مــاذا فعــل النظــام المصــرى بالمواطنيــن...؟! شـئ مؤســـف

[زهرة الالم]

تأثير النظام المصري على المواطنين

سبحان الله , كنت جالسا أمام سراي 6 بالمعرض في الحديقة المقابلة له , فجاء رجل ( لا أعرفه ) إلى في الخمسينات من عمره على ما أعتقد ,مبتسما , يلبس جلبابا , وتبدو عليه أثار الفقر والطيبة والبؤس وقال لي:

السلام عليكم ممكن أقعد يا بني ,

طبعا أفسحت له وقلت له: وعليكم السلام ورحمة الله وبركاته , اتفضل يا حج

جلس بجانبي وكنت أقرأ في كتاب اشتريته من مركز التنوير لدراسة المذاهب والملل بالمعرض والذي يديره الكاتب الصحفي الإسلامي أبو اسلام أحمد عبد الله بعنوان 150 سؤال من أهل المسيحية للإسلام تأليف مجموعة من العلماء مثل د علي جمعة مفتي الجمهورية والإشراف للدكتور محمود زقزوق وزير الأوقاف

فقال لي ( الرجل )

ما هذا الكتاب

فأريته الكتاب فجعل يتصفح الكتاب ,

فسألني من أين اشتريته فأجبته

فقال لي: وهل فعلا يرد على النصارى؟ , قلت له: نعم, وأِشدت بالمؤلفين

فصمت قليلا, فأكملت القراءة في الكتاب

فجأة قال لي : سبحان الله ربنا لايرتضي لعباده الضلال سيدنا عيسى هينزل في آخر الزمان وهيقوللهم ايه اللي انته بتعملوه ده وطبعا عدد كبير منهم هيسلم

قلت له : ان شاء الله وربنا قال في كتابه (( ولا يرضى لعباده الكفر ))

فأكمل قائلا : وطبعا لا رضى لهم الظلم

قلت له : أكيد طبعا

فقال لي سيدنا محمد راجل عظيم ومحارب من النصارى في حياته ومماته

قلت له طبعا وده يدل على عظمة النبي صلى الله عليه وسلم

قال آه طبعا ثم استطرد قائلا تعرف يا بني أكترناس تخاف منهم المنافقين

قلت له : أيوة طبعا قولت فى نفسى : (( ايه الرغي ده يا ربي ))

قلت في نفسي يبدو ان الراجل دهو تبع جماعة التبليغ والدعوة وجاي يحكي معايا وكالعادة في الآخر هيدعوني للإنضمام معهم

قال تعرف ان الكون كله مخلوق عشان النبي عليه الصلاة والسلام

فسكت وقلت في نفسي يبدو ان الراجل ده صوفي وجاي يناظرني لما شايف اني منظري سني

قاللي ايه الكتب اللي عجبتك في المعرض قلت له كتير بس أحسن كتاب أثر في من قبل ما أقراه كتاب لا تحزن للدكتور عائض القرني تاني حاجة مؤلفات أبو اسلام أحمد عبد الله , لكن أنا جيت المعرض عشان أشتري كتب طبية

قال : آه هو حضرتك خريج ايه

قلت له : أنا طالب في بكالريوس أسنان

قال : ما شاء الله

ثم قال لي بعض المصطلحات التي تخص طب الأسنان لدرجة أني حسبته طبيب أسنان فسألته : هو حضرتك طبيب أسنان

قال : لأ ولكن أن بحب أقرا في المواضيع الطبية كتير وبحب الترجمه

( أصابني الريب من هذا الرجل مرة أفتكرة تبليغ ودعوة ومرة صوفي ومرة يقوللي انه بيحب الترجمة وبيرغي معايا كتير وكأنه عارفني , عايز مني ايه ده ؟ )

قال : قاللي تعرف ابه المهلكات السبع؟

قلت له السبع الموبقات

قال لي لأ المهلكات

قلت له لا والله معنديش علم بيها

قال : مممممممممممممممم

رجع الشك بتاع انه صوفي وجاي يتناقش معايا

قال لي تعرف يا بني ان اللي يعين ظالم يبقى كقر

قلت في نفسي : يا حلاوة ده شكله تكفيري وجاي عشمان اني أشارك معاه في حاجة

قال : تعرف الحديث اللي قال فيه النبي صلى الله عليه وسلم

( من أعان ظالما فقد خرج من الإسلام )

قلت لا والله يا حج مسمعتهوش قبل كدة

قاللي تعرف الحديث بتاع من رأى منكم منكرا؟

قلت : أيوة

قال : شفت لما قال فبقلبه وذلك أضعف الإيمان

قلت آه

قال ايه بقة اللي بعد أضعف الإيمان

قلت له : أكيد اسلام وبعدها كفر

راح مسك في كلمة كفر

قال لي شفت أديك انت قلتها بنفسك

( قلت في نفسي ياعم أنا قلت ايه وانت عامل زي بتوع أمن الدولة ميصدقوا يمسكوا كلمة - طبعا مش كلهم - )

قال : يعني اللي بيساعده حسني مبارك على ظلمه زي بتوع أمن الدولة دول تقول عليهم ايه ؟

قلت له : يا حج ده شغلهم وبعدين مش عايزين نخوض في الأمور دي لأننا مش فاهمين حاجة

قال لي : تعرف ان مصر دي متواطئة مع أمريكا من أيام الثورة وهي أس البلاء ؟

قلت له : حضرتك بتتبع اي فكر سياسي ( عشان أعرف أنا بكلم مين )

قال لي : أنا مش بتيع أي حاجة

جاء رجل وألقى علينا السلام وقال أنا من المعرض ونحب نعرف رأيكم في المعرض اداني استمارة فكتبت فيها اللي عجبني واللي معجبنيش

ولما اعطى لصاحبنا رفض يعلق وقال له : أنا مش من البلد دي فقال له صاحب الإستمارات : طيب كويس واحنا نحب نعرف رأي الغير مصريين في المهرجان قال له: معلش اعفيني فتركنا وغاب

أكمل الرجل وقال تعرف يا بني أهو ده أمن دولة؟

نظرت له باستغراب , وقلت في نفسي ايه الراجل المحير ده

قال لي يا بني مصر اللي بتساعد أمريكا في كل حاجة ؟

قلت له : ماهو باين فعلا وآدي أمريكا منعت عننا نص المعونة

قال : وانت بتصدق الكلام ده دي مسرحية عشان يضللوا بها اللي زيك ؟

ثم قال : انت تعرف ان نصر أكتوبر مزيف؟

قلت له مستغربا : نعم !!!!!!!!! مزيف

قال لي : تفسر بإيه ان سوريا انهزمت واحنا اللي غلبنا اسرائيل , مع اننا منقدرش عليها ؟

قلت له : ازاي يا حج دا احنا .................

قال مقاطعا زي ما بقوللك

جاء الينا شاب وسألني عن الصالات التي فيها منتجات كمبيوتر وأثناء كلامه حرك يده إلى الأرض

قلت له: الله أعلم

قال صاحبنا : تعرف أهو ده أمن الدولة وبيقوللي انك هيتقبض عليك ؟

ضحكت وقلت له وحضرتك عرفت منين؟

قال : أنا الوحيد اللي فاهم أمن الدولة

ثم أكمل وقال: المهم, عمنا جمال عبد الناصر كان موالي لامريكا وعشان كدة طلعوا انجلترا لما أمريكا كان موافقاهم هي بريطانيا يابني ما كانت تقدر تشوط عبد الناصر وأعوانه وهي كانت قوة عظمى

قلت له : يمكن

قال لي وبعد كدة العدوان الثلاثي اياك كانت مصر هتقدر على دول لولا أمريكا

قلت له متهكما : طب ده كدة مفيش أحلى من أمريكا

قال لي طب تعرف : انهم هاجموا عبد الناصر لما ا تجه الإتجاه الشيوعي

وعشان كده كانوا راضيين عن السادات لما عرض عليهم انه يواليهم تاني بس لما يساعدوه في مسرحية اكتوبر

قلت : يارااااااااجل

قال لي : أومال انت مفكر ايه ؟

ثم أكمل , وبعد كده راح السادات يطلب من الخليجيين العرب المساعده عشان الحرب , ففتحوا له خزائنهم وخاصة الملك فيصل , وشاه ايران وصدام حسين , وسوريا قالت انها هتشارك معاه

راح البيه مبلغ أمريكا واسرائيل كانت عارفة طبعا فراحوا خلوه يهزم اسرائيل وغلبت اسرائيل سوريا

قلت له : وهي اسرائيل ضحت بجنوده اللي اتقتلوا في الحرب عشان مسرحية

قال لي : يا حبيبي دول عصابة

ثم قال : وبدأ مشوار انتقام أمريكا واسرائيل من اللي بيعادوها

قلت له : ازاي ؟

قال : بدأت بشاه ايران حرضت عليه الخميني اللي كان في فرنسا وخلتهم يعملوا ثورة عليه وقلبت عليه نظام الحكم

قلت له : والسادات استضافه في مصر ودافع عنه ورد له الجميل

مين قال لك كدة , الكلام ده في أيام السادات ( يقصد الفيلم ) , لكن مرض الشاه وحجزوه في المستشفى وقتلوه المصريين في المستشفى

قلت له : وحضرتك ايه الدلائل على الكلام ده ؟

قال للي مفيش حاجة اسمها دلائل يبني دي حقائق

ثم قال : اتلموا بقة على الملك فيصل وحرضوا عليه ابن أخوه وقتله

قال لي : وبدأوا مع صدام اللعبة القذرة . حرضوه على الحرب ضد ايران وساعدوه ومولوه بكل حاجة واستمرت الحرب 8 سنين

وبعد كدة حرضوه على الكويت والبترول , وساعدوه وبكدة لقت أمريكا ذريعة بالدخول للمنطقة وعملت القواعد بتاعتها وحاصرت العراق إلى أن انتهى المطاف بالحرب واعدام صدام وطبعا ساعتها صدام لم يلق دعم من الخليجيين و لا ايران ومصر طبعا هي اللي دخلت الأمريكان من قناة السويس في الدولة العربية الوحيدة التي شاركت في الحرب ضد العراق

قلت له وسوريا

قال أديك شايف ايه اللي حاصل لسوريا من أمريكا واسرائيل

ثم قال: يا بني وكل اللي عامل الكلام ده أمن الدولة

جلست مستغربا وشبكت أصابعي فقال وهذه اشارة منك لبتوع أمن الدولة عشان يقبضوا علي , أنا عارف الشعب ده كله أمن الدولة إلا أنا

وفجأة قام من مكانه وقال ايه ده الراجل ده بيدهن الحديد ايه ده وجعل يصفق ويزغرد

:lol: :) ;) :D

فضحكت وقلت قالوا المجانين في نعيم ,

ولكن هنا في مصر في بؤس وشقاء عقيم مع حكومتنا الرشيدة

حتى المرضى النفسيين ألفوا قصصا من أدمغتهم ليواجهوا بها الحكومة المصرية , أذكر أني سمعت حوار بين شابين , عند بداية حكومة نظيف فقال أحدهم شفت مين اللي هيمسك رئيس الوزراء

قال الثاني : مين ؟

قال الأول : واحد اسمه أحمد نظيف

قال الثاني : ايه أكيد دهو اللي هينظف مصر فعلا وضحكا الإثنان

فعلا حكومتنا الرشيدة نظفت كل أنحاء الجمهورية من الفقر , بالتضييق على الفقراء في حياتهم المعيشية فليس أمامهم إلا أن يرحلوا عنا أو يرحلوا عنا

هذا الحل الأمثل لكل فقير مصري , ليذهب عن نفسه خطر الجوع والمرض , الناتج عن غلاء الأسعار غلاءا فاحشا , في كل شيء الأسعار نار هائجة . اللهم يا رب الفقراء ساعد الفقراء فيما يلاقون من ويلات الحكومة الرشيدة يارب العالمين

اما عن الحوار السابق الذي دار بيني وبين الرجل , فأنا لا أدر كيف تكون هذه التمثيلية أو المسرحية يؤلفها واحد من المرضى النفسيين بهذه العبقرية ,

فلولا فعلته الأخيرة

(( عندما زغـــرد وصفـــق )) :

لكنت صدقته في نقاط كثيرة ذكرها لي .

وفي النهاية لا أملك إلا أن أقول

(( حسبي الله ونعم الوكيل ))

من دهشتى نقلتة لكم

تم تعديل 4 فبراير 2009 بواسطة زهرة الالم

[زهرة الالم]

حقا انا اندهشت لتلك االقصة وحقيقى تبقى مصيبة لو صدقت ؟؟؟؟؟

صدق من قال خدوا الحكمة من أفواه المجانيين