حديث جمال مبارك علي CNN

[abouali]

شاهد الحوار الذي أجراه جمال مبارك مع الصحفي الأمريكي "فريد زكريا" عن مجلة نيوز ويك.

يلاحظ أن الصحفي قدمه علي أنه أي جمال مبارك هو المرشح ليكون رئيس مصر القادم - ومع هذا ورغم أن الحديث استغرق حوالي 27 دقيقة _ لم يكن هناك أي سؤال عن السياسة الداخلية. ويبدو أن موضوع الحوار كان مرتبا من قبل أن يقتصر علي السياسة الخارجية .

http://www.cnn.com/video/#/video/podcasts/...ref=videosearch

[Lancelot]

مقال مجدي الجلاد عن الموضوع

http://www.almasry-alyoum.com/article2.aspx?ArticleID=202225

نص الحوار

http://transcripts.cnn.com/TRANSCRIPTS/0903/08/fzgps.01.html

[Lancelot]

إتفرجت علي الحوار بين فريد زكريا (المذيع الأمريكي من أصل باكستاني) وجمال مبارك .. وقلت أكتب ملاحظات سريعة علي الحوار وأنا بأتقرج وعلي النقد من بعض الناس زي مجدي الجلاد مثلا ..

لما قال إن ناس كتير بتتوقع إن جمال مبارك يكون رئيس مصر القادم ما كنش بينصبه رئيس لمصر لكن بيقدم للمشاهد الأمريكي (بدون شرح للأسباب) اللي الناس في مصر بتقوله .. إلا إنه قبل ما يقدمه بالشكل ده قدمه علي إنه إبن رئيس الجمهورية .. وبس ساعة لما بدأت المقابلة قال إنه "حاليا بيحتل منصب أمين السياسات" .. حاجة مؤقتة يعني ..

السؤال الأول فيه (من جانب زكريا) نبرة من القلق من إن الإسلام إنتشر في مصر بشكل واضح في الحياة اليومية .. "حتي تشوف إن فيه سيدات كتير أصبحوا بيلبسوا الحجاب" .. إلا إن جمال مبارك – مشكورا – وضح له إن السبب ورا كده إن ده مجرد رد فعل علي سياسات "الغرب" في الـ 8 سنين اللي فاتوا (قصده بوش يعني) ..

ومن باقي الإجابة "مصر كانت منارة ثقافية في العالم والمنطقة من الآلاف السنين ... و'أعتقد' إنها هتستمر بالشكل ده" .. تعتقد .. يعني إيه تعتقد .. أولا .. محدش بيمجد فيه نفسه ولا في بلده بالشكل ده .. عايز أوباما يطلع يقول للعالم "إحنا منارة الديموقراطية في العالم وأقوي جيش في التاريخ وأكبر إقتصاد علي كوكب الأرض" .. رغم إن ناس كتير من تتفق مع ده .. ماينفعش تقول كده بنفسك .. معلهش الرحلات ديه الهدف منها التدريب والعلم مش ببلاش برضه ..

ثانيا ... "تعتقد" ... طيب إسمح لي أعيد صياغة الجملة بالشكل اللي كنت عايز تقوله ... ""مصر كانت منارة ثقافية في العالم والمنطقة من الآلاف السنين ... و هتستمر بالشكل ده لو أوباما سمح لي إن أكون الريس بعد بابا" ..

"إننخاب أمريكا لأوباما حدث تاريخي" .. "ومقابلته مع قناة العربية ومخاطبته للعالم الإسلامي خطوة ممتازة" ... طبعا العيل اللي عنده 3 سنين عارف كده كويس ..

السؤال الثالث عن هيلاري كلينتون وإن ناس في العالم العربي إتهمتها بإنها متحيزة لإسرائيل .. "هل تتفق مع هذا النقد؟" .. وبدل ما تحتفظ بكارت التشكيك في حياد هيلاري اللي كانت سيناتور عن نيويورك .. يعني في جيب اللوبي الإسرائيلي في أمريكا .. دافع في إجابة طويلة عنها وأشاد بجهود الرئيس أوباما اللي وصفها بإنها "غير مسبوقة unprecedented" ..

أظرف حاجة في الإجابة (هي مش ظريفة أوي لأنها ممكن تخليك تعيط) هي ... "رسالتي للإسرائيليين" ... طبعا أنا متأكد إن الإسرائيليين مهتمين جدا برسالة سيادتك من خلال دورك المهم كأمين للجنة السياسات في الحزب الوطني في دولة مشهورة بإن الأحزاب فيها ليها دور مركزي في إدارة أحوال الدولة .. مش هو ده دورك برضه ؟

اللي بعده .. "هل إنت شايف إن حكم جورج بوش كان فاشل من ناحية إستماعه لمطالب العرب" ... (بوش ده هو الرئيس الأمريكي اللي في عهده أمريكا أحتلت العراق – للناس اللي مش فاكرين هو مين-) .. "الأولويات لم تكن في محلها" .. "القضية الأساسي تم تجاهلها" .. ذكر العراق علي إنها كانت "إلهاء" .. طبعا أنا متأكد إن مئات الألاف من القتلي العراقيين هيتفقوا مع الرأي ده ..

الكلام المكتوب علي الشاشة .. اللي بيكتبوا فيه إسم الشخص ولقبه الوظيفي .. بيقول "جمال مبارك – إبن الرئيس المصري حسني مبارك" .. أحسن لقب وظيفي ..

يا عيني .. زكريا بيسمع له بإهتمام .. منتظر منه كلام مهم ..

زكريا بينقل لحماس .. "هل شايف إن حماس ممكن تعمل تقدم" .. طبعا ده بسبب إطلاع جمال مبارك العميق علي المباحثات بين مصر وحماس والسلطة الفلسطينية ..

شريط الأخبار اللي في أسفل الشاشة .. "جمال مبارك عاش في لندن .. عمل في بنك إستثماري" ... متعلم يعني مايتخفش منه ..

واضح إن مصر وإيران "علي بعد أميال في وجهتي نظرهم تجاه عملية السلام في المنطقة" .. زكريا بيورطه أكتر .. "من ناحية إنهم (إيران) راديكاليين جدا رافضين حل الدولتين" .. ومصر إعتنقت حل الدولتين .. طب سيب لنا أي أوراق نلعب بيها مش لازم تحرق لنا كل أوراقنا كده ..

زكريا مش لاقي حاجة تانية يورطنا فيها ... الراجل إداله كتير أوي أكتر مما توقع .. "لو أمريكا قررت تضرب إيران .. هل مصر هـ 'تدعم' هذه الضربة" ... ليه ما نضرب معاهم أحسن .. "لا لا ما أعتقدش إن أمريكا عايز تتسرع في دخول حرب أخري في المنطقة .. خلينا نتعلم من 'أخطائنا' " .. أنا كنت فاكر إن الحرب في العراق كانت خطأ أمريكا .. واضح إنها من أخطائنا .. أو إن جمال مبارك أمريكاني .. مش فاهم !!!

وبعدين لما إتكلم عن الحرب في العراق .. إتكلم عنها زي ما تكون ... مش عارف أشبها بإيه والله ... تعالوا نصلح اللي إتكسر .. "شوفوا إحنا كسبنا إيه من الحرب في العراق" ... طب ما تشوف إحنا خسرنا إيه .. إحنا خسرنا إيه .. إحنا كبلد ... كأمة .. كوطن ... أنا عارف إنت ما خسرتش حاجة ... بس إحنا خسرنا ... خسرنا إخوانا اللي ماتوا .. واللي عايشيين بيقطعوا في بعض كل يوم .. خسرنا الـ 3 مللي كرامة اللي كانوا فاضليين .. حسبي الله ونعم الوكيل ..

واضح إنه متفهم جدا لمواقف أمريكا .. زي ما يكون مراقب للموقف بدون مصالح في إن الأمور تميل في إتجاه أو أخر ..

أنا ممكن أفهم إن زكريا اللي بيقدم برنامج عن السياسة الدولية ما يسألش أسئلة عن السياسات الداخلية في مصر .. لكن مش ممكن أفهم إنه يسأل عضو في الحزب الوطني (حتي لو كان رئيس لجنة) علي السياسة الخارجية لمصر تجاه أمريكا والقاعدة وفلسطين وإسرائيل وإيران ..

الخلاصة هي .. السياسة هي الأساليب والطرق اللي بيها توصل لهدفك ... الساسة مش وظيفتهم إختراع حلول أو عرضها أو الجدال حول إيه الصح وإيه الغلط .. الساسة وظيفتهم إنهم يحققوا مجموعة من الأهداف اللي بيتصب في مصلحة الناس اللي بيمثلوهم .. وأول حاجة تعملها كسياسي (أو أول حاجة ما تعملهاش بمعني أدق) .. الحاجة اللي واضحة جدا لدرجة إن عيل زيي فاهمها .. هي إنك ما تحرقش أوراقك ... علشان كده بتلاقي الساسة إجابتهم عايمة رغم إن الأسئلة واضحة زي الشمس ... هل؟ .. والله أصل لو يمكن تقريبا إحتمال هنحاول بس لو علشان هنشوف ... وبعد كده ما توصلش لإجابة ..

لسه واضح إن فيه حاجات كتيرة المفروض تتعلمها ... الرحلات التدريبية ديه كويسة أوي وترفع من المستوي لأنها بتعمل إحتكاك مباشر مع ناس متمرسة .. النتايج مش مهمة لأن مافيش حد بيتفرج غيرنا (البرنامج بيتذاع يوم الأحد الساعة واحدة الضهر يعني زي الجمعة الساعة تلاتة تقريبا .. أفضل ميعاد ممكن تتفرج فيه علي الأخبار) .. لكن المهم علي الأقل يكون فيه تمثيل مشرف .. علشان إسم مصر ما يتبلش في الطين أكتر من كده .. keep up the good work ..

[jgeorge]

جمال مبارك التقى قيادات من أقباط المهجر لإقناعهم بعدم التشويش على زيارة والده لواشنطن

وافق على طلباتهم في العديد من الملفات..

كتب أحمد عثمان (المصريون): : بتاريخ 11 - 3 - 2009

علمت "المصريون"، أن جمال مبارك الأمين العام المساعد وأمين "السياسات" بالحزب "الوطني" أجرى مباحثات خلال زيارته الأخيرة إلى الولايات المتحدة مع العديد من قيادات أقباط المهجر، لمحاولة تسوية بعض القضايا الخاصة بالأقباط في مصر، قبل زيارة الرئيس حسني مبارك المرتقبة إلى البيت الأبيض.

يأتي ذلك بهدف تفادي أية تحركات مناهضة قد تقوم بها جماعات أقباط المهجر خلال زيارة الرئيس مبارك المحتملة في أبريل القادم، سواء على مستوى الكونجرس من خلال تحريك مشروع لمعاقبة مصر، الذي يتبناه عديد من الأعضاء الديمقراطيين بالكونجرس، أو الإيعاز لأعضاء بارزين للربط بين المعونة الأمريكية لمصر، وإقرار إصلاحات ديمقراطية في مصر.

وكانت أنباء قد تردد عن اعتزام أقباط المهجر تنظيم تظاهرات بمواكبة زيارة الرئيس مبارك التي تأتي بعد سنوات من توقفه عن زيارته السنوية إلى واشنطن بسبب التوتر الذي شاب علاقته مع الرئيس الأمريكي السابق جورج بوش، وهو ما قد يكون له انعكاسات على مباحثاته المرتقبة مع الرئيس الأمريكي باراك أوباما، من خلال محاولة انتزاع تنازلات من مصر في عديد من الملفات.

وأبلغت قيادات أقباط المهجر السفير المصري في واشنطن سامح شكري العديد من المطالب؛ أهمها إقرار البرلمان المصير لقانون دور العبادة الموحد، وإنهاء القيود المفروضة على بناء وترميم الكنائس في مصر، وتحسين سبل تعاطي أجهزة الأمن المصرية مع قضية البنات القبطيات "المخطوفات" وغيرها من المطالب، مقابل عدم إثارة مشاكل للنظام المصري خلال زيارة مبارك لواشنطن.

وقدم جمال مبارك ضمانات للقيادات القبطية حول عديد من الملفات، لضمان عدم إثارة مشاكل للرئيس خلال زيارة واشنطن، والتي تمثل أهمية خاصة لمصر في بداية مرحلة جديدة من العلاقات مع الولايات المتحدة، والتي يربطها مراقبون بحسم العديد من الملفات على الصعيد الداخلي في مصر.

من جانبه، أكد السفير عبد الله الأشعل مساعد وزير الخارجية المصري السابق أن تحركات أقباط المهجر الحالية واحتمالات تصعيد أنشطتها خلال زيارة مبارك لواشنطن من القضايا المثيرة للجدل بالنسبة للنظام المصري، لذا فهو يسعى بشكل حثيث لتطويق هذه الحركات حتى لو قدمت تنازلات للجانب القبطي.

وألمح الأشعل إلى مراهنة النظام المصري على الزيارة، لإنهاء حالة البرود التي سادت العلاقة بين القاهرة وواشنطن طوال السنوات الست الماضية، وكذلك مناقشة مستقبل الحكم في مصر، في وقت تترد فيه أنباء قوية عن بدء النظام إقرار خطوات فعلية في إطار عملية نقل السلطة.