ليلة القبض على لولا

[se_ Elsyed]

مشهد داخلي لمجاميع المشرفين وهم يتسلمون جميعاً مظروفات مغلقة بالشمع الأصفر من الأدفايزر .. مرفقةً برسالة نصها كالتالي " هذه رسالة مسجلة بصوتي على سي دي .. بعد سماع الرسالة بخمس ثواني سينفجر السي دي ذاتياً .. لذا يجب الإبتعاد عن الهدف بمسافة 1500 متر على الأقل "

وكانت فحوى الرسالة " هناك إجتماع عاجل على مستوى القاعدة في المكان السري ج د أ نون تيه مربوطة وبعديها همزة عالسطر ... وذلك بتاريخ 15/3/2009 عند الساعة 325 ق م ... إنتهت "

وكالمعتاد طمع س س وعصام في السي دي وظنا انه ريرايتابل ويمكن الإستفادة منه وفضلا الإحتفاظ به .. فأنفجر في وجهيهما طبعاً ليسبب لهما حروق من الدرجة الاولى وتم نقلهما إلى مستشفى أبو الريش لتلقي العلاج ..

في يوم الإجتماع ...

أبو محمد : ما حدش عارف يا جدعان البيج بوص عايزنا في إيه ؟

سلوى : عادي يابو محمد إجتماع عشان نناقش أمور تخص المنتدى ومسيرتنا نحو مجتمع أفضل

وهنا يدخل البيج بوص محاطاً بقوات الأمن الخاصة به ..

أدفايذر : مساء الخير أيها الأفاضل ... لقد إجتمعت بكم اليوم كالمعتاد لمناقشة بعض الامور الهامة بسير العمل في الصالون ... هذا إستهلال لازم ولابد منه ... بس الأول .. مين اللي الإتنين الأفاضل اللي متربطين بالشاش وغرقانين ميكركروم دول ؟

فلانه : ده س س ومعاه عصام ... ما تاخدش في بالك .. دي حادثة بسيطة لكن ربنا سلم .. وإحنا عملنا الواجب وجيبنا لهم برتقان وبسلة .. وبقوا زي الفل .

أدفايذر : مش تحاسب يابني إنت وهو لما تيجو تعدوا الشارع عشان ما تتعوروش .... المهم .. أنا شايف إننا لازم نضُخ دماء جديدة في شرايين فريق الإشراف بالصالون .

س س : أبوس إيدك بلاش سيرة الدم والشرايين أحسن أنا أستويت ...

أدفايذر : وشايف كمان إن باب الشعر والأدب والحركات محتاج تنشيط ... خصوصاً أن عندنا عجز في الشعر العمودي .. لذا أقترح عليكم ترشيح الفاضلة لولا لتلك المهمة ... فهي فتاة ألاحظ عليها النشاط والحيوية والإتزان العقلي والنفسي .. كما انها تتمتع بالنزاهة والشفافية .. موافقون ؟

المجاميع : موافقون ... وعلى بركة الله

أدفايزر : إذاً فلينطلقا الفاضلان س س وعصام لكي يُحضراها إلى مقر الإجتماع السري على وجه السرعة حيث أنني على عجلة من امري .

وينطلق س س وعصام كلا بتوك توكه ليُحضرا الفاضل لولا التي كانت تجلس كعادتها تحت ظلال الزيزفون تُقرض الشعر وتُنظم الأزجال وبالمرة تقشر الكوسة وتنقي الرز عشان ما تتأخرش في عمايل الغدا .. وفي ذلك اليوم كانت لولا في حالة تجلي حيث أن وجبة الغداء كانت تشتمل على لحمة بتلو وشوربة باللمون ... فكانت تكتب قصيدة عصماء بعنوان " مرثية طائر البطريق "

وكان مطلعها يقول :

أتذكر يا حبيبي حين كنا على الطريق

أتذكر مأساة طائر البطريق .

حينها .. شب في قلبي حريق .. كأنني ضُربت بمنجانيق .

تلك هي يا حبيبي مأساة طائر البطريق ..

وحينما أستمع عصام إلى مطلع القصيدة أنخرط في البكاء .. وتدخل س س ليُهديء من روعه :

س س : مالك يابني ؟ إيه الواوا بتوجعك ؟

عصام : حرام حرام ... دكر بط يبقى ماشي في حاله في الطريق ... ليه يعملوا فيه كده ؟

س س : فين دكر البط ده ؟

عصام : مانتاش سامع يابني ؟ لولا بتقول إنها كانت ماشية عالطريق وفي دكر بط ريق معدي فناس زقلته بالطوب وعورته ..

لولا : إيه ده ؟ إنتو مين وإزاي تقتحموا عليه خلوتي بالمنظر ده ؟

س س : معاكي اللواء س س مسئول أمن المحاورات .. وده الشاويش عصام المساعد بتاعي .. إنتي لولا الحمزاوي ؟

لولا : لأ .. أيوه ... أنا .. بس رُخصي سليمة يا باشا والمثلث معلقاه في المرايا .. ومعايا شنطة وكتاب الله مليانة شاش وقطن وجركن ميكركروم ..

عصام : رُخص ومثلث إيه ؟ وإنتي شايفانا واقفين في لجنة على الدايري ؟

س س : يا مدام لولا إنتي مطلوبة حالاً عند البيج بوص .. فاتفضلي معانا من غير شوشرة .. ومش عايزين أي شاعر ياخد باله إن قوات امن المحاورات بتُلقي القبض عليكي .

لولا : طب أنا عملت إيه ؟ طب ممكن اتصل بجوزي يشد لي محامي وييجي ورايا عالقسم ؟

س س : لأ مش ممكن ... لإن هما كلمتين وهاتروحي بيتكو معززة مكرمة سريع سريع ...

لولا : ربنا يُستر ..

وينطلق الجميع بالتكاتك صوب المقر السري ... ثم يدلفا – حلوه يدلفا دي – إلى غرفة الإجتماعات التي كانت غارقة في الظلام إلا من مصباح مُسلط على وجه الأدفايزر ..

أدفايزر : مرحباً بالفاضلة لولا في مُجمع إدارة صالون المحاورات .

لولا : حنحن صفصف ... بسكويت كوكوكو ..

أدفايزر : نعم ... بتقولي حاجه ؟

لولا : بأقول الله يسلم سعادتك يا باشا ..

أدفايزر : إيه يابني أدم إنت وهو ده ؟ فكوا الكلابشات من إيد الفاضلة لولا وأرفعوا العصابة السوداء عن نظارتها .. إنتو مش هاتنسوا أبداً إنكو كنتو مخبرين قبل كده ؟

عصام : ماحنا خوفنا أحسن تجري وتهرب مننا يا باشا فقولنا نأمن المسائل ..

أدفايزر : إحنا مراقبينك من زمان يا لولا وعارفين كل نشاطاتك .....

لولا مقاطعة : وكتاب الله كنت عارفه ومتأكده .. لإن مافيش جريمة كاملة .. بس والله والله أنا ما ليه ذنب يا جناب الأدفايزر .. وحيث كده بقى أنا هاعترف بكُلش حاجة ... حضرتك أنا قاعدة في مرة في حالي لقيت رسالة خاصة من فتفوته بالتأكيد عارفينها ولها عندكو ملف طبعاً ؟ ... وكانت بتطلب مني حضرتك وصفة " الكوبيبة الشامي " فقلت لها المكونات عبارة لحمه مفرومة وبرغل ودقيق ... ونكعور الحاجات كعاوير كعاوير ونقليها في الزيت .. تقوم هي حضرتك تكسل وتعمل الكوبيبة من غير لحمة تقوم تحصل لها مشاكل عائلية وكدهوت تقوم تبعت لي تاني وتزعق لي وتقولي إنتي السبب .. طب حضرتك هو أنا مغسلة وضامنه جنه ؟ ولا أنا قلت لها تعمل الكوبيبة من غير لحمه ؟

أدفايزر : كوبيبة إيه وفتفوته مين ؟ ... مين الست دي ؟

س س : هديئي من روعك يا فاضلة لولا وركزي في كلام الأدفايزر وبلاش مقاطعة ..

أدفايزر : يا فاضلة لولا أنا عايز اقولك إن البلد في مرحلة حرجة ... مصر في حالة مخاض يا لولا ....

لولا مقاطعة مرة أخرى : والله العظيم ماحد قال لي ... وبعدين حضرتك أنا باكتب شعر ونثر وقصة وحاجات من دي .. فالنسا والولادة مش تخصصي .. طب اعمل إنا إيه دلوقت ؟ أجري أسخن ميه .. ولا أروح أنده الدايه .. طب دلوني يا ناس انا مخضوضة ومتلخبطة ؟

أدفايزر : اللهم طولك يا روح ... يا ست إنتي إسمعي للاخر ... عايز أقول لك إن مصر محتاجاكي يا لولا ..

لولا : وانا رقبتي سداده يا محسن بيه .. قصدي يا أدفايزر بيه ... بس حضرتك انا ماقدرش أسافر لوحدي وأسيب جوزي

أدفايزر : تسافري فين ؟ ومين قالك إنك هاتسافري ؟

لولا : مش حضرتك قولت لي مصر محتاجاكي ؟ وأنا عارفه هاتكمل وتقولي إنكو هاتبعتوني إسرائيل عشان أتزرع هناك وأبقى جاسوسة وأجيب لكم أخبار المنتديات التانية وكدهوت ..

أدفايزر : إيه الأفلام الهندي اللي بتحكيها دي ؟ يا ستي أنا بأقولك محاورات المصريين محتاجاكي .. وإنتي هاتبقي مُشرفة ومتخصصة في الشعر العامودي ... فيها حاجة دي ؟

وهنا ينظر الأفدايزر بغضب إلى ساعاته الميقاتية ويقول : أنا لازم أمشي دلوقت يا ولاد .. حيث إن لدي إجتماع هام لعموم المنتديات والصالونات الثقافية العالمية في ولاية نيوجيرسي كمان ساعتين .. ولازم ألحق الديزل ... وإنتو إبقوا إشرحوا الباقي للفاضلة لولا ..

وهنا تُضاء قاعة الإجتماعات وترى لولا للمرة الأولى – والأخيرة – الوجوة الحقيقية لفريق الإشراف المُلقبون بـ " أشاكيف الأسفلت " فتصاب بالخضة وتقول : يا نهار يا نهار .. إيه ده ؟ ده أنتو زينا اهو ومن لحم ودم وحاجات تانية فوق بعضها ...

أسد : أومال كنتي فاكرانا كائنات فضائية ؟

لولا : لأ . بس حضرتك أنا كنت فاكراكو يعني أقصر واحد فيكو طوله مترين .. ووشكو مدور وبيشع نور .. ولابسين أبيض في أبيض وكدهوت ..

فلانه : ليه .. إحنا شغالين في مولد ؟

سلوى : إسمعي يا لولا يابنتي .. أنا مش عايزاكي تتغيري عن لولا الرقيقة المجاملة الإنسانة .. حتى لما تأذي حد أو تعاقبية .. يبقى بحنيه من غير ما يحس

لولا : إزاي ؟ يعني قبل ما أدي حد إنذار أروح مخدراه الأول عشان ما يحسش ؟

س س : الست دي هاتتعبنا وانا ميلأول كنت معترض عليها وعارف إن قلبها رُهيف زي قلب الخساية ومش هاتسد في شغلانيتنا دي

أبو محمد : أصبر يا س س وخلينا نديها فرصه قد شهر أو إتنين تُثبت فيها جدارتها ..

لولا : قول له يا أونكل والنبي ؟ أنا أفوت في الحديد يا س س بس أنا أتراستأ واخد فرصتي ..

سلوى : طب قومي إتفضلي على أوضة الكرار عشان تستلمي الأفارول وعدة الشغل وبالمرة غيري تسريحة شعرك ولميه بأستك من ورا .. مش معقول مشرفة أشكيفية تكون عامله كاريه ..

لولا : فُريره يا مدام سلوى يا عسل .. وبكره تقولوا إننا ما خلفناش غير لولا ..

تمت

وإلى اللقاء مع فيلم الصيف " يوميات لولا في ساعة القيلولة "

[Virus]

قاااااادر يا س س... :ninja:

ياويله وسواد ليله اللي يقع تحت إيدك :sad:

أنا ضحكت ضحك يكفيني العشر سنين الجاية

:sad:

[~Heba~]

:sad: :wub: :P :D

مش مممكنننننننننننننن

ملكشى حل يا سى السيد

فلانه : ده س س ومعاه عصام ... ما تاخدش في بالك .. دي حادثة بسيطة لكن ربنا سلم .. وإحنا عملنا الواجب وجيبنا لهم برتقان وبسلة .. وبقوا زي الفل .

بسلة يا سى السيد

بسلة :ninja:

هو انت عارف انى بحبها :sad:

[زهرة الجبل]

:ninja: :) :sad:

وكان مطلعها يقول :

أتذكر يا حبيبي حين كنا على الطريق

أتذكر مأساة طائر البطريق .

حينها .. شب في قلبي حريق .. كأنني ضُربت بمنجانيق .

تلك هي يا حبيبي مأساة طائر البطريق ..

وحينما أستمع عصام إلى مطلع القصيدة أنخرط في البكاء .. وتدخل س س ليُهديء من روعه

:sad: :wub: :) :P :D

أخي الفاضل سي السيد

بجد ما شاء الله على ملكة الفكاهه التي تمتلكها و تطوعها في السرد بهذا التمكن

لا أذكر مره قرأت لك فيها موضوع و لم أضحك

أضحك الله سنك و أدام عليك هذه النعمه التي يغبطك عليها الكثيرون .. و أنا اولهم

تحياتي

أم كريم

[مغتربة]

مش ممكن يا سين سين بجد انت فظيع اسلوبك هايل جدا جدا يموت من الضحك

ربنا يديم عليك هذه الملكه الجميله و تتحفنا دايما باسلوبك المميز ده

[أبو محمد]

أعزائى الأشاكيف الزرق

أنا قلتلكم الجدع ده ما يتسبش لوحده أبدا ..

جالكم كلامى ؟ .. أهو دلوقت الناس حتفتكر إن احنا بنى آدمين زينا زيهم .. وممكن نبتسم ، وممكن كمان حد متطرف منهم يفتكر اننا كمان بنعرف نضحك

إقبضوا عليه .. أريده حيا :ninja:

[jessika]

مش ممكن يا استاذ س س اسلوبك اكتر من رائع فعلا حقيقى ضحكت جدا استمرررررررررر وياريت تعمل باب خاص بحكاياتك المشوقة دى :ninja:

[moheltohamy]

يااااه يا سين سين... بجد المسرحيّة دي توووحفة :sad:

دمها خفيف ، بدون ابتذال ، وابتسامة رشيقة ، مع انسياق الكلمات...

تسلم إيديك بجد... :ninja:

[se_ Elsyed]

أيها الأدباء الشبان ... تشكرات على تشجيعكم والحمد لله إن الكصة عجبتكم

جالكو كلامي ؟!!

أدي لولا أهي .. مجرد دور واحد في السيما ومن أول بطولة لا عايزة تعبرنا ولا تدخل تبل ريقنا بكلمة حلوه ... وسمعت إنها جابت نضارا شمس واجرت عربية أفيو وماحدش عارف يكلمها دلوقت وماشية تقول يا أرض إتهدي انا مُشرفة وماحدش أدي ...

ماشي يا لولا .. ده على كده لو بقيتي في يوم أدفايزورايا .. ده انتي ممكن ساعتها تمسكي رشاشات وتضربينا بالنار .. أو تاخدي كام واحد أسير وتعمليهم هامبورجر ..

ماشي يا زمن ..

ووالله يا زمن لا بإيدينا .. زرعنا التين الشوكي .. ولا جنينا ..

[ام بودى]

عرفتك وانا اقول الاسلوب دة مش غريب عليا يوسف معاطى وسطينا ومسمى نفسة س س اية اخبار السيما يا ريس مش عايزين وجوة جديدة انا بعرف اقلد يوسف وهبى ويوسف شعبان الاتنين فى نفس واحد :rolleyes:

[شاب مصري]

يا س س انت فزززززززييييييييييييع :rolleyes:

[alsaher]

جامده يا أستاذ س س

بجد أنا وأنا بأقرا أسلوبك المرح بأبقى مش قادر أمنع نفسي من الضحك

ربنا يديم عليك إبتسامتك

أدي لولا أهي .. مجرد دور واحد في السيما ومن أول بطولة لا عايزة تعبرنا ولا تدخل تبل ريقنا بكلمة حلوه ... وسمعت إنها جابت نضارا شمس واجرت عربية أفيو وماحدش عارف يكلمها دلوقت وماشية تقول يا أرض إتهدي انا مُشرفة وماحدش أدي ...

انا سمعت إنها بتدور بودي جارد :ph34r:

بس مش مصدق

لولا تعمل كده :rolleyes:

[د هشام ابراهيم]

الفاضل سي السيد ..أضحك الله سنك ....اتفق مع الجميع موهبة و خفة دم متميزين فعلا ....ألف شكر

[Handasah]

جزاك الله خيرا يا س س :rolleyes: :lol: على رسم الابتسامة الدائمه على شفاه اعضاء المحاورات جميعا النابعة من خفة دم حقيقية ومتميزة وربنا ميحرمنا منها

[لولا]

أدي لولا أهي .. مجرد دور واحد في السيما ومن أول بطولة لا عايزة تعبرنا ولا تدخل تبل ريقنا بكلمة حلوه ... وسمعت إنها جابت نضارا شمس واجرت عربية أفيو وماحدش عارف يكلمها دلوقت وماشية تقول يا أرض إتهدي انا مُشرفة وماحدش أدي ...

ماشي يا لولا .. ده على كده لو بقيتي في يوم أدفايزورايا .. ده انتي ممكن ساعتها تمسكي رشاشات وتضربينا بالنار .. أو تاخدي كام واحد أسير وتعمليهم هامبورجر ..

ماشي يا زمن ..

ووالله يا زمن لا بإيدينا .. زرعنا التين الشوكي .. ولا جنينا ..

ايه ده ايه دا :lol:

ليه بس كده يا اونكل س س .. دا انا والله كنت مش عارفه اقولك ايه على التحفه الفنيه الهايله دى .. بجد بجد بجد ابدعت ياذوق وتفوقت على نفسك :lol:

وفعلا كانت احلى حاجه قريتها النهارده بجد وقلت ارد عليك لما ارجع البيت بس النوم سلطان يا عم :rolleyes:

انما انا اتبهدلت آخر بهدله فى الكصه دى يا سى السيد wst::

ولى عوده على كل التسيح اللى انتا عمال تسيحه دوت :winner:

اروق بس وارجعلك يا ابو المعاطى

[لولا]

جامده يا أستاذ س س

بجد أنا وأنا بأقرا أسلوبك المرح بأبقى مش قادر أمنع نفسي من الضحك

ربنا يديم عليك إبتسامتك

أدي لولا أهي .. مجرد دور واحد في السيما ومن أول بطولة لا عايزة تعبرنا ولا تدخل تبل ريقنا بكلمة حلوه ... وسمعت إنها جابت نضارا شمس واجرت عربية أفيو وماحدش عارف يكلمها دلوقت وماشية تقول يا أرض إتهدي انا مُشرفة وماحدش أدي ...

انا سمعت إنها بتدور بودي جارد :lol:

بس مش مصدق

لولا تعمل كده :rolleyes:

معليش يا ساهر يا خويا .. المرحله الجديده تحكم بردو :lol:

[الباشمهندس ياسر]

معليش يا ساهر يا خويا .. المرحله الجديده تحكم بردو :rolleyes:

مكنش العشم يا امال

[لولا]

معليش يا ساهر يا خويا .. المرحله الجديده تحكم بردو :lol:

مكنش العشم يا امال

الحمدالله انك بتكلم امال .. مش لولا :rolleyes:

[Modest]

الموضوع ده يا لولا أنسب موضوع علشان تبدئي حياتك العملية كمشرفة .. مش هانلاقي احسن من سين سين علشان نجرّب فيه :lol:

ماهو مش معقول يعني يجيبوكي الاجتماع راكبة توك توك ... ده غير إنهم اقتحموا خلوتك و انتي بتنقي الرز تحت ظلال الزيزفون .. ماسموش كلام ده :sad:

ياللا ادخلي امسحي له كام كلمة و لو تديله إنذار يبقى كتر خيرك

[سهران]

وآدي أول بلاغ للأخت لولا ..... انقذينا من خفة دم الراجل اللي أسمه سين سين دهوت mfb: .... مضيه على أقرار فورا ما يكتبش أي مداخلات أثناء دوامنا الرسمي ..... بنقعد نضحك في مكاتبنا زي المجانين mfb: و بنلم علينا الخلايق من كل الجنسيات و الملل و النحّل ....

عاوز يكتب يتوكل على الله بعد الدوام ....... و نبقى نضحك في بيوتنا و نخلي الطابق مستور لكن في أماكن أكل العيش مش هاينفع mfb: mfb: ............ حرصا على الصالح العام أخبطيه أنذار شديد الأصفرار رأفة بالمحاورين mfb: .... و اهو بالمرة يبقى كارت أرهاب لباقي المحاورين علشان ضربتك جت في واحد من الروس الكبيرة .

تم تعديل 18 مارس 2009 بواسطة سهران