شارك معنا باكلات المواسم والاعياد

[nana]

الاول كل سنه وانتو طيبين بمناسبه امولد النبوى الشريف

وبالمناسبه دى خطرت على بالى فكره كل بلد فى اعيادها ومواسمها ليها اكلات مميزه حتى لو فى محافظات مصر

ومدنها داخل المحافظه الواحده اكلاتها برده بتختلف فى المواسم

ايه رايكو لو حد عنده اكلات مميزه لبلده بيعملوها فى المواسم ومش شرط المواسم

يعنى مثلا الكبده الاسكندارانى لو واحده فى المنتدى اسكندارانيه تقولنا طريقته

لو منالسواحل مثلا الصياديه

مثلا

احنا فى المواسم بلدنا بتعمل كبيبيه الرز والحمه الى بتتلق فى الشوربه وبعدين تتحمر بالبيض فى محافظات فى مصر متعرفهاش وبتحمرها الاول بعدين تحطها فى دمعه (صلصه)

ايه رايكو اللى عننده خبره يشترك معانا ولو عايزينى اقولوكو طريقه الكبيبه بتعاتنا هقولوكو عليها

[se_ Elsyed]

عندنا في الموسم .. زي الموسم بتاع إمبارح كده بنعمل بط .. أوووووووووووووووووووووووووووه ... آه ه ه ه ه ه .... حاجه إنتحار .. والواحد بيدخل في البطاية من هنا .. ويجيله ابو النوام من هيناهو ...

طريقة عمل البط ..

- نجيب البطاية من العشة .. ولو مافيش عندنا بط فممكن نستلفه من عشة الجيران ... ويُفضل دبحها وتنضيفها عند الفرارجي عشان في ستات بيوت مش بتعرف تنضف البط كويس وبيبقى جلدة إسود حتى بعد ما يطبخ وبالتالي بيسد نفس نا شخصياً ..

- بعد ما نضفنا البطايه ... نكون بقى محضرين الخلطة بتاعت الحشو ... أمممممممممم .. أنا ريقي جري .... وخلطة الحشو هي :

- رز .... بصلاية مفرومايه .... توابل ... برتقانيه مقطعة - ما تستغربوش - تفاحية متقطعة زي البرتقاناية ... زبيب ... مكسرات لو أعوذ الله موجودة عندنا ... يا سلام لام لام لام لو شوية كبد فراخ أو بط أووووووووووف يابا أوووووف

- وبعدين نحشي البطاية ونقفلها من الخلف بخلة اسنان كإننا بنخيط واحد عيان إتعور في خناقه ... أو في ناس بتقفلها بخيط وإبره بجد والله عشان ما تفرطش الحشو بتاعها ... ونسقطها في ميه بتغلي وفيها بصلايه وورق لوري وعود قرفة وشوية حبهان وقرنفلايه .. ويا سلام برضوا لو عندنا حلة ضغط .. عشان البط مقرف في تسويته ... ونسيبها نص ساعه كده .. وعيش يا معلم ...

- ونطلع البطاية متكتفه ونحمرها في سمنة ..

- وبما إن شوربة البطاية بتبقى سمينه .. فيا سلام لو جنبها طبخنا " كشك ألمظ " على رأي فاتن حمامة في فيلم يوم سعيد لما كانت لسه بترضع ، وحالاً هاسرق لكم طريقة عمل الكشك

طريقة عمل الكـشـك

المقادير

2 كوب كبير من مرق الدجاج أو اللحم وأضافة مرقة دجاج أذا حبيتي

2 ملعقة كبيرة أرز

1 كيلوا لبن

3 ملاعق دقيق + 1 ملعقة نشا

ملاعق سمن

1 بصلة كبيرة مقطعة شرائح رقيقة

طريقة العمل سهلة جدا

أولا :

بعد غسل الارز يضاف الي المرق المغلي علي النار ويقلب من وقت لأخر حتي تتأكدي عند التذوق أنة أستوي.

ثانيا :

قلبي الدقيق والنشا مع اللبن بمضري يدوي حتي يتجانس اللبن مع الدقيق والنشا.

وفي نفس الوقت هاتي طاسة وسخني السمن وضيفي لية البصل حتي التحمير حتي يصير اللون زهبي ثم أنشلية علي ورق حتي يتشرب الباقي من السمن خدي باللك خلي السمن الباقي من التحمير علي جنب لانـك هتحتاجية بعد شوية

المهم : بعد ما أستوي الارز في المرق هاتي مصفاه سلك وحطيها علي حلة المرق وأسكبي اللبن المضاف اليه الدقيق والنشا

وحركي الخليط جيدا بالمضرب اليدوي حتي يتجانس مع بعضة وأذا حسيتي أن الكشك متماسك زيادة ممكن تضيفي بعض المرق أو اللبن وأضيفي الباقي من السمن وقلبي جيدا

وبعد أغرفي الكشك في أطباق التقديم وأضيفي علي الوجة البصل المقرمش

- أما لو العملية مبحبه بقى فيُفضل برضوا عمل طبق ملوخيه بطشة التقلية مستعملين بواقي شوربة البطة الشقية ..

- ولو عايزين نخربها يبقى نعمل طبق فته بالخل والتوم

يا نهار مش فايت ... أتحدى حد يخرج من بيتهم بعد الأكلة الجبارة دي .. وأي واحد بيعاني من القلق أو الرُهاب أو شيزوفرينيا البحر الاحمر المتوسط إن ماكانش ينام فيها 12 ساعة .. هايقول إنت بتسرح بينا يا س س

وعشان الموضوع يبقى دوكيومينتد .. فإليكم صور أخر موسم صيد بط حضرته

دي صورة للبطاية قبل ما تندبح

والله صعبانه عليه .. شكلها بنت ناس ومش وش دبح

ودي صورة تذكارية للبطاية مع عيلتها وهما بيتفسحوا في القناطر الخيرية

ودي صورتها قبل س س ما يتحرش بيها

ودي صورة س س بعد ما ضرب صدر البطه وبلع بطبق كشك ولسه بيمسح زوره

ودي نهاية كل من تجرأ وأكل بط في الموسم سواء هو أو كلب الحراسة بتاعه

ودي صورة س س تاني وهما بيحاولوا يفوقوه من أثار البط المدمرة بعد أربع ايام بلياليهم نايمهم

فوزية بنت خالة س س بعد أن ضربت خامس طبق كشك وراحت في خبر كان

ودي صورة فوزي أخو فوزية كان س س عازمه على حته بط .. وعمالين يفوقوا فيه لدرجة إنه شمموه جزمة صاحبها ما قلعاش من عدوان 56 .. وبرضوا ما فيش فايدة .. فالبط سلاح بيولوجي أكثر فتكاً

وإلى اللقاء في الحقة القادمة مع وصفة أخرى من وصفات الشيف إس إس أخصائي الأكلات الشرقية وأمبراطور الأكلات الغربية وبأصلح ساعات

[nana]

شكرا على الوصفه بس ليه سؤال

برتقانيه مقطعة - ما تستغربوش - تفاحية متقطعة زي البرتقاناية

ودول طعمهم بيبقى عادى حلو فى الاكل يعنى لو جربنا على ضمانتك

[osmel33]

أيه ده يا معلم س س ده بعد الأكلة دى والله لو ضربوه بالنار :lol: مش ممكن يصحى تاني

بس أيه يا أخ س ده أنت جيت على الجرح وفتأته بطاية يا مفترى

سؤال رخم شوية هو أنتم عندكم بط فى السعودية ؟

سؤال أرخم من الأولاني لو فيه بط بينضفوه ازاى أنا أعتقد أن البط اللى بينضفه

لازم يكون معلم من الدرب الأحمر ومتربي فى عشة فراخ محترمة

[Folana]

الاول كل سنه وانتو طيبين بمناسبه امولد النبوى الشريف

مثلا

احنا فى المواسم بلدنا بتعمل كبيبيه الرز والحمه الى بتتلق فى الشوربه وبعدين تتحمر بالبيض فى محافظات فى مصر متعرفهاش وبتحمرها الاول بعدين تحطها فى دمعه (صلصه)

ايه رايكو اللى عننده خبره يشترك معانا ولو عايزينى اقولوكو طريقه الكبيبه بتعاتنا هقولوكو عليها

السلام عليكم ورحمة الله....

موضوع جميل يا nana ...وكل سنة وانت طيبة

لى استفسار بس بعد اذنك....اولا طبعا عايزين نعرف طريقة الكبيبة بتاعتكم

ثانيا...حضرتك بتقولى بنحمر اللحمة بالبيض....مش بس بعض المحافظات اللى ماتعرفش الطريقة دى...ده تصادف ان أنا كمان ما أعرفهاش... :)

فلو ممكن تقولى لنا الوصفتين...وجزاك الله خيرا....

وبالنسبة لسؤالك عن البرتقال فى حشوة البط...فطعمه مش بيكون مسكر ولا حاجة..لكن بيدى نكهة محببة....أنا اكلت فى تايلاند الصيف الماضى أرز بالاناناس والكاجو..كان حكاية...وبيقدموه كمان فى ثمرة الاناناس نفسها.....و جربته فى رمضان وكان جميل ... طبعا الطعم كان مختلف عن الاصل لكن مايخالف...طلع كويس برضه...

وصباحك زى الفل....

[se_ Elsyed]

قبل موضوع إنفلونزا الطيور وأعلانات شعبولا .. كانت الأمور عادي في الرياض وكان في سوق بيبيعوا فيه قرود حتى مش بط .. وهو سوق " المربع " في منطقة الوشم .. وكانت كلها محلات مصرية بتبيع حمام آمممممممممممممم وبط وفراخ بلدي وديوك رومي وأنارب ووز وأهم حاجه بيض بلدي ..

بس بقى لنا سنة طلع حذر بيع أي طيور حيه في المحلات ..

وبالتالي مش عارف إيه وضعها دلوقت

--------

بالنسبة للحشو البرتقال والتفاح .. فالحاجات دي بتستوي مع البطاية وبتبقى زي الملبن وطعمها أكثر من رائع ولا تعارض مع الطعم بل أزيدك من الشعر بيت .. عارفه القراصية بتاعت خشاف رمضان ... يااااااااه لو حطتيها مع الحشو ده .. ياه ياه ياه .. تلاته ياه

فلانه هانم ... جايه مشوار البط ده ولا لأ ؟

[nana]

الاخت الفاضله المشرفه فلانه شكرا جزيلا لمشاركتك وبعد

لى استفسار بس بعد اذنك....اولا طبعا عايزين نعرف طريقة الكبيبة بتاعتكم

ثانيا...حضرتك بتقولى بنحمر اللحمة بالبيض....

طريقه عمل كبيبيه الرز واللحمه

نجيب نص كيلو لحمه حمرا خالص ونفرمها فى الكبه

1 كيلو رز مغسول ويمكن نقعه اولا عادى ثم نفرمه ايضا فى الكبه مع ربطه متوسطه من الخضره(شبت كسبره بقدونس)كلهم او اى نوع متوفر ولكن كلهم يكونو ربطه متوسطه مع بصله متوسطه وفصين توم والملح والبهارات حسب الطلب

نعجن كل امكونات جيدا حتى تتكون عجينه متماسكه سهل تشكيلها

نصنع منها اقراص مبططه يكون حجمها اكبر قليلا من الطعميه الكبيره او حسب الرغبه واثناء الطبطيط يمكنك بل يدك بالزيت ويمكن ايضا الطبطيط من غير زيت

نجهز حله بها شوربه سمينه يعنى شوربه بط مثلا او شوربه مواسير مثلا وعندما تغلى الشوربه نسقط بهاالاقراص ونتركها على النار حتى تنضج بس ياريت الشوربه تكون اعلى من الاقراص حتى لا تلتصق بالارضيه

بعد النضج الى معرفش بعد اد ايه (لانى طول مانا رايحه جايه بقعد اختبر الكبيبه بس بيتهيالى كده نصف ساعه)

نقوم بنشل الاقراص(انا بحب اكلها وهى كده سخنه اول مبتطلع من غير تحمير)

ثم نحضر طبق به بيضه ونضربها بالمعلقه ويمكن التزويد حسب كميه الاقراص المراد تحميرها ونضع بها الاقراص

وتكون طاسه بها زيت دره اوسمن بلدى على النار ونضع بها الاقراص المغطاه بالبيض

هى دى الكبيبه بتعاتنا فى المواسم والاعياد وطعمها والله مش بنشبع منها للاسف

ياريت تجربوها انشا الله فى نص الكميه حتى وتقولولى رايكم

[doha]

موضوع رائع كنت بدور على مثلة من زمان دائما المواضيع الي بتتكلم عن الاكل بتحكي عن حاجات فلته واكلات غريبة وقليل مانلاقي حد بيتكلم عن الاكل الشعبي بتاعنا الي بناكله كل يوم شكرا جزيلا ليك على فتح الموضوع ده .. وننتقل الآن لجدول الاعمال ..

سين سين .. ووووو .. طريقة البط ... تدوخ

واضح ان البط فعلا ميتعملش غير بالطريقة دي وللي بيسال عن البرتقال مع البط وان كانوا ياكلوا مع بعض ولا لاه اقولكم اطمئنوا دائما المطاعم الكبرى ( الي بنشوفها في الافلام الاجنبي طبعا محدش يفتكر زورا اني بخش اماكن زي دي والعياذ بالله ) دائما بيقدموا وجبة البط مع البرتقال ودائما بشوفها في برامج الطبخ الاجنبية وكتب الطبخ بتاعت بني الفرنجة على السواء ..

بس سؤال على الماشي .. البرتقال يتقطع ازاي هو والتفاح يعني ارباع ولا مكعبات ولا متفرقش؟ وبمناسبة البط بالبرتقال انا شفت مرة في كتاب مقطعين البرتقال شرائح مدورة بعدين كل شريحه مقطعه اربع مرات وكل ده مرصوص على اللحم من بره ومثبت فيه كل شريحه بحبه قرنفل . بصراحه شكلها كان روعه ..

اما بقى ناكل ايه على البط فانا معرفش كشك المظ ولا كشك عم عبده لكن هقولكم على حاجه احلى بنعملها مع البط وهي الكسكسي على الطريقة المصرية ..

احيانا ممكن نشتريه علب جاهزه ونسويه بطريقة الرز بالظبط واحيانا تانيه بنعمله من الالف ودي الطريقة الاظبط وهقولكم عليها حالا بتكون ازاي ..

كل الي محتاجينه دقيق , خميرة فورية , شوربة بط , سمن بلدي او زبده , قرفة , ملح وفلفل , حلة تسوية الكسكسي وهي عباره عن حلة بمصفاة بيركبوا على بعض ويكون الغطاء عليهم محكم بحيث ميتسربش البخار اثناء التسويه . .

الطريقة بكل بساطة بنجيب كوباية ماء دافيء ونذوب فيها الخميرة الفورية .. محدش يسألني عن المقادير كام لكام لان مكتوب على الباكيت بتاع الخميرة يذوب في قد ايه .. على كل حال مش هتفرق المقادير في المرحلة دي مهما حطيتم من مقدار بيظبط انا بعملها كده بالبركه .

الخطوة التانية نجيب الدقيق الابيض ونحطه في ماكينة تحضير الطعام .. في ناس بتسميها الكتشن ماشين وناس بتسميها الفود بروسيسور وناس بتسميها المفرمة والي معندوش البتاعه دي يستخدم الكبة اي جهاز كهربائي عندك ويكون له سكينة وبيلف بسرعه غير الخلاط يمشي حاله ..

نحط الدقيق في وعاء الخلط وعليه شويه ملح صغيرين بعدين نحط ملعقتين تلاته من خليط الخميرة والماء ونشغل الماكينة .. كل شويه نفتحها ونزود ماء بخميرة بحرص شديد يعني منكبش مرة وحده عشان الكمية المطلوبة من الماء بسيطه مش كتير .. نستمر كده لغايه مالدقيق كله يختفي ويتكون بداله فتافيت اصغر من حبات الرز واكبر اكيد من فتافيت البقسماط .. حاجه زي فتات الخبز لو فتتناه بالايد كده .. كده المرحلة الاولى خلصت ..

نجيب الحلة بتاعت الكسكسي ونملاها ماء من الحنفية ونحطها على النار .. اول ماالماء يغلي نحضر قماشة نظيفة من الشاش ( في مصر بيبيعوها في السوبرماركت وهنا ممكن تستخدموا نوع من الغتر ابيض وقماشته شبه شفافه واطرافه مزينه بكور من الخيط زي الحمص كده مش عارفه بتسموه ايه اي قماشة زي الشاش يمشي حالها ) طبعا بنخصص القماشة دي للكسكسي ونغسلها دائما بعد الاستخدام ونعينها للمرات الجاية .. المهم نفرش القماشة دي في قاع المصفاة بتاعت حلة الكسكسي ونحط فيها خليط الكسكسي الي عملناه ونغطيه ببقية اطراف القماشه ونركب المصفاة فوق الحلة بتاعتها ونغطي بالغطاء بتاعهم ونتركه كده يستوي ..

بعد شويه ( نص ساعه مثلا ) نيجي نقلب الكسكسي حسينا انه استوى نروح بكل بساطة جايبين السمنه البلدي او الزبده نقدحها ونصبها عليه .. طبعا بنحط حاجه بسيطه يعني الناس الأكيلة تحط زي ماهي عاوزه بس عشان الصحة والرجيم كفايه ملعقتين ولا حاجه . . نقلب كويس بعدين نجيب كمية وافرة من القرفة المطحونة حاجه بتاع ملعقتين تلاته كبار ونرش على الكسكسي . . نجيب كمان كمية من التوابل زي الفلفل واي توابل تانيه بنحب نحطها على الاكل ونرش عليه ( بيطلع شبيه بالرز بالخلطة بس مع طعم خرافي طبعا ملوش علاقه بالرز ) نقلب كل ده بعدين نسقيه بكبشتين تلاته من شوربة البط او اي شوربة دسمه لو معندناش بط في ذلك اليوم . وعلى فكره لو شوربة ديك رومي انسوووووو شيء خيال وخرافي لكن مشيها بط دلوقت لغايه ربنا ما يفرجها ..

بعد ماحطينا كل الكلام ده هنلاحظ ان الكسكسي بيشرب الشوربة نزود شويه لغايه مانحس انه ( ندي ) يعني مش ناشف وفي نفس الوقت مش معجن .. نقلب كويس بشوكه ونغطيه تاني ونسيبه كده على النار بتاع ثلث ساعه كمان ولا حاجه .. وبعدين نغرف وبالهنا والشفا ..

نصيحه الي بيعمل كسكسي يعمل طشت مش حلة لان مش هتشبعوا منه ابدا وبرضه نصيحه الي بيهتم بالرجيم زي حالاتي ميعملش العملة السوده دي غير مرة ولا مرتين في السنة بالكتير ..

[nana]

شكرا يااخت دوحه على طريقه الكسكسى وان شا اله لازم اجربها لانى نفس من زمان اعرفها لانى ايام الكليه كنا قاعدين مدينه كان معانا بنت من البحيره واكلته معاها وعجبنى جدا جدا بس هوه فعلا كان دسم اوى