سلطة وبديل للرز والخبز ..

[بندق أفندى]

ببساطة .. الفلفل الباقى من تزيين السمكة هنا

http://www.egyptiantalks.org/invb/index.php?showtopic=72714

وبطاطس مشوية تقطع انصاف بعد الشوى ويتحمرو فى زيت زيتون لمدة 4 دقائق ويتبل بقليل من الملح والفلفل الأسود المطحون .. والبقدونس المفرى قبل التقديم .. ثم ترص على خلفية من أوراق الخس .. وتتبل بزيت زيتون و وعصير ليمون .. وبس

[se_ Elsyed]

لأ الله يرضى عليك يابو البنادق .

إنت بتشعوذنا وتفتح نفسنا لاكلات شكلها حلو بس تختصرها لنا في فاكسات وكلمات معدودة ..

إشرح بأستفاضه يا مان ..

حاكم أخوك س س نفسه مفتوحة على المطبخ اليومين دول .. ورجعت للملاعب تاني بعد فترة إعتزال قاربت على نيف وخمسمائة عام

وفقعت العيال الإسبوع اللي فات كام أكله جابت أجلهم ومنها :

1- ستيك بقري مشوي بس نشف مني المرة دي مش عارف ليه ؟ وجنبة مكرونة سيباك إنتي

2- حواوشي بالتخصص .. بس ما تقولش لعدوك .. الجزار كتر لي الدهن فيه .. واقسم بالله الريحة جابت أخر العمارة والجيران إتلموا علينا .. ولإنه كان مشطشط وبيفحفح .. فضربت في قاعدة واحدة عدد 3 أرغفة على المغربية كده .. وجيت بالليل يابني وكنت بأطلع في الروح .. ولم ينفع لا سفن أب ولا أم ولا لبن رايب وقعدت يومين تعبان ... العضمة كبرت يا بندق وشكلي داخل على مرحلة الزبادي وهابقى بركة البيت .

3- شاورما بيتي .... بس دي طلعت في الجون .. لكن اللي مش هاتصدقه إن من ريحة الشاندوشتات وأنا باعملها شبعت .. وأكتفيت بأكل ساندوتش مربى .. دي حقيقة ...

[المحترمة]

بس انا حسب معلوماتي

ان زيت الزيتون

اذا حطيناه ع النار قلت فايدته

ولا عندكم راي تاني

[fatfouta]

1- ستيك بقري مشوي بس نشف مني المرة دي مش عارف ليه ؟ وجنبة مكرونة سيباك إنتي

انا كمان عملت الستيك المشوى ده امبارح ونشف منى مش عارفة ليه

ممكن تقولنا يا اخ بندق بخبراتك وكفاية خف علينا عشان الرجيم انت جوعتنا

تم تعديل 8 فبراير 2009 بواسطة fatfouta

[بندق أفندى]

حتى ما ينشف منك الاستيك نحتفظ بباقى خلطة التتبيل او نزودها شوية من البداية وندهن الاستيك بيها من وقت للتانى خصوصا مع التقليب ..

طبعا الأجانب بيحبوه بدمه فعشان كده مش بينشف منهم ..

أما بخصوص الفاكسات الأمر واضح للغاية وسهل وحيث انك مطبخى قديم هتفهم بدون شروحات طويلة .. هى خطوط عريضة والتفاصيل لذوق كل واحد

زيت الزيتون يستخدم بكثر فى الطبخ فى بلاد انتاجه .. احنا اللى مقدسينه شويتين عشان غالى أوى ..