إستفسار حول إنهاء الخدمات

[abueldahab]

السلام عليكم ورحمة الله وبركاته

في الحقيقة كان عندي أكثر من إستفسار بس بعد قراءة بعض الموضوعات والردود بالمنتدى الحمد لله وجدت الرد وفاضل بعض الإستفسارات الأخرى معلش انا هطول في المقدمة لأني محتاج رأيكم أعمل إيه وخاصة من الأستاذ الفاضل سي السيد والأخ أسد

انا أعمل بالمملكة العربية السعودية منذ حوالي سنة و8 شهور تعاقدت مع المؤسسة الي انا جاي علي كفالتها على اني هكون مدرس حاسب آلي براتب 2200 ريال والسكن عليهم بس مفيش بدل انتقال لانهم المفروض هيوفروه ولما جيت السعودية وجدت انه مفيش بدل ومفيش وسيلة انتقال وأغلب الوقت كنت اذهب للعمل مشياً في درجة الرطوبة العالية جدا الموجودة بالمنطقة الشرقية ومفيش حد بيقلك انت فين مع الشكاوي الي بتقدمها عموما المفروض كنت أشتغل مدرس حاسب في المدارس الخاصة بيهم لقتهم وزعوني نظراً لخبراتي على معهد التدريب الخاص بيهم واشتغلت لمدة تلت شهور كمدرب حاسب آلي وبعدها رقوني كرئيس لقسم الحاسب بالمؤسسة بس طبعا ترقية ومسئوليات أكبر بدون زيادة في الراتب وكان الوضع مقبول إلى حد ما وتم إعارتي لمدة شهر للعمل في شركة ساسرف ( مصفاة أرامكو شل ) وبعدها رجعت المؤسسة تاني وكنت كاتب إستقالتي عشان الراتب القليل جدا الي بتقاضاه نظرا للخبرات والأشياء الي بقدمها وساعتها وعدوني وعود كتير بتغيير الراتب واعطائي سكن عائلي لآني كنت نازل اتزوج واعطوني عربية وقتها لأنهم كانوا في حاجة ليا وانا كنت مُصر أنزل مصر

نزلت تزوجت والحمد لله من اربع شهور ورجعت وعملت استقدام لزوجتي وموجودة معي الآن وساعة ما طلبت بدل السكن الي وعدوني بيه نظراً للارتفاع الرهيب فيه الإيجارات في مدينة الجبيل مأوفوش بوعدهم ولم تتم أي زيادة في الراتب بالاضافة لم يصرف لي أي عمل إضافي طوال هذه الشهور

وانا قدامي فرص تانية كتير بس كنت برفض او بخاف عشان موضوع عدم الممانعة ولكن الحمد لله من خلال قراءاتي هنا عرفت انه اتلغي ضمنيا وكذلك مفيش قلق من موضوع البصمة

حاليا المعاملة سيئة جدا جدا وكل حاجة اتغيرت بعد ما عملت استقدام لزوجتي ومش عارف اعمل معاهم ايه بالاضافة إني بعد الأجازة مسكوني ادارة شركة حاسب أسستهالهم قبل ما انزل وفتحتها بعد ما رجعت وبقي في زمتي عهد كتير وكل يوم أخاف يعملوا شيئ او يلفقوا اي شيئ بحيث يطلعوا عليا فلوس عشان اسكت ومطلبش زيادة في الراتب

انا أسألتي هلخصها في النقاط التالية

1- إزاي أحمي نفسي من موضوع المسئولية ولأن مفتاح الشركة مش معياا لوحدي والحمد لله راجعت الحسابات وعملت جرد والموجود أكبر من رأس المال لآنه فيه ربح خلال الشهرين الي فاتوا لما فتحت الشركة

2- تكاليف الإقامة وتجديدها حيث تم خصم 1500 ريال مني لتجديدها سنتنين فهل المفروض الفلوس دي عليهم ولا عليا وهل من حقي أطالبهم بيها ولا لا وثابت في كشوف المرتبات انهم كانوا بيخصموا مني 200 ريال شهرياً

3- بالنسبة لمستحقاتي انا وصلت المملكة 4/7/2007 وبعد شهر مضوا معياا عقد تاني صوري عشان إعتمادي كمدرب في المؤسسة العامة للتدريب التقني والمهني من تاريخ 1/8/2007 أجازتي كانت المفروض في 4/7/2007 مع ان في العقد الي مضيته في مصر كان سنة هجربة وليس ميلادية وليا شهر اجازة مدفوع الأجر انا حصلت علي شهر الأجازة بتاعي ونظرا لظروف العمل طلبوا مني أأجل سفري لشهر 10 عشان الشغل وكان مديري المباشر نازل اجازة وكان لازم احل مكانه نزلت الأجازة في 28\09\2008 ورجعت في 18/11/2008

لو فرضنا اني انهيت العمل معهم الآن وطبعا انا مش هعمل كدا اني اقدم استقالتي لأني كدا هتنازل عنها ولكن انا أعرفهم مجرد ما أطالبهم بحقوقي هيتلككوا ويمشوني وعملوا كدا مع اتنين زملاتي غيري مجرد ما طالبوا بحقوقهم ونسب من الآرباح لأن دا الي متفق عليه ووعدوا بيهم مشوهم ووصلوهم لمرحلة إنهم يتنازلوا عن أي شيئ في سبيل يمشوا

ايه هي مستحقاتي المالية خلال مدة العمل سنة و 8 شهور او سنتين لو فرضنا اني كملت ل 1/7 الي جاي ان شاء الله مع العلم اني صرف لي بدل سكن بداية من 1/1/2009 ومضوني على ورقة انه دين وسلفه وفي حالي خروجي أردلهم الفرق

اجمالي راتبي 2700 ريال شامل بدل السكن

4- في حالة اذا كانت الإقامة عليهم ورفضوا يدوني فلوسي الي اخدوها مني هل أرفع عليهم قضيه في مكتب العمل

5- هما بيمضوا اي حد ماشي على انه ميجيش المملكة او المدينة الي هو فيه تلت سنين حسب رعبتهم ناس مضوهم انهم ميجوش المملكة لمدة 5 سنين وناس 3 وناس تانية ميجوش مدن بعينها تلت سنين لو رفضت أمضي هل فيه مشكلة في كدا

6- ازاي اخد منهم إخلاء طرف اني عملت معاهم في الفترة من كذا الي كذا لانهم بيرفضوا يدوا لحد إلا لما يمضيلهم علي مخالصة انه استلم كل حقوقه بدون ما يكونوا صرفوا ليه ريال وبعد كدا بيدولوا اي حاجة ومش من حقه يتكلم

7- كيفية الخروج من هذه الأزمة وانا كان بيتعرض عليا شغل كتير برواتب ضعف راتبي وكنت هرجع تاني ساسرف اشتغل هناك وهما بياخدوا نسبتهم بس رفضوا يسبوني وقالولي انت لا احنا محتاجينك هنا ومع ذلك لم تتم أي زيادة في الراتب مع العلم انهم ليهم موظفين هناك وبياخدوا نسبة من رواتبهم

8- هل في القانون شرط معين لزيادة راتب العامل ولا المرتب الي الواحد جاي عليه من مصر بيفضل عليه ومفيش قانون بالزيادة بنسبة معينه كل عام

9- لما كنت مقدم استقالتي في شهر 7 الي فات كانت على ورق رسمي ولكن لما طلبوا مني اتراجع عنها لم اتراجع عنها كتابياً هل فيه ضرر عليا من دا بحيث انهم يقولوا انه مقدم استقالته ؟ ولا لا لاني استمريت بعدها 3 شهور ونزلت اجازة ورجعت من 4 شهور

10 - تنصحوني أبدأ أدور على فرصه عمل أفضل من دلوقتي وهل من حقي آخد إخلاء طرف منهم بالمدة الي اشتغلتها زي ما بيمضوني اخلاء طرف ناحيتهم من كل شيئ

11- لو رفضوا يدوني اخلاء طرف (شهادة خبرة وليس عدم ممانعة لأنها المفروض اتلغت ضمنيا حسب ما فهمت ) وقدمت شكوى في مكتب العمل هل هاخدها رغماً عنهم ولا لازم موافقتهم والي قصادها هيمضوني على أوراق واني مجيش الا بعد تلت سنين

انا عارف اني طولت بس ربنا عالم ان الواحد مبينمش من التفكير ومش عارف أعمل ايه

وجزاكم الله خيراً

تم تعديل 17 مارس 2009 بواسطة abueldahab

[abueldahab]

السلام عليكم

للرفع وطلب المشورة

[se_ Elsyed]

الله يكرمك إختصر النقاط اللي عايز تستفسر عنها وطلباتك غيه عشان نقدر نفيدك .. الموضوع أطول من اللازم .

[abueldahab]

السلام عليكم اعتذر عن الإطالة وهحاول اختصر أسألتي

انا أسألتي هلخصها في النقاط التالية وأشيل الي قدرت اعرف اجابته

1- تكاليف الإقامة وتجديدها حيث تم خصم 1500 ريال مني لتجديدها سنتنين فهل المفروض الفلوس دي عليهم ولا عليا وهل من حقي أطالبهم بيها ولا لا وثابت في كشوف المرتبات انهم كانوا بيخصموا مني 200 ريال شهرياً

2-ايه هي مستحقات نهاية الخدمة خلال مدة العمل سنة و 8 شهور او سنتين لو فرضنا اني كملت ل 1/7 الي جاي ان شاء الله مع العلم اني صرف لي بدل سكن بداية من 1/1/2009 ومضوني على ورقة انه دين وسلفه وفي حالي خروجي أردلهم الفرق واجمالي راتبي 2700 ريال شامل بدل السكن

3- هما بيمضوا اي حد ماشي على انه ميجيش المملكة او المدينة الي هو فيه تلت سنين حسب رغبتهم ناس مضوهم انهم ميجوش المملكة لمدة 5 سنين وناس 3 وناس تانية ميجوش مدن بعينها تلت سنين لو رفضت أمضي هل فيه مشكلة في كدا

4- ازاي اخد منهم شهادة خبرة اني عملت معاهم في الفترة من كذا الي كذا لانهم بيرفضوا يدوا لحد إلا لما يمضيلهم علي مخالصة انه استلم كل حقوقه بدون ما يكونوا صرفوا ليه ريال وبعد كدا بيدولوا اي حاجة ومش من حقه يتكلم وهل من حقهم يحطوا أي وظيفة عاوزنها في شهادة الخبرة

5- هل في القانون شرط معين لزيادة راتب العامل ولا المرتب الي الواحد جاي عليه من مصر بيفضل عليه ومفيش قانون بالزيادة بنسبة معينه كل عام

6- لما كنت مقدم استقالتي في شهر 7 الي فات كانت على ورق رسمي ولكن لما طلبوا مني اتراجع عنها لم اتراجع عنها كتابياً هل فيه ضرر عليا من دا بحيث انهم يقولوا انه مقدم استقالته ؟ ولا لا لاني استمريت بعدها 3 شهور ونزلت اجازة ورجعت من 4 شهور

7- المفروض عقدي بيتجدد سنويا وهينتهي في شهر 7 الي جاي لو كتبت ورقة رسمية اني مش عاوز أكمل معاهم هل يعتبر دا إستقاله ؟

وجزاكم الله خيراً

تم تعديل 18 مارس 2009 بواسطة abueldahab

[se_ Elsyed]

السلام عليكم اعتذر عن الإطالة وهحاول اختصر أسألتي

انا أسألتي هلخصها في النقاط التالية وأشيل الي قدرت اعرف اجابته

1- تكاليف الإقامة وتجديدها حيث تم خصم 1500 ريال مني لتجديدها سنتنين فهل المفروض الفلوس دي عليهم ولا عليا وهل من حقي أطالبهم بيها ولا لا وثابت في كشوف المرتبات انهم كانوا بيخصموا مني 200 ريال شهرياً

لو اشتكيتهم في مكتب العمل واثبتت ذلك هاينفخوهم .. لان اي تكاليف مترتبة على تعيني الموظف بيتحملها الكفيل ... انت ليه ما قرأتش قانون العمل ؟

2-ايه هي مستحقات نهاية الخدمة خلال مدة العمل سنة و 8 شهور او سنتين لو فرضنا اني كملت ل 1/7 الي جاي ان شاء الله مع العلم اني صرف لي بدل سكن بداية من 1/1/2009 ومضوني على ورقة انه دين وسلفه وفي حالي خروجي أردلهم الفرق واجمالي راتبي 2700 ريال شامل بدل السكن

نص شهر راتب عن كل سنة ... واحسب بقى الكسور كمان .. لو ماضي انها سلفه تبقى سلفه

3- هما بيمضوا اي حد ماشي على انه ميجيش المملكة او المدينة الي هو فيه تلت سنين حسب رغبتهم ناس مضوهم انهم ميجوش المملكة لمدة 5 سنين وناس 3 وناس تانية ميجوش مدن بعينها تلت سنين لو رفضت أمضي هل فيه مشكلة في كده

يبلوا الورق ده ويشربوا ميته .. الموضوع ده اتلغى خلاص الا لو كنت راجع واشتغلت عند حد منافس لهم وسببت لهم ضرر واثبتوا الضرر ده

4- ازاي اخد منهم شهادة خبرة اني عملت معاهم في الفترة من كذا الي كذا لانهم بيرفضوا يدوا لحد إلا لما يمضيلهم علي مخالصة انه استلم كل حقوقه بدون ما يكونوا صرفوا ليه ريال وبعد كدا بيدولوا اي حاجة ومش من حقه يتكلم وهل من حقهم يحطوا أي وظيفة عاوزنها في شهادة الخبرة

شهادة الخبرة حق من حقوق وممكن تشتكيهم في مكتب العمل انهم رفضوا يعطوها لك

5- هل في القانون شرط معين لزيادة راتب العامل ولا المرتب الي الواحد جاي عليه من مصر بيفضل عليه ومفيش قانون بالزيادة بنسبة معينه كل عام

لأ طبعاً مافيش حاجه زي كده

6- لما كنت مقدم استقالتي في شهر 7 الي فات كانت على ورق رسمي ولكن لما طلبوا مني اتراجع عنها لم اتراجع عنها كتابياً هل فيه ضرر عليا من دا بحيث انهم يقولوا انه مقدم استقالته ؟ ولا لا لاني استمريت بعدها 3 شهور ونزلت اجازة ورجعت من 4 شهور

استمرارك معناه رفض الاستقالة ومافيش مشاكل في كده

7- المفروض عقدي بيتجدد سنويا وهينتهي في شهر 7 الي جاي لو كتبت ورقة رسمية اني مش عاوز أكمل معاهم هل يعتبر دا إستقاله ؟

لأ ده يعتبر نهاية عقد .. وكفاية احسن تعبت

وجزاكم الله خيراً

[abueldahab]

السلام عليكم

جزاكم الله خيراً وربنا يريح قلبك زي ما ريحت قلبي