ما هي تكاليف المعيشة بالدمام..

[kokororo]

انا مسافر الدمام أخر شهر 3/2009 وكنت عايز اعرف تكاليف المعيشة هناك ايه من إتصالات وأكل وشرب وانتقالات وكنت عايز اعرف يا ترى الناس هناك بشتروا المياه ياريت لو حد عايش في الدمام يدلني على التكاليف تقريبا وأفضل الأماكن اللي أقدر اشتري منها الحاجة بسعر رخيص زي العتبة عندنا في مصر كدة ممكن يا شباب وجزاكم الله خيرا

[mouna]

انا كنت عايشةبالخبر بس عندي فكرة بسيطة عن الدمام

طبعا الدمام ارخص من الخبر بالسكن وبأشياء بسيطة اسواقها الشعبية حلوة

عندك محل رامز لحاجات البيت من صحون وواي شي بتتخيله بالبيت عنده وسعره 10 ريال طبعا في اشياء اغلى بس نادر والجميع بيعرف عنوانه محل رامز -الحياة بلازا

حتلاقي قريب عليه اكترمن محل للملابس والحاجات والقطنيات رخيصة وماشي حالها

بالنسبة للخضار والفواكه عندك سوق الخضرا ما عندي فكرة عن الاسعار بس رفقاتي بيشتروا منه وبيقسموا على كذا عيلة لانه بيبيع بالكرتون

يعني لوكنت عزابي خد من سوبر ماركت حيكون ارخص

اغلب صديقاتي المصريين بيمدحوا بمحل اسمه الاخضر اسأل عنه

بالنسبة للمياه في محطات تحلية بتقدلر تعبي منها مياه مجانا للطبخ وفي ناس بيشربوا منها بس طعمها سيئ موجودة بالخبر عند مجمع الراشد بس ما عندي فكرة بالدمام بس الاغلب موجودة

والله يوفقك

[doha]

انا معرفش الحياه في الدمام شكلها ايه من ناحية الاسعار لكن اجيبك عن الحياه في الرياض ..

اجمالا مصاريف المعيشة هي نفسها بالظبط في مصر بل في مصر اغلى شويه في بعض حاجات زي اللبس خاصه ملابس الاطفال هتلاقي هنا اغلى في حاجات تانية على راسها السكن اقل سكن هنا لو هتسكن في حاجه تعبانه جدا مش اقل من الف ونص الفين كل شهر ( طبعا الايجار بيندفع كل ست شهور مش كل شهر ) ده بالنسبة لاقل شيء وصعب تلاقي بالسعر ده في حته نظيفة يعني مش حارة او بيت قديم ضاربه السلك .. عاوز تسكن في حاجه نظيفة ومعقوله اكيد اكتر من كده . .

الحاجه التانية هنا الغاليه هي المواصلات يعني لو هتاخذ ليموزين ( تاكسي يعني ) فاقل مشوار الي هو من اول الشارع لآخره خمسة ريال ( فتح العداد ) ومتوسط المشاوير لو قريب عشرة ريال لو بعيد من 15 وانت طالع وبناء عليه افضل شيء تشتري لك عربية ده شيء اساسي لاي حد عايش هنا ..

ثالث شيء غالي هنا هو العلاج وخذها قاعده اي حاجه تعتمد على البشر هنا بتبقى اغلى من مصر كتير جدا نتيجة ارتفاع الاجور يعني اجرة الطبيب اجرة الحلاق اجرة الكوافير .. الخ كله اغلى من مصر عشان فيه ايدي عاملة لكن اي حاجه كبضاعه بتتشرى بالفلوس زي الاكل والشرب واللبس ومستلزمات البيت .. الخ كلها اما نفس سعر مصر او ارخص شويه على اساس ان في مصر بيحسبوا الضرائب والجمارك ومكسب البائع الي مش بيبيع كتير من البضاعه فبيحملها بسعر اعلى بينما هنا السحب كويس اوي لان السوق استهلاكي بالدرجه الاولى فحاجات كتير بتنباع بسعر قريب من الجملة ..

طبعا انا بكلمك عن اسعار تكاليف المعيشة للحد الادنى او مافوق الادنى ملناش دخل بقى بعيشة الرفاهية لان دي لو هتفتح فيها ملهاش سقف تتوقف عنده نظرا لطبيعه الدخول هنا الي زي مافي ناس من اهل البلد نفسهم رواتبهم اقل من المصريين حتى وناس تانية دخلها اليومي بالآلاف او حتى الملايين عادي وبالتالي فالي عاوز يعيش عيشة هاي تمام التمام ممكن ومتوافر وبرضه لو عاوز تعيش على قدك ممكن وفي الحالتين محدش هياخذ باله او يلفت النظر زي مابيحصل في مصر لو حبيت انك تبحبحها على نفسك فتلفت نظر كل من هب ودب ..

بالنسبة لموضوع شراء المياه عادي هي هنا بتتشري بس برضه لما كنا في مصر كنا بنشتريها .. يعني في مصر بنشتري زجاجة المياه الكبيرة الي هي 19 لتر اظن او 17 مش فاكره بـ 11 جنيه والزجاجة فارغه ثمنها 45 على مااتذكر هنا بنشتري نفس الزجاجة بخمسة الى سته ريال من البقاله او تتفق مع شركه المياه توصلها لك البيت وسعر الزجاجة في الحاله دي بتوصل 4 ريال والتوصيل عليهم كمان ..

على كل حال اسرة من اربع افراد يكفيها زجاجتين الى اربعة في الاسبوع على حسب استهلاكهم في الطبخ والشرب وانت احسبها

آخر حاجه مصاريف المدارس ودي طبعا بتكلف هنا بس في مصر برضه لو عاوز تعلم اولادك تعليم نظيف اكيد بيكلف . .سمعت ان في مدارس تحفيظ قرآن ودي بدال ماتاخذ منك بتدفع رواتب للطلبة كل شهر معرفش ايه نظام المدارس دي وهل هي متاحه للكل ولا زي ماسمعت للي شغالين في الحكومه بس او بواسطه الله اعلم .. برضه ممكن تسأل في الحكايه دي لو مهتم بموضوع المدارس وبرضه الاخوه الي لهم ابناء في سن الدراسه يفيدوك اكتر مني لان معنديش فكرة اوي عن الاسعار .

واخيرا لو عاوز توفر في تكاليف المعيشه يبقى احسن حاجه تكتب احتياجاتك كلها في ورقة وتنزل تشتريها مرة او مرتين كل شهر بالكتير ويفضل بالجملة ( لو انت من النوع المحافظ الي مش هيخلص الحاجه كلها في يوم او يبعثر فيها طالما متوافرة بالكوم ) ومتحاولش تشتت نفسك في شراء كل ماتقع عليه عينك لان الحياه هنا استهلاكية جدا زي ماقلت كل ولو انسقت وراء التيار ده مش هتعرف تطلع منه ولا تعرف تحوش لك حاجه ..

وبالمناسبة نصيحه اخيرة لكل الي بيفكر يجي هنا السعوديه ان الحكايه مش زي زمان الناس دلوقت مش بتيجي هنا تحوش وتعمل قرشين حاليا في ناس بتيجي بس عشان تعيش لانها مش عارفه تعيش في بلدها يعني متتوقعوش اوي ان الرواتب الوف مؤلفه وان الحياه وردية الي يجي هنا يبقى عارف ان مفيش قدامه غير ينطحن وتطلع عينه في الشغل ويطلع فلوس عشان في الآخر يايصرفها ويعيش سواء مرفه وممتع نفسه او يعيش على القدر وخلاص ويادوب فلوسه تكفيه على كده . .لو فلوسه زياده يعني وظيفته حلوة شويه او التزاماته العائلية مش قد كده فيبقى ممكن يعيش مرفه او يحوشها عشان لما يرجع بلده يعمل حاجه نادرا ماتقدر تجمع بين الاثنين وهم الرفاهية والتحويش خاصه لو كنت رب اسرة ..

ارجوا اني اكون قد افدتك

تم تعديل 16 مارس 2009 بواسطة doha

[waaaf]

تيجي بالسلامة

لما تيجي بإذن الله هاتعرف كل حاجة لوحدك من خلال زملائك والدمام بلد رائعة

[abueldahab]

السلام عليكم ورحمة الله وبركاته

أولا توصل بالسلامة إن شاء الله انا عايش في الجبيل يعني قريب شوية للدمام 90 كيلو بس عموما الدمام ارخص من الخبر والجبيل ودا يتوقف على المكان او الحي الي هتعيش فيه وهل هيبقي سكن على حساب الشغل ولا سكن عائلي وبخصوص الأسعار إطمن الدمام أرخص بكتير من الجبيل والخبر والمناطق الي حواليها لان الدمام مدينة تجارية وفيها مناطق اسواق كتير وفيها مكان زي العتبة في وسط الدمام عند عماره مشهورة اسمها سيكو هبقي افتكرلك اسم المنطقة ايه واقلهولك وفيه كل ما تتخيله من كل شيئ حتى محلات الكشري المصرية

بالنسبة للإتصالات فيه طريقة حلوة ممكن تنفعك دلوقتي شركة موبايلي هنا عاملة عرض التجوال مجانا فانت اول ما تيجي باذن الله تشتري شريحة موبايلي وتشحنها وتخلي فيها صلاحيه 6 شهور او سنة وتبعتها مصر في جواب عادي او اي حد نازل وتكلمهم في مصر بسعر المكالمة المحلية كانك بتكلم واحد هنا في السعودية بالاضافة ان شركة الاتصالات بتعمل عروض دايما في الصيف هنا والسنترلات يوم الجمعة بس افضل شيئ بالنسبالك شريحة موبايلي

وبالنسبة للأثاث ممكن تشتري أثاث مستعمل وبجوده ونضافة أفضل من الجديد بتاع مصر من سوق الحراج بالدمام الي هو سوق المستعمل فيها

تكاليفك الشهرية بتعتمد على شيئين تنظيم موضوع الإتصالات ودا زي ما قلتلك على أفضل حل ليه وتقليل أكل المطاعم

وربنا يوفقك ويسعدك وان شاء الله يكون فيه تواصل ولو احتجت أي حاجة اتفضل إسأل وان شاء الله هتلاقي الي يفيدك

[elfakhrany]

تنور الدمام يا كوكو أخوك محمد الفخرانى موجود بالدمام والأسعار هنا معقولة بالنسبة للسكن ممكن تقعد لوحدك فى استديو بداية من 750 ريال او تشترك مع اى مصريين فى شقة بحوالى 300 ريال والدفع بيكون غالبا كل 6 شهور بالنسبة للمياة فى محطة تحلية مجانية موجودة بجوار أسكان الدمام وناس كتيرة بتستخدمها للشرب والطبخ عادى أما بالنسبة للأكل فسعر الوجبة للغذاء بالمطعم بتبدأ من 12 ريال بالنسبة للأتصالات أنت ومكالماتك وزى ما الاخوة قالو يستحسن تبعت خط مصر عشان المكالمات الدولية او ممكن تتكلم دولى من السنترالات من بعد الساعة 5 المغرب الدقيقة ب 55 هللة وبالنسبة للمواصلات هى دى المشكلة لان اى مشوار صغير ب 10 ريال ولو طويل شوية ب 15 ريال وفى تاكسيات بتركب 5 مع بعض بس بتمشى فى خط محدد بتاخد 2 ريال وبالنسبة للأماكن اللى تشترى منها الحاجات رخيصة فيه عندك رامز موجود بالحياة بلاز و بالنسبة للملابس موجود سوق الحب زى العتبة المشهور هنا ب سيكو وأحفظ الكلمة دى عشان هتقولها كتير فى الأول تلف وتفاصل معاهم وفى حاجات سعرها فى المتوسط زى سيتى ماكس وبالنسبة لمصاريف الرخصة حوالى 500 ريال لمدة 10 سنوات لو معاك رخصة مصرى ولو مش معاك رخصة مصرى هتكون تكاليفها حوالى 900 ريال لانك بتدخل مدرسة وتحضر وكدة فيستحسن تجيب رخصة مصرى عشان متقولش ياريت ولو فى استفسار ابعتلى على الخاص وياريت تعرفنا بنفسك ...

[kokororo]

ربنا يكرمكوا جميعا ويوفقكوا في حياتكم بإذن الله وشكرا جدا على ردكم علي ولكم جزيل الشكر وارجو التواصل معاكم بإذن الله

[kokororo]

أرجو تثبيت الموضوع نظرا لأهميتة