وسع وسع كشري المحلات وصل...

[doha]

قريت في موضوع حد بيسأل على طريقة كشري المحلات كنت هحطها رد بس قلت خليها موضوع مستقل افيد ..

للامانة الطريقة اخذتها عن الشيف اسامه في تلفزيون دبي هو مرة كان مستضيف معلم كشري وشرح بالتفصيل اسرار عمل الكشري في البيت عشان يطلع زي بتاع المحلات .. جربتها من فترة قريبة واول مرة في حياتي اعمل كشري ويطلع مظبوط بالطريقة دي بعد ماكنت خلاص فقدت الامل اني ممكن اعمل كشري زي الناس ..

المكونات هنحتاج بصل ورز وعدس اصفر وعدس بجبة ( بني او اسود معرفش غير المصريين بسموه ايه بس احنا بنسميه بجبه وهو النوع الثاني من العدس غير الاصفر ) ومكرونه وشعريه ..

الطريقة :

اول حاجه نقطع البصل جوانح ( شرائح طويلة ) بعدين نقليه في زيت كتيييييير .. يعني نخلي الزيت غزير شويه يحيث يغطي البصل ويفضل يكون زيت ذرة .. الزيت الي قلينا فيه البصل ده هو الزيت ده الي هنستخدمه بعد كده في طبخ الكشري عشان يبقى مشبع بطعم البصل ..

ملحوظه مهمه اوي عملتها ودي من اسرار المحلات وفرقت معايا كتير في الطعم فاضافة لاستخدم زيت البصل فالبصل نفسه بنغطيه الاول بدقيق قبل مانقليه خاصه لو لسه جديد يعني في اول موسمه لما بيبقى البصل مليان مية مش ناشف زي بصل آخر الموسم .. عن نفسي حطيته في كيس نايلون فيه شويه دقيق وهزيت الكيس كويس اوي لما كل قطعه بصل تغطت .. طبعا فككت البصل من بعضه بحيث ميبقاش كتل وانما شرائح رفيعه وغطيتها كلها بالدقيق بعدين قليت ..

طبعا بنترك البصل في الزيت لما ينقلي ويبقى بني غامق مش اسود .. الاسود ده يبقى انحرق .. البني الغامق او المائل للغامق هو ده المطلوب .. نطلعه على ورق نشاف او مصفاه زي ماتحبوا وبكده تكون التقلية جاهزه وانتهينا من اول خطوة ..

الخطوة الثانية بنجيب العدس ابو جبه ونغسله ونحطه في حله على النار مع ماء كافي للسلق وملعقة ولا اثنين من زيت التقلية .. ماء نظيف مش من الحنفية لان الماء ده هو نفسه هنستخدمه بعد كده في سلق الرز . شفتم الحرفنة ..

بعد مايستوي العدس كويس اوي ( طبعا اضفنا له شويه ملح صغيرين اثناء السلق عن نفسي اضفتهم في المرحلة ماقبل النهائيه معرفش ليه جالي احساس ان الملح ممكن يبطأ النضج في العدس زي مابيعمل في اللحمه .. يجوز ) بعد ماينضج تماما نرفعه من الحله وناخذ نفس المية الباقية ونجهز شويه رز مغسولين عليهم شويه عدس اصفر ومخلوطين على بعض نقلب الرز والعدس في ملعقتين زيت من بتوع البصل ونستمر في التقليب شويه عشان يطلع مفلفل ثم نضيف ماء سلق العدس .. طبعا نراعي الكميات يعني نحط كمية الماء مناسبة لكمية الرز بالظبط كأننا بنطبخ رز عادي ومنزودش عشان ميعجنش ..

في المرحلة دي لمن لا يتقن طبخ الرز خاصه المفلفل مفيش مانع بعد مايغلي نغطيه ونحط تحته صاجه او البتاعه الي بيحطوها عشان يستوي الرز تحت الحلة دي ..

وعلى فكره ممكن تسلق معاهم العدس ابو جبه برضه ثاني او تخليه لوحدده تحطه وقت الغرف بس .. عن نفسي حطيت العدس الاسود معاهم بعد ماانسلق بس المحلات مبتعملش كده كله بيبقى لوحده ..

اثناء نضج الرز اسلق شويه مكرونه ( صغيرييييين ) مع شويه زيت صغيرين وشويه ملح وبعد ماتستوي المكرونه كويس نغسلها بماء بارد بعدين نقلبها مع معلقتين زيت من اياهم .. عن نفسي محطيتش زيت على المكرونه بعد ماسلقتها واكتفيت بالزيت الي انسلقت فيه ..

برضه مفيش مانع نحمر ملعقتين تلاته شعريه في شويه زيت لغايه ماتبقى ذهبية بعدين نضيف لها شويه مية ونتفه ملح ونسيبها تستوي كام دقيقة تنفع مع الكشري برضه ..

نلاحظ اننا نستخدم كميات صغيره من كل مكون لان في النهايه هتطلع لنا حلة كبييييييييرة والكشري عامه لو بات مينفعش يتاكل فنحط مثلا كباية رز على نصف كبايه عدس اسود على نصف كباية عدس اصفر على نصف او ربع كوب مكرونه وهكذا ..

المكرونه المستخدمه طبعا هي الصغيره اوي والمحلات عامه بتحط منها وبتحط كمان اسباجيتي مقطعه قطع صغيره ..

نيجي لغرف العدس بقى ..

سهله اكيد الكل عارفها زي بتوع المحلات ..

ناخذ شويه رز بعدس .. نخبط المغرفة في الحله .. نحط عليهم شويه عدس اصفر .. نخبط خبطتين تاني .. نجيب شويه مكرونه وعليهم شويه شعريه واخيرا التقلية على الوجه .. ومفيش مانع ابدا من اضافة بعض الحمص الكبير ( حمص شامي ) مسلوق على الوجه بس بصراحه نسيت الحمص بيتعمل ازاي فمحطيتوش . .

الطريقة دي جهنمية وزي كشري المحلات بالظبط .. جربوها وادعوا لي ..

كنت هنسى طبعا لازم جنب الكشري سلطه وصلصة .. الصلصة بقى سهله جدا .. نجيب شويه سمنه ونقدحهم على النار .. ملعقتين تلاته صلصه ويفضل طماطم مضروبه في الخلاط كويس احسن .. نسيبهم يغلوا شويه مع ملعقة ولا اثنين خل . شويه ملح وفلفل وشطه وتبقى الصلصه جاهزه وبالهنا والشفا .. وعلى فكرة احيانا بحط على صلصة الكشري كتشب وبيمشي الحال ..

تم تعديل 16 مارس 2009 بواسطة doha

[fatfouta]

هجربها بكره واقولك عشان مكانش عندى فكرة اكل لبكره يعنى ماكنتش عارفة هعمل ايه :)

عارفة لو طلع وحش انتى حرة بقى

تسلم ايدك وشكراااااااااا

[سهل جدا]

قريت في موضوع حد بيسأل على طريقة كشري المحلات كنت هحطها رد بس قلت خليها موضوع مستقل افيد ..

أيوه , هو أنا اللي سألت عن طريقة عمل كشري المحلات

شكرا جدا على الموضوع

وهابعت نسخة منه حالا للمدام

بس هاغير عنوان الموضوع بصراحة وهاحطله عنوان روش شوية, وهاسميه:

الطرق اللولبية لعمل الكشري أبو تقلية

[بندق أفندى]

طريقة عمل الصلصة والدقة حسب مطاعم أبو طارق من داخل المطعم فى برنامج عباسيات

طريقة عمل الصلصة:

تغسل الطماطم ثم تعصر ونصفى.

نضعها على النار مع قليل من الزيت لمدة ربع ساعة.

طريقة عمل الطشة:

يوضع بعض الثوم المفروم في القليل من الزيت على النار لمدة نصف ساعة.

تضاف الطشة على الصلصة ثم يضاف المزيج من البهارات (الكمون، كزبرة نشفة، جوزة الطيب، فلفل أبيض وورق اللورى)

طريقة عمل الدقة:

ثوم مهروس + كزبرة فى خل أبيض.

تم تعديل 17 مارس 2009 بواسطة بندق أفندى

[مغتربة]

يوضع بعض الثوم المفروم في القليل من الزيت على النار لمدة نصف ساعة.

معليش يا استاذ بندق بس الحته دى انا مش فهماها انت متاكد من الوقت المكتوب ده

يعنى نحمر التوم نص ساعه ازاى

و لا مش تحمير

معليش استحملنى اصل انا مستجده فى الكشرى بصراحه

[doha]

جربي وعلى ضمانتي باذن الله هيطلع مظبوط ...

شكرا جزيلا شيف بندق على الصلصه فعلا بنحط فيها ثوم نسيته تماما معليش .. بنحمر الثوم الاول على نار هادية بس مش تحمير يصفر بس لان لو تحمر اوي هيبقى مر . والنار هادية طبعا عشان نضمن ان الثوم كله استوى بنسب متساوية مفيش حاجه انحرقت وحاجه لسه نية .. وبرضه تحمير الثوم ده مهم لان في ناس الثوم بيتعبها في الاكل فلو استوى كويس باذن الله بيكون خفيف على البطن ..

بعد ماحمرنا الثوم بنحط الصلصة ونسيبه يغلي ومننساش الخل وطبعا بنترك الصلصة على نار متوسطه او هادية لغايه ماتتسبك وتثقل ..

بس طريقتك في اننا نعمل الصلصة الاول بعدين نطش عليها الثوم اعتقد هي الطريقة الاظبط خاصة ودي نفسها تقريبا طريقة الفته بالخل والثوم ..

يلله حد جرب يقولنا طلعت معاه ايه؟

[se_ Elsyed]

بعون الله عندي المدام في الكشري ده لا تقولي أبو طارق ولا أم سلحول ..

والله محترفة بجد ..

بس اللي مابحبوش في الكشري هو إني بأجوع بعد ما أكل بساعة بالظبط ... مش عارف ليه ؟

[Virus]

بس اللي مابحبوش في الكشري هو إني بأجوع بعد ما أكل بساعة بالظبط ... مش عارف ليه ؟

وأنا كمان يا أخي..الحمد لله أنا كنت فاكر إن عندي حالة طفاسة متقدمة :ph34r:

بس دي ميزة في الكشري ياراجل مش عيب أبدا..

وللتغلب على هذه المعضلة..الحاجة بتاعتنا(مامي :blink: ) بتعمل حلة كشري عملاقة مقاس 5*5 ..وتسيبها متغطية على البوتاجاز وجنبها الدقة...اللي يهضم يخش على المطبخ علطول يفول تاني (زي الري- فل بتاع المطاعم الأمريكاني كده)..م الآخر حفلة كشري معتبرة

طبعا غني عن الذكر إن كشري الحاجة -ربنا يديها الصحة- لا ينافس على الإطلاق..ولا أبو طارق ولا السيدة سينة سينة بذات نفسها :rolleyes:

[وردوفل]

الحقيقة دى الطريقة الاسكندرانى ---وبنسمى العدس الاسود العدس ابو جبة -وممكن نعمله من غير العدس الاصفر -ويطلع طعمه رائع ايضا

[SOSOLOLO]

انا مرررررررررررة عجبتنى الطريقه وهانفذها فورا وجزاكى الله خيرا

[doha]

انا مرررررررررررة عجبتنى الطريقه وهانفذها فورا وجزاكى الله خيرا

طيب كويس ومنتظرة نتيجه التجربة على احر من الجمر ياريت تثري الموضوع بيها ..

[لونا]

بصي يا ضحى أنا كنت بأعمل الكشري المصري بطريقتك دي بالضبط و لكن باختلافين اتنين:

الأول : إني مش باضيف عدس أصفر , و متهيألي ممكن يخليه معجن

التاني : هو حركة إضافة زيت تحمير البصل للأرز و المكرونة و العدس و لما جربتها طلعت رائعة فعلا فرقت كتير في الطعم

تسلم ايدك

[khiria]

tank you

[الباشمهندس ياسر]

شكرا ع الوصفة الجامده دى

[عادل أبوزيد]

حرمنا المصون خبيرة عمل الكشري في البيت  ... رغم أنها لم تذقه إلا بعد تخرجها من الجامعة والدتها بيجا كان لها تعليمات صارمة بالنسبة لمأك لات السوق رغم أنها بنت عمدة بس كانت مثقفة و تقرإ بإستمرار مجلة الدكتور.

في لندن شهد لها الجميع بالحرفية في عمل الكشري ، قرأت اليوم وصفة الفاضلة ضحى عن عمل الكشري بمذاق المحلات . الوصفة في نظري صعبة و تأخذ كثيرا من الوقت  طبعا لو حضرتك برة مصر  فأكلة الكشري تستاهل كل التعب فيها لكن هنا في مصر  عندك الكثير من المحلات بل منها ما تحول الى فرانشايز مثل "توم آند بصل" أو الإمبراطور أو التحرير بالتليفون تصل لبيتك وجبة الكشري المعتبر  و بسعر رمزي

[suma]

مساء الخير عليكم.

  رحلة جميلة فعلا مع طبق الكشري.الست تقى اخذتنا معها دون أن نقو على التنفس والكلام .تخيلتها وهي بتحكي وسمعتها أو كأني سمعت صوتها وابتسامتها وهي تخبط المغرفة في الحلة ..بل كنت منتظرة أن تغرف لي صحن ..

دي مهارة في السرد تحسدي عليها ولو كتبت قصص لن يترك القاريء القصة إلا لما يصل لنهايتها ..سلمت.

     نيجي بقى على الكشري فعلا انا كنت عايزه اعرف سر كشري المحلات ليه بنقبل عليه! وعرفنا سر الصنعة منك..شكرا لك.وأحسب أن تلك الأكله لكل منا طريقته المختلفة والتي اعتادها الاولاد في البيت ..كنت اعمله بكميات بدون العدس الاصفر لكن نفس طريقة تحمير البصل ؛ لكن الحين اكتفي بشرائه جاهزا بعدما أصبحت أنا الآكلة بمفردي.

 

           سومه