مستقبل خريجى حاسبات ومعلومات

[اليوم السابع]

السلام عليكم

المشهور ان مستقبل خريجى حاسبات ومعلومات فى مصر كويس من حيث ان الوظايف متوفرة

طيب هل لهم فرص عمل كويسة بالخارج خاصة الدول العربية وزى ايه ومرتباتهم كويسة ولا لأ

وافيدونا حول الصراع بين هندسة قسم حاسب احسن ولا حاسبات ومعلومات هل المقارنة فى محلها

وليه خريجى هندسة شايفين نفسهم افضل من خريجى حاسبات ومعلومات

شكرا

[osmel33]

الوظايف الخاصة بال IT متوفرة فى دول الخليج وبخاصة فى قطر والإمارات

المهم هو التطوير المستمر يعنى العمل بكل التكنولوجي الجديدة

السباق على الوظائف بين الكليات ماعادش له مكان لأن مجال ال IT دخله ناس من شتى الكليات

والفارق بين الجميع هو فى الكفاءة والتطوير وأنا بيشتغل معايا تقريباً من أغلب الكليات وكلهم عندهم

خبرات كبيرة

يبقى سيبك من الصراع والكلام الفارغ ده وشوف أنت فى أى كلية هندسة ولا حاسبات ومعلومات وطور حالك

بالمناسبة أنا كنت محاضر فى أولى سنوات حاسبات ومعلومات جامعة القاهرة ومنها طلعنا شباب هايل

وبيشتغلوا فى أماكن محترمة ومنهم ناس معايا هنا في قطر

[herohero]

والله موضوع الصراع ده راحت عليه من زمان لان للاسف مجال ال ITبقى واسع ودخله ناس كتير ولو بنتكلم ع هندسه حاسبات شايفين نفسهم ده فيه ناس معاهد شايفه نفسها وده اكتر شيئ مزعلني انه لم من كافه المجالات يمكن اكثر ناس تضرروا هندسه وحاسبات ومعلومات لان دخل ناس محسوبين ع المجال وقللوا المرتبات

اما ف دول الخليج فللاسف الهنود والفلبينيين حارقين السوق فالحكاه بقت محتاجه تميز يعني حاسبات ومعلومات عادي ولا هندسه حاسبات عادي يبقى هتلاقي هنود كتير زيك وارخص وللاسف الهنود مكتسحين كل المجالات باستثناء الطب لكن عموما لو الواحد كان متميز بيقدر ينافس مع هنود كويسين انما البدايه فبتكون منافسه مع هيصه اشي خريجين معاهد ب50% وكليات خاصه ياريت منافسه بين هندسه وبين حاسبات ومعلومات

[Amr Radwan]

طبعا انا لن ازيد علي كلام الزملاء الافاضل في موضوع المفاضلة بين كلية الهندسة و كلية حاسبات و معلومات ..

و لكن كل اللي عاوز اقوله .. سواء انت كنت خريج كلية حاسبات و معلومات او هندسة او معهد .. اللي بيفرق بينك انت و بين اي شخص تاني شغال في المجال هو خبرتك و اجتهادك و اية اللي تقدر تضيفه لاي شركة هتشتغل فيها .. لو فكرت بتفكير صاحب اي شركة كويسة هتلاقي ان من المنطقي اني اخد افضل الكفاءات و بأقل المرتبات .. و لو كان فيه حد خريج معهد او اي كلية اخري و لكن لدية الخبرة التي احتاجها طبيعي اني اشغله و طبيعي ايضا اني ما اشغلش واحد خريج كليه حاسبات و معلومات او هندسة و يكون غير مهتم و مش شاطر (و ان كانت هذه النسبة ضئيلة جدا)

ما يدرسه الطالب في كلية الحاسبات و المعلومات او كلية الهندسة يؤهله و بشدة للعمل في سوق البرمجيات المتقدمة و الIT عموما و يجعله له الصدارة في الطلب و الاولوية في العمل في السوق المصري و بعد اكتساب خبرة العمل يكون له الصدارة في السوق الخليجي بسبب خبرته القوية .

اما بالنسبة لمنافسة الهنود و الفلبينين في السوق الخليجي فهو شئ منطقي و طبيعي .. لان لو صاحب العمل او مدير الشركة في دبي او الرياض او الدوحة او غيرها وجد اصحاب نفس الخبرة من جنسيات اخري مثل الفلبين و الهنود اكيد هيشغلهم لان مرتباتهم اقل .

و هناك ايضا بعض الشركات تفضل بعض الجنسيات علي البعض الاخر و يرجع هذا الامر لقناعة مديرو هذه الشركات او سياساتها الوظيفية .

الخلاصة ..

شد حيلك و اجتهد و ربنا هيوفقك ان شاء الله