مهندس زراعي في الرياض .. فرصته في العمل شكلها ايه؟

[doha]

السلام عليكم ورحمة الله وبركاته ..

طبعا قبل كل شيء شكرا جزيلا لصاحب فكرة الموقع ده الي كل ماعمل سيرش على جوجل ياخذني ليه .. فعلا احنا كمغتربين محتاجين اوي تجمع لنا نستفيد فيه من خبراتنا الي يمكن البعض متعلمهاش بالساهل ..عندي كام سؤال بس هبدأ بحاجه بسيطه كده على الماشي واتمنى اخواتنا في الرياض يفيدوني .. ونبدأ بسم الله ..

زوجي مهندس زراعي باذن الله يصل للرياض الفترة القادمه ..و قادم على فيزا حرة يعني مفيش شغل محدد امامه ..

بالتأكيد الارزاق بيد الله ولكن ده ميمنعش اني اسأل اخواني هنا من ذوي الخبرة عن مجالات العمل المتاحه للمهندس الزراعي ( تخصص بساتين ) هل هي سهله كده ومتوافرة زي مهنة المحاسب على سبيل المثال ( مظنش ) ولا معقده زي مهنة المحامي مثلا ( ربنا يستر ) ؟ ولا مفيش له مجال خالص بتخصصه لا قدر الله ؟

طيب لو مش هيشتغل في مجاله الاصلي ( بالمناسبة هو مهندس جوده ) ايه هي المجالات التانية الي ممكن يشتغل فيها وايه المهارات المطلوبة الي يفضل تكون فيه .. وهل في شهادات مثلا او دورات يفضل ياخذها في مصر قبل مايحضر هنا ؟

واخيرا ايه هي الطريقة المثلى للبحث عن عمل هنا يعني يكتفي بقراءة الاعلانات في الصحف ولا يفضل يروح بنفسه للشركات يترك اوراقه وماهي الشركات الي يفضل يبدأ بيها ؟

الاسئلة كتيرة بس معليش الواحد يحب يستفيد من خبرة الي قدامه وعلى فكره لو الاجابات محبطه مفيش مشكلة ارحب بيها بالظبط زي الاجابات المشجعة المهم اننا نكون على نور من البدايه ..

وشكرا للجميع مقدما ..

[HDarwish]

أولاً أهلا وسهلا بيكي في منتدى محاورات المصريين

بالنسبة لتساؤلاتك للأسف مش كلها هاقدر اجاوبك عليها وده لإني مهندس زراعي بس مش مقيم في الرياض .. لكن من خلال تساؤلاتي قبل كده عن نفس الموضوع كانت الإجابات إن أكثر مجال ممكن يلاقي فيه فرص هو اللاندسكيب وده المجال الخاص بتنسيق الحدائق العامة والطرق والفلل يعني كل ما يخص تنسيق الحدائق وبالتالي لو مهندس زراعي شاطر (يقدر يلف اللي قدامه يعني بكام كلمة لاتينية على كام اسم مبيد على تسميد ..وهكذا) ويا سلام بئا لو دعم نفسه بدورتين (أوتوكاد و ثري دي ماكس) يبقى كده هيحط رجل على رجل والشغل هيجيله لحد عنده ويا سلام كمان لو كان لغته الانجليزية كويسه يبقى كده الناس هتجري وراه وتتحايل عليه وتقوله ياريت تقبل بالعرض بتاعنا المتواضع .... ده يا ستي بالنسبة لتخصص البساتين وتنسيق الحدائق ...

إنما إنتي ذكرتي إنه مهندس جوده ... ومهندس جوده يعني أكيد تخصص يا صناعات غذائية يا قسم منتجات الألبان وده من غير ما اسأل ولا أدور لو معاه شوية خبرة صغيرين في المجال ده يبقى يتوكل على الله ويشوف شركات الانتاج الغذائي زي المراعي وغيرها ... وعلى فكره من أحسن المجالات اللي بيتخصص فيها المهندس الزراعي هما المجالين دول (الصناعات الغذائية والألبان) واللي شغلهم كمان بيقى مريح ونظيف (شغل في معمل ولابس البالطو الأبيض والطاقية البلاستيك وتعقيم وشغلانه) ... كان نفسي اتخصص في المجال ده لكن للأسف أنا كان تخصص شعبة عامة يعني بتاع كله ...

وفي الأول والأخر الشغل ده قسمه ونصيب واللي ربنا كاتبهوله هايشوفه

تحياتي وتمنيات بالتوفيق

سامحيني على العفوية في الكلام

[doha]

جزاك الله كل خير على الرد الوافي .. بس المشكلة عندي معقده شويه ..

هو تخصصه العام بساتين والدقيق تنسيق حدائق يعني لاند سكيب الي بتمدح فيه ده بس المشكلة انه لم يمارس تنسيق الحدائق يعني خبرته فترة طويلة كمهندس حر وكام سنة كمهندس او مدير جوده في محطه لتصدير الموالح ..

هي دي المشكلة الي بنعاني منها ان تخصصه في جهة وخبرته في جهة تانية وفي نفس الوقت مش عارفه ان كان التخصص ده ينفع هنا لو الخبرة كافية ولا ايه ..

طيب لو يشتغل في شركات الالبان والكلام ده هل يقبلوا بأي تخصص زراعي ولا لازم يكون صناعات غذائية مثلا عشان ياخذوه ؟ وبرضه التقدم لهم يكون شكله ايه ..

الي معقدني اني دائما بشوف اعلانات مهندسين زراعيين لاند سكيب بالذات وطالبين عمل لكن مش بشوف اعلانات لاصحاب اعمال طالبينهم الا فيما ندر جدا ..

واخيرا سؤال على الماشي بما اننا بنتكلم في الموضوع ايه هي المرتبات المتوقعة بالنسبة لمجال الزراعيين عامه وهل اللغه الانجليزية والحاسب مهمه اوي في المجال ده ولا عادي ممكن يشتغل من غيرهم او بخبرة بسيطه فيهم ؟

[HDarwish]

جزاك الله كل خير على الرد الوافي .. بس المشكلة عندي معقده شويه ..

جازانا الله وجازاكم كل خير إن شاء الله ... إن شاء الله مفيش تعقيد ولا حاجه وسيبيها على الله ...

هو تخصصه العام بساتين والدقيق تنسيق حدائق يعني لاند سكيب الي بتمدح فيه ده بس المشكلة انه لم يمارس تنسيق الحدائق يعني خبرته فترة طويلة كمهندس حر وكام سنة كمهندس او مدير جوده في محطه لتصدير الموالح ..

من خلال التخصص ده أنا شايف إن مفيش مشكلة ولا حاجه وإبدأوا الأول بالشركات الكبيرة زي شركة الجوف مثلا وإعملوا يادوب سيرش صغير على جوجل واكتبي الشركات الزراعية في السعودية وهتلاقي إن شاء الله قائمة كبيرة جدا بشركات ممتازه ... يعني ممكن يحصل على شغل في الشركات دي واللي بيكون شغلها في الموالح وأشجار الفاكهة كبير إلى حد ما ... وبالنسبة لشغل تنسيق الحدائق فشغلها بسيط جدا وبخبرته دي وبشوية تنشيط للذاكرة من كتب الكلية يبقى إن شاء الله العملية معاه تبقى سهلة قوي

هي دي المشكلة الي بنعاني منها ان تخصصه في جهة وخبرته في جهة تانية وفي نفس الوقت مش عارفه ان كان التخصص ده ينفع هنا لو الخبرة كافية ولا ايه ..

لو كنتي شايفه إن مشكلتكم دي كبيره يبقى أنا بئا مشكلتي مالهاش حل (أصل أنا بنصحك أساساً وفي نفس الوقت محتاج للنصيحه) ... وربنا يسهلكوا الحال إن شاء الله ...

طيب لو يشتغل في شركات الالبان والكلام ده هل يقبلوا بأي تخصص زراعي ولا لازم يكون صناعات غذائية مثلا عشان ياخذوه ؟ وبرضه التقدم لهم يكون شكله ايه ..

أكيد لو كان تخصصه صناعات غذائية هيبقى أحسن ويدعمه أكثر وعلى ما أعتقد إن المجال ده خصوصا بيحتاجوا التخصص فيه بصورة كبيرة جدا يعني يا إما يكون تخصصه صناعات غذائية يا شعبة عامة زي حالاتي ... المهم يبقى عنده شويه معلومات وخبرة عن المجال ده ...

الي معقدني اني دائما بشوف اعلانات مهندسين زراعيين لاند سكيب بالذات وطالبين عمل لكن مش بشوف اعلانات لاصحاب اعمال طالبينهم الا فيما ندر جدا ..

ما هي دي مشكلة معظم الزراعيين وعلشان كده بيبقوا محتاجين مساعده في الأول لحد ما يشتغلوا ... لكن الميزة في مجالنا إنه مالوش دعوه لا بأزمات إقتصادية ولا غيره لإن الناس عمرها ما هتبطل أكل سواء في أزمه أو غيره.

واخيرا سؤال على الماشي بما اننا بنتكلم في الموضوع ايه هي المرتبات المتوقعة بالنسبة لمجال الزراعيين عامه وهل اللغه الانجليزية والحاسب مهمه اوي في المجال ده ولا عادي ممكن يشتغل من غيرهم او بخبرة بسيطه فيهم ؟

برده من خلال أسئلتي عن الرواتب في الرياض للمهندسين الزرعيين فكانت معظم الإجابات بتقول إنها بتترواح من 2500 إلى 3500 و اللغة الانجليزية والحاسب الوقتي عادت من أهم الشروط في معظم المجالات فأكيد بتفرق كثير مع المهندس الزراعي

وعموماً اللي يقدر يفيدك إن شاء الله أكثر مني واحد هنا عامل نفسه مش شايفنا إسمه كابتشينو إندهي معايا عليه يحضر في الحال وهو إنسان خدوم جداً من اللي يتقال عليهم راجل مجدع

تحياتي وتمنياتي بالتوفيق

[capitshino]

يا عم ات درويش صحتنى من النوم بصواك العالى

بالنسبة لسؤال حضرتك.

ممكن نعرف خبرات زوجك فى اى مجال بالظبط .. يعنى ااشتغل فى ايه بالتحديد ؟

فى فرصة بالرياض بس على بعد 150 كم من وسط المدينة . بس لازم يكون عنده خبرة فى انتاج الخضروات او انتاج زهور القطف

بالنسبة للاند سكيب ففى شركات كبيرة فى الرياض ممكن يقدم فيها لما يوصل باذن الله

زى مجموعة زيد الحسين - رابية - فيفيا -

بالنسبة للمرتبات ففى ناس بتاخد 2000 ريال وناس بتاخد 6000 ريال

طبعا الكلام ده حسب الخبرة وحسب المكان

ربنا يوفقكم

انا هاقوم يقى الحق اول سرير

[HDarwish]

150 كم عن وسط المدينة

[HDarwish]

مش عايزين حد حديث التخرج .. أو قديم التخرج بس دار عليه الزمن؟

[se_ Elsyed]

لو إشتغل في مجال توزيغ المواد الغذائية .. يبقى أحسن وأفضل وعمولة المبيعات بتفرق جامد في الراتب ..

[HDarwish]

سي السيد بنفسه معانا ؟! ... يا أهلا يا أهلا

عندك حق والله .... لكن إنت أبو العارفين إن دايما الواحد بيدور على المجال بتاعه الأول وبعد كده لو مالقاش فايده بيشتغل في أي مجال تاني والسلام ...

عشمان فيك في خدمة يا أبو السيد بس هخليها بيني وبينك وتكون عالخاص ... يارب ما تكسفنا

تحياتي (ولو إني سمعتي إن فيه ناس بيحرموها )

[doha]

جزاكم الله خيرا جميعا على الردود ..

مخبيش عليكم انا كده تلخبطت زياده .. يعني برضه معرفتش هل الفرصة هنا متاحه كويس ولا لاه .. كتير بيقولوا كان المفروض نسأل الاول قبل الفاس ماتقع في الراس يعني قبل مانجيب التاشيرة لكن مش مشكلة احنا بنحب نعمل عكس الناس يعني نعمل العمل الاول بعدين نسال ينفع ولا مينفعش ..

على كل حال بالنسبة لخبراته فهو خبرته كمهندس زراعي حر يعني زراعه المحاصيل التقليدية الي انتم عارفينها في مصر القمح والشعير والبرسيم وبرضه الخضروات ... الخ

اما الخبرات الي موثقة بشهادات فهو كان بيشتغل مهندس جوده ثم مدير جوده لمحطة تصدير حاصلات زراعية يعني برتقال بالذات وجنبه كام صنف من الفواكه زي العنب والمانجو على مااعتقد ..

مجال عمله في الاشراف على المحصول وقت زراعته وطبعا تجهيزه وتعبئته ومن ثم تصديره .. كل الخطوات دي طبعا كانت من مهام عمله ( مش حاجات مهمه اوي لكن اكيد احسن من مفيش يعني يقال عليها خبرة برضه )

طيب الشركات الزراعية الي قلتم عليها دي يروح لها ازاي يعني نعمل سيرش من النت مثلا او دليل الهاتف ونطلع الارقام ونجيب العناوين ويروح يقدم اوراقه او يرسلها بالفاكس ولا في طرق تانية افضل ؟

ثاني شيء لما يكتب السي في بتاعته ايه النقاط الي يأكد عليها فيها ؟ انتم عارفين احيانا الواحد بيكون متقن لاشياء او على علم باشياء وشايف انها تافهه فمش بيجيب سيرتها بينما قد تكون مهمه لصاحب العمل وبيدور عليها .. يعني من خبرتكم كمهندسين زراعيين او حتى كمصريين في الرياض ايه الحاجات الاكثر طلبا هنا في سوق العمل ويفضل تكون فيه عشان يقدر يحصل على وظيفة كويسه ..

وبرضه لو مشتغلش في مجاله وحاول يدور في مكان تاني ايه الوظيفة المناسبة لواحد بمؤهلاته مع العلم انه مش حديث التخرج بس زي ماقلت لكم خبرته الموثقة بشهادات اقل بكتير من الخبرة الفعلية كخريج قديم ..

سؤال بقى خاص للاخ درويش بعد اذنك

بتقول ان وضعه افضل شويه من وضعك طيب استأذنك لو تقولي ايه المشاكل الي تعرضت لها كمهندس زراعي او العقبات الي خلت وضعك مش هو الوضع المطلوب .. يعني كزراعي قديم في الرياض ولاقى صعوبات تقدر تقولي كده كام نقطه ممكن نستفيد بيها من تجربتك ؟

وسؤال برضه على الماشي لاخوانا سين وكبتشينو

بالنسبة للوظيفة الي على بعد 150 كيلو دي يعني تقريبا فين خارج الرياض ولا جنوب ولا شرق والاهم ايه المتطلبات التانية للوظيفة وطبعا اكيد ايه المميزات بعد اذنك .. لو تحب تديني فكرة على العام يبقى كويس لو حبيت خليها على الخاص برضه كويس وجزاك الله خيرا مقدما ..

وبخصوص توزيع المواد الغذائية طيب بتشترط ايه مهنة زي دي عاده يعني بخلاف اتقان القياده هل بيشترط سن معين او خبرات معينة وبداية في شغله زي كده تكون ازاي يعني يروح يقدم فين ولا يجيب اعلانات منين ..

معليش انا اثقلت عليكم عارفه بس لاني صاحبة الفكرة في القدوم لهنا فمش عاوزه اندم عليها وعشمي اني مكونش تصرفت الا الصح ..

تم تعديل 16 مارس 2009 بواسطة doha

[HDarwish]

سؤال بقى خاص للاخ درويش بعد اذنك

بتقول ان وضعه افضل شويه من وضعك طيب استأذنك لو تقولي ايه المشاكل الي تعرضت لها كمهندس زراعي او العقبات الي خلت وضعك مش هو الوضع المطلوب .. يعني كزراعي قديم في الرياض ولاقى صعوبات تقدر تقولي كده كام نقطه ممكن نستفيد بيها من تجربتك ؟

الأخت الفاضلة

أولا أنا زي ما قلت قبل كده مش من سكان الرياض ولا السعودية أنا مقيم في الكويت وكنت دايما حتى بذكر في مشاركاتي (حسب ما عرفت أو سألت زمايل ليا وقرايب موجودين في الرياض) لإن أنا في نفس المشكلة اللي هي ... زوجتي طبيبة وحاولنا نحصل لها على شغل هنا في الكويت لكن دايما بيطلبوا شروط زيادة شوية غير الوضع في السعودية على العكس تماما شغلها مطلوب هناك جدا وفي أكثر من مكان وبرواتب ممتازة علشان كده بنفكر كثير جدا إننا نسيب الكويت ونروح السعودية بس الأول أقدر أتحصل على شغل هناك ... المهم علشان ما طولشي عليكي والحكاية دي أمرها يطول .... طبعا لإني في الكويت والكويت معروف عنها إنها مش بلد زراعية نهائي إضطريت إني اشتغل في مجال تاني غير الزراعة والحمد لله ربنا وفقني فيه جدا والحمد لله وضعي الوقتي احسن من ناس كثير شغالين في الزراعة بس برضه ما فقدتش الأمل وبياخدني الحنين دايما إني أرجع تاني اشتغل في مجالي وبحاول اعمل دراسات عليا وكلام كثير من ده ...

لو فيه أي استفسارات أنا حاضر على قد ما اقدر وعلى حسب معلوماتي

تمنياتي بالتوفيق

[capitshino]

وسؤال برضه على الماشي لاخوانا سين وكبتشينو

بالنسبة للوظيفة الي على بعد 150 كيلو دي يعني تقريبا فين خارج الرياض ولا جنوب ولا شرق والاهم ايه المتطلبات التانية للوظيفة وطبعا اكيد ايه المميزات بعد اذنك .. لو تحب تديني فكرة على العام يبقى كويس لو حبيت خليها على الخاص برضه كويس وجزاك الله خيرا مقدما ..

وبخصوص توزيع المواد الغذائية طيب بتشترط ايه مهنة زي دي عاده يعني بخلاف اتقان القياده هل بيشترط سن معين او خبرات معينة وبداية في شغله زي كده تكون ازاي يعني يروح يقدم فين ولا يجيب اعلانات منين ..

معليش انا اثقلت عليكم عارفه بس لاني صاحبة الفكرة في القدوم لهنا فمش عاوزه اندم عليها وعشمي اني مكونش تصرفت الا الصح ..

المزرعة فى منطقة تسمى وادى التمساح . هو المكان مافهوش حياة اوى بس المشروع كبير

والسكن بالمزرعة ...

ببالنسبة للميزات فهى ليها علاقة مباشرة بالشروط

يعنى لو خبرته كبيرة فى انتاج الخضار خصوصا الطماطم والخيار والفلفل هيبقى مرتبه كويس والعكس طبعا

عالعموم اذا تحبى ممكن ابعت لك رقم الفاكس وابعتى عليه السى فى ومش هتخسرى حاجة

[doha]

وادي التمساح دي فين يعني تبع الرياض ولا القصيم ولا حته تانية ؟ ولو الاقامه في المزرعه هل ممكن ينزل خميس وجمعة مثلا للرياض ولا نظام معسكر ميتحركش منه ؟ على كل حال هو دائما الشحات عاوز فطيرة سخنة .. هات ياسيدي الفاكس نحط السي في مش هنخسر حاجه وجزاك الله كل خير ..

[se_ Elsyed]

عشمان فيك في خدمة يا أبو السيد بس هخليها بيني وبينك وتكون عالخاص ... يارب ما تكسفنا

تحت امرك

بس اوعى تكون عايز صُرة من الدنانير سلف لحد اول ابريل :blush2:

[HDarwish]

مش بالظبط كده ....

[doha]

معليش يااخ درويش مكنتش اعرف انك في الكويت لاني جديده على المنتدى

على كل حال ربنا يفتحها عليك في الرزق هنا او هناك وان شاء الله تلاقوا فرصة عمل كويسه لكم انتم الاثنين ..

[doha]

الحمد لله وصلنا الرياض وفات الجزء الصعب .. بس باقي الاصعب :sad:

اكيد طبعا البحث عن عمل ..

ياريت بقى لو حد عنده فكرة عن مكان او جهة محتاجه مهندس زراعي خبرة عشرين سنة ( في كله ) يدلنا عليها واكون شاكرة له جدا ..

بس ياريت برضه ياجماعه يكون الشغل ده في الرياض نفسها . لو مفيش يبقى الامر لله ندور خارج الرياض ..

شكرا جزيلا لكل من هيهتم بالموضوع ده ويساعدني ولو بالدعاء بالتوفيق ..

جزاكم الله خيرا ..

[كفايه بقى]

هوه فيه حركه حلوه جدا ساعات بتصيب وساعات بتخيب وهى بتعتمد على الرخامه وهى كالاتى:

انا محاسب حديث التخرج ولسه جاى من شهرين ومكنتش لاقى شغل براتب كويس(على الرغم من كفاءتى)ماعلينا

المهم بعد ماتخنقت من اللف بقيت بجمع فاكسات وايميلات اى شركه اشوفها قدامى ان شالله تكون شركة زباله حتى وابعت السى فى وهكذا ...

ومر اسبوعين ولم يتصل احد؟؟

وبعد ماشتغلت فى مصنع للاخشاب

لقيت التيفونات مابتبطلش رن كلهم عايزينى عشان برنامج محاسبى معين كنت مذاكره

المهم الطريقه على الرغم من تفاهتها وسذاجتها الا انها حسستنى انى مرغوب فيا مش مليش لازمه زى اول ماجيت

وللعلم انا لسه برضه ملقيتش شغل بالراتب الى انا عايزه بس اهوه الشغل موجود والرزق هوه اللى بيجرى ورايا

واخيرا انا كل ماحس انها ضاقت بفتكر الحديث النبوى الشريف

سهمان انطلقا:(العمر والرزق) صدق رسول الله صلى الله عليه وسلم

[doha]

هوه فيه حركه حلوه جدا ساعات بتصيب وساعات بتخيب وهى بتعتمد على الرخامه وهى كالاتى:

انا محاسب حديث التخرج ولسه جاى من شهرين ومكنتش لاقى شغل براتب كويس(على الرغم من كفاءتى)ماعلينا

المهم بعد ماتخنقت من اللف بقيت بجمع فاكسات وايميلات اى شركه اشوفها قدامى ان شالله تكون شركة زباله حتى وابعت السى فى وهكذا ...

ومر اسبوعين ولم يتصل احد؟؟

وبعد ماشتغلت فى مصنع للاخشاب

لقيت التيفونات مابتبطلش رن كلهم عايزينى عشان برنامج محاسبى معين كنت مذاكره

المهم الطريقه على الرغم من تفاهتها وسذاجتها الا انها حسستنى انى مرغوب فيا مش مليش لازمه زى اول ماجيت

وللعلم انا لسه برضه ملقيتش شغل بالراتب الى انا عايزه بس اهوه الشغل موجود والرزق هوه اللى بيجرى ورايا

واخيرا انا كل ماحس انها ضاقت بفتكر الحديث النبوى الشريف

سهمان انطلقا:(العمر والرزق) صدق رسول الله صلى الله عليه وسلم

بالعكس حركتك دي ممتازه وانا شخصيا اشتغلت بيها قبل كده .. كنت بجمع ارقام كل المعاهد الي بتدرس حاسب واتصل بيهم اترك بياناتي وبعد كام شهر اتصلوا بي واحد وراء الثاني.

ان شاء الله ناويين نعمل الحكايه دي احنا كمان بس زي ماانت عارف الواحد لازم يجري في كل الاتجاهات فبرضه اكيد جنب ( تلقيح الجتت ) لازم نوصي المعارف والاقارب انهم يدوروا معانا لان الوقت ضيق من جهة ومن جهة تانية الواحد لازم يطرق كل الابواب عشان يختار وهو مرتاح ..

وعلى فكرة في جهات كتير زي المدارس مثلا معتمده الطريقة دي في التوظيف يعني بعضها مش بينزل اعلانات نهائيا معتمد على كم السير الذاتية المخزنة عنده من ناس كتير زينا بتعتمد طريقة ارسل قبل مايطلب ..

طيب بالمناسبة عندي استفسار ياريت حد يجاوبني عليه ..

وظيفة مدير مبيعات دي عباره عن ايه .. هل هي مسمى تاني لمندوب المبيعات ؟ يعني ايه المطلوب من شخص عشان يشغلها او بمعنى ادق ايه عيوبها ومميزاتها ..

سؤال تاني بعد اذنكم .. لو احنا بندور على وظيفة تكون محترمه واكيد طبعا براتب كويس ندور في فئة ايه ؟ يعني اعرف في وظائف بتشترط يكون جامعي بس وكمبيوتر ولغه والكلام ده وبتكون رواتبها ومميزاتها ووضعها الاجتماعي كويس .. حد يقدر يفيدني في مسميات وظائف من النوع ده وبتكون في شركات ايه؟

[كفايه بقى]

لأ طبعا ااااااا

فمدير المبيعات يختلف عن مشرف المبيعات يختلف عن مندوب المبيعات

وطبعا اعلاهم فى الهيكل الوظيفى هو مدير المبيعات ويتمثل دوره فى الاتى:

1- دراسة السوق.

2- معرفة من هم عملاء المستهدفين وكيف يمكن الوصول إليهم .

3- معرفة من هم المنافسون للشركة .

4- معرفة ماهى نقاط القوة والضعف لدى المنافسين .

5- تحديد ماهى المزايا التى يمكن أن يقدمها للعملاء .

6- تكوين فريق بيعى متخصص .

7- متابعة عمليات البيع وتلقى شكاوى العملاء .

8- الاستجابة السريعة لطلبات وشكاوى العملاء

التخطيط لاماكن البيع

اختيار وتعيين مندوبى المبيعات

وضع خطط طريقة البيع والعروض المختلفه مثل نسبة الخصم وحدود الائتمان للعملاء وما الى ذلك

متابعة سير خطط العمل كما خطط لها

وبإختصار فان دوره هو تحديد متى وأين وكيف ومن يقوم بعملية البيع

ثم يبدأ بعد ذلك دور مشرف المبيعات وتتمثل فى الاتى:

وهو يعتبر همزة الوصل بين مدير المبيعات ومندوبى المبيعات

ودوره هو شرح خطط العمل الموضوعه من المدير وطرق تنفيذها

ثم متابعة مندوبى المبيعات للتأكد من قيامهم بأداء المطلوب منهم

ورفع التقارير لمدير المبيعات عن حركة وسير العمل

ثم يأتى دور المندوب وهو الذى يتولى التعامل مع العملاء ووظيفته معروفه لذا لن اتعرض لها

وفى بعض الشركات الصغيره يكون مدير المبيعات هو نفسه مشرف المبيعات

وبالنسبه للمواصفات التى يجب توافرها فى مدير المبيعات

اولا ان يكون قد عمل كمندوب او كمشرف مبيعات لفتره

ثانيا مؤهل علمى مناسب(وقد يغنى عن المؤهل الخبره الجيده فى هذا المجال)او الدورات المتخصصه فى التسويق

ثالثا القدره على التطوير والتخطيط وقيادة فريق عمل والحاجات دى!!!

وطبعا مميزاتها هى الراتب المرتفع والمركز الاجتماعى وما الى ذلك

اما عن عيوبها فهى ان مدير المبيعات هو الشخص الوحيد الذى يساءل امام مجلس ادارة الشركه عن حجم المبيعات المحقق ومقارنته بالمبيعات المستهدفه حيث يجب عليه وضع الخطط البيعيه لتحقيق حجم المبيعات المستهدف من الاداره

هذا هو المفرووووووووض ولكن قد يختلف الواقع عن كل هذا فممكن ان يطلق على مندوب فى منطقه مثلا ولتكن القصيم

مدير مبيعات منطقة القصيم وهكذا

اما عن الوظائف التى تحتاج مؤهل عالى وكمبيوتر ولغه فلن تجد افضل من وظيفة سكرتير تنفيذى لشركه كبيره (انا شخصيا مقدم فى شركه من الشركات وربنا يكرم)

بس دى عايزه حاجه مهمه لسه مش متوفره عندى وهى عمل خطابات للجهات الرسميه مثل الجوازات والوزارات والهيئات الحكوميه

ودى طبعا بتبقى براتب نحترم على حد علمى ويشترط فيها اللباقه وحسن المظهر واظنها متوفره فى كثير من المصريين

وربنا يكرم الجميع ونرجع لبلدنا سالمين غانمين

تم تعديل 28 أبريل 2009 بواسطة كفايه بقى