هل ممكن تجتمع الصداقة مع الغيرة

[ذهبية]

سؤالى بسيط جدا هل الصداقة فيها غيرة

لى صديقة من ايام الجامعة ومازالنا مع بعض تخرجنا و تزوجنا و انجبنا و كل واحدة فينا لها ظروفها و لم نفترق نعرف كل شىء عن بعض كحال اى صديقين لكن للاسف احسست فى الفترة الاخير ة انها تغير منى جدا ومحدش يقولى كل الفترة الصداقة دى لم تكتشفى هذا تقدروا تقولوا عبط منى هبل عدم اهتمام او انى طيبة زيادة عن اللزوم او انى لاحظت و طنشت و صداقتها اكبر من اى شىء تانى

لكن لاحظت ان الموضوع بزيد جدا بالرغم ان حالتها تحسنت جدا و يمكن اكتر منى بكتير و يمكن تفوقت عليا فهى تتعمد ذكر ذلك دائما وانا لا اهتم بذلك نهائى لكنى لاحظت ان لو حصل فى حياتى اى شىء كويس

تزعل و تضايق و تخاصمنى تلات او اربع ايام و يمكن تعمل خناقة مع جوزها لحد ما يجيب لها الشىء اللى عندى

حتى ابنى الضغير و ابنها فى عمر واحد لو ابنى تفوق فى الدرجات على ابنها تتقفل و تضايق و تخاصمنى ايام وتظل فترة حتى تقدر ترجع متمالكة اعصابها معايا

انا احترت معاها و بصراحة اضايقت و سالت نفسى سؤال لية انا مش كدة معاها ؟؟؟

انا فعلا اتمنى لها الخير من كل قلبى لية هى مش العكس

هل تعتبر هذة صداقة ؟؟؟؟؟؟؟؟؟

هل مر احد من الاصدقاء بنوعية صداقة مثل هذة؟؟؟؟؟؟؟؟؟

[لولا]

نعم يا ذهبيه هذه امور تحدث .. وحدثت لى قصه فيها.

سأعود لسردها لاحقا ان شاء الله .

الصداقه الوحيده الخاليه تماما من الغيره هى الصداقه بين الجنسين .. وهذا موضوع آخر.

اى صداقه اخرى بين فتاتين .. يؤسفنى وحسب تجربتى ان اقول انها لا تسلم من الغيره باى درجه تقل وتزيد حسب النفوس.

دمت بكل خير.

لولا

تم تعديل 12 فبراير 2009 بواسطة لولا

[Amr Radwan]

اختي الكريمة ذهبية ..

ما تفضلتي بذكره لا افسره علي انه "غيرة" افسره بشئ اخر .. و انصحك نصيحة جادة الا تفشي اسرارك الي هذه الصديقة .. لاني من خلال خبرتي الصغيرة في الحياة ان افشاء الاسرار الي اقرب المقربين بتكون مشكلة كبيرة و لا يتم اكتشافها الا بعد مده طويلة و ساعتها بتكون المشكلة بقت كبيرة جدا ..

و عشان ما اطولش عليكي .. خلي تعاملك مع هذه الصديقة تعامل "سطحي" و اخرجي من القرب "الزائد" باحترافيه و اتركي خيط رفيع من الصداقة بينكم و لا تقطعيه ..

تحياتي لكي

[Emo]

ذهبية ..تعرفي الأخوات نفسهم بيتغيروا ع بعض بعد فترة من الزواج..

مش بس الأصدقاء..

الواحدة لما بتتجوز غالبا بتصادق زوجه ومملكتها ع حساب أي حاجة..وياسلام بقى لو زوجها نفسه مش حلوة اووي من جهة الناس..

أكيد هتكسب منه كل الصفات دي..

كوني بفرح وسعادة بلا كدر يارب..

[ريحانة]

السلام عليكم

طبعا حببتى زى ما تفضلوا الأخوات وقالوا ان دى امور طبيعية وبتحصل

حتى بين الأخوات

بس بصراحة انا لى رأى انى

انا معاهم انها تحصل بس ازاى ولأى مدى؟

طبعا احنا مش ملايكة ممكن صاحبتى لما يجيلها خير

وان كنت استبعد زعلى من كده بس حتى لو زعلت يبقى مجرد احساس بسيط

استغفر ربنا عليه وادعوه يطهر قلبى منه وخلاص

انما تزعل وتخاصمك وتتخانق مع زوجها كمان

لأ كده فى حاجة مش تمام

وبعدين لما صديقتك تعمل كده امال مين يتمنالك الخير

ومين يفرحلك

ده الواحد ساعات عيونه بتدمع ويبكى فرحا لما خير يجى لحد بحبه

والله انا مش بجرد الأمر من البشرية

بس انا شايفة لما توصل لزعل ونكد وخصام

اعتقد مينفعش تبقى الصديقة الوحيدة وصديقة العمر

وانا بتكلم من ناحية انك تأتمنيها على اسرار مثلا

اما من ناحية العلاقة خليها عادية ومتكدريش نفسك عشان حد

بس متكونش مستودع اسرار

وربنا يكرمك ويسعد قلبك ياحبيبة

[لولا]

هل ممكن تجتمع الصداقه مع الغيره ؟

سؤال اجابته عريضه جدا !!

فى عالم النساء .. للأسف .. أقول بكل أسف .. نعم :)

اولا تعلمت أشياء بسيطه جدا ..

الصداقه قبل الزواج تختلف جدا عن الصداقه بعد الزواج .

الحدود تتغير كثيرا ... ما يقال وما لايقال .. الوقت الممنوح .. أشياء كثيره جدا.

فى حالتك ذهبية لا استطيع ان اسمى هذه الإنسانه التى تتحدثين عنها صديقه العمر ولا الطفوله ولا ان اوافقك على المكانه التى وضعتها فيها

سواء فى حياتك او قلبك .

عندما تصل الأمور لهذا الشكل " المرضى " احذرى جدا .. ابتعدى خطوات بهدوء ، ضعى حدود للعلاقه ، احتفظى بخصوصيات بيتك واولادك ولا تشاركيها

فى ابسط أخبار عائلتك .

هذا الإحساس الغامر الذى تشعرينه تجاهها فتسمينها صديقه العمر والسنوات هو وهم صدقينى .. لا تقطعى العلاقه .. ولكن اتخذى خطوات لحمايه

نفسك من غيرتها .. وقللى الإحتكاك قدر الإمكان .

عندما كنت فى الثانويه - فى الغربة - كانت لى صديقه احبها جدا .. والدتها مصريه ولكنها ليست مصريه .. كنا نقضى الإجازات فى مصر معا .. نتشارك

فى كل شيئ ولنا ذكريات رائعه معا .

عندما دخلت الجامعه ظلت علاقتنا قويه جدا .. كنا نتحدث بالهاتف .. تأتى دائما للقاهره ونقضى الأيام معا .

قبل ان اتزوج وحينما كنت فى مرحلة التجهيز للفرح وحجز القاعه ومكان الفرح سافرت خصيصا لتأتى وتشاركنى تلك الفتره ..كنا نتنقل من اوتيل لآخر

وكان رأيها يهمنى بشده .. ثم اثناء تلك الفتره حضر خطيبى من سفره واصبحنا نخرج معا للإختيار النهائى لمكان الفرح .. لا تتخيلى كيف تغيرت

هذه الصديقه فى تعاملها معى فى تلك الفتره .. كيف كانت عدائيه نوعا ما تجاه خطيبى بدون مبرر .

وقتها كانت هى فى القاهره لتشاركنى هذه الفتره وكنت سعيده جدا بها وحضر خطيبى بعد اسبوع وكانت اجازته ايضا قصيره جدا .. وبما انى اشعر

بمسؤليه تجاهها واشعر بالإمتنان التام لحضورها لأجلى فكنت اخجل جدا من ان يمر يوم واحد دون ان امضيه كله معها . وبما ان خطيبى ايضا

اجازته قصيره فقد كنت اطلب منه ان نكون مجموعه وان نخرج سويا خصوصا ان اخوها ايضا معها وكلنا من نفس العمر . وافق على مضض

وحدث الموقف التالى فى ثانى خروج لنا سويا .. يومها دعانى خطيبى للعشاء فى مطعم نحبه جدا وكنا طوال النهار مع صديقتى واخوها ..

فقالت لى انها جائعه ..كانت حوالى الثامنه مساء ..فقلت لها "اوكى تحبى نروح فين ؟" اختارت هارديز .. وذهبنا كلنا .. اخوها طلب الطلبات

الخاصه بهم .. وخطيبى طلب لى انا وهو مجرد بيبسى .

ولما جاءت الطلبات .. نظرت لى وقالت لى لماذا لم تطلبوا شيئا ؟؟ فقلت لها اصل محمد عازمنى على العشا النهارده ..بس احنا حبينا نيجى معاكو

عشان الوقت لسه بدرى .

نظرت لى بغضب شديد جدا .. وبدأت تكلمنى بعصبيه شديده غير مبرره و لم افهمها وتقول لى " يبقى محدش قالك تيجى معانا اصلا !!"

واخدت شنطتها وخرجت من المطعم واخوها لحقها مستغرب !!

طبعا خطيبى اتجنن منها .. وحلف مية يمين ما اخرج معها تانى .. وانا اقوله دى صاحبتى من كام سنه .. انتا بتقول ايه .. احداث وكلام ومشاكل

وربنا خلى الأيام تعدى .

بعدها بسته شهور كان موعد فرحى .. طبعا هى معزومه .. اعتذرت عن الحضور وقالت انها مشغوله جدا .

جيت بعدها السعوديه وكنت حاسه انها اخت ليا هنا وكنت متخيله ان علاقتنا حتكون زى زمان لما كنا بنات ..او قبل انا ما تجوز .

لكن تخيلى فضلت تلات شهور اكلمها ديما وهى ديما بتتهرب وانا مش فاهمه فى ايه اصلا .. وهى ولا جات زارتنى حتى تباركلى

فى بيتى ولا على قد عشرتنا واعياد ميلادنا والهدايا والمجاملات اللى كانت بينا ولا حتى المعرفه العائليه من كام سنه .

وأخيرا بعد كام شهر .. قابلتها بالصدفه فى مطعم .. تخيلى .. اول ما شافتنى .. ورحت اسلم عليها .. سألتنى سؤال غريب جدا ..

واحنا لسه بنبوس بعض .. تخيلى سألتنى ايه ؟؟ هو مفيش حاجه فى السكه !!

طبعا جوزى كان معايا . بمجرد ما سلمت عليها شدنى من ايدى واسـتأذن منهم .. وحلفنى مليون يمين ما اكلمش ولا اعرف الإنسانه دى تانى.

وقالى دى انسانه مش طبيعيه .. وبتغير منك . وانا ساعتها استوعبت تماما كل المواقف اللى حصلت وفاتت وليه هى اتغيرت تماما بعد اخر اجازة

اتقابلنا فيها وبعد جوازى .

ساعات اقول لجوزى طب لو اتجوزت ممكن الغيره دى تروح .. ممكن ساعتها نرجع اصحاب .. الاقيه بيزعل جدا جدا من كلامى ويقولى لأ .. الإنسانه

دى مش عايزك تعرفيها تانى .

المشكله انى عارفه ان جوزى عنده حق .. وكلامه كله صح .. لكن لما بفتكر ذكرياتنا .. الخروج .. الضحك .. اعياد الميلاد .. السفر .. اجازات الصيف

بحس انها بتوحشنى وببقى مش عارفه ليه كل الغيره دى ؟؟ ليه ؟؟

عموما هى النفوس اكيد مش وحده . وحتى لو هى رجعت طبيعيه واحسن من زمان كمان ..خلاص .. جوزى مش ممكن يسمح انى اعرفها باى شكل .

ذهبيه العزيزة ...

خلى بالك من نفسك واولادك .. حاولى بجد تبعديها عن حياتك وتخبى تفاصيل حياتك عنها .. مش كل الناس بتكتفى باللى بين ايدهم

فى ناس شاغله نفسها جدا بالى عند الناس .. والنفوس مش زى بعض .

تقريبا من الموقف دا مع الإنسانه دى .. فقدت ايمانى بصداقه البنت للبنت خصوصا خصوصا لو كانت الظروف مختلفه .. واحده متجوزه والتانيه لسه .

وفى الظروف المتشابهه احب ديما ان الحدود تكون واضحه .

الإنسانه الوحيده فى الوجود اللى لا يمكن تغير منك بصفتك انثى آخرى .......................... هى الأم . بس .

دمت كل خير .

لولا

[Virus]

صداقة!!!

الكلمة دي عدت علي فين قبل كده؟؟هاتجنن وأفتكر..

مش هي دي اللي كانت مع العنقاء والغولة..

يمكن..

[المحترمة]

:lol:

حكمة في الصداقة لو حفظناها وطبقناها

ما تعبنا ولا زعلنا

احبب حبيبك هونا ما

عسى ان يكون بغيضك يوما ما

وابغض بغيضك هونا ما

عسى ان يكون حبيبك يوما ما

[ذهبية]

طبعا متشكرة ليكم كلكم على مشاركتم الرد على سؤالى لانة بجد كان يهمنى وتعبنى نفسيا بجد طبعا شكرا لك

يا عمرو على نصيحتك الغالية ان اجعل العلاقة سطحية على قدر الامكان و اتمنى من الله ان انجح فى ذلك لانى لم اتعود على ذلك لكن لا مفر

شكرا لك

يا emo معاك حق كلمتك الى انت قولتها علقت فى دماغى جدا ان لو اتجوزت واحد نفسيتة مش حلوة من جهة الناس كانك دوست على الجرح بالضبط و مرسى جدا على دعوتك الغالية

اشكرك يا ريحانة على ردك و على دعوتك الغالية و هاحاول فعلا اخلى العلاقة عادية و ربنا يقوينى على دة

اشكرك يا لولا جدا على ردك الوافى وكلماتك الاكثر من رائعة ومن النصيحة الغالية قرات قصتك وفعلا فى بعض الاحيان تغمرنا مشاعرنا ناحية اصدقائنا و يعمى عيونا حبهم و تهفو روحنا اليهم و نشتاق الى ايام الشباب و الطفولة و نتمسك بيها و بما ان وجود هؤلاء الاصدقاء يذكرونا باحلى مراحل عمرنا نتمسك بينهم فى حياتنا لنظل نعيش نفس احساس زمان و بنفس الاشخاص ووبتفس الاماكن لو امكنا ذلك

و نفوق على اننا كنا نعيش وهم و ان الزمن يتغير و المكان يتغير و كذلك احساس البشر يتغير

و لا نكتشف ذلك حتى ياتى لنا موقف او صدمة او طرف ثالث يفوقنا من حلمنا ومن الكذبة التى كنا نعيش فيها و يا حسرة على الاصدقاء

[fatfouta]

[quote name='لولا'

الإنسانه الوحيده فى الوجود اللى لا يمكن تغير منك بصفتك انثى آخرى .......................... هى الأم . بس

كلامك صحيح هى الام الانسانة الوحيدة فى الدنيا هى امك ومافيش من بعدها اى حد