هل نصفك الاخر على علم بوجودك هنا

[nana]

هل زوجك او زوجتك تعلم انك قاعد هنا فى حوارات المصريين بتتحاور مع اخرين سواء نساء او رجال واذا كانت لا تعلم اولا يعلم ماذا تعتقد سيكون رايها او رايه لو عرف حتى لو كانت المناقشات جاده؟

[سهل جدا]

والله يا أخت نانا سؤال محرج جدا

بصراحة عن نفسي ممكن أقول لزوجتي إني مشترك في المحاورات , بس لا يمكن أقولها على إسمي

طبعا حضرتك عارفة ليه

عشان أرائي الشخصية اللي بنشرها حول موضوع التعدد :sad:

والتي أذكرها صراحة دون أي كسوف أو حياء , لأني أراه حقا

المشكلة إني بحب مراتي جدا وبخاف إنها تزعل من كلامي في المواضيع ديه ده زي ما كل الستات المتجوزين زعلانين مني دلوقتي ومش طايقين يشوفوا لي تعليق..

طيب بالنسبة لأخواتنا المتزوجات هنا , فهم مش بيشوفوني , فالموضوع بيعدي

لكن مراتي بقى هاتبقى ليل نهار في وشي , هاروح منها فين ؟؟ :lol:

وإذا كان في تجاوزات فربنا يغفر لنا جميعا

[Emo]

سؤال ف غاية الأهمية..

وفعلا متوقف عليه حجات كثير جدا ف سعادة الأسرة..

يعني من رأيي ان مدام الإنسان صح..يبقى مافيش حاجة هتتخبى..

واللي هيخبي يبقى أكيد عارف ان ده يزعل شريك حياته..

ومدام يزعله -حتى لو كان شيء عادي وموضوعات جادة_ فالحاجة اللي منقدرش نعملها قدام شريكنا ..يبقى منعملهاش من وراه ..مدام مابيطالبناش بقطع رحم او حاجة تغضب الله..

لأن بصراحة ده عامل بالظبط زي موضوع الإشتراك ف نادي او الكتابة في مجلة او غيره..

يعني بيخلق عالم تاني..لازم شريك حيااتي يكون ع علم بيه..

احتراما ليه..ولمشاعره ولرغباته..وكمان عشان يقدر يكون جنبي لو حصلت مشكلة..

عن نفسي ان شاء الله لما ارتبط هعرف شريكي باي عالم تاني لي تواجد فيه او حتى كان لي تواجد فيه..

ولو حسيت مجرد احساس انه هيضايق..هبتعد لحد مانتكلم بالعقل ف لحظة صفاء ..ماقتنعش ..

معلش الموضوع متعلق بانه هو مش اي حد تاني..جنتي وناري..

وانا عاوزة الجنة ...

يبقى مع السلامة يامنتدى...

[سجدة شكر]

اذا أنا مش عارف أني قاعد مراتي هتعرف :sad:

[Emo]

المشكلة إني بحب مراتي جدا وبخاف إنها تزعل من كلامي في المواضيع ديه ده زي ما كل الستات المتجوزين زعلانين مني دلوقتي ومش طايقين يشوفوا لي تعليق..

يا أستاذ سهل..اللي يزعلها في حضورها ..

يزعلها أكثر ويجرحها في غيابها..

وبعدين هو فين موضوع التعدد ده خليني ادخل اشوف..!! :sad:

[سهل جدا]

يا أستاذ سهل..اللي يزعلها في حضورها ..

يزعلها أكثر ويجرحها في غيابها..

إيه يا ست إيمو , إنتي عاوزة توديني في داهية ولا إيه

طيب دا أنا كتبت مرة التعليق ده

مش عارف لو شافيته ممكن تعمل في إيه ؟؟

يا أم كريم

أنا ما قولتش إن الراجل يتجوز في السر

أنا كل اللي قولته إنه لا يشترط إنه يستأذنها, لكن ممكن يخبرها بعد ما يتجوز علطول أو في يوم الجواز

يعني يحطها قدام الأمر الواقع

وفي الغالب السناريو اللي ببيحصل هو اللي هاحكلكم عليه ده

بعد الراجل ما يعملها ويتجوز على مراته يقوم جايبلها هدية حلوة ويدخل عليها ..

الزوج: ازيك يا روحي عاملة إيه واحشاني موت

المدام: إيه وحشاك ديه , ما انت كنت لسه معايا الصبح

الزوج: بردو بتوحشيني حتى لو غبت عنك ساعة

المدام: إيه الحكاية مش عوايدك , عاوز إيه

الزوج: تصدقي يا حياتي أنا بحمد ربنا إنه رزقني بواحدة زيك

المدام: انت هاتعيش الدور ولا إيه , خلّص، عاوز إيه ؟؟

الزوج (بعد أن يبلغ ريقه ويتلعثم): أصلى يا حياتي .. أنا بصراحة اتجوزت

المدام: نعم يا ....

وطاخ طيخ طوخ بوووووووووووووووووم

(وعلقة تفوت ولا حد يموت)

وبعدين يعمل نفسه زعلان ويمشي بره البيت

ويروح لنمبر تو (الزوجة التانية) يبات معاها 3 أيام إذا كانت ثيب , أو 7 أيام إذا كانت بكر

زي ما الحديث بيقول..

وتوتة توتة خلصت الحدودة

ملحوظة: ممكن الست تطلب الطلاق في الأول، وده في الغالب بيستمر لمدة شهر, بس بعد كده بترضى بالأمر الواقع

تقول في نفسها: هاروح فين بالعيال

وأهو ظل راجل ولا ظل حيطة

حرام عليكي , عاوزاني أعرفها الخطة الجهنمية ديه

وبعدين هو فين موضوع التعدد ده خليني ادخل اشوف..!! :sad:

اتفضلي يا ستي:

إضغط هنا لزيارة الموضوع

[Emo]

يا أستاذ سهل..

اللي مش ترضاه لنفسك..مش ترضاه لغيرك المفروض..

مش كمان ااقرب حد ليك..

واللي بيحب حد مايجرحهوش مهما كان..

يتنفز كل الوسائل الودية الأول..وقبل مايقدم كمان ع اي تصرف يديله علم انه هيعمل كده..

مش تقلي سياسة القمر الواقع..

يااستاذي ده الواحدة فينا لو قصت شعرها لزوجها من باب التغير وعملاه لي مفأجاة ..هيخربيت اللي جابوها..

ليه..عشان سياسة الأمر الواقع اللي حضرتك بتقلها..

مع انه ليه..وعشانه..

بس شوف الكيل بمكيالين ده هو اللي مضيعنا..

وع كل حال سلامتك من الداهية..الله لايوريك مكروه ابدا...

[capitshino]

بصو

انا فى ناس معرفهم انى انا كابتشينو وناس لا. لاسبا مختلفة يصعب ذكرها هنا.

اما نصفى الاخر عند وجوده فسوف اخبره لا محالة لانى مابعملش حاجة غلط .

شكرا جزيلا

[عصام]

موجودة وكمان عضوة :sad:

[Folana]

السلام عليكم ورحمة الله.....

نعم...أى نعم...نصفى الأخر على علم طبعا بوجودى هنا وفى أى مكان صحرا ان كان او بستان....

ومش نصفى الاخر بس...ده الربعين التانيين...(بناتى)....وخطيب بنتى...وأختى كمان عضوة معانا بس بعافية شوية اليومين دول...وحارس العقار والبقال اللى بجوار المنزل....

والدعوة عامة........ :sad:

[Spanish Eyes]

عارف طبعا بس هو ملهوش في المنتديات بس اي واحد ممكن يعرفني لأن اسمي هو اسمي الحقيقي فعادي مش شايفاها مشكلة، على فكرة الأخ سهل جدا طلع مش سهل خااااااالص

تقبلوا تحياتي

[أبو محمد]

كل اللى فى البيت عارفين ..

ما لا تستطيع أن تدافع عنه أمام الناس .. لا تفعله فى الخفاء

[fatfouta]

ايوه طبعا عارف ولولاه ماكنتش عرفت يعنى ايه منتدى

لانه هو اللى دلنى عليه لما لقانى زهقانة وقاللى فيه منتدى كويس كله مصريين ادخلى وسجلى وناقشى

وعارف اسمى وكمان هو مشترك هنا طب وايه يعنى

طالما مافيش حد تخطى حدوده وكلنا بنحترم بعض يبقى انا مش شايفة اى ضرر

وشكرا على موضوعك ده يا نانا

[aimen]

الحمد لله معنديش نصف تانى

وتقريبا مش فى الخطة انه يكون هناك نصف تانى اصلا

[ام بلال]

أيوه زوجي عارف و جميع القبيلة ، ودايما أحكي له و أستشيره في أشياء كتيرة إن لم يكن كلها أو أحكي له ما يجد ،

المواضيع المثارة في إطار الإحترام المتبادل ، حتى عندما أرسل رسالة على الخاص لأحد من الأعضاء أحكي له لآخذ رأيه

محاورات المصريين منتدى محترم ، رغم كل الخناقات اللي بتحصل أحيانا في المناقشات :blink:

[HDarwish]

أنا مش شايف مشكلة إن النصف الآخر يكون على علم بوجودي هنا ... هو إحنا بنعمل حاجة غلط ولا إيه ...

ده بالعكس ساعات الكتابة بتوضح حاجات كثير قوي للنصف الآخر ممكن ما يعرفش يقولها الإنسان بلسانه فيكتبها بإيديه ...

بس تصوروا ساعات فعلا بفكر في الموضوع ده من ناحية ثانية ...

إزاي ...

الصراحة ... الصراحة ساعات بتعمل مشاكل والواحد خاصة وهو بيكتب بيبقى صريح مع نفسه أكثر ما بيكون ساعة لما يتكلم ... وبالتالي ممكن في موضوعات معينة أو آراء ما والإنسان بيكتب ومنفعل في الكتابة يلاقي نفسه بدون قصد قال حاجات المفروض ما كانت تتقال ...

وبعدين معايا أنا خادتني الصراحة مرة ثانية ...

بعد إذنكم ...

رسالة للنصف الآخر

" إوعي تاخدي الكلام ده على محمل شخصي ... ده رأيي بصفة عامة ... وإنتي عارفة ومتأكده إني كتاب مفتوح ومفيش حد زيي في الصراحة "

ربنا يستر

[سهل جدا]

واللي بيحب حد مايجرحهوش مهما كان..

يتنفز كل الوسائل الودية الأول..

طيب واللي استنفذ كل الطرق الودية مع نصفه الآخر يعمل إيه؟!!

على فكرة الأخ سهل جدا طلع مش سهل خااااااالص

تقبلوا تحياتي

مرسي .. :blink:

أنا بستريح جدا لما أعرف إنه أخواتنا المتزوجات معرفين أزواجهم إنهم في المنتدى

ربنا يحفظلكم أزواجكم وزوجاتكم جميعا

[Emo]

طيب واللي استنفذ كل الطرق الودية مع نصفه الآخر يعمل إيه؟!!

يحترم رغبته ومشاعره..ويضحي برغباته عشانه..

مش هو ده الحب ولا انا متهيئلي..!!

[سهل جدا]

يحترم رغبته ومشاعره..ويضحي برغباته عشانه..

مش هو ده الحب ولا انا متهيئلي..!!

:blink:

في فرق بين منع الرغبات ومنع الحقوق

حق الزواج الثاني والثالث والرابع , هو حق للرجل وحده

وكما أنه لا يحق للرجل أن يمنع زوجته من أي حق شرعي لها (كزيارة أمها مثلا) فلا يحق للزوجة أن تمنع زوجها حق له

يا نهار أبيض

مراتي دخلت على الماسنجر دلوقتي

بتكلم بجد والله

يا لطيف ..

يا ترى صدفة ولا إيه الحكاية ..

[capitshino]

يحترم رغبته ومشاعره..ويضحي برغباته عشانه..

مش هو ده الحب ولا انا متهيئلي..!!

wst::

في فرق بين منع الرغبات ومنع الحقوق

حق الزواج الثاني والثالث والرابع , هو حق للرجل وحده

وكما أنه لا يحق للرجل أن يمنع زوجته من أي حق شرعي لها (كزيارة أمها مثلا) فلا يحق للزوجة أن تمنع زوجها حق له

يا نهار أبيض

مراتي دخلت على الماسنجر دلوقتي

بتكلم بجد والله

يا لطيف ..

يا ترى صدفة ولا إيه الحكاية .. :blink:

يا عم سهل جدا انت بقى ليك اعداء وخلى بالكك علشان ممكن حد يكون بلغ فيك .