتظروا

سوري يا بشمهندس

بس انا فعلاً مشغولة جداً اليومين دول ( ادعولي -عندي كمية من العمل الشاق رهيييييييييييييبة )

ماعلينا

سؤالي

بس عايزاكو تفكرو فيه كويس واتمني ان عدد كبير من الأعضاء يشاركني فيه

هو موضوع حقيقي لصديقة تهمني جداً

الموضوع وما فيه

صديقتي دي كان معاها زميل هي بتكرهه جداً كدة لله في لله من غير سبب واضح .......... بس يمكن لأنه شايف نفسه حبتين وطالع فيها شويتين ......... هي ماتعرفش سبب عدم ارتياحها ليه من أول مرة تشوفه وكانت دايماً بتتعامل معاه بأسلوب مش كويس ( وهي بشهادة كل الي يعرفوها مثال للادب والذوق والاخلاق ) لدرجة انها لو في مرة واقفة مع اصحابها وحاول زميلها دة الاشتراك معهم في الحديث كانت تنقلب رأساً علي عقب وتتحول من بنوتة هادية ومرحة وبشوشة إلي شخص آخر , وفي مرة كانت بتتكلم مع اصحابها في مواضيع عامة وجاء وتتدخل في الموضوع وفي ضمن كلامه قال ( اصل مستوايا مايسمحليش ....) وفجأة راحت صديقتي بكل هدوء ردت عليه وقالتله أمام الجميع : اوكي انت بقي روح اتكلم مع الناس الي في مستواك إلي انت اصلاً فاكره مستوي مع انك أقل من العادي علي فكرة حاول تفهم الواقع دة ................... وطبعاً الكلام دة كان امام الجميع مما تسبب في احراجه بشدة ........... ولم تشعر هي بأي تأنيب للضمير بالعكس دي ارتاحت ( أنا بحكي كل دة علشان تعرفوا هي بتكرهه اد ايه) وبعد فترة حوالي سنة ونصف ( كان بيحاول يكلمها خلالها بس دايماً بيلاقي الباب مقفول في وشه ) زميلها دة فاجئها بالمفاجأة التي لم تكن ع البال .................. طلب انه يرتبط بيها وابدي لها اعجابه بها وحبه لها ؟؟؟؟؟؟؟؟؟؟؟؟؟

طبعاً صاحبتنا اتصدمت صدمة خليتها ماقدرتش تنطق ببنت شفة ................. وطبعاً كانت رافضة الموضوع تماماً لدرجة انها لم تكترث حتي أن ترد عليه ........... بس اصحابها لما عرفوا الموضوع اكدولها انه شاب كويس وانسان محترم ومستقبله هايل جداً ......الخ وهي برضه مش مقتنعة اصلاً

لحد لما سألوها سؤال .............. ايه السبب الي يخليكي تكرهيه بالطريقة دي ؟؟؟؟؟؟

وهنا ساد الصمت .......... ماعرفتش تجاوب خااااااااااالص واكتشفت انه مافيش سبب معين يخليها تكرهه هو بس عدم ارتياح وخلاص والموضوع دة ماحصلش معاها قبل كدة الا لما عرفت زميلها دة ؟؟؟؟؟

دلوقتي كل آراء الناس الي حوليها انها تقبل الارتباط من الشخص دة لأنه كويس وابن ناس ومستقبله المهني كويس ومستواه العلمي والاجتماعي والاقتصادي مناسب............الخ بس هي برضه مش مرتاحة

انا نصحتها بصلاه الاستخارة

ياتري تنصحوها بايه ؟؟؟؟؟؟؟؟؟؟؟؟؟؟

[لماضة مصرية جدا]

السلام عليكم و رحمة الله و بركاته

حبيبتشي رودي..... يا بنتشي و الاله كنت لسه بفكر فيكي النهاردة و بقول يعني هي راحت تشتري سؤال و غابت.... و لسه هضب علي صدري و الم الناس لقيتك داخلة عليا و ميحرمنيش منك... و طبعا في القرطاس ايه سؤال.؟؟؟

بصي يا قلبي.... بالنوسبة لصاحبتك

كون انها ابتدت تسال نفسها هي بتكرهه ليه.... معناها ان فيه نسبة 10% شايفة انه بني آدم كويس

بس واضح من كلامك انها واخدة عنه انطباع انه اليط او متعالي.....بدليل "قالوله"...قصدي....انها لما احرجته في النقطة اللي بيتفاخر بيها هي محستش بتانيب ضمير خالص....لانه دايما مديها الانطباع ده....

بس اللي لفت نظري في الموضوع.....(ايه ايام ما كان عندي نظر)

عارفة يا حياتي لو هو فعلا اليط و مش طايق نفسه...في نفس الموقف اللي هي احرجته فيه كان رد فعله هيبقي حاجة تانية خالص.... كان هيتآلط عليها ازيد...لكن كون انه اتحرج معناه انه حس انه اتفهم غلط

حد رافع صباعه ورا و هيسالني......و انتي بتحاميله ليه؟؟؟؟ نزلت ايدك يا حبيبي

و هجاوبك برضه

حلو ان الواحد يحاول يشوف الامور من اكتر من زاوية

و الاحلي انه يتاكد ان وجهة نظره دي كانت صح

بصي يا قمر (آخر دلع اهه) طبعا هي تستمر علي صلاة الاستخارة.... و لو هو اتقدم في البيت و حصل بينهم كلام.....تقول اللي مزعلها بشكل واضح جدا

في نفس الوقت... هي بتقول انهم زمايل أو كانوا زمايل في الكلية

يعني في اصدقاء مشتركين... تقدر من تحت الترابيزة كده تستشف هل هو فعلا زي ما تخوفت منه و لا لأ (أبوس ايدك و ايدها بلاش تقولهم انه متقدم لها....اساليني انا.... أنا مدوباهم... ما علينا)

ع فكرة انا عادة بثق في احساسي جدا جدا... بس لما نحط الاحساس مع العقل بيبقي فرصة الندم قليلة... و فرصة التعلم اكبر

و طبعا هدحرج السؤال للي بعدي عشان كلنا نتعلم

شوفتوا العقل اللي انا فيه.....طول عمري

فوتكم بعافية

[justme]

شوفي بقى يا اختي بالصلاتو على النبي كده

خلينا نسأل نفسنا السؤال ده

هوه غلس ليه

اقولك بقى من وجهة نظر العبد لله

الواد باين عليه لخمة زي حالاتي وبيحب البت من زمان قوي

وعلشان هوه يمكن ملوش في موضوع الورد والمسجات وكان خايف يصارحها يترفض كان بيدور على طريقة يخش بيها للبنت دي فكان بيدلق نفسه عليها بمناسبة وبدون

وعلشان كان في الغالب بدون مناسبة وشكله ملوش في الهزار هي اخدت الانطباع ده انه متطفل وأليط وخلافه

وهو يمكن كان بيحاول يعمل نفسه بطل او بوس امام المجموعة بطريقة اندفاعية علشان يعجب البنت او يلفت نظرها

لكنه لم يوفق في اختياره للكلام

واذا كان من النوع الغلبان يعني ملوش في اللف والدوران يبقى واد لقطة

واكيد هي كانت بتشوفوا وليها زمايل عارفينه كويس وممكن يأكدو النظرية دي

المهم هي شايفة ان عيبه ايه غير كده

يعني اخلاقه شكله والحاجات التانية

والاهم من ده هي ممكن تقعد معاه لما ييجي عندهم وتنسى انها تعرفه وتحاول تتعرف عليه من جديد يمكن تلاقي فيه حاجات مش شايفاها بسبب انطباعها الأولاني

وطبعا الاستخارة قبل كل شيء

وربنا يوفق ان شاء الله

واخير وقت السؤال

لأن بعيد عنكم عندي واجب ولازم اخلصه

والدكتور اللي بيدرسني جزائري بصراحة مشفتش منه حاجة وحشة بس الترم مخلصش

وهو مشرف عليا في عملي الماجستير فربنا يستر

بس دلوقتي اتنمنى اللي بعده يقول رأيه في الموضوع ده مؤقتا

اذا كان رئيس القسم في الجامعة جزائري وهو المشرف على الماجستير وحصل اللي حصل تعمل ايه

تم تعديل 13 ديسمبر 2009 بواسطة justme

[لماضة مصرية جدا]

السلام عليكم و رحمة الله و بركاته

معلش انا تاني.....(عندي ارق الظاهر فيه اكلان في دماغي)

اخونا الفاضل (انا و بس)

واخير وقت السؤال

لأن بعيد عنكم عندي واجب ولازم اخلصه

والدكتور اللي بيدرسني جزائري بصراحة مشفتش منه حاجة وحشة بس الترم مخلصش

وهو مشرف عليا في عملي الماجستير فربنا يستر

بس دلوقتي اتنمنى اللي بعده يقول رأيه في الموضوع ده مؤقتا

اذا كان رئيس القسم في الجامعة جزائري وهو المشرف على الماجستير وحصل اللي حصل تعمل ايه

يا ولدي... خش عليه بقلب جامد و خلي شغلك يتكلم عنك..... و من يتق الله يجعل له مخرجا و يرزقه من حيث لا يحتسب

و اللي تخاف منه ميجيش احسن منه

و اجري جري الوحوش غير رزقك لن تحوش

يالا يا ااااااااااااااااااااااااااااااوحش

السنة فاضل عليها ايام اعمل تحدي لنفسك و خلص اكبر جزء في المجسترة

و مبروك مقدما

كان معكم

سواق ميكروباص شبرا- الوراق

"العين صابتني و رب العرش نجاني"

[عنبو]

رضوي مشاركة بتاريخ أمس, 11:00 PM

صديقتي دي كان معاها زميل هي بتكرهه جداً كدة لله في لله من غير سبب واضح .......... بس يمكن لأنه شايف نفسه حبتين وطالع فيها شويتين ......... هي ماتعرفش سبب عدم ارتياحها ليه من أول مرة تشوفه وكانت دايماً بتتعامل معاه بأسلوب مش كويس ( وهي بشهادة كل الي يعرفوها مثال للادب والذوق والاخلاق ) لدرجة انها لو في مرة واقفة مع اصحابها وحاول زميلها دة الاشتراك معهم في الحديث كانت تنقلب رأساً علي عقب وتتحول من بنوتة هادية ومرحة وبشوشة إلي شخص آخر , وفي مرة كانت بتتكلم مع اصحابها في مواضيع عامة وجاء وتتدخل في الموضوع وفي ضمن كلامه قال ( اصل مستوايا مايسمحليش ....) وفجأة راحت صديقتي بكل هدوء ردت عليه وقالتله أمام الجميع : اوكي انت بقي روح اتكلم مع الناس الي في مستواك إلي انت اصلاً فاكره مستوي مع انك أقل من العادي علي فكرة حاول تفهم الواقع دة ................... وطبعاً الكلام دة كان امام الجميع مما تسبب في احراجه بشدة ........... ولم تشعر هي بأي تأنيب للضمير بالعكس دي ارتاحت ( أنا بحكي كل دة علشان تعرفوا هي بتكرهه اد ايه) وبعد فترة حوالي سنة ونصف ( كان بيحاول يكلمها خلالها بس دايماً بيلاقي الباب مقفول في وشه ) زميلها دة فاجئها بالمفاجأة التي لم تكن ع البال .................. طلب انه يرتبط بيها وابدي لها اعجابه بها وحبه لها ؟؟؟؟؟؟؟؟؟؟؟؟؟

طبعاً صاحبتنا اتصدمت صدمة خليتها ماقدرتش تنطق ببنت شفة ................. وطبعاً كانت رافضة الموضوع تماماً لدرجة انها لم تكترث حتي أن ترد عليه ........... بس اصحابها لما عرفوا الموضوع اكدولها انه شاب كويس وانسان محترم ومستقبله هايل جداً ......الخ وهي برضه مش مقتنعة اصلاً

لحد لما سألوها سؤال .............. ايه السبب الي يخليكي تكرهيه بالطريقة دي ؟؟؟؟؟؟

وهنا ساد الصمت .......... ماعرفتش تجاوب خااااااااااالص واكتشفت انه مافيش سبب معين يخليها تكرهه هو بس عدم ارتياح وخلاص والموضوع دة ماحصلش معاها قبل كدة الا لما عرفت زميلها دة ؟؟؟؟؟

دلوقتي كل آراء الناس الي حوليها انها تقبل الارتباط من الشخص دة لأنه كويس وابن ناس ومستقبله المهني كويس ومستواه العلمي والاجتماعي والاقتصادي مناسب............الخ بس هي برضه مش مرتاحة

انا نصحتها بصلاه الاستخارة

ياتري تنصحوها بايه ؟؟؟؟؟؟؟؟؟؟؟؟؟؟

بص يامعلم واضح جداً من الموقف الى حصل ده حاجه من الاتنين

لاما الواد ده غلبان بجد لانه معرفش يرد عليها لانه بجد لو واد من اياهم كان فرج امة لا الله الا الله عليها ومكنتش اخدت فيه حق ولا بااااااطل

او الواد ده بيحبها بجد علشان كده اتصدم من الكلمه دى ومعرفش يرد فى وقتها يعنى حصله كده زى لما واحد يبقى قااعد بردان جداً وفى عز البرد يجى وااااااحد غلللللللللللللس ويقوم ايه كابب ميه ساقعه فى ضهره اسيبكم مع الشعور اوعى حد يجربه

بس برده صحبتك دى واضح انها سطحيه جداً يعنى بتحكم على الناس من خلال احساسها وده غلط كبير جداً الواحد ممكن يشوف واحد مش يرتاح له فى الاول لكن بعد لما يعامله يلاقيه قمه فى الذوق

فقولى لصاحبتك الواد لقطه ومش تضيعه من ايدها وبنى وبينك انا مستكتر الواد ده على صاحبتك دى بجد معلش ده رأى ولو هو وااد من الاخر مكنش فكر فيها بس واضح انه غلبان وفى حاجه بتقول حبك البت تكرهك اكره البت تحبك

ويلا ربنا يوفقهم يمكن يكونوا انسب اتنين لبعض خليهم هم الاتنين يصلوا صلاة الاستخاره اصل فيه ناس بتقول للى رايحين يتقدموا ليها صلى صلاة الاستخاره وهو مبصليهاش

شكراً محمد عنبوووو

محلل نفسانى قد الدنيا

[عنبو]

مشكله لواحد صاحبى قولت اشور عليكم واشوف رأيكم

لو انت جيت خطبت واحده ماااااشى الواحده دى قالت هعيش معاك فى اى مكان مااااااااااشى لحد لدوقتى تمام وبعدين انت ممكن تعمل شقه فى بلدك وممكن بدل لما تعمل شقه فى بلدك تشترى شقه فى المدينه الى منها زوجتك او حتى مدينه من المدن الجديده علشان حتى خطيبتك لانها من مدينه اكبر نوعاً ما من المدينه الى انت منها تمام

بس فى نفس الوقت كده انت هتبقى بتبعد قوى عن اهلك وفى نفس الوقت المكان الى انت عايش فيه فيه كل حاجه من خدمات ومافيهوس زحمه وانت شايفه منااااااااسب جداً وشايف ان فى الاول لازم يكون ليك شقه فى بيت العيله وبعدين ممكن بعد كده تاخد شقه فى اى مدينه مش فارقه بس اهم حاجه تبدأ حياتك هناك

تعملوا ايه ؟؟ تاخدوا شقه بره ولا جوه وعلى فكره خطيبتك هتكون مبسوطه قوى لو اخدت شقه فى مدينتها او مدينه من المدن الجديده ؟؟

يلا مستنى اجابتكم ورسائلكم على زيرو زرزورين تلات زرازير

كان معاكم محمد عنبو من المكتب ومافيش مواقع انهارده يلا هى

[الباشمهندس ياسر]

ياتري تنصحوها بايه ؟؟؟؟؟؟؟؟؟؟؟؟؟؟

انا مش موافق

قليلها ترفض ببساطة تامة

طب و ليه يا حاج ياسر ... متخليك مصدر خير عشان نجوز البنية و نخلص منها

بصي يا رضوي

الاحتمالات بتقول انه مينفعش

يعني في اصدقاء مشتركين... تقدر من تحت الترابيزة كده تستشف هل هو فعلا زي ما تخوفت منه و لا لأ (أبوس ايدك و ايدها بلاش تقولهم انه متقدم لها....اساليني انا.... أنا مدوباهم... ما علينا)

ربنا يكملها بالستر

البنات عليها كمية نفسنة ضد بعضيهم.... تودي المتحف بسرعة البرق

واذا كان من النوع الغلبان يعني ملوش في اللف والدوران يبقى واد لقطة

واكيد هي كانت بتشوفوا وليها زمايل عارفينه كويس وممكن يأكدو النظرية دي

مش شرط يا زميييييييل

من النوع الغلبان ده ... شباب اول ما يتفنط و يعرف شكل الحياة الخلفية و ابوابها المسخبية

و يبدأ يزور العالم الليلي للمدينة الساحرة

الاية بتنقلب 180 درجة و تفاجىء ب الدون جوان نفسه قدامك

و اول ما يتنطط ... يتنطط ع المسكينة اللي ف البيت

واخير وقت السؤال

لأن بعيد عنكم عندي واجب ولازم اخلصه

والدكتور اللي بيدرسني جزائري بصراحة مشفتش منه حاجة وحشة بس الترم مخلصش

وهو مشرف عليا في عملي الماجستير فربنا يستر

بس دلوقتي اتنمنى اللي بعده يقول رأيه في الموضوع ده مؤقتا

اذا كان رئيس القسم في الجامعة جزائري وهو المشرف على الماجستير وحصل اللي حصل تعمل ايه

ولا يفرق معاك بتعريفة

خليك ف شغلك و بس

مشكله لواحد صاحبى قولت اشور عليكم واشوف رأيكم

لو انت جيت خطبت واحده ماااااشى الواحده دى قالت هعيش معاك فى اى مكان مااااااااااشى لحد لدوقتى تمام وبعدين انت ممكن تعمل شقه فى بلدك وممكن بدل لما تعمل شقه فى بلدك تشترى شقه فى المدينه الى منها زوجتك او حتى مدينه من المدن الجديده علشان حتى خطيبتك لانها من مدينه اكبر نوعاً ما من المدينه الى انت منها تمام

بس فى نفس الوقت كده انت هتبقى بتبعد قوى عن اهلك وفى نفس الوقت المكان الى انت عايش فيه فيه كل حاجه من خدمات ومافيهوس زحمه وانت شايفه منااااااااسب جداً وشايف ان فى الاول لازم يكون ليك شقه فى بيت العيله وبعدين ممكن بعد كده تاخد شقه فى اى مدينه مش فارقه بس اهم حاجه تبدأ حياتك هناك

تعملوا ايه ؟؟ تاخدوا شقه بره ولا جوه وعلى فكره خطيبتك هتكون مبسوطه قوى لو اخدت شقه فى مدينتها او مدينه من المدن الجديده ؟؟

يلا مستنى اجابتكم ورسائلكم على زيرو زرزورين تلات زرازير

كان معاكم محمد عنبو من المكتب ومافيش مواقع انهارده يلا هى

شوف مصلحتك فييييين

و فكر ع المستوي البعيد

يعني متبصش تحت رجليك و انت بتاخد القرار

بس خلاص

و بالمناسبة

اللي هيمشي وراء الحريم ... مش هيخلص

[قلب ابيض]

ايييييييييييه هو ده ؟؟

هو انا اعيى لى يومين تلاته الاقى الناس كلها بتزوء فى بعضها كده؟

اهدى يا عنبى

صلى على النبى يا ياسر

ماللك يا رضوى انتى ولماضه؟

اهدوا كده وتعالوا لى واحد واحد واحده واحده

تعالى يا رضوى يا حبيبه تانت انتى 000 كان يا ما كان كان فيه زمان قلب اخضر 0000وحصل له اللى حصل لزميلتك ده 0000ووتقريبا كل التفاصيل اللى ذكرتيها

وكبر القلب الاخضر وبقى قلب ابيض 000

وصاحبكم المغرور بقى اموووور ومشيت الامور وعاشوا فى تبات ونبات وخلفوا صبيان وبنات

طالما انه مهذب وبيراعى ربنا ومستقيم وانا شايفه انك ما ذكرتيش فيه عيب غير انه تقريبا واثق من نفسه اووووى " وده ممكن يميزها عن غيرها 00اسأل مجرب "

زى ما قال الفيلسوف عنبكو الواد ده لقطه 000قولى لها " اعقلها وتوكل " واخده بالك انتى قوووولى لهاااااا cld:

تعالى هنا يا محمد انت هتدوخنى وراك كده فى المحاورات ؟؟

كل شويه الحقى محمد بيتخانق فى موضوعات خفيفه

الحقى محمد متزرزر فى موضوعات جاده

اهدى شويه يا محمد لحسن والله ما اخدك معايا فى موضوع تانى :lol:

موضوع صاحبك ده مش هارد عليه 000كفايه انه صاحبك 00وانت ماشاء الله ماتتوصاش !!!!انصحه انت

وبعدين ايه حكايه صاحبتى 000وصاحبى دى؟؟؟

انت بقى يا عم الهندزه 0000ده كلام ؟؟؟ ازاى البنت تسيبها منه خالص ؟ ينفع كده؟

لاءلاءلاء ده مش ياسر

وبعدين ايه موضوع الحريم ده ياسى السيد عبالجواد؟؟؟ :D

[عنبو]

الباشمهندس ياسر مشاركة بتاريخ اليوم, 12:09 PM

شوف مصلحتك فييييين

و فكر ع المستوي البعيد

يعني متبصش تحت رجليك و انت بتاخد القرار

بس خلاص

و بالمناسبة

اللي هيمشي وراء الحريم ... مش هيخلص

عم ياسر حبيبى من ايام زمان قوووووى

انا بقول صاااااااااحبى انا بالنسبه ليا موضوع السكن مع الاهل ده جزء لا يتجزأ عن كيانى الى قصدك عليه ده موضوع تانى خااااااالص هارش ؟

مش شرط يا زميييييييل

من النوع الغلبان ده ... شباب اول ما يتفنط و يعرف شكل الحياة الخلفية و ابوابها المسخبية

و يبدأ يزور العالم الليلي للمدينة الساحرة

الاية بتنقلب 180 درجة و تفاجىء ب الدون جوان نفسه قدامك

و اول ما يتنطط ... يتنطط ع المسكينة اللي ف البيت

مش كله ياعم ياسر فيه الى بيفضل طول عمره طيب وفيه الى بيتنطط ده ياعم ياسر بيكون مش طيب ده بيكون بس مكنش واخد فرصته واول لما تكمن اتحكم بقى

تعالى هنا يا محمد انت هتدوخنى وراك كده فى المحاورات ؟؟

كل شويه الحقى محمد بيتخانق فى موضوعات خفيفه

الحقى محمد متزرزر فى موضوعات جاده

اهدى شويه يا محمد لحسن والله ما اخدك معايا فى موضوع تانى

موضوع صاحبك ده مش هارد عليه 000كفايه انه صاحبك 00وانت ماشاء الله ماتتوصاش !!!!انصحه انت

وبعدين ايه حكايه صاحبتى 000وصاحبى دى؟؟؟

حضر ياماما "" وش صلاح عبدالله فى مسلسل الدياسطى ""

[ذهبية]

مساكم خير جميعا قلب ابيض نورتى و الف الف سلامة عليكى يا قمر المنتدى

انا طبعا يا رضوى مع راى عنبى و قلب ابيض و لماضة

اعتقد ان صاحبتك ظالمة جداااا و بعدين زى ما الزملاء قالوا كلهم

دة لو انسان مش بيحبها مكنش فكر يتقدم لها بعد الكلمة الى قالتها

اعتقد انها تدى لنفسها فرصة تقعد معاة تانى مرة و اتتين و تلاتة و تسال عنة جوة الشغل و برة لان ساعات الانسان بيضطر فى بعض المواقف بالذات فى الشغل انة يكون رخم او غلس علشان يخلى دايما فية مسافة بينة و بين اللى قدامة

ممكن جدا تلاقى الانسان دة فى حياتة الاسرية مختلف تمام وخديها فى سرك صعب قوى تلاقى انسان كويس و فى نفس الوقت

بيحب صاحبتك و شاريها

يا عنبى موووضوع صاحبك انا مع انة يختار البلد اللى رزقة فية مطرح ما يكون رزقة فية كويس و مضمون مطرح ما يقعد

ام الاهل سواء انت معاهم و بعيد هم دول اهلك عمرك ما هتبعد عنهم ابدااااا

و فكرة بيت العيلة دة اسالنى انا كلة مشاكل و متفتكرش ان دة كويس

وبعدين مفيش بعد مسافات بين الاحبة

اية يابش مهندس ياسر

اية مووضع كلام الحريم هو بقت كدة كلام للحريم و كلام للرجالة طيب خد عندك بقى انا عمرى بصراحة ما

باقتنع بكلام راجل فى علمك بقى و باحس ان الراجلة بتمشى كلامها و خلاص لمجرد العند حتى لو غلط

نادر خد بالك من كلمة نااااااااااااااادر دى انى الاقى راجل راية سديد و بعدين انت ناسى مبدا الشورى و ماخاب من استشار و بعدين

معلش بقى الراجلة بتفهم فى مواضيع معينة و الستات لها خبرة اكتر بكتير من الرجل فى مواضيع تانية

معلش احنا بنتكلم

حريم اة بس لينا رأى

[ذهبية]

سؤالى

انتى او انت تبحكى للصديق المقرب ليكم كل حاجة كل حاجة و لا الاصح ان يكون فية مسافات و حاجات تتحكى و حاجات لا؟؟

[justme]

انا من رأيي ان تواجدك في الأول قريب من اهلك مهم علشان

1- انت لو في غربة وبتنزل كام شهر في السنة يبقى يقدروا يشوفوك على طول

2-علشان يبقى في مكان يجمعك انت واخواتك

3- علشان لما اهلك يحتاجوك تبقى تساعدهم في سنهم الكبير لأنهم بيبقوا محتاجين حد قريب منهم

4-علشان اولادك يحسوا بالانتماء

اما موضوع شقة في المدن الجديدة فده مش غلط بس الواحد يخلياها مش المقر الأساسي على الأقل طول ما اهلك موجودين

وهي كمان استثمار جيد

اما موضوع ان الأهل بيعملوا مشاكل فده انت وشخصيتك وشخصية المدام

انا قلت انت اقصد صاحبك فالكلام موجه له

تحياتي

[عنبو]

يا عنبى موووضوع صاحبك انا مع انة يختار البلد اللى رزقة فية مطرح ما يكون رزقة فية كويس و مضمون مطرح ما يقعد

ام الاهل سواء انت معاهم و بعيد هم دول اهلك عمرك ما هتبعد عنهم ابدااااا

و فكرة بيت العيلة دة اسالنى انا كلة مشاكل و متفتكرش ان دة كويس

وبعدين مفيش بعد مسافات بين الاحبة

ذهبيه هاااااااااااانم

يافندم لما اكون انا متغرب عن اهلى واخرى شهر فى السنه انزل عندهم يبقى كمان الشهر الى انزله اجازه قضيه بعيد عنهم نووووووو

وبعدين مع مرور الوقت وربك يسهل الامور نبقى ناخد بيتى تانى وتالت بس يكون الاصل فى بيت الاهل اما بالنسبه للمشاكل فاحب قولك بتكون بسبب ان المركب الى ليها ريسين بتغرق والحمد لله بيتنا له ريس واحد فقط لا غير وكل واحد عارف هو له ايه وعليه ايه

وبعدين انا بحب جو العيله جداً بس طبعاً كل واحد يكون فى معااااااااااش لوحده علشان ميبقاش مولد ونخلص من موضوع شغل السلاليف

معلش بقى الراجلة بتفهم فى مواضيع معينة و الستات لها خبرة اكتر بكتير من الرجل فى مواضيع تانية

قصدك المطبخ وبتاااااااااع مهو ده مافيش خلاف عليه اوعى حد يضرب

بالنسبه بقى لسؤال ذهبيه

انتى او انت تبحكى للصديق المقرب ليكم كل حاجة كل حاجة و لا الاصح ان يكون فية مسافات و حاجات تتحكى و حاجات لا؟؟

الحاجات الى تخصنى انا بس بحيكها لاصحابى لكن فيه حاجات بتكون مشترك معاك فيها ناس مينفعش احكيها ليه لانه مبتنكش تخصنى انا لوحدى فيه ناس تانيه معى بس قولك على حاجه لو هتحكى لصحبتك مشكله مثلاً علشان تفكر معاكى فيها وتحلوا مع بعض اوك لكن لو هتحكى من باب انك تفرغى ومش هتعملوا حاجه يبقى لا امسكى ورقه وقلم وقعدى احكى الى انتى عاوزه وبعدين خلاص هتلاقى نفسك مرتاحه قوووى

[عنبو]

justme مشاركة بتاريخ اليوم, 02:14 PM

انا من رأيي ان تواجدك في الأول قريب من اهلك مهم علشان

1- انت لو في غربة وبتنزل كام شهر في السنة يبقى يقدروا يشوفوك على طول

2-علشان يبقى في مكان يجمعك انت واخواتك

3- علشان لما اهلك يحتاجوك تبقى تساعدهم في سنهم الكبير لأنهم بيبقوا محتاجين حد قريب منهم

4-علشان اولادك يحسوا بالانتماء

اما موضوع شقة في المدن الجديدة فده مش غلط بس الواحد يخلياها مش المقر الأساسي على الأقل طول ما اهلك موجودين

وهي كمان استثمار جيد

اما موضوع ان الأهل بيعملوا مشاكل فده انت وشخصيتك وشخصية المدام

انا قلت انت اقصد صاحبك فالكلام موجه له

تحياتي

عم جسط انا كنت بكتب المداخله الى فاتت ومكنتش بقرأ الى انت بتكتبه بس سبحان الله هو ده رأى تماماً

روح ياشيخ ربنا يرزقك ببنت الحلال الى تخليك تنسى اسمك بس اوعى تنسى ان انا صاحب الدعوه

وعلى فكره بما انى مسؤل عن فك اللعنه بتعة العزاب فاحب قولك ان انا توصلت انك لازم تغير اسمك الاول من جسط مى الى كاوبلز علشان ربنا يكرمنا كده ونعرف نطلع العفريت من المنتدى وبعدين حضرتك لسه مدفعتش فلوس التعويزه

سلا سلام عليكم

[الباشمهندس ياسر]

ايييييييييييه هو ده ؟؟

هو انا اعيى لى يومين تلاته الاقى الناس كلها بتزوء فى بعضها كده؟

صلى على النبى يا ياسر

انت بقى يا عم الهندزه 0000ده كلام ؟؟؟ ازاى البنت تسيبها منه خالص ؟ ينفع كده؟

لاءلاءلاء ده مش ياسر

وبعدين ايه موضوع الحريم ده ياسى السيد عبالجواد؟؟؟ :lol:

اللهم صلي و سلم و بارك عليييييييييييه

الف الف سلامة عليكي يا تانت و ان شاء الله الناس اللي يزعلوكي

تسيبها منه خالص .. ده قرار انا قلته لتصوري للموضوع من زوايا مختلفة عن الزوايا اللي الاخوة بصوا منها ( ربنا يستر و منحتاجش نظبط زوايا)

بالنسبة لكلمة الحريم ...

انا عاوز افهم ... هي كلمة الحريم فيها حاجة عيب او غلط و انا مش واخد بالي

تصوري الشخصي لكلمة الحريم بيقولي انها كلمة تفيد الاهتمام العااااااااااااااااااااااااااااااااااااااالي جدا

نحن نقول ... بيت الله الحرام

و هذا حرم الله

و ذاك الحرم النبوي ... مسجد المدينة المنورة

و هنالك الحرم الجامعي

و هذا حرم بيتي

و هذه محارم الله فأجتنبوها

بس كده

و اكون سعيد و شاكر و احمد كمان لو صححتولي المعلومة بتاعتي

اية يابش مهندس ياسر

معلش احنا بنتكلم

حريم اة بس لينا رأى

و ماله يا ذهبية

مين قال ان الحريم ملهاش رأي

انا فاكر موقف ستنا ام سلمة رضي الله عنها يوم صلح الحديبية

و فاكر برده موقف شجرة الدر في فترة من اصعب الفترات

بس انا مقصدتش اللي مخك راحله

انا قصدت ان اللي هيمشي وراء طلبات البنات .. مش هيخلص

طب شوفي كده

مرة عاوزة شقة جنب ماما عشان ابقي قريبة عليها و اقدر ازورها و تزورني بسهولة و كمان عشان لما اجيب بيبي يا حبيبي

مرة عاوزة شقة ف المدن الجديدة عشان .. يااااااااي الخضرة هناك تجنن ولا تقسيم الشوارع ... روووووووووعة يا ضي عيوني

مرة عاوزة شقة ف اسكندرية لاني اتخنقت من القاهرة خالص .. اصلها بقت زحمة اوي و الحياة بقت صعبة جدا

نكمل ولا كفاية كده...؟

و برده حقك عليا ... اخاف يكون كلامي ضايقك :lol:

و اوعدكم هعمل مداخلة مستقلة لتوضيح حيثيات قراري

[رضوي]

السلام عليكم ورحمة الله وبركاته

مش عارفة ابدأ منين ............. بس خليها بالدور

لمضمض حبيبتي ........... كل الاصدقاء الي يعرفو الطرفين من زمااااااااااااااااااااااااااااااان وهما يعرفوا ان أخينا واخد في نفسة مقلب لدرجة ان أصدقائة المقربين بيسموه البرنس !!!!!!!!!!!!!!!!!!!!!!

الاخ justme أحب الفت نظر حضرتك ان أخينا ولا خجول و لا لخمة والا كانت المشكلة اتحلت لأن الناس الي زي دي معروفين وللأسف أصبحوا عملة نااااااااااادرة الوجود دة غير انه بيعرف يتكلم كويس جداً ( وقبل كدة كان عنده مشارييييييييييييع ارتباط ) .

وبالنسبة لموضوع سيادتك فلايوجد عليك أي حرج ........ وتعامل وكأن شيئاً لم يكن فلم تكن أنت ولا هو سبباً فيما حدث .

الأخ محمد العنبي

انت كدة بهدلت البنية وبجد ظلمتها كتيييييييير , وهو مش من النوع الغلبان الي مالوش في اللف والدوران ......... بالعكس وبشهادة الشهود هو غير كدة خااااااالص

وبالنسبة للموقف الي أحرجته فيه هو مايقدرش يرد للأسباب دي

- صاحبتنا صدمته بكلامها وبهدوئها .

- هي كانت وسط أصحابها وقالت الكلمتين دول وغيرت الموضوع في لمح البصر وماحدش من اصحابها علق علي ماحدث ( يعني لمل تكن له الفرصة الكافية للرد ) وبعدين هو حاول يحرجها مرة تانية باسلوب سخيف بس هي تفادت الموقف .

وبالنسبة لسؤال حضرتك اعتقد ان المكان المناسب هو الذي تتوفر به الخدمات الكافية والقريب من جهة العمل .

[justme]

والله يا اخت رضوى انا فسرت على قد ما كان مكتوب

لأن القصص اللي زي كده ملهاش غير تفسيرين

ياما لخمة علشان كده مردش

ياما هوه كان بيحبها علشان كده مرضيش يزعلها

عموما طالما هوه مغرور زي ما بتقولوا وكمان ليه علاقات تانية

يبقى

حلاقة ميري

وعلموا عليه

ومادامت شكلها مش طايقة ومش مستعدة تفكر في حسناته

يبقى مفيش نصيب وربنا يسهلها

اما موضوع ان اللخمة بقوا عملة نادرة فده مش صحيح

انا متأكد ان فيه ناس لخمة من الطرفين كتير بس يبقى العثور عليهم صعب نظرا لعدم نشاطهم بصورة تظهرهم

لأنهم لو كانو ظاهرين بين اصدقائهم يبقوا مش لخمة ولا حاجة

وبعدين والله يا اخ عنبي انا بقيت مستريحلك لله في لله

فكرك بقى الحجاب اللي عملتهولي احطه تحت المخدة ولا اعلقه على صدري

عموما موضوع تغيير الاسم معنديش مشكلة اذا كان ده يريحك

تم تعديل 14 ديسمبر 2009 بواسطة justme