الرحلة اللاندنجية فى الأراضى الكندية

[The Syrian]

السائق: أنا مهندس كيميائى و أول ماجيت دورت على تخصصى فمالقتش و ضيعت 70 ألف دولار و فى الأخر إشتغلت سواق تاكسى علشان أقدر أصرف.. (70 ألف دولار) ده لتأكيد الرقم .. ماأعرفش هو كان بيسرح بيا و اللا لأ بس أنا حسيت بصدقه خاصة لما إنفعل أول مرة لما سألته عن حديقة الحيوان.

--------------------------------------------

يعني 70 ألف دولار ...لو صرف 3000 دولار كل شهر ح تعيشو سنتين بكل اريحية ..ده نمرة واحد

نمرة تنين ...كم باكستاني معاه 70 الف دولار ..ياعم اللي زي ده بيشتغل بالخليج ب 1000 ريال

من الواضح ان الراجل ما بيقولش كلام صحيح

[abdelallah]

العزيزة SoSoRaNy حاولت أبعث رد و لكن الخاصية لا تعمل .. الإجابة الطيران لطول المسافة و من أرخص الأسعار حيكون www.expedia.com

بالتوفيق

[abdelallah]

الحلقة السابعة:

السلام عليكم و رحمة الله و بركاته

وصلنا الفندق و كان فيه زبالة بجانب مدخل الفندق و كان مفاجأة إنى أجد شحات بيقلب فى الزبالة و بيشرب سيجارة ... السواق فضل يبص للشحات بطرف عينه و إحنا بننزل الشنط ... بعد ما نزلنا الشنط و دخلناها جوا الفندق .. خرجت لمحاسبة السائق و قلت له أنا حأدفع ببطاقة الإئتمان .. طلع الألة اليدوية و سحب عليها البطاقة و مضيت على الورقة .. و هنا كان فيه علامة إستفهام ثانية و هى إن الراجل إستخدم الألة اليدوية (انا ما شفتش الألة دى إلا مرة واحدة فى كينيا).

دخلنا الفندق و لقينا الحجز بتاعنا موجود على السيستم و الراجل اللى فى الإستقبال كان بشوش و العملية لم تأخذ أكثر من عشرة دقائق.

طلعنا الغرفة و كانت نظيفة و فيها كل حاجة ( أنا إتأكدت من مكونات الغرفة على الإنترنت قبل الحجز) .. بس كانت ضيقة شوية أو إحنا كان معانا شنط كثيرة جدا. فيه حاجة كويسة للأطفال فى الفندق ده و هو وجود حمام سباحة فيه مياه مسخنة و الأولاد نزلوا مرتين و إتبسطوا جدا.

فيه شبكة إنترنت لاسلكية فى الفندق و هى نصيحة إنك تأخذ معاك لابتوب .. أنا كنت بأستخدمه فى البحث عن أى معلومات عايزها و من أهمها أحوال الطقس الأيام القادمة..و أتكلم من برنامج السكايب ..

نمنا زى القتلى .. بس لفرق التوقيت و تغيير المكان صحينا بدرى و قررنا نغزو تورونتو بأول زيارة ... (أنا زى ما قلت ما أجرتش عربية و إخترت نقعد فى نص البلد) ... كانت الشمس طالعة بس الجو سقعة جدا.. بعد أول يوم كانت شفايفنا كلها عاوزه زبدة كاكاو .. لقيتها منتشرة هناك لإنتشار هذه الظاهرة و هى متوفرة بكذا ماركة و كذا شكل و منها الغالى و الرخيص .. المهم إتجهنا إلى إيتون سنتر .. ( أنا طبعت الخريطة من الإنترنت ) .. و هى مشى حوالى ربع ساعة من الفندق .

مول كبير جدا و جميل على عدة أدوار ... كان أكلنا مركز على الأسماك و الخضروات علشان يكون إسلامى و الجيلاتى هناك خطير!!

معلش الحلقة صغيرة بس شوية صور بقى علشان الحبايب.

أستأذنكم كفاية كده النهاردة – متنسوش الدعاوى

[abdelallah]

الصور لإيتون سنتر ... و فيه صورة مقلوبة معرفش ليه نسيت أعدلها .... :wub:

تحياتى

[ايناس احمد]

تسجيل متابعة ياأستاذ عبداللة

حلقات جميلة وشيقة ربنا يكرمك ويجازيك الف خير

وربنا يبارك لك فى اولادك ويخليهم

[SoSo R]

شكرا يا أستاذ عبدالله ع الرد والصور جميلة بس ليه ما حدش طالع فيها منكم؟؟

[samehelassad]

الف الف شكر ليك يااستاذ عبداللة تسلم ايدك. ويبقى كتر الف خيرك لو تنزلنا بخريطة تورونتو. يبقى تمام اوي وزي الفل. واكون شاكر ليك مقدما.

[abdelallah]

شكرا لكم جميعا على الردود الحلوة..

عزيزى سامح أنا بأحب موقع ال:

http://www.mapquest.com

للخرائط

[abdelallah]

الحلقة الثامنة:

السلام عليكم و رحمة الله و بركاته

اليوم التالى رحنا علشان نعمل ال(سين نمبر) فى مبنى بجانب إيتون سنتر و ده مكان إسمه "سيرفس كندا" و هو منتشر فى كل أنحاء كندا علشان تلاقى أقرب مكان لك فيه لهم موقع و هو:

http://www.servicecanada.gc.ca

الموقع بالإنجليزى و الفرنساوى و جواه كل حاجة عنهم و الخدمات اللى بيقدموها و أماكنها .. بعد كده دخلت على الموقع بتاع الخرائط علشان أعرف أروح إزاى :

http://www.mapquest.com

و إحنا فى الطريق كان فيه جنينة كبيرة و كان فيها حمام كثير و فجأة شفنا سناجب فى الجنينة ... الحقيقة أول مرة أشوف سناجب فى حديقة عامة .. كنا على الناحية الثانية من الشارع و كان لازم نعدى عاشان نروح الجنينة .. كل الأرصفة فيها أماكن مصممة لنزول العربات بتاعة الأطفال و المعاقين (يعنى مش لازم العربية تتكسر و هى بتنزل من على الرصيف أو تسأل حد يساعدك تنزل العربية من على الرصيف)..

إستنينا لحد ما الشارع فضى من العربيات و بعدين عدينا .. كان فى الإتجاه المقابل فيه عربية بوليس جايه لمل شافنا بنعدى وقف طبعا بيننا و بينه بتاع عشرة متر .. و بعد ما عدينا الشارع خالص الراجل بتاع البوليس اللى فى العربية قال لى لو سمحت المرة الجاية عدى من عند الإشارة !! .. بصيت لقيت نفسى بأعدى بعيد عن الإشارة بشوية فعلا بس اللى خللانى ما أخذش بالى الحتة هو الى فى الرصيف اللى قلت عليها .. المهم رديت عليه أوكى ... مشى على طول ... بس بص الإحترم ... وقف علشان نعدى ... سبنا نعدى خالص ... و بعدين قال الكلمة دى للتنبيه..

رحنا على الجنينة و لعبنا مع الحمام و السناجب شوية (أقصد الأولاد – ما حدش يفهمنى غلط) .. الحمام كان بييجى قريب جدا .. السناجب ماكانتش بتيجى قريب .. كانت تيجى تخطف الأكل و تجرى على الشجرة .. منظرها تحفة...

كملنا الرحلة فى شوارع تورنتو .. جميلة جدا ..و نظيفة و منظمة .. حاجة حصلت برضه فى السكة أحب أحكيها .. واحدة منظرها غريب جدا لبسها وسخ و عجوزة جدا وقفتنى وفضلت تقول لى حاجات مش فاهمها بس إستنتجت إنها بتقول لى ليه ما روحتش الكنيسة النهاردة ! واضح إن شكلها مجنونة فسبتها و مشيت بس دى ثانى مرة أواجه المشردين فى كندا و زى ما قرأت قبل كده واضح إن "داون تاون" فيها من الناس دى.

رحنا على "سيرفس كندا" و كان فيه مكتب فيه سيدتين .. قلت لواحدة منهم أنا هنا علشان ال"سين نمبر" كانت بشوشة جدا و ظريفة جدا بعد ما أخذت الورق طلبت أملى كذا أبلكيشن .. و قالت أنا حأعمل لإثنين منكم ال"سين نمبر" و زميلى حيعمل للثلاثة الباقين .. ملحوظة كل فرد حتى الأطفال له "سين نمبر"لوحده.

فعلا خلصنا الإجراءات بسرعة و قالوا إنهم حيبعثوهم فى خلال شهر و أعطونا ورقةفيها معلومات عن ال"سين نمبر" و رقم تليفون علشان لو الأرقام ما وصلتش...

أستأذنكم كفاية كده النهاردة – متنسوش الدعاوى

[abdelallah]

شوية صور للجنينة ..

[abdelallah]

مبنين حلوين كانوا فى السكة..

[abdelallah]

الحلقة الثامنة:

السلام عليكم و رحمة الله و بركاته

الأيام بتجرى بسرعة قوى... و دى أخر حلقة .. حتوحشونى.

قعدنا خمس أيام فى تورنتو فى داون تاون على أساس إننا حنرجع ثانى بعد ما نروح أمريكا كام يوم.

قبل السفر بيوم دخلت على النت علشان أحجز تاكسى للعودة .. و قلت بالمرة أسأل فى الفندق .. و لقيت إن التاكسى من الفندق حيفرق خمسة دولار بس .. قلت أضمن بدل ما يحصل اللى حصل و إحنا جايين .

فعلا فى يوم السفر كان التاكسى موجود و حطينا الشنط فى التاكسى و دار حديث بينى و بين السائق اللى كان أسود معاه الجنسية الكندية و هو أصلا من أثيوبيا .. قضى مدة 10 سنين فى أمريكا و 8 فى كندا .. (ده كلامه).

قال لى لما عرف إنى لسه عامل لاندنج إن كندا أفضل مكان للعيش و خاصة لو قورن بأمريكا .. هو عاش فى شيكاغو و واشنطن دى سى و هو متزوج و عنده ولد و بنت .. هو بيتكلم عن التربية التعليم و الصحة و الإهتمام بالأولاد بشكل عام .. الكلام كان حلو و مشجع .. و إحنا ماشيين شفت تورنتو تاور على يمينى .. مبنى كبير و جميل خاصة إننا بالليل.

وصلنا المطار و نزلنا الشنط و رحنا على الكاونتر ووزنا الشنط و كان فيه شنطة واحدة معديه الوزن .. الست اللى على الكاونتر كانت متعاونة و قالت لو سمحت خلى بالك من الوزن لإن دى كان ممكن يكون فيها غرامة كبيرة بس إحنا مش حندفعك حاجة المرة دى.

عدينا الشنط ورحنا على الجوازات و كان فيه نفس الأسئلة بتاعة الأكل و الخضار و الفاكهة اللى فيها بذر.

و رحنا أمريكا بس لظروف خاصة رجعنا على مصر من أمريكا و ما رجعناش على كندا... بس فيه كام حاجة أحب أذكرها:

* الجوازات بين كندا و أمريكا داخل مطار تورنتو مش فى أمريكا .. يعنى الجوازات الأمريكية فى مطار تورنتو و الباسبور بيتختم فى كندا .. و لما تنزل أمريكا تروح على الشنط على طول.

* حاملى الجنسية الكندية لهم طابور غير الأخرين .. و طبعا طابورهم بيمشى أسرع.

* كان المفروض أرجع على كندا .. و لإن كارت ال"بى أر" ماوصلش.. الطريقة الوحيدة هى عن طريق تعدى الحدود فى عربية خاصة (متأجرة أو شخصية) .. و أنا كلمت قسم الهجرة فى كوبرى "كوين" و قالوا بأوراق اللاندنج طالما فى عربية خاصة تقدر ترجع كندا.

* في الطريق بين الفندق و إيتون سنتر كان فيه "نايت كلوب" كان مكتوب عليه كده .. بس ما شوفتش بودى جاردز أو مناظر ستات مش كويسة.

* كان الأولاد كثير يسألوا ليه الراجل ده لابس حلق أو مربى شعره زى الستات .. و أسئلة من هذا القبيل .. جهز نفسك للإجابات و ياريت تكون مجهزهم قبل السفر إن إحنا رايحين بلد مش زيينا و إننا مسلمين و لنا عاداتنا.

* زبدة الكاكاو.

* الوزن الزائد للشنط.

* الفاكهة و الخضروات اللى فيها بذر.

* موقف أخير حصل معايا .. و إحنا فى إيتون سنتر كان فيه مكتبة فى أخر دور .. الأولاد كانوا يدخلوا يفروا الكتب و يقعدوا على الأرض يتفرجوا و ما حدش بيقول لهم حاجة خالص .. و لما كنا بنقعد نستناهم بره .. كانوا ساعات يأخذوا الكتب بره المكتبة يوروها لنا .. و ما حدش بيقول لهم حاجة و هم داخلين خارجين.. الأطفال لهم مكانه خاصة..

* ملحوظة هامة المتهم برىء حتى تثبت إدانته ... و أنت مصدق مالم يثبت أنك تكذب..... و ده يخليك تحس إنك بنى أدم و دى حاجة جميلة قوى ساعات بنفتقدها فى بلادنا.

أنا شرفت بكم و أتمنى أن أكون قد أفدتكم .. أنا جاهز لأى أسئلة و متنسوش الدعاوى

[abdelallah]

الأخ طارق خاصية الرد لا تعمل .

أهلا و سهلا بك .. أكسيبيدبا امن جدا و أنا جربته كثير و يعطى أسعار جيدة جدا .. و يرسل التذاكر على شكل تذكرة إليكترونية تطبعها و تروح بها المطار.

أعتقد أن حل الشقة أفضل لحضرتك من الفندق للعدد .. و عموما حسب المدة اللى ناوى تقعدها لإن المدد الصغيرة صعب تجد فيها شقة .

ألموقع ده فيه معظم الروابط اللى حتحتاجها و لو فيه رابط لحاجة معينة .. قولى عليها و لة فى إيدى حاجة إن شاء الله حأعملها .

تحياتى.

[samehelassad]

شكرا لكم جميعا على الردود الحلوة..

عزيزى سامح أنا بأحب موقع ال:

http://www.mapquest.com

للخرائط

الف الف شكر يااستاذ عبدالله على ردك الكريم. كلك ذوق واخلاق. واسف على التاخير في الرد لكن الانتر نت مكانش مظبط اليمين اللي فاتو دول وماكنتش عارف ادخل المنتدى. تحياتي. ولواني نفسي تكملنا انطباعاتك اكتر. وياترى انت ناوي تستقر نهائي هناك امتي؟ ولية ماقررتش تستقر على طول وفضلت تعمل لاندنج وترجع؟

[Nassarlink]

شكرا جزيلا يا استاذ عبدالله

الحلقات كانت ممتعه جدا ومفيده جدا

وربنا يوفقك انشاء الله في الاستقرار بكندا

[abdelallah]

شكرا لك و أتمنى للجميع التوفيق.

شكرا جزيلا يا استاذ عبدالله

الحلقات كانت ممتعه جدا ومفيده جدا

وربنا يوفقك انشاء الله في الاستقرار بكندا

[AmgadGamal]

و أنا أتصفح الموقع وجدت هذا الموضوع الجميل.. و لم يأخذ حظه مثل مواضيع أخرى مفيدة ... أرجو أن يفيد الجميع

[safar]

الف الف شكر يااستاذ عبدالله على ردك الكريم. كلك ذوق واخلاق. واسف على التاخير في الرد لكن الانتر نت مكانش مظبط اليمين اللي فاتو دول وماكنتش عارف ادخل المنتدى. تحياتي. ولواني نفسي تكملنا انطباعاتك اكتر. وياترى انت ناوي تستقر نهائي هناك امتي؟ ولية ماقررتش تستقر على طول وفضلت تعمل لاندنج وترجع؟

نتمنى من الأخ عبدالله الإجابة على أسئلة الأخ سامح مثل لماذا لاندنج ورجوع وليس استقرار؟

مع تحياتي

تم تعديل 5 أبريل 2009 بواسطة safar

[abdelallah]

السلام عليكم

شكرا على السؤال .. الحقيقة الرحلة دى كانت "رحلة إستكشافية" أخلص فيها إجراءات اللاندنج و أشوف حال البلد ... أنا دلوقتى بأدور على فرصة عمل و أول ما أجدها إن شاء الله سأنهى إرتباطاتى و أسافر فورا .. و السبب الأخر هو مدارس الأولاد اللى حتخلص على شهر يونيو إن شاء الله.

تحياتى.

[mohajer in Process]

الأخ عبدالله،

أولا ألف مبروك على اللاندينج وحمدلله على سلامتكم والعائلة الكريمة.

بحكم تجربتكم الواقعية أرجو منكم التكرم والردعلى هذا الأستفسار بعد إذن حضرتك:

1- عند طلب الجوازات هل يتم ختم تأشيرة على جواز السفر،أو فقط يكتفون بإصدار خطابات للاندينج دون أختام على جوازات السفر، ،بينما تتم عملية ختم الجوازات بالمطار عند الدخول...(تأشيرة+دخولية).

أرجو التوضيح وشكرا.