جزيرتي الوراق والدهب خطط لتحويلها لمنتجعات سياحية

[KANE]

نقلاً عن المساء اليوم

إعادة توزيع السكان ..في القاهرة والجيزة

تحويل جزيرتي الوراق والدهب .. إلي متنزهات وفنادق عالمية

القاهرة الإسلامية والقبطية والخديوية .. متاحف مفتوحة

تطوير واجهة النيل من ماسبيرو حتي أغاخان .. نقل الوزارات واستغلال مواقعها في أنشطة ثقافية

كتب جمال العليمي:

أعلن د. مصطفي مدبولي رئيس هيئة التخطيط العمراني التفاصيل الكاملة للمخطط العمراني بعيد المدي لإقليم القاهرة الكبري "القاهرة 2050" الذي يتضمن إعادة توزيع السكان في محافظتي القاهرة والجيزة.

قال د. مصطفي خلال مؤتمر صحفي إن المخطط يشمل تحويل جزيرتي الوراق "1400 فدان" والدهب "400 فدان" إلي متنزهات وفنادق عالمية وحدائق عامة والسماح بإنشاء مشروع سياحي وترفيهي واحد فقط في كل منهما.

ويشمل المخطط أيضاً تحويل القاهرة الإسلامية والقبطية والخديوية "العتبة وعابدين والأزهر والحسين والسيدة زينب" إلي متاحف مفتوحة ومراكز سياحية. بالإضافة إلي تطوير الميادين الرئيسية: التحرير ورمسيس والعتبة وعابدين. وكذلك نقل الوزارات واستغلال مواقعها في أنشطة ثقافية.

كذلك يشمل المخطط تطوير كورنيش النيل بدءاً من ماسبيرو حتي أغاخان. والسماح بإنشاء أبراج إدارية وخدمية وسياحية خلف منطقة ماسبيرو علي ألا تزيد نسبة البناء علي 20% والباقي حدائق.

كما سيتم تحويل الجبانات الموجودة بين طريقي صلاح سالم والأوتوستراد إلي أكبر متنزه عام بالقاهرة علي مساحة 1400 فدان. ونقل سكان مقابر الغفير والمجاورين والإمام الشافعي وباب الوزير والقرافة الشرقية للمسلمين وباب النصر وقايتباي "حوالي 100 ألف نسمة" إلي مناطق إسكان جديدة.

كما يشمل إنشاء مدينتين طبيتين لجراحات القلب المفتوح والكبد والكلي. وسيتم تأسيس مدينة القاهرة الدولية للتعليم والبحوث.

ويتم تحويل منطقة نزلة السمان بمساحة 253 فداناً إلي متحف مفتوح من خلال الكشف عن معبد الوادي للملك خوفو وإنشاء مجموعة من الفنادق العالمية لاستغلال أهرامات الجيزة.

أكد د. مصطفي ان المخطط يتضمن فتح محور علي امتداد شارع جامعة الدول العربي بعرض 600 متر وطول 8 كيلومترات يخترق منطقة بولاق الدكرور ليفتح مجالا لرؤية الأهرامات ويتوسطه حديقة بعرض 250 متراً ممتدة بطوله وخلخلة منطقة بولاق الدكرور ويتم إقامة المباني السياحية والخدمية علي جانبيه بالاضافة إلي فتح محور علي امتداد أهرامات سقارة بعرض 300 متر وطول 5 كيلو مترات ليصل من نهر النيل حتي عمق مدينة 15 مايو وامتداد مدينة حلوان.

أكد المهندس أحمد المغربي وزير الاسكان والمرافق والتنمية العمرانية ان هذه المشروعات مجرد مقترحات وليس هناك قرارات نهائية.. مؤكداً أن المشروعات الأكثر حساسية هي ما يتعلق بجزيرتي الوراق والدهب وأن استمرار الوضع علي ما هو عليه حاليا في الجزيرتين سيؤدي إلي خسارة مادية كبيرة للدولة.

حضر المؤتمر محافظو القاهرة والجيزة و6 أكتوبر وحلوان والقليوبية.

ويستمر بيع مصر

[se_ Elsyed]

أجمل جُملة في الموضوع ده هي دي

مؤكداً أن المشروعات الأكثر حساسية هي ما يتعلق بجزيرتي الوراق والدهب وأن استمرار الوضع علي ما هو عليه حاليا في الجزيرتين سيؤدي إلي خسارة مادية كبيرة للدولة

البلد بتُدار وكإنها سبوبه

أيوه نسيب الناس دي هناك إزاي ... دي خساره في جتتهم

أرمي اللي جابوهم يا عم في مساكن النهضة أو مساكن الزلزال أو حتى منشية ناصر عشان يقع عليهم جبل المقطم مش مهم ..

وليذهب هؤلاء السكان إلى الجحيم المستعر ..

ومش مهم مدارس العيال اللي هناك .. ولا أشغالهم ومصالحهم ... ولا اللي كان عنده دكان بقالة بيسترزق منه ..

أهم حاجه إننا نعمل منتجع سياحي .. ومطار أنفاق

ييجي الشخص المريش من دول .. معاه الريموت .. ومؤ مؤ مؤ .. يفتح المطار ... يلاقي بقى في الوراق وجزيرة الدهب المول بتاعه ... وحمام السباحه النيلي الطبيعي ...

ونعمل جاكاكيز هناك ( جمع جاكوزي ... اللي هو زي حمام السباحة كده بس طالع منه اللهم أحفظنا خراطيم من الجنب بتزغزغ النفر من دول بس بالميه اللي إيشي سُخنه وإيشي باردة وكده يعني ..

وطالما دخلنا في التخطيط الطويل الأجل اللي ما شاء الله لحد 2050 ( وإبقى قابلني .. لإن ياحنا هانموت يا هو هايموت يالحمار يموت ) .. الإقتراح يضمن إننا نعمل برضوا منتجعات .. وما نصرفش ولا فلس على السكان اللي هناك دول .. حد يقول لي إزاي بسرعة ؟

إزاي يا فكيك ؟

إحنا نسكن الناس دي في خيم قماش مؤقتاً ... على جنب كده في الجزيرتين ...

وبالنسبة للحمامات وخلافه ... أهو عندهم النيل واسع وكل نفر مع نفسه ونصرف كوز صفيح لكل مواطن ...

حلو كده ؟

أثناء بقى بناء المستقعات قصدي المنتجعات ... نشغل الناس دول في السُخرة ... آه والله .. عبيد يعني

وكرابيج وأديلو ..

أهو منها نبقى وفرنا مساكنهم ... ومنها وفرنا عمالة وأيادي عاملة .. ومنها شغلناهم بلقمتهم ..

نقول المستنجعات هاتاخد لها ييجي 5 سنين بُنا ..

نكون إحنا بقى صفينا الناس دي ... وبما إن البقاء للانضف ... فهايفضل عندنا العتاولة منهم واللي صحتهم حلوه .. والباقي هايموتوا في شغل السخرة ..

برضوا مانسيبش العتاولة دول .. نشغلهم يخدموا على رواد المنتجعات ... إيشي عمال نظافة على مخدماتهم على روم سيرفس وكده يعني

ده بقى بيسموه في علم الإقتصاد الـ recycling يعني من دقنه وإفتل له ..

-----------

بالنسبة لسكان القرافة الشرقية ومقابر الدراسة اللي الدولة صحيت النهاردة 26/1/2009 أكتشفت إن عددهم يزيد عن 100 ألف نيسمه ..

فبدل ما ننقلهم مساكن حضارية - بأخاف قوي من الكلمة دي لإن مساكن منشية ناصر وبلوكات النهضة في مدينة السلام اللي ناشع فيها المجاري وبتقع على دماغ صحابها كانت حضارية برضوا- .. الناس دولاهما إحنا ندفنهم في القرافة وهما أحياء أحسن ونقول وباء أو فيره جت لهم وخلصت عليهم ... ونشحنهم في عربيات نقل ونرميهم في الصحراء الغربية يمكن جثثهم لما تتحل وكده يتحولوا الى بترول وبنزين 92 و 95 من أبو إتنين جنيه اللتر ؟

أما موضوع شارع جامعة الدول العربية من عند فرغلي بتاع الفخفخينا وإنت رايح على بولاق الدكرور ... ففعلاً فكرة منتازة جداً إننا نهد البيوت بتاعت بولاق اللي فيها العيال اللي بييجوا يتحرشوا بعلية القوم في شارع جامعة الدول العربية بتاعت أونكل عمرو موسى ونوسع الشارع ونخلخل السكان ونخليه العرض عرضين يعني 600 متر

يالله إن شالله ماحد حوش هي الأرقام بفلوس ...

شارع عرضه 600 متر ... يا الف ليلة بيضا والف نهار مبروك ... ده ولا في أمريكا ولا كندا يا جدعان ... يعني لو قسمناه حارات .. وكل حاره 10 متر ... يبقى عندنا في مصر شارع فيه 60 حاره ... والواحد بقى وهو ماشي في الشارع داهوت يتوه في الحواري ده ويفضلوا يدوروا عليه ويجيبوا منادي وتلاقي واحده ست ماشيه في لاشارع السـ 600 متر ناكشه شعرها وحافية القدمين وتسألها مالك يا حاجه ؟ تقولك : جوزي ياخويا .... خرج عشان يجيب عيش فينو من الفرن اللي الناحية التانية من الشارع من صباحية ربنا ولسه ما رجعش لحد دلوقت ؟

عنده حق .. ده الراجل يتوه ونص كمان تخيل شارع عرضه 600 متر والنفر مننا بيعديه على رجله ... يعني فيها 3 أيام رايح جاي ... وأساساً على ما يوصل البيت هايكون أكل الفينو من الأرهاق والجوع بتاع الطريق .... شيء غريب وناس مش عارفه مصلحة نفسها

وبرضوا نفتح الشارع ده من الناحيتين لحد ما نوصل لبولاق الدكرور ..

ونعمل زي الشقتين اللي عند آبيه جمال مبارك اللي واحده في 6 أكتوب روالتانية في إسكندرية وراح فتحهم على بعض عشان يدي وِسع ..

وقدام شويه الشارع ده هايولد .. ويخلف شارع صغنن عرضه 300 متر - تابع نظرية الأرقام المستظرفه - عشان نوصل الهرم بنهر النيل بحلوان بمدينة 15 مايو - بس الراجل ده ما قالش 15 مايو سنة كام بالتحديد ؟ - وبكده يبقى طبقنا النظرية العوكلية بتاعت " نقل القلعة جنب البحر "

يبقى فعلاً الواحد يبقى سهران تحت سفح الهرم مع الحته النضيفه اللي جايبها من شارع جامعة الدول العربية وتحديداً من الشارع الـ 600 متر ... .. وفي نفس الوقت مدلدل رجله في النيل وجنبه على طول العيون الكبريتية لمدينة حلوان ومدي ضهره لمتحف مدام توسو بتاعت الشمع

وبالنسبة لتحويل العتبة والموسكي ودرب البربرة إلى متحف مفتوح من جميع الجهات ...ده إقتراح هايل عشان السُياح ييجوا يشوفوا في المفتح المحتوف .. قصدي المتحف المفحوت ده .. الإنسان المصري الشقيان اللي طالع عين أهله .. ودي سلالة بشرية كانت إنرقضت منذ قرن من الزمان ... وأهو بالمره يعدوا بعد جولتهم في المتحف المفتوح على بحه بتاع الناصرية أو زيزو نتانه اللي في أخر الموسكي ويضربوا شاندوشتات كبده وسدُق ماركة هوهو .. وبكده يبقى عملنا رواج إقتصادي ثقافي سياحي كبدواي هايل ..

الرجل بتاع التخطيط ده استاذ وعنده تطلعات سوداوية هاتعجب القيادة العُليا وخصوصاً بتوع الخص خصه

[ابو محمد المصري]

اشكرك اخي الفاضل علي موضوعك

واشكر اخويا سي السيد علي رده الاكتر من رائع

ونزيد من الشعر كام بيت

خد عندك منطقه العباسيه والوايليه وباب الشعريه والجماليه هما اكبر سبب لضرب السياحه في مصر عشان كده الحل الامثل طبعا من وجهه نظر حكومه حزبهم نشيل كل المناطق دي ونعملها منطقه سفاري مفتوحه ياعني كام جمل من ابو صنم او اتنين علي كام جبل علي كام تعبان من بتوع الكوبرا او الاكانودا وشويه عقارب محترمين علي كام ام اربعه واربعين وشويه طريشه اللي لدغتها والقبر ومتشلوش هم الرمله هنجيب من سينا لاننا هنعمل اكبر حفره نسكن فيها النازحين من تلك المناطق المبؤئه وبكده نعمل اكبر مشروع سياحي في الكون كله ايه يعني كام مليون نسمه يتشردوا مهما واخدين علي كده وبعدين الترحيل لسينا كله مزايا

اولا: هيكون عندنا اكبر حمام بالانكليزيه توليت مفتوح في العالم

تانيا :هنقدر نقف قدام الازمه الماليه العالميه لاكهربا ولاتليفونات ولا وجع دماغ ولا ترفيه من اللي بيقصر الاعمار

تالتا: طبعا مفيش لامستشفيات لانه مفيش امراض والعيان يموت اسهل له ولهم

ربوع: لامدارس ولا تعليم ولاكادر ولا حجج فاضيه وطبعا مفيش تلموذ حيموت يبقي حسنا التعليم

خموس:لاطرق ولا كباري ولا انفاق الا بتاعه حماس وبكده يقل عدد شهدا الاسفلت ونبقي احسن دوله مفيهاش حوادث

سدوس:لادخليه ولا سجون ولا تعذيب ولا انتهاك كافيه اللي هما فيه

سبوع :لا وزاره تضامن ولا دعم عندهم الصحرا واسعه وخير ربنا كتير

المشكله الوحيده اللي خايف منها عمنا بطرس بتاع الضرايب هو العرابي اكيد هيفكروا في حل لزياده موارد الدوله وبرضه دون المساس بمحقوقي ومعدومي ومنسوبي الدخل وكل الكلام الكبير