البطيخ

[maksoof]

زمان لما كنت فى مصر كنت قبل ماشتري البطيخة أطبل عليها واسمع لو كانت بترن و لا مكتومة. النهاردة رحت أشترى وبحدة و طبلت عليها و صوتها كان مكتوم فسبتها لإنى مش فاكر لو كان الصوت المكتوم بيدل على إنها حلوة و اللا قرعة (وش مكسوف)

ممكن تقولولى يا إخوانى إيه نظام البطيخ؟ هل أروح أشتريها و اللا أطبل على واحدة غيرها؟

[هشام عبد الوهاب]

ممكن تقولولى يا إخوانى إيه نظام البطيخ؟ هل أروح أشتريها و اللا أطبل على واحدة غيرها؟

انا رأيى تطبل على راس البياع لو رنت يبقى البطيخ كله اقرع .

وممكن تطبل على عربية البطيخ لو الزباين رقصت ... اخطف بطيخة واجرى.

[Faro]

الأخ مكسوف

أفضل شراء البطيخ ذو الصوت الرنان الذى يدل على حلاوة البطيخة وهذا يعني قلة الماء بداخلها وليس الحمرة.

[achnaton]

يا اخوانا .. اللى يدى النصيحة يديها صح .. هو صحيح .."مكسوووووووف " يسأل .. لكن برضه نقوله على الطريقة الصح ..

شوف يا ياعزيزى .. أنت تروح عند هريدى بتاع البطيخ .. وتمسك البطيخة بإديك الأثين .. وتحطها على ودنك .. هريدى حا يستغرب .. ويوطى يسمع معاك .. تخطف العمة بتاعته على طول .. إذا كان أقرع يبقى البطيخ بتاعه أقرع .. أرمى البطيخة واجرى .. وطبعا لازم قبلها تلبس جزمة كاوتش .. نساعد على الجرى ..

وجرب ..

[farasha79]

و يا سلام يا maksoof بعد ما تجيبها تسقعها في الثلاجه و تجيب ربع كيلو جبنه بيضه مع العيش الساخن

تنام ماتقومشي

[KWA]

ممكن تقولولى يا إخوانى إيه نظام البطيخ؟ هل أروح أشتريها و اللا أطبل على واحدة غيرها؟

و الله يااخ مكسوف سؤالك رغم بساطته و لكن يعكس مدي تأثير يوسف والي....و سياسته الزراعيه التي زرعت فينا عدم الثقه في البطيخه....و توارثنا من جيل لجيل .....رنه البطيخه....علي العموم انت حر الأن في كندا و حسب معلوماتي ان البطيخ ......حمار (ضع فتحه علي ح ) و حلاوه .....فأتوكل علي الله و انسي حكايه الرنه علي البطيخه ....و اشتريها و بالهناء و الشفاء....و خلي حكايه الرنه دي لما تنزل مصر......

[disappointed]

أنا مش شايف ايه المشكله فى ان الواحد يعرف اذا كانت البطّيخه قرعه وماسخه أم حمراء وحلوه...... وزى المثل الأيرلندى ما بيقول :

If you want to discover,then you must uncover

وبناءا على ماتقدّم فاننى أستحلف السادة المستشارين أن يقولوا لى :

فيه ايه يعنى لو الزبون طلب من البائع أن يقوم بشق البطّيخه للزبون حتى يتبين ما اذا كانت البطّيخه قرعه أم لا(ولم لا يجعل الزبون يذوق منها كمان)؟؟؟ هوّه الزبون ده مش حيدفع فلوس ومن حقّه يشترى شيئ جيّد بهذه الفلوس؟؟؟

لماذا نحن كمصريين دائما بنيجى على نفسنا وعلى حقوقنا وندوس على نفسنا ونرضى بالتغاضى عن حقوقنا؟؟!!

وقاعدين محتارين نكتشف حقيقة البطّيخة ازّاى بالتخبيط عليها بينما شقّة السكّين تحل كل المشكله , واذا طلعت البطّيخه قرعه لمّا يشقّها البائع ايه المشكله لمّا ترفض تشترى حاجه سيّئة؟؟!!!

الغريب فى الموضوع ان بائعى الفاكهه والخضار قاموا بتربية الزبون على انّه مافيش تنقية وكأن التنقية خيانة عظمى أو جريمة فى حق البائع تستوجب رفع قضيّة رد شرف على الزبون حتّى أصبحت النقاوة كحزام التابو ... و..و.. زباين هم عايزين ينقّوا كمان

يا اخوانّا ده فى الخليج مافيش حاجه اسمها بائع يمد ايده يحط لك فى كيس أى حاجه... أنت من تقوم باختيار ماتريد (وهذا ينطبق على كل المستويات من أول السوبر ماركيت السوبر ستور الى محل الفكهانى اللى فى أى شارع جانبى)

ملحوظه : يقال أن آخر زبون مصرى طلب من بائع البطّيخ أن يقوم بشق البطّيخه له كان جزاؤه أن قام البائع بشق بطنه

و....آآآآآه يانى منّك يا مصر...لله فى أمصاره شئون

[عادل أبوزيد]

أنا مش شايف ايه المشكله فى ان الواحد يعرف اذا كانت البطّيخه قرعه وماسخه أم حمراء وحلوه...... وزى المثل الأيرلندى ما بيقول :

If you want to discover,then you must uncover

وبناءا على ماتقدّم فاننى أستحلف السادة المستشارين أن يقولوا لى :

فيه ايه يعنى لو الزبون طلب من البائع أن يقوم بشق البطّيخه للزبون حتى يتبين ما اذا كانت البطّيخه قرعه أم لا(ولم لا يجعل الزبون يذوق منها كمان)؟؟؟ هوّه الزبون ده مش حيدفع فلوس ومن حقّه يشترى شيئ جيّد بهذه الفلوس؟؟؟

سيدى الفاضل الرجل سأل عن شئ معين هو استنتاج جودة البطيخة من "التخبيط عليها " كما كنا نفعل من سنوات طويلة و لعل الأمر كذلك حيث يعيش هو هنا فى مصر فى السنوات الأخيرة عادى ان ان تشترى البطيخ " على الدواق بتشديد الواو " و طبعا كل شئ و له ثمن و احيانا نشترى البطيخ و نتصور انه صفقة من احد بائعى البطيخ الواقفين على اطراف "الأتوستراد" و تكون النتيجة صفقة و لكن " ل بط و اوز أم أحمد زوجة البواب "

هل يمكتك فى الخليج شراء بطيخة كاملة "حمار و حلاوة على السكين ؟؟؟"

[ragab2]

فتح

البطيخة عند هريدى بتاع البطيخ مشكلة وخاصة أن سكينة بائع البطيخ ملوثة ومش نضيفة

وأتبع

طريقة فى خداع بتاع البطيخ بأن أخبره أن يختار واحدة ع. السكين والدواء وبعد ما يغلب نفسه فى اختيار بطيخة جميلة ووزنها أطلب منه عدم فتحها وآخذها مقفولة وبذا أضمن حسن الاختيار

وربنا ياسمحنى اذا كنت باستعمل معاه شوية مكر

[maksoof]

أولا شكرا للأخ فارو للرد على سؤالى. اللى حصل إنى رجعت للمحل و رحت عند البطيخ فلقيت واحدة صينية بتطبل على بطيخة فسالتها و أكدت كلامك: لو تسمع لها صدي تبقى البطيخة حلوة.

المهم وقفنا إحنا الإتنين نطبل على البطيخ و الناس إتلمت حوالينا و معاهم موظفين و موظفات المحل و سألونا على اللى بنعمله و شرحنالهم الموضوع و بدؤا يطبلوا معانا و الظاهر إنهم إشتروا بطيخ كتير لإن مديرة المحل شكرتنا.

ألأخت فراشة: الجبنة البيضة جاهزة بس كنت أفضل لو كانت مصرى لكن للأسف كل اللى موجود هنا يونانى و دانماركى. (العيش باعمله فى البيت).

أما بخصوص هريدى: إشتريت التذكرة لمصر و حاتوقع من أخونا أخناتون و أخونا رجب إنهم يستنونى فى المطار عشان يودونى عنده.

الإخوة KWA و Disappointed و عادل: العملية مش محتاجة إني أطلب من البياع إنه يقطع لى البطيخة لإني لازم أدور علي موظف من المحل بس المديرة قالت لى لو إشتريت البطيخة و ماعجبتكش حنديلك واحدة غيرها أو نرجع لك فلوسك. و ده بيفكرنى بموقف حصل من كام سنة لما إشتريت لحمة مفرومة من عندهم و لما مراتى كانت عايزة تعمل Hamburgers ريحة اللحمة ما عجبتهاش فرمتها. المرة اللي بعدها لما رحت أشتري لحمة سألت الراجل اللى بيشتغل فى قسم اللحوم لو كانت كويسة و قلت له إن اللحمة اللي إشتريتها آخر مرة رميتها فى الزبالة فسألنى عايز قد إيه قلت له 8 باوند فإداهم لى ببلاش بالرغم إنى قلت له إنى رميت باوند واحد.

فلما تيجوا كندا إشتروا حاجتكم من Safeway .

[optimistic]

وممكن تطبل على عربية البطيخ لو الزباين رقصت ... اخطف بطيخة واجرى

ملعوووووووووووووووووبة

[هشام عبد الوهاب]

المهم وقفنا إحنا الإتنين نطبل على البطيخ و الناس إتلمت حوالينا و معاهم موظفين و موظفات المحل و.

معلش يا استاذ مكسوف ماقدرتش امسك نفسى وماكتبهاش .

(وش واحد ميت م الضحك على الموقف ومتخليه بجد)

[maksoof]

المهم وقفنا إحنا الإتنين نطبل على البطيخ و الناس إتلمت حوالينا و معاهم موظفين و موظفات المحل و.

مكسوف: واحد بقاله 10 دقائق بيضحك لغاية ما وقع من على الكرسى وقام تانى و لسه بيضحك و الظاهر إنه حيفضل يضحك لمدة نص ساعة على الأقل

[disappointed]

هل يمكتك فى الخليج شراء بطيخة كاملة "حمار و حلاوة على السكين ؟؟؟"

ده هوّه ده الطبيعى والله يا أستاذ عادل

سوق البطّيخ ينقسم هنا الى قسمين :

القسم الأول وده من الباعة الذين يعرضون البطّيخ فى عربات نصف نقل او نقل خفيف على الطرق السريعه أو فى حلقات وأسواق الخضار والفاكهه... وهؤلاء يبيعون البطّيخ بالواحده (او بالحبّه كما يقولون) وليس بالوزن...يعنى يقول لك البطّيخه بكذا (سعر موحّد)... وهؤلاء نظامهم العادى أن يقوم باختيار البطّيخه لك ثم يقوم بشقّها بالسكّين دون أن تطلب منه ذلك (وقد يسألك عن المكان الذى تريد ان يقوم بشق البطّيخه منه) , ثم يقوم بقطع طرف من الجزء المشقوق ومناولته لك على طرف السكّين لتتذوّقه وتتأكّد أن طعم البطّيخه عاجبك , وعندما تومئ له بعلامة "الأوكى" يقوم بوضع الجزء المشقوق فى داخل البطيخه مره أخرى ثم يتناول لفّة بلاستر شفّاف موضوعه على منضدة البيع ليقوم بقفل الجزء المشقوق من الخارج بالبلاستر تجنّبا لسيلان مياه البطّيخه فى سيّارتك أثناء ذهابك لمنزلك

(أنا عن نفسى ساعات لمّا بأذوق البطّيخه وأحس ان طعمها مش حلو قوى بأتكسف من انّى أرفض أشتريها أو انى أردّها للبائع وبأخذها وأقول مش مشكله أبقى أرش عليها شويّة سكّر عند تقطيعها او أبقى أعملها عصير ...ولكنى رأيت فى أكثر من مناسبه زبائن يرفضون شراء البطّيخه بعد تذوّقها , وآخر مرّه صادفت أحد الزبائن الذى قام بتذوّق ثلاثة بطّيخات لم تعجبه أى منهم , ثم انصرف متوجّها لبائع آخر , وانتظرت رد فعل حانق من بائع البطّيخ ولكن المفاجئة كانت ان رد فعله عادىىى جددددا , بل كان خجلانا وأخذ يتمتم بما معناه أن البطّيخ هذا الموسم مش حلو قوى بصورة عامّه)

القسم الثانى: فى السوبر ماركتات الكبيره والسوبر ستورز , وهذه تبيع البطّيخ امّا بالوزن أو بالواحده بسعر معيّن , وعندما تطلب شق البطيخه يتم لك ذلك , وفى العامين الماضيين لجأت بعض السوبر ماركتات الكبيره الى فكره ظريفه جدّا , وهى تقطيع البطّيخ الى شرائح وتغليفها بالنايلون فى أطباف شيك من البلاستيك او الفلّين توضع فى ثلاّجات العرض الكبيره (وبأوزان مختلفه كل منها ملصوق عليه تيكيت بالوزن وسعر الكيلو وسعر الشرائح الموضوعه بالطبق حسب وزنها)

وبالمناسبه :

أحلى تعليق سمعته فى موضوع البطّيخ ده كان من زوجة أحد أصدقائى (وهو استشارى جهاز هضمى) عندما تقابلت الأسرتين بالصدفه فى سوبر ستور أثناء التبضّع وتسوّق مستلزمات الشهر فقمنا بالتسوّق سويّا حتّى يونّس الأطفال بعضهم , وعندما ذهبنا لقسم الفاكهة والخضار وأثناء مرورنا بمكان وضع البطّيخ , وعندما هم صديقى بشراء بطّيخه وأخذ ينظر لها نظرة خارجيّه فاحصه , اذا بزوجته تقول له :

"اوعى تكون عايز تعمل ليها "منظار" دى كمان"

[Faro]

أولا شكرا للأخ فارو للرد على سؤالى. اللى حصل إنى رجعت للمحل و رحت عند البطيخ فلقيت واحدة صينية بتطبل على بطيخة فسالتها و أكدت كلامك: لو تسمع لها صدي تبقى البطيخة حلوة.

هناك طريقة أسهل وهي إستخدام الشوكة الرنانة فربما تعطي نتيجة أسرع و أدق.

[disappointed]

بس المديرة قالت لى لو إشتريت البطيخة و ماعجبتكش حنديلك واحدة غيرها أو نرجع لك فلوسك. و ده بيفكرنى بموقف حصل من كام سنة لما إشتريت لحمة مفرومة من عندهم و لما مراتى كانت عايزة تعمل Hamburgers  ريحة اللحمة ما عجبتهاش فرمتها. المرة اللي بعدها لما رحت أشتري لحمة سألت الراجل اللى بيشتغل فى قسم اللحوم لو كانت كويسة و قلت له إن اللحمة اللي إشتريتها آخر مرة رميتها فى الزبالة فسألنى عايز قد إيه قلت له 8 باوند فإداهم لى ببلاش بالرغم إنى قلت له إنى رميت باوند واحد.

وهذا هو مفهوم احترام المستهلك والذى لا تصل اليه الأمم الاّ بعد المرحلة الأساسيّة وهى احترام الفرد واحترام حقوقه وآدميّته

يعنى مفهوم "خدمة ما بعد البيع" الذى نفتقر اليه فى مصر وصل فى تلك المجتمعات الى البطّيخ واللحمه المفرومه بينما نفتقده نحن فى القطاعات الخدميّه وفى سوق الأجهزة الكهربائيّه..الخ الخ الخ والتى تحتاج بالأساس الى خدمة ما بعد البيع...وأذكر أننى كنت فى أجازة بمصر فى 1999 وأثناء مطالعتى للداتا بانك الخاص بى اكتشفت أن هذا اليوم يصادف عيد ميلاد احدى الممرّضات الفلبّينيّات التى تعمل معى , فقمت بعمل ورقة معايدة ظريفه بالباور بوينت على الكمبيوتر , وتوجّهت بالورقة الى سنترال ألماظه (لاحظ معى أنه أحد أكبر سنترالات القاهره) لارسال فاكس لها بمناسبة عيد ميلادها , واذا بالموظّف يطلب منّى سداد عشرة جنيهات كرسوم مبدئيّه دفعتها وأنا غير مقتنع بالتحصيل المسبق لقيمة مادّيه ثابته لخدمة متغيّرة القيمة نظرا لاحتساب قيمة الفاكس بالزمن الذى يستلزمه ارساله كأى مكالمة تليفون , ما علينا......خرجت الورقة من جهاز الفاكس ومعها الــ" كونفيرميشن سليب" وعليه رمز غريب هو خليط من أرقام وحروف , وعندما سألت الموظّف عن معنى الرمز قال لى أن معناه أن الفاكس قد تم استقباله على الجهة الأخرى.....وانصرفت

فيييين وفيييين وقبل مغادرتى القاهرة بأيّام كنت فى سنترال آخر بالكوربه فأحضرت الــ"كونفيرميشن سليب" من السيّاره وسألت الموظّف عن معنى ذلك الرمز فكانت المفاجئه أن الرمز معناه أن هناك خلل فى الاتصال ولم يتم ارسال الفاكس من أساسه

لماذا حدث ذلك الموقف لى ؟؟؟ لأنه لا يوجد احترام للمستهلك , وهى احدى تبعيّات عدم احترام قيمة الفرد بصورة عامّه فى مجتمعاتنا

ملحوظه : مش عارف ليه تخيّلت الشخصيّه المصريّه الفهلويّه تطلب الحصول على ضمان مختوم للبطّيخه من مديرة سوبر ماركت عندما قالت له :" لو إشتريت البطيخة و ماعجبتكش حنديلك واحدة غيرها أو نرجع لك فلوسك" رغم أنه تعوّد فى مصر أن يشترى البطّيخه على المتغمّض وبأسلوب بختك يا أبو بخيت

ولو البطّيخه طلعت حلوه يا أستاذ مكسوف مش حأوصيك بقى ترسل "شقّه" منها فى صندوق بريدى الوارد (فى رساله خاصّه الله يخلّيك أحسن الناس بقت عينيها وحشه)

[disappointed]

أولا شكرا للأخ فارو للرد على سؤالى. اللى حصل إنى رجعت للمحل و رحت عند البطيخ فلقيت واحدة صينية بتطبل على بطيخة فسالتها و أكدت كلامك: لو تسمع لها صدي تبقى البطيخة حلوة.

هناك طريقة أسهل وهي إستخدام الشوكة الرنانة فربما تعطي نتيجة أسرع و أدق.

آهى دى بقى عايزه يكون اللى بيشترى البطّيخه دكتور أنف وأذن ويكون لسّه خارج من عيادته وشايل شنطة "العدّه" معاه...أو يبعثوا له البطّيخ فى العياده يكشف عليه

[disappointed]

و ده بيفكرنى بموقف حصل من كام سنة لما إشتريت لحمة مفرومة من عندهم و لما مراتى كانت عايزة تعمل Hamburgers  ريحة اللحمة ما عجبتهاش فرمتها

الجمله دى عملت لى Mental block لمدة دقيقه تقريبا لأنى ما كنتش واخد بالى انك قصدك تقول فـــ...رمتها وكنتك فاكرك بتقول فرمتها , وقعدت أقول لنفسى : طيّب ياربّى هيّه مدام الأستاذ مكسوف فرمتها ليه تانى اذا كانت هيّه لحمه مفرومه من الأساس؟؟!!!

وش واحد مخّه ما كانش معاه ساعة ما قرأ الجمله.... السن له أحكامه بقى