شقة 86 متر في مشروع صقر قريش-مدينة نصر

[kiko]

لا خاب من استشار قالهالي AbuAdham والاستاذ junior member بعد ما اتورطت في المشاركة في شراء أرض تخصيص قديم مع صاحب العمر ورفض يكتبلي أى عقود تثبت حقي ويادوب لسه بيكملي في الفلوس الل دفعتها معاه في الاقساط الله يسامحه .ناوي أشتري الآن شقة 86 م نصف تشطيب حكومي غرفتين وصالة مدينة نصر-مشروع صقر قريش حتي مش فاهم يعني ايه نص تشطيب حكومي ! لكن متوقع انه أقل جودة . والشقة ملك ورثة وسددوا الاقساط الباقية وسوف يستلموها الشهر الجاى مارس 2009 . مطلوب أدفع فيها 137 ألف ومؤجل 10 ألاف علي تكملة أقساط تدفع بعدين. يعني اجمالي 147 ألف على ثلاث دفعات من الان وحتي شهر أغسطس 2009 هل السعر ده كويس ولا ايه وحتحتاج تشطيب كم أنا مشفتش الشقة لاني مش في مصر. لكن المعلومات دي سماعي . أرجو النصيحة الله ينور يصائركم .ولا خاب من استشار .

[أشرف محمد]

بسم الله الرحمن الرحيم

الأخ الكريم / kiko

تحية طيبة وبعد 000

هذا السعر مغالى فيه جداً بالنسبة للظروف التي يمر بها سوق العقارات من ركود 0 فالأسعار في صقر قريش لا تتعدى 110 ألف جنيه 0 علماً بأنك لازم تعاين الشقة قبل الشراء وحاول أن تبعد عن موضوع الشراء من الورثة 0

شكراً مع خالص تحياتي

مهندس / أشرف محمد

تم تعديل 9 فبراير 2009 بواسطة أشرف محمد

[fatfouta]

بص يا اخى الكريم

ماتحاولش تشترى اى حاجة وخصوصا شقة الا اذا شفتها وعجبتك ولما تستقر خلاص انك تاخدها يبقى كمان ماتدفعش فلوس غير لما تاخد مفتاحها

وذى ماقالك الاخ اشرف فعلا غاليه اوى فى صقر قريش شقة بالمبلغ ده احنا كنا بندور فيها وكنا بنلاقى شقق اكبر وارخص من اللى انت بتقول عليها دى

خد بالك والله احنا جربنا ولقينا اللى يقولك ادفع واستلم بعدين والحاجات دى كلها كلااااااااااام فاضى

[abuAdham]

استاذ KiKO كلام حضرتك صعب جدا أنا فعلا اعصابي بتتحرق لانك راجل طيب ومحتاج حد يقف جنبك ارجوك واتوسل اليك لا تشتري هذه الشقة دي سعرها غالي جداوقبل ما تشتري شقة في اي مكان لازم تسئل سماسرة المكان أسئل أكثر من واحد ( ولا تثق في كلامهم ) خد فكرة فقط والكلام دة سبق وقلتة في المنتدي لاخت كانت عاوزة تبيع شقة في المقطم وهو ( لو حضرتك عاوز تشتري شقة قول للسمسار انك عاوز تبيع شقة مساحة كذا دور كذا مواصفات قريبة وليست مطابقة تماما لكن قريبة جدا من الشقة المعروضة عليك وهو هيعطيك سعرها الفعلي لكن لو تروح تقولة هشتري هيشتغلك ويعمل عليك اوفر دة الواقع المهم

فركش البيعةدي لان سعر الشقة غالي فية اوفر ذي البشمهندس ما قال لك هي من 110 الي 115 لو علي شارع رئيسي وكمان العمارات تعبانة ومستواها شعبي جدا سوف ادلك علي شيئ الفضل اذهب الي التجمع الاول قريب جدا من صقر قريش وبالفلوس ال معاك هتشتري شقة 95 م ثمنها 135 الف ولو هتأجرها مثلا فهيكون ايجارها اغلي من مساكن صقر قريش في صقر بتتأجر تشطيب شركة ( هوضحلك يعني اية تشطيب شركة ) هتأجرها ب 500 ج حد اقصي لكن في التجمع 650 وبرضة تشطيب شركة لكن المكان انضف بكثير وال 81 م في التجمع تعمل 115 الف ولو هتسكن فيها هتكون انظف

نرجع لتشطيب الشركة ( هو ان الشقة علي المحارة بها ابواب وحلوق وبلاط موزايكو او اسمنتي وقاعدة تواليت وحوض مطبخ وحوض حمام وحنفيات النحاس العادية وبدون عداد كهرباء )

دة اولا ثانيا بقي تعالي نتكلم في الامور القانونية عشان تضمن حقك </b>

لو في اي وقت هتشتري اي عقار من ورثة لازم يكون معهم اعلام الوراثة ويكونوا جميع من مثبوت اسمائهم في الاعلام الشرعي ان يقوموا بعملية البيع لو يوكلوا احدهم بتوكيل خاص مذكور فية انهم وكلوه في بيع الشقة كذا بالعمارة رقم كذا اي كل تفاصيل الشقة بالضبط ولا يذكر في التوكيل اي عين اخري سوي الشقة ثم تشتري حضرتك من وكيلهم بتوكيل مطابق للتوكيل السابق وتضيف علية ان فلان هذا ( باع لك بصفتة وكيلا عن الورثة فلان وفلان ورثة المرحوم فلان بتوكيل رقم كذا بتاريخ كذا من مكتب شهر عقاري كذا ) عشان بعد كدة تعرف تنقل الشقة بأسمك في الجهاز او الشركة او علي الاقل تعرف تبيعها وقبل ما تدفع ولا مليم تروح تسئل عن الشقة في الجهة المختصة بها بنك او شركة او جهاز وتعرف المبلغ المتبقي كام بالضبط مش يمكن اكثر منالمبلغ المذكور وممكن صاحبنا ميكونش مسدد اقساط والشقة مطلوبة شؤون قانونية او صادر ضددها امر سحب واخيرا ايضا اذكرك متشتريش شقة صقر قريششششششششششششششششش

وحضرتك بتقول انك خارج مصر ياريت متدفعش فلوس لاي حد يشتري لك اي شيئانتظر للاجازة( اشتري نقاوة عنك افضل من تصحيح اخطاء غيرك) ومحدش هيخاف علي الفلوس اكثر من ال شقي بيها ولو انت مضطر تشتري ارسل لي مواصفات اي شقة وان شاء الله هدلك علي سعرها التقريبي ان لم يكن السعر الحقيقي خاصاً مدينة نصر والتجمع والعبور والشروق وبدر وربنا يسترها معاك

تم تعديل 9 فبراير 2009 بواسطة abuAdham

[دكتور مصري]

السعر مرتفع جدا

[kiko]

السلام عليكم .

أسف للتأخير في الرد ...

ربي يحفظكم ان شاء الله

وأخص بالذكر الأخ الأكبر AbuAdham

علي النصيحة الغالية وسوف لا أبدأ في أي جديد الا وأنا في مصر وبعد

استشاراتكم ....... :Exclam:

[mhmh]

اخى العزيز .. تحذير

الشقق بتاعت صقر قريش .. هو ده سعرها دلوقتى ..

كمان الشقق الـ 85 متر فعلا بتتسلم الفترة الحالية ...

انا عندى شقة فى مشروع صقر قريش اشتريتها من 4 سنوات ودفعة فيها 40000

دلوقتى تساوى 150000 على وضعها الحالى وقدمها على التسليم ونصف تشطيب ايضا سنتين ونصف

خد بالك الفلوس فى العقارات مبتخسرش

تشترى احسن ولا الفلوس تسيبها فى البنك احسبا بنفسك

علشان تبقى مطمن شوف الشفى لو موقعها متميز هيبقى التصرف فيها سريع فى حالة حبيت تبيعها

انا قولت رئى وفكر كويس

طبعا مع احترامى لكل الارائ السابقة والاختلاف ليفسد للود قضية

والسلام والرحمة

اه كمان نسيت اقولك

انى ابحث عن شقة ووجدة فى اسكان الضباط بمبلغ 180الف فى اسكان الضباط بصقر قريش ومساحتها 77 متر غرفتين وريسيبشن

تشطيب لوكس

تم تعديل 12 فبراير 2009 بواسطة mhmh

[kiko]

الســلام علـيـكم

شــكرا أخي على المرور والرد والمعلومات .

[فيصل رافت]

الاخ الكريم

السلام عليكم ورحمة الله وبركاته

بشان موضوع شريكك وانه اخذ فلوسك دون وجه حق ورافض اعطاءك نصيبك فى الارض بسعر السوق الحالى انا راى تتخذ الطريق القانونى وتقوم برفع دعوى يمين حاسمه تشرح فيها الموضوع وتطالب بتوجيه اليمين الحاسمه بالصيغة الاتيه (( اقسم بالله العظيم ان المدعى لم يشاركنى فى قطعه الارض رقم كذا بمدينه الشروق مساحتها كذا ولم يقم بدفع ثمن الارض معى مناصفة من عام 2004 والله على ما اقول شهيد )) وتطالب فى حاله نكوله عن الحلف الزامه باداء نصف ثمن الارض بعد التثمين

وده حل يريحك عشان ربنا يقصف عمره لو حلف كذب بدل ما تقعد وتضيع حقك

وديه وجهة نظرى ولك حريه الاختيار

وعلى فكره انا بقولك دعوى يمين حاسمه عشان انا عارف انك معكش ورق يثبت حقك والله الموفق

[الأقصرى]

ده اعلان فى الوسيط عدد اليوم ده يؤكد ان السعر غالى كما ذكر الساده فى الردود السابقة

بصقر قريش ـ 86 م2 ـ 3 غرف وصاله ـ لوكس ـ بحرى بشارع هادئ - بحصة بالارض - ط 5 ـ بالتليفون ـ مقايسة غاز - امام الواحه ـ 105 ألف ج ـ ومؤجرة حاليا ق ج ب 700 ج كاستثمار او اخلائها فورا ـ ت: ‌ 8058702/010 ـ 8504521/010 ـ 24115055

[kiko]

السلام عليكم .

الأخ الكريم فيصل رأفت كل الشكر يا أخي على اهتمامك وسوف أعمل بنصيحتك في الصيف باذن الله.

الأخ الكريم الأقصري أشكرك على المرور والايضاح الله ينور بصائركم .

[بنت فاضل]

بصراحة بصراحة

بارك الله فيكم انا حاسة هنا بروح الاخوة وانكم بتخافوا على مصحلة بعض

ربنا يكرمكوا يارب منتدى هايل ورائع

اما بخصوص شقة صقر قريش - وحياة ربنا غالية جدا جدا

انا لو معايا المبلغ دة - انا ادفع مقدم لارض ف الشروع والباقى اقساط وابنى واحدة واحدة على 300 متر

ولا ايه رأيكم يا جماعة

اهو برضه معاكم واحدة مغتربة وبفكر ف كدة

منتظرة جهابذة المنتدى ترد

كانت معكم

بنت فاضل

من امام مواقع عقارات النت

الكويت

[kiko]

فعلا روح أخوة يارب ترجع لمصر تاني . يارب مصر الحلوة ترجع تاني أشكرك وبس ببساطة .