فية حاجة اسمها سحر بجد ؟؟؟؟؟؟؟؟

[ذهبية]

لى اخ شاب فى مقتبل العمر لا ينقصة اى شىء من حيث الاصل والادب و المستقبل و الشقة و المستوى المادى و الاجتماعى والوسامة و الحمد الله

لكن حظة وحش جدا بدون اى اسباب

من ثلاث سنوات حتى الان لم يعثر على زوجة المستقبل كل حاجة ماشية معاه بالعكس فى كل شىء مفيش بيت ندخلة الا لو رحب بينا جدا و بعدها لا اعرف ما يحدث و تنقلب الاية

او هو نفسة لا يريد ان يكمل الى نعوزة لا يعوزنا و اللى يعوزنا لا نعوزة احترت واحتار دليلى معاة

كتير قالوا ليا دة معمول لة عمل ولازم يتفك علشان يتجوز و ربنا يسهلة

للعلم كانت كل بنت عم ليا تحبة حبا شديدا و ماماتها الىل هى زوجة عمى كانت بتموت نفسها علشان تجوزة لبنتها لكن والدتى ما كانت تحبها و رفضت الجواز نهائى قالت زوجة عمى انة مش هيتجوز نهائى هل ممكن تكون عملت لة عمل فعلا او سحرتة لة

اعرف ان كلامى مش عقلانى نهائى لكن بجد مقلتوش الا بعد لف تلات سنين شاف اكتر من الف عروسة يمكن و مفيش فايدة والله و الله كان لة خطوبتين اتفسخوا قبل تلبيس الدبلة بيوم فى الفجر العروسة تصرخ و تقول مش عايزها بعد ما المعازيم اتعزمت و حضرنا كل شىء و السبب غير معروف مع انهم قبلها بدقايق كانوا سمن على عسل

وهو ايضا كان فك خطوبة بعد ما كان معجب بالبنت جدا و فجاة مش عايزها بدون اى اسباب انا هاتجنن

كل اللى بيحصل لينا دة بجد مش طبيعى

انا مش لاقية اى سبب نهائى لا ام هو يرفض لا ام هى ترفض فى النهاية الموضوع بيبوز حتى لما الطرفان بيوافقوا بتجى قبل اعلان الخطوبة و الموضوع بيبوز من اسباب تافهة جدا

هل فى حاجة اسمها عمل و سحر

طيب اعمل اية بجد انا محتارة خاصة ان والدتى متوفية و انا اعتبر بالنسبة لة كل شىء

انا فعلا حزينة على حالة و الايام و السنين بتعدى و مفيش اى امل

لو قولت انة بيشوف فى اليوم عروستين و اكتر مش هتصدقوا ولا موضوع بيمشى مع انة ناقصة اى شىء اعمل اية و اية الحل ؟؟؟؟؟؟؟؟؟؟

هل فعلا معمول لة عمل فية حاجة اسمها سحر بوقف الحال ؟؟؟؟؟؟؟

[MZohairy]

لو لسه فيه سحر في الدنيا كان زماننا غلبنا اسرائيل

و كنا قدرنا نوقف حال بوش مثلا

[سهل جدا]

السحر موجود ولا يوجد أدنى شك في ذلك

ألسنا نقرأ القرآن؟

الم يذكر صراحة في أكثر من آية منها مثلا: {.... ولكن الشياطين كفروا يعلمون الناس السحر }

أكيد كلنا نعرف قصة موسى وفرعون وذكر الله للسحرة فيها

ألم نقرأ قول الله: {فإذا حبالهم وعصيهم يخيل إليه من سحرهم أنها تسعى}

هذا في القرآن , أما في السنة النبوية الصحيحة

فقد ثبت أحاديث كثيرة تدل على وجود السحر

وثبت كذلك وجود رقى معينة تعصم الناس من السحر

لكن تبقى مشكلة كبيرة

وهي أن كثير من الناس كلما حصل له أي مشكلة ظن أنها بسبب السحر , حتى أصبح كثير من الناس يعيشون في الأوهام ..

السحر مرض كأي مرض له أعراض معينة وله علاج

بالنسبة لأخو حضرتك يا مدام ذهبية فممكن تعرضيه على أحد يكون عنده علم بأمور السحر ديه وعلاجه وأدعيته

بس إحذري من الدجالين

تم تعديل 21 فبراير 2009 بواسطة سهل جدا

[se_ Elsyed]

لو لسه فيه سحر في الدنيا كان زماننا غلبنا اسرائيل

و كنا قدرنا نوقف حال بوش مثلا

أتفق تماماً مع زهيري ...

السحر في القرآن البعض فسره على إنه تدخل إنساني بغرض التخريب ..

وحتى سحرة فرعون .. فمن المعروف إن السحرة بيستخدموا ادوات ومواد معينه تخلينا نظن إن اعمالهم دي من فعل الجان .. واظن إن الحبال والعُصي اللينة لو دهنت بمادة الزئبق بطريقة معينه فهايتخيل لنا إنها بتتحرك .. كذلك في ذلك الوقت لو كان حد من السحرة دول يعرف شوية كيمياء صغيرين وخلط بعض المواد ببعضها وعملت دخان أو تحولت إلى شكل أخر . فكانوا هايقولوا عليها أبو السحر مش سحر وبس ...

- كان لي زميل دراسة معايا من إبتدائي لكن جينا في ثانوي هو دخل سكة العسكرية وأنا كملت عادي .. المهم صاحبنا إتقدم ييجي لـ 100 واحده ... وكل مرة تُفسخ الخطبة أو تصل لكتب الكتاب ويُطلق بعد ما العملية تتفشكل ... فصعب على والدتي راحت إتوسطت له عند ناس قرايبنا عندهم بنات زي الفل وخطب واحده فيهم ... وإتفسخت الخطوبة برضوا بعد فترة قصيرة ... وكان السبب كما يقول هو إنه معمول له عمل وفضل يلف على الدجالين وعلى المعالجين القرآنيين الدجالين أيضاً ، لإن القرآن مش محتاج وسيط عشان حد يقرأه لي أو يعالجني أو يصلي لي .... وطبعاً إدفع يا عم الحج وهات عرف ديك أصفر .. وميه مقري عليها ... وشنب ناموسه حامل ...

فلما سألنا الناس اللي كان خاطب بنتهم هو الراجل ده كان تعامله معاكم إزاي ؟

عرفنا إن الزبون - ولم أكن أعرفه بصراحة من الناحية المالية بالشكل الكافي - أتاري البيه كان مسمار مقطوم وبخيل إيحه .... فلما واجته بهدوء بهذه الإدعاءات على اساس العشم اللي بيننا ، لقيته يرد عليه ويقول لي : والله كدابين ... طب ده أنا لسه عازمهم كلهم عندي - ييجي 10 أنفار من البنت واهلها نركز مع بعض - والكلام ده كان نقول سنة 2000 أو 2001 مثلاً ... عزمتهم عندي عشان أفرجهم على شقة الزوجية يا عم س س ونزلت جيب لهم غدا .. كلفني

كلفني

17 ج !!!

فقلت له : 17 ج يا معفن ؟!!!!!!!!!!!!!! ياض ده أنت لو جبت له فول من غير طعمية كنت هاتصرف أكثر من كده ... آه نسيت اقول لكم ... إنه من 3 سنوات إتجوز وإتصلت به أبارك له فعرف إني نازل مصر بعد إسبوع فطلب موبيل حديث إسمه 6600 .. وكمان ميموري زيادة وكل ده ثمنهم موجود وهايعطيني المبلغ أول ما أوصل ... وجبتهوله وروحت باركت له وأخدت لك هدية الجواز واعطيته الموبيل ومستلزماته كمان فلقيته بيقولي إنه إتعذر وأتصرف في المبلغ وبإذن الله هايدفع لي المبلغ ( حين ميسره ) فمارضيتش أمد إيدي عليه وأنا في بيته ... لكن لم أُحرج منه وكلمته بعدها بيومين وقلت له إنت خدعتني واللي ما معاهوش ما يلزموش ولو سمحت هات المحروق ده أنا هابيعه بخسارة ... فبعدها كلم اخويا وقال له ( س س أتغير قوي .. هو بيعمل كده ليه ؟ هو متحاج فلوس ؟ ما هو على قلبة قد كده ومش هايأثر معاه ثمن الموبيل ) وأخدت الموبيل من عينه وأخويا باعه لي في نفس اليوم

من ضمن الأسباب أيضاً إن البيه كان لسه قاري فاتحه بس عايش في دور عتريس الحِمش ... فالبنت كانت تعمل في وظيفة محترمة ... وعشان وسائل المواصلات والروحه والجاية ، لازم تبقى حركتها خفيفة وتلبس ملابس مريحه فكان معظم لبسها عبارة عن تاييرات وبنطلونات تحتها وهي محجبة ولبسها في منتدى الحشمة .. فالبيه حكم عليها بلاش تلبس بنطلونات مع إن البنطلون اساساً مش باين .... فالبنت إتخنقت منه مع شوية حاجات تانية فوق بعض ورمت الدبلة في وشه ...

هذا هو السحر من وجهة نظر البعض يا سادة ...

تصدقوا أنا سألته وقلت له : إنت إيه ظروفك اليومين دول ... يعني بتصلي بإنتظام ؟ فقال : لأ ... بأصلي على سطر وأسيب سطر

مرة اخرى : هذه هي الشماعة اللي ناس كتيرة بتعلق عليها خيبتها .. او أسباب فشل موضوع ما أو عدم توفيق من عند ربنا ..

وبدل ما يبحثوا عن الأسباب ويتعبوا نفسهم .. فبيروحوا لازقينها في السحر والشعوذة والاعمال والحركات ..

يا ست ذهبية ... إنت أدرى الناس وعارفه إن الزواج قسمة ونصيب ... وعسى أن تكرهوا شيئاً وهو خير لكم ... وقد تكون زيجة من اللي إتفكرشت لاخوكي دي .. قد تكون كان في ها عذابه وشقاه ... وقد يكون الناس دول هو ما يستهالهمش وربنا شايل له نصيبة في علم الغيب وكل شيء بأجل وكتاب ..

وبالتالي عليه ألا يضع هذا في باله ... وأن يتقرب لله أكثر .. ويعرف إن ما أصابه ما كان ليخطئه وما أخطئه ما كان ليُصيبه ...

وأكاد أؤكد لك وأبصم بالعشرة .. إنه لو دخل في سكة العلاج من السحر والكلام ده .. فمش هايخلص وحالته هاتسوء ...

على فكرة ... لو الموضوع كده كان زمان الصحابة المقريبن من الرسول هم أفضل المعالجين القرآنيين في تاريخ البشرية ..

أو كانوا قعدوا في مسجد المدينة وشوية يقعدوا في مكه .. ويقعدوا يقرأوا على إمبراطورتي الفُرس والروم وإن ربنا يجيهم ويحط عليهم ويمحوهم من الوجود .. وبلا جهاد بلا غزوات بلا تعفير هدوم ..

------------

قصة أخرى عشتها من 3 سنوات ورأيتها وعاصرتها بنفسي ..

فكنت قد حكيت لكم على إبن أختي اللي بيمر بمرحلة مراهقة وأبوه وامه شديدين عليه جداً بحجة إنهم عايزينه يطلع راجل ... والولد بقى يتعامل معاهم بطريقة خالف تُعرف وعايز يثبت شخصيته وهما مش فاهمينه وما إلى ذلك .. ومش هاحكي لكم عن الثقافة والتعليم ومراكزهم المرموقة .. إلا إنهم بدل ما يبحثوا عن الأسباب المباشرة اللي هما السبب فيها طبعاً ، فهما مش ممكن يغلطوا من وجهة نظرهم .. راحوا قايلين إن الولد معمول له عمل وسحر .. وأهل الخير - اللي هما أهل الشر أساساً - دلوهم على واحد بيعالج بالقرآن وما بياخدش مليم .. فقولت أخدهم على قد عقلهم واروح معاهم بعربيتي وأهي تجربة أخوضها لأول مرة في حياتي ... وفعلاً روحنا للراجل وأقسم بالله لإن الشقة عنده مليانه عيانين ... فراح مقابلنا في مدخل البيت وكشف عالواد في بير السلم وفضل يتمتم ويقرأ عليه أيات قرآنية ... وأنا عارف ومتأكد إنه لازم يريح الزباين .. فقال لهم إن الولد معمول له عمل - ده لو ماقلش كده الناس تاكل وشه - وبالمرة بقى إن اختي كمان ما هي كانت معانا معمول لها عمل، أنا قلت والله لو بص ناحيتي وقال والواد الحليوه ده كمان معمول له عمل ومدفون في بطن سمكه بوري .. قلت هاديه بضهر إيده على بوزه ولا مانع من بعض الشلاليت - ... الروشتة بقى : عليهم بالصلاة في وقتها والمواظبة على الأذكار الصباحية والمسائية ( يا سلام !!! .. طب ما دي حاجات معروفة ومش محتاجة الشحططة وبير السلم ) ... في الأخر زوج أختي جه بيدي له فلوس فقال له بغضب : حاشا لله ... أنا ما باخدش فلوس .. لكن عندي زيت رجل برغوث يتيم مقري عليه والقزازة الصغيرة بخمسين جنيه .. لوووووووووليييييييي ... إطلع من دول يا عم الشيخ .... فتاخد القزازة وتدهن بها قفا المريض وهو هايخف على طول ...

شوفتوا السحر ...

فقلت ما هي العملية حلوه أهي يا س س بلا غربة بلا شغل بلا قرف .. ما تشتغل إنت كمان وتفك الاعمال وتربط الفلتان .. وتريح الهفتان ... فقعدت مع الواد زي ما حكيت لكم قبل كده واعدت تظبيط صواميل دماغه وثبتته عالاخر وواجهت اختي بالحقيقة المُرة وهي إن هي بتعنُتها هي وزوجها ومحاولتهم تقويم العود الأخضر الطري بطريقة خاطئة .. فكده هايكسروه ...

وأهو إلى حد كبير الولد إتظبط ونجح العام الماضي ودخل هندسة ... والبركة في الشيخ س س المعالج الروحاني والطبيب الرباني

وحييييييييييييييييييي .... الخير جيييييييييييييي ..

آه نسيت أقول لكم إزاي السحر بيفرق بين المرء وزوجه وبين الناس وبعضها ..

لما حد بيروح لمعالج قرآني او عالم رباني من دول .. فلازم يرمي له كعب كده وهو إن في ناس قريبين منه هما اللي عاملين له عمل ... فطبعاً أقرب الناس للواحد بيبقى زوجته مثلاً أو زوجها أو حد عامل معاه فصل بايخ .. وبس

بيسيب الناس تشتغل بقى على بعض والحرب تشتغل وهو المستفيد من ده وده .. وكإنه بيبيع سلاح للناس ...

مذيعة قناة إقرأ " بسمه وهبي " قبل ما تتجنن وتخلع الحجاب وتلبس سواريهات صارخه .. عملت حلقة عن السحر وجابت واحد من المعالجين الروحانيين يعالجها على أساس إنها كانت عامله إنها خليجية وجايه تتعالج في مصر ... فأقنعها إن أولادها أو حد من داخل بيتها هو اللي عامل لها العمل وإن الموضوع محتاج جلسات كتيرة عشان نفك الاعمال دي ...

[dawn walker]

انا كنت ناوى اكتب تعليق بس س س منه لله

موتنى من الضحك على قصصه الشيقة ومش عارف اكتب الا السطرين دول

تم تعديل 21 فبراير 2009 بواسطة dawn walker

[سهل جدا]

يا أستاذ سي السيد يا حبيب قلبي

الدين مش بالقصص والحواديت الظريفة

الدين يعني قرآن وسنة نبوية صحيحة

وبالنسبة لقضية السحر ديه؛ فهي قضية تمس العقيدة.. فما ينفعش أن نتكلم فيها إلا من خلال النصوص الشرعية

وحتى سحرة فرعون .. فمن المعروف إن السحرة بيستخدموا ادوات ومواد معينه تخلينا نظن إن اعمالهم دي من فعل الجان .. واظن إن الحبال والعُصي اللينة لو دهنت بمادة الزئبق بطريقة معينه فهايتخيل لنا إنها بتتحرك ..

معليش اسمحلي الكلام ده مخالف لظاهر الآية الكريمة (سحروا أعين الناس)

لاحظ دقة اللفظ في القرآن الكريم، فلم يقل أنهم استعملوا مواد معينة ولا زئبق ولا غيره وإنما قال أنه سحروا الأعين نفسها ..

طبعا في بعض السحرة يستعينوا بأشياء ومواد كيميائية معينة فلا أنكر ذلك، ولكن ليس بالضرورة أن يستخدموها ..

لكن المشكلة كما ذكرت من قبل إن في ناس بتبالغ في هذا الشيء .. وأي مصيبة تحصلها تقول إن السحر هو السبب زي قصة صاحبك البخيل ده

والحق أن نقول أن السحر قد يكون سببا لبعض المشاكل (وهي قليلة جدا) وقد لا يكون كذلك ..

أما بالنسبة لموضوع الدجالين, فأنا معك في أنها مشكلة كبيرة

ولذلك الأفضل للمسحور (إذا ثبت أنه مسحور فعلا) أن يعالج نفسه عن طريق الأدعية والرقية الشرعية, ولا مانع من الاستعانة بمن يثق بدينه وأمانته في هذه الرقية ..

وربنا يكفينا شر السحر والسحرة

[se_ Elsyed]

طب إشرح لنا بإستفاضة يا سهل إزاي سحروا أعيُن الناس ؟

وهل سحر أعيُن الناس يختلف عن حركات خفت اليد التي يمارسها بعض الأراجوزات والعروض السحرية الأن واللي بيقوم الساحر فيها ببلع البيضا وهو مخبيها في كم الجاكيت أو يخرج لك من البرنيطة أرنب وحمام وفيران ؟

وهل السحر يُمكن أن يُغير قدر أو شيء مكتوب أو يؤثر على شيء قائم بالفعل ؟

وهل أنا قلت شيء يتعارض مع إن الدين قرآن وسُنة ؟

[Emo]

تفسير سورة الفلق

قُلْ أَعُوذُ بِرَبِّ الْفَلَقِ مِنْ شَرِّ مَا خَلَقَ وَمِنْ شَرِّ غَاسِقٍ إِذَا وَقَبَ وَمِنْ شَرِّ النَّفَّاثَاتِ فِي الْعُقَدِ وَمِنْ شَرِّ حَاسِدٍ إِذَا حَسَدَ

--------------------------------------------------------------------------------

هذه السورة يأمر الله -جل وعلا- نبيه -صلى الله عليه وسلم- أن يستعيذ برب الفلق، وهو الله -جل وعلا-. " والفلق": هو الصبح في قول جمهور المفسرين.

مِنْ شَرِّ مَا خَلَقَ يعني: من شر مخلوقات الله -جل وعلا- فما له شر من هذه المخلوقات فهو داخل في هذه الاستعاذة.

وَمِنْ شَرِّ غَاسِقٍ إِذَا وَقَبَ يعني: من شر الليل إذا دخل؛ لأن الليل إذا دخل تتسلط فيه شياطين الإنس، وشياطين الجن والدواب والهوام، وقد جاء عن النبي -صلى الله عليه وسلم- في حديث عائشة -رضي الله تعالى عنها- أن النبي -صلى الله عليه وسلم- أراها القمر، وقال: استعيذي بالله، فإنه الغاسق إذا وقب .

لكن جمهور المفسرين عن التفسير الأول، وقالوا: إن هذا الحديث يدل على أن ظهور القمر علامة على دخول الليل، فالنبي -صلى الله عليه وسلم- أشار إلى علامة دخول الليل، فلا ينافي ما فسره به جمهور العلماء، وهذا الحديث صححه جمع من العلماء كالترمذي والحاكم وابن خزيمة وابن حبان والحافظ بن حجر في آخره.

ثم قال -جل وعلا-: وَمِنْ شَرِّ النَّفَّاثَاتِ فِي الْعُقَدِ يعني: من شر الأنفس التي تنفث في العقد لتسحر الناس؛ لأن السحرة ينفثون في العقد التي يعقدونها، من أجل سحر الناس، وينفثون عليها، "والنفث ": هو الريق والهواء الذي يخرج من الفم، أو شيء من الريق وهو دون التفل، وفوق النفخ فهذا يسمى نفثا، فهذه نفث الساحر إذا نفث في العقد. يقول العلماء: نفسه شيطانية فتتكيف مع هذه الأشياء، فيحصل السحر للمسحور.

وهذه السورة أمر الله -جل وعلا- نبيه -صلى الله عليه وسلم- أن يستعيذ فيها من شر المخلوقات أجمعين، يعني: من شر المخلوقات أجمعين، ثم خصص ذلك بالليل، وخصه -أيضا- بالنفاثات في العقد.

وأيضا: وَمِنْ شَرِّ حَاسِدٍ إِذَا حَسَدَ يعني: من شر الحاسد إذا حسد في وقت الحسد الذي يحسد فيه الإنسان؛ لأن الإنسان قد يكون متلبسا بهذه الصفة يحسد الناس، لكنه في بعض الأحيان لا يحسد، لكن في حال حسده فهو مأمور من النبي -صلى الله عليه وسلم- أن يستعاذ به في مثل هذه الحالة.

فخصص النبي -صلى الله عليه وسلم- هذه الثلاثة أشياء؛ لظهور ضررها وعظمها وكثرتها. وهذا يدل على أن الحسد، وهو تمني زوال النعمة عن الغير صفة مذمومة، لا تليق بمسلم؛ لأن الله -جل وعلا- أمر النبي -صلى الله عليه وسلم- أن يستعيذ من صاحبها، وأما الحسد الذي يكون بالمعنى المقارب للتنافس، فهذا جائز شرعا كما قال -صلى الله عليه وسلم-: لا حسد إلا في اثنتين: رجل آتاه الله مالا فسلطه على هلكته في الحق، ورجل آتاه الله القرآن فهو يقوم به آناء الليل .

فمن حسد أخاه المسلم -بمعنى غبطه- تمنى أن يكون مثله، ولكنه لم يتمن زوال النعمة عن أخيه، فهذا من باب الغبطة، ومن باب الحسد المباح، وأما إذا تمنى زوال النعمة عن أخيه المسلم فهذا من باب الحسد المذموم، الذي أُمر النبي -صلى الله عليه وسلم- أن يستعيذ من صاحبه.

النَّفَّاثَاتِ فِي الْعُقَدِ هذا استعاذة من شر أهل السحر الذين ينفثون في العقد، وهذا يدل على خبثهم، وأما الليل فهو مخلوق من مخلوقات الله -جل وعلا- لا يجوز سبه لذاته، وإنما أمره الله -جل وعلا- أن يستعيذ من شره لما يقع فيه.

وأما الليل والنهار والأيام والليالي فهذه لا تذم لذاتها، ولا يسند إليها شيء؛ لأن الذم والمدح إنما يقع فيها، ولهذا قال -صلى الله عليه وسلم-: لا تسبوا الدهر فإن الله هو الدهر قال الله -تعالى- في الحديث القدسي: يؤذيني ابن آدم فيسب الدهر، وأنا الدهر أقلب الليل والنهار نعم.

يعني لو السحر مش حقيقية واقعة مكنش القرآن أمرنا بالإستعاذة منه..

لكن التعامل مع السحر ..هو ده اللي محتاج مواضيع نحكي فيها..عشان نبين الدجل والشعوذة المتلبسة ف الموضوع..

وأعتقد نماذج من اللي حكها أستاذ سين ..توضح بجد أزاي في بشر بتستغل حاجة الناس وضعفهم وتسوق عليهم الهبل..

اما بالنسبة لموضوع اخوكي ياااستاذ ذهبية..ترى ده الوضع السائد والله مش تقلقي عندي أخ شاف عدد مهول من البنات ونفس الحكاية اللي يوافق بيها ماتوافقش..والعكس..

يبقى كده أكيد ده موضوع قبول..

ومع كدهخلي اخو حضرتك يداوم ع أذكار الصباح والمساء..ويشغل سورة البقرة كل يوم..وأهم حاجة مايستسلمش للإحساس ده..ويارب نفرح بيه قريب..

دمتم سالمين من الشرور..

[MZohairy]

عندي اعتقاد شخصي في ها الموضوع يا اخواني

اي ربط بين أي احداث سيئه تحدث للإنسان و بين السحر هو نوع من انواع الحث على الخمول و السلبيه و التراجع بل و الشر ايضا

فبهذه الطريقه سيربط العامه بين اي حدث غير مرغوب فيه و السحر و من قام بسحرهم ايضا

بل و سيتحول الامر احيانا الى محاولة الانتقام ممن عمل لنا هذا السحر!

زي ماتشات الكوره الافريقيه اللي كنا بنتغلب فيها و نقول اصلهم بيسحروا!!!

يبقى مفيش داعي للاجتهاد و العمل حيث ان الخصم ساحر و بالتالي مفيش فايده

و هذه دعوه لكل السحراء العرب ليقوموا بسحر ما ضد اولمرت

او لكل سحراء المسلمين ليقوموا بسحر ضد راسم الرسوم الكاريكاتوريه الدانمركي

قل لن يصيبكم الا ما كتب الله لكم يا اسيادي

و لكم الف تحيه

[الباشمهندس ياسر]

عندي اعتقاد شخصي في ها الموضوع يا اخواني

اي ربط بين أي احداث سيئه تحدث للإنسان و بين السحر هو نوع من انواع الحث على الخمول و السلبيه و التراجع بل و الشر ايضا

فبهذه الطريقه سيربط العامه بين اي حدث غير مرغوب فيه و السحر و من قام بسحرهم ايضا

بل و سيتحول الامر احيانا الى محاولة الانتقام ممن عمل لنا هذا السحر!

زي ماتشات الكوره الافريقيه اللي كنا بنتغلب فيها و نقول اصلهم بيسحروا!!!

يبقى مفيش داعي للاجتهاد و العمل حيث ان الخصم ساحر و بالتالي مفيش فايده

و هذه دعوه لكل السحراء العرب ليقوموا بسحر ما ضد اولمرت

او لكل سحراء المسلمين ليقوموا بسحر ضد راسم الرسوم الكاريكاتوريه الدانمركي

قل لن يصيبكم الا ما كتب الله لكم يا اسيادي

و لكم الف تحيه

i am not agree with this words

i will be back to rediscusse again you

sorry for english, iam not at my desktop

[الملكه]

ايوه فى حاجه اسمها سحر وعين وحسد واعمال

الرسول عليه الصلاه والسلام سحر

ولان فى ناس بجد اشرار ونفوسهم ضعيفه و يتمنوا زوال الخير من غيرهم سواء اختلفوا معهم او لمجرد الحقد لان فى ناس بتكره تشوف حد سعيد او مرتاح او حتى هادى او راضى بما قسمه الله له فى ناس بتستغل الضعف دا وتستغل النفوس الضعيفه دى فى توجيههم لفعل الشر وله طرق كتيره ممكن يكون منها دجل ومنها ممكن يكون حقيقه والناس الضعيفه دى بتبقى على اتم استعداد انها تدفع اى فلوس فى مقابل انها تأزى وتدمر وتاخد اللى ملهاش حق فيه ودا كفر واللعياذ بالله فى ناس بتحترف المهنه دى وتساعد على الاذيه منها حقيقه ومنها دجل بس الدجالين بيتعرفوا بسرعه بس اقسم بالله السحر موجود ومفعوله بيبقى لفتره معينه والسحر بيتجدد كل اول شهر عربى ودا ارخص الاعمال ولكن السحر الدائم وهوه السحر الاسود والعياذ بالله دا اللى ميتجددش وبيبقى غالى جدا وبيتعمل ممكن باسم الام ممكن باطرك وممكن برش معين وممكن فى الاكل او الشرب ومش عاوزه اقولكم ان مش يكون بالتفريق بس لا ممكن يكون بالحب واحده مش عارفه تتجوز واحد تعمله عمل عشان يحبها والعكس واظن دى حاجه تستاهل انها يدفع فيها فلوس ( مع حد نفسه ضعيفه) ممكن السحر بتسوئ السمعه وممكن للحقد فى العمل حد ياخد مكان حد ممكن يكون ان مفيش حاجه تكتمل مثل حاله اخو دهبيه

وزى اللى بيعملوا الاعمال دى وبتصيب فيهم دجالين برضه اللى بيعالجوا فيهم كدا

واخيرا لا يفل الحديد الا الحديد يعنى لازم العلاج ولازم التحصين

وقل اذا اجتمع الانس و الجن على ان يضروك بشئ لن يضروك الا بشئ قد كتبه الله لك

طبعا كلامى دا مش معناه ان اى حد حصلوا حاجه يبقى عمل او سحر لا مش كل واحد عنده صداع يبقى عنده ورم فى المخ

دا نبذه مختصره من تجارب انا واثقه منها جدا لانها كانت لاقرب الناس ليه والحمد لله تم علاجهم بنجاح بفضل الله ويقين ان دا قدر وقل لن يصيبنا الا ما كتب الله لنا

تم تعديل 26 فبراير 2009 بواسطة الملكه