الوقائع الكندية

[abdulazizo]

ربنا يكرمك يا رب والله انت راجل ذوق فعلا , على فكرة انا بشتغل في مجال الاعلام التلفزيوني وأي خدمة يا باشا

[moheltohamy]

سيادة حضرة معالي رئيس التحرير هشام بك ياخويا مدّيني خصم أسبوعين م المرتب اللي مش مكفيني سجاير لآخر الشهر!

وعشان الخطوة الجاية هاترفد من الجريدة... جايب لكو خبرين النهاردة للعدد الأسبوعي...

الخبر الأول: بدأ الاقتصاد الكندي مرحلة التعافي من الكساد الاقتصادي العالمي. ولعل أوضح دليل على ذلك ارتفاع الدولار الكندي في مواجهة نظيره الأمريكي (الذي بدأ الهبوط أمام باقي العملات في العالم ، ما عدا في مصر طبعاً ، عشان مصر مالهاش كبير! رغم إن اللي مالوش كبير بيعمل له كبير!)

كان الدولار الكندي وصل لأزهى عصوره على مر التاريخ في شهر سبتمبر 2007 مع بداية تواجدنا في كندا لأول مرة ، وكان من الواضح جليّاً فرحة الكنديين بهذا التطوّر على شاشات التليفزيون ؛ حيث وصل الدولار الكندي لما يعادل 1.08 دولاراً أمريكياً (أو أصبح الأمريكي = 0.92 كندي). إلى أن وصل لأقل معدلاته مؤخراً في مارس من هذا العام حيث بلغ الأمريكي ما يعادل 1.29 كندي.

اليوم أصبح الدولار الأمريكي يعادل 1.08 كندي ، وهناك توقعات باستمرار تراجعه أمام الدولار الكندي في الأيام القادمة ، حتى يتعادلا في هذا الصيف.

وينصح المحللون وخبراء الاقتصاد (أنا والواد ديبو) بمتابعة انخفاض الدولار الأمريكي إلى أدنى مراحله ، وعندها يكون من حسن الفطن الاستثمار في شراء الدولار الأمريكي ؛ لتوقع ارتفاعه لمعدله الطبيعي بالنسبة للدولار الكندي في القريب.

ومالناش دعوة باللي هيحصل بعدها! همّه انتو كنتو هتنفحونا من مكاسبكو؟!

تحليل لتذبذب قيمة الدولار الأمريكي في مقابل الكندي...

الخبر التاني: أثناء وجود مراسل الجريدة (العبد لله... أنا المرّادي!) في تورونتو يتجوّل في الداون تاون تورونتو على قدميه ، مع رفاقه الفقراء من أمثال ديبو وهشام ؛ تاركاً سيارته الفارهة (الإيجار) أم 8 سلندر اللي خربت بيته بنزيم...

لاحظنا مظاهرات الأخوة التاميل (الله يحرقهم ، ويريّحنا منهم) قافلة شوارع الداون تاون ، ومعطّلانه أنا وديبو ساعة عشان نوصل لهشام وبيننا وبينه 200 متر!

عندها ، وبأنف الصحافة ، وبإيمان الصحفي أن له دوراً في الحياة ؛ هو أن ينقل الأحداث إلى أعضاء المحاورات... بدأت التصوير بالكاميرا الجديدة ، رغم إن الواد ديبو كان منقوط ومستغرب ، وعمّال يقول (يا جماعة يللا نمشي ، عاوز أتغدى) ، ومش عارفين نقنعه إننا بنصوّر المظاهرة عشان المنتدى! سبت هشام يتفاهم معاه ، ويعرّفه إننا بنشقى ونتعب عشان العمل الصحفي ده رسالة يا اخواننا.

وتوغّلت وسط المظاهرة ، وداستني الأقدام وانا باجيبلكو الصور دي...

الصورة دي مش لمتسابقين في سباق العَجَل... دول - اسم الله على مقامكو - البوليس... بس مش البوليس اللي بيخوّف ، لأ ، دول البوليس اللي موجود هنا عشان حماية المظاهرة!

والله صعبوا عليّا البوليس دول... عليهم إيه م المرمطة دي بس؟!

ودي المظاهرة اللي بيحموها... (الصورة دي بقى حرقت فيها بتاع 10-15 سعر وانا باطلع الكوبري جري عشان ألحق أصوّر المظاهرة! كل ده ، وديبو منقوط!)... مؤخرة الانتفاضة ، قصدي المظاهرة...

ودي المقدّمة:

وهنا بقى لمّا بدأت الأقدام تدوسني...

والصورة دي عشان الناس اللي في الفندق مش عشان المظاهرة :blink:

يُتبع...

[moheltohamy]

وطبعاً فرحوا أوي لما شافوني جاي أصوّر اليافطة دي! الواد فضل ملطوع وانا باصوّر... الصحفي اللي هيوصّل صوتنا للعالم بقى وكده!

هشام شايف إنها صورة متفبركة ومضروبة بالفوتوشوب... محتاجين حد خبير بالفوتوشوب يقول لنا رأيه (فينك يا هشام جلال؟ :lol: )

وطبعاً شويّت العيال اللي بالبسكلتات دول زي قلّتهم ، فكان لازم حماية جوّية ، فـ هيليكوبتر البوليس كانت بتأمنهم من فوق ، ومعاها هيليكوبتر الصحافة...

حتة زوم بقى ع الهيليكوبتر (صباح الفل يا إيهاب) ;)

وطبعاً لقطة مستحيل تتصوّر غير في وقت زي ده في أشهر ميادين تورونتو (دنداس سكوير) ؛ مستحيل يكون بالفضا ده في غير وجود المظاهرة دي (أخيراً لقينالها فايدة!). الصورة دي باصّين جنوباً تجاه المظاهرة (واخدين بالكوا من كيس الزبالة اللي رموه السادة المحترمين بتوع المظاهرة؟ البهوات ماشيين ينأنؤوا في سندوتشات ماكدونالدز وغيره ، وبيسلّوا نفسهم في السكة! ويقوللك مظاهرة! ويرموا الزبالة ع الأرض وتتحرق كندا ، هيّه كانت بلدنا! ):

والصورة دي باصّين شمالاً باتجاه دنداس سكوير ، وبعد 6 كيلو كده (البيت في يانج آند إجلنتون :blink: )

الله أعلم بقى الوضع وصل لفين اليومين دول...

مراسلكم والمصور ، وبتاع كله... العبد لله. (على الله هشام بيه يرضى علينا ، ويشيل الخصم :blink: )

[precanadian]

صديقي العزيز دكتور هشام

اسمح لي احط اللينك ده خاص باماكن الاكل الحلال يمكن يفيد بعض الناس

Zabihah.com

[ايهاب سالم]

لاحظنا مظاهرات الأخوة التاميل (الله يحرقهم ، ويريّحنا منهم)

أأأأأمين

الحمد لله إنهزموا شر هزيمه و مات زعيمهم وقائدهم و مش سامعين لهم حس من ساعتها

كانوا قارفينا في عيشتنا و رابكين وسط البلد و يسدوا شوارع غير متفق عليها مع البوليس و يناموا في الار ض ورافعين علم منظمة نمور التاميل اللي كندا مصنفاها منظمة ارهابيه وكل ده والبوليس ساكت لهم و مطول باله لحد ما قفلوا الهاي واي و كمان وضعوا الاطفال و الستات في الصفوف الاولى

تصرف غير مسؤول

بعدها طلع رئيس البوليس قالهم اي تجاوز اخر ضد القانون بالجزمه

احنا طولنا بالنا عليكم كتير

بعدها بيومين انهزمت نمور التاميل و اختفت من الوجود واستريحنا كلنا

مش عارف كانوا عايزين كندا تتدخل ليه .... حرب اهليه احنا مالنا .... خلينا نشوف مصلحتنا

لو زعلانين قوي ... يرجعوا يحاربوا مع جماعتهم

تم تعديل 3 يونيو 2009 بواسطة ايهاب سالم

[ايهاب سالم]

حتة زوم بقى ع الهيليكوبتر (صباح الفل يا إيهاب) ;)

متحاولش يا مستر تي

التصوير ده موهبه مش عضلات smk:

بدأت التصوير بالكاميرا الجديدة

مش مهم الكاميرا الجديده (شكلها كوداك برضه ....المستوى بيبان)

المهم النفس (بفتح النون و الفاء )

تم تعديل 3 يونيو 2009 بواسطة ايهاب سالم

[د هشام ابراهيم]

ربنا يكرمك يا رب والله انت راجل ذوق فعلا , على فكرة انا بشتغل في مجال الاعلام التلفزيوني وأي خدمة يا باشا

العفو يا باشا ...و في انتظار المزيد من المشاركات smk:

[د هشام ابراهيم]

سيادة حضرة معالي رئيس التحرير هشام بك ياخويا مدّيني خصم أسبوعين م المرتب اللي مش مكفيني سجاير لآخر الشهر!

وعشان الخطوة الجاية هاترفد من الجريدة... جايب لكو خبرين النهاردة للعدد الأسبوعي...

يا أفندم العفو ....سعادتك القهوة ديه واخدة فرانشايز من التهامي هورتونز يعني سعادتك صاحب بيت بس صراحة الخبرين A1 و تستاهل عليهم ترقية كمان .. كفاية الحرفية و المجهود في المتابعة و الصور ...إلخ إلخ ...مدير عام يا باشا ...مبروك :rolleyes:

اليوم أصبح الدولار الأمريكي يعادل 1.08 كندي ، وهناك توقعات باستمرار تراجعه أمام الدولار الكندي في الأيام القادمة ، حتى يتعادلا في هذا الصيف.

المشكلة يا كابتن تومي إن ارتفاع قيمة الدولار الكندي أمام الأمريكي مش في صالح قطاعات كبيرة من الأقتصاد الكندي ...بالذات القائمة علي السياحة و التصدير للولايات المتحدة

[د هشام ابراهيم]

عندها ، وبأنف الصحافة ، وبإيمان الصحفي أن له دوراً في الحياة ؛ هو أن ينقل الأحداث إلى أعضاء المحاورات... بدأت التصوير بالكاميرا الجديدة ، رغم إن الواد ديبو كان منقوط ومستغرب ، وعمّال يقول (يا جماعة يللا نمشي ، عاوز أتغدى) ، ومش عارفين نقنعه إننا بنصوّر المظاهرة عشان المنتدى! سبت هشام يتفاهم معاه ، ويعرّفه إننا بنشقى ونتعب عشان العمل الصحفي ده رسالة يا اخواننا.

وتوغّلت وسط المظاهرة ، وداستني الأقدام وانا باجيبلكو الصور دي...

حصل و علي يدي

مالكش حل يا كابتن تومي .........و الصور طلعت حلوة قوي .....تستاهل السعرات الحرارية اللي أتحرقت يوميها

متابعين يا أبو الكباتن :rolleyes:

[د هشام ابراهيم]

وطبعاً فرحوا أوي لما شافوني جاي أصوّر اليافطة دي! الواد فضل ملطوع وانا باصوّر... الصحفي اللي هيوصّل صوتنا للعالم بقى وكده!

هشام شايف إنها صورة متفبركة ومضروبة بالفوتوشوب... محتاجين حد خبير بالفوتوشوب يقول لنا رأيه (فينك يا هشام جلال؟ :rolleyes: )

ما زلت عند رأيي ...الصورة متفبركة ...في انتظار رأي الخبراء بقي

[terminator]

الغريب يا دكتور تهامى اننا شوفنا صور لجميع الأعضاء بتوع كندا .. دكتور هشام ودكتور شامى والمهندس ايهاب سالم انما انت ماشوفتلكش صورة و ماعرفش شكلك ايه لغاية دلوقتى ؟

[د هشام ابراهيم]

صديقي العزيز دكتور هشام

اسمح لي احط اللينك ده خاص باماكن الاكل الحلال يمكن يفيد بعض الناس

Zabihah.com

رابط مفيد جدا يا دكتورنا العزيز ...جزاك الله كل خير

حاضيف ده كمان ....المنتجات ديه أنا جربتها بنفسي ....... جودتها معقولة و متوفرة في سكاربورو و ميسيسوجا .....حتي في No Frills كمان :rolleyes:

Maple lodge farms

[abdulazizo]

وطبعاً فرحوا أوي لما شافوني جاي أصوّر اليافطة دي! الواد فضل ملطوع وانا باصوّر... الصحفي اللي هيوصّل صوتنا للعالم بقى وكده!

هشام شايف إنها صورة متفبركة ومضروبة بالفوتوشوب... محتاجين حد خبير بالفوتوشوب يقول لنا رأيه (فينك يا هشام جلال؟ :rolleyes: )

ما زلت عند رأيي ...الصورة متفبركة ...في انتظار رأي الخبراء بقي

اعتقد يا دكتور هشام ان الصورة صحيحة , انا شفت صور فيديو صعبة جدا عن الموضوع ده وطبعا مطلعتش في التلفزيون , عموما الموضوع ده مأساة انسانية بكل معنى الكلمة , ربنا يهدي النفوس

تحياتي

[د هشام ابراهيم]

اعتقد يا دكتور هشام ان الصورة صحيحة , انا شفت صور فيديو صعبة جدا عن الموضوع ده وطبعا مطلعتش في التلفزيون , عموما الموضوع ده مأساة انسانية بكل معنى الكلمة , ربنا يهدي النفوس

اذا كان رأي حضرتك كده حاصدق إن الصورة صحيحة و لو إن شكلها علي الطبيعة مريب جدا ..... الله أعلم

بالنسبة للصراع ما بين السنهال و التاميل فالجانبين ارتكبوا جرائم ضد الطرف الاخر اللي بيه ما تقدرش تتعاطف مع طرف ضد الاخر

الحاجة التانية التاميل ارتكبوا جرائم ضد الأقلية المسلمة هناك ....مع إن التاميل نفسهم أقلية بس لما شموا نفسهم شوية و تحت قيادة النمور التاميل استولوا علي مناطق و اعلنوا فيها الحكم الذاتي أول ما عملوه طردوا المسلمين من أماكن حكمهم و حصلت جرائم تطهير عرقي أو بالاصح ديني

آخر الموقف الاخراني ده التاميل و السنهال زعلانين من كندا !!

التاميل بيقولوا إن كندا تجاهلت المذابح و لم تفرض عقوبات علي حكومة سريلانكا !!

السنهال شايفين إن كندا كانت بتأيد التاميل و لم تتخذ موقف متشدد من تجاوزات التاميل و منها الاعتداء علي معبد بوذي خاص بالسنهال !!

[qenawy]

وطبعاً فرحوا أوي لما شافوني جاي أصوّر اليافطة دي! الواد فضل ملطوع وانا باصوّر... الصحفي اللي هيوصّل صوتنا للعالم بقى وكده!

هشام شايف إنها صورة متفبركة ومضروبة بالفوتوشوب... محتاجين حد خبير بالفوتوشوب يقول لنا رأيه (فينك يا هشام جلال؟ :rolleyes: )

ما زلت عند رأيي ...الصورة متفبركة ...في انتظار رأي الخبراء بقي

مضروبة

انتم نسيتم الاناتومي يا شباب ولا ايه

الصور مفبركة مائة في المائة

[ايهاب سالم]

وطبعاً فرحوا أوي لما شافوني جاي أصوّر اليافطة دي! الواد فضل ملطوع وانا باصوّر... الصحفي اللي هيوصّل صوتنا للعالم بقى وكده!

هشام شايف إنها صورة متفبركة ومضروبة بالفوتوشوب... محتاجين حد خبير بالفوتوشوب يقول لنا رأيه (فينك يا هشام جلال؟ :rolleyes: )

ما زلت عند رأيي ...الصورة متفبركة ...في انتظار رأي الخبراء بقي

مضروبة

انتم نسيتم الاناتومي يا شباب ولا ايه

الصور مفبركة مائة في المائة

بالعكس يا دوك قناوي .... ده أنا من واقع دراستي للأناتومي في الشفخانه بأقول إن الصور صحيحه مائه و عشره بالمائه

بص بنفسك هتلاقي الفشه و الكرشه مكانهم و المومبار طالع و ملعلط

ولحمة الراس مدلدله و بالشفا

باين عليك نسيت الأناتومي يا دوك

[د هشام ابراهيم]

اختلف الخبراء في الصورة :)

...بجد لو شوفتوها من قريب أستحالة تقولوا حقيقية .....الله أعلم

[Princesse]

هي المظاهر دي سببها ايه؟ و مين الناس دي؟ و ليه مصنفة انها منظمة ارهابية؟

و افتكر كنت مرة بكلم على النت جماعة دينية مجنونة اسمها الرائليين raeliens هم لسة موجودين في كندا؟؟

الجماعة دي هي اول من اعلن انهم استنسخوا بشر من كام سنة كدة. و مش بيؤمنوا بوجود ربنا و الرسول بتاعهم راجل كندي اسمه رائيل.بس فجاءة اختفوا

[qenawy]

باين عليك نسيت الأناتومي يا دوك

التشريح مادة غير اخلاقية

هذا رايي وخصوصا بالطريقة اللي شفناها في كلياتنا يا باشمهندس ايهاب

المفروض يكون فيه نماذج وليس بني ادمين تعمل المناشير عملها واحواض الفورمالين وتاجير الحتة بعشرة جنيه لمدة ساعتين

كانت ايام سوداء

[qenawy]

ا لمشكلة يا كابتن تومي إن ارتفاع قيمة الدولار الكندي أمام الأمريكي مش في صالح قطاعات كبيرة من الأقتصاد الكندي ...بالذات القائمة علي السياحة و التصدير للولايات المتحدة

ولا في صالحي انا

ولااي حد عاوز يهاجر

طيب العشرة قروش اللي زادو زودوا الطلبات عندي خمسة الاف جنيه