دور محاورات المصريين فى مواجهة الأزمة الإقتصادية

[ابو محمد المصري]

اخواني الافاضل السلام عليكم ورحمه الله وبركاته

الموضوع جميل جدا وحيوي جدا جدا لقد سبق لي ان حاولت تذكير بعضكم اننا مغتربون ولسنا مهاجرون والفرق بمنتهي البساطه ان المغترب طال الزمن ام قصر لابد له من عوده واغلبكم يعلم ان البقاء في سوق العمل سواء بالانتاج او حتي التسويق هو للكيانات الكبيره فالصغير سهل جدا ابتلاعه في وسط محيطات البيروقراطيه وحيتان السوق التي تنتظر الفرصه لالتهام صغار المستثمرين

اخواني الحل من وجهه نظري وقد اكون مخطـأ هو ان يتكتل مجموعه من العائدون لارض الوطن بالاشتراك مع اخرين موجودون داخل الوطن لمحاوله تكوين كيان شبه قادر علي الوقوف في وجه رياح السوق

حاولوا اخواني ان تتناسوا مقوله ان المهم البدايه ومن يبدا صغير مع مرور الايام سيكبر كان يمكن ان يحدث هذا في الماضي ولكن الان شبه مستحيل

اخواني لو صدقت النيات وخرج الامر بشكل قانوني رسمي يضمن لكل ذي حق حقه ويعتمد علي تجارب بعضنا سوف باذن الله نحقق النجاح

لقد سبق ان طرحت عددا من المشروعات لااستطيع انا او قد لايقدر بعضنا عليها وكمثال اعود واكرر

1- مشروع تعليمي مدرسه تكون بدايتها من الصفوف الاوليه والابتدائي

2 - مشروع تسمين سواء حيواني او داجني او حتي سمكي

3 - مشروع هايبر ماركت

4 - مشروع انشاء مستوصف صحي او مستشفي صغير

5 - مشروع شركه مقاولات لاستغلال فيض العماله التي سترجع حتما من الخارج وايضا العماله الداخليه

الافكار كثيره ولكن العين بصيره واليد قصيره قد اكون لست خبيرا في بعضها ولكن بعضنا خبراء في معظمها

الحل اخواني في عمل شركه مساهمه تعتمد علي اسس قانونيه صحيحه يعرف كل مساهم فيها حقوقه وواجبته

اعذروني علي الاطاله ولكن الامر يستحق

[osmel33]

الأخوة الأفاضل لو جادين فعلاً فى موضوع المشاريع المشتركة وإنشاء كيانات

من خلالنا "وكل واحد باللى ربنا يقدره عليه" أنا أقترح أن أحنا نجيب دراسات جدوى

للمشاريع ودى موجودة كتير على النت ونناقشها بموضوعية حتى ممكن يحصل

تقسيم للمشاريع بمعنى أن ممكن مجموعة تشتغل في مشروع ومجموعة تانية

في مشروع تاني ونشوف فى الآخر كيفية تكامل المشاريع دى مع بعضها

والمصري إن شاء الله هايقوم ويصحى من النوم :rolleyes:

[أسد]

لنجاح أي مشروع يجب أن تكون هناك مقومات النجاح التي يعول عليها صاحب المشروع في إنجاح مشروعه ..

والتخصص .. من أهم مقومات النجاح ..

فعند التفكير في أي مشروع يجب أن يكون القائم عليه من أهل الخبرة .. فالخبرة أمر هام جداً في إنجاح المشروعات ..

فمن غير المنطقي أن يكون هناك من هو مثلاً طبيب .. ويعمل في تجارة الأجهزة الكهربائية .. او مهندساً مدنياً .. يشرع في إقامة مشروع تسمين عجول .. والإشراف عليه بمفرده .. دون أن يكون هناك من هو صاحب خبرة في المجال نفسه ..

فمثلاً .. الطبيب .. يمكنه أن يفكر في مشروع يقدم خدمات طبية على مستوى جيد .. ومحترم ..

المهندس .. مشروع لشركة تقدم خدمات هندسية .. وحلول بشكل جيد ...

مدرسة .. تعمل على أساس تربوي صحيح .. وأسلوب إقتصادي .. يجعل منها مشروعاً مربحاً وفي نفس الوقت يلقى إقبالاً من الناس ..

الإعتدال في الربح . والقبول بقوانين الأزمة الإقتصادية .. والرضوخ لها .. إلى أن تعبر وتمر ... هذه أحد مقومات النجاح

توفر رأس المال الكافي لإدارة المشروع لفترة بدون الحاجة إلى الإعتماد على أي قروض من البنوك ... وتقليل إحتمالات تعثر المشروع في بداياته ..

الدراسة الجيدة لأي مشروع ... والبعد عن المجازفات الغير مدروسة .. والنصائح من الأصدقاء من غير ذوي الخبرى .. وأصحاب الرؤى القاصرة والمحدودة ..

للأزمات أيضاً رجالها . وفرصها .. بشرط التعامل مع الأزمة الإقتصادية بقوانينها ...

الحديث عن التعامل مع الأزمة الحالية وتداعياتها القادمة قد يكون بأكثر من أسلوب ..

إنشاء مشروعات يحتاج إليها المجتمع بالفعل . وبالتالي سيكون عليها طلب من الناس .. حتى ولو في ظل الأزمة .. وإن كان الطلب سيكون ضعيفاً أو محدوداً ..

البحث عن المشروعات ذات الميزة التنافسية .. كمشروعات الغذاء الرخيص .. أو الإقتصادي .. والجيد .. في حال إنشاء مطاعم .. أو إنتاج منتجات غذائية جيدة مناسبة السعر .. ذات حاجة أساسية لدى الناس .. وليست كماليات .. أو إنشاء متاجر للتجزئة لها القدرة على الشراء الكبير وبالتالي الحصول على أسعار منافسة والبيع للمستهلكين بسعر أقل ..

الخدمات الطبية .. والتي نجد أن بها قصور شديد في مصر .. شريطة أن تكون جيدة في مستوى الخدمة .. وفي نفس الوقت تقدم علاج إقتصادي .. وآدمي .. وبأرباح معقولة لأصحاب تلك المشروعات .. وهي مشروعات مضمونة النجاح .. وإن كانت تحتاج إلى تجمع لرؤوس الأموال ..

خدمات التعليم الجيد .. وهي إنشاء مدارس تقدم خدمات تعليمية جيدة وراقية ... بشكل إقتصادي تفاعلاً مع الأزمة ...

مزارع الدواجن والأسماك .. وتسمين العجول .. بشرط وجود الخبرة ... ورأس المال الكافي لإنشاء مشروع متوسط أو كبير الحجم وليس صغيراً ..

يمكن أيضاً أن يقرر الشخص ألا يقوم بإنشاء أي مشروع .. وفي تلك الحالة لديه الكثير من البدائل ...

البنوك ..

العقار .. والأراضي ..

وحذاري من توظيف الأموال لدى الغير ..

ففي الأيام القادمة .. قد يكثر النصابون ... يدعون المشاركات .. وإنشاء الشركات . والمشاركة في الأرباح ..

لا تشارك أحد في أي مشروع لا تكون عنصراً فاعلاً فيه ... ولا تشارك في أي مشروع لا تكون لديك الحدود الدنيا من معرفة النشاط وبعض خفاياه وآليات عمله ..

للعائدون من الخليج ..

لا تتقمص شخصية الكفيل .. وأن تقوم بتمويل أي مشروع وتترك آخرين لإدارته .. يجب أن تكون مشرفاً بنفسك على إدارة أموالك .. صحيح .. لا يجب أن تكون أنت المدير .. كونك قد لا تحمل الخبرة الكافية للإدارة .. فالإعتماد على أهل الخبرة هو من أهم مقومات النجاح .. ولكن يجب أن تكون ملماً بمعرفة كل شئ ..

إذا لم تتمكن ..

عليك بإيداع أموالك في البنوك ..

البنوك العادية ..

البنوك الإسلامية ..

كيفما ترى .. ولا تغامر بشقاء عمرك .. ولا تنجرف وراء سراب الأرباح الهائلة ..

في الأزمات .. الإستمرارية .. قد تكون في حد ذاتها نجاح عظيم .. وربح هائل ..

لا تصدق من يقول لك أن هناك مشروعاً سيدر عليك أرباحاً طائلة .. لا يوجد مثل هذا في ظل أزمة إقتصادية طاحنة مثل التي نمر بها ..

وخاصة في بلد لا يعرف حتى الآن كيف يحبو .. في الإقتصاد وآليات السوق ...

لا تغامر بالإستثمار في البورصة والمضاربة فيها .. إذا لم تكن لك خبرة كافية جداً للتعامل معها ..

لا تضع البيض كله في سلة واحدة ...

نوع ..

إذا كنت ستدخر أموال ..

قسمها بين مصري ودولار .. ويورو .. وذهب ..

عند شراؤك ذهب .. إختار التوقيت المناسب .. لا تشتري الكثير من المشغولات .. وركز في الشراء على الجنيهات والسبائك .. فهي تحتفظ بقيمتها بشكل أكبر ..

العقار والأراضي . لازال سعرها مرتفع وغير مغري للشراء ..

لا أنسى أن أحيي طفشان وأبو محمد المصري على ماكتبوه .. كلام ذو قيمة عالية ..

للحديث بقية ...

[ابو محمد المصري]

اشكرك اخي الفاضل اسد علي كلامتك القيمه

نصيحه اخواني من اخ مجرب يدعي ان له بعض الخبره لاتفكر اطلاقا في وضع نقودك مع اي فرد اي ماكان بداعي انه سيستثمرها لك وان العائد مضمون هذا اولا

ثانيا : الكيانات او التكتلات التي بنيت علي اسس احتمال نجاحها اكبر

ثالثا : قد تكون غير خبير في مشروع ما ولكن يمكنك ان تؤدي بصوره عضليه ساحاول ان اشرح فكرتي بشكل مبسط لناخذ مثلا مشروع الهايبر ماركت مثلا قد تكون لاتفهم في التجاره وانا علي عكس البعض مقتنع تماما ان التجاره اخواني اولا موهبه وقدره وقلب الي حد ما جرئ ولكن مع العقليه التجاريه نحتاج الي جهد جسماني كبير في مراقبه الهايبر نحتاج من يقف لمراقبه حال الهايبر نحتاج الي مراقبه ومتابعه النواقص نحتاج الي من يهنن الزبون ويدلله ليعود مره اخري نحتاج الي معرفه اسعار البيع التنافسيه في باقي المعارض نحتاج الي من يعرف كيف يتعامل مع الموظفين الموجودين نحناج الي من يراقب ويتابع النظافه نحتاج الي من يتابع تواريخ الصلاحيه نحتاج الي من يعمل ابسط قواعد التجاره وهي بالبلدي حرك الصنف يتحرك بمعني ان تدوام بشكل مستمر علي تحريك البضائع داخل الهايبر قد يقول البعض ان هذا دور الموظفين وحسب ولكن تخيل معي ان من يقوم بتلك الادوار هو صاحب المال اكيد سيكون اكثر حرصا من اي موظف

يمكن قياس ذلك علي اي مشروع تجاري او صناعي او زراعي نحتاج الي تكتل من اصحاب الاموال فالقليل منك مع القليل مني علي الرغم من انه كل ما نملك هو كثير بالتجمع

اخواني المشاريع الفرديه نعم نجاجها غير مستحيل ولكن المشاريع الناتجه من تكتل احتمال نجاحها اكبر بكثير

اخواني يد بمفردها تعمل عمل عظيم ولكن يدين تعمل انجاز اذا صدقت النوايا وتخيلوا معي عشره او عشرون يد

اشكركم اخواني

[molhm]

المشكلة فينا المغتربين داءما خايفين من عمل اي شئ في مصر عشان كدة كل فلوسنا اما في البنك او العقار او راحت في توظيف الاموال انا مقيم بالسعودية منذ 25 سنة عملت في ثلاث شركات وكنت دائما ابدا من الصفر مش انا الي صفر الشركة هي الي صفر وبعد خمس ست سنوات تبقي شركة محترمة وتكسب ملايين وانا كان راتبي بيزيد بس برضة راتب . اخر عمل انا فية دلوقتي مصنع لصناعة الخزانات الاستانلس استيل انا الي عملت دراسة الجدوي واجرت المكان ورحت جبت العمال من الهند والفابين بنفسي وانا دلوقتي المدير المالي ومدير المبيعات وبشرف علي الانتاج في وجود مساعد فني وبرضة انا مدير المشتريات وحققنا ارباح صافية العام 2008 2200000 ريال اثنين مليون ومأتان وانا بأخد راتب سنوي مع المكافأت وكلة 150000 ريال طبعاغ انا في نعمة والحمد لله بس شوف احنا المصريين بنكسب الناس اد اية وخايفين نعمل حاجة ونكسب نفسنا . وعشان كدة انا قررت ابدأ مشروع زراعي علي 40 فدان امتلكها في جنوب حلوان يشمل زراعة اعلاف وعمل مشاريع تربية طيور بانواعها وغنم وبقر تأكل الاعلاف الي هازرعها . ارائكم مهمة بس الله يخليكم ماحدش يقولي خليك انت احسن وماتعملش حاجة لان الكلام دة هو الي مخلينا كلنا نقعد سنين موظفين مع اننا نقدر نبقي رجال اعمال .

[عطر الجنة]

المشكلة فينا المغتربين داءما خايفين من عمل اي شئ في مصر عشان كدة كل فلوسنا اما في البنك او العقار او راحت في توظيف الاموال انا مقيم بالسعودية منذ 25 سنة عملت في ثلاث شركات وكنت دائما ابدا من الصفر مش انا الي صفر الشركة هي الي صفر وبعد خمس ست سنوات تبقي شركة محترمة وتكسب ملايين وانا كان راتبي بيزيد بس برضة راتب . اخر عمل انا فية دلوقتي مصنع لصناعة الخزانات الاستانلس استيل انا الي عملت دراسة الجدوي واجرت المكان ورحت جبت العمال من الهند والفابين بنفسي وانا دلوقتي المدير المالي ومدير المبيعات وبشرف علي الانتاج في وجود مساعد فني وبرضة انا مدير المشتريات وحققنا ارباح صافية العام 2008 2200000 ريال اثنين مليون ومأتان وانا بأخد راتب سنوي مع المكافأت وكلة 150000 ريال طبعاغ انا في نعمة والحمد لله بس شوف احنا المصريين بنكسب الناس اد اية وخايفين نعمل حاجة ونكسب نفسنا . وعشان كدة انا قررت ابدأ مشروع زراعي علي 40 فدان امتلكها في جنوب حلوان يشمل زراعة اعلاف وعمل مشاريع تربية طيور بانواعها وغنم وبقر تأكل الاعلاف الي هازرعها . ارائكم مهمة بس الله يخليكم ماحدش يقولي خليك انت احسن وماتعملش حاجة لان الكلام دة هو الي مخلينا كلنا نقعد سنين موظفين مع اننا نقدر نبقي رجال اعمال .

ان شاء الله اخى حتنجح

لانى قلت فى مداخلتى ان من انجح المشاريع تربية الاغنام لان دورة راس المال سريعة فيها و قد دخل زوجى مشروع شراكة فيها العام الماضى ولكنه دخله كما قال احد الزملاء بنظرية الكفيل يعنى هو دفع راس المال و الاخر تولى الرعاية و ما الى ذلك و فى غضون سنة تضاعف العدد لكنه الطمع آفة المشاريع و نسيان الاخر انه لولا راس المال ما قام المشروع

و فعلا الاعلاف ايضا مشروع حلو فقد خاضه احد الاقارب و كسب منه حلو

الله يوفقك و يوفقنا

و يا ليت تركز على الغنم لان كما قلت دورة راس المال فيها سريعة مما يسعد و يحفز على الاستمرار و يوفر سيولة و مكاسب قريبة ايضا عن الابقار و ايضا بعيدة عن حكاية عنابر الدجاج و انفلونزا الطيور

[سهل جدا]

الأخ الفاضل أسد:

ربنا يوفقك .. كلام ونصائح تدل على عقلية راجحة.. استفدت من كلام حضرتك كثير

الأخ الفاضل طفشان:

شكلك كده رجل اقتصادي , استفدت بردو من كلامك

الأخ ياسر:

طبيعة الشخصية هي اللي بتحدد المشروع اللي يتناسب معاها

يعني المشاريع اللي محتاجة تسويق , لازم تكون شخصية بالبلدي كده (تكون لبط)

بكلمك بجد, التسويق أغلبه بيكون بالآجل , وعشان تلم حقك وفلوسك لازم تكون شخصية قوية ومرحة ومرنة في نفس الوقت

[abuAdham]

المشكلة فينا المغتربين داءما خايفين من عمل اي شئ في مصر عشان كدة كل فلوسنا اما في البنك او العقار او راحت في توظيف الاموال انا مقيم بالسعودية منذ 25 سنة عملت في ثلاث شركات وكنت دائما ابدا من الصفر مش انا الي صفر الشركة هي الي صفر وبعد خمس ست سنوات تبقي شركة محترمة وتكسب ملايين وانا كان راتبي بيزيد بس برضة راتب . اخر عمل انا فية دلوقتي مصنع لصناعة الخزانات الاستانلس استيل انا الي عملت دراسة الجدوي واجرت المكان ورحت جبت العمال من الهند والفابين بنفسي وانا دلوقتي المدير المالي ومدير المبيعات وبشرف علي الانتاج في وجود مساعد فني وبرضة انا مدير المشتريات وحققنا ارباح صافية العام 2008 2200000 ريال اثنين مليون ومأتان وانا بأخد راتب سنوي مع المكافأت وكلة 150000 ريال طبعاغ انا في نعمة والحمد لله بس شوف احنا المصريين بنكسب الناس اد اية وخايفين نعمل حاجة ونكسب نفسنا . وعشان كدة انا قررت ابدأ مشروع زراعي علي 40 فدان امتلكها في جنوب حلوان يشمل زراعة اعلاف وعمل مشاريع تربية طيور بانواعها وغنم وبقر تأكل الاعلاف الي هازرعها . ارائكم مهمة بس الله يخليكم ماحدش يقولي خليك انت احسن وماتعملش حاجة لان الكلام دة هو الي مخلينا كلنا نقعد سنين موظفين مع اننا نقدر نبقي رجال اعمال .

اخي الفاضل هقولك علي مشروع جميل متكامل تعملة علي ال 40 فدان

اشتري اناث جاموس لباني تسمي بالعامية فحلات جاموس في عمر فوق 40 يوم واقل من 6 شهور ( لكي تكون منخفضة الثمن ) وتبدأ في تربيتهن حتي عمر السنة ونصف لتبدأ مرحلة الاخصاب وخلال تلك الفترة هيكون تضاعف رأس مالك ثلاث اضعاف ( لكن مش هذا المقصود ) المقصود هو الاستفادة من الاناث لانتاج الالبان فيصبح لديك مشروع انتاج البان وطبعا هتزرع الارض المحيطة ببعض الاشجار المثمرة وبين تلك الاشجار تزرع العليقة للماشية و ستتضاعف لديك عدد الاناث وممكن تطبيق المشروع علي الابقار الفريزيان لانها تعطي كمية مساوية للجاموس ان لم تتعداها وطبع لازم يكون هناك عمالة للتنظيف والحلب وممكن تشتري حلابة وتعمل غرفة تبريد ومصنع جبن ابيض ملحق بالمزرعة عشان لو فية لبن اتركن عندك تستفيد منة ( هذا باختصار شديد )

اما لو هتعمل علف هتحتاج خبرة اكثر في السوق وجنبك سوق الصف والكريمات ولازم يكون عندك عربية نصف نقل والعلف مش مربح ذي الالبان لان دورة العلف 3 شهور الي 6 شهور حسب عمر العجول ومجهودها كبير ولو عجل عطش منك هيموت فورا لانة بياخد ملح صخري مع الكسب

المهم ان اي مشرو ع طبعا محتاج دراسة جدوي لكن الانتاج الحيواني والالبان

من افضل المشاريع في مصر اما المشروع الثالث فهو باختصار حضرتك ممكن تستفاد من الارض في زراعة النباتات العطرية ( وهتدعيلي ) تختار بعض انواع الاعشاب مثل الريحان والبابونج الخ وهذا موقع زراعي ممكن منة تاخد فكرة عن المشاريع الزراعية وانصحك نصيحة اخيرة لو معاك مبلغ هتشيلة اشتري بة عقار اي شقة اض اي شيئ واحترس من البنوك ( العقار هو الابن البار والبنوك تجلب الفقر ) وربنا يسترها معانا جميعا وياريت لو احد من الاخوة عندة مشروع ممكن يعرضة ونتناقش فية ( زراعي او عقاري )

الموقع

http://aradina.kenanaonline.com/tags/5287/posts/7492

تم تعديل 9 مارس 2009 بواسطة abuAdham

[ام بودى]

السلام عليكم اسعد اللة اوقاتكم بكل خير اخوتى وجازاكم اللة خيرا على هذا الطرح الجميل والافكار الرائعة الحقيقة انتو اتكلمتو فى موضوع يشغل بالى انا وزوجى منذ فترة ليست ييعيدة فقد مضى علينا خمس سنوات فى الغربة وكان حقيقا علينا ان نعيد حساباتنا ونحاول ان نستثمر ما توفر لدينا من مبلغ معقول هو حصيلة خمس سنوات غربة لان مش معقول حنفضل طول عمرنا شغالين عند الغير . اتمنى طرح المزيد من الافكار لننتقى منها ما يناسبنا . كل ما اريدة ان اؤمن مستقبل اولادى ماديا اعلم ان المستقبل بيد اللة وكل شئ بقدر ولكننا امرنا ان نجتهد ونتوكل على اللة فكرنا فى شهادات الاستثمار ثم عدلنا عنها لحرمتها وكذلك الودائع واذا وضعنا الفلوس فى بنك اسلامى فهو غير مجدى فالبنوك عموما عادية او اسلامية لا ينمى مالا. ما تفضلتم وقدمتوة افكارا رائعة ولكن ليس لنا خبرة بها فهى لاتصلح انتظر المزيد جزاكم اللة خيرا

[الباشمهندس ياسر]

والبنوك تجلب الفقر

انا فهمت كلامك على ان الانسان ميحطش فلوسه ف البنك ..

رغم انه ممكن يعمل حساب جارى بدون فوايد او يعمل سيستم ان الفوائد تطلع على مستشفى مثلا او حاجة زى كده

اومال بقى الانسان اللى هياخد فلوس من البنك عشان يكمل لمشروع معين او لمصلحة يعنى

و هو عارفها و عنده خبرتها و شغال فيها بس محتاج معدة مثلا

انا مش عايز اتكلم ف حلال وحرام .. لان ده مش تخصصى

انما عايز افهم ..فين المشكلة لما اميل ع البنك واخد منه مبلغ عشان هعمل توسع ف مشروع قائم فعلا و بيدر دخل

فين المشكلة لما البنك يساعدنى و اجيب 4 افراد عمالة زيادة

يعنى 4 بيوت جديده هتتفتح بنساءها باطفالها بدنيتها كلها

يا جماعه فعلا نفسى افهم

نفسى افهم ... فين الضرر لما اخد مبلغ وارده اخر السنة مبلغ و شوية صغيرين .. مش قصة يعنى

فرق كبير اوى فى ذهنى بين مسالة الربا بمعناها الفج و بين مسالة الاستثمار

يا ريت اللى يعرف يفهمنى النقطة دى يتفضل وهكون شاكر جدا

بس بلاش مواعظ و كلام مطاط قابل لاكتر من تفسير

[سهل جدا]

انا مش عايز اتكلم ف حلال وحرام .. لان ده مش تخصصى

انما عايز افهم ..فين المشكلة لما اميل ع البنك واخد منه مبلغ عشان هعمل توسع ف مشروع قائم فعلا و بيدر دخل

قروض البنوك ربا واضح, لأنه أي قرض جر نفع فهو ربا

وربنا سبحانه وتعالى (زي ما احنا عارفين) حلل البيع , وحرم الربا فقال: {وأحل الله البيع وحرم الربا}

يعنى 4 بيوت جديده هتتفتح بنساءها باطفالها بدنيتها كلها

يا جماعه فعلا نفسى افهم

طيب ما هي الرقاصة فاتحة مش بس أربع بيوت , دا يمكن فاتحة عشرين بيت

بداية من الطبال والصبي بتاعها واللي بيلم النقطة والمهشكاتي وال..... :lol:

هل هذا يعني إن الرقص حلو ومية مية عشان فاتح بيوت كثير

نفسى افهم ... فين الضرر لما اخد مبلغ وارده اخر السنة مبلغ و شوية صغيرين .. مش قصة يعنى

فرق كبير اوى فى ذهنى بين مسالة الربا بمعناها الفج و بين مسالة الاستثمار

في مقولة قرأتها لبعض العلماء عجبتني أوي بتقول:

العبرة بالحقائق والمعاني وليس بالألفاظ والمباني

يعني جيب الخمرة وسميها أي أسم, (مشروب روحي مثلا ) مش هاتفرق في الحكم, وهاتكون بردو خمرة وحرام

ونفس الشيء لو سميت الربا أي اسم (استثمار مثلا) بردو هايكون نفس الحكم ...

وبعدين احنا ليه بنفترض إن القرض ده هايسبب نجاح المشروع, طيب ما هو ممكن المشروع يخسر, زي ما حصل مع مئات الآلاف من المستثمرين ,

وفي الحالة ديه المقترض بيتخرب بيته

لأنه مطلوب منه يسدد الفلوس اللي خسرها , وفوائدها الربوية كمان..

نرجع للموضوع الرئيسي

في فكرة مشروع حلوة كنت عاوز أعمله لما كنت في مصر

وهي: تصنيغ الأكياس والشنط البلاستيكية بجميع أحجامها

ودا مش محتاج رأس مال كبير.. الماكينة رخيصة جدا

والمنتج كذلك رخيص وسهل البيع , وكل المحلات بتحتاجه..

بس عاوز مهارة في التسويق..

[أحمد سيف]

في فكرة مشروع حلوة كنت عاوز أعمله لما كنت في مصر

وهي: تصنيغ الأكياس والشنط البلاستيكية بجميع أحجامها

ودا مش محتاج رأس مال كبير.. الماكينة رخيصة جدا

والمنتج كذلك رخيص وسهل البيع , وكل المحلات بتحتاجه..

بس عاوز مهارة في التسويق..

ايه يا عم سهل جدا ... أنت على طول كده ماشي عكس الاتجاه :lol:

العالم كله بيشتكي من ضرر الاكياس البلاستيك على البيئة واتمنعت في أماكن كثير ... وانت جاي تفتح مصنع جديد للاكياس البلاستيك في مصر ... زي ما تكون البلد ناقصه تلوث

بعدين سيبك من حكاية التلوث وتعالى قولي ... اشمعنى الناس هاتشتري الاكياس منك انت بالذات ... ما المصانع مغرقه البلد والاكياس من كل صنف ولون على قفا من يشيل ... والسبب برضه إن المكنه رخيصة واللعبه سهلة ... إن ما كنتش هاتنتج حاجه مميزة في الجوده أو في السعر أو هاتقدم فكره جديدة يبقى هاتدخل في منافسه طاحنه مع حيتان وهاتلاقي نفسك بتبيع بخساره لحد ما تصرف اللي قدامك واللي وراك :P

نصيحه من أخ ... لو معاك قرشين روح حطهم في أي بنك لحد ما ربنا يفتح عليك بفكره أحسن

[الباشمهندس ياسر]

انا مش عايز اتكلم ف حلال وحرام .. لان ده مش تخصصى

انما عايز افهم ..فين المشكلة لما اميل ع البنك واخد منه مبلغ عشان هعمل توسع ف مشروع قائم فعلا و بيدر دخل

قروض البنوك ربا واضح, لأنه أي قرض جر نفع فهو ربا

وربنا سبحانه وتعالى (زي ما احنا عارفين) حلل البيع , وحرم الربا فقال: {وأحل الله البيع وحرم الربا}

يعنى 4 بيوت جديده هتتفتح بنساءها باطفالها بدنيتها كلها

يا جماعه فعلا نفسى افهم

طيب ما هي الرقاصة فاتحة مش بس أربع بيوت , دا يمكن فاتحة عشرين بيت

بداية من الطبال والصبي بتاعها واللي بيلم النقطة والمهشكاتي وال..... :lol:

هل هذا يعني إن الرقص حلو ومية مية عشان فاتح بيوت كثير

يا سهل جدا

يعنى انت مبتعرفش تنقى كلامك خااااااااااااالص

دى مش طريقة يا اخى

انا عارف ان قصدك نضيف انما مش كده خالص يعنى

انا راجل بتكلم ف شغل شريف و حاجة طاهرة

تقوم تقارن كلامى بشغل بنات الهوى

بصراحة يا سهل

انا زعلت جدا جدا

فعلا يا اخى دى مش طريقة كلام ابدا

الملافظ سعد

و بعدين اسمحلى بقى

انت مستوى فهمك للقضايا مش كافى علشان تقنع بيه اى حد

و كمان بالطريقة دى انت هتنفر اى حد انه يتناقش معاك

[الباشمهندس ياسر]

حتى لا يتغير مسار الموضوع

اثناء عملى ف القاهرة .. رايت مشروعا جميلا و يحقق هامشا جيدا للربح

احد الشبا عمل مكتب تاجير سيارات لشركات البترول والسياحة وخلافه

و لم يكن يمتلك سوى سيارتين على ما اذكر

و بدأ الناس ف تسليمه السيارات الزيرو بعقود ايجارية بمدد طويلة

و بناءا على علاقاته مع الشركات يقوم هو بتعاقدات

الفروق بين التعاقدات كلها لصالحه طبعا

كمان نقطه ان السيارات زيرو علشان التامين ف حالة الحوادث لا قدر الله

فكرة حلوة

و ان كنت انا مينفعش انفذها لانى مؤمن بالانتاج نفسه اكتر من ايمانى بالربح

[الباشمهندس ياسر]

حد عنده افكار تانية؟؟؟

انا مش عايز اقول كل اللى اعرفه

لانى ممكن احرق الفكرة اللى اقولها لو غيرى هيعرف يعالجها اكتر

مستنينكم يا احباب

[عطر الجنة]

هنا الكل يفكر فى مشاريع متفاوتة القيمة

لان كل واحد حسب قيمته الادخارية و المبلغ اللى راصده لمشروعه

و طبعا و نحن فى ظل الازمة و تخوفاتنا فلابد من عدم المغامرة بمبالغ كبيرة

و هنا انا حقول على تجربة رأيتها بعينى عاملها شاب كويتى زوج احدى زميلاتى هناك

الفكرة ببساطة هو عامل مزرعة سمكية صغيرة لاسماك البلطى

عارفين هو عاملها فين

هو استغل حديقة الفيلا التى لا تتعدى 150 متر

هو عمل ايه

عمل احواض اسمنتية مكعبة فوق الارض ابعادهة 1.5 * 1.5 * 1.5 متر

و طبعا احضر ليها لوازم التربية و الزريعة و بيبيع للناس اللى حوليه و بيسلم طلبيات للمطاعم

و مفيش احلى من انك تروح المزرعة و تنزل الجوبية بنفسك فى الميه و تنقى سمكك طازج

الفكرة صراحة عجبانى لانى بعمل دوبلكس بحديقة حوالى 120 متر

و كمان سعر السمك عالى و سهل التسويق

يعنى كفاية ان الجيران يعرفوا ان فى مكان فيه مزرعة سمك

كمان المشروع مش حيكلف غير كم الف

و انا بحب السمك

[سهل جدا]

الأستاذ الفاضل ياسر

انت زعلت ليه دلوقتي

مش أنت قايل بنفسك

يا جماعه فعلا نفسى افهم

طيب يا سيدي .. إذا كنت حضرتك مش فاهم ليه الربا حرام قولي وأنا أشرحلك, وما تخافش عندي صبر في توصيل المعلومة مهما كان مستوى فهم اللي قصادي

وإذا ما كنتش فهمت أنا ليه جبت المثال بتاع الرقاصات قولي بردو وأنا أشرحلك

لأن واضح من كلامي إني لا أشبه, وإنما أرد على الحجة اللي سعادتك جبتها

وهي حكاية فتح بيوت الناس, وكنت عاوز أقول إن لو كان سبب فتح بيوت الناس من شيء حرمه ربنا فلا قيمة له..

و بعدين اسمحلى بقى

انت مستوى فهمك للقضايا مش كافى علشان تقنع بيه اى حد

رمتني بدائها وانسلت :lol:

نرجع لموضوع الحوار..

واضح إن الأستاذ الفاضل "عادل أبو زيد" لما فتح الموضوع كان يقصد طرح أفكار عامة لمواجهة هذه الأزمة, وليس مشاريع وأفكار فردية

وهذا الذي يظهر من بداية كلامه في الموضوع :

الغرض من هذا الموضوع أن نتوصل معا لآلية معينة لممارسة دور فى مواجهة الأزمة.

وبصفتي عضو في المحاورات فأرى الآتي:

على مستوى الأفراد:

1-من يعمل في وظيفة الآن, فليمسك بها بكلتا يديه، ولا يتخلى عنها

2-من كان معه مدخرات؛ فليحتفظ بها قليلا؛ فليس الوقت الآن مناسب لعمل مشاريع ومجازفات في ظل هذا الركود.

3- من كان مغتربا فلا يفكر في الرجوع لبلده الآن.

على مستوى المجتمع المصي ككل:

1- لازم تشجيع الاستثمار في العقار ومنع تسقيع الأراضي, لأن البناء والمقاولات تنعش الاقتصاد لأن عدد العاملين في هذا المجال ملايين من المصريين

2- فرض قيود على الاستيراد للأشياء التافهة, لما في ذلك من إضرار بالميزان التجاري العام للبلد

يعني مش معقول الناس اللي بتورح تستورد آيس كريم وحاجات كثيرة مالهاش لازمة

3- تخفيض الجمارك أو إلغائها على المواد الخام للمصانع, كي يتمكن المصنع من إنتاج منتجات بسعر أقل ومن ثم المنافسة في الأسواق العالمية ..

[osmel33]

أنا هاقول فكرة كنت ناقشتها من كام سنة مع ابن عمي "أحد أعضاء المنتدى"

والكلام اللى هاقوله ده عارفينه الجماعة الصيادلة والزراعيين المتخصصين فى

النباتات الطبية والعطرية وهو مشروع زراعة نباتات طبية وعطرية وللأسف

السفر خلانا نأجل المشروع ده إلى حين

والموضوع ده مكسبه من عدة أوجه:

1- لو تملك أرض ممكن تأجرها إما للمركز القومي للبحوث أو أحد الشركات

اللى بتشتغل فى منتجات النباتات الطبية والعطرية زى شركة سيكام

2- انت اللى تزرع الأرض ولو ده مش تخصصك ممكن تستعين بمستشارين

فى الموضوع ده وممكن تبيع الناتج لأحد الشركات "ممكن شركات أدوية"

3- لو عايز تكبر المشروع ممكن تزرع الأرض وكمان تعمل معصرة وتعصر وتطلع

المستخلص بتاع النبات وتبيع لأحد الشركات وعلى فكرة فيه طريقة اسمها

العصر على البارد والمعصرة بتاعتها مش بتتكلف كتير

4- لو عايز تكبر المشروع أكبر وأكبر ممكن بعد ما تعصر تعمل خطوط منتجات

يعنى زيت معين لمعالجة آلام المعدة وده طبعاً بيكون تحت أشراف ناس

فاهمة ومتخصصة

ها أيه رأيكم فى الفكرة دى ويا ريت رأى المتخصصين فى الموضوع ده وبالذات

الجماعة الصيادلة

[أبو محمد]

تنبيه إدارى لن يُتبع بآخر

السيدات والسادة الأفاضل :

نشكر كل من ساهم ويساهم بجد وإخلاص فى هذا الموضوع المهم "لجميع" المصريين على مختلف طوائفهم ومشاربهم ومذاهبهم ..

ونرجو ممن قد لا يتنبهون إلى ارتكابهم لمخالفة تغيير مسارات المواضيع التى يشاركون فيها وتوجيهها إلى مسار معين يفضلون الكتابة فيه ، أن يراعوا عدم إفساد الجهد الذى يبذله زملاؤهم فى وضع عصارة أفكارهم الإيجابية فى مداخلاتهم ..

وأن يراعوا كذلك عدم مخالفتهم لقواعد المشاركات وخاصة ما يأتى

7. الإلتزام بعدم تغيير مجري الحوار في الموضوعات او محاولة تشتيت الأفكار التي يناقشها كاتب الموضوع أو تحويل الموضوعات إلي مهاترات شخصية أو إضافة مشاركات لا يقصد الإثراء بها أو الأستفادة وانما فقط لزيادة عدد المشاركات وبالأخص إذا كانت في سياق حوارات جادة.

كل ما يخالف القواعد السابقة سيكون من حق المشرفين حذفه أو تحريره بدون الرجوع الي العضو صاحب المخالفة ، و عند الإصرار علي المخالفة ستتخذ إجراءات فى حق العضو المخالف والتى من بينها مراقبة مداخلاته أو منعه من المشاركة لفترة محددة أو إنذاره وقد تصل إلى الغاء العضوية.

[أبو محمد]

تحية إلى كل من شارك فى هذا الموضوع للإيجابية الواضحة والإخلاص الظاهر فى وضع أفكار بناءة تفتح أبوابا للأمل وأبوابا للعمل ..

الأفكار قيمة .. وأعتقد أننا فى "محاورات المصريين" نستطيع أن نستفيد ونفيد إذا نظمنا "نهر الخير" هذا فى أبواب تكون فى متناول الأعضاء والزوار

يمكن أن تكون أبوابا فرعية لباب "مسائل اقتصادية" على النحو الآتى :

بنك الأفكار : توضع فيه كل الأفكار المبدئية أو التى وصلت إلى إحدى مراحل تطورها

دراسات جدوى : توضع فيه دراسات جدوى بعض أفكار البنك

إدارة أعمال : توضع فيه أسس إدارة المشروعات ذات الجدوى

وهكذا

هذا مجرد تصور مبدئى أضعه كعضو فى "محاورات المصريين" .. وكلى ثقة من أن الأفكار القيمة ستتوالى

ندعو الله أن يوفق الجميع إلى ما فيه خير البلاد والعباد