حد جرب يسترد فلوسه من شركة طلعت مصطفى؟

[drTOTA]

بسم الله الرحمن الرحيم

اعزائى اعضاء لمحاورات الافاضل

لى استفسار وياريت لو حد عنده فكرة يفيدنى لاننا محتارين ومش عارفين نعمل ايه, الموضوع ببساطة هو اننا حاجزين شقة فى مدينة الرحاب المرحلة التاسعة من شهر اكتوبر 2007, واستلامها يكون مارس 2011 ان شاء الله, المشكله اننا دلوقتى وبسبب الازمة اللى حاصلة لانى سبت شغلى علما باننا مقيمين بدبى ,اقساط الشقة بدات تبقى عبء علينا خصوصا والسنة دى خسرت الشغل وابنى المفروض يدخل المدرسة السنه دى , علشان ماطولش عليكو ظروفنا مابقتش تسمح بالاستمرار, بنحاول نبيع الشقة او نرجعها للشركة ولسه ماخدناش القرار, طبعا البيع فى ظروف زى دى مش سهل ابدا خصوصا ان اسعار الرحاب من الاساس غالية عن بقية المناطق, وفى حالة الاسترداد حسب العقد اللى بينا وبين الشركة ان بيتم خصم 5% من المبلغ وارجاعه فى خلال ثلاثة اشهر (بنفس طريقة الدفع) وانا كده فهمت ان هيكون شيك بدفعة الحجز ثم شيك بدفعة التعاقد ثم شيك بالاقساط الشهرية واخيرا شيك بالقسط السنوى, المهم ان جوزى قلقان اوى من موضوع استرجاع الفلوس ده وخايف ان الشركة تعمل لنا مشاكل او تماطل فى ارجاع الفلوس او تطلع لنا بأى منفذ قانونى يضيع حقنا ,خصوصا وان جزء من المبلغ ده كان قرض من البنك يعنى مش مشكلة فلوسنا بس, واملى فى الاخوة الاعزاء اللى عنده اى فكرة عن الموضوع ده او شاف موقف مشابه انه يفيدنى, او ينصحنى ايه الحل؟؟؟؟

[واحد تاني]

بدل ما ترجعي الشقة للشركة ... ممكن تعرضي الشقة للبيع ... وتقبلي السعر اللي تشوفيه مناسب ويوفي حقك ... والشركة في الحالة دي هتاخد مبلغ ال 5% من سعر البيع وهيكونوا مبسوطين اكتر

[Virus]

البيع ممكن يتم بتوكيل بإدارة العقار ومتخسريش ال 5%..

لا أعلم إن كانت الشركة تماطل في الدفع ولكني لا أظن ذلك لأنهم كسبانين كسبانين....هياخدوا منك 5% وهيبيعوا الشقة لحد تاني بالأسعار الجديدة اللي هي زادت مرتين من ساعة ما أخدتي الشقة

[دكتور مصري]

يا ريت تقوليلنا تفاصيل الشقة يمكن حد يحب يشتريها

[eTiger]

أنا رأيي إنك فعلا تعرضيها للبيع وبكده هتستردي فلوسك ويمكن تكسبي كمان لأنك حاجزاها من زمان 2007 وشقتك زاد سعرها كتير دلوقتي.

قولي مواصفاتها وأكيد في ناس بتدور على شقق بأسعار أرخص من الشركة

تم تعديل 8 مارس 2009 بواسطة eTiger

[drTOTA]

الاخوة الافاضل, خالص شكرى لاهتمامكم وردودكم واعتذر عن تأخرى فى الرد وده لان الموقع كان فيه مشكله ومش بيفتح ,واحنا طبعا فكرنا نبيع الشقه بس المسئول عن المبيعات هنا قالنا انه صعب اوى نلاقى حد يشترى الايام دى فى الامارات نظرا للظروف وقال بيعوها فى مصر احسن بس احنا مش عارفين نعرضها ازاى فى مصر ومش عارفين ايه فرصها دلوقتى وعلى كل حال انا هحط مواصفاتها النهارده ان شاء الله بس بعد الظهر.

[ابو محمد المصري]

اختي الفاضله في انتظار المواصفات التفصليه وان شاء الله يصير خير

[molhm]

الاخت الفاضلة اخوكي ابو ملهم من سكان الرحاب والسعر دلوقتي حسب الموقع مابيقلش عن 4500 جنية المتر وفي في الرحاب مكاتب عقارية كثيرة بس خدي بالك انهم لما يعرفوا انك هاتبيعي هايقولك الازمة والاسعار نازلة لكن لو تقولي عايزة اشتري هايقلك الرحاب تختلف عن باقي المواقع والسعر زاد في الشركة من اول يناير 2009 ودة حقيقي بس الواقع ان السعر من 6 شهور كان المتر مايقلش عن 5000 جنية ودلوقتي نزل الي 4500 جنية يزيد حبة او ينقص حبة بسيطة انت مشترية المتر بكام وانت تعرفي . علي فكرة انا مقيم بجدة وطمني الاخ العزيز ذوجك بان الله يقفل باب رزق ويفتح بدل منه 10 ابواب وعن تجربة 25 سنة غربة بالسعودية وربنا يوفقكم ان شاء الله ز

[drTOTA]

الاخ الفاضل ابو ملهم, اشكرك على المداخلة والاهتمام, حضرتك تقصد المكاتب العقارية موجودة داخل مدينة الرحاب؟؟اصلى دلوقتى مش فى مصر والموضوع من هنا مش سهل بصراحة, ويعنى رأى حضرتك انى لو لجأت لاحد هذه المكاتب انه يكون من الافضل اتكلم على انى عاوزة اشترى الاول علشان اقدر اعرف السعر الحقيقي؟؟

[raouf]

الاخ الفاضل ابو ملهم, اشكرك على المداخلة والاهتمام, حضرتك تقصد المكاتب العقارية موجودة داخل مدينة الرحاب؟؟اصلى دلوقتى مش فى مصر والموضوع من هنا مش سهل بصراحة, ويعنى رأى حضرتك انى لو لجأت لاحد هذه المكاتب انه يكون من الافضل اتكلم على انى عاوزة اشترى الاول علشان اقدر اعرف السعر الحقيقي؟؟

السلام عليكم

انا محتاج شقة شبيهة اكمل اقساطها هل من الممكن ترسلى لى تفاصبل الشقة من حبث المدفوع و المساحة و تاريخ الاستلام والاقساط وانا فى السعودية لو ممكن زوج حضرتك يكلمنى بالتليفون لو يحب او يرسل رقمه وانا اكلمه

تم تعديل 9 مارس 2009 بواسطة raouf

[drTOTA]

تفاصيل الشقة هى:

المرحلة التاسعة, مجموعة 127, نموذج D الدور الثاني ,مساحة الشقة 181 متر مربع عبارة عن ثلاث غرف وريسبشن وثلاث حمامات ومطبخ ومخزن.

حجز اكتوبر 2007, واستلام مارس 2011

التقسيط على ست سنوات , والقسط الشهرى 3350 جنيه +400 جنيه قسط النادى

القسط السنوى42540 جنيه وهو ستة اقساط مدفوع منها قسط وموعده فى اكتوبر

دفعة الاستلام 70660

اجمالى المبلغ المدفوع حتى الان:252160 جنيه شاملة اقساط النادى

[dongol]

تفاصيل الشقة هى:

المرحلة التاسعة, مجموعة 127, نموذج D الدور الثاني ,مساحة الشقة 181 متر مربع عبارة عن ثلاث غرف وريسبشن وثلاث حمامات ومطبخ ومخزن.

حجز اكتوبر 2007, واستلام مارس 2011

التقسيط على ست سنوات , والقسط الشهرى 3350 جنيه +400 جنيه قسط النادى

القسط السنوى42540 جنيه وهو ستة اقساط مدفوع منها قسط وموعده فى اكتوبر

دفعة الاستلام 70660

اجمالى المبلغ المدفوع حتى الان:252160 جنيه شاملة اقساط النادى

أختي العزيزه

ارجو من من حضرتك ارسال رقم زوجك في رساله خاصه للتفاهم حول الشقه و انا مستعد للشراء في الامارات و ان شاء الله خير

[molhm]

ياخت توتا ان شاء الله تكون فرجت بمداخلة الاخ الي طلب رقم التليفون عموما ياستي انا هاسهلها عشان اي حد عايز شقة بالرحاب يتصل عليكي وابقي ادعي لي دعوتان القسط الشهري 3750 جنية شامل النادي يعني في 6 سنوات 270000 جنية القسط السنوي 42540 جنية يعني في 6 سنوات 255240 جنية وقسط الاستلام 70660 جنية يعني اجمالي الشقة 595900 جنية يعني سعر المتر 3292 جنية نقول 3300 جنية وصححي لي ياختنا لو انا غلطان.

السعر كدة يعتبر سعر كويس وممكن انشاء الله تبقي بفايدة وبدون خسائر . والمكاتب الي انا كلمتك عليها داخل مدينة الرحاب انت ارسلي لهم البيانات وهم مشاء الله هايدوشوكي تليفونات وان شاء الله تكون قضيت بس ماتنسيش الدعاء .

[drTOTA]

شكرا جزيلا استاذ ابو ملهم , بس السعر كده ناقص دفعة الحجز ودفعة التعاقد انا ماكتبتهمش بالتفصيل لانى ضفتهم على اجمالى المبلغ المدفوع للشقه , وان شاء الله اجيب اجمالى سعر الشقه بالظبط بس اما اروح البيت, لو عند حضرتك تليفونات او ايميلات المكاتب العقارية ياريت ترسلهالى لانى ماعرفش عنهم حاجه, جزاك الله خيرا.

[molhm]

ادخلي علي الاهرام وادخلي علي الاعلانات المبوبة وافتحي سوق العقارات وهاتلاقي الرحاب لها موقع وهاتلاقي كل الشلة الي في الرحاب والي خارجها مثل اليابنية والبيت بيتك ووجهة نظر والفلال وشركات تانية كتير مش حاضرني اسمائهم بس كل جمعة لهم اعلانات مطلوب وللبيع وربنا يوفق ان شاء الله

[dongol]

انا حاولت احسب اجمالي المبلغ بالطريقه اللي حضرتك قلتي عليها لقيت المطلوب 800 الف جنيه و كسور

مش عارف انا غلطان ولا كده الرقم صحيح

[drTOTA]

الاخ الفاضل, بعد التحية

اجمالى عقد الشقة 741770 جنيه مصرى شامل اشتراك النادى, اى يكون بدون النادى حوالى 708800 جنيه

[dongol]

لقد حاولت الاتصال بزوج حضرتك و لكن ماحدش بيرد لعل المانع خير

[drTOTA]

اخى الفاضل: ارسلت لك الرد فى رساله خاصة برجاء الاطلاع عليها