حد سمع حديث أحمد أبو الغيط على أوربت إمبارح ؟

[se_ Elsyed]

كان حديث ممتع وشيق ومثير جداً .. وإن لم يأتي بجديد ولكنه أوضح بعض الأمور التي تحدث خلف الأبواب المغلقة ... وقعدت أكثر من ساعتين يا مؤمنين لحد الساعة إتنين ونصف صباحاً إلى أن غلبني النوم وما كملتش الفينال بتاع البرنامج وماما شاليتني وديتني على سريري من غير ما أغسل رجلي حتى ..

حد هنا ارستقراطي عنده أوربت عشان نناقش بعضينا في هذا الحديث ؟ ولا هاتقضوها سمع وخلاص ؟

[احمد هادي]

صباح الفل يا سين سين

شوف ياسيدي ....انا شفت الحوار بس الصراحة مقدرتش استحمل لحد الآخر وخرجت بالانطباعات الاتية

1- الحوار جاء في وقته بالنسبة لأبو الغيط ....ليحاول تحسين صورته المهتزة في الشارع المصري والعربي بصفة عامة ...خاصة بعد القلم الي خده من الست سيبني وليفني .....

لما تقارن رد فعل تركيا علي ليفني اللي كانت قبل العدوان في تركيا بأسبوع ولم تناقش الموضوع مع الاتراك ...اللي اعتبروها اهانه كبيرة لتركيا - وهي بالمناسبة - حليف لاسرائيل وبينهم اتفاقيات تعاون علي كل المستويات .لما تقارن تعرف الفرق بين دبلوماسية وأخري

2- انا شفت ركبة الاخ ابو الغيط طالعة برة الشاشة .....هو من الدبلوماسية ياكابتن ابو الغيط انك تحط رجلك في وش الملايين عشان تحط رجل علي رجل ....إذا كان ده عادي ومقبول في الغرب .....عندنا في مصر مش مقبول حتي لو من وزير

3- كلام ابو الغيط في مجمله مش جديد زي ان الريس هو اللي بيخطط السياسة الخارجية ..وان الاخ ابو الغيط عامل زي الخولي اللي بينفذ اوامر ناظر الوقف .....جته وقف حاله

4- التفاخر بإن مصر أفشلت قمة الدوحة ....كأنه بطولة .....خيابة ....وبدل ما يتشطر علي الدول العربية اللي معروف انها كلها دبلوماسيا ملهاش لازمة ولا تأثير ..كان يورينا نفسه علي مستوي التعامل مع اسرائيل

5- بمناسبة التعامل مع اسرائيل ......نفس الطرح الأهبل بتاع الاخ حسني .....احنا منقدرش نصعد الموقف مع اسرائيل عشان ما تستغلش الفرصة وتضربنا واحد ورا التاني - وفرحان قوي بالكلام ده - وأنه قالة لبشار الاسد في القمة ....أخزاك الله ايها الوزير الحقل

وطبعا دي صياغة تانية للجملة الشهيرة بتاعة الريس ناظر الوقف-ايام حرب لبنان- لما قال أقف ادام اسرائيل ...احط راسي بين فكي الاسد

6- كلامه ان قطر لولا قناة الجزيرة لما كان لها دور ولا تأثير - كلام ساذج - فمصر عندها النايل سات كله ومع ذلك الكل كان ضد سياساتها ........ كمان كلامه ان الجزيرة حركت الشارع العربي كله ضد مصر لدرجة انه البعض اعتقد ان مصر تهزها قناة تليفزيونية .......وبعدين هو كلف خاطره ليه بالرد علي الجزيرة طالما هي ملهاش تأثير ولا لازمة من وجهة نظرة

6- خيابة من نوع مختلف لما يفخر بأنه الوزير العربي الوحيد اللي كان بيشتغل وان الكل كان مقضيها فضائيات- لأنه حتي لو كانت دي حقيقة ....فعيب من دبلوماسي محترم انه يطعن في الاخرين عشان يبين انه هو المتميز

7- ممثل بارع ابو الغيط ....ويقدر يأدي أدوار المنظرة ببراعة ....بس مش علي الشعب المصري .....والكلام بتاع انا مصري وابويا وجوز عمتي مصري ..وكنا رجالة ووقفنا وقفة رجالة ...حسسني ان محمود المليجي وشيرين انضربوا في الخلاط وطلعولنا وزير

8- عمرو اديب فقد الكثير من مصداقيته عند كتير من المشاهدين ...وانا أولهم من أول اضراب 6 ابريل واحداث المحلة ....وهو مش قادر يكون محايد ....وهو له اسبابه

حد يقولة ....يا عمرو طالما مش قادر تكون محايد ....متتكلمش احسن وإلا هتخسر اكتر من اللي خسرته

9- طبعا مش مختاج اتكلم علي مجموعة الطراطير اللي جايبهم معاه في البرنامج اللي بيلعبوا دور الكومبارس باحتراف ...هم يفرشوا له وهو يدخل .....وعلي رأسهم عزن ابو عوف ...مستفيد فوزي ....والصحفي المخبر اللي ظله لو وقع علي عيل هيموته الاخ المهيب احمد موسي

طبعا لا ننسي الباشمهندس حمدي رزق اللي آخره يقدم الصحافة في الاذاعة المدرسية - لابتدائي - لأنه يادوب بيعرف يقرا وأحيانا مبيعرفش - علي اعتبار ان العيال في اعدادي بيعرفوا يديرو حوار مش يعملوا زي البغبغان بتكرار كلام الضيف

10 - طبعا ....كان ظهور الاسطي كرم جبر ...بقلة أدبه وسفالته في فقرة الصحافة سبب رئيسي في تعكير مزاجي خصوصا لما خبط في هيكل وفهمي هويدي ...والله يصبحه بالخير الحاج عبد الحليم قنديل لما قاله حقيقته المرة علي الهوا وعرفه مقامه

ومنك لله يا سين سين ...خلتي افتكر الاشكال دي علي الصبح

تحياتي

[aimen]

انا الحمد لله لا املك جهاز تليفزيون ...ولا اشاهده اطلاقا الإ فى المناسبات القومية ......

علشان كده ما بشوفش الوجوه الماسخة دى ...اسمع عنها اه اشوفها لأ ...ويجعله عامر

[osmel33]

ممتع ؟ وشيق ؟ يا راجل يا طيب

أنا شوفته ويا ريتنى ما شوفته ما نابنى غير حرقة الدم مع واحد فاكر نفسه خارج من

انتصار"مش عارف انه خارج من فضيحة"

أما بخصوص النقد لقطر والجزيرة فزى ما كلنا أعتقد عارفين أن ممكن الجزيرة ماتكونش

محايدة ماشي...

بس المفروض فى رجل الدبلوماسية الأول أنه يعرف يتعامل مع كل الناس وكل الفضائيات

"الله يرحمك يلى فى بالي ويرجعك من الورطة اللى انت فيها" ومعلش بقي قطر على

رغم من صغر حجمها وتحفظنا على اللى بتعمله "السيلية والذى منه"

بس بتقدم الكتير يعنى لسه أمبارح أعلنت عن وقفية لصالح غزة بقيمة مبدئية 35 مليون

ريال طبعاً ده غير اللى قدمته وعلى فكرة بقى فيه حاجة ناس كتير مش عارفاها اللى

يعرفها بس اللى مقيمين في قطر أن المصريين اللى بيشتغلوا فى القناة أكتر من القطريين

لدرجة أنه من فترة سرت شائعة أن وضاح خنفر عامل مرسوم سري بعدم تعيين القطريين

يعنى أنا مش قادر أقول أن القناة لها أجندة قطرية ضد مصر هى ليها أجندة طبعاً ضد مصر

ممكن لكن لصالح مين ده اللى مش مفهوم ما علينا....

المفروض بقي فى رجل الدبلوماسية الأول فى دولة بحجم مصر يقدر يرد على كل

التطاولات اللى جايه من كل ناحية من خلال الفضائيات لأ وجاية لمين دى جاية للدولة

اللى هو وزير خارجيتها وكمان جاياله هو شخصياً

للأسف النقد والتحليل مايكونش مع ناس زى دي هاتضيع وقتك وزى مانت قولت الحوار

لم يأتي بجديد

أما بخصوص الأفندية اللى فى الحلقة فلا تعقيب

ومش هنسى صاحب النصبة عمرو أديب أنا الشخص ده وطريقته المسرحية في إجراء

الحوار كفيلة أنها ترفعلي الضغط وأنا مش ناقص

تم تعديل 28 يناير 2009 بواسطة osmel33

[Virus]

الله ينور عليكوا يارجالة ..الكلام اللي قلتوه ده شفى غليلي جزئيا من الأخ أبو الغيط اللي مش محتاج أشوفله أي حوارات أكتر من اللي شفته عشان أعرف مستواه الفكري المتدني أصلا..يعني مش بس من عصابة الحكم لأ وكمان فاشل!!

الله يرحم أيام ما كان خارجية مصر فيها ناس زي بطرس غالي وعمرو موسى..وكمان مكانش عاجبنا...

يعني فساد الداخل مستحملينه لكن نبقى مضحكة العالم كده ..كتير قوي بصراحة

الصبر من عندك يارب

تم تعديل 28 يناير 2009 بواسطة Virus

[لولا]

لم اشاهد الحوار ,, بغير أسف طبعا ً!!

لأن الأسف الحقيقى ان يكون هذا الشخص هو من يمثل صوره مصر فى الخارج .

متفقه مع الفاضل احمد هادى فيما قال.

من يملك الحجه و قوه الحق يستطيع دوما ان يرد بهدوء ومنطق ليكسب الرأى العام المَضلل بواسطه الجزيره معه حسب ما يقول .

ولكنها ذاتها سياسه رد الهجوم بهجوم .. والتفاخر بالسقوط والباسه عباءة النجاح ... أساليب مكشوفه .. قديمه .. تثير الإشمئزاز .

لولا

تم تعديل 28 يناير 2009 بواسطة لولا

[se_ Elsyed]

ومعلش بقي قطر على

رغم من صغر حجمها وتحفظنا على اللى بتعمله "السيلية والذى منه"

بس بتقدم الكتير يعنى لسه أمبارح أعلنت عن وقفية لصالح غزة بقيمة مبدئية 35 مليون

ريال طبعاً ده غير اللى قدمته

قبل ما أكتب تعليق على ما قاله بو الغيط والذي لا أتفق معه بالطبع ..

أود أن اوقل إن من يومين فقط محافظة الدقهلية وتحديداً مدينة المنصورة وحدها مقدمة " ألف طن معونات " 1000 طن ... لصالح أهلنا في غزه ... من باب العلم بالشيء ...

وأود أن أوضح أيضاً نقطة هامة جداً لكل من أتهم مصر بإنها لا تريد فتح المعبار .. ولكل من أتهم مبارك لإنه صرح بإن قطاع غزه مازال محتلاً من قبل الصهاينة وهم مسئولين عنهم ..

أقول لهم : إرجعوا لكلام الدكتور محمد غنيم أستاذ الكلى والرجل اللي أشهر من النار على العلم .. وهو ليست له علاقة بالسياسة مُطلقاً .. أفاد بإن الأطباء لم يستطيعوا أن ينفذوا إلى غزه إلا بعد أن أتصل الصليب الأحمر المصري بالصليب الأحمر الدولي اللي بدورهم أخذوا إذن إسرائيل وأفادوها بتفاصيل سيارتهم المارة إلى غزه .. وإلا كانوا أنضربوا جوه بمنتهى السهولة .. واللي خلاها تضرب مباني الأمم المتحدة فمش صعب إنها تصطاد أي سيارة داخله القطاع ..

إذاً مهما قلنا .. فهناك إحتلال صهيوني وهناك تقنية متقدمة ممكن تدمر النملة لو دخلت من معبر رفح ..

ومعبر رفح له جانبين .. جانب مصري .. ممكن نزج باللي عايز يدخل هناك وكل سنة وإنتم طيبين .. ومدخل من غزه وده اللي بتسيطر عليه إسرائيل ...

فهمتوا حاجه ؟

أما عن أداء أحمد أبو الغيط فهو فعلاً مثال لموظف الحكومة من بتاع من 8 إلى 2 ... وهو شخص بالتأكيد ليست لديه كارزمة عمرو موسى .. ولا يستطيع أن يكح من غيره ما يرجع لمديره العام ألا وهو مبارك طبعاً ..

[dawn walker]

مع انى ما شفتش الحوار لانى ما بحبش عمرو اديب ...بس كان المفروض ابو الغيط ..يقرر اعلان الحرب على اسرائيل ..ساعتها طائرات حلف الاطلنطى ستدك المصريين لكى يخففوا الضغط على الغزاوية ..ومش بعيد كانت تنطلق من قواعد الناتو فى تركيا ...واهلا بعدها بتعاطف الاخ نجاد والاخوة فى قناة الحزيرة ...

وبعدين ردود الاتراك ما تدخلش دماغ ...مش هم دول الاتراك اللى بقالهم عشرات السنسن يدكون الاكراد المسلمين فى اطراف تركيا ..والا الا كراد دول مش مسلمين بردك !!!!!

[على الزيبق]

ابو الغيط

رجل مريض نفسى

وانا فرحان انه وزير فى نظام مبارك

اللهم كتر من الدببه حول مبارك

وابو الغيط احسن دب يقتل صاحبه

[شاب مصري]

أنا شفت جزء منه

عجبتني حكاية انه لما قال ((الرئيس مبارك هو اللي بيضع سياسة مصر الخارجية واحنا بنمشي عليها :rolleyes: ))طيب حاسب لتتكعبل وانت ماشي عليها :lol:

يعني بالصلاة عالنبي مفيش مجالس نيابية ولا بطيخية بتحدد اي حاجة ولا بترسم سياسة ولا بترسم على الحيطة حتى

الرئيس يقول واحنا حاضر يا فندم (اللهم صل عالنبي ياسلام على حكمة الريّس)

بالنسبة لموقف تركيا وموقف مصر

انا قرأت في جريدة الدستور مقال هام جدا عن معاهدة كامب ديفيد ومعاهدة السلام مع اسرائيل

المقال يشرح القيود المفروضة على مصر وكيف انها صارت لا تقدر حتى على ادانة اسرائيل بقوة كما تفعل تركيا او حتى فنزويلا :blush2:

يعني تم تعويق دور مصر العربي والاقليمي عن طريق الاتفاقية

والسادات وافق تحت ضغط امريكا واسرائيل لرغبته في استعادة الأرض

أنصح الجميع بقراءته

لكن المشكلة المقال على موقعهم الالكتروني ناقص وغير كامل

المهم ان المعاهدة تنص على :

1-الاتفاقية لها الأولوية على اي اتفاقية اخرى بما فيها اتفاقية الدفاع العربي المشترك.

2-لا يجوز لمصر الدخول في اي اتفاقيات تتعارض مع الاتفاقية.

3-يجب على الدولتين تجنب كل اشكال التهديد والتلويح بالعدوان سواء بالقول او الفعل او التلميح.

4-قيود كبيرة ومذلّة على تواجد القوات المصرية في سيناء.

ومصايب تانية بالكوم في الاتفاقية

وان الرئيس السادات اضطر للتوقيع لكي يسترد سيناء (يعني كان تحت ضغط امريكي صهيوني تحت وطأة استمرار احتلال سيناء -حسب كلام الكتاب رضوان آدم- مع اني اعرف ان الحرب حررت كل سيناء تقريبا ولا اعرف مدى صحة معلوماتي .. المهم ان احد اتفاقيات جنيف تنص عى بطلان المعاهدتا الموقعة تحت ضغط سياسي او عسكري او تهديد ياستخدام القوة وهو ما حدث من قبل امريكا واسرائيل تجاه مصر)

+ ان وير خارجية مصر استقال من منصبه لرفضه الاتفاقية التي قال عنها أنها "مذبحة التنازلات"

للاسف المقال الموجود في موقع جريدة الدستور غير كامل ولو حد عنده عدد الأربعاء الماضي هيلاقي المقال.

تم تعديل 28 يناير 2009 بواسطة شاب مصري

[شاب مصري]

الست سيبني وليفني .....

سيبني وليّفني :rolleyes:

[الدكتورة أم أحمد]

كان حديث ممتع وشيق ومثير جداً .. وإن لم يأتي بجديد ولكنه أوضح بعض الأمور التي تحدث خلف الأبواب المغلقة ... وقعدت أكثر من ساعتين يا مؤمنين لحد الساعة إتنين ونصف صباحاً إلى أن غلبني النوم وما كملتش الفينال بتاع البرنامج وماما شاليتني وديتني على سريري من غير ما أغسل رجلي حتى ..

حد هنا ارستقراطي عنده أوربت عشان نناقش بعضينا في هذا الحديث ؟ ولا هاتقضوها سمع وخلاص ؟

والدي الله يرحمه كان ديما يقول لنا أي حاجه تشفها عنيك بالليل النوم أحسن منها أظنه لو شاف أبو الغيط كان نيمنا من العصر

[Alshiekh]

كان حديث ممتع وشيق ومثير جداً .. وإن لم يأتي بجديد ولكنه أوضح بعض الأمور التي تحدث خلف الأبواب المغلقة ... وقعدت أكثر من ساعتين يا مؤمنين لحد الساعة إتنين ونصف صباحاً إلى أن غلبني النوم وما كملتش الفينال بتاع البرنامج وماما شاليتني وديتني على سريري من غير ما أغسل رجلي حتى ..

حد هنا ارستقراطي عنده أوربت عشان نناقش بعضينا في هذا الحديث ؟ ولا هاتقضوها سمع وخلاص ؟

ياسلام لو كنت ارستقراطى وعرفت اسمع ذلك الحديث الشيق الممتع كى اتناقش معك .

طيب هو قال ايه حلو وقال ايه وحش؟ لانى من الـ حداشر مداخلة ماعرفتش هو قال ايه ، كل اللى عرفته ان الناس نازلة شتيمة فى الراجل من غير مايسمعوه.

طيب مش اللى سمعه يقول لنا علشان لما نشتمه احنا كمان ، علشان نبقى بنشتمه على حق ومانبقاش بنرتكب سيئات عمال على بطال.

وبعدين ياعم سين سين انت قلت انه كان حديث ممتع وشيق علشان توضيحه لبعض الامور التى تحدث خلف الابواب المغلقة ، كمل جميلك واحكى لنا قال ايه وماتتخضش من الهجوم اللى بيحصل علينا لما نِلَمْح ان فيه حاجة عجبتنا فى مصر او فى واحد من الحكومة لان الموضة هى انك تبقى معجب بحماس او الاخوان بس.

احكى ياعم خلى الغلابة اللى مش ارستقراط زى حالاتى يعرفوا ايه اللى بيحصل خلف الابواب المغلقة.

[ahlawycatalony]

ممكن بعد اذن المشرفيين

اجيب لنكات الحلقه لناس اللى ما شافتهاش

فعلا حلقه نار

من جزئين

http://www.mediamasr.com/TV%20Show/elqaher...gheet-part1.wmv

http://www.mediamasr.com/TV%20Show/elqaher...heet-part2-.wmv

وعيشوا مع عمرو اديب وابو الغيط

[se_ Elsyed]

أهلاوي كاتالوني .. 100 % ...

على فكرة .. أنا برضوا أهلاوي وبرشلوني كاتالوني

-----

عم محمد

أحياناً الإمتاع بيأتي من المفاجآت والصدمات

وقد كان

ومختصر الحديث إنه وضح الإنقسام والتشرزم وعدم اللامؤخذه - الهيافه العربية -

الناس سايبة غزه بتولع وكل واحد كان بيدور على سبوبة وشو إعلامي لبلدة ..

ومافيش حد بيشتغل لوجه الله

هذا هو ما فهمته

من تعنت مصر ومعاها السعودية والأردن والإمارات والكويت .. لإفشال قمة الدوحة اللي كانوا عارفين إنها فضيحة ومش هاتطلع بحاجه .

ومحاولة قطر التسلق على جثث الفلسطينيين وإظهار بلدهم إنها صغيرة حجماً لكنها كبيرة مقاماً .... وهو غير صحيح

الجانب الأخطر هو إن كل كلام أبو الغيط اللي كان عامل زي الطاووس وزي ما قال إبننا أحمد هادي حاطط رجل على رُكبه مش رجل على رجل وفعلاً جزمته كانت طالعه من الشاشة ولازقه في وش المشاهد .. وظهر البيه وكإنه موظف حكومي أراري لا يعرف السما من العمى وبيربط الحمار مطرح ما يعوز الحمار أو كما قال يوسف والي قبل ذلك ( جميعنا سكرتارية لدى الرئيس وننفذ ما يقول بالحرف )

وحكاية إن الرئيس وحده هو من يرسم السياسة الخارجية .. صحيحة 100 % .. ومصيبة مليون في المية ... يعني لو الرئيس قام الصبح ما لقاش السيمون فيميه اللي بيحبه جاهز .. والتشيز كيك بايت .. ممكن يلغوص في السياسة الخارجية ويُعلن الحرب على شادر السمك وعلى محلات الكُشري وإحنا قاعدين ساكتين وماحدش من قراطيس السلطة يقول له كده كخ يا ريس

ويحيا الحكم الفردي الديكتاتوري الأرتوازي

[احمد هادي]

لكل من يبحث علي الارستقراطية

من الابواب الخلفية

اللنك ديه

http://www.justin.tv/alkahera_alyoum

تشوف عليها القاهرة اليوم

بجوده عالية وصورة نقيه

مباشر بصورة يومية

وتحياتي

[abdulmuttaleb]

أهلا سيدي الكريم سي السيد أنا أحد الذين يكنون لك تقديرا خاصا

طبعا بما أن حضرتك لست من الجيل Y الذي أمثله أنا بلا فخر وهو جيل الانترنت والكمبيوتر

رابط أول حلقة من الحوار مع الوزير أبوالغيط الذي بدا وكأن مصر أثرت عليها شاشة 21بوصة عليها قناة الجزيرة مع الأسف الشديد

http://www.youtube.com/watch?v=vnBjEtF5qQ0

فسأهدي حضرتك روابط من اليوتيوب لتشاهد عليها أجزاء من العاشرة مساء والقاهرة اليوم والبيت بيتك كمان:D

هذه الروابط من اليوتيوب تابعة لمستخدمين مختلفين ينزلون هذه الحلقات (أو ما يستهويهم منها بالأدق) إلى اليوتيوب ليشاهدها أمثالنا من غير الأرستقراطيين:lol:

بس توعدني ما تكون مدمن لهذه الصفحات لأنّي شخصيا مدمن لها:

قناة القاهرة اليوم أوربت وهذه نايمة في العسل منذ فترة لكن فيها فيديوهات مش بطالة

http://www.youtube.com/profile?user=alkahe...amp;view=videos

قناة القاهرة اليوم وفيها حلقة زيارة عمرو أديب لغزة ضمن أكثر من 600ملف فيديو لأكثر من 90حلقة

http://www.youtube.com/profile?user=alqahe...amp;view=videos

قناة هشام المخصصة للقاهرة اليوم وفيها حلقات مثيرة مثل حوار رامي لكح وحوار حمدي قنديل وفيصل القاسم والرئيس محمودعباس وساويرس وصباح

http://www.youtube.com/profile?user=heshom...amp;view=videos

قناة أخرى لعرض أجزاء من القاهرة اليوم

http://www.youtube.com/profile?user=Ba7bek...amp;view=videos

قناة عمرو أديب صاحبها نشيط في تنزيل حلقات القاهرة اليوم:

http://www.justin.tv/alkahera_alyoum/all?k...der=most_recent

قناة توتي المخصصة للعاشرة مساء بما فيها تغطية البوشي

http://www.youtube.com/profile?user=toti4m...amp;view=videos

قناة أخرى للقاهرة اليوم

http://www.youtube.com/profile?user=modest...amp;view=videos

قناة أمير المليجي للعاشرة مساء وتتضمن حوار د.أحمد زويل ولقاء مدكور ثابت لعرض فيديوهات نادرة لمصر أواخر 1880 وزيارة منى الشاذلي لمعبر رفح وحوار فهمي هويدي

http://www.youtube.com/profile?user=amirel...amp;view=videos

قناة منوعات وهي تشكيلة من العاشرة مساء والطبعة الأولى والحقيقة (على قناة دريم) و90دقيقة

http://www.youtube.com/profile?user=smazag...amp;view=videos

تم تعديل 12 فبراير 2009 بواسطة abdulmuttaleb