بحبك وعاوزة أتجوزك

[icehearted girl]

السلام عليكم أهالي المنتدي الكرام :blush2:

ياه بقالي 24 ساعة بحالهم منزلتش أي مواضيع :roseop: بس من غير حدف طوب بس

خدتوا بالكم من العنوان؟؟؟... تفتكر لاي مدي الجملة دي منطقية ومقبولة في مجتمعنا؟؟؟

ياتري لو انت رجل وجت بنت قالتلك كدا هيكون اي رد فعلك؟؟؟

وهل هيختلف رد فعلك باختلاف الشخصية دي؟

ولو انتي بنت :blush2: ..هل ممكن تروحي تطلبي شخص للزواج لو لقيتي فيه كل الصفات اللي بتتمنيها؟؟

وعلي اي مقياس هتختاري؟؟

وياتري هتتحملي الموضوع دا لوحدك ولا ممكن توسطي حد؟؟ :ninja:

[tarek hassan]

«قالت إحداهما يا أبت استأجره إن خير من استأجرت القوي الأمين قال اني اريد ان انكحك احدى ابنتي هاتين على ان تاجرني ثماني حجج....... »

ليس عندي مانع أن تختار المرأة لنفسها من هو كفؤ لها

وأن يختار وليها لها كذلك والمثل بيقول اخطب لبنتك ومتخطبش لابنك

بس لو أحسنت الاختيار واختارت صاحب الدين فلن تواجه موقفا محرجا

والله أعلم

تحياتي وشكرا

تم تعديل 16 مارس 2009 بواسطة tarek hassan

[icehearted girl]

هو حضرتك جبت المفيد ودي قاعدة تقريبا المعظظم عارفها

بس هل حضرتك شايف ان في الوقت دا بنت تتصف باخلاق هاتين الفتاتين؟

حضرتك شخصصيا ممكن تثق في اختيار بنتك لشخص ما بارادتها فقط وان تبادر اليه

وبعدين دي والدها اتوسط في الموضوع ودا ممكن

انما لو هي راحت خطبته لنفسها كننا هنشفها بنفس الطريقة؟؟؟

[tarek hassan]

هو حضرتك جبت المفيد ودي قاعدة تقريبا المعظظم عارفها

بس هل حضرتك شايف ان في الوقت دا بنت تتصف باخلاق هاتين الفتاتين؟

حضرتك شخصصيا ممكن تثق في اختيار بنتك لشخص ما بارادتها فقط وان تبادر اليه

وبعدين دي والدها اتوسط في الموضوع ودا ممكن

انما لو هي راحت خطبته لنفسها كننا هنشفها بنفس الطريقة؟؟؟

أنا شايف إن القاعدة العامة العفاف

وطلب الزواج طلب العفاف

أما نظرة الناس التي تسوغ أشياء كثيرة ليست شرعية وتحرم أشياء مباحة

المشكلة في ثقافة الناس

وفي سوء الظن في جانب المرأة

أظن أن السيدة خديجة هي التي خطبت الرسول صلى الله عليه وسلم

ولم يكن هناك شيء في ذلك

وتقولين والدها توسط

طيب فعلا في مسائل الزواج عامة لا تزوج المرأة نفسها مباشرة

الرجل يحتاج لمن يتحدث عنه وتحتاج المرأة كذلك

أب أو غيره

حتى زوجتي الآن تقول لي

لابد وأن تعزز المرأة نفسها

وحتى لا يعايرها الرجل فيما بعد

وبعض الناس لا يقدرون المرأة التي تقول لهم ذلك ربما ظلما

وكل بيئة تبع العرف السائد فيها

أما قولك من الآن في أخلاق الفتاتين فلو كانت الفتيات أقل منهما فهن أحوج لطلب العفاف

والله أعلم

تم تعديل 16 مارس 2009 بواسطة tarek hassan

[icehearted girl]

حضرتك اديت مثال بالسيدة خديجة أم المؤمنين

ودي مش هلاقيها في بناتنا حاليا

كمان هي لما طلبت الزواج من شخص

كان سيدنا محمد صلي الهل عليه وسلم اشرف الخلق

يعني مستحيل كان هيفهمها غلط

هي احسنت الاختيار فعلا

بس معايير الاختيار بتختلف يفندم

بناء عليا يه واحدة دلوقتي تقدم علي خطوة زي كدا؟؟

[SoSo R]

انتى عارفة إن السؤال دة أعدت فترة كبيرة من حياتى محتارة فيه؟

لو البنت أحبت شخص فى المحيط اللى حواليها ممكن تعمل إيه؟

و كنا أنا و صديقاتى بنتناقش فى الموضوع دة كتير و خصوصا فى مرحلة الكلية اللى هى باعتبرها بداية النضج العاطفى و نهاية المراهقة...

كان دايما رأيى مخالف لرأيهم

أنا كنت باقول حاسة بحاجة قوليها ..عبرى عنها

أنا فى وجهة نظرى

ليه الولد لو حب بنت عادى إنه يقول و يبادر لكن البنت لو حتى فكرت يبقى عييييييييييييب

طبعا كدة أنا مجنونة و فاسقة فى نظر ناس كتير

وكان الناس المتفتحين شوية يأولولك هى بس تلمحله وهو يكمل يعنى بردة الموضوع من أوله لآخره يأوم بيه الراجل

يعنى لو الواحدة بتحب واحد زميلها و بتتأطع من الحب المفروض إنها تكتم و ما تطلعش نفس

و دة سببه الثقافة المتخلفة إنها لو صرحت بحبها تبأى سافلة و ليها تجارب و زى ما أعترفتله بحبها كان فيه لستة قبله و كلام من هذا القبيل ونظام

الأفلام العربى

غير كدة لو هو ما بيبادلهاش نفس الشعور إيه الأحتمالات اللى ممكن تحصلها:

لو هو محترم هيتجنبها لحد ما الناس تاخد بالها إن فيه حاجة مش طبيعية

لو مش محترم هيقول لكل المجموعة المحيطة و يفضحها و يسوأ سمعتها

لو سافل بأى هيجاريها و يمشى شوية يسلى نفسه لحد ما يزهق

و هكذا يفكر مجتمعنا للأسف الشديد جدا

تحياتى

سوسورانى

تم تعديل 16 مارس 2009 بواسطة SoSoRaNy

[icehearted girl]

منورة يا سوسو

انا معاكي انها انانية ان الولد يكون له حق الاختيار في اي بنت تعجبه للزواج منها

والبنت مش من حقها دا

وتبقي مش كويسة و...و.......و لو طلبت دا منه بنفسها

انما الي مش معاكي فيه

هي ان البنت تقدم انها تعبر عن مشاعرها لشخص ما

لان اساسا لو الرجل اللي عمل كدا

دا غلط

طالما مش في اطار شرعي

يبقي البنت بالمثل

[ذهبية]

و الله يا ايس هارت اعتقد ان صعب جدا ان البنت تحط نفسها فى الوضع دة لان البنت اول صفة تتصف فيها الحياء

تفتكرى لو البنت عملت كدة و كان الرد الرفض هيكون وضعها اية حتى لو محدش عرف بينها و بين نفسها

هيكون احساسها اية

طيب لو وافق تفتكرى مش هيجى يوم و اول خناقة بينهم يقولها متنيسش انك جريتى ورايا بالمشوار علشان

اوافق اتجوزك

صعب قوى البنت تحط نفسها فى الوضع دة حتى لو بتموت فية

دة حتى بالبلدى يقولك اية لما يجى عريس لبنتك خلية يدفع عليها علشان يحس انة تعب و اللى يتعب اكيد هيحافظ على تعبة لكن لو جت لة الحاجة سهلة هتروح سهلة زى ما بقولوا

easy come easy go

يعنى انا احب الراجل هو اللى يشترينى و يتمنانى و اللى بيتعب فى اى شىء فى الدنيا صعب قوى يتنازل عنة بسهولة

[SoSo R]

للأسف هو دة التفكير اللى مودينا فى داهية

البنت عندها حياء

الولد هيعايرها بحبها

لازم يدفع و يصرف و يكع دم قلبه عشان يحس بالجوهرة اللى معاه

كلها أفكار ستى

أمت هنغيرها

لما الراجل يبص لمراته و يحس إنها السبب فى زنأته المادية الحالية

وياكلوا عيش حاف

هيفضل يحبها ولا هيبأى طايقها أو طايق أهلها؟؟؟

متهيألى إننا لازم نفكر بتفتح أكتر من كدة

تحياتى

سوسورانى

[SoSo R]

منورة يا سوسو

انا معاكي انها انانية ان الولد يكون له حق الاختيار في اي بنت تعجبه للزواج منها

والبنت مش من حقها دا

وتبقي مش كويسة و...و.......و لو طلبت دا منه بنفسها

انما الي مش معاكي فيه

هي ان البنت تقدم انها تعبر عن مشاعرها لشخص ما

لان اساسا لو الرجل اللي عمل كدا

دا غلط

طالما مش في اطار شرعي

يبقي البنت بالمثل

هو ليه التعبير عن المشاعر خطية

ليه كلنا إتربينا إننا نكبت اللى جوانا

لما تحبى حد أوليله ولما برضه تكرهى حد أوليله مش لآزم نلبس ميت قناع و قناع

الحياة كلها وشوش ومسوخ ليه ما نبأش صرحاء مع نفسنا و مع الناس اللى حوالينا

الراجل اللى عمل كدة بتأو لى غلط؟؟؟؟

ليه غلط...بس عشان ما فيش حاجة شرعية

ما هو هيفاتحها فى إيه؟؟

فإنه بيحبها أو معجب بيها و عاوز يتنيل على عينه و يرتبط بيها

لو هو ناوى يتسلى يبأى الغلط فى شخصيته مش فى فكرة الأعتراف بالحب

تحياتى

سوسورانى

تم تعديل 16 مارس 2009 بواسطة SoSoRaNy

[ذهبية]

للأسف هو دة التفكير اللى مودينا فى داهية

البنت عندها حياء

الولد هيعايرها بحبها

لازم يدفع و يصرف و يكع دم قلبه عشان يحس بالجوهرة اللى معاه

كلها أفكار ستى

أمت هنغيرها

لما الراجل يبص لمراته و يحس إنها السبب فى زنأته المادية الحالية

وياكلوا عيش حاف

هيفضل يحبها ولا هيبأى طايقها أو طايق أهلها؟؟؟

متهيألى إننا لازم نفكر بتفتح أكتر من كدة

تحياتى

من امتى اصبح الحياء من الصفات القديمة من افكار ستى و ستك و لازم نبدلها و لازم نغيرها علشان نتقدم

من امتى الحياء هيودينا فى داهية اعتقد ان العكس هو اللى هيودينا فى داهية لما المعايير تتبدل و يبقى الصح غلط و الغط صح اعتقد ان دة اللى هيودينا فى داهية

اعتقد يا سوسو ان اجمل ما تتزين بة النساء هو الحياء

ام موضوع انة يدفع دم قلبة دة لا بمزاجى و لا مزاجك دة ما نص علية الاسلام ان الرجل كفيل بيتة

بسم الله الرحمن الرحيمالرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ النساء/34

الرجل ملزم نصا و شرعا ان بالانفاق و الكسوة و المسكن و من هنا ياتى حق القوامة

و الراجل اللى هيضايق لما يصرف على مراتة و يتعب و يجيب فى بيتة و يبقى مش طايق مراتة و لا اهلها اسفة ميبقاش راجل من وجهة نظرى

[icehearted girl]

ومين قال ان دا كبت يا سوسو؟؟

بالعكس

دا تهذيب للنفس

لو كل واحد مشي حب واحدة راح قالها

وكل بنت أعجبت بولد راحت قالتله هتبقي هيصة

وبدون اي ظوابط

انما لو كل واحد قدر يهذب مشاعره

ويحوشها فعلا للانسان او الانسانة اللي هيرتبط او ترتبط بيه

هيحس بقيم الحب دا

الحب الحلال

انتي بتقولي ان الراجل لو عمل كدا مش هيبقي غلط

او عالاقل المجتمع مش هيغلطه

بس المجتمع دا حاجة عابره بيختلف من مكان لمكان

والدين هو اللي باقي

انا احكم بحلال وحرام

مش يصح وميصحش يا سوسو

سيدنا محمد نفسه صلي الله لعيه وسلم أمر من لا يستطيع الباءة بالصيام

والصيام هنا مقصود به الصيام عن الشهوات

حفاظا علي نفسه

اصل هي دائرة مفرغة

طالما حد مسك طرفها وانغمس في الطريق دا مش هيخرج منها الا لما يبقي كله غلط في غلط

بس حقيقي سعيدة بكلامك يا سوسو :)

[الباشمهندس ياسر]

لما الراجل يبص لمراته و يحس إنها السبب فى زنأته المادية الحالية

وياكلوا عيش حاف

هيفضل يحبها ولا هيبأى طايقها أو طايق أهلها؟؟؟

متهيألى إننا لازم نفكر بتفتح أكتر من كدة

تحياتى

سوسورانى

الجملتين دول بقى داخلين دماغى اوى اوى

مرة كان مترشحلى عروسة ( جواز صالونات ) و بعدين

قاعدين بنتفق انا و ووالدها

و الراجل طلب شقة ب 600 الف ... طب منين؟؟؟

المهم اعتذرت والموضوع انتهى

انما حسيت ان الراجل بيطالبنى ابدأ من حيث انتهى هو

يعنى ابو 27 سنة مطالب انه يحصل مجموع ما حصله ابو 60 سنة و عجبى

و هبقى ارجع بعد شوية اتخانق معاكو ع الموضوع نفسه

يوووووووووووه قصدى اتناقش

[محمود الاسكندرانى]

انا اب وعندى بنتان غيرت شويه السوأل وافترضت ان بنتى كبرت وجت تقولى انا بحب شاب وعايزه اتجوزه :يا ترى ردى عليها حيكون ايه؟

هل حزعل منها واعنفها ويمكن يكون رد فعلى اقوى من التعنيف ؟

او حتجاوب معها وابدأ اسألها عن اخلاقه وعمله ومؤهله ومدى جديته فى الارتباط بمعنى قدرته الماديه على تحمل نفقات الزواج ؟

لا اخفى عليكم سرا اذا قلت انى اخذت وقت طويل فى التفكير فى الاجابه ولكنى اميل الى الجواب الثانى مع التمنى ان لا يحدث هذا

ويأتى لى شاب ممتاز من كل الوجوه ويقول لى يا عمى : عجبانى اخلا ق بنتك واتمنى ان توافق على زواجى منها

تم تعديل 20 مارس 2009 بواسطة Advisor

[ابو محمود]

للأسف هو دة التفكير اللى مودينا فى داهية

البنت عندها حياء

الولد هيعايرها بحبها

لازم يدفع و يصرف و يكع دم قلبه عشان يحس بالجوهرة اللى معاه

كلها أفكار ستى

أمت هنغيرها

لما الراجل يبص لمراته و يحس إنها السبب فى زنأته المادية الحالية

وياكلوا عيش حاف

هيفضل يحبها ولا هيبأى طايقها أو طايق أهلها؟؟؟

متهيألى إننا لازم نفكر بتفتح أكتر من كدة

تحياتى

سوسورانى

وانا كمان عندى فكرة لية البنت ما تطلبش الزواج من الشخص اللى تحبة وممكن نبقى زى اوروبا اقصد الناس اللى تخلصو من عقدة ستهم ويتجوزو بعدما يتم العلاقة بينهم وينجبو وبعدين يقررو يجوزو دى بقى الحرية والتقدم والحضارة

الحضارة الاوربية اليوم وغذآ يحاولون التخلص من كثير من الانفتاح اللا اخلاقى كالعلاقات الشاذة والتعارف بين الشباب من الجنسين فى صورة بوي فريند واختلاط الاعراق بالزنا

فمن حسن حظنا نحن سكان المنطقة التى تسمى ارض الشرق التى يحب اهلها الان التخلص من العفة والحياة الكريمة التى اعطت المرأة كل حظوظها فى انها مكرمة عن الرجل بأ ن حباها اللة بكرمة فجعلها بكرآ كما يوصفها يوم الدين بأن يجعل المرآة الصالحة شباب دائم وبكر ونحن او بعضنا يريد ان نكون متفتحين ولنا حرية

ومن الشيء الملفت للنظر ان البنت فى اى قطر عربى من حقها ان تختار زوجها لكن ليس الا بعد ان يتقدم اليها

ويمكن ان ترفض ما تشاء وجميعنا كرجال لنا تجارب فى كثير من المشاهدات

ومن الملفت ايضآ ان ننكر ان الزواج رزق يرزق اللة الرجل بزوجتة فأن كانت المرآة لا تريد الرجل فعليها او لها اختيارين اما ان تصبر او تطلب الطلاق وهذا كفلة الشرع الذى انزل من السماء

اما ان صبرت واحتسبت فكتبت من الصابرين وهذا جذاء درجتة رفيعة يو م الدين لن يتحصل علية الا من فهم قصدة

اما ان نحاول ان نضع المرأة التى كرمها اللة بأن انشأها بكرآ ومن اهم مايمزيها ايضآ الحياء والعفة فهذا ليس من ثقافة المجتمع العربى

ومن تجاربى عن الزواج لاحظت الاتى لم ارى فى حياتى زيجة بنيت على الاتى نجحت

الحب اول ما ينتج عنة الطلاق بعد الزواج لان الحب قبل الزواج يكون مخادع وليس كاشف عن طباع المتحابين والتجربة من بين شفاة المطلقين ممن كانت لهم علاقة وهم بكرآ

التعلق بما يكون فى الرجل من ثراء او عنفوان او جاذبية او طريقة حياة سريعآ او ليست مضمونة الثبات لانها من رزق اللة كالمال والصحة والانجاب وخلافة من فضل اللة على الرجل فكثيرآ من التغيرات تحدث لعدم ادراك من يختار ان اللة يرزق فلا يجب ان نحاول ان نختار لانفسنا الا من خلال الطرق الشرعية فى الاختيار وتبدأ فى الرجل

بأن يكون ذى خلق ومن اصل ولة دين ومن ثم يأتى المال وخلافة فأن كانت البنت ذى دين وحياء فلتترك رزقها للة وتجعل اختيارها شريك الرحلة القصيرة (الدنيا) لة صلاحيات ان يساعدها الى اكمال المشوار بأمان وعدم خسارة الرحلة بما يغضب اللة

ومن هنا تأكدى ان كل بنت سيختار لها اللة رزقها وما اعظم ان نترك للة الاختيار ونرمى حمولنا علية فلو جعل الانسان نفسة عبدآ ربانيآ لرزقة اللة نعمة الدنيا والاخرة

اتمنى التوفيق لكل بنت على سن الأختيار لزوج ان توفق فى ان تجعل اللة يختار لها رفيق الرحلة وليس رفيق الدنيا ولهوها الفانى فالرحلة قصيرة مهما طالت فمن اغتنم الفرصة كسب النعيم الأبدى الذى يصفة اللة لنا بانة نعيم لم تشاهدة العين او يخطر على بال ايآ من البشر ....

ويكرم اللة الأنثى بأن جعلها سيدة على بنات الحور وزوجها بزوج خيرآ من زوجها حين ترزق بزوج فى الدنيا يتعبها ويكون من اهل النار اليس التكريم واضح ويحتاج الى مراجعة للشباب من الجنسين كيفية الحياة الكريمة حتى يتحصلو الغنيمة او المكافأة التى اعدت للمتقين

... من يتق اللة يجعل لة مخرجا....

[الترجمـان]

بالنسبه للشق الخشن من الموضوع

ياتري لو انت رجل وجت بنت قالتلك كدا هيكون اي رد فعلك؟؟؟

وهل هيختلف رد فعلك باختلاف الشخصية دي؟

لو اعرفها كويس وجت سألتني السؤال ده ممكن أطلبلها واحد عصير لمون و أدوّر في جيوبي على قرص مهدئ ادهولها ولو معايا ساعه ممكن أبتدي أقيس النبض على ما الحباية تعمل مفعولها ... :)

أما لو صرخت في وشي واصرت على موقفها .. فبتهيألي ساعتها ممكن أرتبك شويه وابتدي ابص لروحي كدا بنظرة شك واسأل نفسي يا ربي هو انا في حاجه فيه غلط خلاها تقولي الكلام داه ..ياترى دي الكاميرا الخفية وانا مش واخد بالي :ninja: او حد من العيال الزومباكولو عامل المقلب داه :happy:

المهم :lol: ...

إن جينا للجد فبيتهيألي صعب الموضوع داه يحصل من أي بنت يا أخت icehearted girl ...

وحتى لو كان نيتها سليمه فهي بكدا بتعرض نفسها لمخاطر جسيمه ومما لا شك فيه أن موقفها هيتفهم غلط ..

أما بالنسبه للشق الناعم من الموضوع ..

فبتفق مع كلام أختنا ذهبية

و الله يا ايس هارت اعتقد ان صعب جدا ان البنت تحط نفسها فى الوضع دة لان البنت اول صفة تتصف فيها الحياء

تفتكرى لو البنت عملت كدة و كان الرد الرفض هيكون وضعها اية حتى لو محدش عرف بينها و بين نفسها

هيكون احساسها اية

طيب لو وافق تفتكرى مش هيجى يوم و اول خناقة بينهم يقولها متنيسش انك جريتى ورايا بالمشوار علشان

اوافق اتجوزك

صعب قوى البنت تحط نفسها فى الوضع دة حتى لو بتموت فية

دة حتى بالبلدى يقولك اية لما يجى عريس لبنتك خلية يدفع عليها علشان يحس انة تعب و اللى يتعب اكيد هيحافظ على تعبة لكن لو جت لة الحاجة سهلة هتروح سهلة زى ما بقولوا

easy come easy go

يعنى انا احب الراجل هو اللى يشترينى و يتمنانى و اللى بيتعب فى اى شىء فى الدنيا صعب قوى يتنازل عنة بسهولة

بس علشان خاطر الشباب بلاش موضوع يدفع دي ...

حاسس إن الـ "Tone" بتاعها خرم ودني ربنا يكرمك ويكرم الجميع ... :happy:

تم تعديل 17 مارس 2009 بواسطة الترجمـان

[newcomer]

خدتوا بالكم من العنوان؟؟؟... تفتكر لاي مدي الجملة دي منطقية ومقبولة في مجتمعنا؟؟؟

الأول حابه ارحب بيكى....و اقولك منورة....

يعنى الجملة اللى فى العنوان ......بالطريقة دى...

اكيد ...اكيد ....مش هاتبقى مقبولة فى مجتمعنا

بس .... المؤمن كيس فطن

يعنى ممكن يكون فيه حل وسط

حل بين العرف و التقاليد اللى فى مجتمعنا

و فى نفس الوقت بين حرية الأختيار

يعنى اكيد هايكون فيه حد ....بيلعب دور الوسيط

حد من الأهل....الصحاب....الجيران....الزملاء

دايما فى عندنا كلنا كمصريين النزعة دى لتوفيق راسين فى الحلال

بحيث ان لو العريس ده ....مش فى دماغة العروسة دى

او مش حاسس بقبول من ناحيتها( و طبعا ده وارد....حقه !!)

ما يبقاش الموقف محرج ليها و لأنوثتها.....

و فى نفس الوقت ...لو طلع راجل مش محترم

مش هايقدر يقول اى كلام بايخ عليها....

اه...بالمناسبه

بالنسبه لقصة السيدة الرائعة خديجة رضى الله عنها

و جوازها من سيدنا محمد ( عليه الصلاة و السلام)

فهي ما خطبتهوش او طلبت الجواز منه بشكل مباشر

فيه واحده ....صديقتها يمكن او قريبتها

هيه اللى عرضت موضوع الجواز على الرسول عليه الصلاة و السلام

و بشكل ديبلوماسى كمان......

مفيش تحت ايدى لينك لموقع او حاجة دلوقتى تؤيد اللى بحكيه ....

بس انا متأكده من الأحداث دى

و ان شاء الله حد من الأفاضل المتعمقين فى السيرة.....يفيد اكتر منى

تم تعديل 17 مارس 2009 بواسطة newcomer

[pink rose]

زواج النبي صلى الله عليه و سلم بالسيدة خديجة رضي الله عنها و ارضاها

وفي الخامسة والعشرين من سنه صلى الله عليه و سلم خرج تاجرًا إلى الشام في مال خديجة رضي الله عنها قال ابن إسحاق‏:‏ كانت خديجة بنت خويلد امرأة تاجرة ذات شرف ومال، تستأجر الرجال في مالها، وتضاربهم إياه بشيء تجعله لهم، وكانت قريش قومًا تجارًا، فلما بلغها عن رسول الله صلى الله عليه وسلم ما بلغها من صدق حديثه، وعظم أمانته وكرم أخلاقه بعثت إليه، فعرضت عليه أن يخرج في مال لها إلى الشام تاجرًا، وتعطيه أفضل ما كانت تعطى غيره من التجار، مع غلام لها يقال له‏:‏ ميسرة، فقبله رسول الله صلى الله عليه وسلم منها، وخرج في مالها ذلك، وخرج معه غلامها ميسرة حتى قدم الشام‏.‏

ولما رجع إلى مكة، ورأت خديجة في مالها من الأمانة والبركة ما لم تر قبل هذا، وأخبرها غلامها ميسرة بما رأي فيه صلى الله عليه وسلم من خلال عذبة، وشمائل كريمة، وفكر راجح، ومنطق صادق، ونهج أمين، وجدت ضالتها المنشودة ـ وكان السادات والرؤساء يحرصون على زواجها فتأبي عليهم ذلك ـ فتحدثت بما في نفسها إلى صديقتها نفيسة بنت منبه، وهذه ذهبت إليه صلى الله عليه وسلم تفاتحه أن يتزوج خديجة، فرضى بذلك، وكلم أعمامه، فذهبوا إلى عم خديجة وخطبوها إليه، وعلى إثر ذلك تم الزواج، وحضر العقد بنو هاشم ورؤساء مضر، وذلك بعد رجوعه من الشام بشهرين، وأصدقها عشرين بَكْرة‏.‏ وكانت سنها إذ ذاك أربعين سنة، وكانت يومئذ أفضل نساء قومها نسبًا وثروة وعقلًا، وهي أول امرأة تزوجها رسول الله صلى الله عليه وسلم، ولم يتزوج عليها غيرها حتى ماتت‏.‏

تم تعديل 17 مارس 2009 بواسطة remo

[moheltohamy]

مبدئياً يا سوسوراني... المنتدى ده منتدى محترم ، وطاهر وهيفضل طول عمره طاهر! واحنا ما عندناش بنات تقول الكلام ده لرجّالتنا!

على ما يبدو حضرتك فاكرة نفسك عايشة في كندا بلد الفسق والفجور ، والنساء العرايا في كل مكان! دول ماشيين بلبوص في الشوارع يا شيخة!

وهناك البنت هيّه اللي بتختار البوي فريند بتاعها ، وتاخده على بيتها ، والأب لو نطق أو كشر في وش المفعوص ، هيسحبوه ع القسم ، ويسحلوه هناك!

عاجبك المجتمع الفاسق البايظ ده؟!

المفروض تحمدي ربنا إنك عايشة في مجتمعنا الشرقي الأوسطي ، حيث العفة والطهارة والشرف والقيم الأصيلة ، وليها مقياس فيزيكال موجود وبيتكشف عليه كمان!

ومنّه لله قاسم أمين وأمثاله ، اللي خرّجوا المرأة للدراسة وبعدها للعمل ، ومن بعدها والبلد فجرت! الست مالهاش غير بيتها تطبخ وتغسل وتحمّي العيال! وتستخبّى من عينين الرجّالة اللي بتتفحّص كل حتة في جسمها!

كان كفاية عليها الابتدائية وآهو تفك الخط وخلاص على كده! وليه أساساً فك الخط؟! مش هتحتاجه طول ما هيّه جوّه البيت!

وشكلك نسيتي أخلاقيّات بلادنا الأصيلة ، ومحتاجة حد يفكّرك بيها!

مفيش حاجة اسمها بحبَّك وعاوزة اتجوّزك أصلاً... فيه حاجة اسمها تبُص في الأرض ، و وشّها يحمر ، وتتلوّى من الكسوف وابوها بيسألها عن رأيها في العريس اللي أوّل مرة تشوفه في حياتها! طبعاً المفروض تفرح ، مش هتتجوّز؟!

مبدأ الجواز نفسه للبنت حاجة تفرح! دا طبعاً عشان هتلبس دهب بالهابوللي ، وتلبس فستان فرح ، وتؤعد ع الكوشة ، وتعيش في بيت يبقالها فيه رأي (بسيط) ، بعد ما كانت في بيت أبوها واحدة من ضمن الدستة اللي بتخسّأ الحاقدين (لمؤاخذة يا سهل جداً ياخويا)!

وطبعاً لازم العريس نعرّفه قيمتها ، عشان يحس بغلاوتها! معلش بأه ، نتنازل مؤقتاً عن مبدأ إن أقلّهن مهوراً أكثرهن بركة ، هيّه الواحدة بتفرح كام مرة في العُمر؟! والعريس لو مش عاجبه ؛ العرسان على أفا مين يشيل ، والمثل بيقول قعدة الخزانة ولا جوازة الندامة!

وكلّه لرفع أسهمها بعد الجواز طبعاً ، والغالي تمنه فيه ، واللي عاوز يشتري ، لازم يقدّر تمن البضاعة! والراجل اللي تعب وربّى وصرف على مدار سنين ، المفروض يكسب برضه! دا لو كان جاب شوالين بصل أو شكارتين رز وخزنهم المدة دي كلها كان كسب أكتر من المهر اللي المحروس بيدفعه! دول ما يجوش تمن البنزين!

وقالها الشاعر العربي الأصيل قبل كده :

تهون علينا في المعالي نفوسنا *** ومن خطب الحسناء لم يُغلها المهرُ

وطبعاً اللي بيشتري حاجة أصيلة لازم يستلم شهادة الجودة ، وطبعاً معيار الشرف والكرامة والجودة معروف ، وكل العيلة من كبيرها لصغيّرها بيستناه ، وبكده بس يطّمّن الأب والأم إنهم أدّوا رسالتهم في الحياة ، ويرفعوا راسهم وسط الناس والمجتمع!

ولو حصل وفرّطت ، تبقى مصيبة للجبيلة بحالها! وهيّه طبعاً بقت ملك جوزها اللي دفع فيها دم قلبه ، يبقى من حقه يقتلها ؛ وممكن يتنازل عن الشرف ده لابوها أو اخوها عشان راسهم تترفع بدل ما الترابيزياص توجعهم من كتر البص في الأرض من عملتها السودة!

الراجل طبعاً براحته... مالوش شهادة جودة... مش هوّه اللي بيشتري وبيدفع؟! يبقى بفلوسه لمؤاخذة! ومعلش يعني لو غلط قبل الجواز ، معلش برضه نعذره! لكن هيّه... البُندُجة موجودة ، والمنشنين موجودين وجاهزين ومن أقرب الناس ليها!

واللعبة ليها أصول وقواعد... الراجل هوّه اللي ياخد الخطوة الأولى... هوّه كده! هوّه الصيّاد وهيّه الفريسة! خلاف كده تبقى قليلة الأدب ، وناءصة رباية!

ما بنقولش حاجة ، لو عاوزة تحبه من بعيد أو من ورا المشربية هنسامح فيها! لكن تتكلّم ؛ نقطعهولها! وكلّه للحفاظ عليها وعلى سمعتها...

بالظبط زي ما بنختنها وهيّه صغيّرة عشان تطلع مؤدّبة ، وآهو كلّه من الدين! وكل الأجيال اللي فاتت اتعمل لهم كده وزي الفل آهوه ، ومش نائصهم أي حاجة ، والواحدة بتخلّف أورطة عيال!

وبخصوص السؤال... هل مقبول منها التصريح بمشاعرها ولاّ لأ...

مش لمّا نعترف لها بالأهلية الأول ، وبكمال العقل نبقى نفكّر في حقها بالتصريح بالمشاعر؟!

وتيجي تقوليلي تحب وتتنيّل؟! يا شيخة بلا كلام فارغ! :rolleyes:

نتكلّم جد بأه شويّة ، وبصراحة! خلاصة اللي عاوز اقوله:

الموضوع پاكيدچ على بعضه... ما ينفعش الست تاخد حاجة وتسيب التانية! لمّا يكون نظرة المجتمع ليها إنها سبب للفساد وللفتنة ، والمفروض نحبسها في البيت ، وأساس المشاكل خروجها من بيتها... وسيطرة الفكر الذكوري على المجتمع ، واللا مساواة في الحقوق والواجبات بين الجنسين... صعب جداً تقبُّل إنها تكون إيجابية في التعبير عن مشاعرها بالبساطة دي!

نقطة تانية برضه الإنصاف يستدعي ذكرها...

الموضوع يتعلّق في جانب منه بطبيعة الأنثى... يعني حتى فتيات الغرب تلاقي هناك البنت تفرح لمّا يجيلها توم كروز يطلب إنه يتعرّف بيها أو يبدي إعجابه بيها! طبعاً هيّه مش هتوصل لإنها تتقطّع وهتموت وييجي يكلّمها زي عندنا!

طبعاً أنا مش مُقتنع بنقطة إن ممكن تتصدم برفض الطرف الآخر ، وده ممكن يؤذي مشاعرها! يعني هوّه الراجل اللي تنح وجبلّة؟ مالوش مشاعر وأحاسيس لمّا يتقدّم لإظهار مشاعره للبنت وهيّه تكسفه؟! فين الإيكواليتي؟!

والموضوع كده ولاّ كده اختلافات فردية... يعني لمّا تكون البنت شايفة الواد اللي معجبة بيه دماغه صعيدي ، ونظرته ذكورية في الموضوع ده ، يبقى هتخسره لو خرجت عن قواعد اللعبة! أمّا لو كان رجل واخد الحياة ببساطة – زي العبد لله المؤمن بالإيكواليتي – مش هينقح عليه العرق الصعيدي إيّاه ، وهيسعده إن البنت تعبّر عن اهتمامها وإعجابها.

من حق الرجل التعبير عن عواطفه ، ومن حق المرأة التعبير عن عواطفها ، وأي طرف منهم له الحق في القبول أو الرفض ، وأي طرف منهم يسعده ويفرحه إحساسه بالإعجاب من الطرف الآخر! دي طبيعة إنسانية مالهاش دعوة بالجنس أو بالجنسية!

تم تعديل 17 مارس 2009 بواسطة moheltohamy

[icehearted girl]

بصراحة لما قرأت الجزء الاسود اللي فوق دا ضغطي علي وكنت ناوية ادب خناقة جمدة جمدة يعني :rolleyes:

بس لي عودة للتعليق علي الكلام اللي بجد