ما أعرفه عن نفسي..

[Emo]

كانت مقابلة مع صديقة الطفولة هي السبب في كتابة النوت ده..

قابلتني في موقف كنت حزينة فيه ولما بدأت احكيلها دموعي بدأت تنزل ..لقيتها بتقلي

إمونة تعالي نجري..

بصيت لها باستغراب.. :blink:

وجوايا بقول اي العبط ده :wub:

لقيتها بتقولي فاكرة ايام المدرسة ...

لما قولتيلي "يوم ماتحسي انك مخنوقة وعاوزة تعيطي اجري وانتي تنسي الشعور ده.."

فاكرة لما كنتي بتغلطي في الإمتحان ولما تخرجي الاقيكي عمالة تجري في كل المدرسة وأعرف وقتها إنك غلطتي..

تعالي نجري.. :rolleyes:

يااااه قد ايه الواحد بيضيع من نفسه في الزحمة..

عشان كده

قررت أكتب عن نفسي..

عشان لو في يوم ضعت مني ألاقيني وافتكرني..

وياريت كلنا كمان كل اللي يقرأ النوت يحاول يكتب عن نفسه اللي عارفها دلوقت..

أكيد مع الوقت هيحتاج يرجع للي كتبه عشان يلاقي روحه..

يلا.. البداية

..

1-لبسي المفضل الكاجول جينز وأضرب عليه أي تشيرت وانتهينا..

وعادي جدا أنام باللبس ده

2- بعشق الفراولة ممكن أكل 17 كيلو في يوم واحد

3-لازم أحط مخدة فوق راسي لما أجي أنام

4- بنزعج جداً من الأصوات العالية ..وغالباً بفقد أعصابي وقتها

5- بحب ريحة القهوة أكثر من شربها ومفتونة بكل أنواعها

6-بشرب الماء معطر بالكادي يوميا

7-فاشلة للغاية في الإلتزام بميزانية محددة شهريا..لازم أستهلكها واستعين بالإحتياطي

8-عندي رموز مهمة دايماً في حياتي

بمعنى هتلاقي بين حاجاتي الخاصة حاجات قديمة أوي..

ممكن تكون شوية حصى ..وبلي وخاتم منقوش وحجات غريبة ..

بأحرص جداً إني أحصل على أي حاجة رمزية من كل حد مقرب مني عشان تكون ذكرى ..

9-المطر \أذان الفجر\ضحكة أمي الثلاثة بيعنولي حاجة واحدة الأمــــــــل

10- الشيخ سعود الشريم هو المفضل لدي من بين أئمة الحرم..

12-الصداقة عندي مقدسة بأعتبر نفسي المسئولة الأولى عن كل حاجة تخص أصدقائي..

13- دولاب ملابسي بيغلب عليه الروز والأبيض والأسود ..

14-معرفش انام بدون غطا حتى لو في عز الحر

15- فصل الشتا هو الأفضل بالنسبة لي

16-حاسة البصر أقوى عندي من السمع

وده أكتشفته من شغلي ..( لما حد بيمليني الأرقام اللي بدخّلها ع الجهاز بأغلط كثير اووي,,

لكن لو انا اللي ببص وانقل مافيش ولا غلط)

17-لما بخرج اي كافيه بطلب عصير ليمون مع ثلج كثير مع اني مابشربهوش ف البيت

18-بحب الشطة جدا..وماقدرش استطعم الأكل بدون شطة

19-بأتعلق بالأحلام المنامية جدا..بل إني بستنى كل يوم هحلم بإيه وكأني بخطط لرحلة ممتعة

20- النوم بالنسبة ليا (مملكة) وأنا الإمبراطورة فيها ..

وقت السلم بنام كثيير جدا ..

ووقت الحرب ممكن مانامش خالص ويستثنى من الحرب( أيام الإمتحانات) لأنها بتكون كلها نوووم تقريبا

21- بأعيط من قلبي لما اغلط في أي إمتحان حتى لما كبرت وبقيت في الماجستير لسه زي الهبلة بأعيط في الامتحانات

22- مابحبش اتسوق بس مفروض عليا كده

23- كائنة بيتوتية وده سبب فشلي ف الشغل اني ممكن فجأة اقرر مارحش لمجرد اني عاوزة ااقضي اليوم ف البيت

24- بحب اطبخ اووي واخترع اكلات من دماغي وبأتلذذ وانا بشوف الرضا عليها في عين بابا بالذات

25-بتحول لكائن تاني خالص يوم ماحد يدوس لأهلي ع طرف او يفكر حتى انه يعملها بأتحول لوحش

26-مبعثرة وفوضوية من جوايا جدا..افكاري متضاربة ومش بثبت ع حال

27-بحب ان الوضع من حولي يكون مناسب لمزاجي ,

عشان كده دايما بلاقي لنفسي عذر في تناثر الورق ع الأرض او تعليق هدومي مرة ع السرير ومرة في الدولاب ومرة ورا الباب ومرة ارميها ع الكرسي

الفوضى في نظري رسالة للي بيشوفها ليفهم بأني فعلا تائهة و منشغلة في ذات الوقت

28-علاقتي بالمراية غريبة يعني مش بحب أسرح شعري قدامهاولا احط ميك آب فيها ولا حاجة..

بعمل كل ده وانا قاعدة وبعدين أقوم القي نظرة واحدة فيها

29-بأحرص جداً إن شنطتي وشوزي يكونوا متناسقين مع بعض

30-وجبة الإفطار هي الوجبة الأساسية عندي ومش مهم الإفطار ده امتى 3 بليل 12 الظهر 10 مساءا المهم إني اول مااصحى من النوم اشرب عصير وبعدها بربع ساعة بالكثيير أكل

31-عندي مشكلة في الهمزة ومش بعرف أكتبها على اي شكل فابتبع احساسي في كتابتها

32- كنت فاشلة في مادة الإملاء

33- كنت مبحبش اذاكر جغرافيا أبدا

34-لما اكون متوترة او بفكر بلعب سولتير العنكبوت عشان اركز

35-بأتمالك أعصابي جداً وقت المشاكل و الخوف و الحوادث لاقدر الله..

ورغم كده بكون ضعيفة أووي في مواقف ماتستاهلش

36-مابحبش حد يجاملني او يشكرني بيحطني في حرج كبير

37-الحمد لله أهلي بيعتمدوا عليا اعتماد كلي في كثير من أمورهم وقرارتهم

38-عندي شبشب (الله يكرمكم)ما بقدرش اقضي يومي وهو مش في رجلي..وبيتنقل معايا في كل سفرياتي

39-بأحرص دايما اني أشيل محفظة في الشنطة بس مابيكونش فيها لافلوس ولا إثبات هويّتي ..مجرد عياقة يعني

40-بحب القراءة جداً .وان كنت مش بمارسها بقالي فترة

41- رسائل الموبايل sms

بتعنيلي كثير اووي بفرح اووي لما تجيلي رسالة حتى لو كان فيها بيان بقطع الخدمة

42-بأتنرفز من السمك ممكن آكله مرة كل 3 شهور و المشكلة مامتنا بتحبه

43- بعرف أجيب حق غيري...لكن حقي عليه العوض ومنه العوض

44- علاقتي بابا أقوى من علاقتي بماما بابا يعتبر صديق مقرب جدا ليا..ماما العكس انا صديقتها المقربة

45-بأفرح اووي بالنونو الصغير ..بأحس بمتعة لوجوده ف البيت

46-بكبّر دماغي من اللي يغلط فيا لو كان عزيز عليا

47-بعمل كل حاجة في آخر وقتها

48- بتأخر على ميعادي دايماً للاسف

49- يوم ماحبيت اتغيرت حياتي رأسا على عقب

50-بزعل من نفسي في حجات كثير .زلكن اللي بيطمني اني بقتلها لوم وبتمنى ألاقي الهداية في يوم

وكفاية كده دلوقتي

[osmel33]

فكرة أكثر من رائعة وأنا هاشارك فيها حتى علشان الواحد يبقى شاهد على نفسه

بس المشكلة هايبقى فيه شهود تانين (أهل المنتدى) والله بس فكرة حلوة

:rolleyes:

تم تعديل 29 يناير 2009 بواسطة osmel33

[osmel33]

1- أنا شخص اجتماعي تماماً باحب الناس وباحب اتعامل مع أى حد وأتعرف على أى حد ماتفرقش كتير وماعرفش أبداً أعيش لوحدى عشان كده ماباحبش قعدة البيت وولادى خدو الخصلة دى مني ومطلعين عيناي فى الخروج والفسح

2- أنا من أيام الدراسة وبالذات أيام الامتحانات ما بيجينيش نوم وتقعد الباترفلايز تلعب فى بطنى وهيهات طبعاً انى أعرف أنام

3- كنت لما باخرج من الامتحان ينتابنى حالة من الذهول :rolleyes: لفترة بغض النظر أنا عملت أيه ويقعدوا اصحابي يفوقوا في كأنى بالظبط مغمن على :blink:

3-عندى ملكة التدريس على الرغم من عملي الفنى وحاضرت فى الجامعة سنوات وأعتقد أنى نجحت في الموضوع ده بشهادة الدكاترة والطلبة طبعاً وأعتقد أن الملكة دى أنا اكتسبتها من أمى الله يرحمها لأنها كانت موجهة لغة إنجليزية وكانت بارعة فى التدريس (أسكنها الله فسيح جناته)

4- كانت طبيعة شغلى السابقة فى البرمجة كانت بتخلينى كتير باكون لاسع :unsure: يعنى مافيش مشكلة أغنى وأنا قاعد وسط ناس أعمل أصوات ببقى عجيبة وكل الناس اللى حولي يبقوا مذهولين بس هانقول أيه بقى يلى، بس دلوقت لما بقيت مدير مشروعات قد الدنيا لازم شوية أحترام طبعاً "عيب الناس موجودة" وعلى الرغم من أنى لى أودة لوحدي بس ولو

مش هانتفضح على آخر الزمن

5-باحب زوجتى وولادى جداً ودايما هما فى رأس أولوياتي "بس ده مايمنعش بونية شلوت حاجة كده على الماشى أصول التربية" :wub:

6-باحب القراية من صغري وفى عربيتى على الإقل كتابين لما باكون رايح شغلى اتعمد أروح بدري على الأقل نص ساعة اقعد أقرا فيهم أو لو في مكان لوحدى على كورنيش مثلاً ولا حاجة أفتح كتاب من اللى معايا واقعد اقرا "على فكرة أنا نجحت إنى اقرا مجموعة كتب فى زمن قياسي بالطريقة دى"

7-كنت زمان باحب الرياضة بالذات العنيف منها وخدت فى صغري وأنا فى ثانوى تقريباً حزام أسود فى الكاراتيه وكنت باعشق اللعبة دى جداً بس بطلت الكلام ده

8-اعتقد انى من الناس المنظمين جداً يعنى مثلاً مش ممكن أسافر إلا ولازم يكون فيه ورقة كاتب كل اللى لازم أعمله قبل السفر ومكونات الشنطة اللى هاخدها معايا "ومعنى أن الموضوع ده محصلش كارثة عندى وهى فعلياً ماحصلتش غير مرة واحدة" والورقة دى بابتدى فيها قبل السفر باسبوع وباعمل ليها ابديت كل اما افتكر حاجة

9-أنا من الحاجات الجميلة اللى علمتهاني أمى الله يرحمها عمايل الأكل كانت دايماً تقولى يابنى لازم تعمل حاجتك بأيدك بكرة ممكن تسافر وتتسوح لوحدك وفعلاً ده اللى حصل والحمد لله بانافس الشيف أسامه فى المطبخ

10- باحب الأكلات المصرية الأصيلة فول بالزيت الحار - فتة - ممبار - السمك بجميع أشكاله وطرق عمايله لدرجة أنى مرتين روحت فيهم أبوظبي عشان شغل ماهمنيش الشغل قد ماهمنى أنى أروح مطعم الشوكة الذهبية عشان شوربة السي فوود - "وكفاية كده عشان أنا جوعت وأنا باكتب"

11-باعشق (البحر + أم كلثوم) الاتنين مع بعض يعملوا معايا قفلة جامدة جداً وطبعاً با حب حليم وفريد ونجاة وكل ناس الزمن الجميل

12-باحب القاهرة التلاتينات والأربعينات "أنا ماعشتش الفترة دى بس والدى كان بيحكيلى" وكنت على طول مقيم فى كافتيريا Bakery Mariot اللى فى شارع جامعة الدول كانت زمان حاطة صور جميلة للقاهرة فى الفترة دى بس الله يسامحهم شالوها وكنت تقريباً باحب اروح المحل ده عشان الصور دى وأكيد الناس اللى بتروحه من زمان فاكره الصور دى

13- باحب المحل الجميل "الأمرييكيين" اللى موجود فى شارع فؤاد فى السبعينات والتمانينات "كنت موجود فى الفترة دى" طبعاً مش اللى موجود دلوقت - جروبي - شارع فؤاد وضواحيه بس برضه زمان

14-بما أنى باحب البحر فعشان كده باعشق اسكندرية تحديداً ولو روحت أى مكان فى وقت المصيف شارم أو الغردقة أو بره لازم أروح أسكندرية

15-باحب منظر اتوبيسات النقل العام وبالذات وهى محشورة والناس طالعة بره على الرغم انى ماباركبهاش يمكن آخر مرة ركبتها من نهاية التمانينات وكان لى موقف لم وان أنساه "فيلم الصراع مع الأتوبيس"

يتبع......

[Emo]

osmel33

سعيدة بمداخلتك جدا...

فعلا هي توثيق لحياتنا في اللحظة الراهنة..يعني إنى شاء الله نرجعلها بعد 10 سنين..نشوف احنا كنا ازاي..

ع الأقل تبقى دليل براءة في حال اللزوم.. :happy:

-اعتقد انى من الناس المنظمين جداً يعنى مثلاً مش ممكن أسافر إلا ولازم يكون فيه ورقة كاتب كل اللى لازم أعمله قبل السفر ومكونات الشنطة اللى هاخدها معايا "ومعنى أن الموضوع ده محصلش كارثة عندى وهى فعلياً ماحصلتش غير مرة واحدة" والورقة دى بابتدى فيها قبل السفر باسبوع وباعمل ليها ابديت كل اما افتكر حاجة

تعرف حضرتك انا لو عملت كده..تبقى في معجزة كونية..

رغم اني نفسي اكون منظمة وبنبهر بالناس المنظمين ..خاصة في قرارتهم..

لكن انا عندي عادي ممكن اكون الصبح ف القاهرة وابقى خارجة مثلا رايحة الجامعة يطق في راسي اشوف اهلي ااقوم مغير طريقي ع المطار

وادي الباسبور لأني بمشي بيه دايما..واقطع تذكرة ع اول طيارة ..وفجأة تلاقيني في جدة ..واتلفن لأهلي انا في المطار تعالوا خدوني..

:closedeyes:

-باحب القاهرة التلاتينات والأربعينات "أنا ماعشتش الفترة دى بس والدى كان بيحكيلى" وكنت على طول مقيم فى كافتيريا Bakery Mariot اللى فى شارع جامعة الدول كانت زمان حاطة صور جميلة للقاهرة فى الفترة دى بس الله يسامحهم شالوها وكنت تقريباً باحب اروح المحل ده عشان الصور دى وأكيد الناس اللى بتروحه من زمان فاكره الصور دى

بكري جامعة الدول من الأماكن المقربة جدا لروحي..وقضيت فيه شطر كبير من اقامتي ف مصر..

مكان ليه طعمه الخاص..

5-باحب منظر اتوبيسات النقل العام وبالذات وهى محشورة والناس طالعة بره على الرغم انى ماباركبهاش يمكن آخر مرة ركبتها من نهاية التمانينات وكان لى موقف لم وان أنساه "فيلم الصراع مع الأتوبيس"

بيحزني جدا جدا المنظر ده..ولازم لما اشوفه اعيط..مش بقدر اتحمل المعاناة اللي بيدل عليها..

الله يأجرهم الناس اللي بتركب الأتوبيسات ويحلي عيشتهم ويجازيهم برضاهم..

بإنتظار الــــ يتبع..

كن بخير..

[Spanish Eyes]

موضوع شيق وشدني للكتابة فيه بصراحة متناهية معرفش ليه حبيت اتكلم يمكن عشان افكر نفسي معرفش بس حاتكلم عن نفسي

1- اغلي انسانه عندي ماما الله يرحمها الدنيا كلها كانت عندي ماما، بذاكر عشان ماما بانجح عشان افرح ماما كمان اتجوزت عشان افرح ماما لما اشتغلت كانت اول واحدة اقولها هيا ماما، لما تجيلي ترقية او زيادة اول واحدة بفرحها كانت ماما يعني من الاخر اي نجاح في حياتي كان عشان ماما.

2- مش بفطر الصبح ومش بكلم حد خالص لغاية الساعة 9 بعد مااكون شربت النسكافية وقرايت الميل بتاعي (عارفين الاعلان بتاع النسكافيه بتاع المرتبة اللي لزقة، انا بكون كدة بالظبط)

3 بحب اللبس الفورمال والسوارية عشان بحس اني هانم اوي معرفش ليه

4- حشرية قوي

5- معنديش اكله مفضلة كله نعمة ربنا بس مقدرش اكل السبانخ

6- بحب اعمل السمك والجمبري وبيطلبوا مني دايما عشان اصحابنا بيحبوا الاكل دة مني اصل انا الوحيدة الأسكندرانية في الشلة وكمان فلقوني بالكبدة الأسكندراني يكلوا لما يموتوا وبعد كدة يقولولي كنتي مذودة التوم

7- المركز العلمي(الكويت) مكاني المفضل عند costa قدام البحر - في اسكندرية سابا باشا على البحر برضة مقرش اعيش من غير بحر وفيروز

8- ذكيه جدا بس كسسسسسسولة عشان كدة بعتمد على ذكائي وزاكرتي والصراحة شلوني من مصايب كتير قبل كدة

9- زهقت من تحمل المسؤلية نفسي اعيش في lalala land او في الهييييش ايهم اقرب

10- ملتزمة حتى الموت في الناحية المالية ولو حموت بس budget متخرمش ولو خرمت يبقى على الماستر او الفيزا

11- عندي هوس التعليم الأفضل عشان اولادي وبخاف عليهم زيادة عن اللزوم نفسي ابطل العادة دي مش عارفة

12- بحب الناس اللي بتضحك ومقبلة على الحياة عشان في اوقات كتير مودي بيقلب فجاة على سوداوية فلو الناس دي مش في حياتي دماغي بتركب توربيني اكتأب

13- امنية حياتي جوزي يعملي سندويتش وشاي بلبن

14- قبل متجوز كنت قمة في الفوضى بعد الجواز كل حاجة مترتبة ومنظمة مش عشان بحب النظام ابدا بس عشان جوزي منظم جدا فامفيش داعي اسمعلي كلمتين

15- مبحبش اطبخ ولا المطبخ بس حطيت الموضوع في دماغي واتقنته جدا تحدي يعني ودلوقتي حاجات كتير بتتطلب منى special request

16- مرة مش حانساها دكتور في الجامعة عندي قالي u born for challange مقدرش اعيش من غير تحديات مش بحب الحاجة السهلة

17- متناقضة وموديييييييييييي جدا

18- طيبة ويسهل ارضائي بكلمة وبنسى القسوة

19- اصحابي فكرني مامتهم مش صحبتهم

20- مش بعرف ارتب حبل افكاري بس جوزي بيعمل دة بدالي هاهاهاه

21- 4 سنين تخصص محاسبة كل اصحابي قلولي كنتي لازم تتخصصي ادارة اعمال too late

22- لما بعمل حاجة لحد بتوقع thank u so much

23- last minute is the most productive minute

24- الكشري بالشطة اساسي في الحمل

25- العدس مع البصل والليمون اساسي في الشتا

26- صيف يعني شرم

27- لما جالي خبر وفاة ماما معيطتش وتصرفت بحزم في كل الأمور بس بليل كنت بصلي انهرت

28- وائل جسار --- بيجيب من الأخر

29- لما ببقى متفائلة عندي القدرة على نشر الابتسامة والتفاؤل في اي مكان بكون فيه

30- حاجة كلكوا حتستغربوا منها بحب رمضان في الكويت جدا باختصار الصلاة في المسجد الكبير خلف فهد الكندري ومشاري العفاسي بس فهد الكندري بياثر فيا اكتر

انا رغييييييييت كتير قوي كفاية كدة

[dongol]

موضوع جميل لذلك سأدلو بدلوي (حلوه دلوي ديه)

1- أنا اصغر اخواتي بس حاسس اني اكبر واحد فيهم و لازم اخد بالي من كل واحد حتي لو ما طلبش

2- عمري ما حطيت فلوس في المحفظه و دايما راميها في جيبي و نادرا ما بعرف معايا كام و انا خارج (الموضوع ده عملي مشاكل كتير بس اهي بتعدي)

3- بحب لبس الكاجوال جدا و لما بلبس بدله بيبقي يوم اسود و بفضل مخنوق طول النهار (الموضوع ده اتعدل شويه بعد الجواز)

4- بموت في حاجة اسمها قرايه لحد لما نظري ضعف (تخيلوا انا الوحيد في اخواتي اللي لابس نضاره مع اني اصغرهم)

5-مش بحب سماع الاغاني الا في لحظات معينه يعني لما تكون الاغنيه بتوصف الموقف اللي انا فيه

6- كنت طول حياتي بحب السفر و اول ما بسافر تصيبني حاله اكتئاب فظيع و ببقي عايز ارجع مصر باي طريقه

7-ايام الامتحانات كانت بتصيبني بحاله نفسيه لدرجه اني كنت بقعد يومين قبل الامتحان ما بنامش و ما يجيليش نوم الا لما ارجع من الامتحان و انا حالل كويس

8-ايام الدراسه كنت بحب الكيمياء و الانجليزي قوي ومش قادر احدد السبب لغايه دلوقتي

9-بحب اخواتي البنات عن الصبيان و برضه مش عارف السبب و بحس ان البنات قريبين مني قوي ولو طلبوا عينيه هديهالم من غير تردد (الموضوع ده عاملي مشاكل مع مراتي بعد الجواز بس كله يهون )

10 - بحب العب مع الاطفال لدرجه اني امي دايما تقولي اعقل بقي انتي كبرت ما يصحش كده الناس تقول عليك عبيط

11-الاكل ايام زمان كنت بحبه قوي اما دلوقتي فاي حاجة هتقضي الغرض

كفايه عليكم كده النهارده

[الباشمهندس ياسر]

وكفاية كده دلوقتي

كفايه ايه و بتاع ايه

ايه البرااااااااااااااااااااااااااءة دى

ده كده مش فاضل حاجة خالص متكتبتش

لى عودة ان شاء الله

لانى على ارتباط بعد قليل

[Emo]

مروة الشامي.. :closedeyes:

استمتعت جدا وانا بقرأ عنك..

وعجبتني اووي حكاية ..

13- امنية حياتي جوزي يعملي سندويتش وشاي بلبن

والله إنك طيوبة ..

بس سندوتش..وكمان شاي بلبن..!

فين الفطار المتكامل ..والنسكافيه المضروب لمدة نص ساعة بالإيد..!!

الله يسعدكم يارب ويحققلك كل أمانيكي..

- ملتزمة حتى الموت في الناحية المالية ولو حموت بس budget متخرمش ولو خرمت يبقى على الماستر او الفيزا

ياريت تعلميني.. :happy:

- بحب الناس اللي بتضحك ومقبلة على الحياة عشان في اوقات كتير مودي بيقلب فجاة على سوداوية فلو الناس دي مش في حياتي دماغي بتركب توربيني اكتأب

منطق حلو والله..

انا بردوا بحب صدقاتي دايما يكونوا ناس متفائلين ومقبلين ع الحياة..

بس مكنش عندي تفسير..

لقيته هنا..

انبسطت بقربك مروة..كوني بـــ سعادة دوم..

[osmel33]

سعيدة بمداخلتك جدا...

فعلا هي توثيق لحياتنا في اللحظة الراهنة..يعني إنى شاء الله نرجعلها بعد 10 سنين..نشوف احنا كنا ازاي..

ع الأقل تبقى دليل براءة في حال اللزوم.. :happy:

والله أنا خايف يكون دليل تلبس مش دليل براءة i*:

تعرف حضرتك انا لو عملت كده..تبقى في معجزة كونية..

رغم اني نفسي اكون منظمة وبنبهر بالناس المنظمين ..خاصة في قرارتهم..

لكن انا عندي عادي ممكن اكون الصبح ف القاهرة وابقى خارجة مثلا رايحة الجامعة يطق في راسي اشوف اهلي ااقوم مغير طريقي ع المطار

وادي الباسبور لأني بمشي بيه دايما..واقطع تذكرة ع اول طيارة ..وفجأة تلاقيني في جدة ..واتلفن لأهلي انا في المطار تعالوا خدوني..

:rolleyes:

والله الموضوع هو تعود ومش موضوع أنضباط وكلام جامد من ده كل مافي الموضوع اني

بانسي أون لاين mfb: يعنى ممكن أكون باكلم معاكى وبعدين أقولك انتى مين مثلاً ؟ :blink:

أو أنا ايه اللى جابنى هنا فتخيلى بقى لو سافرت ونسيت حد من الولاد مثلاً

نظام هوم الون وكلام من ده أنا قربت اكتب اسماء الولاد فى الورقة علشان مانساش حد فيهم

بكري جامعة الدول من الأماكن المقربة جدا لروحي..وقضيت فيه شطر كبير من اقامتي ف مصر..

مكان ليه طعمه الخاص..

يبقى أكيد فاكره الصور اللى أنا قولت عليها

الله يأجرهم الناس اللي بتركب الأتوبيسات ويحلي عيشتهم ويجازيهم برضاهم..

والله مسألة برضاهم دى مش مضمونة bsh:)

[سهيلة]

موضوع لذيذ يا ايمو وفرصة الواحد يقعد مع نفسة ويكتشف حاجات فيها يمكن بعد فترة من الزمن نقول انا ازاى كنا كدة وازاى بقينا كدة

فعلا الزمن بيغير بعض الصفات ف الانسان وليس الكل طبعا

زمان ودلوقتى وف كل وقت احب الاماكن لقلبى هوة البحر خصوصا بحر اسكندرية قدام البحر بنسى كل همومى وتلاقينى مبسوطة ومنشكحةة كدة وانا بسمع صوت الموج ولو اى حد كلمنى ساعتها وانا مندمجة كدة غالبا موش برد علية

موش بحب اصحى بدرى مطلقااااااااااااااااااااااااااا حتى ايام الكلية كنت بزوغ من المحاضرة الاولى او اروحها متاخر

بحب يوم واحد ف الشهر لان دة اليوم اللى بنقبض فية المرتب :rolleyes:

اسعد اوقاتى وانا بصرف الفلوس ف الشوبنج :sad:

كنت قبل الزواج ما اعرفش كام ف محفظتى من الفلوس وكدة لكن دلوقتى بدات انظم نفسى وبطلت تبذير نوعا ما\\

مصر بالنسبالى رمضان ساعة اذان المغرب وصلاة العيد ولمة العيلة وشلة الاصحاب

كنت بضايق من قلق ماما علية الزائد وسؤالها علية لكنى حسيت دة اوى لما بقى عندى بنوتة وبخاف عليها اوى

بحب الشتا اكتر من الصيف وبستمتع بالمطر جدااااااااااااااا

متسامحة لابعد الحدود الا فيما يخص كرامتى

حالتى النفسية بتكون مرتفعة جدا وبكون راضية عن نفسى لو صليت الفجر حاضر بس للاسف موش بداوم علية

بس خلاص

[Emo]

أغلى تحية لكل من مر من هنا..ولي عودة برد مفصل..

وتكملة التسييح لنفسي..

بس ربنا يتوب عليا من الشغل وسنينه..

موعدنا الليلية.. :rolleyes:

[DIA ELDIN]

موضوع جميل

تسجيل متابعة

[Emo]

dongol

اعتذر عن تأخري ف الرد.. :wub:

(يقطع الشغل وسنينه)

2- عمري ما حطيت فلوس في المحفظه و دايما راميها في جيبي و نادرا ما بعرف معايا كام و انا خارج (الموضوع ده عملي مشاكل كتير بس اهي بتعدي)

احنا أخوات بقى ع كده..

صعب اووي مسألة ان الواحد يعد الفلوس بتاعته..بحس ان بركتها بتقل..

بس والله نفسي اغير الصفة دي..

يارب يعني..عندي أمل فيا.. :)

7-ايام الامتحانات كانت بتصيبني بحاله نفسيه لدرجه اني كنت بقعد يومين قبل الامتحان ما بنامش و ما يجيليش نوم الا لما ارجع من الامتحان و انا حالل كويس

طيب من هذا المزنق أحب أعترف إني انا اللي كنت مستولية ع النوم في الشرق الأوسط أيام الإمتحانات..

بناام لكل الغلابة اللي مابيقدروش يمارسوا الترف ده..

:)

أسعدني تواجداك..وبكرة ابقى ماسكة عليكم زلل..اوريها لعيالكم لما يكبروا..

دم بكل خير..

[Emo]

وكفاية كده دلوقتي

كفايه ايه و بتاع ايه

ايه البرااااااااااااااااااااااااااءة دى

ده كده مش فاضل حاجة خالص متكتبتش

لى عودة ان شاء الله

لانى على ارتباط بعد قليل

:)

هو انا مأجرة المكان ومدفعتش الإيجاار ولا ايه.. :wub:

براحتتتتتتتتتتي ..انا بسيح لنفسي.. :)

وعشان الرد اللي بيقلي اتكتمي ده..انا هرجع اكملهم 100

نيهاهاهاهاها.. :)

[Emo]

إقتباس

بكري جامعة الدول من الأماكن المقربة جدا لروحي..وقضيت فيه شطر كبير من اقامتي ف مصر..

مكان ليه طعمه الخاص..

يبقى أكيد فاكره الصور اللى أنا قولت عليها

الأستاذ الفاضل

osmel33

عودا حميدا..

الحقيقة مش شفت الصورة..بكري دلوقتي كله صور فناجين وشخابيط وحجات كده غريبة..

انا بتكلم عن بكري الكبير اللي ف جامعة الدول..

بس ع كل حال..مازال بيحتفظ أكيد بسحره الخاص..

دم بكل خير..

[نصير]

الموضوع جلب انتباهي ربما هي دعوة ذكية للوقوف بكل شجاعة امام المرآة لمواجهة انفسنا ..و هي وقفة لابد منها بين الحين والاخر لنقيم انفسنا....

لكن ما رأيكم لو تركت زوجتي تتحدث عني ..فهي تقف ورائي الان لتراقبني ماذا اكتب :)

[نصير]

على كل حال ...اعدكم اني ساحدثكم عن نفسي عندما اجد الشجاعة لمواجهتها او لنقل عندما استطيع ترويضها فنفسي كما قال المتنبي على قلق كأنّ الريح تحتي

[Emo]

سهيلة..

مبدئيا أعترف إني فبرحت جدا جدا جدا لما شفت ردك,,ومتسألنيش ليه..

لأن دي نفسي بردوا اللي تلاقيهالا بتفرح إذ فجأتن.. :wub:

كنت قبل الزواج ما اعرفش كام ف محفظتى من الفلوس وكدة لكن دلوقتى بدات انظم نفسى وبطلت تبذير نوعا ما\\

الله يبشرك بالجنة يعني فيني أمل أتظبط ف حكاية الفلوس دي في يوم..!

مصر بالنسبالى رمضان ساعة اذان المغرب وصلاة العيد ولمة العيلة وشلة الاصحاب

فعلا الوقت ده ف مصر بيكون غييييير..رووعة وهدوء يأخد العقل..

وتحسي كده ان الوقت الذهبي للتأمل وكتابة الشعر وانك تروحي من الهرم لمدينة نصر ف ربع ساعة..وان اللي عاوز يسرق حاجة فهي دي ساعة الصفر المناسبة :)

حالتى النفسية بتكون مرتفعة جدا وبكون راضية عن نفسى لو صليت الفجر حاضر بس للاسف موش بداوم علية

عندي استعداد ارخم عليكي واصحيكي كل يوم الفجر.. :)

انا بعمل كده مع صحابي..واعدائي.

وأهلي...

وكل الحبايب اللي بتفرق معاهم حكاية الصلاة بدري..

فعلا صلاة الفجر ف وقته مفتاح لطاقة أمل وسعادة بتملاكي طول اليوم..

الله يديم عليكي الرضا والفرح ف طاعته يارب..

دومي بحب..

[Emo]

DIA ELDIN

موضوع جميل

تسلم الله يسعدك

تسجيل متابعة

ع أساس ان حضرتك واقف ف طابور عيش..

مااااااشي.. :)

بإنتظار تشريفك دوما..كن بخير..

[Emo]

أستاذ نصير..

أسعدني مرورك والعائلة الكريمة بأجمعها.. :)

الموضوع جلب انتباهي ربما هي دعوة ذكية للوقوف بكل شجاعة امام المرآة لمواجهة انفسنا ..و هي وقفة لابد منها بين الحين والاخر لنقيم انفسنا....

لكن ما رأيكم لو تركت زوجتي تتحدث عني ..فهي تقف ورائي الان لتراقبني ماذا اكتب

صدقني مش محتاجة شجاعة قد ماحسيت ان الإنسان بينسى نفسه ف الزحمة..لحد ماتيجي عليه لحظة ينسى هو مين أصلا...

على كل حال ...اعدكم اني ساحدثكم عن نفسي عندما اجد الشجاعة لمواجهتها او لنقل عندما استطيع ترويضها فنفسي كما قال المتنبي على قلق كأنّ الريح تحتي

بإنتظار الوفاء بوعدك..وحتى وقتها وبعدها..دم ك أطيب مافي الكون..