مساعدة عن الجمارك والوزن الله يكرمكم

[ام زياد]

السلام عليكم ورحمة الله وبركاته

لو سمحتم انا مقيمة فى الرياض من فترة

وان شاء الله نويت انى انزل انا والاولاد

ولدى اشياء كثيرة عايزة انزلها

وبفكر انزل بري لان الوزن بيكون كبير

بس حبيت انكم تنصحونى الطريق اخباره اية

ولو فيه شركة حد منكم جربها فى النزول بري

ياريت يدلنى عليها

وكمان اخبار الجمارك اية

بيفتحوا الشنط كلها ولا بالنظر ولا اية النظام

يعنى عايزة اى حد منكم عنده معلومة ما يبخل عليا بها الله يكرمكم يااااااااارب

اختكم ام زياد

[se_ Elsyed]

والله النزول بري مُرهق جداً يا ام زياد .. لكن لو الموضوع حكم .. يبقى عليكم وعلى شركة النقل الجماعي ( سابتكو ) بس اتأكدوا انكم هاتستقلوا العبارة السريعة اللي بتستغرق 3 ساعات بين السعودية ومصر اما العبارة الاخرى العادية فبتاخد حوالي 10 ساعات ومع التحميل والتزيل فالوقت بيطول ويزهق ويتعب

واعتقد الوزن المسموح لكي فيها هو 100 كج للفرد

لكن لو حبيتو تنزلوا طيران وتشحنوا الحاجة من الباب للباب .. يبقى دي افضل واوفر فكرة

وانا شخصياً جربت شركة هنا في الرياض في شارع الستين محترمة قوي ... وبييجوا ياخدوا الحاجة من البيت وينزلوها كمان لو انتي ساكنه في دور عالي والكيلو بيكلف 3 ريال .. وفي مصر يوصلوها لحد الباب وبتستغرق الرحلة دي اسبوعين تقريباً لو عايزه اعبت لك تليفونهم تتصلي بهم مافيش مانع

وجربت شركة اخرى في شارع المنفوحة العام بعد مطعم شيخ البلد اسمها " طيف الوسطى " هي اسمها كده .. ودي ارخص والكيلو بيشحنوه من الباب للباب وبيتكلف اتنين ريال لكن لازم تودي الحاجة بنفسك

بس اهم حاجه في الشحن ما يكونش فيه ملابس بالدستة مثلاً او اشياء للأتجار

كمان البطانية بتتحاسب لوحدها بخمسين ريال

والسجادة بـ 150 ريال شامل الجمرك

والاجهزة الكهربائية زي التليفزيون والغسالة والحاجات دي لها حساب خاص بيتضمن جمركها في مصر

وبرضوا فترة الشحن هي اسبوعين

بس نصيحة الايام دي لو نزلتوا بري في البرد القارس ده .. هاتكرهي الدنيا واللي فيها خصوصاً في فترات انتظار العبارة حيث لا مآوى الا السماء كلحاف والارض كبساط .... اما البرد في عرض البحر .. فماقولكيش

بالمناسبة .. مش هاتصدقي ان سعر طيران سما وناس اللي في حدود 500 ريال للتذكرة اتجاه واحد يكاد يقترب من سعر التذكرة البري .. والفرق هو ريالات بسيطة ... بس عيبهم ان الوزن المسموح به للفرد هو 20 كج ما يزيدوش خردله والكيلو الزيادة بـ 25 ريال ...

يبقى ريحوا نفسكو واحجزوا عليها .. وقبل سفركم بعشرين يوم تقوموا شاحنين حاجاتكم بحيث تروحوا تلاقوها وصلت

[HassanAboali]

هين قرشك ولا تهين نفسك شوف يا ستي أنا بجدة ورحت وجيت بري عن طريق العقبة من تلاتة شهوروقبلهارحت وجيت طيران خطوط سعودية فرق شاسع بينهم ونصيحةلله عزوجل خد برأي الاستاذ سي سيد وإن أصريتي وسافرتي بري فإياكي ترجعي من مصر بري منتهي الذل والإهانة وممكن تنامي ليلة بالميناء زي محصل معي وإن شاء الله بكرة سأشرح بالتفصيل السفربري والجمارك لأن أكتب من التلفون الأن

[عصام أبوالفتح]

والله النزول بري مُرهق جداً يا ام زياد .. لكن لو الموضوع حكم .. يبقى عليكم وعلى شركة النقل الجماعي ( سابتكو ) بس اتأكدوا انكم هاتستقلوا العبارة السريعة اللي بتستغرق 3 ساعات بين السعودية ومصر اما العبارة الاخرى العادية فبتاخد حوالي 10 ساعات ومع التحميل والتزيل فالوقت بيطول ويزهق ويتعب

واعتقد الوزن المسموح لكي فيها هو 100 كج للفرد

لكن لو حبيتو تنزلوا طيران وتشحنوا الحاجة من الباب للباب .. يبقى دي افضل واوفر فكرة

وانا شخصياً جربت شركة هنا في الرياض في شارع الستين محترمة قوي ... وبييجوا ياخدوا الحاجة من البيت وينزلوها كمان لو انتي ساكنه في دور عالي والكيلو بيكلف 3 ريال .. وفي مصر يوصلوها لحد الباب وبتستغرق الرحلة دي اسبوعين تقريباً لو عايزه اعبت لك تليفونهم تتصلي بهم مافيش مانع

وجربت شركة اخرى في شارع المنفوحة العام بعد مطعم شيخ البلد اسمها " طيف الوسطى " هي اسمها كده .. ودي ارخص والكيلو بيشحنوه من الباب للباب وبيتكلف اتنين ريال لكن لازم تودي الحاجة بنفسك

بس اهم حاجه في الشحن ما يكونش فيه ملابس بالدستة مثلاً او اشياء للأتجار

كمان البطانية بتتحاسب لوحدها بخمسين ريال

والسجادة بـ 150 ريال شامل الجمرك

والاجهزة الكهربائية زي التليفزيون والغسالة والحاجات دي لها حساب خاص بيتضمن جمركها في مصر

وبرضوا فترة الشحن هي اسبوعين

بس نصيحة الايام دي لو نزلتوا بري في البرد القارس ده .. هاتكرهي الدنيا واللي فيها خصوصاً في فترات انتظار العبارة حيث لا مآوى الا السماء كلحاف والارض كبساط .... اما البرد في عرض البحر .. فماقولكيش

بالمناسبة .. مش هاتصدقي ان سعر طيران سما وناس اللي في حدود 500 ريال للتذكرة اتجاه واحد يكاد يقترب من سعر التذكرة البري .. والفرق هو ريالات بسيطة ... بس عيبهم ان الوزن المسموح به للفرد هو 20 كج ما يزيدوش خردله والكيلو الزيادة بـ 25 ريال ...

يبقى ريحوا نفسكو واحجزوا عليها .. وقبل سفركم بعشرين يوم تقوموا شاحنين حاجاتكم بحيث تروحوا تلاقوها وصلت

انت انسان رائع بمعنى الكلمة يا ابوعمر

السؤال هو بتجيب الوقت ده منين ؟؟؟؟؟؟

ماشاء الله تبارك الله

.. ربنا يباركلك فى وقتك وتواصل عطائك لاخوانك بلا حدود

[ام زياد]

السلام عليكم ورحمة الله وبركاته

اشكركم جميعا للرد

والاخ سي السيد الله يبارك لك فعلا

وربنا يجعله لك في ميزان حسناتك ان شاء الله

فى الحقيقة انا عمرى ما نزلت ولا جيت بري وده اللى خلانى اسألكم عن المشقة

لانى لمست فيكم النصيحة الصادقة فعلا

فبدل ما الواحد يلاقي نصايع من ناس غيركم تتوهه وتخليه يتعب على الفاضي

الاخ سي السيد

طالما لك تجربة فى الشحن من قبل فده حل ممتاز بالنسبة لى

لانى عندى منقولات كتير عايزة انزلها

بس الناس ارعبتنى من اسعار الشحن :lol:

لكن لو على 3 ريال الكيلو

من الباب للباب ده ممتاز ورائع كمان

وطبعا انا فاهمة ان الاجهزة الكهربائية والمفروشات هتكون لها اسعار منفصلة

بس هل شركات الشحن مضمونة

مفيش حاجة تضيع ولا حاجة تنكسر

وهل لو عندى غرفة نوم عايزة انزلها هيكون حسابها ازاى

واحب اوضح لك عشان تفيدنى صح

ان الاجهزة الكهربائية عندى ماركات غالية ولكنى استعملتها لمدة سنة ونص

هل ستعامل مستعمل ام جديد :unsure:

وهيذبحونى فى جماركها

وبالنسبة للنزول طيران

اخبار الجمارك فيه اية

انا قبل كده لم اتعرض لجمارك لان كل ما كنت انزل به كان هداية

حتى لو فيها جهاز او اثنين بيكون اجهزة صغيرة ومش بتتجمرك عادة

فارجو منكم التوضيح

واسفة للاطالة

والله يتقبل دعائي لكم يارب

لان منتدى راااااااائع وفيه المصريين بجد بتوع بلدنا الحلوة

[ahmos1]

طيب يا جماعة حد جرب شركات محترمة فى جدة لانى اريد عمل نفس الشيى و عايز اشحن حاجات كتيرة كمان ياريت حد يفيدنا فى اية اللى نشترية من هنا و احنا نازلين مثلا سجاد او اثاث او ستاير او بطاطين اية خبراتكم ياجماعة و شكرا

[HassanAboali]

تكملة لما قلته أمس بخصوص السفر بري ( هين قرشك ولا تهين نفسك ) بالنسبة لي سأقول لك كيف كانت رحلتي من جدة إلى القاهرة بري

أنا سافرت عن طريق شركة الفوزان وهما كانو محترمين مع العائلات يعني إلى معه زوجته بنته أولاده بيركبو في الباص من الأمام ، الرحلة كانت عن طريق العقبة - نويبع باللنش السريع بمنتصف شهر رمضان الماضي 1429هـ وكان وقت عمرة وزحمة كتير

أولاً أرسلت الشنط قبلها بيومين إلى شركة الفوازان والوزن 100 ك للفرد كان يوم الثلاثاء وقالو يوم الخميس السفر الساعة 9.00 صباحا تكون في مقر الشركة.

الساعة 9.30 صباحاً كنا في مقر شركة الفوازان الباص طلع الساعة 11.15 رغم إنهم قالو الساعة 9.30 سوف يتحرك ( نمرة واحد موضوع الساعة ده بسفر بري تعبان وأكتر حاجة الانتظار إلى بيضايق الواحد ) المهم 11.15 صباحاً اتحرك وصلنا منفذ الدرة الساعة 2 بعد منتصف الليل يعني بعد 14 ساعة بالباص والسائق كان محترم وبيقف استراحة كل ثلاث ساعات مش زي محصل في مصر بعد 5 سعات وقف استراحة دا لسة أقول لك على الاستقبال المهين إلى الواحد بيشوفه لما بيوصل مصر وبما إنك بتكوني مشتاقة للأهل فالواحد بينسى إهانة الاستقبال. منفذ الدرة هو الحدود الفاصلة بين السعودية والأردن انتظرنا هناك حوالي ساعتان للتفتيش وختم خروج من السعودية وبعد حوالي خمسين متر يرجع يقف الباص لختم دخول إلى الأردن بنفس المنفذ الخروج من السعودية بيكون سهل على المنفذ ومفيش تفتيش حصل معانا الشنط إلى كانت معنا بقت بالباص وبعد الأختام والانتظار حوالي ساعتان وصلنا الميناء تقريبا الساعة 4 فجرا ظلينا بالميناء من الساعة 4 فجراً إلى الساعة 11.30ظهرا حوالي 8 ساعات والسائق كان محترم فضل معانا بالباص انتظرنا والنوم كان بالباص مشكلة العقبة إن الخدمات فيه تعباناً جدا والحمامات بايظة المهم خلال الانتظار تم ختم خروج من الأردن وده بداخل الميناء حوالى الساعة 8 صباحاً وكان طابور طويل وخناقات على الدور بين المصريين ، تحرك اللنش الساعة 12 ظهرا وصلنا بحمد لله إلى ميناء نيوبع الساعة 2 ظهرا الرحلة باللنش شيقة لحد ما منظر المياه والجبال على الأطراف قريبا جد وباللنش بيتم ختم الدخول لمصر انتظرنا في قلب اللنش تقريبا ساعة قالو السلطات المصرية بتشوف أسماء الناس إلى وصلت لو حد مطلوب، خرجنا من اللنش بسلام لساحة الميناء طريقة رمي الشنط الشنط بميناء نويبع كأنه إنفجار ودا ناتج عن عملية الفرز إلى بيقوم بيها الحمالين الموجودين بالميناء حيث يقومون بتجميع الشنط كلاً حسب إسمه فطبعاً ( لا تنسي عمل ملصق واضح وكبير على كل شنطة فيه إسمك وقم التلفون ) دا هيوفر عليك عملية البحث عن شنطك وسط الشنط المرمية والتي قد تستغرق ساعتان كما حصل معي وكان كل شنطة باتجاه شمال وغرب وجنوب عادي إنتي بقيتي في مصر ولكن مع وضع الاسم والعنوان والتلفون بيسطيع الحمالين بالميناء فرز وتجميع الشنط كلاً حسب إسمه و بالميناء أول لما تصلي إلى ساحة الشنط تقلاقيهم بينادو بالأسم إلى موجود على الشنط المتجمعة نقطة مهمة ( خلي معك فلوس مصري حوالي 200 جنية أو أكثر وتكون فكة خمسة عشرة عشرين لأنك هترشي رشا جامدة على الناس إنتي جاي من السعودية بقى أول حاجة إعملي حسابك في حوالي من 50 إلى 100 جنية للحمال ِإلى جمع لك الشنط طبعا هو هيقول مبلغ معين وفصلي معاه حسب كمية الشنط إلى معك ، هيخرج بالشنط معك وتعدي للتفتيش إعملي حسابك بعملة مصرية جاهزة فئة خمسة وعشرة جنيهات بحدود خمسين أو سبعين جنية لأن أي واحد هتمري عليه عايز فلوس كله يقولك الشاي بتاعنا فين في الوقت ده مشفتش شنط حد تفتحت كله عدى وفي رسوم شنط بتدفع ممكن خمسة جنيه على الشنطة أو أقل ، أول صدمة الباص بتاع السوبر جيت أسوأ من كدا مفيش الباص أبو نصف جنية إلى بيلف جوا البلد من التحرير للعتبة أنظف منه بمائة مرة ، والمهم لا تنسي الشاي بتاع سواق الباص وإلا لو معك شنط كتير ممكن يدعهم في باص تاني للشنط مخصوص ودي قصة تانية هتبقى إنتي في باص والشنط في باص تاني ودي وجع دماغ شوية الهم ركبنا وتحرك الباص من نويبع الساعة تقريبا 5 المغرب ووصلنا لله الحمد ألماظة يوم الجمعة الساعة 1 بعد منتصف الليل السائق الله يسمحه لم يقف في إستراحة إلى بعد حوالي خمس ساعات رغم استرحام الناس له أننا نحتاج لاستراحة للحمام والأكل ( ملاحظة قدر الإمكان حاولي في البري تخدي أكل ومياه كفاية معك حتى لا تضطري للأكل من مطاعم الاستراحات في الغالب مش نظيف ) عملية أخذ الشنط من الباص في في محطة ألماظ زحام ومش بتلاقي لا عربية ولا حاجة تضعي فيه الشنط من الباص إلى الرصيف والحمد لله وضعت الشنط على الرصيف والتاكس كتير هناك بس بيكون غالي شوية وبكدا الرحلة أخذت حوالي 40 ساعة. أما رحلة العودة إلى السعودية بري دي قصة تانية أكبر لأ أنصح بتخربتها وأنا أتكلم عن السفر من نويبع للعقبة لا أنصح أحد بالسفر عليه إلا الناس إلى معهم سيارة فطبعا الوضع بيختلف كتير عما من يستخدم الباص.

[ام زياد]

اخي حسن ابو علي

واضح ان التجربة فعلا صعبة

الله يكون فى عونك

ورغم انى شاهدت ناس كتير سافروا بري

لكن فعلا الناس قدرات

وانا مش قد العذاب ده لا انا ولا عيالى كمان

فلذا انا شايفة ان اقتراح اخونا سي السيد

بالشحن هو اقتراح رااااائع

وانا معك اخى احمس

اننا نتبادل خبرات مع اخواتنا اللى نزلوا حاجات لمصر

اية افضل حاجة الواحد ينزلها

واية اللى مالوش لزوم ينزل

لان فعلا الواحد بس يعرف انه نازل

بيبقي عايز يلم السوق كله

وينزل به مصر

والله المستعان

ولا تحرمونا من افادتكم يا جماعة

الله يبارك لكم يارب ويكرمكم