هل حان وقت التغير ؟؟؟؟؟؟؟؟

[ابو محمد المصري]

اخواني الافاضل متيجوا كده نعمل كشف حساب ونشوف هل حان وقت التغير الوزاري ولا لسه شويه

نجيب من فوق لتحت

السيد رئيس الوزاره :-

غاب عن اغلب الازمات اللي شفناها واخره مشكله غزه كان فين الله اعلم شئ عادي لاننا دوله مؤسسات ومحدش يسالني يعني ايه

السيد وزير الداخليه : -

تعذيب حدث ولا حرج انتهاكات لحقوق الانسان وايه يعني كام ظابط قتل كام مواطن بش كتير اعتقالات بالجمله برضه وايه يعني لازم شويه ظبط وربط بتاع بني مزار خرج براءه بعد كل كبشه الاتهامات برضه وايه يعني مبتحصل في كل العالم

السيد وزير الماليه : -

كبشه ضرايب لازم عشان الميزانيه اعتصام بتوع الضرايب العقاريه برضه بش مشكله زياده النمو واحنا بش حاسين برضه دي غلطتنا احنا ازمه عالميه ايه ده نظامنا المصرفي عنده فايض يغطي امريكا

السيد وزير النقل : -

شويه حوداث علي بعض الطرق عادي كام الف شهيد في القطارات بش مشكله كام غريق من خيره شباب البلد في شويه حوداث وايه يعني مهما كانوا هيتخرجوا وبعدين ينتحروا اضراب كل عمال السكه الحديد وكلف البلد كام مليون بش مشكله شويه مصرين يغرقوا في العباره عادي وبتحصل مش احسن ما كانوا يتخطفوا من اي قرصان تعبان وبعدين ندوخ عشان نفرج عنهم

السيد وزير التضامن ( التموين سابقا ) : -

طوابير عيش يموت فيها كام مواطن برضه عادي ازمه انابيب تهد حيل القوي لازم برضه اهي تمارين اسعار نار ومكوي منها الشعب وايه يعني لازم نربط الحزام

السيد وزير الزراعه : -

قطنا ضرب ومبقاش له سعر عادي اسمده سعرها نار علي الفلاحين برضه عادي بنستورد اغلب منتجاتنا وايه يعني مساحتنا الزراعيه محدوده وعلي قدها ومعندناش ميه

السيد وزير الصحه : -

اكياس دم ملوثه عادي كام مواطن بيموت في المستشفيات الحكوميه لقله الامكانيات عادي وبيحصل في كل الدنيا انفلونزا طيور وجنون بقر كل العالم معرض له الدنيا قريه صغيره ياخونا كام اعتصام بش مشكله الكادر جاي جاي

السيد وزير التعليم : -

الراجل تعب معانا يلغي سته بش عاجب يرجع سته برضه بش عاجب يخلي الثانويه سنه يخرج معارضين يخليها تلاته برضه يخرج معارضين يموت طالب ولا اتنين في المدارس ده امر من قله مندسه من المدرسين عايزين يشوهوا صورته كادر بش عاجب وبرضه فيه اعتصامات من قله مندسه دروس بالهبل خربت بيت اي ولي امر حتي لو ابنه في كجي وان برضه عادي

السيد وزير التعليم العالي : -

جامعات مصر احسن جامعات في عموم العالم وترتيبها دايما في المقدمه وعشان كده الراجل عنده جامعات حكوميه وجامعات خاصه وعشان البحر بيحب الزواده نحط كمان جامعات اهليه ومحدش يسال ليه كل ده عادي ملاليم بتصرف علي البحث العلمي برضه عادي هي دي امكانيتنا

السيد وزير الخارجيه : -

تيجي ليفني بتاعه اسرائيل وتحطنا في مشكله عادي ميخرجش باي تصريح يرفع راسنا قدام العالم عادي برضه حقوق مصريين مغتربين ضايعه ومحدش بيدور عليهم برضه عادي فتحنا معبر قفلنا معبر شان داخلي ولسه هنتناقش فيه

طبعا هيخرج واحد من الفئه المندسه ويقول ان اي مشكله من دي تدعوا لاستقاله اي وزاره في العالم نقول له كل دي امور عاديه وبتحصل في كل الدنيا ولازم نستحمل لان القريه الذكيه والمدرسه الذكيه والحكومه الاليكترونيه لازم تاخد حقها

اللي حرق دمي بجد قال ايه وزير الصحه الفرنساوي خرج بتصريح رسمي كله اعتذارات قال ايه عربيه الاسعاف اتاخرت ربع ساعه بحالها عن اسعاف مريض وقال ايه كان هيقدم استقالته ياعم روح الله يخليك ده كل دي امور عاديه وبتحصل في كل العالم

عشان كل ما سبق اعلن تايدي الغير محدود والغير مشروط للحكومه واطالب بكل فخر ان الشعب هو اللي يستقيل ولا عزاء للديمقراطيه والحريه والكلام الصغنن اللي ملوش لزمه

[tarek hassan]

السيد رئيس الوزراء لسه مخدتش فرصته دا مكملش خمس سنين بعد وزارة السيد عاطف عبيد ( بناء على توجيهات سيادة الرئيس )

أما السيد أبو الغيط برضه بس من 2004 دا كفاية أنه خد بإييد ليفني والأخر ضحكت عليه وهو مش عارف حاجة

وكان من أسباب نجاحها

ودا جه بعد الوزير أحمد ماهر صاحب الواقعة الأليمة في القدس حينما تكاثرت عليه الأحذية

فعلا محتاجين تغيير حقيقي

تم تعديل 14 فبراير 2009 بواسطة tarek hassan

[ابو محمد المصري]

اشكرك اخي الفاضل علي تفاعلك معي

ونرسل نداء للسيد الرئيس تلك الحكومه فاشله ولم تستطيع ان تحقق ولو جزء مما هو مرجو منها الازمات تكالبت علي الشعب البطاله في ازدياد التعليم في تخبط الصحه اصبحت القاتل الصامت النقل نعوش متحركه صورتنا الخارجيه اصبحت في وضع لانحسد عليه الامن اصبح مفقودا في الكثير من الاماكن الضرائب اصبحت اكثر مما نحتمل الزراعه في تدهور

لاننكر ان هناك خطوات تم عملها ولكن المشاكل اكثر بكثير

والان حان وقت التغير