حب الشباب

[فــيــروز]

جررررررررررررررررررر ده تعبير عابر عن الغضب و الاستياء من الشئ السخيف المدعو حب الشباب ..

الصراحه انا عانيت من الموضوع ده فى فترة المراهقه اللى خلصت الحمد لله من ييجى 8 سنين اهه .. و استنيت بفروغ صبر الموضوع يخلص بقى حيث انى بقيت زى الناس و عديت المرحله العمريه دى لقيت مفيش فايده ومش عارفه هو لازم انهى مرحلة الشباب كمان عشان حب الشباب يفضل يطلع لى؟ الحقيقه الموضوع اتحسن كتير عن زمان لكن كل ما اكون منفعله مثلا او متعصبه او عندى ضغط شغل كبير ابص الاقى الحب طلع وبدل ما ابقى متعصبه قيراط الموضوع يتطور و اتعصب زياده وهلم جرا

جربت دوا كويس اعتقد كان اسمه Dalacin T بس مش دايما الاقيه وحتى ده تاثيره وقتى وانا عاوزه حاجه تنسف حمامك القديم .. هو حب الشباب ده قدر ولا ايه

انا باحب آكل مخلل ولست من عشاق الشيكولاته ..

[tiger1411]

كل ما اكون منفعله مثلا او متعصبه او عندى ضغط شغل كبير ابص الاقى الحب طلع 

علاج مجرب : الابتعاد عن الانفعال والتعصب وضغط الشغل الكبير

ايه رأيك؟؟؟؟؟؟؟؟؟؟؟؟؟

(وش راسم البراءه)

[فــيــروز]

هى دى بالظبط النصيحه اللى كنت مستنياها

بارك الله فيك يا اخ تايجر و اكثر من امثالك

نزل هنا وش واحد لا متغاظ ولا مفروس ولا حاجه ابدا ..

[freefreer]

السلام عليكم .. مممممممم .. عايز احكى تجربتى و خايف لأنى وصفت وصفة مرة لزميله عزيزة فى المنتدى و كانت النتيجة مش ولابد ..

على العموم .. "الآن أتكلم" ..

حب الشباب كرهنى فى حياتى .. و ظللت اعالجة طويلا و كما تصفين .. يذهب .. ثم يعود .. جرررررررررررررر

فى الآخر .. و بسبب (الغل) الشديد .. عملت حاجة مجنونه ..

كنت خارج مصر .. فأرسلت طالبا كريم كان طالع جديد اسمة بترفلاى14 .. لا أظن انه يختلف عن الكريمات الأخرى .. المهم كيف استخدمته ..

بدأت ذات مساء الخطة التالية .. اغسل وجهى بماء دافئ اقرب الى الساخن عدة مرات .. بعدين ادهن طبقة من الكريم المذكور ..

المهم .. انتظر نصف ساعة أو ساعة .. هنا تكون الحبوب قد تفتحت و بدت تخرج ما بها من دهون و افرازات ..

فأقوم بغسيل وجهى مرة اخرى بنفس الطريقة .. و دهان طبقة اخرى من الكريم .. و فى هذه المرحلة يسبب الكريم (حرقان) لأن الحبوب متفتحة كلها .. و لكننى كنت استعذب هذا الألم لأحساسى اننى اقتل هذه الحبوب ..

احيانا .. من الإفترا و الغل .. اكرر هذه العملية مرة ثالثة .. بعد عدة ساعات .. ثم اذهب للنوم ..

ظللت على هذا الحال عدة ايام .. يمكن خمسة .. يمكن اسبوع .. حتى لا حظت مرة انى وجهى قد (احترق) بحرق مثل حروق التعرض للشمس مدد طويلة .. الجلد لون أحمر .. و بيلمع .. مشدود و رقيق ..

و هنا صعب عليا وجههى و ما اصنعة فيه .. فتوقفت عن هذا العمل الجنونى ..

المفاجأة المذهلة .. الحبوب اختفت نهائيا و بدون رجعة .. بعد هذه العملية مباشرة .. بعد سنين من العذاب و العقد ..

العبد لله لا ينصح أحدا بتطبيق هذا دون استشارة الطبيب ..

تحياتى ..

[Faro]

انا باحب آكل مخلل ولست من عشاق الشيكولاته ..

يقال أكل المخلل ممنوع كذلك الدهنيات.

يحب غسل الوجه عدة مرات يوميا بصابون خاص.

أى نصائح أخرى يجب سؤال الطبيب.

لحسن الحظ ولدت عجوزا لذا ليس لي سابق معرفة لعلاج حب الشباب.

كنت أظن أن الموضوع يدور حول الحـــب - الذى كان مرضا وتم القضاء عليه - وليس حب الشباب .

[فــيــروز]

الاخ فرى

حمدلله على سلامتك

لا خلاص انا مش عاوزه اتخلص من الحبوب بعد الطريقه اللى قلتها دى

لانى مش هاقدر انفذها خالص

اصل الصراحه يعنى ممكن تكون جت سليمه معاك انما انا ورقى اليومين دول مضروب و معنديش نفس اشتغل فى افلام الرعب .. بس شكرا جزيلا لحضرتك على المسانده المعنويه ..

اخى فارو

اصل انا باحب المخلل اوى .. يعنى يمكن اكون باكله اكتر من الاكل نفسه

انما ايه موضوع ولدت عجوزا ده !! ليه كده خير ..

ممكن نفتح موضوع عن الحب - الذى كان مرضا وتم القضاء عليه - لكن المشكله انه مرض تم القضاء عليه بحمد الله طيب هنتكلم فى ايه؟

نصحا الصبح نقرا فى الجرايد :

حدوث انتكاسه و عودة مرض الحب الى الظهور بعد القضاء عليه نهايئا فى بدايات الالفيه الثالثه .. حملات مكافحه للحد من انتشار المرض و جرعات منشطه للاطفال !!

ايه رايك؟

[Faro]

انما ايه موضوع ولدت عجوزا ده !! ليه كده خير ..

الأخت فيروز

هذا يعني أن حب الشباب لم يزورني حتى الآن ... وإقترابي من المخللات والدهنيات كان بحذر و مازال.

أرجوا أن تتغلبي على سحر المخلل / الطرشي إلا إذا كان Home made ولكن بحذر .

حظ سعيد

[disappointed]

أفضل نتائج لعلاج حبوب الشباب تمثّلت فى :

Doxycycline 100 mg capsoules

وهو مضاد حيوى يتم تعاطيع عن طريق الفم بجرعة كبسولة مرّتين يوميّا (صباحا ومساءا) لمدّة أسبوعين متواصلين أو عشرة أيّام على الأقل

مع

Skinoren skin oint

وهو مرهم للوجه يتم وضعه مساءا (لمدّة أسبوع)بعد غسيل الوجه بماء دافئ جيّدا ,وينصح بعدم التعرّض للشمس عندما يكون المرهم على جلد الوجه (ولذلك يستعمل مساءا)

مع

غسيل الوجه بـــClean & Clear فى الصباح الباكر ,وهو غسول وجه رغوى من انتاج جونسون آند جونسون(لمدّة شهرين)

مع غسيل الوجه بصابونة Acne Aid الطبّيه قبل وضع الــSkinoren بساعتين (لمدّة أسبوع)

جرّبي الوصفه دى وادعى لى......وخلّى الفيزيته علينا المرّه دى

[freefreer]

الاخ فرى

حمدلله على سلامتك

الله يسلمك .. الأحداث دى مر عليها اكثر من 25 سنة .. <وش محرج>

اصل الصراحه يعنى ممكن تكون جت سليمه معاك انما انا ورقى اليومين دول مضروب و معنديش نفس اشتغل فى افلام الرعب ..

هاهاهاها .. عندك حق

[ragab2]

طريقة فرى سليمة

ومبنية على فكرة تقشير البشرة وازالة ماعلق بها من ميكروبات ودهون تتغذى عليها هذه البكتريا وهى فكرة سليمة طبيا بشرط أن تكون البشرة غير حساسة

[فــيــروز]

ما شاء الله يا فارو اللهم لا حسد

المخلل فى الغالب مش بيكون home made الصراحه بيبقى طرشجى ميد !!

الاخ محبط .. (حضرتك محبط ليه؟) وش بيستعبط

ان شاء الله اجرب الوصفه و ادعى لك حتى من قبل ظهور النتائج :)

الاخ فرى

الشباب شباب القلب وده بجد مبدا انا مقتنعه بيه تماما دلوقت .. وش حاسس انه عجز اوى

الاخ رجب

الحقيقه اظن ان بشرتى فى الغالب تصنف على انها زفت حساسه .. عفوا لاستخدام كلمة زفت بس كنت اظن ان هذا الوصف يعنى ميزه ما ولكن اتضح انه خيبه قويه .. تحياتى

[ragab2]

مادام

البشرة حساسة يبقى نجرب وصفة المضادات الجيوية لأخونا محبط

وأفضل الكريمات والعلاج الموضعى

( وش محبب )