استشارة ياهل الكويت

[الطير السافر]

السلام عليكم

انا مهندس ميكانيكا ع ندي خبرة تلات سنين بعمل حاليا فى الرياض وجالى عقد بمرتب احسن فى الكويت والمرتب هو 700 دينار مع العلم ان المرتب شامل كل البدلات من سكن ومواصلات وكل شئ ياربت اى حد فى الكويت يقولى رايه فى العرض لشاب متزوج لا يوجد اولاد والسكن يكون صغير و قريب من حى الري

[الكريم]

اخى السكن فى الكويت حوالي من 150 الي200 دينار و شهري بدون اولاد ممكن 150 دينار شهري انصحك تجيب عربية حتوفر كتير انا لا اعرف مرتبات المهندسين

[الطير السافر]

شكرا جدا على الرد

يعنى سكن عوائل فى حدود 150 ومتوسط مصاريف الاكل والشرب بتعمل فى حدود كام

وهل حى الري قريب من وسط البلد ولا ايه

[SoSo R]

مساء الخير يا أستاذ طير:

السكن يختلف هتاخد غرفة وصالة ولا ستوديو لازم تبقى فاهم إن 150 دينار دة يعتبر المنينم كمان الرى دى مش منطقة سكنية دى فيها شركات وورش

أقرب مناطق سكنية ليها هى الفروانية,الجليب,خيطان بس دى مناطق مش راقية أوى و خصوصا لو هتسيب مراتك لوحدها فى البيت مش هيبقى سهل إنها تنزل من البيت لوحدها

موضوع العربية مهم جدا لأن الحياة من غير عربية تقريبا مستحيل التنقلات بالتاكسى مكلفة جدا والباصات ما بيركبهاش غير العمال و الأسيوين غير ضرورة العربية لما تجيب طلبات الأسبوع

بس إجمالا المرتب معقول جدا و هتعرف تحوش منه كويس و يا سلام كمان لو مراتك أشتغلت كدة يبقى أنت عديت و خصوصا إن لسة ما عندكش أطفال

أرجو إن أجباتى تكون وافية لكل التساؤلات

تحياتى

[smsm]

السلام عليكوم

الراتب جيد جدا كبدايةلكن المهم الشركة لانها ممكن ماتدفعش

الرى منطقة صناعية و الفروانية هى اقرب مكان ليها بس زحمة اوى

الاييجار غرفة و صالة 150 الى 200 دك

السيارة مش اوبشين دى اهم من المية و الهواء mf-:

[الطير السافر]

متشكر جدا يجماعة على ردكم ومساعدتكم

طبعا السيارة اساسى جدا حتى هنا فى السعودية يعنى بعد ادنكم هيكون متوسط المصاريف شهريا كام

وهل دفع الايجار كل نصف سنة ولا شهريا

ومعلش يسمسم قصدك ايه على موضوع الشركة ممكن متدفعش

[الكريم]

اخي العزيز المصارف الشهرية انا معى زوجتى و 3 اولاد صغيرين بصرف في حدود250الى200 دينار انا بكلمك عن نفسي دة طبعا بيختلف من واحد للتاني انت ممكن تصرف اقل لان الاولاد ليهم متطلبات كتير اما السكن فالدفع شهري على فكرة اسعار الحياة هنا اعتقد قريبة من السعودية الاكل فى الخليج اسعارة متقاربه

[الطير السافر]

شكرا على الردود

الراجل اتصل بيا امبارح وقالى ابعتلى شهاداتك و صور الباسبور عشان اعملك عدم الممانعة مش عارف ايه ديه بس احنا عندنا عدم الممانعة ديه عند الخروج النهائى ومتعرفوش ايه الاوراق المطلوبة بالظبط لكده والموضوع ده بياخد وقت اد ايه

[الطير السافر]

يجماعة مردتوش عليا هو يعنى ايه عدم الممانعة وايه الاوراق المطلوبة واد ايه بتاخد معلش باه هتعبكم معايا

[HDarwish]

يجماعة مردتوش عليا هو يعنى ايه عدم الممانعة وايه الاوراق المطلوبة واد ايه بتاخد معلش باه هتعبكم معايا

عدم الممانعة ... يعني مفيش مانع تدخل البلد عندنا وعدم الممانعة تطلق على الفيزا عامة بجميع أنواعها.

الأوراق المطلوبة ... صورة الجواز وشهادة التخرج.

بتاخد أد إيه ... دي بئه إنت ونصيبك وحسب الحال في وزارة الشؤون الاجتماعية ... لو الأمور ماشيه تمام ومفيش خربطة يبقى من اسبوع لاسبوعين بالكثير لو الأمور مش تمام ممكن شهر أو شهرين ... لإن جت فترة منعوا إصدار تأشيرات العمل وبالتالي المصريين ما سكتوش وقاموا داخلين من اتجاه تاني وهو زيارة تجارية وبعد ما تدخل بزيارة تجارية تتحول لإقامة بمجرد التعاقد ....

وليا لقاء ثاني معاك بس بعد ساعة البريك ...

تحياتي

[الطير السافر]

انا متشكر جدا على الاجابات وانا بصراحة خايف من حاجة الا تكون عدم الممانعة هى عبارة عن فيزا زيارة او تجارية او اى حاجة لانى بصراحة مش عايز اغامر بالشغل هنا واروح على فيزا زيارة وانتم عارفين الباقى فياريت تدلونى

[الطير السافر]

انا بعت للشركة انهاردة الاوراق بس فى حاجية تانية عايز اسالكم فيها انا صور الجواز مكتوب فيها مهنة غير مهنة مهندس لان الشركة الاولى بعتتلى الفيزا بالوصف ده وده نفس صورة الجواز اللى بعتها للناس بتوع الكويت السؤال هو التاشيرة الجديدة هتبقى بنفس مسمى الجواز ولا ايه ولا بالشهادة ولا ايه النظام هناك

متشكر جدا للاجابات

[HDarwish]

ممكن يطلبوا منك تغيير المهنة في الجواز ... ولو إن المهنة بتعتمد إعتماد كلي على شهادة التخرج واللي بتكون متوثقة من مصر وبعد كده تتوثق من الكويت (قنصلية وخارجية) ... ما تقلقشي من موضوع المهنة ده في الغالب ما بيبقاش فيه مشكلة كبيرة هنا زي اللي بنسمعه في السعودية ....

وحسب حجم الشركة وسمعتها وتعاملاتها ... إن شاء الله ما يكون فيه مشاكل ...

ونصيحة من أخوك الصغير .. راجع نفسك وفكر تاني .. إحسبها كويس ...

لو سألتني ليه ... هيبقى هناك كلام كثير لازم أقوله بس للأسف أنا وقتي شوية بيبقى قليل ما بقدرش أكتب كثير

تحياتي وتمنياتي لك بالتوفيق والسداد

[الطير السافر]

انا متشكر يدرويش على الرد

بس ياريت لو فاضى اليوم تقولى على الحاجات الكتير ديه عشان مغامرش مع ان بحب المغامرة اوى بس الافضل تكون محسوبة

وعلى موضوع عدم الممانعة هى ممكن تكون زيارة او تاشيرة تجارية ولا ديه خلاص زى الاقامة يعنى ولا ايه النظام هناك

[الحاج فوزى]

توصل بالسلامة أن شاء الله ..

عدم الممانعة أو الامانع هى تأشيرة تستخدمها لإجراءات الكشف الطبى وخلافه ثم تأتى بها للكويت لإستكمال إجراءات الإقامة ..

الراتب على 3 سنوات خبرة راتب جيد ..

الحد الأدنى للسكن المقبول غرفة وصالة يتراوح ما بين 150 - 200 دينار ( وتختلف طبعا من شخص لأخر ))

تستطيع بعد مرور 3 أشهر الحصول على سيارة بالقسط .. لو أخذت سيارة موديل السنة 1600 سى سى سيكون القسط فى حدود 75 دينار شهريا ً وممكن طبعا سيارة مستعملة والقسط طبعا ً يختلف نزولا ً وصعودا ً حسب السيارة وثمنها ..

المأكل والمشرب يختلف من أسرة لأخرى ومن مستوى لأخر ومن رغبة فى الحد من النفقات من شخص لآخر .. أعرف أسر لا تنفق 100 دينار فى الشهر .. وأخرى تنفق مالا يقل عن 500 فى الشهر ..

سيكون من الجيد التأكد من إسم الشركة وحجم أعاملها ومدى الإستقرار الذى تتمتع به حاليا ً .. فأنا شخصيا ً لا أنصح حاليا ً فى ظل الأزمة بالتنقلات إلا فى أضيق الحدود طالما الوضع مستقر مع صاحبه حتى مرور الأزمة .

بخصوص باقى تفصيلات الإجراءات بالكويت يسعدنى أن ارسل لك ملف بكافة التفاصيل .. كان وصلنى وكنت أجريت عليه بعض التعديلات المهم أصبح دليل للقادم للكويت فيما يخص الإجراءات الرسمية ومن أين وكيف ..

سأبحث عنه حيث أعتقد انى وضعته بمنتدى أخر وسأرسله لك إن شاء الله ..

[الطير السافر]

انا متشكر جدا يحاج فوزي على المعلومات الجميلة ديه ومتشكر لكل من مر على الموضوع

وبجد انا منتظر جدا ملفك الجميل اللى بيشرح الموضوع

وشكرا

[HDarwish]

والله بعد كلام الحاج فوزي مافيش كلام يتقال ... كفيت ووفيت يا حاج فوزي

تعرف يا الطير المسافر إنت بتسأل على الوضع لما هتسيب السعودية وتيجي الكويت

طب إيه رأيك لو هنسألك عن العكس يعني لما واحد عايز يسيب الكويت ويجي السعودية (الرياض تحديدا)

تقدر تنصحه بإيه ومجالات الشغل اخبارها ايه ومتوسط الرواتب والمعيشة في حدود كام لزوج وزوجة وطفل صغير ... يعني على قد ما تقدر من معلومات ... وهل في ظل الظروف اللي احنا فيها دي في مجال إن الفرد يحصل على وظيفة كويسة ولا الأبواب كلها مقفولة بالقفل...

دمت بخير

[الطير السافر]

اهلا بيك استاد درويش انا على فكرة من الرياض برضة انت تشرف

المهم المعيشة فى الرياض على اللى انا بسمعه منكم الحياة رخيصة نسبيا طبعا يعنى مثلا السكن فى حدود من 10 الف سنويا بتدفع كل ستة شهور يعنى انا مثلا ماجر شقة تلات غرف وصالة وحمامين ومطبخ فى منطقة كويسة ب 17 الف سنويا وده اللى انا اعتقد مش هلاقيه فى الكويت ولا حتى شقة استوديو بالسعر ده

وبالنسبة للاكل والشرب انا اعتقد انه واحد وبس وباقى المصاريف طبعا ارخص من اى دولة فى الخليج وبالنسبة للشغل طبعا انا معرفش مجالك ايه عشان احدد المرتبات اللى انا اعرفها بس انا ملاحظ ان هنا بيدوا بدل سكن وبدل مواصلات وده اللى كمان مشش موجود فى الكويت وعموما اغلب الشركات ببتدى تلات شهور مرتب بدل سكن

بس انا مش لاقى حاجة تانية اقدر اضيفها بس انت لو عندك اى سؤال احنا فى الخدمة ومتشكرين تانى مرة

[HDarwish]

لا شكر على واجب

تنور الكويت

[الطير السافر]

احبائى بالكويت

انا وصلى العقد والتاشيرة الحمدلله خلاص بس فى شوية حاجات عايزها من خبرائنا بالكويت

اولا : انا جالى التاشيرة والعقد بس فى مشكلة ان المرتب اللى متفقين عليه هو 700 دينار والعقد مكتوب فيه 300 وكلمت صاحب الشركة قالى ده بس فى العقد الرسمي للتوثيق وكده ومرتبك زى متفقنا اكيد

انتوا ايه رايكم وكمان ادا كان ده عادى هناك ولا ايه

ثانيا : العقد مجرد ورقة واحدة مفيهاش نهائيا اى شئ من اللى اتفقنا عليه على كلامه

وعلى كلامه ان انت اما تيجى هنعمل عقد فيه كل الشروط