الوقائع الكندية

[د هشام ابراهيم]

فيلم كندي تدور احداثه في القاهرة

روبا ندا مخرجة كندية كان أثار فيلم لها إسمه صباح إنتاج ٢٠٠٥ ضجة كبيرة و ردود أفعال أغلبها أيجابي في مهرجانات السينما داخل و خارج أمريكا الشمالية ....صباح كانت تدور احداثه حول قصة حب بين فتاة كندية مسلمة من أصل عربي و فتي كندي مسيحي من أصل غربي

روبا حتستخدم نفس التيمة في فيلمها الجديد ....قصة حب بين رجل مصري و سيدة كندية تدور أحداثها في القاهرة و مناطق أخري في مصر

روبا زارت مصر كتير قبل كده و بتحب القاهرة ما عدا مضايقة الشباب لأي سيدة غربية تسير بمفردها .....روبا في مقابلة صحفية شايفة إن القاهرة بتتطور للافضل خلال السنوات الماضية و حاسة إن مصر دولة بتتمتع بالحرية علي حد قولها

في نفس المقابلة اشتكت من البيروقراطية المصرية اللي كانت أكبر عائق لتصوير الفيلم المنتظر عرضه قريبا هنا في كندا

أسيبكم مع الترايلر

Cairo Time

[qenawy]

مساء الخير دكتور هشام

عارف توجد 2 مصر

مصر اللي صورتها المخرجة النضيفة اللطيفة

ومصر تانية وبدون نقد

2 مصر

مصر بتاعة الاجانب

ومصر بتاعتنا

[د هشام ابراهيم]

في ديه عندك حق يا دكتورنا الفاضل أوجه مصر المتعددة لا تخفي علي أحد ...مصر القطامية هايتس ملهاش علاقة بمصر الدويقة و مصر بورتو مارينا ما تعرفش حاجة عن مصر ابنوب إن جيت للحق هما أكتر من ٢ مصر ...علي العموم وعد لما أشوف الفيلم باذن الله اكتب تاني عنه و عنها .....مصر يعني :)

[moheltohamy]

خبر طازة النهارده...

كلنا طبعاً عارفين تيم هورتونز ، أو بالطبع (التهامي هورتونز) ، واللي تُعتبَر الكافيه القومي للكنديين ، زي ما ستاربكس هوّه الكافيه القومي الأمريكي...

طبعاً أمريكا برأسمالها الفاجر كانت ماسكة التهامي هورتونز وكان مندمج مع وينديز ؛ سلسلة مطاعم زي ماكدونالدز كده ، على مدار بتاع 15 سنة!

مؤخراً عادت إدارة التهامي هورتونز لبلدها الأم... كندا. يعني من حق الشرّيبة بتوع الكابوتشينو بالفرينش فانيللا زيي وزي هشام ، أو شرّيبة الآيسد كابوتشينو إنهم يحطوا في بطنهم بطيخة صيفي

وبهذه المناسبة توجه ستيفن هاربر رئيس الوزراء لفرع من فروع تيم هورتونز ، وألقى خطاب فيه بيهنئ فيه كندا على عودة تيم هورتونز ليها ، وبيعتبره مرآه لوضع الاقتصاد الكندي ، اللي يخللي الشركات العالمية تحس باستقرار الاقتصاد الكندي.

جدير بالذكر أن الإدارة المركزية لتيم هورتونز لم تبارح :blink: كندا ، وأنها - المقر الرئيسي - موجود دائماً في مدينة أوكفيل غرب تورونتو.

وأسيبكم مع الخبر...

[د هشام ابراهيم]

يعني لازم يبقى خبر عن التهامي هورتونز شخصيا علشان تشرف علي قهوة من الكافيهات اللي مفتوحة ..مش كفاية قهوتك اللي بيصفر فيها الريح ...ماشي يا عم الاخضر بس لما اشوفك :D

تشكر يا زعيم علي الخبر الجامد .... الناس كانت بتذيع الخبر و لا تأميم قناة السويس ..... عودة تيم إلي حضن الوطن يعني :lol:

[د هشام ابراهيم]

خبر النهارده أنا شايف إنه مهم شويتين مش لكندا بس للعالم كله و حاقولكم ليه

من المنتظر في يونيو ٢٠١٠ باذن الله أن تستضيف مدينة هانتزفيل في مقاطعة ماسكوكا في أونتاريو كندا آخر إجتماع لمجموعة الG8 الدول الثماني الكبار حيث من المنتظر إنعقاد أول اجتماع لل- G20 و هي المجموعة الأقتصادية الجديدة اللي أعلنت الدول الكبري انها حتحل مكان ال-G8 في قيادة الأقتصاد العالمي

ال-G20 موجودة بالفعل انما دورها كان ثانوي بجانب الG8

من المفروض إن قمة واشنطون ٢٠٠٨ اتخذ فيها قرار توسيع دائرة القمة لتضم اقتصاديات الدول الصاعدة بقوة و المؤثرة بدورها في دورة الأقتصاد بجانب الدول العظمي التقليدية كما كانت ممثلة في ال-G8

الأمر لم يخلو من سياسة طبعا.... الG20 ما بتمثلش أقوي ٢٠ اقتصاد في العالم لان الدول الكبري اتفقت علي استبعاد الدول البلاك ليستد ...زي ايران و فنزويلا مثلا

المهم ظهور ال-G20 و اختفاء ال-G8 أعتقد إنه بيمثل نقطة تحول مهمة سواء في ميزان القوي العالمية أو كمان دورة الأقتصاد العالمية كلها اللي أكيد بتأثر في حركة التاريخ كله

قائمة ال-G20

١- كندا

٢- الولايات المتحدة

٣- المكسيك

٤- الأرجنتين

٥- البرازيل

٦- الأتحاد الاوروبي (ممثل يتغير بصفة دورية بالاضافة إلي ممثل البنك المركزي الاوروبي )

٧- ألمانيا

٨- بريطانيا

٩- فرنسا

١٠- إيطاليا

١١- تركيا (برافو تركيا .... ما أقدرش أقول غير كده )

١٢- روسيا

١٣- الصين

١٤- الهند (طبعا الهند و الصين ..... الناس ديه ما بتهزرش)

١٥- كوريا الجنوبية

١٦- اندونسيا (و النمور الاسيوية الجديدة كمان أهو )

١٧- السعودية (و بكده تبقى رسمي زعيمة الشرق الاوسط اقتصاديا و قبل كده سياسيا و مش بعيد كمان ثقافيا قريب )

١٨- اليابان

١٩ - أستراليا

٢٠ - جنوب أفريقيا (يعني زعامة أفريقيا كمان راحت علينا )

بالاضافة إلي ممثلي صندوق النقد و البنك العالمي و كام منظمة اقتصادية

الناس ديه هي اللي حتحدد السياسات المتحكمة في الأقتصاد العالمي كله ...يعني تأثيرهم حيوصل لكل بيت علي الأرض ... بدل ما كانوا ٨ بقوا ٢٠ ....ببساطة لان الثمانية القدام ما يقدروش يتحكموا في الاقتصاد العالمي من غير الأعضاء الجدد

أول مهمة قدام ال-G20 الخروج من الأزمة الاقتصادية العالمية

أدينا مستنيين

[hosiny]

والله مواضيعك كلها مميزة يا دكتورنا و فعلا احد اعمدة المنتدي......بس اوعي تجيلك ترقية خضرة و تقبلها لاحسن منشفكش تاني بعد كده زي واحد صاحبنا انت متعرفوش

تم تعديل 27 سبتمبر 2009 بواسطة hosiny

[د هشام ابراهيم]

حسيني باشا :unsure:

يا أفندم كتر ألف خيرك ...أسرتني بذوقك و كريم مديحك

بالنسبة للمختفي الأخضر فانا غلبت معاه خلاص مش عارف أعمل له إيه :closedeyes:

ربنا يهديك يا اللي في بالي ....

[غريق]

اسمحلي اسجل اعجابي بيك يا د هشام

من اول يوم بدات اقرا كتاباتك وانا نفسي اشكرك علي الطرح الرائع لكثير من القضايا

وكمان التحليل الاكثر من ممتاز

[د هشام ابراهيم]

أهلا و سهلا بحضرتك يا سيدي الفاضل .....متابعتك تسعدني يا أفندم .....إسم حضرتك أكيد يحمل وراه الكثير و الكثير

[د هشام ابراهيم]

كندا في المركز الرابع في ترتيب الأمم المتحدة لاحسن البلاد معيشة

اصدرت الأمم المتحدة تقريرها السنوي عن التنمية البشرية في دول العالم و رتبت ١٨٢ دولة حسب أفضلية المعيشة فيها ....أخذ التقرير في الحسبان عوامل مثل معدلات التعليم و الأمية ... متوسط العمر المتوقع .....و الدخل السنوي للفرد ..... قسم التقرير الدول حسب معدلات التنمية البشرية إلي ٤ أقسام .....دول ذات معدلات تنمية عالية جدا ....و عالية ...و متوسطة ...و منخفضة ....المراكز الخمس الاولي احتلتها النرويج فاستراليا ..فايسلندا فكندا فايرلندا .....بينما احتلت سيراليون و أفغانستان و أخيرا النيجر المراكز الأخيرة من ١٨٠ - ١٨٢

اسرائيل ٢٧ ... الكويت ٣١ .. قطر ٣٣ .....مصر للاسف الشديد ١٢٣

بقي إن الداتا المبني عليها التقرير بناء علي أرقام ٢٠٠٧ قبل الأزمة المالية العالمية ...يا تري بعد الازمة الترتيب أتغير قد إيه

http://hdr.undp.org/en/statistics/

[moheltohamy]

مش ملاحظ حاجة يا شيكو؟!

تقريباً الـ 20 دولة الأوائل من بلاد التلج ، أو أقل واجب من الدول ذات الطقس البارد!

ليه دايماً البرد مرتبط - في الغالب - بالتحضر ، والحر مرتبط بالتخلف والرجعية؟! :sad:

آهو السؤال ده محتاج واحدة م الخواطر بتوعك إيّاهم :lol:

[د هشام ابراهيم]

تصدق و تؤمن بالله يا تومي أنا كنت بافكر في الحكاية ديه و أنا باكتب الخبر ..ما هو صعب تجمع النرويج و آيسلندا و كندا في جملة واحدة و عقلك ما يفكرش في التلج ...مسيرها نخوطرها :rolleyes:.....بس مش هنا في الموضوع التاني

[أحمد سيف]

الملاحظه بتاعت الدكتور التهامي فيه ناس درستها وطلعت حولها نظريات من زمان ... أحد النظريات بتقول إن الإنسان زي السيارة أو الكمبيوتر بتزيد انتاجيته في الطقس البارد بينما الحر بيخليه بطئ وكسول ... نظرية أخرى بتقول إن الطقس البارد بيجبر الإنسان على العمل لإنه لو ما اشتغلش هيموت نتيجة استهلاكه جزء كبير من طاقته للتدفئة بينما في الطقس الحار بيستهلك سعرات حرارية أقل ولذلك فإنه غير مجبر على العمل بصورة مكثقة لتعويضها ولذلك فإن شعوب الدول الباردة تعودت على النشاط والعمل بينما الكسل أصبح جزء من ثقافة شعوب المناطق الحارة ... نظرية أخرى تقول أن أصل الحضارة كان في المنطقة الحارة وأن الشعوب التي غادرتها لتعيش في المناطق الباردة هي التي كانت تمتلك القدرة على التحمل وحب المغامرة وهما شرطان أساسيان للنجاح ... وطبعا هناك نظريات أكثر عنصرية تزعم أن الشعوب الشمالية الآرية متفوقة بطبيعتها على الشعوب الجنوبية.

من وجهة نظري المتواضعة فإن المسألة باختصار هي توازن بين الموارد وعدد السكان ... الأجزاء الشمالية الباردة من العالم يعيش بها عدد قليل من السكان وبما أن الموارد الطبيعية (أرض زراعية - مياه - أخشاب - معادن - طاقة) متوزعة بشكل متوازن في العالم فإن نصيب الفرد في الدول الباردة هو أكبر من نصيبه منها في الدول الحارة ... هذا طبعا تفسير عام ويتجاهل العديد من العوامل المتفاوتة في الأهمية. ولكنه يفسر الى حد كبير لماذا نرى الدول العربية الصغيرة مثل قطر والإمارات والكويت في مرتبة متقدمة مقارنة بالدول العربية الكبيرة.

[qenawy]

تلك البلاد ذات نظم ديمقراطية ضاربة في القدم

لذا فهي هي

لو رد احدهم قائلا ولكن هناك قطر وغيرها اقول انها منحة الله ببتروله وعندما ينتهي ستنتهي

(ايه ده حكم والله )

[sollykh]

دكتور / هشام

ارسل لكم تحياتى من القاهرة ............انا متابع جيد لجميع موضيعكم المنشورة بالفعل لقد قمت بقرائتها كلها

احب ان استشيركم فى شىء انا الحمدلله و لله الحمد انهينا انا و العائلة الكشف الطبى و السفارة طلبت الباسبورات من حوالى 12 يوم

سؤالى كم من الوقت الباقى لاستلام الباسبورات ؟

و هل يستحسن ان اسافر فور استلامهم؟ ليس لدى ارتباطات هنا سوى مدرسة يوسف 9سنوات علما انا ذاهب الى كيبك و ليس تورونتو ارجو افادتى و شكرا جزيل

[somayasaleh]

دكتور / هشام

ارسل لكم تحياتى من القاهرة ............انا متابع جيد لجميع موضيعكم المنشورة بالفعل لقد قمت بقرائتها كلها

احب ان استشيركم فى شىء انا الحمدلله و لله الحمد انهينا انا و العائلة الكشف الطبى و السفارة طلبت الباسبورات من حوالى 12 يوم

سؤالى كم من الوقت الباقى لاستلام الباسبورات ؟

و هل يستحسن ان اسافر فور استلامهم؟ ليس لدى ارتباطات هنا سوى مدرسة يوسف 9سنوات علما انا ذاهب الى كيبك و ليس تورونتو ارجو افادتى و شكرا جزيل

مساء الخير دكتور هشام

التوبك ...ما شاء الله....رائع

عامل كده زي من كل فيلم اغنية....خفيف ومفيد وسريع

يعني المختصر المفيد....ربنا يبارك لحضرتك في وقتك ومجهودك

بعد اذن حضرتك....اخذ الزبون ده للدكتور قناوي ......في التوبك الخاص بالاستفسارات

الاخ...او الاخت.....

برجاء الذهاب الي اللينك ده ...http://www.egyptiantalks.org/invb/?showtopic=65889

بالنسبة للوقت المتبقي ...ان شاء الله .... من اليوم لحد اسبوعين علي اكتر تقدير باذن الله

رأي الشخصي......توكل علي الله وسافر علي طول....خسارة تضيع السنة ده في تعليم فاشل في مصر...توكل علي الله واحجز وسافر فورا

وربنا يوفقك ان شاء الله

[د هشام ابراهيم]

من وجهة نظري المتواضعة فإن المسألة باختصار هي توازن بين الموارد وعدد السكان ... الأجزاء الشمالية الباردة من العالم يعيش بها عدد قليل من السكان وبما أن الموارد الطبيعية (أرض زراعية - مياه - أخشاب - معادن - طاقة) متوزعة بشكل متوازن في العالم فإن نصيب الفرد في الدول الباردة هو أكبر من نصيبه منها في الدول الحارة ... هذا طبعا تفسير عام ويتجاهل العديد من العوامل المتفاوتة في الأهمية. ولكنه يفسر الى حد كبير لماذا نرى الدول العربية الصغيرة مثل قطر والإمارات والكويت في مرتبة متقدمة مقارنة بالدول العربية الكبيرة.

تلك البلاد ذات نظم ديمقراطية ضاربة في القدم

لذا فهي هي

أكيد موافقكم يا اصدقائي الأعزاء .... التصنيف بيعتمد وسط عوامل أخري علي متوسط نصيب الفرد من الدخل القومي ....علي افتراض إنه انعكاس للحكومة حتصرف قد إيه علي الفرد من الشعب و كل واحد نصيبه قد إيه ....طبيعي إن الدول الغنية اللي عدد سكانها قليل و حكوماتها نسبة الفساد فيها قليلة نسبيا تبقى سابقة بقية الدول .....ده اللي فهمته يعني و الله أعلم

صراحة أنا مش مقتنع بحكاية الحر مرتبط مع التخلف و البرد مع التقدم ...شايف انها تبسيط زيادة و مخل زي ما الفاضل العزيز أحمد سيف قال

[د هشام ابراهيم]

الفاضل sollykh أرجو أن تكون الباشمهندسة الفاضلة سمية جاوبت علي استفسارك و فعلا موضوع العزيز د قناوي مليان معلومات لا تقدر بثمن يا ريت حضرتك تقراه حيفيدك كتير

سيدتي الفاضلة باشمهندس سمية .... تحرجيني بذوقك و أدبك الجم دائما يا باشا صراحة مفروض اشكر الأخ سولي إنه تسبب في مشاركة حضرتك في التوبيك .....متابعة حضرتك تشرفني و تسعدني يا أفندم :D

[عبير يونس]

صراحة يا دكتور هشام

كلمة و لازم أقولها

بصراحة أدب و ذوق حضرتك في الرد على الجميع يبهرني

و بيحسسني أننا في مصر أيام الثلاثينات

أيام ما كانوا الناس مهذبين و شيك

و كلامهم كله ذوق و مراعاة لمشاعر الآخرين

متخيلة حضرتك كده زي يوسف بك وهبي

لما كان بيطلع باشا في الأفلام القديمة

:D

ربنا يزيد حضرتك من حسن الخلق