ليه مشروع "حلم العلم" مش هينجح ؟

[Lancelot]

مش علشان أنا عندي بلورة سحرية شفت فيها المستقبل وبأقول إيه اللي هيحصل .. لأ .. لكن يمكن أكون عرفت بالشكل ده ..

إتفرجت في حلقة العاشرة مساءا (أقوي صلاتي بالأحداث اليومية في مصر) علي موضوع "حلم العلم" .. فكرة كويسة وعنوان ممتاز .. حلم عن العلم ... حلم مش علم ..

للتلات أفراد منكم اللي ما يعرفوش إيه هو الموضوع ... ببساطة إتبرع ولو بجنيه علشان نعمل بحث علمي في مصر .. هو مش بالضبط جنيه ولكن أقرب إلي ألفين وخمسمائة جنيه كل سنة لمدة عشر سنين من أربعين ألف مواطن .. يعني تقريبا (25 ف 40 ومعانا الألف ونزود تلات أصفار ناقص خمستاشر يبقي) مليار جنيه في عشر سنين بمعدل مئة مليون جنيه مصري في السنة .. دول نحل بيهم مشاكل البحث العلمي في مصر ونجيب بالباقي عصير قصب إن شاء الله ..

فكرة ممتازة ... نحل بيها مشكلة البحث عن التمويل اللي كانت معطلة كل مشاريع البحث العلمي اللي عمالة تتراكم علي مدار السنين .. أخيرا لاقينا الفلوس اللي كانت ناقصنا ... مشكلتنا الوحيدة إتحلت .. فرحتنا بالفكرة ديه بتفكرني بالإعلان بتاع عبد الرحيم عمرو بتاع الموبيليا زمان .. طبعا إنتم يا أطفال مش هتفتكروه .. كان واحد عايز يتجوز ومشكلته الوحيدة "وأجيب جهازي منين" .. وصاحبه بيساعده .. "ما عندك جهاز العروسين" .. "عبد الرحيم عمرو" .. "طبعا عبد الرحيم عمرو" .. وبعدين تبدأ المزيكا .. "وإحتكم الأمر .. من عبد الرحيم عمرو .. وهأتجوز" .. ممتاز .. الراجل فلوسه جاهزة والعروسة منتظرة وأبوها موافق والأسرتين زي السمن علي العسل والشقة متشطبة .. لكن المشكلة الوحيدة اللي مؤرقة نومه هي هيجيب الجهاز منين ..

أنا مش بأشك للحظة في نوايا الناس اللي بتسعي لهذا الموضوع .. ناس محترمين وشرفاء وحبهم لوطنهم فوق كل شئ .. لكني بأشك في كل لحظة في نية "الدولة" في إنها تسعي في المساعدة ... والدليل ... مش هأحكي لكم عن ألف قصة ممكن من خلال مشابهتها بالفكرة المطروحة إني أثبت وجهة نظري .. لا أنا هأذكر قصة مشابهة بالكربون من الفكرة المطروحة .. مشروع الجامعة بتاعة أحمد زويل ... إيه اللي حصل فيها .. مات المشروع .. وراح غير مأسوف عليه من الحكومة ومبكي عليه بالدم مش الدمع مننا ..

مشكلتنا مش في الفلوس .. اللي علي فكرة مش مبلغ ممكن يساعد في الأبحاث اللي أنا سمعتها في الحلقة زي النانو تكنولوجي .. وكل buzzword تانية نعرفها عن العلم .. المبلغ المطروح (مئة مليون جنيه في السنة) يمثل واحد علي مئتين وخمسين من نسبة المبالغ المخصصة للبحث العلمي في مايكروسوفت (اللي بيتصرف خمسة مليار دولار أمريكي في السنة) .. ومايكروسوفت شركة سوفت وير (برمجيات) مش شركة أدوية ولا أسلحة .. يعني إستفادتها من البحث العلمي جاية بعد كام سنة ..

مشكلتنا مش في الفلوس .. مشكلتنا في الإرادة .. إحنا مش عايزين يا أخي ... ليه تحرج الحكومة بالشكل ده ... الناس بقالهم سنين طويلة مخصصين أقل من نصف في المئة من الدخل القومي للبحث العلمي وكمان طنشوا مشروع جامعة أحمد زويل .. يعني لو مفهمتش من الإشارة عبر السنين الطويلة إفهم من الفعل المباشر .. عيب تحرج الناس بالشكل ده .. ترضي حد يعمل فيك كده ..

وبعدين لما بدأوا يدخلوا في التفاصيل .. نعمل قانون .. لا نعمل قرار جمهوري .. زي ما يكون القانون هيتنفذ ولا القرار الجمهوري هيتبع .. عاملين زي واحد وزنه عدي المئة كليو فقال أنا لو جيبت مشاية بتاعة الجيم في البيت هي ديه اللي هتساعد إني أفقد الوزن لأني بأكسل أروح الجيم ولا أنا أنزل أجري ... أديني جيبت المشاية ودفعت فيها دم قلبي .. ولعبت عليها ولما نفسي إتقطع بطلت ... لا وجودها قدامي طول الوقت ساعد .. ولا الفلوس اللي إتدفعت دفعتني لإني أتشجع .. لأني الحقيقة المرة إني مش عايز .. والحكومة مش عايزة .. بلاش كده ده حتي الغصب حرام ..

ليه المشروع مش هينجح .. الحكومة مش عايزة بحث ولا نيلة .. من غير بلورة .. مباشرة من كل حاجة حصلت بالفعل ..

[se_ Elsyed]

قررنا إيقاف العضو لانسلوت لمدة 3 شهور ..

لحد ما يقول كان فين من 3 سنين وليه إختفى فجأة ..

ولإن 99.9 % مش عارفين الفارس لانس ...

فهذه نبذة مختصرة عنه :

- ولد الفارس لانسلوت في أواسط القرن السابع عشر لأسرة إنجليزية عريقة تمتد جذورها وتتفرع فروعها إلى عمق التاريخ وظلت هذه الأسرة تحكم إقليم إيرلندا ودارفور لمدة قرنين - ما تفهمنيش غلط .

- ثم في أواسط القرن الحادي والعشرون وتحديداً سنة 2006 تم إختيار لانسلوت ( أقول للناس كنت كاتب إيه بدل حرف السين ولا آمييييه آميييه ؟ ) تم إختياره فارساً من فرسان الترابيزة المستديرة في محاورات المصريين وكان أصغر مُشرف أشكيفي بين المشرفين ..

- وتوسمنا فيه جميعاً الخير .. وما قصرناش معاه .. وكنا بنعزمه في طيبه مول عشان يشرب كابتشينو وهوت تشوكليت وياكل كمان معاها كورواسون ... وتنبأنا له بمستقبل باهر وإن ده هو اللي هاينافس جمال مبارك بعد عُمر طويل .

- ولكن ولإنه كان لسه بيدرس في كلية الهندسة قسم مش عارف إيه وتخصص أجهزة تعويضية ... فجأة قرر إعتزال الحياة العام وتقوقع وحبس نفسه في أوضته وما بقاش حتى يروح الحمام .. وجاي النهاردة بموضوع حلم العمر راح يا طنط إنشراح ؟!!! ياخي ده بُعدك

[Alshiekh]

مشكلتنا مش في الفلوس .. اللي علي فكرة مش مبلغ ممكن يساعد في الأبحاث اللي أنا سمعتها في الحلقة زي النانو تكنولوجي .. وكل buzzword تانية نعرفها عن العلم .. المبلغ المطروح (مئة مليون جنيه في السنة) يمثل واحد علي مئتين وخمسين من نسبة المبالغ المخصصة للبحث العلمي في مايكروسوفت (اللي بيتصرف خمسة مليار دولار أمريكي في السنة) .. ومايكروسوفت شركة سوفت وير (برمجيات) مش شركة أدوية ولا أسلحة .. يعني إستفادتها من البحث العلمي جاية بعد كام سنة ..

مشكلتنا مش في الفلوس .. مشكلتنا في الإرادة .. إحنا مش عايزين يا أخي ... ليه تحرج الحكومة بالشكل ده ... الناس بقالهم سنين طويلة مخصصين أقل من نصف في المئة من الدخل القومي للبحث العلمي وكمان طنشوا مشروع جامعة أحمد زويل .. يعني لو مفهمتش من الإشارة عبر السنين الطويلة إفهم من الفعل المباشر .. عيب تحرج الناس بالشكل ده .. ترضي حد يعمل فيك كده ..

حمدا لله على سلامة العضو الفاضل / 'Lancelot'

اولا انا معترض على قرار الايقاف بتاع س س ، وحاعمل فيتو ، يعنى القرار مش حايمشى ( الا اذا قال لى على سر النعناع بالليمون ) يبقى فيها نظر. :P

نرجع لموضوعنا .....

لو كنت منتظر ان الحكومة تقوم بمشروعات البحث العلمى ، فمعلهش أرجوك راجع المثل أدناه فهو اصدق مثال على على هذه الحالة

القول المأثور فى البحث العلمى فى البر المعمور

" يامستنى السمنة يجى من بطن النملة لاعمرك حاتطبخ ولا تقلية حاتقللى "

وبمناسبة الحديث عن مايكروسوفت

مين بيدفع لمين؟ مايكروسوفت هى من يدفع للحكومة الامريكية وليس العكس.

المشكلة ياسيدى الفاضل اننا كشعب انصرفنا عن البناء والطموح الشخصى فى النجاح والتألق واكتفينا اوقل صدقنا ان الحكومة ستتكقل بنا من الكى جى وحتى الدكتوراة ، وان الحكومة ستوفر لنا الوظيفة والعروسة والعربية ، واعتبرنا ان الدولة تملك كل شيئ بما فيهم البشر فخرج منا فريقا يضع العراقيل امام الفلتات التى لم تصدق ماصدقناه ، فاضطروهم للهجرة خارج الوطن حاملين معهم ماحصلوه من علوم ومعارف دفع ثمنها الشعب الفقير المغلوب على امره.

فأصبح ينطبق علينا المثل الثانى فى سلسلة الامثال عن الغباء والعته " زى القرع ... يمد لبره " نربى عيالنا ونعلمهم ونوقفهم على رجليهم ، وعندما يحين وقت القطف ، يتم القطف لصالح دول لم تنفق مليما.

صدقنى الموضوع مش اننا نشارك ولو بنكلة او نص فرنك

الموضوع ان الطموح مقتول داخل الوطن ، الطموح المسموح به داخل الوطن ان تسرق لتصبح ملونير او ملياردير ، وليس لان تكون صاحب صرح علمى قطاع خاص ، وعلى فكرة انا لا أعرف على من تقع مسئولية وضع العراقيل .... هل هى فينا كشعب؟ فى كبار صغار الموظفين؟ ام فى صغار كبار الموظفين؟ ام فى اسرائيل !!! وأمريكا !!! أم فى كندا !!! أم فى الهيئة

[الترجمـان]

الأخ Lancelot من الواضح انك مناضل محاوراتي قديم .. واسمحلي أني أرحب بيك وبعودتك الطيبه .

مش عارف ليه من قراءاتي لبعض الكتابات هنا أننا بنموت في هري الذات وتحطيمها بالوصول سريعا إلى حالة اليأس كخيار أستراتيجي

في هذه المرحلة الحرجة التي مر بها شعوب كثيرة وصل الفساد السياسي بها إلى أكثر من ذلك بكثير ..

ومن الجيد أنك تركت لنا خيار قدرة المصريين على جمع الأموال والدماء إن لزم لإنجاح مثل هذه المشاريع التي تمثل لمن يحتمل عقله

مساحة واسعه من الأحلام لنجاح هذا البلد فرصة مناسبه جدا لخروجه من المأزق السياسي والإداري اللذان يكبلان أحلامه الجامحه ..

وأكاد أجزم لك أن مش المصريين بس اللي هيتبرعوا لمثل تلك المشاريع ولكن هناك الكثيرين سواء عربا كانوا أو غير عرب يحبون هذا

البلد كما يحبه أهله ومستعدون للمشاركه الإيجابية فيه سواء بالمال والدماء والخبرات ...

حضرتك قلت

للتلات أفراد منكم اللي ما يعرفوش إيه هو الموضوع ... ببساطة إتبرع ولو بجنيه علشان نعمل بحث علمي في مصر .. هو مش بالضبط جنيه ولكن أقرب إلي ألفين وخمسمائة جنيه كل سنة لمدة عشر سنين من أربعين ألف مواطن .. يعني تقريبا (25 ف 40 ومعانا الألف ونزود تلات أصفار ناقص خمستاشر يبقي) مليار جنيه في عشر سنين بمعدل مئة مليون جنيه مصري في السنة .. دول نحل بيهم مشاكل البحث العلمي في مصر ونجيب بالباقي عصير قصب إن شاء الله ..

فكرة ممتازة ... نحل بيها مشكلة البحث عن التمويل اللي كانت معطلة كل مشاريع البحث العلمي اللي عمالة تتراكم علي مدار السنين .. أخيرا لاقينا الفلوس اللي كانت ناقصنا ... مشكلتنا الوحيدة إتحلت .. فرحتنا بالفكرة ديه بتفكرني بالإعلان بتاع عبد الرحيم عمرو بتاع الموبيليا زمان .. طبعا إنتم يا أطفال مش هتفتكروه .. كان واحد عايز يتجوز ومشكلته الوحيدة "وأجيب جهازي منين" .. وصاحبه بيساعده .. "ما عندك جهاز العروسين" .. "عبد الرحيم عمرو" .. "طبعا عبد الرحيم عمرو" .. وبعدين تبدأ المزيكا .. "وإحتكم الأمر .. من عبد الرحيم عمرو .. وهأتجوز" .. ممتاز .. الراجل فلوسه جاهزة والعروسة منتظرة وأبوها موافق والأسرتين زي السمن علي العسل والشقة متشطبة .. لكن المشكلة الوحيدة اللي مؤرقة نومه هي هيجيب الجهاز منين ..

حضرتك اغفلت في تقديمك لنقد المشروع أن الحملة ستبدأ إن قدر الله لها أن تبدأ بكوبونات التعهدات المبدئية لكل المواطنون الموافقون على هذا المشروع ولن تبدأ بجمع التبرعات بشكل مباشر إلا بعد جمع هذه الكوبونات أو التعهدات وتشكيل مجلس الامناء الذي سيتولى الرقابة والمتابعة على سير العمل في هذا المشروع ..

إذا فالمشروع سيدأ تصاعديا بتجميع الإرادة الداخلية الموافقة على إنجاز هذا المشروع بشروط المساهمون في هذا المشروع .. وهذا شئ طبيعي أن أي مشروع يحتاج إلى إرادة فهل نحن نملك مثل هذه الإراده الشعبية اللازمه للنجاح ..؟؟

مشكلتنا مش في الفلوس .. مشكلتنا في الإرادة .. إحنا مش عايزين يا أخي ... ليه تحرج الحكومة بالشكل ده ... الناس بقالهم سنين طويلة مخصصين أقل من نصف في المئة من الدخل القومي للبحث العلمي وكمان طنشوا مشروع جامعة أحمد زويل .. يعني لو مفهمتش من الإشارة عبر السنين الطويلة إفهم من الفعل المباشر .. عيب تحرج الناس بالشكل ده .. ترضي حد يعمل فيك كده ..

أخي الفاضل أتفق معك تماما ان الحكومات المتعاقبة في عهد الرئيس المبجل مبارك لم تنظر إلى مشاريع البحث العلمي بنظرة عطف ولا بشفقة .. وهو ما أدى إلى رحيل قاعدة كبيرة من الخريجين الأكفاء لإتمام دراستهم بالخارج عن طريق الهجره أو التسرب من المنح العلمية التي ترعاها الجامعات المصرية للشباب المتفوقين ..

فمجمعات البحوث العلمية التابعة للدولة الرشيدة لا تملك القدرة لإحتواء مثل هؤلاء الشباب الطموح القادر على بناء نهضة في هذا البلد لأسباب كثيرة منها ضعف العائد المادي وتخبط السياسات الحكومية وانخفاض سقف طموحاتها وتدني جودة الحياة في مصر ..

كما أننا من المفروض كبرنا بقى على موضوع الإحراج داه وكل واحد يستطيع أن يرى بنفسه كيف تستطيع الشعوب أن تصنع ما تريده وتلعب دور مباشر في إسقاط السياسات وإحلال ما يتفق مع إرادتها ...

كل ما اعجبني في هذا الحملة أنها تهدف لمشروع شعبي لا تتحكم فيه سياسة بعينها سوى سياسية النجاح المفقوده على مر القرون السابقة .. فهو مشروع ظاهره العلم وباطنه السعي إلى التوحد والتحضر وإحلال ثقافة العلم فوق كل شئ ..

وبعدين لما بدأوا يدخلوا في التفاصيل .. نعمل قانون .. لا نعمل قرار جمهوري .. زي ما يكون القانون هيتنفذ ولا القرار الجمهوري هيتبع .. عاملين زي واحد وزنه عدي المئة كليو فقال أنا لو جيبت مشاية بتاعة الجيم في البيت هي ديه اللي هتساعد إني أفقد الوزن لأني بأكسل أروح الجيم ولا أنا أنزل أجري ... أديني جيبت المشاية ودفعت فيها دم قلبي .. ولعبت عليها ولما نفسي إتقطع بطلت ... لا وجودها قدامي طول الوقت ساعد .. ولا الفلوس اللي إتدفعت دفعتني لإني أتشجع .. لأني الحقيقة المرة إني مش عايز .. والحكومة مش عايزة .. بلاش كده ده حتي الغصب حرام ..

المواجهة مطلوبه دائما حين يوجد إهمال أو فساد ..

فإذا كانت المنظومة التعلمية الحكومية أو البزنسية لم تقدم الواقع المطلوب الذي يتغنى بها رئيس الجمهورية في كل محاضره يلقيها على شعبه الذي انتخبه بصمته الخجول فلماذا لا يتدخل الآن لإنقاذ هذه المنظومة ويوجه الدعم الشعبي لمثل هذا المشروع وإثارته

سواء في مجلس الشعب أو حتى بالإعتصامات والإضرابات..

لماذا نضرب ونعتصم على الفرعيات ونترك الأساسيات التي تستحق الغضب دون مزايدة ولا نقصان ..؟؟

وشكرا على إتاحة المجال للتفكير وللأحلام التي أرى أنها مازالت ممكنه

[الترجمـان]

في نقطه أخرى نسيت أضفها في المشاركه ..

وهي ان المثقفون عليهم عامل كبير واساسي في توجيه الجماهير وتعبئتهم ويا حبذا لو تظافر الجميع لإنجاح مثل هذه المشاريع والخروج بها من دوائر المنافسات السياسية والحزبية والدينية ... وهذا لن يتم بالكتابة ولا بالأشعار وإنما يحتاج إلى جهد كبير ومخلص تجاه هذا الوطن الذي يستحق الكثير ..

تحياتي

[عادل أبوزيد]

سيدى الفاضل لا تجهض الحلم .... عفوا لم يصبح حلما بعد لكنه مجرد محاولة للإستفزاز أو التحفيز من أجل أن نحلم ..

ما سيق كان إستهلالا لابد منه

ليتك تعود لموضوعك القديم عن مجلة ميكى و قد أضفت إليه مداخلة اليوم.

كما قلت لا ينقصنا المال ..... ما الذى ينقصنا من أجل الإنطلاق ؟

منذ عشر سنوات هنا فى محاورات المصريين نحاول أن "نستفزنا من أجل أن نحلم" هل نيأس ؟ ....

عندى تصور أريد أن أصدقه أننا نستطيع الإنطلاق و أستشهد على ذلك بإنطلاقة عصر محمد على و لا أمل - من الملل - من القول أن مصر وصلت قبل محمد على - سنة 1798 - إلى قاع العالم و تم توثيق حالتها بالكامل بواسطة علماء الحملة الفرنسية فى كتاب وصف مصر لعلماء الحملة ، و بعد 25 سنة تحالفت أوروبا كلها لتواجه أسطول مصرى صناعة محلية بالكامل فى معركة نفارين البحرية قبالة سواحل اليونان.

و لا أمل - من الملل - من تذكر إنطلاقة مصر فى عشرينيات القرن الماضى الإنطلاقة التى قادها بنك مصر و إبن مصر طلعت حرب ....

أتسائل عندما أرى الجماهير تشاهد أحدى مباريات كرة القدم ..... هل هؤلاء عاجزون عن الإنطلاق !!

دعونا نبحث عن سر الخذلان - و لا أقول التخاذل - هل .... هناك المئات من ال "هل" ...... و عندما نصل لإجابة واحدة ستنطلق مصر و شعب مصر.

وضعت مداخلتى هذه فى نفس الوقت الذى كان يكتب فيه الفاضل الترجمان و التى أتفق معها بالكامل

[الباشمهندس ياسر]

قريت مرة ان حقائق اليوم هى احلام الامس و ان احلام اليوم هى حقائق الغد

و لولا الامل مكناش هحنب الحياة

ده الموضوع ببساطة

الفكرة بقى اننا نكمل

عايز اقول حاجة اخيرة

عندى احساس قوى جدا اننا هننجح ...... رغم كل الظروف اللى بتقول غير كده

[محمد فرج]

انا رائي المتواضع برضه ان المشروع ده مش هاينجح في البداية لازم ننتبه بشدة لأي محاولة لتعبئة الناس على هدف لابد أن ننتبه أن يكون الهدف واضح بدون أي كهنوت أو غموض دا واحد الشئ الثاني أن يكون هدف قابل للنجاح فعلا لأن لو كان الهدف غامض و غير قابل للنجاح الناس المعبئة هاتنصرف عن أي مشاركة إجتماعية.

أما عن مشروع حلم العلم فالمشروع هدفه تنمية البحث العلمي في مصر عن طريق إنشاء جامعة بالتمويل الشعبي و لكن هذا الهدف هو أخر خطوة يجب أن تنجز في المجتمع لإصلاحه هل فكر القائمون على المشروع لو تم فعلا فأين البيئة المناسبة لتطبيق الأبحاث العلمية المنتجة من هذة الجامعة أم انها ستكون للتصدير و التطبيق في بلاد أخرى لأننا ببساطة بلد غير مهيئ لتقبل نتائج أبحاث علمية لأننا فعلا في ظل ظروفنا نحتاج أبحاث تطبيقية أكثر.

سؤال أخر من هم الشباب المؤهلين للإلتحاق بهذة الجامعة لأن الشباب المصري غير مؤهل من تعليمه الأساسي و لما يخرج الشباب لجامعات الدول المتقدمه فإنه ينجح لأنه يستند على جامعة قوية لديها أصول و قواعد راسخة من العلماء و الإمكانيات المادية و لكن هذة الجامعة الوليدة أخشى أنها لن تستند على قواعد مادية و علمية تكفي لإعادة تأهيل الشباب الغير مؤهل من التعليم الأساسي.

و بالإشارة إلى التعليم الأساسي فأنه و لا شك هو القضية الأساسية و الهدف القومي الأهم الذي يحتاج من كل طوائف الشعب التكاتف و هذا الهدف لا يحتاج إلى إمكانيات مادية جبارة و لا حتى علمية لأننا لن نعلم الأطفال علم الذرة و لا النانو تكنولوجي و لكن يحتاج لحالة غائبة من التوافق و السلام الإجتماعي الغائب عن مصر.

[hanzalah]

ينجح مشروع النهضة العلمية في ظل توافق وتخطيط وتنسيق لنهضة في مجالات اخرى اجتماعية و تربوية

يجب ان يؤمن الناس بمنظومة قيم جديدة

ايمانهم يأتي بوجود قدوة وليس فقط مؤتمرات وكتابات وتنظير بارد ليس له مردود في دنيا الواقع

وإلا لكانت أثمرت من قبل مئات الالوف من خطب الجمعة و مواعظ الاحد في كنائسنا !!

السلبية تم زرعها على مر سنوات في الامة المصرية

والنهوض يجب ان يسبقه تحضير جيد للتربة

قبل بذر البذور وانافق الاموال (التي سنجمعها)

قدرة الشعب المصري عظيمة على النهوض من كبواته

ولكن ..

يود في دني االبشر الواقعي ما يسمى .. مقدمات .. يتبعها توالي ..

لا يصح أن نضع العربة قبل الحصان

لايصح أن نحلم اليوم بنهضة علمية ونحن في حضيض خلقي وقيمي

لانعرف للاجتهاد والاتقان و الجودة في الأداء قيمة

لانعرف للعمل المشترك و روح الفريق والتعاون قيمة

لانعرف للانسان قيمة

ونحن لم نفق بعد من صفر المونديال

يلبس رئيس الوزراء والحكومة الترنجات ويحتفلوا بـ (يوم الرياضة)

أي تهريج نعيشه !!!

[Lancelot]

لم يكن الهدف من كلامي إني أدعو لموقف أو إتجاه علي حساب إتجاه أخر .. الهدف كان إني أتوقع (بمساعدة البللورة) المستقبل للفكرة ديه .. علشان كده العنوان هو "ليه مشروع حلم العلم مش هينجح" وليس "أفشلوا مشروع حلم العلم" ولا "بلاش تحلموا" ولا أيضا "عدت إليكم بالكأبة واليأس" ..

الهدف هو .. بلاش ندعي إننا بنحل المشكلة بمعالجة سبب نقص التمويل .. في حين إننا متجاهلين السبب الحقيقي وهو إنه مفيش دعم من الحكومة ولا سياسة من الدولة تجاه البحث العلمي ولا علي أجندتها خالص .. علي إفتراض إن الأجندة فيها أكتر من بند واحد ..

المشكلة مش في إننا نجمع فلوس ... الفلوس أنا متأكد مليون في المئة إنها هتتجمع بدون مشاكل ... لكن بعد كده الفلوس ديه هتتصرف إزاي .. هتروح في جيب مين .. وإنتوا عارفين إننا عندنا الشفافية عالية أوي أوي .. يعني طبعا كل مليم هيتصرف مش هنعرف عنه حاجة ...

بلاش إسلوب ... "أنا عندي فكرة" ... تعالوا نجرب إسلوب تاني ... "أنا عندي خطة" ... قولي بالضبط الفلوس ديه هتتجمع إزاي وتتصرف إزاي وفي إيه وعلي مين وبأي قواعد وبأي قانون .. وبعدين أقولك هأدفع ولا لأ .. لأن الشيطان في التفاصيل زي ما بيقولوا ...

أنا مش بأقول أنا متخيل إن اللي هيحصل هو كذا ... لا أنا بأقول إن اللي حصل في موضوع جامعة زويل هو اللي هيحصل في الموضوع ده ... دعم من الرئيس .. وصورتين وعنوانين في الجرايد .. وبعدين ... نووووووووووووووووم في الخط ..

تجميع كعب تعهد من أربعين ألف مش هيخوف الحكومة ويخليها تفكر في الموضوع ... أنا عارف كده كويس زي ما أنا عارف إن تجمع 400 ألف قدام القصر الجمهوري مش هيخلي الرئيس يسيب الحكم ...

نقطة أخيرة ... خلينا واقعيين شوية .. بلاش تكلمني عن الحلم والإحساس بالأمل .. مفيش داعي للعلاج النفسي الجماعي ده ..

نقطة بعد الأخيرة ... أوعوا تزعلوا من نبرة خطي (أو صوتي لو بتقروا بصوت عالي)... إنتوا واحشني جدا كلكم ... بس الموضوع ده خرجني من صمت تلات سنين ...

[الترجمـان]

نقطة أخيرة ... خلينا واقعيين شوية .. بلاش تكلمني عن الحلم والإحساس بالأمل .. مفيش داعي للعلاج النفسي الجماعي ده ..

افهم من كدا أن حضرتك رافض العلاج ..؟؟ :ninja:

احترم واقعيتك أخي الفاضل :)

انا بس حبيت أني اعيد واوضح نقطه معينه ان الحمله دي فعلا كما قلت حضرتك أقرب للعلاج الجماعي فربما بدايتها بداية عشوائية وربما من دعى لها راجل شاعر مالوش في الكيمياء ولا الأحياء ولكن أستطاع أن يعطينا الأمل فينا ويعطينا الفرصة الجماعية للإعتذار لأنفسنا عن سلبيتنا تجاه الوطن الذي نعيش فيه ويحتضننا خيره ..

وبدايتها اعتذار في كوبون صادر منّا وعائد ألينا في يوم من الأيام بإذن الله

تحياتي لك واجدد ترحيبي بك

[Sherief AbdelWahab]

طالما أننا نعتقد أن المشكلة هي فقط التمويل .. فنحن إذن نعيش "فيلم العلم"..

من السهل إسقاط أي مشكلة إلى سبب خارجي ، وليكن التمويل ، دة أنا لو معايا .. أنا لو معايا ..

بينما يتضح لك أنه "أنا لو معايا كنت ح أحمل في الحكاية دي إيه؟"..مع الاعتذار لـ"أيمن بهجت قمر" في أغنية "محمد حماقي" "أنا لو أذيته"!

في ظل أي رواتب ستبقى العملية هية هية في النملية ، أبحاث بتتطلسأ وتتكروت ، زي الدراسات الميدانية اللي بتتعمل في الكليات النظرية اللي بتتعمل ببيانات متفبركة وأي كلام في الأي كلام.. واللي حيحصل إن زادت الميزانية إن الطلسأة هي اللي حتتطور..

أرجع للنقطة الهامة جداً جداً اللي قالها الزميل محمد فرج ، واسمحولي أصيغها بأسلوب تاني:

هل فيه مستهلك للبحث العلمي اللي حيتقدم؟

علشان تعمل بحث علمي يخدم الصناعة لازم يكون عندك صناعة ، وتكون الصناعة على استعداد للاستفادة من أبحاثك..مش بس من قبل القطاع العام اللي بيملك نسبة كبيرة من قطاع الصناعة في مصر ، كمان من القطاع الخاص الهادف للربح ، واللي حتضطر رغم مشاعرك الشريرة ناحيته للاعتماد عليه علشان تعمل تنمية في بلدك..ولو استفاد منها في الأول هو اللي حيصرف وحيدعم بنفسه..

وكلما كان التنوع الصناعي حاضر كلما كانت الأمور أفضل ، على عكس ما يكون الاعتماد في مصر على صناعة ولا اتنين .. يبقى تقريباً كدة ما عملناش حاجة..

وعلشان تقدر تخدم غيرك برضه لازم تخدم محيطك الأول ، بشغل حقيقي مش مجرد دراسات لا ترقى إحصائياً إلى مستوى الهلاوس..

وعلشان تعمل دة كله لازم يكون فيه إرادة .. تعوضك نقص وارد في عدد الموهوبين والفلتات بالعمل الجماعي والعزيمة .. لإن عمر ما أي نهضة قامت على فلتات ، لإن النجاح اللي بيقوم على فلتات بيزول بغيابهم إن ما عملش "المعلمين" دول "صبيان" يبقوا معلمين بعد كدة ، عيب الملحوظة دي تعدي علينا بما إن مصر من أقدم البلاد اللي عرفت الحرف وعرفت النظرية اللي أهملناها وتخلفنا..

ولازم نخلص من عقلية الموظفين اللي بتحكم البحث العلمي ، سهل أوي تروح تعمل إضراب وتخلط الحابل بالنابل ومرتباتك بفلوس الأبحاث .. ويا فرحتي بنسبة كبيرة من الناتج القومي تخصص للمرتبات والحوافز والبدلات بينما يبقى الحال على ما هو عليه وعلى المتضرر إنه يخبط راسه في الحيطة اللي هو عايزها..

ولازمن نخلص ودة الأهم من فتحة الصدر اللي بقالنا فيها قرون .. تسمع في أفشل القطاعات عبارة "على أعلى مستوى .. على أعلى مستوى" بينما لو قربت لكل قطاع من دول حتلاقي أحط وأسفل وأسوأ مستوى.. مش بالكلام ولو بالكلام ما كانش حد غلب..

خلص الكلام

[serag]

أعمل إيه بس

رغم اني مش من هواة المنتديات

و رغم انه احتمال ضخم جدا مجيش هنا تاني

بس إيدي كانت بتاكلني

لازم ارد

هنحلم

مشوار الألف براءة اختراع هيبدأ بحلم

و مالو

حكومة إيه و دعم إيه

البحث العلمي هيصرف على البحث العلمي

زي ما بيحصل في العالم كله

بحث علمي فاختراع فمنتج فتسويق فربح فبحث علمي ...هلم جرا

بس فيه مشكلة .. البيضة و لا الفرخة

المليار جنيه

الthreshold

اللي من عنده نقتحم الدايرة

و نلف مع الأرض بقى

لو بطلنا نحلم نموت

لو نجحنا في دمج البحث العلمي فعلا في مشروعات اقتصادية يكبرها و تصرف غليه فيكبرها .. لا يمكن حكومة عميلة و لا نفوس يائسة و لا فوضى خلاقة توقفه .. لأن الكلمة هتبقى للقرش .. بحث علمي بيجيب قرش يساوي قرش

و البداية مليار جنيه

المتفائلين بيشجعوا مصر .. و كلنا معاهم..

[saad badr]

بيقولوا في الامثال لو عندك كلمة خير قلها معندكش سمعنا سكاتك

هل مستشفى السرطان تاني مستشفى على مستوى العالم والأولى عربيا وفي الشرق الأوسط مع العلم بامكانيات منطقة الخليج اللي يقدروا يعملوها المستشفى كانت حلم واتنفذ على ارض الواقع وكانت المشكلة في الأول فين ومنين ؟؟؟

السد العالي في عز الخراب والحرب علينا من العالم كله يبقى له منسبناشي من الاحباط والكلام ونحط ايد في ايد

صدقوني والله مصر اعدائها كتير اوي والدنيا كلها عينها على مصر

ايران الفارسية وانا هنا في الخليج وعارف كويس اوي حلمها الخليج الفارسي وعارفة ان مصر هية اللي في وشها ومصر سنية وتحاول تهز صورتها قدام العرب ويكون هناك من الجهلة من العرب اللي انقسموا على مصر بفعل ايراني

اسرائيل عدونا اللدود ومش هقول اكتر من كده

الغرب واطماعهم في المنطقة واداركهم ان مصر هية الدولة الوحيدة اللي ممكن تقف ضدهم

والله انا ممكن اتكلم واشرح بس ده مش موضعنا

موضوعي الحلم ده موجود على الفيس بوك والناس بتشارك برايها له منرحش نشوف واللي عنده فكره يقولها

وكمان اللي يقدر على حاجه يعملها

وصدقوني لما ربنا يكرمك وتشوف علماء مصريين زي الاول عملوا ....

ولا ابنك واحد منهم واخترع ...

ولا ولا ولا ونقدر نقول عندنا علم وعندنا عمل ونقدر نغير ونقدر نرجع مكانتنا

وايه ده بس مش هتعمل حاجه هتقدر تدفع مية جنية ادفع مية جنية كرت شحن وماله

هتقدر تدفع عشرة جنية بحق علبة سجاير وماله

هتقدر تدفع جنيه وماله

مش معاك ومش هتقدر تدفع قول بس يارب اكرمهم علشان بكره وعيالي واحفادي يكون ليهم مستقبل مش يدوروا يهجوا

وتخلع جذروك من اجمل مكان في الدنيا

عامة ده اللينك وان شاء الله كلنا نشارك

http://www.facebook.com/reqs.php#/group.php?gid=67969053584

وكمان فيه مقترحات واراء

يلا كلنا بنحب مصر واللي يلف الدنيا مش هيلاقي احسن من تراب مصر

ترابها ده كنوز

ده الشمس بتضحك لما تعدي على مصر وتشرق على المصريين

والنسمة ترقص لما تعدي من اسكندرية وكمان من حلايب وشلاتين

ولا العصرية وساعة المغربية والحلاوة جاية والشمس تبكي من فراق الفلاحين

ولا السمسية ولا القلوب الطيبة في الشراع شراع المحتاجين

ياناس كفاية نسمة صباها صبية دايما ارض الملايين

عمرانه بالخير والخيرين

وحياة هواها ونسمة صباها لانول رضاها وارجع هناها

ويقولوا عليها انها قاسية مين يهون على امه وازاي نهون على ام المصريين

دهية عافية قووووي وصبورة وصابرة وماترد ايد ولا تزعل حبيب

يا بلاد طيبة وقريبة وحبيبة وقت الخطر امي بتحملي همي حضنك ده دفه وحنان

ايوة دفه وامان وقت الخطر درعي وسيف من غدر الزمان

ولا نقول ماشفش الرجال السمر الشداد ولا العناد في عيون الولاد

ولا نقول احلف بسماها وبترابها