فى بيتنا خادمة

[ام بودى]

السلام عليكم اخوتى واخواتى انا حبيت افتح موضوع اعتقد انة يهم قطاع عريض منا الا وهو موضوع وجود شغالة فى منازلنا ما لة وما علية ايجابياتة وسلبياتة بالنسبة للايجابيات معروفة ولكن للسلبيات اعتقد كل واحد عندة تحفظاتة وامتعاضاتة ياريت كل واجد يكتب عن تجربتة الشخصية ما بين مؤيد ومعارض حتى نستفيد منها

[osmel33]

أنتى جيتى على الجرح أختى أم بودي فى مشكلة عظيمة هنا في الخليج

وهي أحياناً بيفرض علينا وجود خادمة فى المنزل وطبعاً خادمة مش عربية

أسيوية فى أغلب الأحيان يعنى أختلاف ثقافات حتى ولو كانت مسلمة

والمشكلة مع وجود أولاد فى البيت وهى دى بقى الكارثة

وأنا كان لي تجربة مع بنت سريلانكية والحق يتقال كانت لهلوبة وكانت شايلة البيت

شيل وأنا أجبرت عليها علشان مساحة السكن مع أنى كنت معارض على طول الخط

وجود خادمة مقيمة فى البيت والحمد لله غيرت السكن وخليت سبيل البنت ونقلتلها الكفالة

وبقت بس تيجى كل يومين ولا حاجة لما نحتاجها وأنا أعتقد أن كده الصح

وهبقى أحكي على مواقف حصلت معانا وكمان مواقف حصلت مع ناس أصدقائنا....

[سهل جدا]

السلام عليكم اخوتى واخواتى

وعليكم السلام ورحمة الله وبركاته أختنا الفاضلة

انا حبيت افتح موضوع اعتقد انة يهم قطاع عريض منا الا وهو موضوع وجود شغالة فى منازلنا

فعلا وجود شغالة في البيت (امرأة غريبة) مشكلة كبيرة

بس الحمد لله إحنا المصريين لا نعاني منها , يمكن إخواننا وأخواتنا في الخليج , لأنها فعلا تشكل ظاهرة عندهم , بل حسب ما علمت أنه يشترط في العريس المتقدم إنه يوفر خادمة :closedeyes:

الحمد لله الزوجات المصريات متعودين إنهم يخدموا نفسيهم ويخدموا أزواجهم

[ترنيم]

والله فعلا ...........أكرمك الله أختى الفاضلة على فتح الموضوع ولى مداخلات ولكن ليس الآن ........أنا قولت بس أسلم

[ترنيم]

السلام عليكم إخوانى

والله يا أم بودى الموضوع ده مهم جدا وخصوصا للمقيمين فى الخليج والزوجات بيعملوا ....

أولا لو نظرنا للأمر بمنظور اسلامى.. ذكر الشيخ خالد الجندى فى أكثر من لقاء من لقاءته

أن وجود خادمة فى المنزل لمساعدة الزوجة فى أمور المنزل هذا حق لها حتى وإن كانت

لا تعمل.

أنا شخصيا أجد أنه على الرغم من وجود فوائد كثيرة لوجود هذه الخادمات

بالمنزل إلا أننى أجد حرجا كبيرا أيضا من تواجدهم الدائم عند الاقامة الكاملة فى البيت

حرج مثلا من تواجد الزوج وحده معها فى البيت بعض الأحيان (ودى مشكلة كبيرة جدا )

وخوف من تواجدها وحدها مع الصغار وإحنا مش موجودين

أفضل حاجة هى اننا نمسك العصا من المنتصف زى ما تفضل الأخ الكريم osmel

انها تيجى تنظف وتمشى ويكون ده أريح للكل

الصراحة مابيعجبنيش منظرهم فى الملاهى وهم الى بيلعبوا مع الولاد فى حين الوالدين

على ترابيزة ......

المشكلة الحقيقية الى مش لاقيالها حل هى فى حالة عمل الزوجة والولاد مثلا بيرجعوا

قبلها...........

ربنا يعينا جميعا وييسر لنا الخير أينما كان

[tahereyad]

اسمحولي يا جماعه أقول رأيي الشخصي في موضوع خادمة فالبيت,,,,, أولا مع رأي أخي سهل جدا في لفظ (أمرأة غريبة) فالبيت... لأن الامرأة الغريبة فالبيت ممكن تسبب مشاكل قد تصل الي الكوارث لا قدر الله,, و ساعتها هانرجع نندم علي ادخالنا امرأه غريبه فالمنزل,,, و بالذات اذا كانت مقيمة بصورة دائمة فالمنزل... و لكم بعض الأسباب:

1- أولا فرق المستوي المادي بين الخادمة و الاسرة المضيفه وارد جدا انه يولد نوع من الحقد (و الذات اننا عارفين ان الواحدة مش هاتطلع تخدم فالبيوت الا لو فعلا ظروفها زي الزفت و مجبرة علي كدة),,,و بالتالي الخادمة بتشوف المستوي اللي الاسرة عايشة فيه و ممكن تتيح لنفسها أنها تسرق من البيت عشان تحسن أوضاعها المادية,, ولو الموضوع كان فالسرقات البسيطة يبقي مش مشكلة,,, المشكلة بأة فالسرقات اللي ممكن توابعها توصل لضرر أحد افراد ااسرة,,, و في الغالب بتكون سيدة المنزل اللي هية اللي جايبة الخدامة (البشكارة بالاماراتي),,, و مش عايز ازود فالكلام و احكي فالموضوع ده لأنكم اكيد بتشوفوا أفلام عربي و عارفين المصايب اللي ممكن تحصل...

و لو الموضوع ماكنش فالسرقه,,, يبقي علي الاقل فالحسد (و اظن كلنا بنؤمن بموضوع الحسد و شئ وارد)..

و المصيبة الكبري لو الخادمة نفسها ليها أولاد في بلدها الاصلية و سايباهم عشان تقدر تصرف عليهم, (بعد ما جوزها سابها و هرب مع واحدة تانية),, و طبعا شايفة ولاد الاسرة المضيفه مدلعين و متهنيين وسط امهم و ابوهم و كمان جايبينلهم واحدة من برة تخدمهم.... يا تري هايكون ايه شعورها فالوقت دة تجاه أولادك,,, لو هية عندها رغبة عدوانية شويه ممكن تعمل ايه فالعيال بعيد عن انظار الوالدين..

2- فرق المستوي الاجتماعي بيخلي الخادمة تتصرف من واقع البيئة اللي هيا طالعه منها,,, يعني ممكن تكون قبيحة اللسان و تشتم الاولاد شتائم فجة بأي لغة و محدش يفهما لو الاولاد أشقياء شويه,,, و ممكن كمان تكون مش مؤدبة و تتحرش بالاولاد الصغار,, أو بالزوج الصغير في غياب الام... و ممكن حتي لو ماحتكيتش بحد,, الاولاد يشوفوها ي وضع مش مناسب و تكون سبب مشاكل نفسية للأولاد في المستقبل.

زي ماحنا عارفين كلنا ان البيوت أسرار,,, حتي فالاكل الشرب و العادات,,, و الواحد فالبيت يكون قاعد علي راحته,, و ممكن كمان الراجل صوته يعلي شويه فالبيت,, ( و ممكن الست كمان"أحيانا"),,, يبقي ايه شكلكم بقي لو الخادمة دي متعودة تحكي لأي حد حتي لو للبواب علي اللي بيحصل في بيتكم

3- في حالة ان الخادمة مش عربية أو مش مسلمة,,, هايكون في فرق ثقافات كبير جدا,,, يعني مثلا ممكن الخادمة الغير مسلمة يكون ليه بوي فريند و دي حاجه هما متربين عليها,,, و ممكن ببساطة جدا لو معندهاش واحد تجيب واحد من الشارع مدام هو من نفس جنسيتها أو لغتها و ثقافتها,(هي فالاخر برضه أنثي أيا كانت ظروفها),,, و في ثواني بتلاقو الحبيب الولهان بيحوم حول البيت,او بيحاول يتصل بالتليفون,,, و كمان عاوز يقابل حبيبته المسكينة اللي الناس الاشرار حبسينها عندهم

أحيانا بتكون ظروف الزوجة العاملة تحتاج جدا لوجود شغالة فالبيت,,,, في الحالة دي الست لازم تقارن بين فوائد الشغل,,, و أضرار وجود واحدة غريبة فالبيت و تقدر توصل لقرار مناسب..

و أخيرا عاوز اقول ان ربة المنزل اللي فيه خادمة معرضه لارتفاع نسبة الكوليسترول و السمنة و الدهون فالجسم نتيجة عدم بذل مجهود في هضم الفتة و الكوارع و المحشي اللي بتعملهم ببراعة,, و بالتالي بيأثر علي صحتها,, و يمكن كمان علي علاقتها بزوجها و ر أيه فيها,, بعد ماكانت الغزال الشارد ايام زمان.

أظن انا بقا سودت الدنيا في وشكم و اللي عندها خدامة دلوقتي هاتروح تتنازل عنها حااااااااااااااااااااااالاااااااااااااااااااااااان,,, و تكتفي بالغسالة لفول اوتوماتيك وغسالة الاطباق و المكنسة و تمشي نفسها فالبيت و تنضف كل يوم 2متر مربع لحد مايخلص علي العيد الجاي

دمتم سالمين