انا مسافر الرياض يوم السبت وعايز رجاله جدعاااااان..

[كفايه بقى]

السلام عليكم ورحمة الله

بإختصار انا مسافر السعوديه يوم السبت الجاى 14/3/2009 وأنا رايح بفيزا حره بمهنة فنى حسابات عام

اما عن المؤهل فهو بكالوريوس تجاره شعبه المحاسبه العامه دفعة 2008 بتقدير جيد

معايا اى سى دى ال بس معايا افاده عشان الشهاده الاصليه بتتأخر شويه

ومعايا دورة محاسبه تشمل:-

المحاسبه الدفتريه

محاسبه باللغه الانجليزيه

تحليل النظام المحاسبى

المحاسبه باستخدام برنامج الاكسيل

البرنامج المحاسبى الشهير Peach Tree

ومستواى فى اللغه الانجليزيه جيد جدا (بس محتاج لشوية مراجعه)

وأجيد التعامل مع الحاسب الالى اجاده تامه

ومعاى رخصة قياده واجيد القياده

وأنا ان شاء الله هنزل الرياض واقعد عند واحد قريبى لفتره قصيره لحد مالاقى شغل مناسب وكنت عايز اعرف اعمل ايه من اول مانزل هناك عشان الاقى شغل يعنى اقدم على شغل ازاى يعنى هل التقديم زى مصر وللا بيختلف ؟ وايه الشركات اللى ممكن اقدم فيها اول مانزل وتكون شركه محترمه؟ واخد منها خبره كويسه.

وكنت عايز اعرف ايه المرتب اللى ممكن اطلبه مع العلم انى عملت لمدة سته اشهر فى مصر وليس معى شهادة خبره

يعنى من الأخر عايز واحد جدع كده وابن حلااااااااااااااااااااااااااال ورجووووووووله يرسينى على الحوار من طأطأ لسلامو عليكو يعنى من اول ماوصل لحد مالاقى شغل واعمل اجراءات الاقامه واعمل الرخصه واللازى منه وبرضه ممكن الاقى سكن رخيص فين فى الرياض

وبرضه ايه المحاذير اللى ممكن اخد بالى منها يعنى اسيب الجواز مع صاحب الشغل وللا لا والحاجات دى

اســــــــــــــــــــــــــف للإطاله ...وأرجوا منكم ردا سريعا ووافيا ...وجزاكم الله خيرا

[زعلان]

تمنياتي لك بالتوفيق و النجاح عاجبني ان حاسس في كلامك نبرة اصرار وعزيمة ربنا يوفقك معلش انا مش من اهل الرياض و لست ادرى الناس بشعابها يدوب ممكن اكلمك على النفقات لكن البحث عن عمل اظن في مواضيع فتحت قبل كده عن البحث عن وظائف في السعودية دور عليها حتفيدك

لكم الله يا شباب مصر

[المخنوق دائما]

عزيـــــــــــزى (كفايه بقى) سوف اتكلم معك بكثير من الصراحه...

اولا لقد تسرعت كثيراااااااا فى الحصول على فيزا حره للسعوديه بالاضافه الى انك مازلت حديث التخرج وليس معك خبرات او شهادات تساعدك على ايجاد وظيفه مناسبه.

ثانيا وظيفة محاسب لم تعد مطلوبه هنا بالسعوديه كما كان سابقا فياليتك لم تتسرع فى الحصول على الفيزا الحره حتى تتقن مجالا اخر مثل البرمجه وتطوير البرمجيات والذى هو مطلوب وبكثره هنا فى السعوديه وبمرتبات مجزيه بعكس المحاسب حديث التخرج الذى قد لايتعدى راتبه 1500ريال والتى لاتكفى اصلا للمعيشه هنا

ثالثا كان يجب عليك ان لاتأتى السعوديه الا بعد ان يجد لك ا حد اقاربك او اصدقائك وظيفة مناسبه حيث انك سوف تتعب كثيرا فى البحث عن وظيفه مناسبه.

رابعا الفيزا الحره هذه لايشتريها الا الذين عملوا بالسعوديه لفترات طويله ويريدون ان يتركوا وظائفهم لوظائف اخرى افضل مع ميزاتها الاخرى مثل الاستقدام وغير ذلك من ميزات الفيزا الحره التى قد لا تستفيد انت بها الان.

ولا تظن انى اريد ان ايئسك بهذا الكلام فلا احد يعلم اين الخير ولكننى اردت فقط ان اضع امامك الصوره كامله وليس الجزء الوردى منها كما يفعل البعض

حيث اظن انك ظننت انك بهذه الفيزا الحره ستعمل عملا مناسبا براتب جيد وسياره وغير ذلك من الميزات بالاضافه الى كونك حرا اى تستطيع ان تنتقل من عمل لاخر (ولكن هذا ليس كله صحيح)

وعموما اتمنى لك التوفيق والنجاح وارجو ان لا يكون كلامى قد ضايقك .. والله المستعان

وبالتوفيق

[Amr Radwan]

عزيزي كفاية بقا ..

شرفت و نورت السعودية .. ربنا ييسر لك الحال ان شاء الله و يكرمك و يوفقك و خليك متفائل و ايجابي و ما تكونش "مخنوق" قبل ما تيجي :wub:

الدنيا وردي و حلوة و ربنا ييسر لك الحال و الارزاق بيد الله ..

[بندق أفندى]

أنا ممكن آخده عندى .. شرط اختياز المقابلة الشخصية وما يكونش فيه من آفات اخواننا المحاسبين كتير

.. لغتك الانجليزية كيف يا بنى؟

تم تعديل 10 مارس 2009 بواسطة بندق أفندى

[بندق أفندى]

بس مش عاجبنى حكاية رجالة جدعان دى .. على وزن من ليس معى فهو ضدى ..

[كفايه بقى]

مش هقدر اقولك غير منك لله وحسبى الله ونعم الوكيل يامخنوق

يعنى هو انا واجع قلبى وتاعب نفسى وهتغرب وسايب بلدى واهلى عشان الاقى نفس الهم والغم هناك ؟؟؟؟؟؟؟؟؟؟؟؟؟؟؟؟

انت ماتعرفش ردك ده مخلينى حاسس بأيه دلوقتى ؟

بجد والله مخلينى حاسس انى زى اللى رقص على السلم وانا اللى كنت عشمان بشغل كويس وعيشه محترمه!

وانا هرد عليك فى كل اللى انت قله

بالنسبه لانى كان لازم اخلى حد يدورلى على شغل قبل ماطلع فانا اكيد عملت ده وكنت مستنى من زمان لحد مالقيت ان مدة الفيزا قربت تخلص قلت مابدهاش بقى اطلع انا وادور ورزقى على الله واهوه برضه عشان ما أتقلش على قريبى اللى تعب وجابلى الفيزا وكده يعنى.

اما بالنسبه لانى كنت اخد كورسات برمجه والحاجات دى ؟ يعنى هو انا ناقص تشتيت ؟ ولا كنت بذاكر عشان اجيب جيد ليييييه؟ وكنت باخد كورسات فى المحاسبه ليه؟؟؟؟؟؟؟؟ وبعدين يااخى انا عايز اشتغل بمؤهلى.

وبعدين انا ماجبتش الفيزا الحره دى الا بعد ماعرفت ان العقود بتبقى وحشه ومعاملة الكفيل مش ولا بد وان الفيزا الحره بتخليك محترم ومرتبك احسن وليك فرصه فى الترقيات وكده.

وفى النهايه مش هلاقى رد عليك غير انك اسمك (المخنوق دائما) وانا اسمى (كفايه بقى) ويا لمفارقات القدر وكلانا اعضاء جدد

بس انا نفسى ان شاء الله ابقى اقابلك هناك

وسلااااااااااااااااااااام

[كفايه بقى]

طبعا أشكر كل من شاركنى برأيه ولكن اريد ان اوضح نقطه

انا لم أضع هذا الموضوع بغرض الحصول على وظيفه كما يظن (بندق افندى) ولكنى كنت اريد ان استفيد من خبراتكم ففى كل ذلك توفيرا للوقت والجهد حيث انى اريد ان اعرف طريقة التقديم للوظائف وهل هى متاحه ام نادره كما قال الاخ(المخنوق دائما) الى غير ذلك من المرتبات والميزات الاخرى.

انا بس وضعت مؤهلاتى ليس طلبا لوظيفه بأسلوب محترم ولكن حتى تكون الصوره واضحه تماما

ملحوظه: انا لى هناك الكثير من المعارف والاقارب ولكن الاعتماد على النفس من شيم الناجحين وهوه ده اللى خلانى اعمل الموضوع ده عشان انا من الا خر مابحبش ابقى بطيخه ومش فاهم حاجه

واخيرا شكر خاص لبندق افندى على الاهتمام وكنت اريد ان اعرف ماذا تقصد ب(كثير من صفات المحاسبين)

اما عن كلمة رجاااااااااااله جدعان فانا ملاحظ ان معظم اعضاء هذا المنتدى جدعااااااان ان لم يكونوا كلهم

والسلام ختام

تم تعديل 10 مارس 2009 بواسطة كفايه بقى

[بندق أفندى]

طبعا أشكر كل من شاركنى برأيه ولكن اريد ان اوضح نقطه

انا لم أضع هذا الموضوع بغرض الحصول على وظيفه كما يظن (بندق افندى) ولكنى كنت اريد ان استفيد من خبراتكم ففى كل ذلك توفيرا للوقت والجهد حيث انى اريد ان اعرف طريقة التقديم للوظائف وهل هى متاحه ام نادره كما قال الاخ(المخنوق دائما) الى غير ذلك من المرتبات والميزات الاخرى.

انا بس وضعت مؤهلاتى ليس طلبا لوظيفه بأسلوب محترم ولكن حتى تكون الصوره واضحه تماما

ملحوظه: انا لى هناك الكثير من المعارف والاقارب ولكن الاعتماد على النفس من شيم الناجحين وهوه ده اللى خلانى اعمل الموضوع ده عشان انا من الا خر مابحبش ابقى بطيخه ومش فاهم حاجه

واخيرا شكر خاص لبندق افندى على الاهتمام وكنت اريد ان اعرف ماذا تقصد ب(كثير من صفات المحاسبين)

اما عن كلمة رجاااااااااااله جدعان فانا ملاحظ ان معظم اعضاء هذا المنتدى جدعااااااان ان لم يكونوا كلهم

والسلام ختام

يا كفاية مش عيب انك تطلب وظيفة لأنها مش شحاتة .. كمان لما قلت آخدك عندى بأتكلم جد مش تمييس .. بس خليك راسى .. ولا يؤثرن كلام حد فيك .. وما تنساش انك عمرك يا دوب مفترض يكون 22 سنة ..

المهم توصل بس هأرسلك تكلمنى ونشوف ايه المتاح ان شاء الله .. وتحياتى

انت منين يا باشكفاية؟

تم تعديل 10 مارس 2009 بواسطة بندق أفندى

[بندق أفندى]

نسيت اقولك انه شغل المحاسبين كتير .. وفيه نقص كتير .. وأنا شخصيا افضل آخد خريج جديد أبنى أفكاره حول العمل أكتر من حد عنده خبرة سابقة .. أما حكاية بقى آفات المحاسبين فده شئ شرحه يطول ..

[المخنوق دائما]

يا أساتذه يا أفاضل متفكروش انا انا بسود الدنيا فى وش كفايه انا بس عايز اعرفه ان الواقع غير اللى فى دماغه يعنى مثلا بالنسبه للمرتب

لما واحد حديث التخرج(وما أكثرهم) بيبقى طالع محاسب بعقد بيبقى مرتبه لايقل عن 2000 ريال بخلاف السكن والمواصلات وخلافه وخاصة لما بيكون جايب تقدير كمان

اما الفيزا الحره فقد لاتحصل بها على مثل هذا المرتب وبدل السكن والاشياء الاخرى يعنى انا قصدى ان انت كده مش هتستفيد بالفيزا الحره على الرغم انه من المفروض ان يكون العكس

يعنى يكون مرتب صاحب الفيزا الحره اكبر من العقد لأنه لم يحمل صاحب العمل اى جهد او نفقات للاستقدام يعنى (جايله بيضه مقشره على طبق من فضه)

ولكن دايما الحاجه اللى بتيجى سهله مابيبقاش لها قيمه

وان شاء الله اذا كان من نصيبك عمل فى الرياض ممكن نبقى نتقابل بكل سرور

[كفايه بقى]

مشكور يابندق افندى بس لو فيها رخامه كنت عايزك توضح قصدك ايه بأفات المحاسبين عشان الواحد يبقى فى الصوره

تانى حاجه كنت عايز اعرف المرتب اللى المفروض الواحد يطلبه وعشان كده انا كنت كاتب مؤهلاتى عشان حد يقوللى اطلب كام!

ومتشكرين على انك اخذت الموضوع بجديه وانا من مدينة طنطـــــــــــــــــــــــــــــــــا

[بندق أفندى]

مشكور يابندق افندى بس لو فيها رخامه كنت عايزك توضح قصدك ايه بأفات المحاسبين عشان الواحد يبقى فى الصوره

تانى حاجه كنت عايز اعرف المرتب اللى المفروض الواحد يطلبه وعشان كده انا كنت كاتب مؤهلاتى عشان حد يقوللى اطلب كام!

ومتشكرين على انك اخذت الموضوع بجديه وانا من مدينة طنطـــــــــــــــــــــــــــــــــا

شوف يا كفاية .. حمايا طنطاوى ومش عارف أحبك ولا أكرهك

آفات المحاسبين ..

دائما أنادى المحاسب بباش مهندس .. لأنه فى رأيى معظم المحاسبين هيروحوا النار عشان متبرعين بأكل حقوق الناس ودون استفادة للأسف ودى آفة فى المحاسبين المصريين بالذات دون غيرهم ..

المهم ليس مهم كم تطلب .. المهم ان تفكر كيف تبنى مستقبلك المهنى .. وما هى الوظيفة التى سوف تحقق ذلك وما يتوجب عليك من دراسة يجب أن تفعلها ..

لأنه فى البداية الكل يتعب ويعانى لأجل مستقبل أفضل ..

يعنى زمان قبلت وظيفة ب 1000 ريال شهريا ولم أقبل وظيفة ب 3000 ريال .. لأنه الأولى كانت تصب فى مستقبلى المهنى والثانية مجرد وظيفة بدخل .. وكان ساعتها صديق لى يسخر منى ويقول لو انت بتعلف الكمبيوتر (كنت مبرمج كمبيوتر وقتها) كنت هتاخد أكتر من كده .. لو حارس على الكمبيوتر هتاخد أكتر من كده ..

يا رب تكون فاهمنى ..

لابد أن تسعى مباشرة للحصول على شهادة مهنية .. فى المحاسبة .. أو كورسات فى المهنة التى سوف تعمل بها .. لأنه يمكن أن تعمل فى مجال المبيعات اذا كانت تناسبك أكثر وهكذا ..

[كفايه بقى]

يابندق باشا كلامك زى الفل وعلى راسى بس اكيد فى حد معين يجب الا يقل الراتب عنه واكيد طبعا المكان اللى فيه خبره احسن من اللى فيه فلوس بس

بس برضه هوه الواحد لازم يشحت ويلحس التراب عشان الخبره؟؟؟؟وبعدين يابشمهنزززز اكيد ال1000 ريال اول مانت رحت مكانتش وحشه زى دلوقتى!

انا قصدى ان فيه وظائف بتبقى خبره وفلوس واخر منجهه وللا اييييه؟

ثانيا هو الواحد ممكن ياخد كورسات وهو شغال فى السعوديـــــــــــــــــــــه؟؟؟؟؟

وبعدين بينى وبينك مش المحاسبين بس هما اللى مشوهين صورة المصريين دى بقت ظاهره عامه...

اما بقى تحبنى وللا تكرهنى فأنا بصراحه قلبى معاك

حماك شكله مسويييييييييييك!!!

[المخنوق دائما]

بص يا"كفايه بقى" الحكايه مش صعبه ولا حاجه كل الحكايه انها محتاجه شوية صبر وتعب بس انت لازم ماتقبلش براتب اقل من 2000ريال وسكن على الشركه وخلافه عشان تعرف تعمل قرش كويس وبالنسبه للكورسات السعوديين دول عالم عايشين بالأونطه ولا لهم فى الشهادات ولا حاجه اهم حاجه انك تبين للى انت هتشتغل عنده انك فاهم ومش مدلوووووووء على الشغل بتاعه لان للاسف هما بيحددوا الراتب على التناكه بتاعتك وليس على خبرتك او علمك وايضا على المظهر.

وبعدين فيه مثل الهنود هنا كلهم بيقولوه

والمثل بيقول(اشتغل قليل تغلط قليل (يحبوك)،واشتغل كتير تغلط كتير (يرفدوك)، وماتشتغلش خالص يدوك حوافز و(يرقوك)

وللاسف المثل ده صحيح فى كثير من الاحيان

[المخنوق دائما]

انت فييييييييييييييييييييييييييين؟؟؟؟؟؟؟؟؟؟؟؟؟؟؟؟

[tarek nokia]

السلام عليكم

بالنسبة لوضعك صعب شوية مافيش خبرة وتخصصك مش مطلوب كتير لاكن انا ممكن اقولك تراجعك شركة زين وتقدم عندهم تقريبا راتبهم 3000 ريال انا سمعت انهم طالبين ناس مكانهم في اكسترا السويدي اسم الشركة زونيك انت اسئل عن اكسترا السويدي مشهور قوي وشركة زونيك في نفس المكان

[كفايه بقى]

كلامك جميل بس هى شركة زونيك دى غير اكسترا السويدى وللا ايه؟

ثانيا هى مكانها فى الرياض وللا فين؟

وشكراا على الاهتمام

وانا ان شاء الله هحاول اقدم فيهم اول ماوصل

تم تعديل 12 مارس 2009 بواسطة كفايه بقى

[doha]

عن نفسي بجيب جريده الوسيلة وهي جريده تشبه الوسيط عندنا كده فيها اعلانات الوظائف وماشابه .. ماشاء الله تبارك الله عمري ماشفت عدد الا وفيه ثلاث او اربع وظائف على الاقل لمحاسب .. وظيفة المحاسب هنا مطلوبة بشكل لا تتصوره ولكن الشرط انه يكون داخل البلد يعني صعب اوي انك تلاقي عقد محاسب يجيبك من مصر لكن لو انت هنا دخلت فعلا بفيزا خلاص مفيش اسهل من كده انك تلاقي شغل لكن كتير بيشترط عليك نقل كفالة..

الي اقدر انصحك بيه انك تستخير دائما قبل ماتقبل اي شغل لان لو وافقت على شغله معينه هتضيع على نفسك شغله تانيه ممكن تلاقيها لو صبرت شويه وبرضه لو ضيعت منك فرصة ممكن مترجعش فاحسن حاجه انك تستخير ..

لو قدرت تجيب معاك شهاده ( مضروبه ) بخبرة في اي مجال في الدنيا من يوم ماتخرجت للآن او حتى انك كنت بتشتغل وانت طالب هتفرق معاك كتير جدا .. شوف اي حد قريبك عنده اي عمل خاص ويكتب لك شهاده خبرة بس عشان مشيلش ذنبك يفضل تسأل فيها حد بيفهم في الدين لاني مش عارفه ان كانت من باب الشهاده الزور ولا لاه ..

زي ماقالوا لك قبلي ان هنا مش بيهتموا بالشهادات أوي المهم تكون عارف يعني مش مهم شهاده كمبيوتر بقدر اهمية انك لبلب فيه وعلى فكره الانجليزي بتاعك الي بتقول عليه جيد جدا بالنسبة لهم هنا اكس اكس لنت .. هنا الانجليزي المعترف بيه اقل كتير من الي متعودين عليه في مصر يعني لو عارف مباديء الانجليزي وبتعرف تمشي حالك تقرأ سطرين تلاته فيه يبقى انت كده ميه ميه متقولش في المقابلة ان الانجليزي بتاعك تعبان او محتاج مراجعه قول ممتاز وباذن الله هيكون كده ..

نصيحتي ليك انك اول ماتيجي تدور في الاعلانات الي في الجرايد زي ماقلت لك الوسيلة ودي جريده مجانية بتبقى عند بتوع السوبر ماركت كل يوم سبت على مااظن وكمان بتتوزع على بعض البيوت .. كمان في جريده الرياض ودي لها عدد اسبوعي بتنزل فيه الوظائف زي اهرام الجمعه كده بس للاسف مش عارفه هو السبت ولا يوم ثاني .. دور في الجرائد واعمل مقابله ولو مزنوق في الفلوس اقبل اي وظيفة تطلع قدامك بدال القعده واهو تستفيد خبرة بس تكون عينك على وظيفة افضل يعني اقبل ودور على بديل في نفس الوقت واياك تنقل كفاله غير لما تتاكد تماما ان هي دي الوظيفة الي هتكمل فيها لان اول مرة نقل كفالة بالفين ريال بعد كده باربعه وهلم جرا ..

وبرضه اسأل واستفسر عن متوسط الرواتب وماشابه لان في تفاوت كبير جدا في الفرص هنا وممكن تلاقي وظيفة براتب ومميزات معينة وتلاقي هي نفسها في مكان تاني براتب ثلاث او اربع اضعافه .. هي مسألة ارزاق وفي النهايه ربنا الي بيوفق ..

واخيرا بما ان سنك صغيره ولسه مش مربوط باسرة ومصاريف باذن الله فرصتك اكثر من ممتازه في العمل هنا والاستفاده اذا خلصت النية وكنت فعلا ( بتاع شغل ) بس انت اهم حاجه امسك على ايدك كويس وحوش كل قرش عشان تختصر الفترة الي مفروض تبقاها هنا وتقدر ترجع مصر في وقت بدري وتبني حياتك هناك افضل ..

وربنا معاك باذن الله ونسمع عنك اخبار خير ..

[أم سلمى]

بص ياأخويا زى ما ضحى قالت وكلامها 100%صحيح وكمان أزيدك من الشعر بيت بالنسبة للمرتب أقل مرتب ممكن يعيشك هنا لوحدك من غير ماتبعت حاجة لأهلك فى مصر هو 1500ريال بالنسبة للسكن أرخص إيجارات تلاقيها فى حى البطحاء ومنفوحة ودول عاملين زى العتبة فى القاهرة بالنسبة للرخصة لو إنت أساسا كنت عامل رخصة فى مصر وبتسوق بريمو يبقى تروح متحن على طول وتكاليفها 400 ريال أما لو ماكنتش عملها أساسا أو بتسوق نص نص يبقى تدخل مدرسة السواقة اللى جوة المرور ودى ليها مصاريف غير الرخصة 430ريال وكان نفسى أفيدك فى موضوع الإقامة بس زوجى جه بعقد من مصر والشركة هى اللى عملت له الإقامة وهوعمللى الإقامة ربنا ييسر لك الحال وماتزعلش من مخنوق دائما لأن كلامه صحيح بس العمل هنا فى السعوديةمتنوع والناس هنا مختلفة زى شعر الرأس وكل واحد ورزق :)ه ونصيبه فأحسن حاجة خليك قريب من ربنا علشان ربنا يكرمك فى كل حاجة ويبعد عنك الشر وربنا يوفقك فى حياتك