مطلقات قبل الزفاف

[بنت شعنونة]

من كام يوم تقابلت انا واحد زملاء الدراسة القدااااااااااام

وخدنا الكلام على فلالالالالالان وعلان وعاملين ايه وبيشتغلوا فين وكدا يعني

وفوجئت انه فيه حوالي اربعة ازواج من زمايلنا اتخطبوا وكتبوا كتابهم واتطلقوا بدون زفاااااااااف!!!!!!!

وكان من ضمن تعليقاتنا انه طول فترة كتب الكتاب مع الازواج الأربعة كانت احد الأسباب الرئيسية انهم يتطلقوا

لكن بيني وبينكم صعبوا عليا البنات دول جداااااااا جدااااااااا

لأنه من ناحية فقد اكتسبت ذلك اللقب المشؤوووووووووووم الا وهوا مطلقة

دي من ناحية

ومن ناحية تانية فهي لم تتزوج فعليا حتى يصبح استحقاقها لل لقب يعني مقبول نوعا ما

طب يا ترى البنات دول مصيرهم ايه؟؟؟

هل انها تعتبر سكند هاند واي كلام بحيث انها تبقى ملطشة للرايح واللي جاي وتشوف اي عريس والسلام ماهي مطلقة بقىىىىى!!!!!!!!!

والا هل سيرحمها المجتمع!!

وياترى هل دا غلطة الأب و الأهل اللي حبوا يمشوا بما يرضي الله ويكتبوا كتاب بناتهم ويدوهم المشروعية في الخروج والدخول بدون الحرام او شبهته!!!

طب تعمل ايه؟؟

ويعمل ايه اهلها!!

في لحظة من اللحظات لقيت نفسي بقول

ياريتها اتجوزت فعلا واتطلقت كان ها يكون ارحملها

لكن رجعت في كلامي وقلت لا

حرااام

هيا كدا اكيد احسسسسسسسن

" بس حاسا اني فعلا بضخك على نفسي"

طب ايه رايكم؟؟

و الحل اييه؟؟

خاصة انه زي ما فهمت تسجل في السجلات على انها مطلقة

هل يضحكوا على العريس وما يقولوش!!!

والا يقولوا ويستحملوا!!!!!

حاجا تحير "وش قرفان"

[tiger1411]

طب يا ترى البنات دول مصيرهم ايه؟؟؟  

هل انها تعتبر سكند هاند واي كلام بحيث انها تبقى ملطشة للرايح واللي جاي وتشوف اي عريس والسلام ماهي مطلقة بقىىىىى!!!!!!!!!  

والا هل سيرحمها المجتمع!!  

مصيرهم دا غيب لا يعلمه الا الله والجواز قسمه ونصيب

واكيد ان كل منهن لم يأتى نصيبها بعد

اما اعتبارها سكند هند ونظرة المجتمع فدى هى المصيبه

وللاسف لا اعرف لماذا هذه النظره الظالمه للمطلقه سواء

قبل الزفاف او بعده

مهو لو الناس بتتقى الله فى بعضها ولو كل صاحب نظره

سيئه فكر ان بنته او اخته ممكن تكون فى نفس الموقف

ماكانش دا بقى الحال

والغريب ان هذه النظره السيئه من المجتمع لم تكن موجوده فى ازمان سابقه كان الناس فيها -المفروض-انهم اقل تحضرا ومدنيه

ده مش شىء عجيب؟؟؟؟؟؟؟؟؟؟!!!!!!!!!!!!!!

[disappointed]

والله أنا شايف ان النظرة الى هذه الحالة الاجتماعيّه لازال محصورا فى نطاق التعامل مع توصيف "المطلّقه" فى هذه الحالات على أنه توصيف رسمى (بناءا على الأوراق والمعاملات الرسميّه) وليس توصيف عملى (كما هو التوصيف فى حالة المطلّقات بعد فترة من الزواج الفعلى)

أعتقد أن النظرة الى المطلّقة التى تم تطليقها وهى لازالت مكتوب كتابها دون مباشرة الزواج بصورة فعلية لازالت هى نفس النظرة التى تنظر بها غالبية شرائح المجتمع الى الفتاة التى تم فسخ خطبتها (يعنى بالاختصار المطلّقة بعد كتب الكتاب وقبل الزفاف وضعيّتها الاجتماعيّه شبه مطابقة لوضعية البنت التى تم فسخ خطبتها)

وأعتقد أن الوضع سيظل هكذا خاصة بعد الارتفاع الرهيب و الزيادة المضطردة فى نسبة حالات الزواج الفعلى التى تنتهى بالطلاق فى المجتمع المصرى خلال العقدين الماضيين (وخاصة العقد الأخير)... وهى الزيادة التى يلمسها أى فرد فى المجتمع المصرى دون الحاجة الى احصائيّات وأرقام بمجرّد النظر بصورة شخصيّة الى دائرة معارفه و أقاربه و أصدقائه ليكتشف دون عناء أن الزيجات التى تنتهى بالطلاق أصبحت أكثر فى هذا المحيط من تلك التى يكتب لها الاستمراريّه

وهذه وجهة نظرى الشخصيّه....ربّما كانت خاطئة...ولكننى أعتقد فيها حتّى تاريخه

[إبن مصر]

مبدأيا التسجيل يختلف من نوع المطلقه..

هل ثيب ام بكر..

وكل حاله ليست سبه او معره..

فالبكر المطلق مثلها مثل اى امرأه حره عفيفه ..

والثيب كذلك وكل من رغب فى الزواج يعلم جيدا ما يريد..

لا تضيقوا الافق بالنظر الضيق الى حاله الكنز هل هو مدفون ام ظاهر للعيان فسيظل دائما كنز...

ابن مصر

[se_ Elsyed]

مرحباً مرة ثانية بشعنونة وموضوعاتها الشيقة والشائكة .

شوفي يا ستي بالنسبة للبنت المطلقة قبل الزفاف فده عادي جداً وتقريباً ينظر لها الجميع نظرة مساوية للي أتفسخت خطوبتها .. لأن مافيش فرق بينهما وأنا عن نفسي ماتفرقش معايا أن البنت اللى هارتبط بها كانت مخطوبة أو مكتوب كتابها طالما أرتضيت بأخلاقها ودينها .

أما المصيبة الكبرى فهي نظرة المجتمع المتخلفة للمرأة التى كانت متزوجة وطلقت .. فتجدي المجتمع من حولها منقسم إلى ثلاثة أقسام وهم :

1- أهلها : الذين يشعرون انها قد جلبت لهم العار بفعلتها الشنيعة وهي الطلاق ، لذلك فلابد أن يحبسوها فى البيت ولا تخرج لكي لا تجلب لهم المزيد من العار وكذلك يشعروا بأنها حمل ثقيل عليهم خاصة إذا كان لديها أبناء ، مع ان ممكن يكون سبب الطلاف متعلق بالرجل .. لكن تسمعي على طول جملة متكررة من أهلها " أحنا معندناش ستات تتطلق " !! ليه يا عم الحاج يعني الست تعيش فى جحيم وعذاب .. هو ده اللى يريحكم ويحفظ شرف العيلة يعني ؟!!!

2

- نظرة بعض النساء المحيطين بها اللاتي يتغامزن ويتهامسن عن أسباب الطلاق ولابد أن بها حاجة مش مظبوطة و و و و ويعملوا سيرة الست تسلية فى جلسات النميمة .

3- نظرة بعض الرجال المريضة : الذين يظنون أنها صيد سهل وأنها مش هاتمانع من ان يكون هناك علاقات وما إلا ذلك .

فبالتأكيد هذه كارثة حقيقية لأن الطلاق شيء وارد جداً في الحياة الزوجية ولكننا فى مجتمع يكيل بمكيالين ، فتجدي ان الرجل المطلق لا يجرؤ أحد أن يتكلم عليه وده ليه ؟ لأنه راجل ومايعبوش حاجة وأن ممكن يتجوز ويطلق زي ماهو عايز .. ليه يا جدعان ؟ لأن الرجل ما يعيبوش غير جيبه !!! شوفتوا الخيبة ؟!! يعني عنده إشاره خضراء وتصريح أنه يمرمط فى بنات الناس وماحدش يقدر يتكلم عليه علشان راجل.

اما الست لو اتطلقت .. يا سلام يبقى لها الويل والثبور وعظائم الامور وتبقى عيوب الدنيا كلها موجوده فيها ... دي مطلقة يا عم !!!!!!!!!!

ويا سلام يا سلام لو شاب أول مرة هايتجوز وحبها وفاتح أهله أنه هايتجوز واحده مطلقة .... فيكون هذا بمثابة شرارة بدء الحرب عليه من اهله .. تاخد واحده مطلقة ليه وأنت معيوب ده أنت الف بنت تتمناك .. إش عرفنا دي أتطلقت ليه يمكن فيها حاجة ؟!! ...

عادات وتقاليد وأفكار متخلفة لابد أن نتكاتف جميعاً على نسفها وأقتلاعها من جذورها ونحاول أن نصحح هذه الأفكار على الأقل عند أولادنا والمحيطين بنا.

[White heart]

انا من وجهة نظرى المتواضعة ان هذة المشكلة و كثير من المشكلات الأخرى ترجع الى المجتمع نفسه، الينا نحن المصريين و ما بداخل عقولنا من بعض العادات و التقاليد....

"نظرة المجتمع" !!!!

هذة "النظرة" بوجه عام، و خصوصا (عمال على بطال) على أى حق؟

لماذا نتدخل فى شئون غيرنا الى هذة الدرجة من "الخصوصوية"؟؟!!

فلانه خرجت مع فلان....، فلان سمعته بيزعق فى مراته و بيقول كيت و كيت...، فلانه شفتها ماشية امبارح مع...، طبعا كان لازم يطلقها ... تلاقية عرف البلاوى السودة اللى كانت بتعملها قبل ما تتجوزة....، شفتم البت فلانه بت الست علانه لابسة ايه؟؟!! .....الخ ... الخ ...

لماذا ننظر دائما الى ما يفعلة غيرنا؟؟!! و ياليت الأمر يتوقف عند "النظر" بل انه يتعداة الى مراحل اقل ما يمكن وصفها فى بعض الأحيان بالشريرة و ينتج عنها "ظلما" فى كثير من الأحيان أمور محزنه و مخربة، أقلها موضوعنا هذا!!

[farasha79]

انا ليا وجهه نظر في الموضوع ده و ان حصل يعني في المستقبل و هتجوز مش هكتب كتابي الا قبل الفرح بيوم

يعني المفروض في مرحله خطوبه بيتم فيها الاتفاق و المناقشات و المشاحنات ...و بعد كل المراحل التحضيريه و التأكد من قبل الطرفين من ان كل حاجه تم الاتفاق عليها يتم كتب الكتاب .

بالاضافه اني شايفه موضوع البنت المطلقه قبل الزفاف عادي جدا زيها زي البنت العاديه مادامت بكر...

[بنت شعنونة]

فراشة انتي كلامك صحححححححححح فعلا

لازم كتب الكتاب قبل الزفاف بكام يوم بس

عشان تقع الفاااااااااس في الراس

الحاجا التانية اني لاحظت ان رايكم غيييييييييييير راي ناس كتييييييييييير شفتها هنا وبشوف رايها في الكلام دا

على فكرة الكلام على المطلقة التى لم تتزوج فعليا افظع مليوووووووووون مرة من المطلقة فعلا

واول كلمة تتقال

اشششششششش عرفنا طلقها ليييييييييييييه

اكيييييييييييييييييد شاف عليها حاجا

عارفين بيعتبروها زي ايه

زي واحدا اتطلقت في صباحيتها مثلا

اه والله العظيم زي ما بقولكم كدا

وبيعاملوها معاملة بششششششششششعه جداااااااا جدا

لكن وانا بكتب الموضوع دا بنت عمي اللي قاعدة جنبي دي

قالتلي انه البنت ممكن ما تقولش انها مطلقة وما حدش ها يعرف حاجا

ممكن دا بجد؟؟؟؟؟؟؟؟؟

[إبن مصر]

وهل بنت عمك توافقف لو عرفت ان الى عايز يتجوزها كان متجوز قبل كده وخبى عليها؟؟

هذا بالنسبه للمشاعر اما شرعا فى الدين الاسلامى فلابد من المصارحه لانه لايعيب الانسان الا الكذب والخداع ..

وهل لو تمت معرفه شىء بعد الزواج هل تعتبروا هذا الخطاء من نوعيه خلاص معلش؟؟

شانا..

حمدا لله على سلامتك ايوه كده...

( استر يا راااااااارب)

[فــيــروز]

اعتقد ان اخفاء امر الزواج السابق له مضار اكثر بكثير من اعلانه

لان من يخفى امرا كانما يعترف بوجود خطا ما اضطره الى الاخفاء بينما من لا شئ لديه ليخفيه بيكون انسان(ه) واضح(ه) و صريح(ه)

كما انى اعتقد ان اخفاء هذا الامر صعب للغايه اصلا ولكن حتى اذا كان هناك فرصه لاخفائه فلا احبذ هذا اطلاقا لان عواقبه لن تكون جيده على الاطلاق ..

ناتى الى نظرة المجتمع .. الصراحه مؤخرا بدات اشعر بالاختناق من هذا المجتمع و من نظراته .. ولولا نصائح العقلاء كنت اتخنقت بجد .. والنصيحه التى انصحها لاى انسان تقلقه كثيرا نظرة المجتمع ان يتجاهلها على قدر استطاعته .. يمكن زمان كنا نقدر نقول ان لنظرة المجتمع وزن اما كان المجتمع محترم و يتمسك بالقيم .. بينما دلوقت ومجتمعنا به كثيرون ممن يهللون للانحراف و يستبشرون به او على الاقل خالص يغضوا الطرف عنه لم تعد لنظرة المجتمع اى قيمه .. بل بالعكس صار الاختلاف عما يفضله المجتمع غاية .. المجتمع فى الغالب لا يرضى عن احد .. ويعشق الحديث عن الآخرين من خلف ظهورهم .. يرى الكلام عن عيوب الآخرين اسهل بكثير من محاولة اصلاح عيوب الذات لذلك يتفرغ للامر الاول .. ولذلك وايا كانت الحاله الاجتماعيه للانسان اظن انه من الافضل ان يتناسى تمام نظرة المجتمع اليه ويركز فقط فى بناء شخصيته و الاستفاده من اخطائه السابقه ..

[بنت شعنونة]

شانا.. 

حمدا لله على سلامتك ايوه كده... 

( استر يا راااااااارب)

 

 

الله يسلمك يا فندمممممممم

"همممممممم ها اموت اعرف مين قاله اني واخدا اذن من عنبر 15 في السرايا وجايا اكتب كلمتين وراجعه"

نرجع للجد

اكيد ما حدش يرضى ينضحك عليه لكن خلينا نتكلم واقعيا

لو اب وعنده بنته مطلقة "اسما فقط" ولقى المجتمع ينبذها ويعاملها على انها سكند هاند ها يكمل يقول الحقيقة حتى لو شاف العرسان بتهرب؟؟؟

انا قاكرة انه كان فيه موضوع اتكتب هنا زمااااااااااااااااان بيتكلم عن هل الزوجة تقول للزوج كلللللللللللل حاجا بصراحا والا لا

وكان اجماع الكل رجالا ونساااااااااااء ان في حاجات لالالالالالالالالالازم تتقال وحاجات تانية قلتها احسسسسسسسن يعني عدم قولها احسسسسسسن

طب لو مشينا بالكلمة " واذا بلييييييييييتم ف استتروا"

مش يبقى برضوا المقروض ما نقولش!!

خاصة ان البنت صاااااااااااااغ سليم!!! والا نوقف سوقها وخلاص!!

فيروز انتي كلالالالالالالالالالامك صح

بس للأسف لو خبينا مش نافع ولو اتكلمنا مش نافع

لآن مجتمعنا مازال يتوارث تقااااااااااااليد بالية

طب والحل!!

[فــيــروز]

يا شانا يا عزيزتى منين نطبق مبدا "اذا بليتم فاستتروا" ومنين نعتبر البنت "صاغ سليم" !! انا طبعا رايى انها صاغ سليم و زى الفل ولهذا فهى ليست مبتلاه ولا تحتاج للتستر على اى شئ لانها لو تسترت على اى شئ فهى تصم نفسها بنفسها ان هناك شئ خطا اضطرت لاخفائه .. خاصة انها لو تزوجت و علم زوجها بالامر بعد هذا قد لا يغفر لها و يعيش دور اللى انضحك عليه ويطلعه عليها ازواجا و افرادا طيب ليه !! ما تصارحه من الاول واذا كان يعجب ماشى مايعجبش يبقى كل واحد يروح فى طريقه ويادار ما دخلك شر وليغن الله كلا من سعته ..

[se_ Elsyed]

بنت شعنونة كتبت

طب لو مشينا بالكلمة " واذا بلييييييييييتم ف استتروا"

مش يبقى برضوا المقروض ما نقولش!!

خاصة ان البنت صاااااااااااااغ سليم!!! والا نوقف سوقها وخلاص!!

يا شنشن دي مسألة تقديرية لأن فيه حاجات مهما الواحد خباها لازم هاتتعرف وأظن لما تكون واحده اتكتب كتابها وبعدين اطلقت قبل الزفاف هذا لن يكون حدثاً عادياً أو عابراً يمكن إخفاءه مهما طال الزمان .

لكن هأقول على مثال ، بنت أرتبطت عاطفياً إرتباط بريء بأحد زملائها وبعدين تركوا بعض ومرت الأيام والبنت أتجوزت .. تيجي بقى تتشملل وتعمل فيها أمينة رزق - الله يرحمها - فى فيلم سيبوني أعترف وتقول لزوجها انها كانت بتحب واحد أيام الدراسة وبعدين سابوا بعض وده اعتقاداً منها أنه هايقول عليها يا سلام هذا هو الأخلاص بصحيح .. لكن العكس تماماً سوف يحدث فطبعاً سيقوم الأفندي خابطها قلم مخبرين ورامي عليها اليمين وباعتها فى اول قطر على بيت اهلها .... مع ان البنت ممكن تكون مخلصة له جداً ولم تعد تتذكر هذه الأيام على الأطلاق ..

إن العبث في بعض ذكريات الماضي لا يؤدي إلا إلى الخراب فقط .

[بنت شعنونة]

خاصة انها لو تزوجت و علم زوجها بالامر بعد هذا قد لا يغفر لها و يعيش دور اللى انضحك عليه ويطلعه عليها ازواجا و افرادا طيب ليه !! ما تصارحه من الاول واذا كان يعجب ماشى مايعجبش يبقى كل واحد يروح فى طريقه ويادار ما دخلك شر وليغن الله كلا من سعته .. 

يا فيروز صدقيني انا بتكلم من منطق واحد لو اختي في الموقف دا

وعمالة افكر معاكم بصوت عالي

يعني فرضا جالها عريس وقلناله الحقيقة وطفش

وبعده وبعده

اسيبها تعنس عشان "كللللللللللللللللمة"!!!!!!!!!!!!

ما برضة في حاجا اسمها يا سي السيد

خاطبوا الناس على قدر عقوووووووووولهم

يعني خد كل واحد على قد عقلة

يعني انا لو شايف المخلوق اللي جاي دا ممكن يتفهم الوضع ونعدي الازمة

اقوله مافيش مشاكل

انما لو لقيته مش ها يشتوعبها دلوقتتتتتتتي خااااااااالص

واحتمالية معرفته بيها ضعيفة نوعا ما طب اتكلم لييييييييه!!!!!!!

والا ايييييييه؟؟؟؟؟

[Farah]

يعني انا لو شايف المخلوق اللي جاي دا ممكن يتفهم الوضع ونعدي الازمة

اقوله مافيش مشاكل

ماهو لو مش حايفهم ويقدر يبقي قلته احسن دي عشره مش قاعده وتعدي

ما بني علي باطل فهو باطل من حق الزوج ان يعرف

وبعدين كل شئ نصيب .. هو حصل ايه والله مجتمعنا ده يجنن لا ده نافع ولا ده نافع ...يبقي الواحد مايخفش ويكون صريح بدلا ميمسك حد عليه زله..

[فــيــروز]

تمام يا فرح هو ده بالظبط اللى كنت ناويه اقوله اما اروح البيت

احنا ليه بننسى ان الزواج قسمه و نصيب كما يقولون واننا مهما بذلنا من جهد فى النهايه لن ننال الا ما كتبه الله .. يبقى اذا لا قد الله ماحصلش نصيب فى الموضوع نبقى نهيناه بكرامتنا ومن غير ما حد يقول اننا غشاشين او كذابين او اخفينا حقائق كان من حقه يعرفها .. واذا ربنا اراد و الموضوع تم على خير تبقى البنت فازت بسعاده تستحقها مع انسان يحترم صراحتها و امانتها معه ..

انا مش عاوزه افضل ادى امثله و اقول لك يعنى لو اخوكى تعرض لهذا الموقف مع زوجته او ان اقول لو اختى تعرضت لهذا الموقف لانى انا شخصيا لو تعرضت لهذا الموقف طبعا لازم اصارح الطرف الآخر به قبل قبل واذا لم يقبل خلاص ..

[impossible]

هم يضحك وهم يبكى

من كام سنة عمى كان فى السعودية وحب يخطب

خطب واحدة بابها فى السعودية بس البنت فى مصر نزل مصر اتعرف عليها

بس عمى محضرش الخطوبة

قال لبابا يعمل خطوبة ويبلبس البنت الدبلة

اخويا هو اللى لبسها الدبلة

وبعدين عمى نزل كتب الكتاب وبعدين سافر

وبعدين عمل لبابا توكيل عشان يطلقهاااااااا

[Lighthouse]

هم يضحك وهم يبكى

من كام سنة عمى كان فى السعودية وحب يخطب

خطب واحدة بابها فى السعودية بس البنت فى مصر نزل مصر اتعرف عليها

بس عمى محضرش الخطوبة

قال لبابا يعمل خطوبة ويبلبس البنت الدبلة

اخويا هو اللى لبسها الدبلة 

وبعدين عمى نزل كتب الكتاب وبعدين سافر

وبعدين عمل لبابا توكيل عشان يطلقهاااااااا

ايه ده

[impossible]

ايه ده

دة فلم عربى بس مترجم هندى بس بعد الدبلجة المكسيكية بقى دمة تقيل خصوصا استخدام اللهجة الاسبانية فى اللغة الايطالية

[kokowawa1979]

فيروز كتبت :

اعتقد ان اخفاء امر الزواج السابق له مضار اكثر بكثير من اعلانه

طبعا دي حاجة مابتستخباش ياأخت فيروز لسبب بسيط لأنه في جميع الأحوال العريس هايعرف إذا كانت من يرغب في الزواج بها تزوجت من قبل أم لا وذلك عند كتب الكتاب لأن المأذون بيدون في قسيمة الزواج حالة العروس فقد يكتب بكر مطلقة على أساس أنه لم يدخل بها وقد يكتب أرملة فلان قبل الدخول على أساس أن فلان توفي قبل الدخول وقد يكتب مطلقة بعد الدخول

وأنا في رايي أن البنت لايعيبها أنها مطلقة بل صارت الآن تتم جوازات كثيرة للمطلقات قد تفوق الأبكار حاليا .

وصدقوني لم تعد النظرة للمطلقة كما كانت في الماضي فضغوط الحياه حاليا تجعل الكثير من الأزواج في غاية العصبية وتكون كلمة الطلاق سهلة بالنسبة له في ظل عصبيته فهل يمكن أن نلوم المراة في ذلك ؟؟

الكثير مكن الرجال لامؤاخذة عينيهم زايغة وقد يسيل لعابهم على فتاة ساقطة في سن أبنائهم فيبدأ في اختراع التلاكيك لدفع زوجته إلى طلب الطلاق وقد تكون في غاية العقل وتقول أنها نزوة وسوف تمر لكنه يبدا في التنكيل بها لكي يجبرها على طلب الطلاق أو الخلع حتى لايدفع أية نفقات فكيف تكون النظرة إلى هذه السيدة

سيدة أخرى أراد زوجها أن يقدمها لأصدقائه على موائد القمار فتتعار ك معه وتطلب الطلاق فكيف تكون النظرة إليها؟

البعض يشعرني أن السيدة المطلقة ينظر إليها على أنها سمعتها سيئة وهذا غير صحيح لأن الرجل مهما كان باستثناء الديوث يرفض الزواج من البنت أو السيدة سيئة السمعة أي أن سوء السمعة يكون قبل الزواج وليس بعد الزواج !!!!

صدقوني 90 % من المطلقات مظلومات في وقتنا الراهن !!!

طبعا كلامي قد لايعجب بعض الرجال ؟؟