ازاي أعمل رز ؟ طريقة عمل الرز ؟

[شاب مصري]

السلام عليكم ورحمة الله وبركاته

خبراتي في عمل الرز كلها تنتهي بنتيجة واحدة

مقرمش من بره وطري ومعجن من جوه smk:

يعني بيكون محروق من الحواف

لكن من قلب الحلة بيكون عبارة عن كتلة واحدة زي حتة العجين mfb:

وأعتقد ان المشكلة في توقيت وضع المياه او كمية المياة او ظبط النار

أو المشكلة فيا أنا :P

ده بيحصل معايا في الرز المصري والر البسمتي على السواء mfb:

دلوقت ياريت طريقة خطوات عمل الرز بحيث يطلع قابل للأكل الآدمي

أعتقد الطريقة واحدة للرز المصري والبسمتي الباكستاني

فما هي الطريقة التي تؤدي لعمل ذلك الرز المنشود ؟

[Scorpion]

إضغط هنا

[لولا]

بص يا هندسه اهم حاجه فى عمايل الرز هى .... اخلاص النيه

وبعدين حدد نوع الرز ؟

رز ساده

رز بالشعريه

رز مفلفل

1- يغسل الرز

2- يكرر غسل الرز

3- نتأكد من غسل الرز

4- نصفى الرز

5- نحط الرز فى الحله ( مثال كوبيتين )

6-نغلى الميه بره

7- نحط فوق الرز كوبيتين ونص ميه او ثلاته بحيث تكون ارتفاع الميه عن الرز بمقدار 2 سم .تستعمل نفس الكوبايه اللى قسنا بيها الرز .. تقريبا كل كوبايه رز مش مستوى بتحتاج كوبابه ونص او كوبايه وربع ميه للسوا حسب نوع الرز .

8- معلقه ملح

9- زبده او سمنه او زيت معلقه اتنين حسب الدايت اللى انتا عامله

10- اول ما يغلى بعد كام دقيقه توطى النار خالص خالص وتغطى الحله وتسيبه 20-30 دقيقه يستوى على مهله وبلاش تفتح كل شويه وتقلبه عشان الرز ميتكسرش او يعجن .

11- تفتح الحله .

12- تغرف فى الطبق

13- بالهنا والشفا

هى الطريقه صعبه شويه بس معليش كل حاجه فى اولها صعبه mfb:

الرز بالشعريه بقى خليه فى المرحله القادمه بعد النجاح فى عمل الرز ساده .

وكل رز وانتا طيب mfb:

تم تعديل 22 فبراير 2009 بواسطة لولا

[شاب مصري]

شكرا للفاضل Scorpion

شكرا للأخت لولا .

[alexa]

السلام عليكم

يا عمي انت وجعت قلبي مع ان اسهل حاجه في الطبيخ هو الرز

وعلي فكره فيه حله مخصوصه للرز

رز بالكهربه

بس انا اقولك رز الشورت كات

حط الرز بعد غسله في حله يارت تكون قعرها تخين او موزع حراره

ويكون ليها غطاء محكم

المهم

حط الرز بعد غسله وعليه ميه من الكاتل (مغليه) لغايه ما الميه تغطي الرز وترتفع عنه مقدار عقله اصبع

وتحط الملح والزبده وتغطي

وتحط الحله علي نار هاديه

عشر داقئق وتقلب الخلطه دي

كمان عشر دقائق و تشوف الدنيا مشيه ازي

بعد كده يبقي فاضل يا عشره يا خمسه

وكل بالهنا

مافيش اسهل من كده

:sad:

[aimen]

ياعمنا اشترى صحتك وعافيتك wst:: wst:: wst:: وهات لك طباخة ارز ... تبدأ اسعارها من 40 ريال الى 200 او اكثر على ما اعتقد

ضع مقدار ارز ومقدار مياة وشوية ملح و هى كلها 10 دقائق و تنتهى القصة كلها

ولا تتعب قلبك وتفكيرك وكل شوية تروح تشوف الرز

لأ على البوتجاز

لأ وطى البوتجاز :blink:

[شاب مصري]

شكرا يا أليكس ويا أيمن

استعنا على الشقى بالله :blink: wst::

[بندق أفندى]

عندى لك طريقة مجربة وسهلة وتعطيك رز مختلف تماما عن كل اللى فات

اغسل الرز .. حط معلقة زبدة أو معلقتين زيت حسب رغبتك

حط عليهم الرز على نار هادية .. وكل شوية قلبه .. لحد ما الرز يتفلفل ويتشرب الزبدة أو الزيت (بياخد حوالى 20 الى 25 دقيقة)

حط عليه الملح وماء مغلى حوالى 1 سم أعلى من سطح الرز .. وعلى نفس النار الهادية ولا تقلبه ولا تيجى ناحيته

لما يستوى خليه فى الحلة على الأقل ربع ساعة يهدى ويكمل سوا

الرز البسمتى .. اشترى نوع جيد . اغسله .. حطه فى الحلة .. اغلى الماء .. حط أى كمية مية مش هيجرى له حاجة .. ضيف له كم فص هيل وكم حبة فلفل أسود سليم

ولما يستوى شيلهم ..

بعدين ساعة الأكل تقدر تعمل منه اللى انت عاوزه .. يعنى تعمل رز صينى .. تعمل رز بالزبدة تعمل رز بالفاصوليا الحمراء .. زى ما انت عاوز (انا بأعمل فه كده وبيبقى كأنه خام وساعة الأكل تحدد انت عاوز ايه)

وجرب ده

[medopharm]

بص ياعمنا

الطبخ ده مزاج

وخصوصا الرز

والطريقه المفضله لطبخ الرز أهى

تجيب الرز وتغسله كويس

وبعد كده تجهز بصله تقشرها وتغسلها وتقوم مخرطها

وتقلبها على الرز اللى غسلته

وبعد كده تقوم جايب فصين او تلاته توم وتقطعه على الرز برضه

وتضيف الميه بقى وتكون على أد كميه الرز وتزيد شويه

يعنى كوبيتين رز تحطلهم كوبيتين ونص ميه

وتحط معلقة ملح وشوية زيت صغيرين

وتبدا تحطهم على النار لمده 5 او 10 دقايق

بعد كده تقلل النار عشان الرز مايتحرقش

وتقلبه كل شويه عشان يكون متجانس والبخار الناتج عن السوى يسويه كله زى بعضه

وبعد كده تغطيه وتهدى النار خااااااااالص لحد مايستوى

هتاخد احلى رز بنكهة ماحصلتش

وبالهنا والشفى

[شاب مصري]

شكرا يا بندق باشا وشكرا يا ميدو بيك

انتظروا المفاجأة في البيان التالي

[شاب مصري]

بيان "1"

تم اليوم انجاز حلة رز بسمتي معتبرة والنتايج كانت ممتازة

وكله بالخبرات الوطنية :egyflag: bv:- بالاعتماد على نصايحكم الغالية

ربنا يخليكوا لينا يا رجالة

[سهيلة]

مبروووووووووووووووووووووووووووووك على الارز عقبال المكرونة وباقى الاكلات

[سهيلة]

استاذ بندق بعد اذنك

هوة الارز اللى ف الصورة دة مكوناتة اية

بصراحة شكلة شهى جداااااااااااااا

[بندق أفندى]

استاذ بندق بعد اذنك

هوة الارز اللى ف الصورة دة مكوناتة اية

بصراحة شكلة شهى جداااااااااااااا

شوفى حضرتك .. هو رز بسمتى مسلوق مع هيل وفلفل أسود حب (مش مطحون) يتشالو بعد السلق

تجيبى معلقتين زيت سمسم (مفيش يبقى زيت ذرة )

تحطى معاهم بروكلى متقطع وبسلة وذرة أصفر حلو (هتلاقيه مجمد أو أحيانا كيزان أو عرانيس)

على النار مع التقليب من وقت لأخر لمدة 5 دقائق .. بعدين سعادتك تحطى الرز .. وتقلبيه مع الجماعة سابقيه

ثم تضيفيى قليل من الصويا صوص .. ما تخليه يغير اللون زيادة .. وحسب ذوقك فيه صويا صوص حلوة وفيه مالحة وفيه معتدلة .. بس بسيطة خالص أهه

[شاب مصري]

:sad:

مبروووووووووووووووووووووووووووووك على الارز عقبال المكرونة وباقى الاكلات

الله يبارك فيكي أخت سهيلة .

[شاب مصري]

استاذ بندق بعد اذنك

هوة الارز اللى ف الصورة دة مكوناتة اية

بصراحة شكلة شهى جداااااااااااااا

شوفى حضرتك .. هو رز بسمتى مسلوق مع هيل وفلفل أسود حب (مش مطحون) يتشالو بعد السلق

تجيبى معلقتين زيت سمسم (مفيش يبقى زيت ذرة )

تحطى معاهم بروكلى متقطع وبسلة وذرة أصفر حلو (هتلاقيه مجمد أو أحيانا كيزان أو عرانيس)

على النار مع التقليب من وقت لأخر لمدة 5 دقائق .. بعدين سعادتك تحطى الرز .. وتقلبيه مع الجماعة سابقيه

ثم تضيفيى قليل من الصويا صوص .. ما تخليه يغير اللون زيادة .. وحسب ذوقك فيه صويا صوص حلوة وفيه مالحة وفيه معتدلة .. بس بسيطة خالص أهه

يا عيني يا ليلي على المزاج العالي :sad: :sad: :sad:

[سهل جدا]

إيه يا عم شاب مصري

فضحتنا كده وسط الستات , عشان يقولوا علينا مش فاهمين حاجة ؟؟

هو في أسهل من الرز

طيب اسأل على حاجة صعبة شوية

طريقة عمل البيض المقلي أو المسلوق مثلاً

أو ....

آه , افتكرت

الكشري بتاع المحلات ليه دائما البيوت عمرها ما بتعرف تعمل زيه ؟؟

السؤال ده فعلا محيرني ..

حد يعرف له جواب ؟؟!!!

[سهيلة]

شكراااااااااااااااااااااااااا جزيلااااااااا استاذى العزيز بندق

وسيتم تجربة الوصفة فوراااااااااااااااا

[شاب مصري]

إيه يا عم شاب مصري

فضحتنا كده وسط الستات , عشان يقولوا علينا مش فاهمين حاجة ؟؟

هو في أسهل من الرز

طيب اسأل على حاجة صعبة شوية

طريقة عمل البيض المقلي أو المسلوق مثلاً

أو ....

آه , افتكرت

الكشري بتاع المحلات ليه دائما البيوت عمرها ما بتعرف تعمل زيه ؟؟

السؤال ده فعلا محيرني ..

حد يعرف له جواب ؟؟!!!

والله يا عم الحاج أنا مكنتش عاوز أسيح

بس وصلت بيني وبين الرز لطريق مسدود :sad:

دايما مقرمش ومحروق من بره .. ومعجن و ملزق من جوه :sad:

فقلت ما خاب من استشار وبصراحة الحمدلله كان الرز يستاهل بؤك

أما بالنسبة للكشري فنا مؤمن ان كشري البيت هو الكشري اللي برز وعدس أصفر بس .. ودي أكلة جامده جدا مع البطاطس المقلية و شوية مقبلات وممكن بيض مقلي وبتنجان مقلي

بس مش كل محافظات مصر تعرف الكشري ده

أما كشري المحلات فده مينفعش فالبيت لازم تروح المحل وتقعد في جو الكشري موود وتضرب الكشري والشطة (بلاش الدقة مش بأفضلها ابدا لكرهي للثوم وكرهي للخل .. باكره الفتة لنفس الأسباب)

وتحبس ببيبسي أو عصير وقصب

وتقول اللهم ديمها نعمة :sad:

لكن في البيت مش هتاخد دماغ الكشري دي خالص :sad:

[Virus]

أما بالنسبة للكشري فنا مؤمن ان كشري البيت هو الكشري اللي برز وعدس أصفر بس .. ودي أكلة جامده جدا مع البطاطس المقلية و شوية مقبلات وممكن بيض مقلي وبتنجان مقلي

بس مش كل محافظات مصر تعرف الكشري ده

إيه ياعم انت..الكشري الاصفر ده بتاع ميت غمر بس..جميع الحقوق محفوظة!!

وممكن التغاضي عن طبخه في باقي أنحاء جمهورية الدقهلية..فقط

إنما لو طلعت من محافظة تانية ها جيبلك شرطة المصنفات واعملك قضية ملكية فكرية..(اللي هي أخت بدرية عدل :P )

ياسلام عليه بالسمنة البلدي...مفيش حاجة تقدر تنافسه إلا الكبيبة الغمراوية برضو..

صحيح تحيا الدقهلية عاصمة الطبيخ في الشرق الأوسط bv:-

تم تعديل 25 فبراير 2009 بواسطة Virus