كيفية شواء اللحم والدجاج

[Simba]

السلام عليكم

حاولت كتير قبل كده اني اشوي دجاج او لحم وكل مرة كانت النتيجة فشل :sad:

سالت قالوا لازم تعمل تبتيلة وكده اصلا كل اللي اعرفهم محدش فيهم بيشوي هو بيقول وخلاص

بسال اهل الخبرة ايه هي خطوات الشوي المظبوط علي الفحم

[osmel33]

السلام عليكم

حاولت كتير قبل كده اني اشوي دجاج او لحم وكل مرة كانت النتيجة فشل :sad:

سالت قالوا لازم تعمل تبتيلة وكده اصلا كل اللي اعرفهم محدش فيهم بيشوي هو بيقول وخلاص

بسال اهل الخبرة ايه هي خطوات الشوي المظبوط علي الفحم

وعليكم السلام ورحمة الله

بص يا سمبا من واقع خبرتي اللوزعية فى موضوع الشوى على الفحم هاقولك تتبيلة

بسيطة جداً للدجاج تجيب الدجاجة بعد ما تتقطع طبعاً وتقوم أولاً داقق عليه شوية كده

علشان اللحم بتاعها يطرى ويوصل الشوى لجوه اللحم وبعدين تجيب بصلتين كبار وتجيب

فصين تلاتة توم وممكن تجيب كمان طماطماية وتضرب كل ده فى المفرمة شوية صغيرين

ما ينعاموش قوى تقوم أيه جايب الدجاج وتحطه فى صينية كبيرة وتحط عليها الخلطة دى

وكمان شوية خل أو ليمون وتحط طبعاً التوابل وتسيبها فى التلاجة تحت الفريزر ويا ريت

الكلام ده قبل الشوى بيوم من بليل يعنى تانى يوم تولع الفحم وأوعى تقولى

ماباعرفش أولعه وتشوى وبالهنا والشفا ودمتم

تم تعديل 11 مارس 2009 بواسطة osmel33

[بندق أفندى]

مهم جدا التتبيل لا يقل عن 12 ساعة ..

طبعا أخونا أوسميل بيعاملك على انك خبير وعشان كده اختصر جدا ..

زى ما هو قال بصل وثوم وملح وفلفل أسود وكمون وخل وليمون وممكن زبادى وزيت زيتون أو زيت عادى

لو الفرخة سليمة هتقطعها نصفين بالطول وتعمل شرحات فى اللأجزاء السميكة منها عشان تتشرب التتبيلة ..

اللحم ابتدى بقطع معقولة الحجم وتذكر انه للشوى لابد تكون اللحمة ملبسة دهن مش لحمة حمراء خالص ..

اذا لقيت النار زيادة غطى شوية من الفحم بتراب النار حواليه .. لقيتها قليلة اديها شوية تهوية

والنتيجة هتبقى كويسة ان شاء الله

ممكن صحيح تجيب حاجة من السوبر ماركت اسمها صلصة باربيكيو تحطها مع الخلطة ..

نسيت أقولك لو بتشوى قطع كبيرة خلى الصوص المتبقى من النقع جنبك واسقى القطع منه اثناء الشوى عشان تطرى وتتشرب وما تتحرق من برة وتكون لسة من جوة نيئة

وهنا وعافية

[se_ Elsyed]

عذراً يا شيف بندق إنت والشيف بابا إسماعيلو

نسيتو أهم حاجة في الشوي

وهو إنك تعمل شاي عالفحم بعد الشوي وتسيب الشاي يغلي .. وإشرب وإدعي لي ولا تقولي لحمه مشويه ولا فراخ مقلية

[بندق أفندى]

تقصد عالركية؟

[se_ Elsyed]

تقصد عالركية؟

عليك نور

بس إحنا يالفلاحين اللي نعرف الإسم الكودي بتاعها " راكيه " ده

وبالتالي عايزين نبسط المصطلحات لإخواننا الخواجات :sad:

بس إيه رأيك .. بيبقوا شوية شاي بيوصولوا مباشرة لمراكز الاحساس في الفص الأيمن للمخ ... والواحد بعد أول كوباية بيبقى حاسس إنه دماغه قد البطيخة الشيلين ...

تعرف بقى إن الشوي ده له قصص داميه معايا ؟

- كنا زمان أيام راحت البال نلم بعضنا نحن المتزوجون ونطلع نشوي في البر او بنأجر إستراحة .. فتخيل بقى ييجي 20 واحد رجاله وستات وعيال عمالين نشوي ييجي 30 فرخة .. وإحنا الرجالة اللي بنتعك فيها والستات عماله تسولف وتسقع في قلل وقاعدين ولا في دماغهم والعيال بتلعب وإحنا اللي شايلين الليلة ..

وأخوك س س نا ما بيستحملش الجوع وبأبقى فعلاً عصبي جداً وأرى وأسمع هلاوس سمعيه وبصرية ... وخلاص بأبقى على وشك الجنون .. وصعب ألاقي قدامي فرختين تلاته خلصوا وإتشووا وما أكلش .. فكنت أقعد أتسحب في الخباثة وأحلق للفراخ من الجناب بتاعتها وكإني بأحلق لها أو بأتخلص من الأعضاء اللي مالهاش لازمه زي الجوانح والأفخاد والصدر .. مانا جعان ...

حتى السلطة كانوا بيكسلوا يعملوها يا مؤمن .. والواحده منهن تتفرد وتتني وتتخن صوتها وتقولك : ماحنا طول عمرنا بنتعب .. إتعبوا مره في حياتكم ...

ولو حكيت لك على مشهد تتبيل الفراخ .. تموت على نفسك من الضحك ..

كان واحد صاحبنا غاوي موضوع التتبيل ده .. فكان ينزل يشتري التلاتين فرخه .. وقد نص شوال بصل على توابل على حركات ويفضل ياعيني يوم كامل يقطع فيهم ويدق عل الفراخ المتقطعة بالشاكوش عشان تبقى رُقيقة ... ويروح منضف البانيو عنده وقافلة وناقع الحركات دي فيه ...

لكن بامانة ربنا .. لا تقل طازج ولا فقيه ولا البيك بتاع موديست اللي مستخسر فيه وجبة من أم 10 ريال بقى له 5 سنين ومش راشضي أتكلم

والظاهر الفراخ لما بتتنقع في البانيو .. فبتبقى وجبه نضيفة خالص ...

[بندق أفندى]

فكرتنى .. كان فيه درس فى كتاب بركتس أند بروجرس الانجليزى .. كان بيحكى عن يوم نزهة .. وقال انهم شوو على نار فى الهوا وعملوا مشروبات ساخنة .. فقلت للمدرس يعنى راكية .. وزعل أوى منى عشان قلت ركية دى .. تقولش حضرتك كان من سامبو مقام؟ وما يعرفش ..

آخر مرة شويت كانت فى العيد اللى فات .. بس عندنا فى مصر شواية تحفة .. بقالها ييجى 400 سنة مش عارف جت منين ولا وصلت لنا ازاى .. وخوك فى البلكونة وعمال يشوى .. كان يوم مشهود ..

مش بأحب الزحمة أوى خصوصا انه الكل بيتواكل .. واللى فالح هو اللى بيشيل الليلة .. لكن ممكن أعزم الكل وأشتغل وأخلص أسهل .. وكتير كنت أعملها ويكون عندى عزومات 30 شخص خصوصا فى رمضان

[شاب مصري]

الأخ العزيز لخبطة اتكلم عن الموضوع ده

http://www.egyptiantalks.org/invb/?showtopic=51451

هقولك حاجة من خبرتي الخاصة : شوي الكباب أصعب حاجة ولازم يطلع محروق وبيشد في الأكل تحس انك بتاكل مطاط

الكفتة مشكلتها انها هتتفتت منك وهتلاقي نفسك بتاكل فرافيت وشراذم لحمة مفرومة محروقة وقلبها ني

الفراخ أمرها أسهل بس بردو يفضل انها يتم انضاجها في الفرن وبعدينن تاخد ريحة الفحم بس للاسف بالطريقة دي مش هتحس بنكهة شوي الفحم الأصلية

الخلاصة هو مشروع فاشل و تكرار المحاولات فيه تؤدي لمزيد من الفشل

اسمع كلام س س و خليك في الشاي

[osmel33]

هقولك حاجة من خبرتي الخاصة : شوي الكباب أصعب حاجة ولازم يطلع محروق وبيشد في الأكل تحس انك بتاكل مطاط

الكفتة مشكلتها انها هتتفتت منك وهتلاقي نفسك بتاكل فرافيت وشراذم لحمة مفرومة محروقة وقلبها ني

الفراخ أمرها أسهل بس بردو يفضل انها يتم انضاجها في الفرن وبعدينن تاخد ريحة الفحم بس للاسف بالطريقة دي مش هتحس بنكهة شوي الفحم الأصلية

الخلاصة هو مشروع فاشل و تكرار المحاولات فيه تؤدي لمزيد من الفشل

اسمع كلام س س و خليك في الشاي

سيبلى أن الطلعة دى يا شيف بندق

شوى الكباب مش صعب خالص مالص أول حاجة هى اختيار اللحم بتكون بتلو هاتضمن أنها تستوى بسرعة ومش هاتشد

ولا تجيب صحابك يشدوا ولا حاجة دى حاجة وعلى فكرة موضوع الخل أو الليمون على اللحم بيساعد أنها تستوى بسرعة

نيجي بقى للكفتة الوصفة اللى أنا قولتها فوق دى "أيوه عليك نور"

نعم "جاية من النعومية" التتبيلة قوى جداً خالص وياريت بقى تفرم معاها شوية لية خروف أكيد عارفينها وتحط التتبيلة دى

فى اللحمة وتقعد تعجن فيها لغاية أما ماتعرفش فين التتبيلة من اللحمة وتسيبها يوم كامل وتشوى يا ريس تانى

وتخلى ايدك مبلولة شوية علشان تمسك فى السيخ ويفضل السيخ الخشب وعلى فكرة الوصفة دى أنا بعملها كتير

حواوشى ولو ليك فى الحراق زى حالاتى ممكن تفرم فيها فلفل اللى هو الصغنن خالص والنار مالص ده

وبالهنا والشفا كان معاكم أسامه ابو العافية من مطبخ تجمع الدوحة

تم تعديل 11 مارس 2009 بواسطة osmel33

[osmel33]

عذراً يا شيف بندق إنت والشيف بابا إسماعيلو

أنت جبت بابا اسماعيلو دى منين ؟

اسمها اوسميل عين عين

تم تعديل 11 مارس 2009 بواسطة osmel33

[HDarwish]

الله ينور عليكوا يا رجاله

الموضوع ده لسه معايا طازه ... يادوب إمبارح كنا بنشوي ... والحمد لله بائت العملية بنجاح منتهي النظير

كل اللي قولتوا عليه فوق ده عملناه من أول التتبيلة بتاعة الزبادي مع الزيت مع الخل والليمون والبصل والثوم لحد الشوي والمهارات الفنية اللي ممكن تتخيلوها وكمان شوية الشاي اللي على الفحم بعد الأكله .. والجو إمبارح ما كانشي له حل حاجة كده تسطل

بأمانه كان يوم رائع ... وكنت سايب مهمةا لشوي دي للشباب اللي معانا ويحاولوا يقنعوا فيا إن المتعة كلها في الشوي مش في الأكل لكن على مين يا سيادنا أحلى حاجة إنك تقيل شوية في الظهرية وتقوم على الأكل وبعد كده تلعب شوية طاولة مع كوباية الشاي اللي على الفحم...

دمتم بخير

[Simba]

خالص تحياتي وشكري العميق لكل من ساهم في الموضوع وافادني دمتم جميعا بكل خير

[doha]

انا مليش اوي في حكايه الشوي دي او مليش خالص فيها بمعنى ادق بس الناس الي بتفهم لما سألتهم افادوني بكام معلومه قلت افيدكم بيها يمكن تكونوا اشطر مني وتطبقوا عملي ..

بالنسبة للكفته المشويه فقالوا متحطوش عليها بصل نهائي في نس بتفرم معاها بصل والنتيجة انها بتفك من على السيخ .. قالوا الحل الصحيح ان تختاروا قطعه لحمه وعليها قطعه دهن ويفضل من اللية وينفرم الكل مع بعضه بالتوابل ( قالوا متحطوش كمون لان الكمون للفول مش للحم ) بعدين لازم تتركوا الخلطه دي بعد العجن الجيد في الثلاجة فترة مهم جدا عشان متفكش .. واخيرا وقت ( التصبيع ) او تركيب الكفته على السيخ تكون محضر صحن فيه عصير بصل ( بصل مفروم جامد اوي في الخلاط مع شويه ماء صغيرين جدا ) هتبل ايدك في العصير ده وانت بتشكل الكفته على السيخ وبس كده ..

بالنسبة للدجاج شفت واحد محل مشهور اوي عندنا في مصر بيبيع فراخ مشويه بيعمل حركه حلوة .. بيرش الفحم ببخاخ فيه ماء من الي بننظف بيه الزجاج ده .. اول مابيعمل كده الفحم بيطلع دخان وريحه فيزود طعم المشوي في الفراخ ..

اكيد برضه وانت بتهوي على الفحم فدي صنعه .. لو هويت زياده هترفع النار عليه ولو قللت هتوطيها وطبعا لو النار واطية هيطلع الاكل ناشف ولو عاليه هينحرق من برا ومن جوه مش مستوي يبقى الصح انك تحاول تظبط ايدك بحيث تكون النار متوسطه لا عاليه ولا واطية .. وحلو اوي معلومه دفن الفحم الزايد عشان نوطي النار الي كتبوها الاخوان هنا جديده علي بس شكلها كده نصيحة حكيمة ..

الدجاج المشوي دائما في الفرن لازم ينقع قبلها من بليل في زبادي عشان يطري زياده وبرضه بنشقق الاجزاء السميكه فيه وبالتاكيد القاعده هي نفسها بالنسبة للفراخ المشوي على الفحم ..

بس ده الي افتكرته بخصوص المشويات وان شاء الله ذوي الخبرة يفيدونا اكتر