رأيكم بعقد عمل في الرياض محاسب حديث التخرج2007

[عماد حمدي]

السلام عليكم

أعضاء المنتدي الكرام أرجوا الرد للأهميه القصوي , لأني محتاج الرد النهارده علشان ارد علي صاحب العقد بكره

أنا روحت قدمت في شركه الحاق عماله ولقيت بالصدفه انترفيو محاسبين المهم استنيت وعملت الانترفيو والحمد لله اتصل بيا وقال انته نمره واحد عندي الشركه اسمها مدد الخليج للمقاولات بالرياض - صاحبها تركي الشمري

اولا انا دفعه 2007

اللي عمل معايا المقابله شخص زميل صاحب الشركه , وصاحب الشركه قاله لما تنزل مصر شوفلي محاسب عن طريق اي مكتب وأتأكد انه كويس المهم الراجل عمل الانترفيو وخلاص واتفقنا شفويا ً علي الآتي :-

العقد سنتين

الراتب 2000 ريال

السكن والاقامه والمواصلات علي الشركه

التأمين الطبي موفرينه

التأشيره جايه فني تبريد وتكييف

قالي فيه زياده لما صاحب الشركه يشوف شغلي

المهم قالي مش هاخد منك ولا مليم غير لما التأشيره والفيزا معاك وتمسك جواز سفرك وتسأل عنه وتتأكد ان كل حاجه سليمه قالي هاخد 7500 سبعه حق الفيزا و 500 للمكتب ... لان صاحب الشركه دافع في السعوديه 7000 جنيه حق الفيز بما يعادلها بالريال

بالنسبه للعقد قالي العقد اللي هيتكتب هنا يببقي عقد صوري مش معترف بيه لان كده كده هتعمل عقد هناك ؟؟ قالي ولو عايز تعمل عقد هنا مفيش مشاكل .. هل الكلام دا صحيح

وايه رايكم في العقد ؟؟ ووضع الشركه هيا بالرياض

وايه هيا الاحتياطيات اللي ممكن اعملها هنا في مصر أأمن نفسي جامد ؟ لان الراجل بصراحه كلامه مقنع من ناحيه الماديات اللي هدفعها هنا

[jamalpody]

طبعا كلام فارغ

لان الراتب ده يعتبر ضعيف وحتي لو قبلنا بموضوع الراتب فليس من حقه ان يساومك علي ثمن الفيزا

ثم انه غشاش لان رسوم الفيزا من مكتب العمل فقط 2000ريال

نصيحتي لك الا تقبل لان ما بني علي باطل وكذب فهو باطل بمعني انك بعد ماتيجي ممكن تلاقي

الوضع مختلف وحملك تكاليف تانيه مثل رسوم الاقامه او التأمين او السكن ............الخ

ثم ان معظم شركات المقاولات هنا الا من رحم ربي بيأخروا دفع الرواتب بالشهور

[الطير السافر]

ألسلام عليكم

اولا انا شايف ان مرتب 2000 مش وحش بالنسبة لمحاسب خريج 2007 وبالنسبة للعقد هو طالما الفيزا بتاعتك مكتوبة فنى تبريد وتكييف يبقى لازم العقد اللى هيتوثق يكون بنفس الفيزا بالظبط وعموما انت عارف كوييس ان الظروف مش كويسة فى مصر فانت اكتر واحد عارف ظروفك وعارف شغلك بس بالنسبة لل 7000 دول كتير جدا

وبالنسبة لتاشيرة فنى مبتقابلش مشكلة بعد كده فى الاستقدام وانت احسبها واستخير

[mahroos]

اكتب عقدك قبل ما تسافر

لأنك ممكن تسافر ولما تيجي تكتب العقد يقولك خد 1600 ويزيدوا بعد اربع شهور بعد شهرين تجربه - يعني ست شهور- يوصلوا للالفين

وده بيحصل هنا في السعودية كثير فمرتبك 2000 يعني 2000 ولازم تمسك في ايدك عقد قبل ما تسافر

ولو تعرف توصله ل 2500 يبدأ بألفين وبعدين يزيد في خمس اشهر كويس كبداية لك وحاول توفر وربنا يوفقك

[عماد حمدي]

اان بشكر كل الناس اللي ردت عليا وبجد انتم ناس محترمين جزاكم الله كل خير ,,وجعله في ميزان حسناتكم لان الدال علي فعل الخير كفاعله .. انا شايف ان المرتب بالنسبه ليا مش وحش خاصه ان فيه ناس صحابي كتير سافروا علي 1500 ريال بعدين هوه مكنش بيساومني علي ثمن العقد ول حاجه دا بيقولي ان المكتب هياخد 500 والفيزا ب 7000 وقالي المكتب لو قالك اكتر من كده اتصل بيا اقابلك ونروح اي مكتب تاني نعمل عليه الوكاله ونخلص علي 7500 ومتدفعشي مليم غير لما تتأكد ان كله سليم ميه الميه ... انا بس عايز اعرف هعمل العقد هنا ازاي ومين اللي هيمضي طرف اول هل المكتب علي اعتباره وسيط ولا مين خاصه ان اللي معاه الفيزا دا زميل صاحب الشغل زي ما قولتلكم ؟؟ فأرجوا توضيح الأمر ولكم مني جزيل الشكر

[عماد حمدي]

يا جماعه الله يخليكم فين بقت الأعضاء !!

[hosambob]

يا عم اسمع الكلام اللي كتبوا الاصدقاء

انا بقلك لازم تكتب في العقد كل حاجة السكن والتأمين و المواصلات و رسوم تجديد الاقامة و الراتب و الاوفر تايم و الزيادات الدورية و الشهرية ...

لان لما بتيجي هنا كل حاجة بتتغير و الكلام بيبقي كلام تاني

اما بالنسبة لتمن التأشيرة كتتتتييير جدا ً .. زي ما الأصدقاء أقول ما بتزدش عن 2000 ريال أو 2500 ريال يعني حوالي 3500 جنية مصري و المكتب ياخد 500أو 600 ريال بكتيييرة 700 جنية

[samooegypt]

عرض كويس بس حكايه انه يشيلك مصاريف الفيزا دي لازم ترفضها تماما

قله معيش فلوس واتكلم بقلب جامد

هو مطالب انه يتحمل جميع مصاريف استقدامك تاشيره وتذاكر سفر

اهم حاجه اتمسك برايك وكمان لازم عقد موثق من هناك عشان تضمن حقك

بالتوفيق

[eng hoss]

الراتب معقول

لكن تأكد أن النيه مش كويسه

الشركات المحترمه والنص محترمه بتتحمل تمن التأشيره

و7500 جنيه دول ياأما بخل من الشركه ودى مقدمه مش كويسه أو نصب من الوسيط

العقد تعمله من عندك وتوثقه وياريت تتفق على زياده سنويه ثابته حتى لو 300 ريال

وأسم صاحب الشركه مش مريحنى والله أعلم

أنا قلت ملاحظتى ولك الاختيار وانا شايف أنك ناوى على السفر

فصلى صلاة استخاره وربنا هيوجهك للى فيه الخير

[المحترمة]

مسألة الراتب كويس ولا مش كويس تتوقف على ظروفك المادية

لأن العملية نسبية اللي يبنفع واحد ممكن ما ينفعش التاني

انت وحدك ادري بالدخل والمنصروفات اللي تحتاجها

وبعدينلازم تسأل حد ثقة يكون عايش في نفس المكان اللي فيه العقد

هو يجيب لك قرار الموضوع

وتعرف هل الشركة كويسة ولا نصابة والراتب مناسب ولا لا

وكده تعرق راسك من رجليك

تسافر ولا تقعد

[خالد شحاته]

السلام عليكم ورحمة الله وبركاته

في شي مهم جدااااااااا الكل مش عارفه

انت راجل محاسب تمام والتاشيره فني تبريد وتكييف يعني طبعا للازم مؤهل دبلوم تبريد وتكيف صنايع ولا انت هتخد التاشيره ازي

وانا صاحب شركة الاحاق عماله وعارف الكلام ده كويس وللازم تكتب عقد وتصدقه من السفاره السعوديه في مصر براتب

[عماد حمدي]

كلام خالد شحاته تمام وفعل ً كانت دي مشكله , بس الحمد لله اتغيرت لنجار مسلح .. المهم Eng Hoss اسم صاحب الشركه مش مريحك ليه طمني وعلي فكره دا اقل مبلغ سمعته ثمن التأشيره انا سمعت 15 و 16 الف ومبالغ كبيره ويمكن استاذ خالد عارف الموضوع دا