يا اهل الدين والدنيا افيدونى

[enjisultan]

اسالكم الدعاء لزوجة اخى الغالية المرحومة الحجة ربنا يرحمها كانت باكلمها فى التليفون زى كل يوم نصبح على بعض قولتلها الو ازيك يا حيبتى قالتلى الحمد للة وفجاة هى ضحكت ضحكة بسيطة وبعدين سمعت صوت حد بيشخر لمدة 5 ثوانى وفجاة سمعت مامتها قالتلها انتى كنت بتضحكى ولا لية بتشخرى انتى نمتى ولا اية لانها فاعدة عندها لان اخويا فى السعودية وبعدين سمعت مامتها واختها بييقولو الحقونا بدكتور وزحمة طبعا انا ااغصابي باظت فاخدت بناتى ونزلت جرى بينا حوالى 20 دقيقة بالعربية وصلت لقيتها توفها اللة كانو جابو دكتور قبل ما اوصل بيتهم المهم انا حاولت اعمل اي حاجة بالرغم من ان اللى الدكتور انا للة وانا الية لراجعون بس بصراحة موقف مهيب انا اول مرة بعمرى حد غالى عليا اشوفوا مات وكمان اسمع صوت طلوع روحها دى حاجة واللهى العظيم ....مش مصدقة اية يعنى اللى خلانى اطلبها فى اللحظة دى بالذات يعنى انا بجد كنت عايزة افضفض واحكى لحد وكمان انا نسيت اقولكوا انها عمرها32 سنة وعندهم ولد وحيد عمرة 4 سنوات رنا يتولاة برحمتة معلش مضطرين كنتوا تسمعوا القصة دى عشان انا عايزة نصيحة منكم هى عندها اخت لم تتزوج عمرها 45 سنة واخى عندة 35 سنة بيفكر انة يتجوزها عشان ينفع ياخد ابنة معاة انا الاول كنت موافقة مع علمى التام انها غير اختها خالص فى الشكل والاخلاق الا ان والدتى وكل من فى العائلة رافض تماما مع انى كنت حاسة ان دى الوحيدة اللى تنفع تربية لانى عندى بنتين 5و3 سنين واختى كمان عندها ولد4 سنين دا غير ان الولد عنيف مامتة اللة يرحمها قبل وفاتها بيوم فعدت تقولى انة لما بيروح المدرسة بيوحشها اوى بس اول لما ينزل من باص المدرسة وتنزل تاخدة يقوم ضربها بالقلم عى وشها كانت تقولى نفسى يحضونى كدة زى اى ام وابنها وبجد هى كانت حنينة جدا جدا بشهادة طوب الارض. انا رغم انى اصغر واحدة فى اخواتى ودى كانت زوجة اخوبا الكبير الا انى قوية التاثير اوى علية فمش عارفة اقولوا اية يعنى هو لو اتجوزها عشان يرضى ابنة هل هيندم بعد كدة ارحوكو افيدونى انا خايفة اقف مع اهلى الولد يتعذب وخايفة اقف مع اخويا يرجع يندم.

[newcomer]

لا حول و لا قوة الا بالله العلى العظيم

انا لله و انا اليه راجعون

ربنا يغفر لها و يرحمها و يرحم امواتنا جميعا

مش عايزة اقلب عليك و على المواجع و الاحزان

بس حقيقى موقف رهيييييييييييييب و عظيم

ربنا يصبركم و يصبر مامتها و اهلها و يعوض ابنها خير

بصى.....هاقولك حاجة...... اول حاجة

عندى اعتقاد ان مينفعش اسعدك و انا تعيسة!!

يعنى مش معقول اخوكى يتجوز واحدة اكبر منه ب 10 سنين

و مفيهاش مميزات زى اختها

و المقارنة مش هاتكزن فى صالحها على طول الخط

و طبعا اكيد هايكون ...كل طرف عنده معاناته نتيجة حساسية الوضع

و هى كمان هتبقى حاسه انها بتتجوز سد خانة!!

و الولد شقى ...زى ما بتوصفى

لعوامل كتير....انا من رأى عيلتك

جوازه زى دى ...مافيش حد هايكون سعيد فيها

و لا حد الولد الصغير

بيتهيأ لى ان احسن وضع ....انه يفضل مع جدته لأمه

مع الأتفاق انها الوحيدة اللى يكون لها حق التوجيه و التربيه

علشان الولد مايتشتتش بين مناهج التربية المختلفة

لعماته و خالاته

و ان شاء الله ربنا هايحط واحدة مناسبة فى طريق اخوكى

تعوضة و تتقى ربنا فى الطفل اليتيم ده و تكون ليه نعم الأم

ارجو انى ماكنش طولت عليكى

و ربنا يصبركم و يقدم ما فيه الخير

[الباشمهندس ياسر]

انا مش موافق انه يتزوج اختها

[التونسى]

البقاء لله اختى الكريمه .. وتهون باذن الله

انا شايف ان فرق السن كبير .. وكمان حيكون فيه عقد للمقارنه بينها وبين اختها رحمة الله عليها .. ومفيش عاطفه .. يعنى زواج غير متوافق تماما .. انا رأيى الانتظار فتره لغاية ما النار تبرد شويه .. والعمليه تهدا ..وبلاش الاستعجال تماما .. وبعدين بعد كده يتم التفكير بشكل اكثر عقل ومنطق فى اللى مفروض يتعمل

والله الموفق .. ولكى ولاهل المتوفاة الصبر والسلوان

[nana]

البقاء لله وربنا يرحمها ويغفر لهاويصبركم ويحفظ ابناؤها

بالنسبه لى ارى ان بالنسبه لانسه عمرها 45 فرصه زواجها مره اخرى ضعيفه واذا تزوجها اخو سيادتك فلن يخسر شىء فاذا كانت زوجه صالحه فستكون ام لابناؤه احسن من غيرها واعتقد ان ذلك لكان يسعد زوجته واذا لم يوفقا معا فهناك رخصه الطلاق انا عارفه ان الطلاق مش سهل ولكن بالنسبه لاختها فلن تخسر الكثير فتجربه الزواج بالنسبه لها احسن من بقائها دون زواج

والله اعلم والامر فى الاول والاخر لمساله القبول

[ذهبية]

البقاء الله وربنا يصبر والدتها و زوجها و ابنها على الفراق انة قضاء الله لا يد لنافية

انا لا ايؤيدك فى راى انة يتزوج اختها لاسباب عديدة انها اكبر منة بعشر سنوات و انها اخت الراحلة هذا سوف يخلق عامل نفسى شديد جدا على اخو حضرتك و لن يشعر بالسعادة معها

ثانيا لو فكر انة ينجب مرة اخرى افتكر ان الانجاب فى هذة السن بيكون صعب او محفوف بالمخاطر

ثالثا بشهادة منك انها مختلفة تمام عن اختها الراحلة فى الشكل و الطبع والاخلاق

يبقى مبرر الزواج اية ؟؟؟؟ لا اعتقد انة يوجد اى شىء يشجع على اتمام هذة الزيجة

انتى كدة فكرتى فقط فى مصلحة الولد الضغير و لم تفكرى بمصلحة اخوكى كرجل

ممكن جدا ربنا يرزقة بسيدة فاضلة تعوضة خير تكون زوجة صالحة و ام فاضلة

انصح اخوكى فقط بالتريث و حسن الاختيار و ربنا يعوضة خير بامر الله

[enjisultan]

ربنا يكرمكوا جميعا على ردودكو بس انا النهاردة اتكلمت معاة وهو بيقولى دا هيبقى جواز على الورق كمان .وفى شروط هاحوطها لها لازم تلتزم بيها فقولتلوا طب لو زعلت على اختها حبة وبعدين كمان ما استحملتش العيشة فى الغربة قالى زى ما رديتوا يبقى الطلاق بس دا بقى هيدمر اي حاجة حلوة ما بينة وبين اهلها بدل ما يزيد الود... فى مشكلة تانية انا عاتيزة رايكم فيها انة زمان قبل ما يتجوز المرحومة كان مرتبط ببنت واهلها فركشوا الجوازة ومن حوالى سنة اتقابلنا كدة على الفيس بوك المهم البنت محترمة وطيبة وغلبانة واهلها اجبروها انها تتجوز واحد وبهدلها وفى الاخر سرق منها فلوسها ونصب عليهم واتطلقت والبنت دى كانت رافضة تماما حتى مجرد التفكير فى اخويا لانى مجرد التفكير فية هيبقى خيانة لمراتة. هى طبعا عرفت عن طريق الفيس بوك الموضوع من تعازى اصحابى المهم هيا عايشة برة اتصلت بيها قالتلى انها عندها استعداد تبقى ام لابنة وتتجوزوا بس مش عارفة يعنى تعمل اية ....الموضوع بقى معقد جدا انا ساعات بحس بالذنب انى زقها علية لانها خيانة للمرحومة بس شوية اقول ما هو لو سعيد هيقدر يسعد ابنة انا دلوقتى محتاجة تقولولى اعمل اية واخويا وقتوا محدود ولازم يسافر والبنت مش هتقدر تيجى مصر غير بعد شهر والنبى قولولى اعمل اية وازاى افتح مع اخويا الموضوع انا متاكدة انة كان بيحب البنت دى اوى وممكن يرفض عشان مايحسش الذنب ساعدونى انا منهارة وحاسة انى بقى عندى مية سنة من الهم دا..

[بركة]

بما أن عنوان موضوعك يحمل عنوان يا أهل الدين والدنيا يبقى إنت جبتي المفيد :

أولا تصلوا استخارة وبعدها ربنا باذن الله هييسرلكم اللي فيه الخير .

قال تعالى" وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون"

ثانيا عدم التسرع .

ثالثا ان لانظلم اي طرف لانه لكل طرف في الموضوع حق

وربنا يجعل للجميع الخير ويرزق أخوكي اللي تستاهله ويرزق ابنه الام اللي تحن عليه .

وانا لله وانا اليه راجعون .

[enjisultan]

العقدة هى انة مسافر كمان شهر ونص بالكتير وحلف انة ما يسافر غير وابنة معاة ومش هيسيبوا لحظة هى دى الغقدة لانة لو صبر هيكون الامور هديت... يا جماعة انا الموضوع دا ماثر عليا خصوصا انى كنت اقرب واحدة للمرحومة وكانت غالية عليا وكنت غالية عليها مستصعبا اوى اقولوا روح اتجوز واحدة تانية مع ان واللهى التانية غلانة وبنت حلال دلونى بقى ازاى اقدر افاتحوا فى الموضوع دا

[enjisultan]

الحمد للة جوازتوا من اختها باظت

[ام بودى]

اختى العزيزة عظم اللة اجركم فى فقيدتكم وانا للة وانا الية راجعون اسمحى لى ان احدثك بصراحة وبدون زعل ما هذا الذى يحدث فى محيط اسرتكم كم مر من الوقت على وفاة المرحومة حتى تتلاحق الاحداث بهذا الشكل هل انتهى حدادكم عليها هل افاق اخيكى من صدمة وفاة زوجتة وهى الشابة الحبوبة التى ماتت فجأة مهلا اختاة على رسلكم لماذا تسبقون الاحداث تقولين لمصلحة الولد وهل الولد دون رعاية انة فى كنفكم احسبة الان مقدما على كل اطفال العائلة مدللا من الجميع ويحظى بعناية الكل اما ان هذا وضع مؤقت وسيحتاج لمن ترعاة فيما بعد فلنترك هذا لفيما بعد واما اصرار اخيكى ان يأ خذ ابنة معة فلا احسبة قال ذلك الا حزنا على زوجتة ورغبتة ان يكون معة قطعة منها لا خوفا على ابنة فهو يعلم ان ابنة سيكون بخير مع جدتة واخوالة وخالاتة واهل ابية وانتى انتى العمة الحنون التى كانت تحب امة فالحل هو التروى فيأخذ كلا شئ حقة تستوفى المرحومة حقها فى حدادكم عليها لا ان (اسمحى لى )تحلوا اخرى محلها . اختها لا ثم لا ثم لا فهى لا تصلح بكل المقاييس صديقتك لا داعى للعجلة من يدريكى لعل اخيكى يجد الانسانة المناسبة ولكن بعد حين اتركو الوقت للجروح ان تشفى والتفكير يكون اهدأ ومن ثم القرار يكون اصوب وفقكم اللة

[ترنيم]

إنا لله وإنا إليه راجعون

أسأل الله أن يجعلها آخر أحزانكم وأن يجعل مثواها الجنة

أوافق الأخت أم بودى الرأى تماما فما من شك أن أخوكى وهو فيه ما فيه من حزنه على فراق زوجته

فى حالة تسمح له بالتفكير السليم وخاصة فى أمر هام وهو أملر حياة مثل الزواج

فلم العجلة ..فليتوكل على الله ويسافر وإبنه هنا فى وسط أهله وأعتقد أن أقدر واحدة على رعايته هى جدته لأمه

وهو كما قلتى كان مقيما عندها فلن يشعر بغربة معها

وأخوكى بعد أن تهدأ نفسه فلتبدأو فى البحث له عن زوجة صالحة تكون أما حنونا لإبنه بإذن الله

أسأل الله ان يوفقكم لما فيه الخير .........آمين

[شاب مصري]

لا حول ولا قوة الا بالله

ربنا يرحمها

في الجنة ان شاء الله

اعتقد بلاش يتجوز اختها

ممكن يخطب ويتجوز واحدة تانية بس تكون طيبة وحنونة

والولد يعيش معاهم

او لو منفعش يعيش مع حد من قرايبه عندكم او كده لحد ما والده ييجي في الصيف كل اجازة .

[enjisultan]

هو فعلا انا معاكو ان اخويا متسربع بس عارفين هو عايز يبقى مطمن على ابنة اودام عينة من غير ما يسيبة ومن غير كمان ما يبعدوا عن اهل مامتة اللة يرحمها ...طبعا الولد كمان فى عنينا بس المشكلة مثلا ان ابنة فى مدرسة فى التجمع وانا ولادى فى مصر اسماعلية وبيتى يقى بعيد عن بيت جدتة على الاقل لحد اخر مايو هيكون فى مدارس ممكن بعد كدة نفكر فى حلول .....وبعدين هو عرض على والدتها انها تسافر معاة وياخود معاة مربية بس برضوا رفضوا وطبعا فشل موضوع جوازوا من اختها... وبعدين هو بقى على هذا الاساس بيفكر يقعد فى مصر ومايسافرش بس برضوا ما يقدرش ياخود منهم الولد لانة مش هيقدر علية لازم يبقى معاهم بصوا الموضوع بقى معقد .....دا غير ان الولد بقى زى ما قولتلكوا صعب ومدلل بطريقة تخليكى تفكرى 1000 مرة عشان تقولى اربية.... واللهى الموضوع مش تخلى عن اخويا بس فعلا اخويا مدلعوا لدرجة انك لما البسوا... البسوا بس.. عشان يخرج او ينام لازم يبقى فى مكافاة على انو سمحى لى البسوا احنا بصراحة قولنا لاخويا انك مبوظوا مش مدلعوا بس الوقت الراهن انا شخصيا ما قدرش حتى اساعدوا فى تعديل سلوك ابنة لانى قلبى بيوجعنى كل لما احاول ازعق لة وبصراحة مامتو كانت اعز عليا حتى واللهى من اخويا فاسلوبى مع الولد برضوا مش هينفعوا واللهى ...يعنى اللى عندة اى فكرة يقولهالى انا حاسة انى ما عنديش اى حل يرضى اخويا وابنة واللة المستعان

[enjisultan]

الموضوع دا كان عن مشكلة اخويا وابنة بعد وفاة زوجتة من فترة

وبم ان الموضوع ابتدى يتحل نوعا انا قولت برضة احكى لكوا اية اللى جد عشان بصراحة انتوا ساعدتونى نفسيا جدا

اخويا قعد مع ابنة 3 اضعاف فترة اجازتة وبعدين رجع السعودية

رجعت صحابتى اللى كنت حكيت لكم عليها وهى كانت مرتبطة باخويا من 12 سنة قبل حتى ما يعرف زوجتة

وكان موضوعهم باظ لان اهلها كانوا حاسين انهم كانوا صغيرين والفيلم دا وبعدين كانت رجعت امريكا وانقطعت اخبارها دا ددى قصتهم باختصار.....دلوقتى اتخطبوا

والولد قاعد مع جدتوا وخالتو

وكل ويك اند بيقضية معانا انا واختى وولادنا

وكمان 5 شهور هيرجع يتجوز وياخود مراتة وابنة ويسافروا

لعلمكوا مش هو اخويا واللى هيتجوزها صاحبتى

بس برضوا فى غصة فى قلبى انة هيتجوز واحدة غير اللة يرحمها ام ابنة

هو انا احساسي كدة غير طبيعى ولا اية ؟

[ziad]

إنا لله و إنا إليه راجعون

أتمني تكون قصه أختنا ديه عظه لنا كلنا ،الموت هو اليقين ،ملوش ميعاد

يا أخت إنجي

كنت أتمني إن أخوكي يتزوج من الأخت الأكبر منه في السن ،يحصنها ،تساعده في تربيه إبنه و هكذا ،و أرجو من الناس تنسي حوار السن ده ،الرسول صلي الله عليه و سلم تزوج ستنا خديجه و هي أكبر منه بي ١٤ سنه

الحمدلله على كل حال ،بالنسبه لإحساسك ناحيه زوجه أخوكي القادمه فا ده إحساس طبيعي عند الستات و إن شاء الله ينتهي الإحساس ده أول متعرف الأخت ديه كويس و تقربوا لبعض و إن شاء الله تكون زوجه صالحه لأخوك و تعينه علي حياته

[enjisultan]

zaidشكرا

هو اختها هى اللى رفضت

بل وعلى العكس اتقلبوا علية لما طلب انة يتجوزها

والبنت اللى هيتجوزها دى صاحبتى من زمان اوى وانا واثقة انها ان شاء اللة كويسة

بس هو يمكن زى ما حضرتك قولت كسيدة حاسة انة المفروض يزعل عليها العمر كلة لكن دا الحقيقة ما بيحصلش

يعنى مافيش غالبااااا ازواج بتعيش على ذكرى زوجاتهم المتوفيات

[pink rose]

الموضوع دا كان عن مشكلة اخويا وابنة بعد وفاة زوجتة من فترة

وبم ان الموضوع ابتدى يتحل نوعا انا قولت برضة احكى لكوا اية اللى جد عشان بصراحة انتوا ساعدتونى نفسيا جدا

اخويا قعد مع ابنة 3 اضعاف فترة اجازتة وبعدين رجع السعودية

رجعت صحابتى اللى كنت حكيت لكم عليها وهى كانت مرتبطة باخويا من 12 سنة قبل حتى ما يعرف زوجتة

وكان موضوعهم باظ لان اهلها كانوا حاسين انهم كانوا صغيرين والفيلم دا وبعدين كانت رجعت امريكا وانقطعت اخبارها دا ددى قصتهم باختصار.....دلوقتى اتخطبوا

والولد قاعد مع جدتوا وخالتو

وكل ويك اند بيقضية معانا انا واختى وولادنا

وكمان 5 شهور هيرجع يتجوز وياخود مراتة وابنة ويسافروا

لعلمكوا مش هو اخويا واللى هيتجوزها صاحبتى

بس برضوا فى غصة فى قلبى انة هيتجوز واحدة غير اللة يرحمها ام ابنة

هو انا احساسي كدة غير طبيعى ولا اية ؟

ليه بس يا انجي

اخوكي يا حبيبتي من حقه يكمل حياته

هو ما طلقش مراته و لا راح اتجوز عليها عشان تزعلي و تحسي بخيانة للمرحومة باذن الله مراته

هي راحت للي خلقها و اخوكي لسا شاب في عزه و عنده طفل محتاج رعاية ام

كل اللي مطلوب منك انك تدعي ان اللي هو هايتجوزها تسعده و تراعي الله في ابنه

و ربنا يجيب الخير :)

[سهرانه]

بصراحه يا اخت انجي

انا لسه شايفه الموضوع بتاعك ده دلوقتي

ده لان انا عضوه جديده .بس قراْته كله

والاعضاء ماسابوش حاجه الا وقالوها .يعني مش هازود حاجه عن اللي قالوه

اولا : ربنا يرحم زوجت اخيك ويسكنها فسيح جناته

الاعمار بيد الله.

ثانيا: مش شرط ان اختها تكون هيه الحل وان زواجها من اخوكي هايحل مشاكل ابنه

ثالثا:انت بس متاْثره علشان كنتي مرتبطه جدا بزوجته الله يرحمها.وبعدين ده حتى لو اي انسان قريب لكي او جارك وحصل معاه الموقف ده لا زم ها تتاْثري بانه هايتزوج واحده تانيه غير زوجته الاولى

انا شايفه انك تدعي ربنا انه يوفق اخوكي وزوجته التانيه ويجعلها ام كويسه لابنه

وسبحان الله مش عارفه اقول ايه بس عسى ان تكرهوا شيئا وهو خير لكم

انا بقه ليه واحده صديقه اتجوزت زوج صديقتها بعد ما صديقتها اتوفت وكانت سايبه بنت عندها 4 سنوات

هيه في الاول اتجوزته علشان تربي بنت صاحبتها و ربنا ما اْرادش انها تخلف منه .وسبحان الله بتعامل البنت يمكن احسن من والدتها الله يرحمها .

فربنا بيسبب الاسباب .

يعني هيه ماكانتش تعرف انها مش بتخلف

وربنا كرمها ببنت صاحبتها اللي توفت .وهيه بتعاملها معامله .ما شاء الله

انا باقول لك الحكايه دي علشان تعرفي ان الدنيا فيها كتير

وان مش شرط ان الام البديله تكون خالت الطفل ربنا بس يكرم اخوكي وتكون دي الزوجه الصالحه وتلربي له ابنه كويس