مصر 2010 - حلم جميل ام كابوس مفزع؟

[فــيــروز]

اخبرنى احد اقاربى الشباب من فتره قصيره عن سعى مصر للفوز بتنظيم نهائيات كاس العالم 2010 !!

ولا اخفى عليكم سخريتى من الخبر فى بادئ الامر .. الا انى وجدته يقول لى كلاما عجيبا من نوعية :

اسرائيل تقف بالمرصاد لهذه المحاولات المصريه !!

لماذا يا امير؟ -هذا هو اسم قريبى- فيرد امير قائلا لان هذا معناه انه ستكون هناك خطط تنميه شامله فى مصر من اجل هذا الحدث !! وانه اذا كان ولابد ان تنظم الحدث دوله عربيه فلتكن اى دوله غير مصر .. الا انى استبعدت ان يكون هذا الموضوع حقيقى ..

على ان امير لم يفهم سر امتعاضى من ان يكون سبب التنيمه فى مصر فقط هو سعيها لتنظيم كاس العالم

ولا ادرى حقا هل يمكن ان يكون تنظيم بطوله بهذه الضخامه فال حسن و قدم خير لمصر -على اعتبار انها كرة قدم يعنى- ام سيكون عبء كبير لا تتحمله ميزانيتنا المرهقه بالفعل؟ وهل نحن قادرون على تنظيم مثل هذه البطولات؟ ليس فقط على المستوى الرسمى ولكن على المستوى الشعبى و هو الاهم !!

[linux]

رائي فى الموضوع كتبته قبل كده. أنا ضد الفكرة ككل:

http://www.egyptiantalks.org/bforums/viewt...opic.php?t=6997

________________________________________

لينكس البلاموطى لينكس و ولده سبع الليل

مادد رجلية على قد لحاف ناس تانية خالص!

[disappointed]

أولا : موضوع تقدم مصر بطلب لتنظيم كأس العالم هو حركة دعائيه خايبه وحركه مسرحيه هابطه من اتحاد الكوره المفلس والفاشل بتاعناعلى هامش الانتخابات القادمه

ثانيا: الأخ العزيز لينوكس اللى بيتمنى عدم تنظيم مصر لكأس العالم منعا للفضايح قدام خلق الله وحتى لانصبح مثارا للسخريه فأحب أطمئنه ان الفيفا مش منظمة هبلة أو متخلفه عقليا علشان ترمى بأهم بطولاتها فى التهلكه وتضحّى بيها

ثالثا: الجماعه التعبانين بتوع اتحاد الكباب والكفته المعروف سابقا باسم اتحاد الكوره عايشين فى مجرّه ثانيه مش بس فى كوكب تانى...والظاهر فيه حد مفهّمهم غلط ان التقدم لتنظيم كأس العالم يكون عن طريق وضع لافتات عليها لوجو خايب قام أحد الخطاطين بتصميمه فى السريع فى التراك فى مباريات لايراها أحد سوى الجمهور المصرى.... والواحد الحقيقه شاكك انهم لمّا حبّوا يقدّموا الملف المصرى للفيفا قدّموه الأول فى ملف علاّقى من الكرتون الأخضر أبو ربع جنيه اللى الشباب بيحطّوا أوراقهم فيه وهمّه رايحين التجنيد فى الهايكستب

رابعا: عيب علينا نضحّك على روحنا خلق الله ونشمّت الأعادى فينا , وبلاش الهلاوس والأفكار الخياليه اللى بتراوداتحاد الكوره بتاعنا لأنه شكله كده بقى عامل زى الجدع اللى بيرسمه مصطفى حسين وهوّه بيقرأ الجرنان وبيسب ويلعن فى الضريبه المفروضه على السيجار الكوبى والويسكى الجيفاز وهوّه قاعد على سطح بيتهم بيشرب سبارس ولابس بنطلون بيجامه كستور مهترئ على فانله داخليه مرقّعه ومراته بتنشر الغسيل والواد ابنه بيلعب بعجلة عربيه وهوّه لامؤاخذه يعنى ملبّسينه هدوم من فوق وسطه وانت طالع بس

خامسا:بالنسبه للملاعب.....الكابتن الهمام السياجى لما استضافوه فى الجزيره قعد يشب ويلب ويحبق ويدبق علشان يعد 8 ملاعب (كان من ضمنهم دمنهور وعجرود فى السويس وبنى عبيد!!!)...بقى بالذمه ده اسمه كلام؟؟؟ الملاعب الموجوده ملاعب تعباااااانه....لا أرضيه عدله...ولا مرافق عدله.... ده حتى ساعات الاستادات مهزله.....حد شاف ساعة استاد القاهره وقارنها بساعات أى استادات فى دولة عربية مش حأقول أوروبيه أو آسيويه؟؟ زى الفرق بين البلاى ستيشن والأتارى أول ماطلعت الألعاب بتاعتها فى شكل عصيان بتنقل الكوره.....والاّ الحمّامات....تخيّلوا بقى طقم ألمان او فرنساويين أو طلاينه عايزين يدخلوا الحمام فى الاستاد...والريحه اللى احنا عارفينها....والمخلّفات الآدميه...ومستوى النظافه.....و.....و....يالاّ بلاش نقرفكم أحسن يكون حد قاعد بيأكل وهوّه داخل أون لاين

وبعدين مش قادر ياربى أتخيل شوية المناظر اللى حتحصل... جحافل الشحّاتين والعيال الصغيره بتوع مناديل الكلينكس والمتسوّلات اللى خاطفه عيال تشحت بيها واللى قاطعين له ايد واللى فاقعين له عين وهمّه محتشدين فى مداخل الاستاد...و "جيف مى وان دولار ماى جود ميك يور تيم وين ذى تشامبيون شيب"... ده طبعا غير منظر المشجعين الانجليز والبرازيليين مثلا وهمّه قاعدين فى المدرجات وبتوع السميط والجبنه وجرادل الحاجه الساقعه عمّالين يرذّلوا عليهم...وعايز السميط بالدبّان ولا من غير دبّان ياخواجه...وعلى قوطه ..وابراهيم الأهبل...ومن على شاكلتهم وهمّه بيبزنسوا على الجماهير الأجنبيه وبيبيعولهم ميداليات فرعونى واطباق نحاس بالعافيه..وياعينى على الفضايح...ده احنا حنتجرّس جرسه ما يعلم بيها الاّ ربّنا

سادسا: حدّث ولا حرج عن المواصلات وكوبرى أكتوبر والشوارع النظيفه الجميله والاتصالات والتليفونات الدوليه والمركز الاعلامى والفنادق والخدمات والمرافق.....دى حتبقى مهزله... والماتشات تتلغى علشان الطريق كان واقف على الكوبرى.... والصحفيين مش عارفين يبعثوا فاكس أو يعملوا مكالمة تليفون... والفنادق تنزّل للجماهير الأجنبيه اللى جايه تتفرج قزايز المياه المعدنيه بلطجه وبالعافيه فى كل وجبه.... وحالات تسمم واسهال للمشجعين الأجانب اللى حيغرهم زمانهم وياكلوا فول وكشرى وفاكرين انهم ممكن يضغطوا النفقات بكده زى ما بيعملوا فى بقية الدورات المتنظمه فى بلاد تانيه.. ومواسير المجارى تضرب والمشجعين الأجانب يقعدوا يصوروا نفسهم فيديو للذكرى والتاريخ وهمّه بيعدّوا فوق الطوب وسط المجارى الطافحه.....ده طبعا غير الصيّع اللى حيكونوا متربّصين فى الشوارع بالمشجعات الأجانب من ذوات اللحم الأبيض والشورتات والبوديهات الساخنه ان لم يكن بالبيكينى (يوليو وحر يوليو يا جماعه)...وتخيّلوا بقى كم قلّة الأدب والخبط والرزع والمضايقه....مش قادر أتخيّل مشجعات البرازيل والا ايطاليا وهمّه فى شربين والا دمنهور والعيال الحافيه بتجرى وراهم والشباب بالجلابيب والنسوان طالعين يهادوهم بحلل المحشى والحمير وعربيات الكارّو وهمّه بيتصوّروا معاها للذكرى والتاريخ ده غير صورهم وهمّه يتزلّجوا ويتزحلقوا على الجلّه علشان يورّوا الحاجات الأورويجينال دى لأصحابهم لمّا يرجعوا (أمّا حتّة خرابه.....تجنن...على رأى محمد صبحى)و..و..و...و....ده كابوس...ده احنا حنتجرّس

سابعا:الاخراج التليفزيونى

ده احنا فضيحتنا حتبقى بجلاجل

الاخراج التليفزيونى ده...ابقى اقرأ مقال ساخر عنه فى الوصلة التاليه

http://www.egyptiantalks.org/bforums/viewt...opic.php?t=4993

الخلاصه............ بلالالالالاش فضايح الله يستركم.... مش ناقصه تجريس وتريقه من اللى يسوى واللى مايسواش

ورحم الله امرئ عرف قدر نفسه

ملحوظه: مش عارف ليه لمّا بأتخيّل الدهشورى حرب وهوّه بيقدّم ملف مصر للتقدم لتنظيم كأس العالم لــ"سيب بلاتر" رئيس الفيفا بأتذكر مشهد فيلم "رد قلبى" اللى الباشا طرد فيه الجناينى أبو شكرى سرحان من السرايه لمّا راح يخطب انجى بنت الباشا لابنه

[disappointed]

أكثر أنواع السخريه والكوميديا احزانا هى التى تكون مشتقه من الواقع

وللأسف....فما سردته هو مايحدث بالفعل

وبعدين أنا راضى ذمّتكم..... شكلنا حيبقى ايه لمّا الصحفيين والاعلاميين ينزلوا يعملوا ريبورتاجات فى رسائل القنوات الفضائيّه...يا عينى على رسالة كأس العالم فى اليورو سبورت من كفر القرايعه...وصور الميكروباصات "الترامكو" المتهالكه وهيّه شايله الناس فوق ظهرها ورايحين الاستاد.... وبتوع العسليّه والبوريك وطبقة المنتفعين الأرزقيّه الطفيليين اللى حيبيعوا ورق البردى والتى شيرتات الفرعونى المضروبه بالعافيه وبالرذاله للمشجعين الأجانب قدّام الاستاد

يا جماعه....الموضوع مش موضوع استادات ولا امكانيّات بس... الموضوع موضوع دولة متكاملة الاستعدادات لتنظيم حدث كبير زى ده (حكومة وشعبا وبنية أساسيّه).......ولذلك يتم تنظيم كأس العالم دائما فى دول متقدّمة وليست دول عالم ثالث او دول ناميه , وحتى عندما تم تنظيمها فى بعض الدول مثل المكسيك والبرازيل فان هذه الدول أطلق عليها دول عالم ثالث مجازا لأنها دول متقدمة تكنولوجيا وصناعيّا وشعوبها تملك ثقافة التعامل مع السياحه (البرازيل بحكم كرنفالاتها الشهيره والمكسيك بحكم استيعابها للسيّاح الأمريكان)... ولهذا تم سحب تنظيم كأس العالم من فنزويلا فى 1986

أبسط حاجه عايز أقولها انه علشان مصر تنظم كأس عالم يبقى لازم مبدئيّا تقوم بانشاء مطار دولى جديد فى القاهره (بدل المسخره اللى فى مطار القاهره) مع وجوب وجود مطارات فى كل المدن التى ستقام بها المباريات (والاّ الفرق والمشجعين حتروح بالسوير جيت والبيجو؟؟؟)

الاستعدادات تمس كل دقائق الحياه فى مصر , من أول مخرج ومصور التليفزيون و سلوك رجل الشارع العادى و حالة الطرق ونظافة الحمامات لغاية موظف وزارة السياحة اللى لم يكلّف نفسه استشارة واحد بيفهم انجليزى ليصحح الــSpelling mistakes فى قائمة أسعار المشروبات بكافيتريا مطار الغردقه بدلا من الفضائح التى تراها عندما تطالع قائمة الأسعار لتجد كلمات انجليزيه من عينة :

shoklate قصده يعنى شيكولاته

Binaples يقصد يعنى أناناس

واللى مش مصدق يروح مطار الغردقه ويشوف المهزلة دى بنفسه ,والله يرحم بطولة أفريقيا اللى نظّمناها فى 1986 وكانت التترات بتنزل وهيّه مكتوب عليها Director by فلان الفلانى , ده غير ماتش مصر والكاميرون فى النهائى اللى فضل اسم مصر مكتوب طول الشوط الأولانى على الشاشهEGYBT لغاية ما نبّهوا البجم اللى كتبها انّها بالــP الثقيله اللى مافيش أثقل منها غير خيبته وخيبتنا

ما تقلّبوش علينا المواجع الله يستركم , الواحد كرامته موجوعه ومش ناقصه

[فــيــروز]

الاّ بلاش نقرفكم أحسن يكون حد قاعد بيأكل وهوّه داخل أون لاين

ايوه انا فعلا كنت لسه بافطر

والله يا جماعه انا رايى بردو انه كابوس

واننا غير مستعدين اطلاقا لتنظيم مثل هذه البطولات

ولا ادرى ما هو موضوع اللوجو الذى يتحدثون عنه حاليا و الخاص بالبطوله و عين حورس اللى اتفقعت من كتر ما استخدمناها و تعبر عن مدى افلاسنا حيث اننا فى كل مره يكون لدينا حدث هام تبص تلاقى عين حورس طلعت !! هو مفيش غير عين حورس؟ مفيش عين الصيره مثلا !!

ولا ادرى لم نخوض هذه المسخره كل مره و نظل نتحدث عن تنظيم البطوله و نظل نحلم نحلم حتى نقع على قفانا !! وبالفعل كلما اتخيل هذا الموضوع اتذكر شخصية مصطفى حسين التى ذكرها محبط .. اظن انه الكحيت الذى يدخن سيجارا فاخرا و يضع رجل على رجل ليظهر فى احدى قدميه شبشب مقطوع و شعره منكوش وزوجته ترضع طفل صغير !!

ولا ادرى هل هناك احد مقتنع فعلا بامكانية تنظيمنا لبطوله بهذا الحجم !! لا ادرى هل يمكن ان يعمى الحماس الطفولى الاعين لدرجة الا ترى اننا حاليا غير قادرون على الفوز بتنظيم هذه البطوله وانه لو الفيفا اتلطش فى نفوخه و منحنا هذه الفرصه ستكون كارثه قوميه !!

[Faro]

عين حــــــــــورس

[KWA]

سابعا:الاخراج التليفزيونى 

ده احنا فضيحتنا حتبقى بجلاجل 

الراعي الأول

اتحاد الإذاعة والتليفزيون هو الراعي الأول لحملة مصر ووافق صفوت الشريف وزير الاعلام علي تخصيص 750 ألف دولار "حوالي 6 ملايين جنيه" للمساهمة في هذه الحملة. تساهم في مساندة ودعم الملف المصري 18 وزارة في مقدمتها الاعلام والسياحة والشباب والتعليم والاتصالات.

http://yallakora.com/articles/details.aspx...px?news_id=1269

[فــيــروز]

الراعي الأول

صحيح .. اذا كانوا يعتبروننا غنم فلابد ان يوجد الرعاه .. اليست مصر هى عزبة البعض !!

750 الف دولار .. الصراحه ماعادش فيه دموع ممكن تذرف حزنا على مصر و حال مصر .. 750 الف دولار وهم يعلمون اننا خاسرون لا محاله .. حسبنا الله ونعم الوكيل

[KWA]

http://www.egypt-2010.com

[disappointed]

http://www.egypt-2010.com

خير اللهم اجعله خير.....قلّبت فى الموقع كلّه ولم أجد صورة واحده للريّس.....فيه حاجه غلط يا جماعه...لم يتم ذكر جملة "حسب توجيهات سيادة الرئيس" ولا مرّه فى الموقع

خير اللهم اجعله خير.....مش بعاده يعنى

[ديكارت]

بعد ما اقر الاتحاد الدولي ان كاس العالم عام 2010 ستكون في افريقيا... اعتقد ان المنافسة ستكون قوية جدا بين المغرب وجنوب افريقيا

ولو ان المغرب هي الاقرب بحكم انها خسرت في مونديال 98 و 2002

بفارق صوت واحد . وهي تحاول منذ العام 94 تنظيم كاس العالم

اكثر حاجة فرساني هي الشعار الغبي بتاع البطولة .... والله ثم والله

لو ان طالب في المرحلة الاعدادية اسند له تصميم الشعار لانتج افضل من هذا بكثير

ولكن كالعادة الابداع والحكومة في علاقة عكسية على طول الخط

[elbana]

قلتوا كل اللي كنت قاعد أقوله من يوم ما سمعت بالموضوع ، وأتشال واترقع قدام التلفزيون وأنا باشوف السياجي بنظارة اللحام اللي لابسها ، وأحمد شوبير قاعد ياكل في ضوافره وما بيعرفش يقول كلمتين انجليزي على بعض ، وأنا أتشال واترقع تاني ، وزوجتي تهدي فيّ وأنا ح أطق ، ربنا يخليك يا لينوكس إنت ومحبط وفيروز وديكارت ، قلتوا كل اللي في نفسي وحسستوني إني مش لوحدي اللي ح أفرقع .

أما الشعار بقى فأول ما كشفوا عنه كان ح ييجي لي سكتة قلبية ، أنا لي أصدقاء اتخرجوا من فنون جميلة عملوا شعارات لشركات سياحة موجودة على الباصات ، وكلها آية في الجمال ، مع إنهم ناس مغمورين ما حدش يسمع عنه ، طب إزاي الدولة بجلالة قدرها ما عرفتش تجيب مصمم محترم يضع شعار محترم ، إلهي تتفقع عينك يا حورس بحق جاه النبي .

عموماً أنا متأكد إن الفيفا مش ممكن يوافق على إسناد التنظيم لمصر ، وأنا بأقول كده وكلي ألم وحسرة ، ولا يمكن تتخيلوا المرارة اللي جوايا وأنا بأقول كده على بلدي ، المسألة وصلت لدرجة إن احنا زي الفقير الكحيان اللي خايف لحس ييجي له ضيوف يتفرجوا على عياله بهدومهم المقطعة وعفشه المهربد وسلالم بيته المكسرة . اللي يخرب بيوتهم اللي وصلونا لكده ، بقى لهم عشرات السنين بيحكموا البلد ، ومافيش ولا حاجة ظهرت علينا ، عمالين نمشي من سيء إلى أسوأ ، لدرجة إننا في الآخر بنتمنى إن الفيفا يرفض يسند تنظيم كأس العالم لنا ، الفرصة اللي كل دول العالم بترقص ابتهاجاً بها ، إحنا بنتمنى ربنا يبعدها عننا خوفاً من الفضايح .

حسبنا الله ونعم الوكيل .

[balsameer]

هذه الفكرة لا تخلوا من الوجاهه , باعتبار ما لمصر من ريادة فى افريقيا,

و لكنها حق يراد به باطــل .... باطل ....

انها فكرةمشروع لملىء جيوب و حسابات ناس تعرف ازاى تتعامل مع المال العام السايب ... انه مزاد للسفر و البيزنس و التنطع باسم مصر.. و عندما يكون الشعار مصر و ريادة مصر , تفتح كل الخزائن و تتوفر كل الاعتمادات و كله ح يدفع ,,, و لكن من الذى سيحاسب ؟

هذا من ناحية المصالح المادية, و قل فيها ماتشاء ...

اما من حيث التنظيم , فارجو ان يعودوا الى ما حدث فى افتتاح دورة الالعاب الافريقية عام 1991 , وهل استطعنا تطبيق قواعد البروتوكول الصحيح مع رئيس اللجنة الاولمبية الدولية و قتهــــا ؟؟؟

و هل يعلم الناس ماذا حدث فى الصالة المغطاه و فى احدى المباريات الهامةعندما طلب احد كبار الضيوف الذهاب الى ... دورة المياه ؟؟؟؟؟

ربنا كبير و طبعا لن ننظم كاس العالم ... و لكن حنخسر كام الى ذلك الحين ؟؟