إستفسار عن الدراسه والعمل فى اوروبا باوراق رسميه

[غريب الزمان]

السلام عليكم ورحمة الله

فى البدايه اشكر كل اعضاء المنتدى وكل فرد صادق ساعدنى سابقا

واعلم انكم شعله لن تنطفىء.

نشر موضوع فى احد المواقع وهو يتدث عن الدراسه والعمل فى اوروبا باوراق رسميه

ارجو من كل من لديه خبره المشاركه لانه من الممكن ان يضيع مستقبل الكثيرين

وانا اعلم ان جميع الاعضاء سيهتمون لانهم يعتبرون كل شاب مصر اخ او ابن او صديق

نص الموضوع

في جمعية اسمها بسمة المستقبل بتقدّم خدمة للشباب اللي عاوز يكمّل دراسته برَّه سواء بعد الثانوية أو بعد الكلية في إحدى جامعات أوروبا..

وفي نفس الجامعة دي بتوفَّرله شُغل إما في مطاعم أو رعاية كبار سن ومتوسط دخل الفرد في أوروبافي الساعه الواحدة 15 يورو يفرق عن هنا فرق شاااااااااااااااااااااااسع..

بس الجامعة بتسمح للشخص ب5 ساعات يومياً شُغل بس في 5 أيام,يعني إجمالي 100 ساعة في الشهر..والإقامة والشغل الجامعة هيا اللي بتوفرهم.

كل المطلوب هوا 30 ألف جنيه عشان تتدفع للجامعة مصاريف أول سنة اللي لو الدارس سقطها بيكون ليه سنة كمان بنفس المواصفات اللي فوق,يعني طول السنتين دول 30 ألف مش هيتدفع عليهم مليم شاملة الإقامة والعمل إلا تذكرة الطيارة أو السفينة بس.

فالـ 30 ألف اللي هيتدفعوا هيتردوا في مفيش شهرين تلاته بالكتير أوي والباقي صافي ربح للي هيسافر.

الإقامة قانونية 100% بفيزا تعليمية مُرسلة من الجامعة,والسفر نفسه شرعي 100% سواء طيران أو عن طريق البحر والقانون بيغطي كل شيء في السفرية دي عكس السفريات اللي بنشوفها والشباب تموت في الطريق وهناك يعيشوا مُطاردين وحاجات مهزلة بجد.

آخر معاد لدفع الفلوس هوا 15-2 مع كافة الضمانات عليه عشان يتبعتوا للجامعة وتلحق تبعت الفيزا قبل معاد بدأ الدراسة في نص شهر 4

فاللي جاد فعلاً ياريت يستفسر زي ماهوا حابب عشان آخر موعد للدفع فاضل عليه 15 يوم بالظبط وللأسف بعد كاد يستنى بقى للدفعة بتاعة شهر أكتوبر.

وربنا يوفق الجميع إذا مكانش هيسافر للمنحة التعليمية مع الشغل فممكن يكون غرضه الشغل بس وميروحش الجامعة ولا غيره لكنه متحجم بـ100 ساعة شهرياً.

__________________

انا كلمت صاحب الاعلان وحاولت افهم وافكر بس ملاقتش غيركم افكر معاه لان كل الشباب الى عرف الموضوع موافق وهيدفع

ولما كلمته وصلنى بواحد اسمه دكتور اسامه وقالى انه رئيس تحرير مجلة حديث المدينه هل فى حد من حضراتكم يعرفه؟؟ لانى معرفش المجله ولا اعرفه

والمصاريف الى هتدفع للجامعه فى اول سنه 5000 يورو طبعا غير السكن والاكل والتذاكر والمهم المبلغ الى هيتدفع للجامعه لانه هيتدفع فى الاول وهيروحلهم قلتله امتى قالى بعد ما تقدم ورقك ويوافقوا على الطلب

وطلب منى اترجم الشهاده والباسبور فقط

قلتله والضمان المالى ؟؟؟ مش لازم كشف حساب

قالى لا الفيزا هتكون دراسه وعمل فمش مطلوب ضمان مالى

يا ريت حضرتكم تعرفونا الكلام ده فيه نسبه كام من الصح؟

ولو حد هيدخل الموضوع ده يتاكد ازاى وياخد احتياطه ازاى

لان فيه لا يقل عن 100 شاب موافقين على الفكره وهى هتكلف اقل حاجه 50 الف مصرى يعنى مستقبله ومستقبل عيلته كمان لان الشاب فى مصر بيشتغل 10 سنين مبيحوش 10000 على بعض وانتم عارفين

تم تعديل 4 فبراير 2009 بواسطة عصام شوقى
تغيير عنوان الموضوع بما يعبر عن مضمونه

[Torontotruk]

لو تعرفلي اسم رئيس تحرير مجلة حديث المدينة ان شاء الله حجيبلك الرد السليم ...

[Torontotruk]

اسمه بالكامل...ودكتور في ايه بالظبط..

[غريب الزمان]

شكرا على ردك واهتمام استاذ Torontotruk

اسمه اسامه كرم وده الى عرفته منه لما كلمته كان الوقت ضيق

ومهتمتش باسمه كامل لانى كنت عاوز افهم تفاصيل الموضوع

بس هكلمه تانى واعرف اسمه

لانى مش هدخل الا لما اخد اراء حضرتكم لانى واثق فيكم

واتمنى من الكل يشارك لانه مش موضوع شحصى ده موضوع لو نصب هيضر الكل

[blbl]

لازم تعرف دول اية وجامعات اية. كتير من جامعات اوربا الكبيرة بترفض الاعترف بشهادات مصر. يعني في نفس الدولة تلاقي جامعة تقولك اوكي وجامعة لا. ثانيا مش كل دول اوربا ومدنها الشغل سهل اوي كده. يعني في لندن ولا جنيف ولا بالريس الطلابة بتلاقي شغل زي كنس الشوارع ونضافة المولز وساعات تلاقي كنز يعني تقطع بصل ولا تغسل مواعين ولا تصور ورق (انا بكلم بجد). للاسف بعض المدن مثل هذه الاشغال قليلة وصعب تلاقيها.

وماذا عن اللغة. معظم الجامعات بتدرس بلغة البلد يعني الماني ولا فرتسي كده يعني. انا معرفش اه شروطهم.

بصراحة الموضوع شكلة نصبة. طيب متقدم انت مباشرة للجامعة. هو ميقدرش يعمل اي حاجة زيادة غير انه يقدم الورق للجامعة ويستني الرد. طيب متقدم انت?

[jundi]

نصابين أكيد

[Bassam El Sayed]

صحيح على راى الاخ blbl

ما تقدم انت للجامعة مباشرة هو اصلا لايملك الا انة يقدم لك الورق وخلاص ما يقدرش يتدخل فى قرار الجامعة بالقبول او الرفض.

شوف جامعات فى اوروبا ومش بس اوروبا بس عندك امريكا وكندا لية لا.

[Folana]

السلام عليكم ورحمة الله....

أخى الكريم غريب الزمان.....يرجى الاطلاع على هذا الموضوع أولا....قبل الاقدام على اى خطوة

http://www.egyptiantalks.org/invb/index.php?showtopic=68636

وهذا موقع جريدة "حديث المدينة"...ومنه تستطيع الوصول الى ارقام تليفونات الجريدة والاستفسار عن صحة الاعلان

حديث المدينة

والله الموفق......

[عماد حمدي]

انا اتعرض عليا السنه اللي فاتت أدرس في روسيا وكان التقديم علي الجماعه نفسه من خلال موقعهم الاكتروني والناس بصراحه بترد مش بطنش سواء بالموافقه او الرفض بس موضوع الشغل دا بصراجه مش واثق فيه .. حاول تعرف منه اساماء الجامعات دي اهم حاجه وخش علي النت اعمل سيرش وهات موقعهم انته وقدم ورقك او ابعته فاكس دا أضمن حاجه ولعل وعسي تقبل وتوفر فلوس الوسيط او علي الاقل تقل شويه

[غريب الزمان]

شكرا للاساتذه EMAD HAMDY , Folana blbl, Bassam El Sayed , jundi

الراجل اتكلم معايا على اسبانيا وسئلته على اللغه بتاعة الدراسه قالى اسبانى قلتله انا انجليزى وشوية ايطالى صغيرين ده الى اعرفه

قالى الجامعه بتدى 6 شهور دراسة لغه وديه سياسة البلد علشان ينشروا اللغه وكده

والجامعات الى قالى عنها

جامعة غرناطة,جامعة ألميريا,جامعة كاديز,جامعة هويلفا,جامعة سيفيل,

وقال الضمان للفلوس هتسلم ايصال استلام ولو عاوز تجيب محامى يضمن الفلوس باى ورق هاته

وبالنسبه لاسمه كامل انا بعتله ومستنى رده

بس الراجل عطانى عنوان الجمعيه ورقم تليفونه المحمول اول مره كلمته

وبالنسبه للشغل ونوعيته مبقتش تفرق مع اى شاب لانى حضرتك شغال مهندس والمهندس رايح جاى عارف بشتغل كام ساعه؟ مش اقل من 14 ساعه ولا ابالغ من الفجر لغاية المغرب واوقات العشا كمان وده غير الظروف المعيشيه القذره والى متضطر استحملها لانى فى الصحرا غرقه لا تصلح للمعيشه واكل لا يصلح انه يكون اكل وعلشان اكمل بضطر اصرف الملاليم الى بخدها على اكل بجيبه انا

انا بتضيع ساعات عمرى والساعه مش بتكمل شلن علشان كده انا واى شاب لو لاقى الشغل بالساعه وتعبه بيلاقى قصاده فلوس والشغل حلال عمرنا ما هنقول لا ايوه هنتعب نفسيا شويه بس هنصبر لانه فيه مقابل

انا هنا بتحبس بالاسابيع فى مكان شغلى كانى مسجون وفى الاخر مبطلعش باى فايده تعرفوا لما بنيجى نسيب شغلنا بيرفضوا يدولنا حتى شهادة خبره؟؟؟؟ يعنى لما بطق واسيب شغلى ارجع ادور على شغل وكانى مشتغلتش قبل كده

يا اساتذه ارجوكم وجهونا

شكرا

تم تعديل 4 فبراير 2009 بواسطة غريب الزمان

[adrianocrespo]

السلام عليكم

و ماهي التخصصات

هل هي دبلومات مثلا ام شهاده بكالريوس ......... او دراسات عليا ؟

و هل هناك مجالات مثا الطب و الصيدله و الهندسه

اصل اسعار الدراسه في الخارج غاليه اوي ؟؟؟؟؟؟

انا شايف اسعار قليله

[غريب الزمان]

لو تعرفلي اسم رئيس تحرير مجلة حديث المدينة ان شاء الله حجيبلك الرد السليم ...

د.أسامه الكرم,حاصل على الدكتوراه في الاقتصاد من جامعة ديربي بوكستون الإنجليزيَّة

[غريب الزمان]

ايه الى حصل يا جماعه يعنى مفيش حد عنده معلومات خلاص؟

[abojim]

بص أنا أعرف إن الدراسة في أوربا ينفع بالطريقة المذكورة في أول الموضوع و بيكون معاها عدد ساعان شغل محددة في الأسبوع عشان تقدر تاكل و تشرب و تسكن

بس ممكن تذكر لي الدراسة اللي المفروض هتسافر عليها؟؟

لأن بصراحة أنا لا أثق في أي وسيط و خاصة إنه مش هيعمل شيء يضيف

الصح إنك تراسل الجامعة بنفسك

[abojim]

و دي لنكات الجامعات الأسبانية اللي انت ذكرتها:

http://www.ual.es/

http://www.uhu.es/

http://www.ugr.es/ugr/index.php

http://www.us.es/

http://www.uca.es/

تم تعديل 8 فبراير 2009 بواسطة abojim

[غريب الزمان]

بص أنا أعرف إن الدراسة في أوربا ينفع بالطريقة المذكورة في أول الموضوع و بيكون معاها عدد ساعان شغل محددة في الأسبوع عشان تقدر تاكل و تشرب و تسكن

بس ممكن تذكر لي الدراسة اللي المفروض هتسافر عليها؟؟

لأن بصراحة أنا لا أثق في أي وسيط و خاصة إنه مش هيعمل شيء يضيف

الصح إنك تراسل الجامعة بنفسك

استاذى الكريم

شكرا على اهتمامك

الدراسه الى هسافر عليها انى اكمل دراستى للعلوم الزراعيه

انا معايا بكالوريوس فى العلوم الزراعيه 2006

وانا كمان لا اثق بالوسطاء

بس هو بيقول ان كل ده فعل خير وانهم جمعيه خيريه وانا مش مقتنع

وكمان بيقول ان الجمعيه ليها علاقات وثيقه بناس بدكاتره داخل الجامعات وهتسهل الشغل والمسكن وكده

انا غرقان فى بلاد العجائب بجد

مصر مبقتش مصر ولا الناس زى ما كانوا الكل بيقول يلا نفسى

يا اساتذه طيب بلاش تردوا على الموضوع

طيب الخطوات السليمه الى اعملها ايه

الشيخوخه قربت يا جماعه عاوز الحق احس انى عايش وليا حقوق زى بقيت البشر فى العالم

[abojim]

الخطوات السليمة إنك تراسل الجامعات بنفسك

و عندك الموقع ده فيه الماجستير في جميع دول أوربا

http://www.mastersportal.eu/

شوف اللي يناسبك و ابدأ راسل

ودور على برنامج يكون بالانجليزي و امتحن التوفل عشان تثبت و انت بتراسل الجامعات انك بتعرف انجليزي

[abojim]

و ده لنك في نفس الموقع اللي فات

فيه كل البرامج اللي ليها علاقة بماجستير في العلوم الزراعية

http://www.mastersportal.eu/students/searc...31e&start=0

[abojim]

ولازم تقديراتك تكون كويسة

يعني جيدجدا و انت طالع

[غريب الزمان]

الاستاذ abojim

جزيل الشكر للاهتمامك

كده لازم اعادل شهادتى علشان اقدر اروح اى دوره من الدورات ديه

اعادلها ازاى وفين؟

ربنا يخليك يا رب

ومتشكر على اهتمامك