الكل يبارك لأخوكم ... لأن تصريح العمل بالإمارات طلع

[محمد زكى]

ارجو الإفاده هل ممكن التحاليل تكون هناك فقط ام لابد ان تكون من هنا ؟ ومتى يطلبونها منى

أفيدونى :lol: :blink:

[الباشمهندس ياسر]

مسا التماسى

بص يا عمنا

اولا الف مبروك على التاشيرة

بالنسبة للامارات ... سعادتك هتروح تعمل ورقة جامكا... ايوه اسمها كده

قدام قسم قصر النيل هتلاقى عمارة فى بدرومها حاجة اسمها هيئة جامكا

و هى الهيئة الطبية المعتمده لدول الخليج

بتروح تسلم الباسبور و 4 صور تقريبا و تستنى نص ساعة على ما اذكر

و بعدين ينادوا اسم سعادتك و تستلم الباسبور ومعاه ورقة تحويل لاحد المستشفيات

بتروح المستشفى و معاك ورقة التحويل و تدفع 180 حنية تقريبا او 120 .. مش فاكر بالظبط

و تدخل تمر على صف اطباء و تعمل اشعة صدر وتحليل يورين وشتول و ياخدوا عينة دم عشان وظائف الكبد

و تانى يوم تروح تستلم الشهادة الجميلة اللى لازم تبعتها اصلا عشان تطلعلك التاشيرة .. اللى جاتلك من غيرها ازاى ... انا مش عارف

لو السعودية او الكويت يبقى بتزود خطوة كمان وهى انك تروح المعامل المركزية بتاعت وزارة الصحة

ايوه اللى ف جاردن سيتى و تعمل تحليل فيروسات الكبد والايدز

و بالتوفيق يا عمنا

[محمد زكى]

يا باشمهندس ياسر الف شكر على شرحك الجميل

بس انت مستغرب ازاى بعتو العقد بدونها هاتستغرب اكتر لما تعرف إن أنا فى الأول بعت فقط صورة الجواز وصورة البطاقه وهما مكتوب فيهم حاصل على ومع ذلك جاء العقد بمهنة ..... كذ ولما سألت المرسل معه العقد قال صاحب العمل رتبه كبيره فى الجيش وفوق القانون قلت له طيب أغير أنا بقه الجواز والبطاقه عشان يكونو زى العقد قلى برده ده ما تعملوش انت هناك اتعملك على كده وهتمشى على كده وهتستلم على كده ...............

أظن بعد الكلام ده ممكن أمشى على كده بدون الجمكا

ولا انت رأيك ايه ؟

بصراحه العمليه ماشيه معايا من الأول بطريقه غريبه ومدهشه وربنا يكمله على خير

لك منى الف تحيه

ويا ريت اشوف تعقيب منك

[roka]

أولا ألف مبروك

ثانيا اللى جه لحضريتك تأشيرة عمل ولا أسمها أيه بالظبط

أما بالنسبة لأنك فى الباسبور حاصل على وجاءت بمهنة ده عادى لأنى المفروض أنى المؤهل المكتوب هو مؤهل الوظيفة أما موضوه التحليل فى مصر ده أول مره أسمع عنه أنا زوجى سافر من ست شهور ولم يقوم بأى تحاليل فى مصر كل التحاليل كانت هناك

فياترى ده نظام جديد ولا أيه

[amh]

برجاء الإخوة في الإمارات إفادتنا هل تحليل فيروس سي مطلوب أم لا

لأن القوانين بتتغير بشكل مستمر

وهل بذا القانون ينطبق على كل الإمارات أم بعضها

وجزاكم الله خيرا

[مغتربة]

كل التحاليل بتتعمل فى الامارات

لو انت طالعلك تاشيرة عمل

بتسافر الاول و بعدين بتعمل الفحوصات فى الامارات

و هى بتبقى عباره عن فحص دم و صوره اشعه

و يتعملوا فى يوم واحد

ارجو ان اكون افدك

[elfakhrany]

مبروك مقدما

بالنسبة للتحاليل بتكون بعد ماتوصل الامارات

تم تعديل 28 أبريل 2009 بواسطة elfakhrany

[mouna]

التحاليل الهامة تعمل في الامارات بمراكز مختصة ولا يعطونك الاقامة الا بعد الانتهاء من التحاليل لاتستطيع حتى ان تقدم على شهادة السواقة اذا لم تنتهي التحاليل